Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue October 2021



Editorial

 

Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw.

Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta cha athai viapa nata pahno viapazy tlâ asaohiah awpa a châ.

Thai tlôh vâ, chyhsa asaohiah a nawhtaw ha tlôhpa he eima hluh kaw. He vâ heta hmahsie thai leipa chhao eima hluh hra. Ado leipa tlai ‘Seilakohpa mahsô siepa hawhta’ khâchâ eima siekhei raruah tyhpa nata chhosiena dopa eima nahthlie khoh tyh leipa he eima zyu chhiepa palâsatuhpa deita a châ. Chyhsa sohpa nata patapa (quality) ta cha hmo he aphapa ta achupasia ta, nahthlie ta, chhosiena palôh pasoh kawpa ta pachâ pazi ta, a nawhtaw leipa ta, a pachâna nata pahnona do leipa kha a pado thlâh ha tyh.

Eima thai pasia leipa nata pahnopasia leipa liata chyhsa asaohiah he a nawhtaw khah ei s’u. Cha leipa ta la eima râh liata zawpi hmô thei awpa ta châropa nata tawpazy he ado leipa a hluh tu ha; ataotuhpazy ‘Quality’ a palâsa tyh, pha vei.

 

Chhuh chheipa a y ma???

 

 

----------------------------------------------------------------------------------------------------------------------

 

MARALAND G.K

 

                        1. Mara râh liata tlâh asâh chaipa cha Mawmâ Tlâh châ ta, tilaipi tawhta thliepa ta 1941 Meter ta asâhpa a châ.

              2. Mara râh liata Tipo alai chaipa cha Palâ Tipo châ ta, a doh lâ 870m nata a hâ lâ 700m ta akawhpa a châ.

              3. Chavah lai chaipa cha Beinô (Kolodyne) châ ta, Mara râh nata Mawrâh lia chhaota seih chaipa hleidy chhao he chavah liata daopa châ ta, a seihna lâ cha 285m a châ.

              4. Mara râh liata khih alai chaipa cha Siaha châ ta, a chyh chaipa cha Lope a châ.

               5. Mara râh liata Printing Press aduah tua chaipa cha Louisa Memorial Press châ ta, Saikao liata kô 1923-pa liata RA. Lorrain ta a padua.

              6. Mara râh liata Mara reih ta châbu apua tua chaipa cha, Krizyhpa Chiahmie tôna châ ta, kô 1926 liata papua pathaopa a châ.

 

 

Khotalaina râh liata

seichâna bâlia

 

~HC. Malsawmthanga.

                                                                                

              Philosopher mohpathâhpa Socrates ta cha, “Khotalaina yna maih ei râh”, tahpa ta England lâ â paih ta, chyhsapazy châta khotalai kawpa ta charei-palao theina râh maih cha tlaichhai ta, cha khotalaina râh lia tlai cha khota lai awpa a vaw khoh tyh. Freedom Fighter rônahpa Thomas Paine pachâna nata deikua ‘alei nata avâ’ hawhta tlaita â eichapheih ta, “Khotalaina y leina maih ei râh”, tahpa ta, Thomas Paine heta khota a lai thei leipa nata seichâna bâlia ta chahry haipazy chareina su lâ pangai laihpa ta, khotalaina a tei laih.                            American War of Independence nata French Revolution daihti liazy khata khotalaina teituhpazy tha patlô awpa ta hrona asokhâhpa ta a hlaohli laih ta. Ama reina liata cha, French buana liana khata Thomas Paine cha pa-aosao awpa ‘Wanted List’ liata pahlao ei ta. Ama thie awpazy ochhi liata ngiana ama taopa cha vâhneichhih kawpa ta a ochhi â pahy no vaw châ thaichho ta, thie awpa ta ama tluana daihti liata a ochhi cha â vaw khaw hapa vâta, thina â vaw khôkhâh ha tahpa ta ama za reih.

              A châ na, he khizaw noh khaihpa hmô hra tlôh ta, khota a lai thei leipa chi nata phozy cha ngiachhiechhih chaipa nata vâdua chaipa ama châ ngaita tlai! Indian Nationalist Movement liata pawhrâh chaipa pakha BalGangadar Tilak khata, “Swaraj is my birth right, I shall have it”, tahpa ta, India râh cha British tlybaina tawhta thaopapua awpa ta tei ta. Khotalaina cha a pikheipa tovyuh a châpa vâta, a hnei awpa a châ zie riahpha kawpa ta tlâh a vaw awhkheipa a châ. Kha khata India chyhsa thysâh hluhpi palôh pahra ta, Indian Nationalist Movement chata a kih a tlôpa kha a châ.

