PRESS RELEASE
NO.22/2026
SIAHA, 06 Pamih, 2026 (Chutynoh): Atanoh dawh 11.00 AM khata I & PR Conference Hall, Siaha liata Mizoram Upa Pawl District Headquarters, Siaha zy ta Assembly ei 4-na â hmâh ei ta, Puhpa S. Lalremthanga, Hon’ble Dy. CEM, MADC chata Khichhai Laipa (Chief Guest) châpa ta â hmâkhei ei.
First Session Programme he Puhpa C. Sangnuaia, President, MUP, District HQ, Siaha ta chhihtha ta, Major S. Lalrampuia, Commanding Officer, Centenary Corp ta Abeipa lâta pavaosana daihti â hmâh.
Puhpa S. Lalremthanga, Dy. CEM chata, “Atanoh MUP District HQ, Siaha Assembly ei 4-na liata Khichhai Laipa châpa ta hruapa ei châpa he a ly hmeiseih na ta, Khazohpa ta hnatlâna phapa cha pie ei sa la, hropareihna chhao cha pie mawh ei sy,” tahpa ta biehmia a pathao.
“Châ eimâ chu nota eima Professor pakha heta, uhthei kawpa hawhta na hmô hra u la, ei palôhrupa deikua cha kô 16 hawhta na a châ e a tah. Â pielyu dâh mopa heta cha hawti palôh a hneina vâ chata thyudyupa â pielyu dâh hawhta â pielyu thlâh ha tyh.”
“Kô uhthei lâ hmah châ hra u la, punctuality nama pachâ peimawh dâhzy ei hmô nah heta, za namâ chhihna â lâ ta, Office lâ eima bua kawpa vâta, bâh ta vaw hawh na ta, nâmo cha a daihtita liata namâ vaw ki khai ha bao. Mopâtlâh nama châ hmeiseih.”
“Programme hro lâ liata chhao ama veiseih ta khichhai laipa ta na hrua tyh hra ei ta, nâmo hawhta punctual ta a daihtita liata programme a thao theipa he y beih veih ei. Khizaw khaihpa vaw hmô tuapa châ ei chi ta, amopâtlâh nama châ hmeiseih.”
“Thyutliazy heta nama hro he châ mopâ ei sa la tahpa he ei khoh kaw. Khih to heta kô 80 khô lâ uhtheipa hnei hluhna khih he cha, ama khihsana ama riethei ma, thei vei ma, Khazohpa byhnâ tona khih châ ta, khih zachhihpa châ ei ta, Khazohpa khoh dâh hawhta hro ahmâpa khih châ ei ta, thlalôh chhao â chhih hra. Hropareihna he chyhsa ta eima kho kho ta pahsisa thei’pa châ vei.”
“Kô uhthei lâ châ ha na ta, tahpa ta O liata y thlâh leipa ta, thyutliapazy pasyu ta, thyutliapazy châta hmophapa tao ei chi ta, he hawhta programme zy pachhuahpanoh ta Assembly zy nama pachhuahpanohpa he aly â chhih ta, reithai tlâh nama châ hmeiseih.”
“Bieso ta cha ‘Experience makes a man perfect’ tah ta, chyhsapa kô kaw uhthei lymâpa liata hmo kaw tyh laih lymâna practical liata hmo nama pahnopa hluhpi y ta, chazy cha thyutliapazy nama chhopachhuah lymâ awpa he a peimawh ngaita kaw.”
“Chyhsapa hro eimâ kaw hmâh lymâna lia heta a theory ta â chupa hlâta ta practical ta eimâ tyhpa he â do via hra ta, hro taopathituhpa nata pitloh hro hneina chhao a châ hra.”
“Hmo hluhpi vaw experience chiehpa nama châpa vâta cha za kaw ei na ta, zana ei cha hlâ pâ hra ei. Thyutliapazy pi he la experience eima hnei chyh vâ heta hmo taochheipa hluhpi eima za hnei tyh. Thyutliapazy hro padotuhpa nata experience nama hnei hluhna tawh heta thyudyupazy hro dopa lâ amâ chhih lymâ thei n’awpa ta pasyutuh phapa châ lymâ u la, nama sie lymâ n’awpa liata khokheina sâh chaipa ei cha hlâ ei,” tahpa ta khichhai laipa ta pasyunabie pha kawpa a reih.
Guest of Honour Pihnô LS. Lalbiakzuali, District Social Welfare Officer (DSWO), Siaha chhaota biereina hnei hra ta, Râh asosâhpa râh liah maih heta kô lâta uhtheipazy za ei ta, ama zachhihna chhao ama pabohsa tyh. Eima District lia heta thyutliapazy paritheipa tao ta iahzaipa hluh kaw ei ta, cha hnaihta, atanoh ta he su liata â vypazy kô uhtheipazy hmah châ hra u la, ei uhthei tu ha tah leipa ta, thyudyupazy paritheipa ama pathleih thei n’awpa ta hmahla hra ta, paritheipa adyuhna kyh liana heta, uhtheipa experience hnei hluhpa nama châna hawhta paritheipa namâ dyuh chyu hra awpa ta ei châ haw ei, tahpa ta pasyunabie pha kawpa a reih.
Laihsa Cindy Lalramhlimpuii nata Laihsa R. Lalchansangi zy ta pahnie kawpa ta hlasapa ta zawpi ama palôhpahawh.
Tanoh programme âhmâna lia heta kô 80 chô lâ uhtheipazy hnohta lymâ raina ama hnei pâ hra.
Dy. CEM he Official lâ tawhta Puhpa Pawsa Lava, Asst. I&PO, MADC nata Puhpa Martin L. Hlychho, I&PD, MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
