PRESS RELEASE
NO.63/2025
SIAHA, 23 Patô, 2025, Chutynoh – Atanoh dawh 1:00 PM khata CEM Conference Hall, MADC, Siaha liata Puhpa M. Laikaw, Hon’ble Chief Executive Member (CEM), MADC cha khichhai laipa (Chief Guest) châpa ta Inheritance of Property Act, 2024 nata Marriage & Divorce Act, 2024 Châbu a palâhâh.
Programme he Puhpa JB. Chozah, Court President & Recorder, District Council Court, MADC ta chhihtha ta, Rev. AZ. Beirakaw, Executive Secretary (Social Mission & Dev) ta Abeipa lâta pavaosana thlahchhâna hnei ta, Puhpa H. Vabeikhai, ACO, MADC ta report piena nata preview of the book a hnei.
Puhpa M. Laikaw, Hon’ble CEM, MADC chata, “Atanoh Inheritance of Property Act, 2024 nata Marriage & Divorce Act, 2024 palâhâh theipa a vaw châpa he ei ly hmeiseih. Kô 2007 liata buakha ta CEM ei vaw châ no khata Art & Culture nata Judicial he mo hropa ta to leip’aw ei chi ta, keima ei to aw, tahpa ta a vaw pahawh na ta, kha no tawh khata Customary Law vaw pachhuahpanoh pathao pi ta, Khazoh ngiachhiena vâta CEM ei vaw châ heih pataw nahta, Customary Law hmahla pazi pi ta, zâkô 2023 lia khata eima vaw released thei hapa a vaw châ, al’ypa a châ hmeiseih,” tahpa ta a reih.
“Zâkô kha Zyhno liata eima nawhtazy ama hnei nota Customary Law eima hmâh awpa a châ, tahpa ta ahawna tao na ta, eima hmâh pathao. Ahneina kyh liata kho dâh hawhta mâ eima haw tyhpa he a pha lei kaw. Yzie hnei leipa ta eima sie thlâh tyhpa he ei vei kaw tyhpa a châ,” CEM ta a tah.
Khichhai laipa chata, “Ahnei khai tawhta zâ apathlie daihti liata ahnei viapazy ta Motor hyhkha chhaota athyukhei awpa Dowry System hawhta eimâ pathlie tyhpazy ei za pachâ nahta, a hnei lei viapazy châta ngiachhi ama chhizie ei za pachâ nahta eima Society liata a hnei viapa nata a hnei lei viapazy likawh â zâ hlie tu ha, Awnano Assembly ta guidline tao ta zyh khoh pyly leipa pi ta, chavâta mara chi nah pho pabohsa n’awpa ta Customary Law eima tao ngâpa a châ,” a tah.
“Customary Law ngâlâh a daih leipa ta ryu to kyh liazy a sianô viapa ta eima sie lymâ thei n’awpa nata ahneina nata achhaihna a vaw y daihti lia chhaota yzie hnei viapa ta eima sie lymâ thei n’awpa ta Inheritance of Property Act nata Marriage & Divorce Act zy za peimawh lymâ pi ta, atanoh he châbu pha kawpa nata eima hmâh phahnai kaw awpa release theipa a vaw châpa he aly’pa pa a châ hmeiseih,” CEM ta a tah.
CEM chata, “Law & Judicial Department nata Art & Culture Department he top priority liata ei soh. Kô 2007 tawh khata hmah vaw la lymâ pi ta, eima festival lyuva khutlazy chhao regular kawpa ta vaw hmâh lymâ thei pi ta, aly’pa pa a châ hmeiseih. Eima chheipâh liata eima unawhzy heta eima dress zy he a ru lâta azyzyh ta miah lapa lymâ ei ta, a chhâna lâta cha keimo hmâchhâh a to khao lei’pa eima lyu thlâh ,” tahpa ta a reih.
“Customary Law, Inheritance of Property Act, 2024 nata Marriage & Divorce Act, 2024 he marasaw chi nah pho chhâ a kaw sie lymâ awpa liata mei-ôh lâthlôh miah chhituhpa chi nah pho eima chânapa miah duakheituhpa justice miah padotuh awpa ta hmâh pathao bâ awpa a vaw châpa he a rônah ta na ta ei ly ngaita kaw,” tahpa ta CEM ta a reih.
Puhpa C. Siatha, J.O (SDCC) ta vote of thanks reina a hnei khai tawhta Abeipa thlahchhâna (The Lord’s Prayer) reihparaohpa ta daihti pachhâsapa a châ.
CEM he Official lâ tawhta Puhpa Pawsa Lava, AITO, MADC nata Puhpa K. Nehemia, Cameraman MADC zy ta ama chakaochahlâh.
ISSUED BY:
Information & Publicity Department
Mara Autonomous District Council
Siaha.
