PRESS RELEASE
NO.116/2025
SIAHA, 29 Thlarâh, 2025 (Hriatuanoh): Atanoh my dawh 11:00 AM khata Siahatlâh liata Puhpa T. Seido, EM i/c Social Welfare, etc., MADC chata khichhai laipa (Chief Guest) châpa ta Office of the Hmangaih Society, Siaha (District HQ Siaha, Mizoram, Regdn No.MSR 434 of 27-04-2012) a pahy.
Hmangaih Society he kô 2010 khata Puhpa L. Dawkô ta vaw padua ta, kô 2012 liata sawhkhâ liata registration taopa a châ.
Pahyna programme he Puhpa L. Dawkô, President ta chhihtha ta, Abeipa lâta pavaosana thlahchhâna a hnei pâ.
Puhpa T. Seido, EM chata, “Atanoh Hmangaih Society office thiehpa pahy awpa ta khichhai laipa ta raopa ei châpa he ei ly hmeiseih. Disabled persons zy châta office thiehpa paduapa a vaw châpa he aly â chhih hmeiseih,” a tah.
“Khazohpa ta chhâpa/yzie hnei leipa khâpa hmah tao tlâ vei. Khazohpa hmotaopa zydua he chhâpa/yzie hneipa sai ta a taopa a châ. A tliata liata MADC liata Executive Meeting hnei pi ta, bie eima pathlupa liata ei ly kawpa cha, atahmâ tawhta sawhkhâ rai eima la awpa nata, eima la lymâ awpa liata 4 per cent he Disabled persons châta pasopa a châ lymâ bâ aw,” a tah.
EM chata, “Suhro lâ liata cha, differently abled (Person with Disability (PWD) zy châta vocational training zy tao tyh ei ta, amâ thôhkhei kaw tyh. Keimo he eima duasu a pha lei kawpa vâta tao thei mâh leipa pi ta, châhrasala, tahmâ vocational training eima hnei thei n’awpa ta project tao pi ta, Abeipa ta âryh a tah khiahta la, eima hlao a tloh nahta ei pangiasa. He project he a hlaotloh khiahta la O pha kawpazy hnei pi ta, vocational training zy eima hnei hra bâ aw,” a tah.
“Sôh nah thih eima rairu tu hapa vâta hlaozy a hluh papôh thei leipa pi ta, Machâ hlao he Rs. 250 tawhta Rs.500 deita papôh thei pi ta, chahawh pyly hra chata, disabled persons hlao chhao Rs.500 tawhta Rs.750 deita eima papôh theipa a vaw châ,” a tah.
“Nick Vujicic kha kô 1982 liata Melbourne, Australia liata kuphei (born without arms and legs) hnei leipa ta vaw pih ta, atahmâ cha world-famous motivational speaker a vaw châ thlâh ha. Khazohpa heta hmoto he yzie hnei leipa ta tao tlâ vei,” EM ta a tah.
“Differently abled châ na ta, tahpa ta a moh pahnai rai rai’pa châ vei. Khazohpa ta chhâpa/yzie hneipa ta cha tao ei ta, hnabeidyna hro hnei rai rai’pa châ vei,” tahpa ta pasyunabie pha kawpa EM ta a reih.
Puhpa T. Seido, EM heta Hmangaih Society, Siaha liata hriapazy abyuh ângiahna liata ama hmâh awpa sôh a bao pâ hra ei.
Hmangaih Society, Siaha liata hriapazy:
- Puhpa L. Dawkô – President.
- L. Duhkama – Vice President
- Lalnunfeli – Secretary
- Lairengpuii – Finance Secretary-cum-Treasurer zy ama châ.
Hmangaih Society, Siaha lia heta UDID (Unique Disability ID) Card a hneipa ngâlâh member châ thei ei ta, Disabled person zy ta member a châ khohpa ta la, UDID pataosa awpa a byuh.
Official lâ tawhta Puhpa Pawsa Lava, Asst. I&PO, K. Jenny, Cash Clark, Social Welfare Department, Elvina, PA to EM (Social Welfare, etc.,) nata Puhpa Martin L. Hlychho, Cameraman zy ta EM ama zi thei hra.
Puhpa J. Jeffrey Khara, Moonlight Editor chhaota EM he a zi thei hra.
Puhpa L. Dawkô, President ta vote of thanks reina hnei ta, Puhpa T. Seido, EM, MADC ta ama Office liata Office files, etc., peimawhpazy paso n’awpa Steel Almirah a piepa â lyzie reih ta, vote of thanks a reih khai tawhta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
