BML Issue September 2020

              Editorial

 

               Eima Mara râh hmahsie n’awpa heta Mara saw maihta cha sadu eima thlie chyu tyh hr’aw nahta pangiasa â chhih. He Mara râh he adona, ngâchhihna, tiamana, ativynazy ta vaw bie sala tahpa ta saduthlie tyhpa sai eima châ nahta pangiasa â chhih.

              Anodeikua he eima saduthliena zydua he eima râh luhpa nah tao awpa nata hria awpa ngâlâh ta a pachâpa he a hluh via syulyu cha eima châ heih nahta pangiasa â chhih.

              Eima râh pha n’awpa heta Politician nata Awnanopa ngâlâh heta maohphaoh leipa ei ta, eima zydua, moto heta tao theipa hnei chyu pi ta, hria theipa nata thaipa chhao eima hnei chyu hra.

              Keimo mo pakha, ochhôh, vaih, khih liata eima maohphaohna chyu he patlô chyu tyh sih la, keimo mo pakha chyu he ativy achhuah chyu sih la, sawhkhâ pabua abyuh leipa ta keimo kuphei ta a duah achhuah chyupa ta aduah tlai hr’aw sih la, eima râh cha thlai ativypa ta, râh hmahsiepa nata râh phapa nata ngiaryh chhihpa eima châ tahna a vaw châ aw.

              Ativyna he hmahsiena a châ hleikhô ta ti nata râh, chi nata pho abohna thabypa nata peimawh ngaitapa a châ tahpa c hhao he eima my awpa châ leipa ta, khatino tai ta palôh liata atheipa ta, ativy achhuahpa ta nohto rai eima hria awpaha peimawh ngaita.

              Raihria tahpa heta lyu tlyma, sahdô tao tlymâ ngâlâh he pahly leipa ta, hmo hropa, sôhpaliepa tlyma, sôh hmô thei n’awpa ta â do kawpa nata Khazohpa khonazie nata Khazohpa ta byhnâ a pie tlâh awpahta raihriapa ta, hlaotloh cheingei eimâ chhuah awpa a châ.

              Sport a pahâhpazy ta sport liata hlaotloh cheingei achhuahpa ta, nietluana châta hmâh thei cheingei achhuahpa ta tei hualua ei sala, cha hawhna hra chata music, kuzô thaina hro hropa ahneipazy chhaota tiama papua via lymâ sih la, thaina sona hropa a hneipazy chhaota râh châta nata sasyh ativy thei awpa ta palôh hnei kawpa ta ama thaina nata sona ama hmâh via lymâ a byuh hra.

              He Mara râh ativy n’awpa nata hmahsie n’awpa heta chyhsa hropa nata pho hropa zy, sawhkhâ nata politician nah zy hlâta keimo mo pakha chyu he eima peimawh chai tahpa pahnopa ta hmialâ tôh lymâ ei suh u. Na râh châta khâpa e na tao hra aw?

 

 

 

 

BOARD OF MARA LITERATURE

MARA AUTONOMOUS DISTRICT COUNCIL

SIAHA

 

NO. BML 36/EDN/B/ 2019– 2020/2                       

Dated Siaha, the 20^th Thlazoh, 2020

 

Board of Mara Literature Meeting 2020

Biepathlupazy:

 

 

 

A su                                                : Puhpa K. Hrâhmô, EM (Edn), Office, MADC

A daihti                                        : 20^th Thlazoh, 2020 @ 11 : 00 Am

Chairman                                    : Puhpa K. Vanlalliana, Secretarey, BML & Sr. EO

Minute Secretary                  : Puhpa MC. Pâbei, Asst. Secretary, BML

Manôh ahlao theipa zie : 13

 

              Chairman ta Puhpa JB. Khaisia thlahchhâ awpa ta hrua ta, thlahchhâ khai tawhta ryureina pathaopa a châ.

 

1)                   Zâkô ta eima bie pathlu chiehpa H. Sawlawmaw, B. Tekô, Laila Khithie zy hla achuna Seminar pachhuahpanoh awpa kyh, Covid-19 vâta pachhuahpanoh thei khao leipa daihti ryhpaohpa liata hnei awpa khona kyh reipa châ ta, kô 2020 chhôh liata hnei hmâpa châ sala tahpa ta pathlupa a châ.

 

2)                  Mara reih Hlaphôh areipasuana pachhuahpanoh awpa khona kyh reipa châ ta, agenda hawhta pachhuahpanoh awpa ta pathlupa châ ta, a daihti deikua Official zy ku liata sopa a châ.

 

3)                  Sign board miano (2) taw  baichhi awpa khona kyh reipa châ ta, palôhraoh kawpa ta a pyhpa a châ. A daihti nata taw n’awpa su deikua Official zy ku liata sopa a châ.

 

4)                  ‘AWPAH’ tahpa liata ‘H’ bai lei awpa khona kyh reipa châ ta, vâro reipa a châ tawhta  ‘AWPAH’ tahpa liana heta ‘H’ bai khao lei awpa ta pathlupa a châ.

 

5)                  Phurâ khih liata Mara reih Seminar daihti rypaohpa liata pachhuahpanoh awpa khona kyh reipa châ ta, palôhraoh kawpa a pyhpa a châ.

 

              Daihti chhâna lâta BML Secretary, Puhpa K. Vanlalliana ta pasyuna bie reih ta, BML member zy cha Mara Literature hmahsie n’awpa nata laiseih n’awpa ta, ama thaina nata sona hmâh via lymâ ta, BML khozie pabohsatuhpa châ chyu awpa ta a pasyu ei.

Daihti chhâna châta Bei thlahchhâna reipa ta daihti pachhâsapa a châ.

 

 

 

 

Sd/- K. Vanlalliana

Secretary

Board of Mara Literature

MADC, Siaha

 

 

 

 

 

KÔ 2019 – 2020 CHHÔH TA

BML HMAHLANA REPORT

 

1.       Hla nata Bie, Magazine thlachareih ta papua pazao lymâpa châ ta, Thlazoh (August) 2019 issue tawhta copy 750 pataosa tyhpa cha Copy 800 lâta a copy papôhpa châ ta, copy 50 cha Nochhi Mara râh lâ a saipa ta paphao tyhpa a châ.

 

2.      Mara reih thapasana “Mara reih hmahsiena nata hmahsie via n’awpa” tahpa biepipa hmâpa Essay aropasuana  pachhuahpanohpa châ ta, târi 15^th Phiapi, 2019 noh ta Forest Hall, MADC liata result phuahna nata lymâ raina hneipa a châ.

 

Lymâ a daotuhpazy cha hezy he ama châ :

1)      Sâkhana               : AZ. Beimopha, Amôtlâh

2)     Sânona                 : Ahnei Johly, Meisavaih East

3)     Sâthôhna             : Felix T. Chozah, Amôbyuh ‘B’

 

 

3.      Mara reih palaiseihsa châta Vâ-ia châpaphaopa (Love Letter) aropasuana pachhuahpanohpa châ ta, târi 15^th Phiapi, 2019 noh ta Forest Hall, MADC liata  result phuahna nata lymâ raina hneipa a châ.

 

Lymâ a daotuhpazy cha hezy he ama châ :

1)      Sâkhana               : RC. Beiduakhei Nôhro, Tisi

2)     Sânona                 : Beikhotly L. Mara, Chhaolô

3)     Sâthôhna             : Sachhua Chozah, New Colony -IV

 

 

4.     Mara reih hmahsie via n’awpa ta, Middle School achuhaipazy châta Mara reih ta Hlaphôh areipasuana (Recitation) pachhuahpanohpa châ ta, târi 15^th Phiapi, 2019 noh ta Forest Hall, MADC liata  result phuahna nata lymâ raina hneipa a châ.

 

Lymâ a daotuhpazy cha hezy he ama châ :

1)        Sâkhana              : Allanis Beinônai Litho, Ryusa Elementary School

2)       Sânona                : Felina N. Kristangia, Theiva Middle School

3)       Sâthôhna            : Prisilla Beiryraongia, Gov’t. Comprehensive Elementary School

 

 

5.      Mara reih pabohsana Sign Board cha miano, Tipa ‘V’ liata nata Kaochao ‘E’ hleidy kiah liata tawpa a châ.

 

6.        Mara Writers’ Club tawhta kôkha châta, Mara Book of the Year atlyhna lymâ châta sôh maniah ama hiana, BML meeting ta a paryhsapa hawhta Rs. 25,000/- piepa ama châ.

