PRESS RELEASE
NO.127/2025
SIAHA, 31 Phiata, 2025 (Chutynoh): Atanoh zâlâ dawh 1:00 PM khata Puhpa M. Laikaw, Hon’ble Chief Executive Member, MADC ta Tisi Forest Rest House a pahy.
Puhpa M. Laikaw, Hon’ble CEM chata, “Forest Department nata Forest EM tawhta Chief Guest châ awpa ta eina raopa ei he a rônah ei tah hmeiseih. Atanoh he Theiri nata Tisi liata reception rônah kawpa ta maniah vaw dy ei chi ta, ei phuh lei pi ta nâ vaw sy pâ heih ei chi ta, he he keima sia vâta nata tloh vâ châ leipa ta, nâmo Tisi khihsawzy nama palôhâhna a châ hri. Kei ta la asypazy he ei phuhlei tah na ta, khoh thai tyh va na. Anodeikua, atanoh ta einâ sypa ei chi he a eithôhna châ ta, Siata nata Chakhei liata eima hnôh via lâ kha nâ vaw sy ha heih ei ta, ei tlohleina vâta nata ei phuhleinazy pachâ na ta ei no chhao a za ngâsâ. Eima râh liata nôpaw khih nata khihpi viapazy he tlupo ta eina palyupalihpa ei chi he aly ngaita na ta, ABeipa ta byhnâ hluhpi cha pie ei sala. He hawhta District council palyupalihpa a châpa he zawpizy nama khokheina châ ta, a practical kawpa ta nama khokheina nama palâsapa he a rônah ei tah hmeiseih.”
“District council kô 50 a vaw sie tawhta, eima nôpawnah hmahlana zawhzi ta thyutlia vianahzy ta tahmâ daihti eimâ tyh theipa châ ta. Tisi liata tanoh Rest House pahy theipa a châpa he a rônah tah na ta, aly’pa a châ kawpa ta ei pahno. Forest department he council department hry liata ama raihria a pha chaipa ta pahno na ta, tahmâ he Siaha Tlâhpi liata charei n’awpa Park pha kawpa tao ngâhaipa châ ta, rei leita liata pahypa châ aw ta, cha hleikhô ta, Laki khih liata Forest Rest House chhao pahy thei daihmâpa châ bâ ta, he hleikhô ta, Sâphao a tlypazy amâ pahâ n’awpa y leipa ta, Lôdaw liata Rest House sa awpa pachhuahpanohnapa chhao siekhei ngâhaipa châ heih ta, Forest EM nata Forest Department zy ta he hawhpa hmahlana ama hneipa he eima râh, khih nata tlâh asset a châ hleikhô ta eima râh pôhpalôhpa asset châ ta. Hlâno via tawhta Marapazy pi heta, keimo private hmo châ leipa Public Property zy he pabohsana kyh liata eimâ phahla ngâsâ tyh, chavâta, public property zy he pabohsana lâ hmah eima la lymâ awpa a peimawh kaw. Hetawh chhaota hmahlana y via lymâ ta, zawpi ta eima pabohsa lei khiah a leilô lymâ aw, zawpi hmo ahlypazy he chado ta eima pabohsana kyh liata hmah eima la lymâ awpa he a peimawh ngaita kaw.”
“Tahma ta Conservator of forest raihriana a pha kawpa ta pahno na ta, keimo lâ he la officer raihria phapa he chyhsa ta ama thâpha reih thai veih ei, Mara culture liata a pei ei tah kawpa sâkha châ, ama thi khai tawhta ama thâpha reih tyh pi ta. Reithai tlâh a châpa cha reithai sih la, pasipa-ao a byupa la pasipa-ao sih la.”
“12 term MADC Sawhkhâna sie ngâhaipa heta New Maraland vision hnei pi ta, cha cha eima culture nata eima system pha khao leipa siesaipa ta, taopathi byuhpa taopathi lymâ eimâ chhuah. Eima râh he paduapathi’pa a peimawh kaw. He vision ry liana heta recruitment rules thiehpazy hleikhô ta ‘good governance’ a y thei n’awpa châta dâh nata phôhzy taopathi eimâ chhuah.”
“Khazohpa pahnopa ta paduapa eima châpa vâta chi hro pho hrozy chhaota MADC he maniah ama palyupalih kaw, chata a châ nona chata, Tisi khihsawzy District council chhihthatuhpazy nata nama hriaparaohnapa he pazao lymâ u la, Veiseih lôhah khih nama châpa nata chyhsa hropa bao tyhpa nama châna culture he pabohsa u la, ABeipa ta byhnâ hluhpi cha pie mawh ei sy,” tahpa ta CEM ta pasyunabie pha kawpa a reih.
Rest House pahyna programme he Puhpa Thaly T. Azyu, Conservator of Forest, MADC chhihthana ry liata ahmâhpa châ ta, Machâ S. Ngôchô ta Abeipa lâta pavaosana Devotion daihti â hmâh. Puhpa Beichatlaisa Azyu, ACF ta technical report piena hnei ta, Puhpa Tiahlei Syuhlo, EM i/c Forest, MADC ta vote of thanks reina a hnei.
CEM he Puhpa MH. Tiabi, EM i/c Education (M/S), MADC, Puhpa M. Chiadung, EM i/c Soil, MADC nata Puhpa Beihu Nôhro, Deputy Chief Whip, MADC zy ta ama zi.
Tanoh ta pahypa Tisi Forest Rest House he ₹25,88,675 hmâpa ta sapa châ ta, 42×32 feet ta a kawhpa a châ. Single room sâkha nata double room sâno a y. Living room chhao a y pâ hra. Kitchen he a no-eih ta sapa châ ta 24×20 feet ta a kawhpa a châ.
Puhpa LM. Beingalai, I & PO, MADC, Puhpa John M. Beilaisei, PS to CEM, MADC, Puhpa Ngôkô Chozah, DDK Stringer, Puhpa T. Pabua, Cameraman, Puhpa K. Nehemia, Cameraman, Laihsa Chhingpuii Azyu, Artist, Laihsa FC. Siteite, Artist nata Puhpa Lalnunfela NK, PSO to CEM zy chhaota CEM he ama zi thei hra.
ISSUED BY:
Information & Publicity Department
Mara Autonomous District Council
Siaha.
