PRESS RELEASE
NO.94/2025
SIAHA, 6 Thlazoh, 2025, Pakhynoh – Atanoh dawh 11:00 AM khata Puhpa M. Laikaw, Hon’ble CEM, MADC ta Rev. Dr. M. Zakonia châbu ropa “Marapa Châna nata Hmahsiena” (Mara Identity and Development) tahpa cha Forest Hall, MADC, Siaha liata a palâhâh.
Châbu palâhâhna programme he Puhpa Pachi Hlychho, Vice Chairman, BML ta chhihtha ta, Rev. K. Laichhua Azyu ta Abeipa lâta pavaosana thlahchhâna a hnei.
Prof. K. Zohra ta pahnie kawpa ta châbu saichhieliena a hnei.
Puhpa M. Laikaw, CEM chata, “Rev. Dr. M. Zakonia châbu ropa “Marapa Châna nata Hmahsiena” tahpa palâhâhna programme avaw hlao theipa zydua hnohta alynabie cha hlâ ei na ta, he châbu palâhâhna programme pachhuahpanohtuhpa Board of Mara Literature (BML) ta châbu palâhâhtuhpa châta raopa ei châpa he aly kaw na ta, BML chô lâ lia chhaota alynabie ei reih.”
“Châbu rohtuhpa ta tha nata zâh, daihti hluhpi pahryuhpa ta roh ta, palâhâh daihti liata pasô thai kawpa ta, palâhâhna programme zy ahlao ta, chalei ta, eima reih hluh awpa he a peimawh ngaita kaw. Ahy rai ta, Mara reih ta châbu ropa na vaw zua hnaopa he ei chalei lymâ. Chavâta, keimo nata keimo adeichhy thaina vâ zy, keimo nata keimo tha a patlô thai ta, chi nah pho kyhpachâna eima hnei via lymâ awpa he a peimawh ngaita kaw.”
“Chi nah pho pabohsa n’awpa ta chhaichhi vaw la, vaw cheih ula, tahpa vaw châ sala, châbuzy hena eima chhaichhi la awpa, cheih awpa cha a châ. Mara chi nah pho na eima châ e, tahpa ta nôpaw hmiatuapazy ta District Council ama hiah nota, Mara Biehrai (Bible) nata Mara Hlabu ama cheih, pahmôpa a châ. Meithei chaba ta thyu ngâ kaw byuh leipa ta, eima reihzy pabohsa ta, eima culture thyutôna pabohsa he eima papeimawhsa via lymâ awpa he a peimawh ngaita kaw.”
“Nohchareih ta adyuhna field liata chareipa châ pi ta, ngiapâna lâta vaw châ sala, moleina pahnie ta, nohchareih eima hro asohsi thei peimawh ta, chahawh pyly hra chata, eima sapa châta za moh sih la, nohchareih ta, keimo châta hri-iah pha leipa tawhta zy, keimo châta avaih lymâna chôta hmialâ eima sie lymâ awpa he a peimawh ngaita kaw.”
“Khizaw liata eima y chhôh heta, hmo phapa nata chhiepa tlô ngâthlâhpa liata ypa châ pi ta, aphapa nata chhiepa pahrua thai ta, Khazohpa khoziezy pahno thai ta, survive thei lymâpa he chyhsa pitlohpa, hmâhtlâh châpa ama vaw châ tyh. Châ achuhaipa chhaota châ chu hohleina â pahniesa khiahta la, hlaotlohleina leidiana lâ tlao â chhih aw. Chyhsa pitlohpa châ awpa ta, tao awpa, maophaohna a patlô hoh vei khiahta la, chyhsa hmâhtlâh châ leipa a châ aw.”
“Achuhaipa ta achuna pachâ peimawh leipa ta Drugs zy a tao hapa a châ khiahta la, achuna liata hlaotlohna y thai khao vei. Chyhsa ta thathina sei liata â tah khiahta cha, chyhsa pitlohpa, hmâhtlâhpa châ thei khao aw ei. Chavâta, eima hrochhôh heta, thathi leipa ta tiama kawpa ta eima nohchareih hro eima hmâh lymâ awpa he a peimawh ngaita kaw,” CEM ta a tah.
Puhpa MH. Tiabi, EM i/c Education (M/S) & Chairman, BML chhaota biereina hnei hra ta, “Marapa châ pi ta, keimo ta Mara reih pasô ta, eima palaiseihsa vei khiahta la, ahy hmah ta, miah pasôpa leipa aw ei ta, cha hnaihta, Mara reih ta châbu ropazy pasô sih la, reih hluh sih la, Mara reih ta châbuzy eima roh hluh awpa he a peimawh ngaita kaw,” a tah.
Laihsa HC. Teresa Ngianô, Mara Idol Season 7, 2024 ta pahnie kawpa ta hlasapa ta zawpi a palôhpahawh.
Rev. Dr. M. Zakonia ta alynabie reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