 

7.        BML buakheina ry liata he ary liata châbuzy he 2019 – 2020 chhôhta palâhâhpa a châ.

 

(1)               India – Myanmar & Mara Political thâtih thabypa           

-         K. Vâbeihmôsâ

(2)              Phurie ~ Robert B. Syuhlô

(3)              Ei Kuzô ~ L. Beimokhai

(4)              Texas Thlavaw ry lia nâ tyh mah y    ~ Laicho Nôtlia

 

 

8.     BML Library chhao siekhei lymâpa châ ta, atahmâ he châbu 169 paso (collect) haipa  a châ.

 

9.        H. Sawlamaw, B. Tekô, Laila Khithie zy hla achuna Seminar pachhuahpanoh awpa tahpa kha Covid-19 vâta Nationwide Lockdown zy vâta pachhuahpanoh theipa châ mâh leipa ta, rypaoh tua chaipa liata pachhuahpanoh achhuahpa a châ.

 

 

 

 

(K. VANLALLIANA)

Secretary

Board of Mara Literature

 

 

 

Hmialia meihthâhpi

~ L. Beimokhai

 

              Kô 2006, nopi meihthâh azawhpa ta, chiamariapazy ama sâh lichih châ ta, nohkha cha tao awpa peimawh kawpa ei hnei hlei leipa vâta charei chakhyh laih na ta. He ei charei laihna liana heta, keima châta nata S. Siamkungi châta peimawh ngaitapa hla, ‘Hmialia meihthâhpi’ tahpa hla a vaw pih n’awpa châta daihti eihpa nata, ei palôh liata hlaphi awpa ta na tah raruahtuh awpa ei vaw tyh haw.

              Ei khiehlai laihna liana chata o miakha he va tlô na ta, cha okah liana chata laihsa pakha he a vaw tyuh thlâh ha ta. Eina vaw hmô pataw nah chata, “Khâpa na tah aw?” tahpa ta bie cha thlai nâ vaw chho ta. “Ei charei chakhyh laih” tahpa ta thlai achhy na ta. Cha laihsa chhao cha â vaw khie chakhyh laih hrapa he vaw châ ta, chyhsa hropa apakyh awpa ama y vei tawhta cha, a yna okah liata atyuh chy hra awpa chata thlai na hrua ta, keima chhao chata, tao awpa y leipa, yruna vâta a khiehlai laihpa ei châ hrapa vâna chata, a hruana cha veihlâ bie palyusa kaw hr’aw sala, paeipachhia leipa ta, âtyuna kiah liana chata atyuna thlai aparyh ha hra na ta.

              Buakha tlai biehropazy reihpa ta eimâ tyuh tawh chata, “Hmo cha pataosa  awpa khoh kaw tyh na ta, ei kâ deikua chhie pâ ha tyh ta” tahpa ta vaw reih ta. Kei chata, “Khâpa hmo rimâ maw? Na vaw chho bao, tao theipazy ei hnei  khiahta cha ei cha taopa hr’aw kha my” tahpa ta thlai achhy heih hra na ta. A hmia liana chata thiapawh ta bielôhawhpa eima reih thaoh notahpa hlâ khata hmeiseihna hmia a phaoh via ha tahpa chhao pahno thei thlâh ha na ta.

              “Khâpa hropa chhao châ hlei leipa ta, hla cha paphisa awpa khoh kaw tyh na ta mâ my”  Hla na paphisa awpa a khohpa cha hluh kaw tyh ei ta, hlasa thaipazy heta cha ama sa awpa khohpa ta hla maniah hiah tyh ei ta, anodeikua hlasa beih vei, tahpa cha pahno thlâh ha tlôh na ta. A biereipa ki tawh chata chyhsa hluhpi hawhta, â tyhpa tawhta nata a hro tawhta tlyma, a thâtih na chhopa ta hla na paphisa awpa cha a khoh hra tahpa chhao ei pahno thei thlâh haw.

              “Chy, hla cha phi tyh hr’aw sala, a phi thai kawpa chhao châ leipa na ta, khâp’awpa maw, na khoh rai?” Tahpa ta hiahri pakhua pâpa ta palie na ta. Ei pangiasapa hawh tlai chata, “Ei thâtih zydua hih cha chho khai h’aw sala, cha tawhta hla phi la tahpa khoh kaw na ta, deikua chyhsa ta ama pahno awpa la khoh va na. Nâma ta ngâlâh na pahnopa la, ei bieru zydua cha chho khai h’aw na ta, nâma ta na nyupa kaw mah y”  vaw tah heih ta. A hmiapahaozie tawh chata tah chakhyh leipa ta, a palôh hmeiseihpa ta eina chho, tahpa cha pahno thei thlâh ha na ta.

              “Na thâtih nata, a hla siezie awpa na khohdâh cha na chho hra tua rai la, deikua la, hla he khatino rai ta a phi thei thlâh hapa châ leipa na ta, ei palôh liata na duahmo hawhta a vaw paduasa heih tua hra awpazy byuh aw ta, ei vaw phi hawhpa chhaota na pachâ thai la, deikua la vaw phi awpa la ei chhuah cheingei aw” tahpa ta chho na ta.

              Ano chhao chata, “Pei vei, na phi thei ti maih ta vaw phi la, hlasa thaipa hry liata na kho chaipa vaw pasasa pâ la, a hla moh nata ahyma na pasasa tahpa cha na chho la â daih thlâh ha. Deikua la ahy hnoh hmahta, keima ta ei cha paphisa tahpa la chho tlâ lei awpa ta ei châ haw. Ei thâtih nata ei cha paphisana chhâpa la na vaw reih hapa, chhaota, keima deikua la na vaw phuah khah y, ngiachhiepa ta” tahpa ta vaw reih heih ta.

              Keima chhao chata palôh apahy kawpa ta, “Um, cha phuah tiarâh aw va na. Na ngâ la, na thâtih cha na vaw chho bao” thlai tah heih hra na ta. A hmia liana chata hnôhlâ daihti vâna cha, ku ta ropa ta y vei hra sala, pachâpadyna mokhaoh chata hmô thei thlâh ha na ta. Â tyuna dyuchhai cha keima yna lâ a vaw pahniapa ta a vaw paryh pathi ta, lâpi lâ cha aheihhâpa ta, chyhsa amâ vy nahta vy lei cha moh khai ha heih tua ta. Vâhneichhih kawpa ta chyhsa akhiehlaipa nata eimâ tyuna su lâ â vy chhuahpa ama y leipa vâna chata, pachâ pha kawpa ta, a pachih cha liahsa palâ ha tuapa ta, a hu cha minute hluhpi, tiry lâ angia awpa hawh heta sy ha heih tuapa ta, a thâtih cha he hawhna heta vaw reih ha ta.

              “Cha chho awpa chao ei kâchhie kaw, deikua ei palôhpasana nata ei palôhhiahna he cha chho ta, hla ta na phipa cheingei la, tahpa khohtu ha na ta, hla ta eina phipa ha chi khiahta la, ei palôhlie châhta nahthlie tyh aw na ta, ei yrupa chhao a pai via thlyu aw.

              Chapaw pakha nah heta a vaw tyh pi ta, kyh a pachâ kaw pi ta, eimâ khoh kaw hra. Nohkha ta eikha chhâ a hmô leipa ta y thei leipa pi ta, keima chhochhi heta la khatino rai ta vâ thlâh ha tyh na ta, buakha ei hmô leipa chhao ei palôh â vaw lie hmâ thlâh ha tyh.

              Hmoto a chhie pha achho lymâ tyh pi ta, ei pachâna nata ei palôh zydua chhao he ano lia sai ta y ta, a no tawhtapa he ahyta hmahta ei mokhaoh nata palôh he na lapa thei hra veih ei.

              Cha hawhta noh nata daihti eimâ hmâh hai no chata, chyhsa ta eima likah liata bie taopa ta, haipa ta eima likah parao awpa ta miah vaw pabua thlâh ha ei ta, cha bie ama taopa vâna chata likah ziza taopathi thai khao lei awpa ta miah vaw pachhaih ha ta. A pasa tah na ta, ei sapa nata ei palôh heta a tao ngaita tyh.

