PRESS RELEASE
NO.70/2025
SIAHA, 24 Chhiepa, 2025, Hriaheinoh – Atanoh dawh 1:00 PM khata Puhpa T. Seidô, EM i/c Sports & Youth Services, etc MADC ta a Office Chhôhpadâh liata Mara Hlasa Py General Headquarters, Siaha Jersey a palâhâh.
He Mara Hlasa Py General Headquarters, Siaha Jersey he Puhpa T. Seidô, EM i/c Sports & Youth Services, etc MADC nata K. Ngiahlao (Emanuel Hotel hneituhpa) zy ta ama sponsored.
Programme he Puhpa John Beizachhi Phuto, President, MHP Gen. HQ, Siaha ta chhihtha ta, Pihnô P. Chaki, Senior Adviser, MHP Gen. HQ, Siaha ta Abeipa lâta pavaosana devotion daihti â hmâh.
Puhpa T. Seidô, EM, MADC chata, “Mara Hlasa Py zy ei chi he, hmo achynawh kawpa lia chhao, aly-ua thai kaw ei chi ta, eina palysa kaw ei chi. ZAWHÂNA 1:12 liata Châhrasala thokha ano alypa, ano liata angiapâpazy cha Khazohpa sawzy châ thei n’awpa biehneina a pie ei, a tahpa hawhta, alyna châh pahnopa he Khazohpa khozie chhao a châ hra,” a tah.
“Namâ ly-ua thai kaw vâ heta, a heihpa lia chhao taotheina eima hnei khiahta la, tao via lymâ chhao byuh â chhih kaw. Châ achu na ta ei kaw patlô thaohta nota, MHP zy ta programme vaw tao ei chi ta, cha moh chaimâh ei na ta, na palysa tu ha ei chi ta, Circuit House liata Dinner ei cha throw pa ei kha my thai va na. Ei za reih khohpa cha , MHP zy ei chi he, chyhsa nama palysa thai kaw,” EM ta a tah.
EM chata, “Chi nah pho thâtih he reih tyh pi ta, zawpi hmiakô liata chi nah pho thâtih eima reih nahta zawpi pua pha tyh leipa ei ta, hlasa thaipa ta programme eimâ hmâna liata hla nama vaw sapa nah heta, zawpi ama vaw pua pha kaw tyh. Chavâta, nâmo hlasa thaipazy ei chi he, chi nah pho palaiseihsatuhpa, pabohsatuhpa nama châ hmeiseih,” a tah.
“A kheihawhpa programme rai rai he avaw hmâh pi ta, hlasana a y pâ vei khiahta la, zawpi vaw pua hluh thei veih ei. Mawpa pakha hlasa thaipa ta he hawhta na chho ta, hlasa thaipa ei châ vâta pa-ô pazypa tao tlâ khao va na, tahpa ta eina chho. Hlasa thaipazy pa-ô pazypa liata namâ sohsi kaw awpa a byuh. Hlasa thai kaw sai ei chi ta, Mawrâh nata India râh lia chhao dua tiarâh veih ei chi, Khazohpa ta hlasa thaina talent a cha piepa ei he, pasô thai ta, tiama nama papua via lymâ khiahta cha, nama kaw thai via lymâ aw,” EM ta a tah.
EM chata, “Kei Paw ta hmo sâkha eina chhopa cha, tlâ vaw aw ei ta, Ramawh O dyh tota pô 5 vaw chei chyu awpa ama tah nota, pô 6 na cheipa, pôkha extra lia khata na byhnâ a y e, eina tahpa hawhta nama taotheina khôta lia khata na byhnâ a y e,” a tah.
Puhpa S. Vabeihasa, S&YO MADC, Ex-President, MHP Gen. HQ Siaha ta pasyuna bie pha kawpa reina a hnei hra.
Puhpa J. Jeffrey Khara, Auditor, MHP Gen. HQ Siaha ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