              True Story ei palôh na hria kawpa miakha cha Mr. Hamel thâtih kha a châ. He pachutuhpa he Alsace & Lorrain District khih miakha liata French Pachutuhpa châ ta. He daihti no heta France râh hneirôh chaipa Alsace & Lorrain District cha Prussian (German) bei thatlôpa Frederick ta lapa ta, German nah biehneina ry liata a y no a châ. Mr. Hamel chata Siku miakha liana cha French reih pachu tyh ta, ama ti nata râh cha German biehneina ry liata y chy hra sala, French a châna nata thapasana palôhrupa deikua pahnie thei rimâ’pa châ leipa ta, Siku hawtizy cha phahnaingiah kawpa ta ama pikheipa reih French cha a vaw pachu tyh ei.

              My kha cha Prussian beidyuchhai tawhta bie vaw papua ei ta. Prussian beina râh chhôh liata cha French a chu pasai khao leipa a châ zie nata, German reih ngâlâh achu awpa a châna zie he vaw châ ta. Mr. Hamel chata Class hnôh chaipa cha la ha ta. Noh hrota â pielyuzie nata cha my ta â pielyuzie nata hmiamo cha Siku hawti nahzy chata ama no-âh ngaita ta. Noh hrota khokhieh kaw tyhpa nata a hrâh pâ kaw tyhpa tlai kha, cha my cha nai zualuapa nata palôh zaopa vâta keichheih khai hapa hmia tlai he phaoh ta. Ama Siku liata French reih achu pasai khao leipa a châna zie reihpa ta, phahnaingiah kawpa ta French Grammar pachu ta. French reih â ngiana zie nata kyh a pachâ zie a rei haino chata palôh pasapa vâta reih pazao thei khao leipa ta…dusawta chârona Chalk lapa ta, chârona phia liana chata “LONG LIVE FRENCH” tahpa hawrawh lai ngaitapa ta roh ta, mothlih chhaota Classroom cha puasai ha ta!

              Thisaih ta ama vaw pabohsapa, ama râh liata ‘Definitely Endangered’ tahpa ta sopa a  châ. He yzie cha Mara reih he chhâ asie haipa liata hawtizy ta ama Ochhôh nata khiliah liata pasô khao leipa ei ta, ama pikheipa reih hlâta reih hropa ta ama aoh â chhaoh via lymâ ha bâ tahna a châ. Chata a châ khiata cha chhâ khazie vaw y awpa liata ma cha Mara Reih he leidia cheingei awpa hawhta maniah ama hmô.

              Khota eima lai tyhna râh liana chata khota laizaolao thei khao ma pi khiama i? ei za tah tyh. Eima reih Mara reih chhao he eima râh lia cheingei ta a khichhaina su a y hôlô bâ he zaw! Pho hropa reih hmâ â ngiahna su nata daihti cha a y awpa rai a châ; anodeikua, pasôna châh chhao pahnothai khao leipa ta a zakhei hapazy taihta eima za ypa he la ngiahkhoh â chhih tlai vei. Pikheipa reih chhao athai leipazy heta Maraland nata leilô he thapasa ei sala kei la pangiasa thei va na. ‘Eima pahrâna su ta â chu vei’ tahpa ta reina ahneipazy hra cha Tipa, New Siaha, Meisatlâh etc zy tlâ ama châ chuh! He heta a sia kawpa ta a palâsapa cha, Mara reih he Mara râh su thokha liata cha khota lai khao vei tahna a châ.                                                        

Marasaw cha khizaw y chhôhta la amua hraoh aw ma pi. Eima tusawzy ta chhâ a vaw y awpa ama sa pachhuah laih aw. Anodeikua, Mara reih athaipa eima vaw y khao lei tita la, Mara chi nata pho cha ‘pho leidiapa’ tahpa ta khizaw ta maniah ama reih ha bâ aw. Andaman & Nicobar Islands liata Bo chi nata pho cha amua taraw veih ei. Châhrasala, Bo reih athai chhôhpa Bo Senior cha târi noh 26th Nawh 2010 pa khata kô 85 uhtheipa ta thi ta, cha noh nata dawh bawlaw liana chata Bo chi nata pho cha ‘Pho Leidiapa (Extinct)’ tahpa ta khizaw ta a phuah haw.                          