              Atahmâ taih heta kyhpachâ na ta, chyhsa hropa eih châpa ta lahpinô a hnei tawh chhao heta my thei leipa na ta, ei palôh liata abei chai ta, ei mâlâ taih heta ei hmô ngâthlâh ha tyh. Khiliah liata ahmô pi ta, bie einâ chho leipa khiahta la pasa kaw tyh na ta, a ru lâta mothlih ei vaw pathla hmâ thlâh ha tyh.

              Atyhheihna daihtizy vaw chhi tyh hra sala, bie eimâ chhopa chhaota khahlâ hawhta y thai’pah châ khao va, ei palôh yna bie hleikhô reih awpa hnei beih va na. Deikua â ryh khao vei, lôh miakha phaoh awpa ta la, kaolâh hneipa ta saliah nawhhly apyh ha tlôh ta.

              Nohchareih ta saduthlie tyh na ta, kha eimâ lyna nohzy kha vaw kua thai sala, khatlu ei ly aw vâ tly! Alypa ta pahneihsilipa ta apyh ngâ kaw awpa he khoh tyh na ta, anodeikua keima saduthliepa vâta daihti a sie chiehpazy cha vaw kua thai khao rimâ awpa châ khao tlôh ei va. A châhta cha ei palôh ta pasaihlei kawna chôta maochhie pâ tyh na ta, dyhhro châ awpa tlai khazie lyuhbie eina hlâ chi? Tahpa ta.

              Khatita ma keima châ heta alyna noh cha a chhi aw, tahpa ta nohchareih pachâpa ta sai tyh na ta, deikua cha noh cha vaw chhi thai khao aw vei. Kaolâh hneipa ta saliah nawhhly apyh ha ta, keima châta hmialâ daihti zydua cha zoh khai ha ta, ei hmia liana heta meihthâhpi chha kaluhpa  ta nâ ti khâh ha ta, ei hmialâ daihti rai hmô thei khao tyh va na.”

              A biereipa cha achalihpa ta akhu thlâh ha ta. Kei chata, “Cha rakha cha mâ?” thlai tah na ta. A no chhao chata, “Um, cha rakha ei cha chhopa chata na patu thai thlâh ha aw ei pangiasa, a khôlâ la nâma ku liata y bâ sy” vaw tah heih hra ta. “Um, ei vaw phi chhuah khawh. Deikua la ei palôh zydua, nâma duasu liata a vaw paduasa ha tua aw na ta, charâta ei vaw phi thei leipa chhaota na pachâ thai la, ei phi khai ti, chyhsa ta ama sa tita ei cha chho sy” tah heih hra na ta. Ano chhao chata cha cha pha vaw tah hra ta.

              A thâtih eina chho khai tawh chata, eimâ tyuna o hneituhpa nah liata ama laihsapa chata thopi miah kaw pie ta, thopi miah kaw pietuhpa chhao cha, eima kiah liata a vaw tyuhpa ta thopi cha a vaw doh ha hrapa vâta bie hropa reih thai awpa vaw châ khao leipa ta. Eima pathôh chata thopi do pâ ta, bielôhawhpa hropa cha reihpazi ha pi ta.

              Cha hawhta hla na paphisa awpa ta laihsa pakha ta a thâtih eina chho tawh chata, ei palôh ta a duahmo awpa liata a paduasapa ta, a khozie hawh tlaita hla ei phipa thei n’awpa chata ei palôh pachâna cha hmâh pathao hra na ta. Anodeikua, chyhsa hropazy hawhta khoti maihta hla a phi thei thlâh hapa ei châ vei tawhta cha, a rai vaw ru ngaita ta. Na ngâ ta, a thâtih zydua na chho khohtuhpa hnabei padysa awpa cha khoh hra tlôh leipa na ta.

              Daihti vâro a sie tawh chata Târi 8^th Phiapi (November), 2006 zâ vaw châ ta, ei chhôhpadâhpa liata keima deita ta totâ tôpa ta ei y thlâh ha nona chata, laihsa ta a thâtih eina chhopa kha a vaw thei heihpa ta, ei palôh liana chata hla chhao a vaw ngia ha ta. He hawhna heta hlabie cha a vaw lâ laih ha ta:

              Alypa nata thapha kawpa ta ama charei  hai nota, ama likah liata bie taopa ta, ama likah ziza vaw parao ha ta, azaona hnei pakhua khao lei awpa ta amâ vaw chhaih hapa cha he hawhta hlabie ta a châhkhana châta a vaw lâ ta:

 

Chhôhsa lypa ta charei no ta,

Sikhô lyuhbie vâta ma;

Ei chhaih ha chuh, kei nawhhnai heta,

Tao thai a ru, a pasa tu’ na.

 

              Lyuhbie paryh heihpa ta, hrochhôh kaokhoh awpa ta saduthliepa ta, a saduthliena cha hraoleipa dei châ ta, lahpinô hropa hnei thlâh ha pyly awpa ta vâti a vaw hrialâhpa cha pei tah kaw ta, cha cha he hawhna heta hlabie ta a châhnona châta a vaw lâ heih ta:

 

Rairao saduthlienazy he la,

Hraoleipa dei a châ tyh;

Khazia dyh hro châ awpa tlai chi,

Vâti cha ei naw hrialâh tlôh chi.

 

              Hnazô tyyhheihna nohzy vaw chhi tyh ta, anodeikua hnôhlâ daihti hawhta bie achho ta, a hrâkyu awpazy a vaw ryh thai khao leipa ta. A chapawpa hra cha kaolâhzy hnei khai ha ta, palôh yna bie dei leipa cha reih thai’pa châ khao tlôh va. Cha cha a châhthôhna châta he hawhta hlabie a vaw lâ heih ta:

 

Hnazô tyhheihnazy vaw chhi tyh,

Lôhhiah bie dei ahlâ pi;

 ryh khao vei, lyuhbie paryh’pah,

Saliah nawhhly apyh ha tlôh chi.

 

              Nohchareih ta, hnôhlâ daihti cha pachâ tyh ta, vaw kua thai tlai sala tahpa ta saduthlie tyh ta, cha a saduthliena cha a hmeiseihpa râh vaw tlô thei sala, aly kawpa ta pahneihpa ta, khôpheih chô liata apyhpahly ngâ kaw awpa cha khoh ta, cha a khona cha a châhpalihna châta he hawhna heta hlabie a vaw lâ heih ta:

 

Nohly chhiki ta sai pachâ na,

Hnôhlâ daihti kua thai sa;

Pahneihsili ta khôpheih chô tawh,

Nawh hawh ei châ pyh awpa tlai chuh.

 

              A hmialâ daihti cha azohkaluh hapa ta pahno tyh ta, a hmialâ daihti sai awpa chhaota, a hmia liana chata meihthâhpi chhakaluhpa â ti thlâh hapa ta pahno tyh ta, a châta alyna noh a chhi hra n’awpa noh cha khâ sai tyh ta, cha cha a chaneina châta hlabie a vaw lâ heih hra ta:

 

Khati kei châ lyna noh chhi aw,

Nohly chhiki ei sai tyh;

Lytlâh bypi na khôsai tawh chi,

Hmialia meihthâhpi nâ ti khâh chuh.

             

              A hla aony chhaota zâkha ta ei palôh liata â vaw lâ khai thlâh hapa cha aly ngaita na ta, laihsa nah chata rei leipa liata eimâ hmô heih pataw nah chata hla ei phi khai hapa thâtih cha chho na ta, a no chhao aly kaw ta. “Nâma ta na khopa maih vaw pasasa la, na chho heih mah y” na tah ta. Kei chhao chata, “Chata sy” tah hra na ta.

              Ei phi tawhta daihti rei leipa liata S. Siamkungi cha hla na hiah awpa ta eima o nawh kawpa cha za pangai thlâh ha ta. He hla hmialia meihthâhpi tahpa he sapa na ta, a no chhao chata a khozie vaw châ kaw hra ta, apachu ha pi ta. S. Siamkungi ao nah chata a vaw tla ngaita ta, ei pachâpha leina lâ ta zawpi pasôzy vaw hlao kaw ta, Siamkungi ta a sa thaoh no tawhta hiahrina khâ ei dao ngâthlâh ha tyhpa, “Hmialia meihthâhpi, tahpa hla kha na phina chhâpa na chho tua” tahpa ta hiahrina ei dao tyhpa cha, atahmâ ei phi tawhta kô 14 daihmâ a sie tawhta, he châpaw (Article) hmâpa heta ei vaw reihpasia. Ei hlaphipa na pasôpa ta, a vaw nahthlie tyhtuhpa zydua hnohta alynabie reih hmeiseih na ta, hla na paphisatuhpa laihsa nata a satuhpa S. Siamkungi hnohta chhao ei ly hmeiseih hra.

