PRESS RELEASE
NO.4/2026
SIAHA, 17 Nawh, 2026 (Pachynoh): Atanoh dawh 12:00 Noon khata Puhpa S. Lalremthanga, Hon’ble Dy. CEM, MADC chata Puhpa K. Hrahmô, MLA ta a sponsored pa Tipa Zone Football Association (TZFA) Cup Grand Final Programme cha â hmâkhei ei.
Programme he Puhpa Sachhua Khaimeichhô, President, TZFA ta chhihtha ta, Evan. Lalthangliana, Tipa Seventh-day Adventist ta Abeipa lâta pavaosana devotion daihti â hmâh.
Puhpa S. Lalremthanga, Hon’ble Dy. CEM chata, “Atanoh he programme ahmâh thei awpa ta daihti phapa miah pietuhpa Khazohpa hnohta alybabie ei reih. Atanoh he programme liata khichhai laipa (chief guest) châ awpa ta na khokheituhpa zydua hnohta alynabie reih na ta, TZFA President nata a hrialâhpazy hno chhaota alynabie ei hlâ hra ei,” a tah.
“TZFA ta he football tournament nama vaw pachhuahpanopa he aly’pa a châ hmeiseih. He tournament namâ hmâna su playground he eima hawti nota hockey eimâ khai tyhna su châ ta, tahmâ football akhaih n’awpa châta vaw hmâh ei chi ta field pha kawpa eima hnei thei n’awpa ta hmahla ngâhaipa châ ta, atakô April thla tawhta 16th finance commission hmâpa vaw châ ha aw ta, field thiehpa, pha kawpa eima hnei thei n’awpa ta proposal submit ha pi ta, chazy cha a hlao a vaw tloh khiahta la, Tipa area liata ypazy hmâh thei awpa field phapa eima vaw hnei thei nahta eimâ hnabeiseih.”
“Atahmâ tawhta reileipa liata he su lia heta Multi-Purpose Market set (Bazar n’awpa) su lakh zapalih mâpa sapa vaw châ aw ta, cha cha Tipa nata a chheipâh liata ypazy châta hmahsiena rônah kawpa châ ta, women facilitation centre chhao a y pâ hra aw.”
“Tipa nata a chheipâh liata ypa zydua heta thohna paritheipa he aheihsai ngâh chyu suh vy tahpa he bie ei cha ta khoh kawpa ei a châ. Atanoh ta eima râh buana, Awnanopa buana, chhôhkha buana khihtlâh buana cha drugs paritheipa he châ ta, chavâta, thyutliapazy paritheipa tao tlâ lei awpa ta ei châ haw ei.”
“Paritheipa eimâ heihsai tua leipa ta la, sports akheihawhpa rai tao hra u la, hlaotlohna hmeiseih y thei vei. Drugs taona chôta ta châ achuna liata khatluta thai theipa hmah châ hra u la hlaotlohna hmeiseihpa y thei vei. Patitheipa taona chôta la chhôhkha châta chyhsa phahnaipa a châ thei leipa ta, râh châ chhaota phahnaipa chyhsa a châ thei hra vei.”
“Chavâta atanoh ta thyutliapazy paritheipa tao tlâ lei awpa ta ei châ haw hmeiseih ei. Siaha District liata HIV positive a veipa hluh kaw ei ta, namâ sohsi kaw awpa a peimawh ngaita kaw. He zydua he paritheipa tao vâta vaw ypa sai a châ. Râh kyh eima pachâ khiahta la, HIV tawhzy ta eimâ boh awpa a byuh. He zydua tawhta eimâ boh thei n’awpa ta paritheipa eimâ râsai awpa byuh ta, chanô nata chapaw kyh liata eimâ sohsi awpa a byuh. Mylâ hânoh nôvah ahnei awpazy cha thisai test tua lymâ awpa chhao a byuh lymâ ngyu thei aw. Chavâta paritheipa adyuh sih la, tao tlâ lei awpa ta ei châ haw ei,” tahpa ta Dy. CEM ta pasyuna bie pha kawpa a reih.
Puhpa Beihu Nohro, Deputy Chief Whip, MADC chhaota pasyunabie pha kawpa reina a hnei hra.
Satlia Imanuel Rapha, Match commissioner ta tournament report piena hnei ta, Puhpa F. Lalrintluanga nata Laihsa Priscilla Nôtlia zy ta pahnie kawpa ta hlasapa ta zawpi ama palôhpahawh.
Final match he Tipa Dairy FC nata Tisi Kaopi FC zy ta amâ khaih aw.
Puhpa VL. Remruatpuia Nôhro, Senior Vice President, TZFA ta vote of thanks reina a hnei.
ISSUED BY:
Information & Publicity Department
Mara Autonomous District Council
Siaha.
