PRESS RELEASE
NO.91/2025
SIAHA, 02 Thlazoh, 2025, Pachynoh – Puhpa M. Laikaw, Hon’ble Chief Executive Member, MADC ta Lôbô khih a tly.
Siaha tawhta Lôbô khih pangaipa ta eima siena lâta, Noaotlâh khih liata Puhpa Thangṭhuama, VC-1 Member O liata thopi miah vaw palôh dy ei ta, aly kawpa ta thopi eima doh khoh.
Lôbô khih liata Puhpa P. Beirangia, Lôbô-1 VCP O liata public meeting hneipa châ ta, he public meeting lia heta Puhpa P. Beirangia, VC Joint Chairman ta programme chhihtha ta, Machâ H. Nochô ta Abeipa lâta daihti pavaosana thlahchhâna a hnei.
Puhpa M. Laikaw, Hon’ble CEM, MADC chata, “Lôbô khih VC-1 nata VC-11 VCP tawhta Lôbô khih tly awpa ta hruana dao na ta, atanoh Lôbô khih ei kaw tly theipa he ei ly hmeiseih. Eima nôvah ta kaw tly’pa achhuah pi ta, eima nô deikua cha hmo peimawhpa a y vâta kaw sie thei khao vei. Eima nôvah ta eimâ khy thei lei vâta nama pachâthaina ei châ haw ei,” a tah.
“Eima phuh vâ châ leipa ta, he hawhpa palyupalihna eima daopa he palôh hmeiseih ta, ei châ ly hmeiseih ei. Keima nata ei hrialâhpa sawhkhâna alykheina a châpa hawhta pachâ na ta, Lôbô khihsawzy chô liata aly hmeiseih na ta District Council moh chhaota alynabie ei cha hlâ hmeiseih ei,” a tah.
CEM chata, “MADC 12th term liata keima chiehlei chaipa Khazohpa ngiachhiena topa nata ei hrialâhpazy khokheina topa ta CEM vaw châ na ta, ei hrialâhpazy deichhyna zawhzi ta atanoh taihta sawhkhâna siekhei pazao lymâ theipa a vaw châpa he, Khazohpa ngiachhiena vâ nata ei hrialâhpazy vâ deita a châ,” a tah.
“MADC 12th term sawhkhâna apalâ kawpa ta a sie lymâ thei n’awpa nata Khazohpa khoh dâh hawhta eima sie lymâ thei n’awpa ta thlah miah nama chhâkhei lymâ awpa ta ei châ haw ei. Tahmâ ta sawhkhâna sie ngâhaipa he ta goal sia kawpa hneipa ta, ryureina pathaihpa, ryureina dopa siekhei ta, new maraland vision hneipa ta he sawhkhâna he kaw sie pi ta, eima system bâhta thla byuhpazy thla laih pi ta, sawhkhâna he a sie ngâ kawpa a châ,” a tah.
CEM chata, “MADC miah pietuhpa he Mawrâh sawhkhâ châ leipa ta Central sawhkhâ a châ. Central sawhkhâ ta District council sâhrawhpazy heta ama chi nata pho pabohsa ei sa la, special constitution taopa sih la, ama chi nata pho palaiseihsa hra ei sala, tahpa khona vâta District council miah ama piepa a châ,” a tah.
“Eima District council he state ta a sa papuapa châ leipa ta, Central sawhkhâ ta a sa papuapa châ ta, Eima dâh nata phôh he state ta panano thei hra vei, Sixth Schedule panano theituhpa cha central sawhkhâ deita a châ,” a tah.
“Chavâta, Khazopa ta Missionary zy hmâpa ta chi nah pho ta miah padua ta, Awnanopa paduapa vaw châ ha ta, Awnanopa deichhy awpa nata sapa nata thlahpa liata tha patlô lymâ awpa ta Awnanopa nata District council he pachhaih thai’pa châ vei. Chahawh pyly hra chata, VCs, NGOs zy chhao hriaparaohna pha kawpa hnei lymâna chôta sawhkhâna siekhei lymâ awpa he eima palôhru a châ,” a tah.
“MADC liata sawhkhâ rai hriapazy paritheipa taona chô ta raihria haipazy ama pathleih thei n’awpa ta chance pie pi ta, a pathleih khoh leipa cha action eima la lymâ aw. Chahawh pyly hra chata, promotion piena kyh lia chhaota HoD zy chhaota ama thâtih achu lymâ pi ta, promotion hmôtlâh a châpa cha pathluana y leipa ta pie lymâpa ama châ aw. Biehneina lai viapa chhao a hlaotloh thei n’awpa ta hmahla lymâpa a châ,” a tah.
“Eima budget ta miah â khi khao leipa vâta biehneina lai viapa eima hiah ngâ kawpa a châ. Dâh nah phôh hmâpa ta pathluapaeihpa hnei leipa ta raizy la lymâpa a châ aw. Dâh nah phôh â bei chai awpa a châ,” a tah.
“Reikheituhpa hnei leipa chhao ama thâtih achu lymâ pi ta, Office kiahphapa, â do kawpa nata tiama kawpa ta rai a hria lymâpa cha promotion eima pie lymâ aw. Ahy hmah khokheipatluapa y aw v’ei,” a tah.
Puhpa MH. Tiabi, EM i/c Education (M/S), MADC chhaota biereina hnei hra ta, “Lôbô khih, ei bia zawpizy ta Puhpa M. Laikaw, Hon’ble CEM, MADC Lôbô khih tly awpa ta hrua ei ta, CEM ta ama hruana pachâ peimawh ta, Lôbô khih a kaw tly theipa he, aly hmeiseih na ta, biatuhpa ei châna lâ tawhta alynabie ei reih chanei,” a tah.
Puhpa Tiahlei Syuhlô, EM i/c Environment, Forest & Climate Change, etc., MADC nata Pihnô P. Nancy zy chhaota CEM ama zi thei hra.
Pihnô A. Nelly, MDC and Vice President, BJP Siaha District, Puhpa NT. Thatlua, Ex-MDC & President, Minority Morcha, Puhpa Thychha Chozah, Secretary, Siaha District BJP, Laihsa Thluakho Solo, Secretary, Siaha District BJP, Puhpa KT. Beipachharôna (Apaw KT), Co-Convener, IT, BJP Siaha District, Pihnô S. Nathlua, President, Mahila Morcha Siaha District, Pihnô Dellevan Hlychho, Vice President, Mahila Morcha Siaha District, Pihnô K. Juliet, General Secretary, Mahila Morcha Siaha District, Pihnô S. Ngiathlei, Treasurer, Mahila Morcha Siaha District zy ta CEM ama kaw zi thei hra.
Puhpa M. Laikaw, CEM, MADC he official lâ tawhta Puhpa K. Beingiachhie, Sr. EO (M/S), MADC, Puhpa Pawsa Lava, Asst. I & PO, MADC, Puhpa Lalnunfela NK, PSO to CEM nata Puhpa K. Nehemia, Cameraman zy ta ama chakaochahlâh.
Lôbô khihsawzy ta Viahchao nata Vao thie ei ta, he dei châ leipa ta, Awh nata Nga, etc zy chhaota CEM nata a kaw zi theipa zydua châta nata Lôbô khihsaw zyduazy chhaota aly kawpa ta kyhchhina pati dôhkhohpa a châ.
ISSUED BY:
Information & Publicity Department
Mara Autonomous District Council
Siaha.