 

 

 

 

 

PAHMÔHPI HRO TA

MIAH A PACHUPA CHA !

 

 

~ J.B. Khaisia ( Mara Writter)

 

 

                    Marapa saw pitloh palôhhâhpa rakhapa momaih heta cha pahmôhpi a pahno leipa eima y nahta pangiasa leipa na ta, anodeikua a phana lâchhâh ta a reihpa eima y lalih nahta a ngia leipa ta, eima manô mapawzy daihti tawhta tanoh taihta a chhiena lâchhâh deikua reih awpa a hluh kaw thlyu aw. Achhâpa cha Marapa ta eima sahroh zaopa hry ta khichhai âhmie châta eimâ pachy chaipa ‘AWH’ a nie thaipa a châ vâta a châ chai nahta â ngia.

                    He lyurâhpa pavaw (Pahmôhpi) no-aichhih kawpa nata eimâ hao kaw tyhpa ta eima hro châta miah a pachupazy bâhta reih’pa khoh kaw na ta, chavâta na palôh rie nâ pahy kaw awpa ta ei châ haw.

 

1)                            Pahmôhpi cha avâ liata a chareina asâh ta, bobyzy nata pavaw kalihkathâh a hmâhpa sahlao hry liata pahrâ beih leipa ta, pahmôhpi ta zilih a chahâna su liata pavaw hropazy ta tlô hra veih ei. Chahawh hrana chata nâ chhao chyhsa riarô akopa, palôhrupa buahpa, chyhsa kyhchhie reih thaipa nata a hohhiah thaipazy charei pha leina zilih liata charei awpa achhuah lymâ teh.

2)                           Pahmôhpi heta saichhieliena, pachâchhieliena (Vision) hnei pha kaw ta, chô lâ 5km â hlapa tawhna khi ta alei liata alao nie awpa cha mohpasia thlâh ha ta, cha cha pangaipa ta thatlô kawpa ta a zawhnao ta, khâpa ta hmahta a mo paviasa beih leipa ta, â chhuahna cha âdy kawpa ta liahsa a mohpasia tyhpa a châ. Nâ chhao nah mo chhuahpa cha liahsa moh ha la, khâpa ta hmahta na palôhrupa paviasa pasaih leipa la, na hlaotloh hlâ via cha nah mo chhuahpa cha khâchâ achhuah thlâh ha teh.

3)                           Pahmôhpi cha hmohrohhneipa a thi chiehpa nie beih zawrâ leipa ta, a thiehpa sai ta â chyh tyhpa a châ. Nâ chhao ta, nâma liata hmoparohpa nata a chhohpa hmo khô chiehpa taopathi thai khao lei awpazy ta a pabuasa leipa la, pachâna thiehpa, achhuahna thiehpa nata thlahpa thiehpa ta atobi lymâ teh.

4)                           Pahmôhpi he thlihpipa a chi leipa a châpa dei châ leipa ta, a tlaichhai kawtuhpa tlao a châ ualua aw. Meihdo vaw zoh (Meih a vaw chhoh) via, thlihpi pathlipa a rarôh a vaw y via no heta a thapawh tyh ta, ano tha hmâpa ta a zawzâ leipa ta, thlihpipa pathlipa hry liata a mathlaw pakaipa ta âsâh kawpa liata a charei tyhpa a châ. Nâ chhao buana nata rairunazy a vaw tlô daihti liata hnabeidy thlâh ha leipa ta, chazy chô liana chata na mathlaw (ngiapâna mathlaw) pakai la, cha rairuna thlihpipazy cha nâma châ chalotuhpa a vaw châ aw.

5)                           Pahmôhpi ta a nao sialia kawpa ta mo hropa angâhchhâ chakhyh beih leipa ta, a pasia tua lymâ tyh. Keimo chhao eima chakaolâh awpazy cha eikha thlahrai ta zo chakhyh thlâh ha leipa ta, pahnopasia tua tyh awpa a châ.

6)                           Pahmôhpizy a vaw machâ via nahta a mathlawzy a tha vaw chhâ via laih ta, a khodâh hawhta thatlôpa ta azaw thai khao leipa ta a y vâta thi ngâhpa ta (thi awpa hâpa ta) a vaw châ tawhta cha su dâhthlohpa liata anyupa ta ahmi parohpazy py khaipa ta, hmi thiehpa a vaw thao tawhta â nyuna su tawhtapa cha ama pua sai heih tyhpa a châ. Keimo chhao he chiehleinazy hneipa ta palôhrupa thachhâ panyuna daihti liata eimâ pathieh pathi heih thei n’awpa su pangaipa ta, hmoparohpa pha khao leipazy cha chatho pathlahpa ta nôpona nata phaohri zydua chhaota Bei zisu ngaipa ta a no ta miah a taopathi heih aw tahpa pahno ei suh u.

                    He pahmôhpi, khâpa saw ta eima rei leipa hro tawhta achu awpa a ypazy he eima hro nahta a pakho ei sih la, mopâtlâh a châpazy amopâ ta hmâhpazi achhuah lyhlia awpa eimâ khokheipa a châ. “CHYHSA DEI LEI CHA PACHU A NGIAH VEI”.

Ei châ ly kaw ei.

 

 

 

Machâ reih

 

 

1)       Ati                      : Ahnei, tyh, nôvah ta ahneipa

2)      Achyuh            : Nôvah châta hiapa

3)      Angie                : Palôh liepa ta hlasapa

4)      Angiah           : Palôh ta vâ ngaitapa

5)      Ahai                  : Atai, ahluah

6)      Ata                     : Atahmâ

7)      Atazâhnia      : Atazâ, a zâhnia

8)     Atlao                 : A pâhria, pâhria

9)      Atlaopâ           : A y khao leipa, a leidia hawpa, a thipa

10)  A ry râh           : Viah râh

 

1.    Editorial                                                                                   2

2.   R.A. Lorrain Hlaphôhzy            

                                          ~ Laicho Nôtlia                  3

3.    BML Hmahlana Report                                                      11

                                   

4.   Pahmôhpi hro ta miah a pachupa cha

                              ~ J.B. Khaisia                                 14

5.    Chhâzaw châta reihpipa ta chahnaopa-ipa

                                    ~ Samuel Hnaihly                                    16

      6.   BML Meeting biepathlupazy                               19

7.   Siaha Town nata pathaihna 

                                                  ~   Rev. Thylua Hlychho           21

8. Hmialia meihthâhpi

                                          ~ L. Beimokhai                   25

9. Mara reih rozie dopa                                                             31

 

 

 

Mara reih rozie dopa

 

 

Kha(m)              : Kha kha khâpa a châ(pro)

                               A kha a seih kaw.

Kha(r)                : Tao kha, hria kha (Adv)

                               Lâbuah a kha (Adj)

Khah(d)             : Hmo pha leipa tao khah ei suh u (adv neg)

 

Khâ(m)              : Khâ a reih (adv)

Khâ(r)                : Khokhâ a chôh(Verb)

Khâh(d)             : Tao leipa ta ama khâh ha(verb)

 

Khaw(m)           : Ochhi a khaw (verb)

Khaw(r)             : A khaw ama pahy(noun)

Khawh(d)         : Khawh â vy ngâ khawh(adv)

 

Khy(m)              : A khy mah y(verb)

Khy(r)                : Châhna baipa â khy(verb)

Khyh(d)             : A khyh veih ei(verb)

 

Khi(m)               : Khi lâ ama khy(adv)

Khi(r)                 : A rih a khi(verb)

Khih(d)              : Khih a deih haw(adv)

                              Siaha khih liata a y(noun)

 

Kho(m)              : Court liata amâ kho(verb)

                               Ama doh amâ kho(adv)

Kho(r)                : Kho â pao kaw(adj)

Khoh(d)            : Khoh ama tô(noun)

                               Â khoh ngâsâ(adj)

 

R.A. Lorrain Hlaphôhzy :

 

~ Laicho Nôtlia

 

 

              Abeipa Zisu ta Khizaw pachha n’awpah ta a hro â hlâpa hawhta, R.A. Lorrain chhao ano hrona dei châ leipa ta, ama chhôhkha zydua chhaota Mara sawzy pachhapa ta eima y thei n’awpa ta ama hro ahlâpa ta, Mara leilô liata buchâh nata doh-lei lâta amâ lie khai. Khizaw liata khih rônah chaipa tawhta khizaw râh liata khih chaki chaipa, ama pahno beih leipa khih cha ama tlô. Ku rai hria beih leipa cha, Mara sawzy kyhpachâna vâta nohsa vâsua ry liata ti thai, tho phao, pachâ byuh ta, meikhuh chhaota ti chho beih chho tao ei ta, riethei to nâma nata kei vâta ama tao.