Akkala Sami ama tahpa reih miakha, A´kkel and Èu´kksuâl khih, Kola Peninsula, Russia râh liatahpa chhao thlaita a leidia awpa a lyu.  Târi noh 29th Di, 2003 khata Marja Sergina, Sami reih a pahnia kawpa ta a cheih thaipa a y chhôhpa cha thi ta, phiephuh ta a thaipa pano kô 70 rairie ta a uhtheipa nah deikua ama hroh thlâh ha chy. He nah pano he daihti rei maniah hrolâh ei sala a ngia khao vei. Ama thi tita cha Akkala Sami chi nata pho cha pabupa ta a y ha hra aw tahna a châ.                                          

He a chô liata chi nata pho a leidia hapazy thâtih chyuta eima vaw palâsa tawhta hmo sia kawpa ta avaw lâpa cha – Chi nata pho ta maniah taotuhpa Reih vaw laiseih sala, â vaw boh lymâ thei n’awpa kao liata chhaichhi tiah chaipa nata peimawh chaipa cha LITERATURE a châ. Nôpi-pawpipazy he thlaita ama khô aw, Mara reih a viavi lei n’awpa ta thyutliapazy eimâ hra â ngiah kaw bâ tlai na; Maraland kaokih to tawhta vaw pua bâ t’u khaw. Eima khotalaina râh liata Mara reih ta khota a lai lymâ thei n’awpa ta, Literature sahdô liata hrialâh awpa ta ei cha hrua chyu ei!!

“Khotalaina teipa vâta hrona sôhpa pahleipa cha, seichâna bâlia ta chahryna liata hrohpa hlâta a pha via!!”

~ Dunno.

 

 

  

SAVO KHIH TLYNA

 

~ K. Pari

              ( He châpaw (Article) he Pihnô K. Pari châbu, “Hlâno Mara su peimawhpazy” tahpa tawhta lapachhuahpa a châ. Ed)

 

              Savo khih liana heta Zyhno mo ta khih ama sa. Lialai history liata cha Lialai, Heima, Zyhno, Hlaipao nata Chakapi sahlaozy he chikhapa châ ei ta, Lailô lôkhaoh tawhta avaw puakhohpa hawhta ama reih. Chin History nata chyhsa hropazy rei zie ta China tawhta Burma râh a vaw ngia ei ta, Kalay Valley tawhta tlâh râh kaw kiah ei ta, cha tawhta Run chavah chakapa ta Sôthla khih ry, Lailô lôkhaoh kiah liata apahrâpa hawhta reih ei ta, thokha ta Chindwind Valley/River tawhta azu laihpa hawhta ama reih.

              Lailô lôkhaoh he Sôthla khih ry Falam khih daih lâ Km 5 ta âhlapa liata ypa a châ. He su tawhta Rôtlâh, Chhôchô, Sangyu, Thlâtlâh liata khih za sa laih ei ta, Chhôchô tawhta Heima nata apachhaihpa hawhta reih ei ta, cha tawhta Timo, Muakai, Tlâhri liazy ta ama y laih. Tlâhri tawhta Lialai nata amâ pachhaih heih ama tah. Hlaipaoh nata Chakâpi chizy cha lei ha ei ta, Heima, Lialai nata Zyhno ama y tahpa ta ama reih.

              Kahrie tlâh ry liata Vâhâ khih hmo parohpa y ta, he su he thokha ta Vâha khih hmo parohpa tah ei ta, thokha ta Heima khih hmo parohpa a châ ama tah hra. Thokha ta he su liata Deima Bôhia â beina daihti a châpa reih ei ta, thokha ta Serô Bôhia â beina su a châpa hawhta ama reih hra. He su he kaw tly ha pi ta, ama lôpheih paraihpa chhao apha kawpa ta a y hôlô chy. Thokha cha cho bâ laih ta, lôphia ama phawpazy chhao a kei bâ hôlô. Ama thlâlô phawpazy lôphia pi nata kawh kawpa châ ta, pakha zie sualuah ta ma kha alôzy kha â sy ei tly, pahnothai a ru kaw.

