PRESS RELEASE
NO.6/2026
SIAHA, 23 Nawh, 2026 (Chutynoh): Atanoh dawh 11:00 AM khata Forest Hall, MADC Complex, Siaha liata Puhpa MH. Tiabi, EM i/c M/S, MADC & Chairman of Board of Mara Literature (BML), MADC chata Machâ Laichhua Syuhlô châbu ropa “Biehrai liata Nuhby zy” tahpa cha â palâhâh. Châbu palâhâhna programme he BML pachhuahpanohpa a châ.
Programme he Laihsa Femina Hlychho, Asst. Secretary, BML ta chhihtha ta, Rev. S. Beihruasa, Secretary, ECM KTP Hqrs ta Abeipa lâta pavaosana thlahchhâna a hnei.
Puhpa MH. Tiabi, EM chata, “Atakô kô thiehpa thla hmiatuapa NAWH (January) liata Mara reih ta châbu pha kawpa Machâ Laichhua Syuhlô ta “Biehrai liata Nuhby zy” tahpa vaw roh ta, palâhâh theipa a vaw châpa he aly âchhih hmeiseih,” a tah.
“Mara reih a cheihpa eima châ vâ deita ta District Council a hmôpa eima châ. Mara reih a lei lei n’awpa ta Mara reih ta châbu eima roh hluh via lymâ awpa he a peimawh ngaita kaw.”
“India lia heta chyhsa hluh ngâsâ pi ta, reih chhao a hluh ngâsâ hra. Mararâh Siaha District lia heta chyhsa eima chyh dâh cha Lakh khophie rachhôh deita eima y. Maluh eima chyh tu vâ heta Mara reih he pasô sih la, zakhei leipa ta cheih hluh via lymâ sih la, châbu roh hluh sih la, hard copy ta papua hluh via lymâ awpa he a peimawh ngaita kaw.”
“Machâ Laichhua Syuhlô chhao Mara reih ta châbu bu charu papua ha ta, papua hluh via lymâ awpa ta ei haw pâ heih hra. Atanoh he su liata avypazy châbu roh ta hard copy ta papua namâ chhuah chyu awpa ta ei châ haw ei.”
“Mara reih ta châbuzy a vaw pua hluh via lymâ thei n’awpa ta MADC ta Mara reih ta châbu a ropa, papua khohpa châta sôh 75% atôh awpa ta Executive Committee ta pathlu ta, Mara reih ta châbu papua namâ vaw chhuah chyu awpa ta ei châ haw chyu ei,” tahpa ta pasyunabie pha kawpa EM ta a reih.
Laihsa Emilia Nôtlia nata Satlia Joseph Zawtha zy ta pahnie kawpa ta hlasapa ta zawpi ama palôhpahawh.
Rev. Dr. ST. Zawsi nata Puhpa Laicho Nôtlia chhaota pasyunabie pha kawpa reina ama hnei hra.
Machâ Laichhua Syuhlô ta alynabie reina nata châbu raina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
ISSUED BY:
Information & Publicity Department
Mara Autonomous District Council
Siaha.