              Hezy vâta Krista pachhana bie cha vaw thei ha pi ta, pachhana cha eima vaw to haw. Chyhsapa ama châ hrapa vâta tloh pakina chhao ama hnei lei thei hra. Moleina raihria vâta âmo liata nô-una nata palôh do leipa chhao eima phaoh hôlô thei hra. Châhrasala, chazy cha thlahpa pachhana bie nata pakaoh khi tlâh châ vei.

              He pachhana bie rônah ngaitapa kaw tlôkheituhpazy, ama pôhpa nata sapazy hmô awpa y khao vei hra sala, khizaw y chhôh eima pahno ngâthlâh ha n’awpa ta khâpa hmo chhâma eima tao awpa he Mara Awnanopa heta eimâ bâh. Ei saduthliena cha concrete o taw pha ngâsâpa, a moh ‘LORRAIN LÔPU’ bipa ta, he lôpu (o) chhôh liana heta, ama hriana zydua hniehnôh a y theipa maih paso aw pi ta, râh to su to tawhta vaw tly aw ei ta, he he marapa râh byhnâ a vaw châ aw.

              He zydua pachâna tawhta he a ry liata Hlaphôh he ei vaw roh.

 

1.       Nohtla beih lei khizaw vaotuh,

England râh pha, khihpi London;

Râzâh beinô â tyuna su.

 

2.      Â ngiazie nah ngiaryh chhihzie,

Ahy chho thai reih thai y aw;

Noh tla khih deih chhao thei hmâ lei.

 

3.      He tlu khih pha su phapa tlai,

Khâpa lôhpi chama phaoh ta;

Valâ a zoh sai thlâh ha tly?

 

4.      Khâpa lôhpi vâ châ bao vei,

Chô lâ awna ao vâ tawhta;

Hnôh chhypa ta tlâ ‘ma siesai.

 

5.      Kha hlâ zydua London liata,

Ahy vâ  ngiah leita laih ei;

Chaobiepa ta Kâna râh hawh.

 

6.      Unawh mosa pilâh zydua,

Hnoh chhypa ta khôsai awpah;

Kheihta phei lâ nama chakâ?

 

7.       Unawh mosa zydua hlâta,

Chô lâ awna ao heta na;

Chhôhso tlao a thua via ha ei.

 

8.      Chô lâ tawhta awna ao he,

Zawna hawhta tlâ râ sai ei;

Abra hawhta tlao sie papua.

 

9.      Hmia lâ ama tôh laih lymâ,

Chhituh Mawsi hawhna khata;

Hnabeidy lei sie lymâ ei.

 

10.   Chhituh rônah ypâna vâ,

Lâkô daih ei laih n’awpa su;

Beipa chhâzaw reithai y se.

 

11.    Abra hawhta ngai n’awpa su,

Chybia pahno vei hr’ei sala;

Tlôkhei thlyu thlyu â taihpa râh.

 

12.   Beipa taipa Marapa râh,

Tlôkhei haw ei, Haleluia;

Mothlih chi tawh noh khaih vaw lâ.

 

13.   Hârapa saw, nô hnei lei hawh,

Abeipa ta siesai beih vei;

Ama hnohta pahrâ lymâ.

 

14.   Khihsa tôhtu y zia n’awpa.

Novâh a ru mongyuh-nô châ;

Ti thai tho phao, beih lei naih ta.

 

15.   Paohsi thai vei, ngiakhoh chhih vei,

Chakoh meikhuh zaina hry ta;

Tichhi beihchho tao awpa cha.

 

16.   Chhôhso ru ta ngiah aw vâ ma?

London suzy opi bao kha;

Raithlih pah-ru hi thlyu aw vei.

 

17.    Ramâ khaihna London opi,

Chhôhso ru ta rohpady châh;

Lawta lahpi lôh phaoh hr’aw vâ?

 

18.   Khizaw phasana zydua hlâ,

Thlahpa leidia thapasana;

Chhôhso lôh lia veih via tlôh ei.

 

19.   Hro chhôh khihsa rairuna ta,

Pakhâ thei vei chakaona rai;

Krista vâta Kraws tlao pu ei.

 

20.   Lei lia rietheina zydua he,

Vâ Kâna râh tlô tita cha;

Hnohchhypa ta lei khai ha aw.

 

21.   Riethei rairuna zydua he,

Amâ ly hla vaw châ khai aw;

Pachhatuh hnoh ama tlô ti.

 

22.  Mara sawzy thyu la khaih t’u,

Idâh ochhi â pahy haw;

Ngia t’u Peirâh Bei chareina.

 

23.  Pachhatuh Bei saina chôta,

Sie lymâ t’u Mara sawzy;

Khotalaina râh vaw lâ haw.

 

24.  Beipa Zisu ryuhi hnôh chai,

Thâtihpha chho râhto liata;

Mara sawzy maohphaoh chyu pi.

 

25.  Pachhana bie rônahpa he,

A saipa ta hmô ha pi ta;

A saipa ta pie hr’aw pi mâ?

 

26.  Awhsitlana khô lâ râh tawh,

Pachhana bie vaw tlôpa he;

Tlâ eimâ tyukhei thlâh aw mâ?

 

27.   Krista pachhana thâtih he,

Mara sawzy châ dei châ vei;

Khizaw pho to châ chhao a châ.

 

28.  Sie para ta, hria pathao s’u,

Nohzy miah a tla khâh hlâta;

Daihti phapa thlai a chhâ aw.

 

29.  Moh tua khizaw chyhsa hluhpi,

Leidiana lâ pangai hai ei;

Ahy sie aw pachh’aw p’ei ta.

 

30.  Krista palôh kyhpachâna,

Nâmo liata a pahrâ khiah;

Y molo thei beih aw v’ei chi.

 

31.   Pôhpa tlai ta sie cheingei’pa,

Beipa ta miah ahnaw beih vei;

A byhnâ tawh tlao sie hr’ei s’u.

 

32.  Na sôh nah piah, o lyu zydua,

Ahy châ pie, pachâ tua bao;

Nâma theina â hlao rai mâ?

 

33.  He zydua he Beipa Khazoh,

Tahwta na daopa sai a châ;

Khâzia na ria a y rai aw?

 

34.  Alyna châ pahnopazy,

A lie hluh ta Bei ta thô aw;

Na zo vei khiah pasia tua rai.

 

35.  “Na pasia la” Beipa ta tah,

“Vâ ochhizy pahy na ta,

Nâ vao tiah lei ei cha pie aw”.

 

36.  Beipa Byhnâ totuhpazy,

Riakhiehpa cha lei via aw ei;

Chhoreina â baichhi pâ aw.

 

37.   Lei ryu zydua buakha châ dei,

Movi hlâta thlai lei khai aw;

Pahniehna tlâh vaw châ tlai aw.

 

38.  Ryu pachôna pha chaipa cha,

Kyhpachâtuh Beipa ku lia;

Lei thai lei ta, sai-ie hr’aw vei.

 

39.  Khizaw daihti vaw chhâ tita,

Khâpa na reih aw Bei hmia lia;

Ku ruapa ta ma nâ tyh aw?

 

40.  Bei kyhpachâpazy dei cha,

Vaw welcome aw vârâh gate lia;

“Na bei ly lia ngia teh” tah aw.

 

41.   Vârâh ochhi thaby liata,

Ku chamieh ta ma nâ duah aw?

Kheihta Paw hmia na kha thai aw?

 

42.  Hmia kai chôta Pachhatuhpa,

Dy awpa ta na khoh khiah la;

Beipa Zisu bie ngiah mah y.

 

43.  Ahy rai ta Krista Zisu,

Ngiapâpa maih a pachha aw;

Chhâzaw hrona chhao a hnei aw.

 

44.  Daihti phapa a khô hlâ he,

Hria para s’u Krista châta;

Noh miah a tla khei hlâ heta.

