PRESS RELEASE
NO.54/2026
SIAHA, 26 Chhiepa, 2026 (Chutynoh): Atanoh dawh 12:00 Noon khata ECM School Hall, ECM Vaih, Siaha liata Siaha Auto Rickshaw Owners Association (SAROA), Siaha District, Siaha Silver Jubilee Programme ahmâhpa châ ta, Puhpa Beirahmo Syhly, EM i/c Road Transport Department, MADC chata Khichhai Laipa châpa ta â hmâkhei ei.
Programme he FC, Lalrinkimi, Council Vaih, Siaha ta a host. Major Lalthanpuia, CO Siaha Corps ta Abeipa lâta pavaosana thlahchhâna a hnei. Puhpa Lalkhuma, Finance Secretary, SAROA ta apahâ hapazy taokheina daihti â hmâh.
Puhpa Beirahmo Syhly, EM, MADC chata, “SAROA Jubilee heta byhnâ vaw tlôkhei mawh sy,” tahpa ta aly kawpa ta Jubilee pahyna a hnei.
“SAROA châ kô 25 vaw châ ha ta, pitlohpa nama vaw châ haw. Ei châ lykhei hmeiseih ei. Siaha khihpi lia heta ahluahtheipa hluh kaw bâ ta, association chhao a vaw duah hluh kaw bâ hra. Cha liata, SAROA he cha reithai kaw ei na ta, a chhâpa cha, kôchareih nô nata paw hnei khao leipa hâra rietheipazy bao n’awpa châta nama hriapapuapa tawhta baona nama pie tyhpa he a pha tah na ta, reithai tlâh nama châ hmeiseih. Motor ahluahtheipa hropa assciation aduah hrapazy ta he hawhpa ama taopa pahno tlâ va na.”
“Auto Rickshaw Driver zy, ei cha reithai kaw heihpa ei cha, nama Auto Rickshaw chhôh liata nama passenger zy ta hmo ama my nahta, pie pakhua lymâ tyh ei chi ta, aly’pa a châ hmeiseih. He kyh liata ngâ namâ chhihna he reithai tlâh châ ei chi ta, pasâhsa namâ chhih hmeiseih. Motor hropa liazy la, hmo my tlamaw nahta a lei pathlah daihtizy a vaw y pâ tyh.”
“Auto Rickshaw chhôh liata hmo my tlamawpa he la lei thei vei tahpa he ei hmôna dâh a châ. Taopha cha tah ei na ta, ei cha reithai hmeiseih ei. Zawpi (Passenger) phaohtuhpa nama châna hawhta thlalôh kawpa nata âboh kawpa ta amâ chhuahna su nama tlôkhei awpa he nama maophaohna a châ.”
“Auto Rickshaw kiana mâ fare chhao âdo kawpa ta hmâh ta, Driver chhaota âdo kawpa ta passenger kia mâ la ta, passenger chhaota a pha kawpa ta kia mâ pie hra awpa a châ. Hmo kheihawhpa rai eima taona kyh lia heta ngâchhihna he eima papeimawhsa chai awpa a châ.”
“Auto Rickshaw chhôh liata passenger zy ta hmo ama mypa a pha kawpa ta nama pie pakhuapa hawhta, Auto Rickshaw kia mâ (rate) chhao âdo kawpa ta nama la hra awpa a châ. Chyhsa thokha pakah tawhta Auto Driver thokha tawhta kia mâ (rate) âdo lei kawpa ta miah ama pacheisa tahpa he ei za thei pâ tyh. Chavâta, kia mâ (rate) kyh lia heta âdo kawpa ta kia mâ nama la tyh awpa ta ei châ haw chyu ei.”
“Thotlâh paw a châ vâta tlyma, atobina a chhie via vâta tlyma, kia mâ a hluh via la achhuahna palôhru he y khao leipa sala, tahpa nama hry liata ei reih khoh. Siaha khihpi liata chyhsa smart kawpa nata pathaih kawpa eima moh dâh nata thotlâhpa atobina pha tu leipa eima moh dâh zawpi phaohtuhpa eima châna hawhta eima palyu khai awpa he a peimawh ngaita kaw.”
“Chyhsa sai eima châ vâta, kia mâ he cha nama palyu khai awpa a byuh. Parking kyh lia chhao, rei namâ ngiah kaw awpa byuh ta, signal piena kyh lia chhao a pha kawpa ta dâh nama zyh awpa a byuh. Arâ lalao ngâ nota, passenger ta ku ama vaw chaluah khiahta la, eikhapi ta aduah thlâh leipa ta, ei hnôhky liata Motor hropa â râ ma tahpa pachâ pâna chôta, a soka kawpa ta Motor haoh chyu awpa ta ei châ haw chyu ei.”
“Tiama kawpa ta raihria chyu sih la, discipline pachâ peimawh ta, Motor eimâ vaopazy a pathaih kawpa ta mohôh ta, keimo vâ chhao eima pathai khiahta la, passenger chhaota cha ngâ aw ei ta, thlalôh kawpa ta nama Motor kiah aw ei ta, ama cha ngâ hra aw. My nata nohchhô ta pha kawpa ta Auto Rickshaw haoh thlâh ha ta, zâlâ a vaw châ nahta adokyh pâ leipa ta Auto Rickshaw haoh tyhpazy ei chi kha, atahmâ tawhta la, kha hawhta y khao leipa ta, a pha kawpa ta y bâ awpa ta ei châ haw ei,” tahpa ta Khichhai Laipa ta pasyunabie pha kawpa a reih.
Puhpa HC. Vanhmung, President, SAROA ta welcome speech reina hnei ta, Puhpa A. David Vabeihrosa, Secretary i/c Information, SAROA ta report piena a hnei.
Jubilee dawh he chyhsa syno nata papangawh ta tô ei ta, Jubilee lô ama bô pâ hra.
Puhpa C. Lalhmingthanga, College Vaih, Siaha, founder of SAROA ta biereina hnei ta, Puhpa H. Lalrema, Council Vaih ta Special item hnei ta, Puhpa A. Lalthianghlima i/c Traffic Police ta biereina pha kawpa a hnei hra.
Puhpa John Kenneth, RTO, MADC chhaota pasyunabie pha kawpa reina a hnei hra. Puhpa Jerry Zosangzuala, Vice President, SAROA ta palyupalihna hmo hlâna a hnei.
C. Lalrosiama, Siahatlâh, A. Vabeisialai, B. Lalsawmliana, Siahatlâh nata ZT. Beibiekhai, College Vaih zy ta pahnie kawpa ta hlasapa ta zawpi ama palôhpahawh.
Puhpa C. Malsawmtluanga, General Secretary, SAROA ta vote of thanks reina a hnei khai tawhta aly kawpa ta Jubilee kyhchhi pati dôhkhohpa a châ.
ISSUED BY:
Information & Publicity Department
Mara Autonomous District Council
Siaha.