              He su tawhta Kahrie tlâh athy pakhôpa ta Hlôma khih kiah tlâh laki liata y ei ta, he liata a reipi y leipa ta, Zyhno nata Laki cha amâ pachhaih haw. Zyhno cha Tisi chavah kiah, Chaw-ô lôkâh luh chô liata za y heih ei ta, he su liata hri-iah chahra kaw ta, chyhsa chhao thata ama thipa vâta khih cha amâ pasiesai ha heih. Chyhsa hluhpi ama thipa vâta hla phi ei ta:

 

“Ei tyupynô chaw o hlomy ryh,

I awnô naitai yphe lyuna rei vi aw,

Vy syh e uana ryh vyh”, tahpa ta.

 

              Chaw-ô tawhta Savo lâ a pasie ei ta, Savo khih ngai tua leipa ta Lôtai chavah liata byureih tu ei ta, he liata abei Masei cha a thi haw. Masei he Lôtai liata pabu thai’pa a châ leipa vâta Savo khih ama sa n’awpa su liata ama pabu. Savo khih he Zyhno khih parohpa, atahmâ ta ama yna su liata ama vaw y hlâta khih ama vaw sana châ ta, he khihchhôh liana heta su peimawhpa nata thâtih ahneipa tly awpa a hluh kawpa vâta Dr. K. Zohra, Puhpa FC. Khihnia, kha daihti liata MSO President a châ ngâhaipa nata hrialâhpa zy, Zyhno MTP nata khihtlâh nôpawpazy chhaota eima kaw tly.

              He su liata su peimawhpa nata thâtih ahneipa tly awpa a ypazy cha, ama beipa Hmaulai thlâ, Hmaulai lâlai moluh chadô, Tôkâ Riahvaina, Sele mahnô lôkhaoh, British lô khaipa lâpi zy he ama châ.

              Masei heta sawchapaw pano (2) hnei ta, Khaino nata Khaitha ama châ. Khaino he Savo khih liata a bei ta, lahpinô châta Ripi bei sawchanônô Nôna Zawtha zuah hnei ta, Zaupa Viangâchhôh chhao lahpi panona châta a hnei hra.  Nôna chô liata sawchapaw Ngôthaw, Vahei, Vachhô zy sa ta, Zaupa Viangâchhôh chô liata Tevo nata Laichha zy a sa. 

Abei Khaino a thi tawhta a sawchapaw utheihpa Ngôthaw Bôhia ta a su a thla ta, ano he chyhsa machhyu-mahrâhpa a châ hleikhô ta, chyhsa sohpa, Sa a ka thai kawpa a châ.  Masiah, Kaorâ, Chakeih nata sa hropa hluhpi ka hapa a châ. Ngôthaw heta sawchapaw sa leipa ta sawchanô Ngôchia ngâlâh a hnei. Ngôthaw he rei hroh leipa ta thlai thi ta, a nawhta Vâchhô Bôhia, Laki bei sawchapawpa Hmôlai ta a ryu kaw to ta, abeina chhao a kaw pazao pâ.

 

Abei Hmôlai thlâ nata Hmôlai Lâlai moluh chadôpa

              Abei Hmôlai thlâ nata lâlai moluh chadôna thâtih eima rei awpa no heta ano thâtih tlâhpipa rei awpa a peimawh tuapa ta ei pahno. Abei Hmôlai he, bei thâtih ahneipa a châpa vâta a thlâ nata a lâlai moluh ta ama chadôsana suzy eima kei moh. A lâlai lô paraihpa cha hmô thei’pa ta y thlâh ha chy ta, a lâlai cheingei cha nga pasa n’awpa ta ngakhaoh vaw chao khai ha ei ta, su peimawhpa nata thâtih ahneipa pananopa ta a ypa cha pei eima tah kaw.