 

45.  Rei khao aw vei, Krista vyna,

A mâ khai s’u Mara sawzy;

Chhôhso nainôsô khao lei ta.

 

46.  Chaih-mie pyu nah rahao chhaota,

Vâ meihdo hry a vy aw ta;

Nâ mâ aw ma, dy awpa ta?

 

47.   Nainôsô ta, mâ leipazy,

Parupa hawh vaw pachhai ei;

Ama tovyuh meitipo dei.

 

48.  Hriena su lâ khô awpazy,

Chhaihna lyuhbie hlâ awpa cha;

Chhôhso mei hawh miah kâ thlyu aw.

 

49.  Rohpady na meitipo huh,

Lyu rao meisaihpa na a lyu;

Lôh a du va laih n’awpa ta.

 

50.  Hmô pachhina meisaihpi hry,

A zawvo ei, lôh-rie sahlao;

Vânô – vâsâh paza hai ei.

 

51.   Buakha chhôh dei chhao châ lei ta,

Tlyzaw chhâzaw meisaihpi lia;

Vâsâh ama paza awpa.

 

52.  Ngiapachhipa phahnai khao vei,

Zawngiah daihti â khaw ha aw;

“A hawh tu na” tlâ ‘ma tah aw.

 

53.  Meisaihpi tawh awh-na ao chuh,

“A sah tu haw, a pasa tu”

Ngiakhoh y vei, rarôh y cha.

 

54.  Meisaihpi vâ dâhphi pasa,

Ti di kha chhao vâ-iapa ta;

Lieluh papaw zoh hôlô ei.

 

55.  Hro noh chhôh lia, Khazohpa bie,

Khâpasaw ta reih leipazy;

Vâdua chaipazy châ aw ei.

 

56.  Ngiapâtuhpazy deikua cha,

Vâ ruapa lia Zisu hnohta;

Laihzaolao ta charei aw ei.

 

57.   Ryureina noh rônahpa lia,

Ngiapâ leizy thlahzohpa ta;

Chalyu aw ei, Bei hmiakô lia.

 

58.  Mietakuzy Bei chachâh lâ,

Mie sahlao dei, a chavei lâ;

A pahrua aw ryureih noh lia.

 

59.  Chito photo chhôhkhazy taih,

Chhaihna noh-y chhi awpa he;

Khôkhâh thai’pa châ tlôh aw va.

 

60.  A kyhpachâ reingiahzy dei,

Khei pakhy aw, miezy hry tawh;

Bei lyna laia amâ ngia aw.

 

61.   Pachhapazy ‘ma thaphazie,

Lyta Vâlyuhchâzy chhaota;

Mathlaw ta a zawzâ aw ei.

 

62.  Bei dyuchhai chô lia â tyuhpa,

Kyhpachâtuh Beipa Zisu;

Rônahna ta a khu khaipa.

 

63.  Bei dyuchhai lia Beipa Zisu,

Machâzy ta a hmiakô lia;

A bôhpa ta a naoh hai ei.

 

64.  Vânawh Serafi sahlao ta,

“A pathaihna, a pathaihna”

Tah ta naoh ei, bâh leipa ta.

 

65.  Pachha sawzy rônahzie chhao,

Ama hmiazynoh hawh khaih ei;

Pachhatuh Bei kiah lia tyuh ta.

 

66.  Bei dyuchhai tawh ao vaw puapa,

“Hezy riethei tawh vaw puapa;

Thisaih ta pasipazy châ ei”.

 

67.   Khaihna ngiah vei, Beina khihpi,

Chatlaipazy chareina cha;

Haleluia, hmô byuh chhih cha.

 

68.  Tlô ngiatiah va rônah râh cha,

He lei râh tawh rohpady na;

Raithlih chhaotaa ei sai nohto.

 

69.  Pachha sawzy charei n’awpa,

Beipa chhuahdypa khihpi cha;

Ngôhsuapa o, tlyzaw khaihpa.

 

70.  Machâ pakih palihzy ta,

Bei dyuchhai kiah chadôpa ta;

“A pathaihna,” tah ta awh ei.

 

71.    Vânawhzy chhao ao paro ta,

Bâh leipa ta, pahâ hei ta;

“A pathaihna,” tah hra ei ta.

 

72.   Tahmâ riethei a rôhpa ta,

He khizaw lia charei hr’ei si;

Lyna khih thlai a vaw deih aw.

 

73.   Khihdei rônah a vaw khaih ti,

Tahmâ nôpo ‘mâ rôh-nazy;

Bei nônai hnoh chho khai aw pi.

 

74.   Hrochhôh buakha he khizaw lia,

Nohto zâto tyhreihna ta;

Miah chadô ta eimâ rôh tyh.

 

75.   He khizaw lia ngiabâh tlâhpa,

Duama y vei, hrochhôh noh lia;

Mâchhie sana râh dei tlao châ.

 

76.   Khihsa tôhtu niebaw kyh ta,

Lohthiepa ie chawh rôhpa hawh;

Nohto zâto a khiehrâh pi.

 

77.   Khizaw hmo zydua he moh tua,

Hlô awpa rai y tlâ veih ei;

Paw hawh buakha ta ta lo ei.

 

78.  Tlaichhai tlâh awpa rai y vei,

Khizaw lia hmoto zydua he;

Sisaw leipa sai tlâ châ ei.

 

79.   Pathipalôh tlokhuh ta ta,

Khizaw lia â pahniehpazy;

Vâdua chaipa sahlao châ ei.

 

80. Daihti nata kôzy nohzy,

A reipati thai leipazy;

Vâdua chaipa sahlao châ ei.

 

81.   Hmia hnôh sa lei manôh hy rai,

Thlaochhi veih ei, hrochhôh liata;

Vânoh sahlâh to hr’aw veih ei.

 

82.  Chyhsa hrupaa hmiatuapa cha,

A thi theipa a châ, tahpa;

 pahno thai leipazy hih.

 

83.  Chyhsa hrupa mianona cha,

Nôpaw chhorei zyh leipazy;

Hlo-ia chhao â tlu leizy hih.

 

84.  Nôpaw chhorei ngiah leipazy,

Manô mapaw bie phôh hawhta;

Lâ chavei tly lei thei veih ei.

 

85.  Chyhsa sopa hlo-ia lyupa,

Y pathâ lei, raisâh sapa;

Ku dao beih vei sawnawh chhâ taih.

 

86.  Chyhsa ria-y tupa nata,

Riakhieh tupa, ria chhiepa cha;

Vânoh heta â kâ sai tyh.

 

87.  Chyhsa kyh reih, haihphiah thaipa,

Lalie heihpazy chhâna cha;

Noza hmiachhie, hiahkhana dei.

 

88.  Saw reingiahpa molopa cha,

Nôpaw lôhpi tha padâh ta;

Vânoh sahlâh hluhpi â kei.

 

89.  Pih pasipa, lah pasipa,

Pahneisao khâ, ânapa hmo;

Lâkô daihna hawhtu thai vei.

 

90.  Thâtihpha ta he zydua he,

A chahry khai thlaodi lei ta;

Chhôhso ta phie a vao khai s’u.

 

91.   Thâtihpha tlôkheituhpazy,

Phei cha â ngia raolao tlai na;

Chhâzaw hrona phei a vaw châ.

 

92.  Ama hnazô, tliahtlâ chhao hmah,

Hmô awpa y khao vei hr’ei sa;

Ama hniehnôh chhâ pachhy s’u.

 

93.  Eimâ thei thlâh, my lei n’awpa,

Khâpa chhaichhi hiahbâh he ma;

A pha chai aw, pachâ tua s’u.

 

94.  My lei n’awpa lôbô he cha,

Tao hr’ei sih la, zawrâpa hmo;

Meihkiah buakha, ti doh aw vei.

 

95.  Saduthliena he hawh heta,

O taw ngiapa paryh sih la;

‘LORRAIN LÔPU’ mohchho bi si.

 

96.  He lôpu chhôh liana heta,

Ama hria pasana zydua;

Paziah aw pi, châ bie ngia ta.

 

97.   Hmo hmiatuapa Biehrai Hlabu,

Ama dairi, châ bie zydua;

Ryusôh châta soh khai aw pi.

 

98.  He LÔPU he khizaw duah chhôh,

Tleih leipa ta khâsia sih la;

Paku lôh-nah tlu sôh aw ta.

