PRESS RELEASE
NO.46/2026
SIAHA, 06 Chhiepa, 2026 (Pachynoh): Zâhnia târi 05.06.2026 dawh 1:00 PM khata Community Hall, Laki liata Laki Bia, Ambulance Delivery Programme ahmâhpa châ ta, he programme he Puhpa T. Seido, EM i/c Sports, MADC, Puhpa Beirahmô Syhly, EM i/c RD, MADC nata Puhpa Beihu Nôhro, Deputy Chief Whip, MADC zy ta amâ hmâkhei.
Laki biatuhpa Puhpa T. Seido, EM i/c Sports, MADC chata a bia Laki bia liata ypazy tlâhlei daihti liata ama hmâh awpa Ambulance a chaleipa ei.
Programme he Puhpa HC. Rabei, VCP, VC-1, Laki ta chhihtha ta, Machâ T. Tluatha, ECM Laki Vaihpi ta Abeipa lâta pavaosana thlahchhâna a hnei.
Puhpa T. Seido, EM, MADC chata, “Atanoh he programme ahmâh thei awpa ta tlâhna nata daihti phapa miah pietuhpa Khazohpa hnohta alynabie reih na ta, Laki bia tawhta MDC Term 2 na patloh ei chi ta, ei châ ly hmeiseih ei,” a tah.
“12 Term MADC, Puhpa M. Laikaw, CEM, MADC chhihthana ry liata, byhnâ hluhpi to pi ta, Sôh lâchhâh rairunazy atyh tyh hra ei sih la, Kô 2022 pa tawhta MDC LAD fund a vaw pachô hnolo na ta, atakô Bia zawpi châta Ambulance eima vaw hnei theipa he, keima siana nata theina vâta châ leipa ta, Bia zawpi thlahchhâkheina nata khopasana Abeipa ta byhnâ miah a piepa vâta, he Ambulance he hnei theipa eima châ.”
“MADC liata sôh a chyhzie cha pahno khai thlâh ha ei chi ta, chata a châna chôta, sôh vaw pachô hualua na ta ei bia Laki bia liata ypazy tlâhlei daihti liata he Ambulance hmâpa ta khihpi lai viapa Siaha, etc zy nama pangai n’awpa châta Ambulance ei vaw chalei theipa he aly kaw na ta, keima mo pakha ei thei kaw vâ, châ tiarâh leipa ta, Khazohpa ngiachhiena vâ nata Khazohpa ta eina bao vâ a châ.”
“Atahmâ cha tlâhleina vâta Siaha, Lôlei, Aizawl siekhei byuhpazy cha, he Bia Zawpi Ambulance hmâpa ta siekhei thei ha bâ aw pi ta, Zawpi rairuna chhao pathlâpa a châ ha bâ aw.
Zawpi chhao ta he Ambulance he eima eih a châpa pahnona chôta, chado chyu awpa deikua eimâ chhuah awpa a châ. Abeipa ta he Ambulance he Zawpi châta tlâhna byhnâ a châ cheingei nahta khâchâ ei ngiapâ.”
“Tlohleina, sialeina hluhpi hnei hr’aw sala, Laki bia liata zawpizy ta na deichhy ei chi ta, na bao ei chi ta, kei a tlohleipa nata sialei chaipa he Laki bia châta nâ tlyhpatloh ei chi ta, MADC liata EM châ thei awpa ta na padua ei chi ta, tha na patlô ei chi ta, aly hmeiseih na ta, nâmo ta na deichhy ei chi ta, kei chiehlei kawpa tha na patlô ei chi ta, Laki bia liata ypazy châta Ambulance ei vaw chalei theipa he nâmo deichhyna vâ nata tha eina patlô vâ ei chi ta, a chalei theipa ei châpa vâta nama zydua hnohta Abeipa Zisu Krista mohta alybabie ei cha hlâ chyu ei,” tahpa ta Laki biatuhpa ta pasyunabie pha kawpa a reih.
Puhpa Beirahmô Syhly, EM i/c RD, MADC chhaota biereina hnei hra ta, Ambulance he MLA zy deita ta ama chalei theipa nata, tao theipa hawhta vaw pachâ tyh pi ta, Puhpa T. Seido, EM, MADC ta a bia Laki bia liata ypazy tlâhlei daihti liata khihpi lai viapa Siaha, etc pangai para n’awpa châta a vaw chalei thei thlâhpa he noâh chhao achhih ta, alypa a châ hmeiseih.
“Eima pahno chyupa hawhta MADC liata la sôh hluh leipa ta, sôh chyh kaw ta, eima bia chyu liata ypazy ama tlâhlei daihti nata rairuna nano nanopa liatazy eima theina rakhata liata baokhâ tyh pi ta, sôh a chyh tupa vâ heta, miah akhi thai tyh leipa ta, cha hawhta a châ nota, Puhpa T. Seido, EM ta a bia châta Ambulance a vaw chalei thei thlâhpa he la, aly â chhih kaw raohpa ta, noâh chhao â chhih hmeiseih ta, a taopha tah hmeiseih na ta, a bia zawpi kyh a pachâ hmeiseih,” tahpa ta EM i/c RD, MADC ta biereina pha kawpa a hnei.
Laihsa Priscilla Nôtlia ta pahnie kawpa ta hlasapa ta zawpi a palôhpahawh.
Puhpa T. Seido, EM, MADC chata Pihnô M. Thenô, VCP, Ahmypi hnohta Ambulance châhbi (key) a hlâ.
Pihnô HC. Anana, VCP, Khôpai, Puhpa HC. Sihra, Adviser, Laki Welfare Siaha nata Puhpa K. Thaichhua, President, MTP, Laki zy ta pasyunabie pha kawpa reina ama hnei hra.
Rev. Watson J. Byhnadao, ECM Laki biatuhpa ta Khazohpa lâta Ambulance hlâna a hnei.
Puhpa HK. Beiho, VCP, VC-11, Laki ta vote of thanks reina a hnei.
Programme he chhai no lâta a hmâhpa châ ta, Laki Vaihpi Local, Shamma Local, PCI Laki, UPC Local, Khôpai nata Ahmypi zy ta Khazohpa lâta alynabie reina thlahchhâ paraona hneipa a châ hra.
Laki Welfare Siaha liata chhihthatuhpazy ta Laki biatuhpa Puhpa T. Seido, EM, MADC he ama za zi thei hra.
Official lâ tawhta Puhpa Pawsa Lava, Asst. I&PO, MADC, Elvina B. Lalhmangaihzuali, PA to EM (Sports), Puhpa K. Nehemia, I&DP, MADC nata K. Beinoki, Sports Department, MADC zy ta Puhpa T. Seidô, EM, MADC ama zi thei hra.
ISSUED BY:
Information & Publicity Department
Mara Autonomous District Council
Siaha.