Hmôlai abeina daihti kô 1906 rachhôh liata Hlôvyh nah sei arâpa ama patu lilaw heihpa cha lâpi liata ama thie hapa vâta cha kyh liata British pheisaihzy cha Savo khih siehnao awpa ta a thao ei ta. Thlai tlahnao leipa ta ama tlô awpa thâtih cha abei Hmôlai chho awpa ta Puhpa Dotha Rasi cha ama tuah. Dothâ Rasi ama tuapa cha kaw tlô ta, Abei Hmôlai tlyhmia liata Savo khihsaw sahma baopa ta, hlasa khoh tôpa ta khihdeina taihta ama lâna liata a hlao hra ta, khihdei tawhta zikyu â râna bie cha abei Hmôlai chho ta, a biecheipa ualua ta, “Mylâ British pheisaih ama vaw tlô aw, na vaw dy mawh sy a cha tah”, tahpa ta a chho. “Mylâ” a tahpa kha a tlô zâ ta chho ha sala â su awpa châ ta, a mylâ ta a chhopa vâta ‘mylâ’ tahpa châ leipa ta ‘atanoh’ a tah h’awpa a châ nota a reih chhei haw. Hmôlai cha chhôhmohpa ta a y thlâh ha nota British pheisaihzy chata khih vaw dôh khai ha ei ta, ama beipa Hmôlai cha khihsaw mo ta mongyuh pheisaih ama vaw tlôpa ama chho nahta apara kawpa ta a chysiazy cha athla ta, â thla ngâno ta Mongyuh pheisaihzy cha Hmôlai o cha vaw dôh khai ha ei ta. Pheisaih hyutuhpa ta, “Hmolai, khazia eina dy vei chi?”, tah ta, abei Hmôlai ta, “Na vaw tuapa Dotha ta, ‘mylâ a vaw tlô aw, na vaw dy mawh sy, a cha tah’,  tahpa ta eina chhopa vâta châ dy leipa ei châ”, tah ta. Pheisaih molaipa cha a palôh a tlâh lilaw.  A tuapa Dotha deikua cha a nahkao patupa ta padua heih, patyu heih a patahsa ngâkaw ama tah.

              Cha tawhta pheisaih molaipa chata Hmôlai hnohta, “Cha khiata la, Hmôlai y, Meithei tlai 20 eina pie thei chi ma?”, tah ta, Hmôlai ta, “Ei cha pie thei aw”, tah ta, “Mietôhpa 30 eina pie thei chi ma?”, tah ta, Hmôlai ta, “Ei cha pie thei aw”, tah ta. Pheisai molaipa chata, “Cha khiata la, Awhkhypa sy 70 eina pie thei chi ma?”, tah heih ta, Hmôlai ta, “Ei cha pie thei aw”, a tah ha heihpa vâta Savo nata mongyuh pheisaihzy cha zua amâ paryh, ama tah. Hmôlai ta a khihsawzy kyhpachâ ta, ama châta â piepasana nata â pasaina a palâsa kaw. Cha leipa châsala Hlôvy nata thata ama tao awpa a châ.

Ama Beipa Hmôlai mongyuhpa dy awpa ta apara kawpa ta â chhuahpa cha, khihsawzy ta hla tao ei ta, mongyuhpa khâpa sawta ama rei leina nata ama riahphana ama palâsa:

 

“E torotu ka o, Tlele vazô va,

Hravo pyhry Zawhnaipi,

Veh va, chi lei hra pine”, tahpa ta hla ama phi.

              ‘Apara tu kha la, abeipa y, Savo pahrâpa Zyhno pi la, Viahpa a chi lei saw pi na’ tahna a châ.

              Abeipa Hmôlai Bôhia he bei soh kawpa chyhsa châ ta, mongyuh nah chhaota a bie ama nahthlie kawpa a châ. Ei kha cha Sabyh beipa Beihra he matu lâ khih tlyh ta, matu bei Bahei ta Beihra nata a viasazy cha vaw thie ha ei ta, cha luhty rei awpa ta Hmôlai cha Lolei lâ a sie. Luh ty reina liata Hiakha, Matu nata Lôlei mongyuhpa zydua ama y hra. A viasa nata cha rei n’awpa dâh rai pahno leipa ei ta, bei Hmôlai ta Sei mâ zy, Viahchao mâ zy nata hmo hropa a pahruapa maih cha mongyuhpazy chhaota a pha tahpa ta amâ pykhei lymâ. Cha tawh chhochhi cha mongyuhpazy chhaota kyh to liata amâ saohiah chaipa a vaw châ.