 

99.  Lorrain Lôpu hmô khohpa ta,

Khachho vâdâ kao to tawhta;

A zu vy ta, tlô kiah aw ei.

 

100.         Beipa Khazoh eimâ châ hia,

He Lôpu he miah pyhkhei la;

Râh Byhnâ hnawh châ awpa ta.

 

 

 

 

 

 

 

 

 

CHHÂZAW TA REIH PIPA TA

CHAHNAOPA-IPA

‘TLÔSAIH REIH’

 

~ Samuel Hnaihly

 

Atanoh (3.7.2020) cha notla bia lâta ei sie hlâta tah na ta, ei ziana chhôhpadâhpa liata Mara chi thâtih (history) reih heih na ta, ei hmo reipa tlai ei chhôhso liata theisâlô khaita na vaw khai ta, pachâna thata a vaw ngia ta. Eima Beipa Zisu Kristâ nata hlâno mopathaihpa âmô ha p’enawhzy chhao thata a thei na ta. Zisu biereipa nata mopathaihpa Pity biereipazy tlai cha kei thotlâh lômaohpaw palôh thata a palie. Marapazy pi he zâkhano tawhta eima palôh a vaw hâh thai lei ziezy thata pachâ na ta, raithlih ti cha za zôpâ daihmâ ha ta. Machâ Zacho Hnaihly (L) hla phipa EI VAW PIKHEI EI REIH CHEINA tahpa hla tlai kha kaoki khaipaliena taihta sa awpa khona pathipalôhzy pua vaw hnei khai ha na ta. “Khazia ei reih ei pahlei aw, Chô Khazoh eina piepa cha; Pasô ei si â ngianazie, Thyutlia eima daihti chyu ta” tahpa ta ei tyuna liana chata tuhpi kalinô hawhta a hi ngâ kaw  na ta.

Rev. R.A. Lorrain khata reih pipa hnei awpa he Mara sawzy ta eimâ ngiahpa, eima chipho aduah papua n’awpa liata khâchâ a byuhpa ta a pahnopa vâna khata Mara bei charu Zyhno, Chapi, Iana, Tisi, Sabyh nata Tlôsaih beizy cha Saikao khih liata a vaw awpakhy pâ ngâ kawpa a châ. Vaili mahpaw ta hiahrina hetana heta tao ta: “Marapa sai châ ei chi ta, kheihawhpa reih he ma Bible nata Hlabu nata a hropa chhao, Mara châ liata eima hmâh awpa” tahpa ama kho patlysa ta. Bei nahzy cha pakha pakhata ama pachâna pareisa lymâ ta. Tlôsaih paw (Vaili mahpaw) chata, “Cha nama biereipa chyu cha namâ thei pachâh khai ma,” tah ta. Reih â thei leipazy ama y hapa vâna chata, R.A. Lorrain chata “Cha khiahta la, he Zawhâna ei paliepa he vaw reih sala, nama thei ma thei vei ma vaw nahthlie muh vy” tah ta. Châbu a rei tawhna cha, mo pakha mo pakha lâta, “Nama thei ma? A thei leipa nata a pahno leipa nama y ma?” tah lymâ ta. Bei charu p’enawh chata, “Eima thei khai na, Tlôsaih reih he Marapa saw ta eima reih pipa ta eima hmâh awpa na a châ” tah ei ta. Cha no tawhta Tlôsaih reih cha reih pipa châta chhâzaw nata chhâzaw châta ama chahnao pa i haw. A rônah dâh chi!!!!!

A chô liata eima palâsa ha chiehpa “Eima thei khai na, Tlôsaih reih he Marapa saw ta eima reih pipa ta eima hmâh awpa na a châ” He liata ama biereipa tlai he ei palôh na hria kaw ta, Biehrai liata ei chyhsa pasâhsapa mopathaihpa Pity biereipazy tlai a vaw thei kaw na ta. Bei Zisu Krista, Philipi Kaisaria bia a vaw tlô nahta, a pachupazy hnohta “Chyhsazy ta Chyhsa Sawchapawpa he ahy na a châ ama tah? tahpa ta a vaw hiahri daihti ta âchhyna a kaw reih papuapa he zakha liata zakha tlokhuh pasu ta, a hiahrina hih Pity heta âchhy pasu tu vâna heta, “Mesia programme chhao kha phualuahpa ta tlao a ypa a châ.” Pity ta, “Messia cha na châ, Khazohpa hrohpa sawchapawpa cha” tahpa ta a chhy ta. Zisu ta Pity hnohta, “Saimaw Zawna sawchapawpa, na nohhlao na! Sapa nata thisaih ta a cha pahnosapa châ tlôh leipa ta, ei paw avâ liatahpa ta a cha pahnosapa tlao a châ.” Zisu biereipa nata Pity ta Zisu hiahrina âchhyna bie tlai he, thlahpa mokhaoh ta ei za sai châhta R.A. Lorrain nata Mara bei charu p’enawh ama bie reipahmaohpa tlai kha â lyu kawpa ta ei za pahno. Mara bei charu p’enawh ta Tlôsaih paw (R.A.Lorrain) hnohta ama biereipa, “Eima thei khai na, Tlôsaih reih he Marapa saw ta eima reih pipa ta eima hmâh awpa na a châ” ama tahpa tlai he thata pachâkhi a tlohpa a châ. Mara bei charu p’enawh kha sapa nata thisaih ta pahnosapa la châ thlyu veih ei, Mara sawzy Khazohpa, avâ liatahpa ta ÂCHHYNA he a pahnosapa a châ cheingei aw tahpa he ei ngiapâna a châ.

Chavâta, zawhly reih / Mara reih pipa (common language) he eima pasô kaw awpa a byuh. REIH PIPA ‘TLÔSAIH REIH’ he Mara sawzy sapa nata thlahpa liata apôhkhana, kyhpachâna, a pahnothaina etc lâthlôh liata eimâ chhih laih lymâ n’awpa liata Abeipa Khazohpa ta a eihrâhpa (special) ta maniah a piepa na a châ e tahpa eima sia awpa a byuh. R.A. Lorrain nata Mara bei charu p’enawh bietluna ama taopa he Khazohpa ta chhao avâ tawhta a pahnokhei tlaina tahpa he a thiehpa ta eimâ pyh thei tita la, sapa nata thlahpa liata byhnâ thata eima to aw. Eima kaokâh reihzy eima pasô kaw no ta nata pabohsa awpa eima khoh kaw no ta, Reih pipa ‘Tlôsai reih’ a chaie chahmyna lâta hmahzy eima la khiahta la Mara sawzy byhnâ to aw ma pi. Chipho a chhaizaohna maniah tlôkheituhpa dei a vaw châ aw.

Chavâta, Khazohpa ta Missionary zy nata eima manô mapawzy (Mara beizy) siepahliepa ta Marasaw zydua châta reih maniah a piepa ZAWHLY REIH / REIH PIPA he eima pabohsa awpa a châ. Eima biehrai hmâ ngâpazy, Mara Krizyhpa Hlabu eima hmâ ngâpazy etc. liana heta lôhtlâh a pao ei suh u. Eima kaokâh reih he pasô ta cheihchalo awpa tlai a châ, anodeikua Mara sawzy eimâ pôhkhana pachhaihpazaohna taihta hmah eima la khiahta la byhnâ to aw ma pi. Chavâta, sapa nata thlahpa liata Mara chiphozy lôhraoh siaraoh kawpa ta hmialâ keih eima chakâ lymâ thei n’awpa ta CHHÂZAW TA REIH PIPA TA CHAHNAOPA-IPA ‘TLÔSAI REIH’ he pabohsa ta, pasô lymâ awpa he Mara sawzy maohphaohna a châ.

