PRESS RELEASE
NO.52/2025
SIAHA, 02 Patô, 2025, Pobienoh – Atanoh dawh 2:30 PM khata Puhpa S. Lalremthanga, Hon’ble Deputy Chief Executive Member i/c Education (P/S), MADC ta District Hospital Siaha ta kô 2023-2024, 2024-2025 chhôhta Kayakalp ataopasuana liata lymâ sânona lana nata Eco-Friendly 2023-2024 liata lymâ sâkhana lana alyna nata NQAS Certificate ama hmôpa (lana) alyna programme he DMS Hall, District Hospital, Siaha liata â hmâkhei ei. Puhpa K. Chhuabei, Executive Member i/c LAD, etc MADC chhaota he programme he â hmâkhei hra ei.
Programme he Dr. Teresa Thaidi ta pahnie kawpa ta host ta, Rev. P. Riabi, Chaplain, DHS ta Abeipa lâta pavaosana devotion daihti â hmâh. Dr. Beiparysa K ta welcome speech nata alynabie reina a hnei.
Dr. C. Lalrosanga, District Medical Superintendent (DMS) ta Kayakalp report piena a hnei.
Puhpa S. Lalremthanga, Dy. CEM, MADC chata, “He hawhpa programme peimawh kawpa liata ahlao thei hra awpa ta hruapa ei châpa he ei ly hmeiseih. CEM khi atlyh chhôh châ ta, CEM charge ei la no châ ta , nama hry liata biereinazy ei hnei theipa he vâhnei atah na ta, ei ly hmeiseih,” a tah.
“Mizoram sawhkhâ ry liata Urban Development & Poverty Alleviation (UD&PA) Department pachhuahpanohpa Mizoram Cleanliness Competition 2024 liata Siaha khihpi ta District Headquarters Category liata khihpi pathaih chaipa lymâ sâ 2-na dao pi ta, atahmâ District Hospital Siaha ta kô 2023-2024, 2024-2025 chhôhta Kayakalp ataopasuana liata lymâ sâ 2-na nata Eco-Friendly 2023-2024 liata lymâ sâkhana lapa châ ta, chahleikhô ta, NQAS Certificate vaw la pâ heih pi ta, aly’pa a châ hmeiseih,” Dy. CEM ta a tah.
Dy. CEM chata, “Pathaihna he chyhsa to ta peimawh pi ta, Khazohpa khozie chhao châ hra ta, pathaihna he hnatlâna chhao châ ta, eima pathaih via lymâ awpa he a peimawh ngaita kaw. Eima tlâhlei daihti liata Hospital pathaih kawpa liata eima y khiahta la, eima tlâh patoh via tyh,” a tah.
“Tlâhlei daihti liata Dawhty nata Nurse zy ta polite kawpa nata kyhpachâna palâsana chôta, chi rai rai khah y, khâpahmah chi’pa y vei, thlai ta na vaw tlâh ha aw, miah ama vaw tah nahta la, keimo liata alyna nata thlalôhna vaw y ta, eima vaw tlâh via khai ha tyh. Chavâta, tlâhlei daihti liata Hospital eima pangai daihti lia heta Dawhty nata Nurse zy tawhta thlalôhna bie nata polite-na reikah eima theipa he aly â chhih hleikhô ta, eima vaw tlâh via ha tyh,” Dy. CEM ta a tah.
Dy. CEM chata, “Dr. C. Lalrosanga, DMS eima hneipa he aly achhih hmeiseih ta, Aizawl liata Hospital eima pangai daihti liata Siaha cha Dr. thaipa Dr. Sangte hnei ei chi ta, nama vâhnei dâh miah ama tah tyh. District Hospital Siaha liata ahriapa zydua nama hriapasana he MADC vyuhpa ta alynabie ei châ hla chyu ei,” a tah.
K. Rovina nata Puhpa C. Lianmawia zy ta pahnie kawpa ta hlasapa ta zawpi ama palôhpahawh.
Atanoh programme lia heta AB-PMJAY palyupalihna chhao hneipa a châ hra. Abigail KT. Zaizai, DQM ta NQAS liata ama hmahlana nata ama raihrianazy thâtih reina a hnei.
Dy. CEM he Official lâ tawhta Puhpa Pawsa Lava, AITO, MADC nata Puhpa K. Nehemia, Cameraman MADC zy ta ama chakaochahlâh.
Dr. Lalnunziri, Sr. CMO, Siaha District ta vote of thanks reina a hnei khai tawhta Rev. P. Riabi, Chaplain, DHS ta thlahchhâna ta daihti a pachhâsa. Daihti pachhâsa khai tawhta aly kawpa ta zâlâ pati (Dinner) dôh khohpa a châ.
ISSUED BY:
Information & Publicity Department
Mara Autonomous District Council
Siaha.
