PRESS RELEASE
NO.61/2026
SIAHA, 07 Thlazoh, 2026 (Chutynoh): Atanoh dawh 10:00 AM pa ta Farmers Training Hall, MADC, Siaha liata AH & Vety Department, MADC pachhuahpanohpa Poultry Farmers Training cha Puhpa M. Chiadung, EM i/c AH & Vety, etc. MADC chata Khichhhai Laipa châpa ta â hmâkhei ei.
Programme he Dr. Beizakaw Vyhtu, Sr. VO, MADC ta chhihtha ta, Puhpa A. Hiasa, UDC, MADC ta Abeipa lâta pavaosana thlahchhâna a hnei.
Puhpa M. Chiadung, EM, MADC chata, “Atanoh Poultry Farmers Training hnei n’awpa châta sôh maniah pâchâpatuhpa Puhpa M. Laikaw, CEM, MADC hnohta alynabie ei reih hmeiseih,” a tah.
“Atanoh training pachâ peimawh ta, training avaw hlaopa zydua hnohta alynabie reih na ta, nama chô liata ei ly hmeiseih. AH & Vety, MADC ta Poultry Farmers Training a vaw pachhuahpanoh theipa he ei ly hmeiseih.”
“Cha dei châ leipa ta, Khichhai Laipa châpa ta training programme ei châ hmâkhei theipa ei he, ei ly hmeiseih. Khizaw lia heta niebaw tlua n’awpa ta hmahlana pha kawpa hnei he hmahsiena châta hmo peimawh kawpa châ ta, eima Siaha khihpi chhao heta su hrolâ tawhta, State hro lâ tawhta Awh nata Awhtih la hluh kaw pi ta, atanoh ta Poultry Farmers he su liata training avaw hlaopazy ei chi heta, tiama papua ta, ativy peimawhzie pachâ pâ ta, he rairuna he nama pathlâ thei tahpa pahno u la, State hro lâ tawhta Awh (Broilers Layers, etc.) la tyhpa he la khao leipa ta nâmo tawhta Siaha khihpi (Siaha District) supply thei namâ chhuah chyu awpa ta ei châ haw chyu ei.”
“Thaina asosâh lymâ ta, cha hawhna hra chata Awh zaona kyh lia heta, thohna pie pha peimawhzie zy, zao dâh dopa athaipazy tawhta training ama cha piepazy papeimawhsa ta tiama kawpa nata palôh hnei kawna chôta, hlaotloh cheingei achhuahpa ta nama zao awpa a châ.”
“Atanoh ta training avaw hlaopa zydua chi heta, thyutliapazy sahroh zaona kyh liata lâthlôh pahmôtuhpa châ namâ chhuah chyu awpa ta ei châ haw chyu ei. Sawhkhâ rai hria ngâlâh he nietluana a châ leizie, achhohpachhuahtuhpa châ chyu namâ chhuah aw. Sahroh zaona kyh liata khokheina sâh chaipa ei cha hlâ chyu ei,” tahpa ta Khichhai Laipa ta pasyunabie pha kawpa a reih.
Dr. HC. Joane Mary, CVO, MADC, Dr. Benson Chhakchhuak, VO, GOM, Dr. H. Lalruatfela, MVU, GOM nata Dr. David H. Beihroly, MVU, GOM zy ta PowerPoint Presentation hmâpa ta Poultry Farmers zy hnohta training pha kawpa ama pie.
Resource persons-zy ta training piena ama hnei khai tawhta Trainees-zy chhaota interaction daihti hneikhohpa a châ hra.
Pihnô T. Merisa nata Puhpa K. Beirahmo zy ta pahnie kawpa ta hlasapa ta zawpi ama palôhpahawh.
Puhpa John K. Rema, VFA, MADC ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
