PRESS RELEASE
NO.113/2025
SIAHA, 23 Thlarâh, 2025 (Hriaheinoh): Atanoh dawh 11:00AM khata Women Anti-Drugs Association (WADA) Office, New Colony – III, Siaha liata Sewa Pakhwada 2025 Sports Competition hneipa châ ta, he programme lia heta Puhpa T. Seido, EM i/c Sports, etc., MADC chata khichhai laipa châpa ta â hmâkhei ei.
He ataopasuana programme he Prime Minister Narendra Modi pih noh a ly n’awpa châta pachhuahpanohpa a châ.
Programme he Puhpa KT. Zacho, WADA worker ta chhihtha ta, Pihnô S. Nathlua, Mahila President ta Abeipa lâta pavaosana devotion daihti â hmâh.
Puhpa T. Seido, EM chata, “Atanoh programme pachhuahpanohpa Prime Minister Narendra Modi pihna noh alyna Sewa Pakhwada sie lymâpa liata Khichhai laipa châ awpa ta hruapa ei châpa he ei ly hmeiseih,” a tah.
Khichhai laipa chata, “Puhpa Modi he September no 17 liata vaw pih ta, a hawti viano ta a raihriapa ama reipa cha, thopi daoh hâ tyhpa a châ. Thopi dao tawhta India Prime Minister a vaw châ phapa a vaw châ. Pasâhsa â chhih hmeiseih. He liata avy pakhy penawh chhao nama hro parohpa liata abohna y vei tahpa pahno u la, he su vaw pangngaina châh pahno ei chi ta, cha sai hmahta pasâhsa khi tloh ta, ei cha pasâhsa kaw sai ei, chavâta hnôhlâ kua khao lei awpa ta thata tiama nama papua lymâ awpa a peimawh ngaita kaw. Tahmâ he chyhsa nawh kawpa hawhta ahmô hra u la, tahmâ ta nama hmotaona dâh hawhta myla hânoh ta chyhsa rônah kawpa ta nama pua thei tahpa nama pahno awpa a peimawh,” tahpa ta a pasyu ei.
EM chata, “Chyhsa hluhpi ta paritheipa vâta thlâkhaoh angia ha ei ta, nâmo deikua la daihti hnei thlâh chy ei chi ta, chavâta hnôhlâ ta nama hro parohpa lâ kua khao lei awpa ta nama fight lymâ awpa a byuh. Nama pahno ngâthlâh ha awpa ta ei khopa cha, nama hro nama siesai hapa liana khata cha paraotheituhpa y ta, hmia namâ kaw sah lymâ n’awpa lia deikua cha, riahpha kawpa nata tiama kawpa ta nama chatôh lymâ awpa a châ,” a tah.
Lyuhchâpa Pawla ta, “Dyhchhiepa hawhta pachâpa châ pi ta, châhrasala chyhsa hluhpi a pahneirôhsapa eima châ. Khâpa hmah a hnei leipa hawhta pachâpa châ pi ta, châhrasala ato eima hnei. (2 KAWRINI 6:10)’ a tahpa hawhta, nâmo duasu liata pakhopâ na ta â do ei tah kaw. Khizaw chyhsa mohmô liata la nama nawh kaw thlyu aw, Khazohpa mohmô liata khatlu ta ma nama raihria phapa he a rônah, Nama raihriapa he rônah ta, Khazohpa chakaona dopa a châ. Thlahmih leidiapazy pachhapapuana rai nama hria hmeiseihpa ta ei pahno, tahpa ta Khichhai laipa ta WADA liata hriapazy hnohta pasyunabie pha kawpa a reih.
EM chata, Atanoh avypakhypa zydua hnohta sports activities nano nanopazy cha aly kawpa ta hmâh ta, aly kawpa ta ataopasua chyu awpa ta khokheina a hlâ hra ei.
Atanoh daihti he sports activities: Balloon Blast, Arm Wrestling, Push-ups, Carrom, Chinese Checkers, nata Draughts zy ataopasuana pachhuahpanohpa a châ.
Laihsa Thluakho Solo, Secretary, BJP Siaha chhaota pasyunabie pha kawpa reina a hnei hra.
Puhpa MC. Beichônôchai ta vote of thanks reina a hnei.
ISSUED BY:
Information & Publicity Department
Mara Autonomous District Council
Siaha.
