PRESS RELEASE
NO.131/2025
SIAHA, 8 Phiapi, 2025 (Pachynoh): Atanoh dawh 12:00 Noon khata Siaha District Football Association (SDFA) Playground, Meisatlâh, Siaha liata Puhpa M. Laikaw, Hon’ble CEM, MADC chata MADC CEM Trophy 2025 Final Match Programme liata khichhai laipa (chief guest) châpa ta â hmâkhei ei.
Programme he Puhpa Reuben Hlychho, Sr. Vice President, SDFA ta chhihtha ta, Puhpa S. Vabeihrongia, Assistant Secretary, ECM KTP HQ ta Abeipa lâta pavaosana thlahchhâna a hnei.
Puhpa M. Laikaw, Hon’ble CEM chata, “Atanoh he su liata programme â vaw hlao theipa zydua a hmiatua ta MADC vyuhpa ta samaw ei cha hlâ ei. SDFA chhihtuhpazy ta atanoh programme liata khichhai laipa châ awpa ta na khokhei ei ta, ama chô liata chhao alynabie reih na ta, SDFA chhihthatuhpazy tiamana zawhzi ta atanoh MADC CEM Trophy final match akhaih thei awpa a vaw châpa he aly âchhih hmeiseih.”
“Zawpi ta khatluta ma miah ama pasô tahpa liata bua’pa châ leipa ta tiama kawpa ta thyutliapazy châta hmah nama lana lia heta hnabeidy leipa ta tiama nama papua via lymâ awpa ta ei châ haw ei. Thyutliapazy châta nama contribution he a rônah hmeiseih. MADC chhaota eima theina rakha ta, cha bao lymâ’pa he khoh pi ta, anodeikua, eima sôh hneipa a chyh tu vâ heta khoh dâh hawhta cha bao thei tyh leipa pi ta, nama pachâthaina ei châ haw ei. Anodeikua, atahmâ hawh heta châ ngâthlâh ha leip’aw pi ta, Khazoh ngiachhiena vâta, hmahsiena lâ eima pangai laih awpa hawhta pachâ sih la.”
“SDFA chhihtuhpazy thyutliazy châta namâ piepasana, tiamana, nama daihti sôh kawpazy parua ta, nama hriapasana zydua he a rônah ta na ta, reithai tlâh nama châ hmeiseih. Khazohpa ta â ryh a tah khiahta la, mylâ hânoh tahmâ ta football akhaih haipazy he national level, state level nata international level liazy taihta akhaih lymâ awpa châ ei ta, tiama papua ta, palôh hnei kaw awpa he a peimawh ngaita kaw.”
“Palôh a ichapa hnei leipa ta, football akhaih, badminton akhaih, hockey akhaih sports hropa a kheihawhpa rai akhaih khai achhuah thlâh hapa he hmophapa châ vei. Sâkha liata palôh piekhai ta concentration pie khai ta master/professional châ achhuahpa he hmopha chaipa a châ. Football nâ khaih khiah football ngâlâh akhaih ta palôh pie khai lâlao la, hlaotloh chhao achhuah cheingeipa a châ.”
“Kei chhao school ei kiah daihti liata decision sia kawpa tao na ta, he lia heta concentrate na ta master châ ei chhuah aw tahpa ta tiama kawpa ta ei chhuahna hlao patloh ei chhuah.”
“MATHAI 14:28-31 liata eima hmôpa hawhta, Pity cha balyh tawhta thlai pua ta, Zisu lâ pangaipa ta ti chô liata sie ta. Châhrasala thlihpipa a hmô nahta, chi ngaita ta, a pamôh pathao ha ta, chavâta, achhuahna siapa hnei ta, chyhsa ta kheihtama ama cha moh, ama cha sai tahpa lia bua leipa ta, namâ chhuahna liata hlaotloh cheingei achhuah ta tiama kawpa ta namâ chhuahna hlaopatloh namâ chhuah lymâ awpa a châ.”
“Khahlâ viano cha, hockey akhaih ei ta, hockey stick hmâpazy ta a pazei ta, a tupâ tyh ei ta, amâ khaihpa liata concentrate ta palôh piepa hlâta châ ahyma thatlô via, riahpha via tahpa ta atudai chhao apapeisa leina ama hnei tyh. Tahmâ deikua cha, kha hawhpa zydua kha siesai via laih ngâ kaw pi ta, nama siesai pathlah khai awpa a peimawh ngaita kaw. Ahyma â khaih dâh pha chai, daothei chai, mao-oh thei chai, manner hnei pha chai, nôpha chai, self-control hnei pha chai, best player châ achhuah ta, tahmâ cha talent show na daihti châ bâ ta, kao totie liata mopâtlâh châ achhuah chyu awpa a châ.”
“A Kheihawhpa team hema akhaih pha ei ta, a kheihawpa team hema daothei chai ei, tahpa he khizaw ta ama sai dâh a châ bâ. Cha palôh hneina chôta tanoh final namâ khaih awpa cha khokhei ei na ta, kheihawhpa team rai tlô via ta sâkhana la hra u la, a tlô viapa ta tlô dâh thai, a tlô lei viapa ta tlô lei dâh thai ta, tiama via papua namâ chhuah lymâ awpa he a peimawh ngaita kaw.”
“Drugs heta miah chadi lymâ ta, thyutlia talent hneipha kawpazy lytlâh miah khôsai hapa hluhpi ama y. Chavâta, nâmo cha drugs tao rai rai lei awpa ta ei cha pasyu ei.”
“Tahmâ cha global village châ bâ ta, nama pahâhna line liata hmo totie nama yna su tawhta moh thei, achu thei khaipa châ bâ ta, palôh hnei kawpa ta achupa châta la, thainapa he a y thei lymâ bâ.”
“Hnatlâhpa ta nama y khiahta la, hâhkôzy chhao MADC CEM Trophy y heih aw ta, atakô hlâta thai via ta, improve via namâ chhuah lymâ awpa a châ. Nama opa lyuhri liata ypa viasazy sports liata talent hneipha kawpazy nama pahno khiahta la, a vaw chhi achhuah u la, paritheipa ataopazy ama pathleih thei n’awpa ta sports tao ei si tahpa ta namâ vaw chhi lymâ awpa a châ.”
“Viasa châta byhnâ châ namâ chhuah chyu awpa a châ. Hmo nama taona maih kaw liata Khazohpa nama pahno lymâ awpa khoh na ta, District council miah pietuhpa chhao Khazohpa châ ta, cha hnaihta, thlahchhâ hluh ta, akheihawhpa hmo nama taona lia maih ta Khazohpa pahno lymâna chôta tiama nama papua lymâ awpa a châ,” tahpa ta khichhai laipa ta pasyunabie pha kawpa a reih.
Satlia John Litas ta pahnie kawpa ta hlasapa ta zawpi a palôhpahawh.
Match Commissioner N. Ferdinand, Honorary Secretary, SDFA ta report piena hnei ta, Puhpa F. Vanlalmuanpuia, Treasurer, SDFA ta vote of thanks reina a hnei.
Final match akhaih theipazy cha Meisatlâh FC nata Siahatlâh FC zy ama châ.
CEM he Puhpa Pawsa Lava, Asst. I&PO, MADC, Puhpa J. Jeffrey Khara, Moonlight Editor, Puhpa C. Lalramghaka, Kawl Eng Editor nata Puhpa K. Nehemia, Cameraman, I&PD, MADC zy ta ama zi.
ISSUED BY:
Information & Publicity Department
Mara Autonomous District Council
Siaha.