“KHAZOHPA NATA MARA RÂH CHÂTA TEI PARAOH LYMÂ SUH VY”

 

 

 

 

 

 

SIAHA TOWN NATA PATHAIHNA

~ Rev.Thylua Hlychho

 

 

Biehmia :   Chyhsa to ta eimâ ngiah chaipa cha pathaihna he a châ. Khazohpa chhaota chyhsa hnohta â hnawhpa cha pathaihna he a châ hra. “Nâmo nama pathaih awpa a châ; kei pathaih tlôh na ta” (1Pity.1:16) tahpa a châ. Râh nata khih hmahsiepa thliena pha chaipa cha pathaihna he a châ.  Khihpi tlyma, thotlâh khih tlyma, a pathaih leipa cha a hmahsie vei tah pi ta, a pathaih kawpa cha a hmahsie kaw eima tah tyh.  O rônahpa nata hmo mâ rupa hneina liata khih hro- râh hro atlu thei’pah châ leipa pi ta, pathaihna kyh liata deikua cha a pha kawpa ta hmah eima la khiahta la khizaw liata râh hmahsiepazy raohpa ta keih eima chakâ thei thlâh ha aw. Khazohpa ta chyhsa hnohta byhnâ a piepa cha miano y ta, miakhana cha pachhana châ ta, a saipa ta pie ta, mianona cha pathaihna he châ ta, chyhsa ta a hria papua awpa a châ. Chavâta Siaha Town, eima khihpi he a pathaih kawpa ta tao achhuah ei suh u.  Siaha Town he Mara râh thlalâ châ ta, Mizoram district capitalzy hry liata pathaih chai awpah ta hmah la ei suh u.

1.  Siaha Town mohpasiana :  Siaha khih he Mizoram liata  District -3 (Aizawl District, Lunglei District nata Chhimtuipui District) a y nota district Capital a vaw châ hapa châ ta, kô 48 (1972- 2020) a uhtheipa vaw châ ta, district capitalzy hry liata hmahsie lei chaipa eima châ thlyu aw. Daihti a khô hapa liana khata eima district liata hawsaih thina a hluhna chhâpa ama reipa cha “Siaha District he ama pua tu hana” tahpa a châ. He bie he ei palôh na hria kaw ta, my thai va na. He bie heta Siahâ Town pathai awpa ta eina pahao kaw. Siaha Town chhôh liata khiliah lâpizy, sidedrainzy, office & compoundzy, school & compoundzy, private o & compoundzy, Siahatlâh tawhta Meisatlâh taihta mohpasia tua ei suh u. Kô 2019 chhâna lâ tawhna khata khiliah lâpizy vaw pha via ta, eima khiliahzy vaw pathaih via ta, aly’pa a châ kaw. Khataih vaihzy ma pathaih ta, khataih vaihzy ma pathaih vei? Eima vaih chyu mohpasia ei sih la, pathai â ngiahpa cha eima pahno thlâh ha aw.

2.  Palôh (Moral) pathaihna a byuh :  Siaha Town a vaw pathaih thei n’awpa ta siaha khih liata a pahrâpazy palôh a pathaih tua awpa abyuh kaw. Palôh pathaihpa, pachâna dopa, chhie nah pha pahnona pasopa nata khotlyna dopa eima hnei tua awpa a byuh kaw. Siaha khih he a pathaituhpa ma hluh via ei, a papuatuhpa maw? Chyhsa chyta ta Siaha khihpi he pathai hualua ei ta, chyhsa hluh via syulyu ta ama papua tyh, apei kaw. Khazia maw? Eima palôh phaozie â do vei, chyhsa thokha cha apuapazy he ama thy chakhyh thlâh haw. Chavâta  pachâna dopa palôh eima hnei thei n’awpa ta apachuna phapa eima hnei hluh awpa a byuh kaw. Chhôhkha nata khitlâh liata pathaihna kyh a pachu hluh ei suh u.

3.  Siaha Town pathai n’awpa dâh  :   Siaha Town pathai n’awpa dâh cha a ry liata palâsapa hawhna heta hmahlapa châ sala a pha thlyu aw.

1).  Siahâ Town chhôh liata khiliah lâpizy he pathai awpa a châ. Zâkô 2019 chhâna lâ tawhna khata eima khiliah lâpizy vaw pha kaw ta, khiliah lâpi chhao a vaw pathaih via haw. Chata a châpa vâta eima khiliah lâpizy he a raopa maih tao chhyh lymâpa châ sala a pha aw. Eima o kiapâh nata eima vaih chyu liata lâpi a raopa a y khiahta la, biehneituhpazy hnohta thlai tlôkhei ei sih la. Lâpi tao n’awpa châta sôh a y lei no chhaota zawpi ta thyupakhypa ta lâpi cha tao lymâpa châ sala a pha aw.  Eima khiliah lâpizy he a pha khiahta la anao kawpa ta pathai thei aw pi ta, eima Siaha Town cha a vaw pathaih thlâh ha aw.

2).  Tihry lonazy (Side-drain) he eima pathai awpa a châ.  Siaha Town a vaw pualei kaw tyhna chhâpa miakha cha tihry lona pha lei vâ a châ. Su thokha lia cha tihry lona rao ha ta, tihry cha a khona lâ maihta a loh ta, tihry ta hnaihny phaoh ta, eima khiliah nata tlyhmiazy a papua khai ha tyhpa a châ. Su thokha lia cha chyhsa thokha ta a puapa byh khiah ma tah ei ta, Tihry lona liata a puapa/hnaihny ama thy thlâh ha, a pei rimâ cha la. Tihry lona châ ta, tihry lona liata  a puapa / hnaihny eima thy lei awpa a châ. Cha tawhla, su thokha lia cha Tihry lona (Side-drain) rao ha ta, tihry cha  loh chakhyh chaimâh ta, a khona lia maihta hnaihny patoh ta, cha dei châ va, tihry ta râh thata a parao thei hra. Tihry lona he apha kawpa ta mohôh ta, eima pathai khiahta la Siaha Town cha a vaw pathaih thlâh ha aw.

3).   Private Compound pathai heih awpa a châ.  Siaha Town chhôh liata eima O nata compound zy, O sahdô a hneipazy chhaota hmo mâ ru kawpa râh eima hneipazy he a pha kawpa ta mohôh ei sih la, eima pathai chyu awpa a châ.  Lâpi kiah liata a ypazy cha ama o dady liata lâpi nata lâpi dokâh chhao ama pathai tyh awpa a châ. Cha hawhta eima private râh nata compoundzy eima pathai khiahta la Siaha Town cha a vaw pathaih thlâh ha aw.

4).  Siahâ Town pathaituh awpazy  :  Siaha khih liata a pahrâpazy ta Siaha khih cha eima pathai awpa a châ.  P.W.D. ta ama lâpizy cha pathai tyh ei ta, MADC L.A.D. tawh chhaota ama maohphaohna hawhta ama pachâpazy cha pathai tyh hra ei ta, cha tho ta V.C. nahzy ta ama area chhôh ama pathai tyh hra. Cha hawhna chata NGO zy chhaota vaih nata Town chhôh liata a châhta pathaina rai ama hria tyh hra.  Hetana chôta eima Siaha Town cha pathaih mâh vei, hmahla via lymâ a byuh kawpa ta ei pahno. A ryhpaoh thei sala, pathaihna lâta hmahla ta, thatlô viapa ta Siaha Town pathaituh awpa py paduapa châ sala a pha aw. Pathaihna lâ hriatuhpa py eihrâhpa NGO eima hnei khiahta la atahmâ hlâta eima pathaih via thei thlyu aw. Chavâta pathaihna lâ hria awpa py “Clean Siaha Town” (C.S.T.) tahpa py padua ei suh vy.

Bie sypahmaohna :   Siaha Town he a vaw pathaih via lymâ thei n’awpa ta biehneituhpazy ta thatlô viapa ta hmah ama la awpa a byuh. Siaha khih he eima râh thlalâ châ ta, a pha via ta mohôh awpa a byuh hmeiseih. Siaha Town chhôh liata a pahrâpa zydua ta a paraoh ei sih la, Siaha khih he pathai ei suh vy. Mizoram chhôh liata district Capitalzy hry liata a pathaih chai châ achhuah ei suh u. Atakô 2020 liata hmo a tlôpa Coronavirus (Covid-19) heta pathaih awpa ta thata maniah a pachupa ta ei pahno. Khizaw he pua tu ha ta, Khazohpa ta he hripipa hmâpa ta khizaw he a pathai ngâhaipa châ thlâh ha vei ma?  Keimo chhao pathai â ngiahpa eima châ tahpa pahno ei sih la, a pathai ei suh u. Eima kuzy asi ei sih la, eima pôhpa nata chyhsia zy a pathai ei sih la, eima ochhôh nata compound zy pathai ei sih la, eima khiliah nata lâpizy eima pathai awpa a châ. Pathaihna ta byhnâ a vaw tlôkhei awpa he angiatiah’pa châ vei. Siaha Town he a pathaih kawpa ta eima tao ti ta, byhnâ hluhpi a vaw tlô aw.

 

 

Source: Board of Mara Literature, MADC, Siaha.