PRESS RELEASE
NO.29/2026
SIAHA, 1 Pachawh, 2026 (Pakhynoh): Zâhnia târi 31.03.2026 zâlâ dawh 12:00 Noon khata Phura khih liata Evangelical Church of Maraland Maud Louise School Building pahyna apakhyna programme âhmâhpa châ ta, Maud Loyise School (MLS) he Rev. Jimmy F. Sachai, Moderator, ECM Assembly ta Building pahyna nata Abeipa lâta hlâna a hnei.
MLS Building pahyna nata hlâna programme he Rev. Joseph Kôma Chozah, AS & Biatuhpa, Phura ta chhihtha ta, Phura Joint KTP zy ta pahnie kawpa ta hla ama paryh. Hla paryh khai pataw nahta Rev. Jimmy F. Sachai ta Class Room Ochhi KG 1 to Class IV sâkha sâkha ta pahyna a hnei.
Ochhôh liata programme ahmâna lia heta Rev. Chhuakhu Khithie, Chairman, MLS, Phura & ES, Education, ECM Assembly ta chhihtha ta, Rev. Joseph Kôma Chozah, Secretary, MLS, Phura, AS & Biatuhpa, Phura ta felicitation & report piena a hnei.
Puhpa S. Lalremthanga, Hon’ble Dy. CEM chata, “All-round development he education tawhta â vypa a châpa vâta khatlu ta hmah hneirôhpa ta paphasa kawpa ta khihsa hr’ei sih la, châthaina (education) eima hnei tlôh vei khiahta la, cha hmahsiena cha pha paki thei hmeiseih vei,” a tah.
“Eima riethei ta, eima khihsana â vaw hnai hapa chhaota education liata eimâ sâh khiahta cha, cha hmahsiena cha hmahsiena hlaotlohpa a châ.”
“Lyuhchâpa Pawla (Paul the Apostle) chhao kha châ thaipa châ ta, eima Biehrai liata New Testament roh hluh chaipa a vaw châ.”
“Sapa nata thlahpa hmahsiena chhao he châthaina lia heta âpahnieh kawpa a châ. Eima missionary zy moh phaohpa ta school paduapazy tawh heta Marapa sawzy châthaina liata hmahsiena y lymâ sala tahpa he eima kho chaipa a châ.”
“Mararâh zawpi heta eima missionary zy moh phaohpa ta school paduapazy châ heta pachutuhpa nata siku hawtizy châta thlahchhâna eima hnei hluh via lymâ awpa he a peimawh ngaita kaw.”
“Keimo mara sawzy pi heta Aizawl mozy khi eimâ compete thei leina kao hluhpi y ta, anodeikua cha education lia heta la eimâ compete thei tahpa he eima pahno chyu awpa ta ei khoh ngaita kaw.”
“A kheihawhpa chipho rai he ama khihsana duasu â hnai ta, ama riethei kaw hra sala, education liata amâ sâh kaw khiahta la, chi hro pho hrozy ta mohnao ngâh veih ei.”
“Eima thyutliapazy paritheipa sei liata â tâhpa hluh kaw ei ta, he paritheipa adyuhna pha chaipa cha education he a châ.”
“Athai sopazy ta ama reih dâh ta cha, hawtizy he kô 12 taih heta nô nata pawzy ta a pha kawpa ta mohôh ta pachuna phapa ama pie awpa he a peimawh chaina ama tah tyh.”
“Biehrai liata eima hmôpa hawhta suhrawh-sukha he eima pachâ peimawh kaw awpa a byuh,” tahpa ta Dy. CEM ta pasyunabie pha kawpa a reih.
Rev. S. Beihruasa, KTP HQ Secretary, Rev. A Lalhriatpuia, Lopu biatuhpa, Pihnô N. Dawhniarili, Coordinator Sunday School & Education nata Beihrokhai zy chhao he MLS Building pahyna nata hlâna programme he amâ zâ hlao thei hra.
Puhpa Beihu Nôhro, Deputy Chief Whip, MADC chhaota Dy. CEM he a zi thei hra.
Dy. CEM he Official lâ tawhta Puhpa Pawsa Lava, Asst. I&PO, MADC nata Puhpa K. Nehemia, I&PD, MADC zy ta ama zi.
Ls. M. Elisia, Phura nata Puhpa Abraham Lincoln, Phura zy ta hlasapa ta zawpi ama palôhpahawh.
Rev. FC. Pawmoti, Puhpa H. Malvina, MDC Phura Biatuhpa, K. Pawhnie, Ex-MDC nata mohropazy chhaota ML School Phura liata pahypa a vaw châpa amâ lyzie reih chyu ei ta, pasyunabie pha kawpa reina ama hnei chyu hra.
Programme he Abeipa thlahchhâna (The Lord’s Prayer) reihparaohpa ta daihti pachhâsapa a châ khai tawhta aly kawpa ta zâ pati dôh khopa a châ.
ISSUED BY:
Information & Publicity Department
Mara Autonomous District Council
Siaha.