              Abei Hmôlai heta a lahpinô châta Khabôh bei sawchanô Machia Zawtha zuah hnei ta, sawchapaw sa vei. Kô 1916 liata abei Hmôlai cha thi ta, Abei Hmôlai a thipa cha a lahpinô Machia cha a palôh pasa kaw ta, pohhluh akhupa ta noh hluhpi mâchhiesa ta, nie lei do leipa ta vâro a y hapa vâta nata khihsaw chhaota mâchhie vâro ama sapa vâta khih nôpawpa nata machâzy ta pachâ ei ta, mâchhiesana pohhluh pahy n’awpa ta Tebu khih siehnao’pa ta ama pathlupa a châ.

 

Hlâno ta cha Mara beizy ama thi tawhta vâropi cha athihpa sanawh nata ama machhiezy ta mâchhiesana ama vaw hnei tyh. Ama mâchhiesana papai n’awpa ta khih hro lâta chyhsazy siehnao ei ta, ama luhzy kei la ei ta, cha cha ia ei ta, mâchhie papai n’awpa ta ama vaw hmâh tyh tahpa a ry liata hla tawhta pahno theipa a châ hra. Marapazy pi he eima mahnô-mahpaw daihti nota cha chi riahpha kawpa châ pi ta, mongyuh nah chhaota Assam nata Arakan tlâh râh chyhsa hry liata miah ama pahnie hawh chaipa eima châ. Maw nahzy British sawhkhâ ta â vao tawh chhaota Marapazy pi cha daihti khachâ rakha ma cha mongyuh nah ta ryu maniah reipa thei lei khâh ei ta, hlâno ta eima phôhryhpa chhao a chaba parei chaipa py eima châ hra. Chavâta Mawrâh cha British sawhkhâ ku liata a y tawh chhaota Marapazy ta mozy khâ eima vaw thie tyh.

              Zyhno Beipa Hmôlai thipa vâta a khihsawzy nata a lahpinô chhaota mâchhie sa ei ta, Zyhno khihpi liata apalypa-uasapa nata thapawh kawpa ta paro-pasyu atôpa rai y leipa ei ta, ziahzi roh thlâh ha ta. Bei Hmôlai lahpinô chhao cha mâchhie sapa ta daihti reipi a y thlâh hapa vâta mâchhiesa papai n’awpa ta Tebu za siehnao ei ta, ama za thie. He he Marapazy ta a tlia chai ta mâchhie papaina ama hneipa a châ hra. He Tebu ama za chhopa he kô 1918 AD châ ta, Tebu liata pahrâ penawh he Khumi nah ama châ. Tebu he Zyhno tawhta cha chho lâta noh palih/noh pangawh lâsie liata a ypa a châ. Abei nata Machâzy ta pachâ ei ta, Hmôlai mâchhie papai  n’awpa ta Tebu siehnao awpa cha â ryh ama tah. Tebu ama siehnao hlâta zo-adânazy hnei tua ei ta, Khasôh chhao anaoh-pana ama khih luhchô lôkâhpa chô liata ama hnei tua hra. Ama sie hlâta sahma pazy ei ta, ama sahma pazypa cha pâthao liata atlao leipa ta a kaw pua khiata la amâ chhuahna liata hlaotloh awpa ta pachâ ei ta, â tlao khiata la hlaotloh lei awpa ta ama pachâ hra. Ama Sahma pazypa cha atlao hraoh leipa ta, a sie awpazy nata khihsawzy chhao amâ ly ngâsâ hra.

              Chariah lâta sie awpa zârie nata niebaw awpa ta sâh nata viah-ao daipa ei ta, viah-ao he beih ama chho hmâ leipa tlymâ, chariah vâta ama chho thei leipa chhaota ama baw awpa ta ama tahpa a châ. Chanô nahta karaoti chariah lâta asie penawh châta pazypa ei ta, khihsaw sahlao ta ky pahlô bâ, zaih phy bâ tah tah ei ta, chatanachata  Zyhno satlia riahphapa nata nawhtaw akhoh leipa sythôh (30) chhi apahrua ei ta, sie’pa ta apatohpatia ei ta, ama sie hlâta chariah hmia liata ama viasa nah arâsai tlâ lei’pa ta bietainazy hnei tua ei ta. Ama viasa ngâ viapa liata, “Ei sâthi a tla khiata la nâma ta bâh nâ huapa mah y”, tahpa ta a chho ei ta, he yzie cha, “Chariah ku liata na bao la, eina thie ei khiata la nâma ta phuh bâh la la, ei luh he chariah rai bâh vaw palasa khah y”, tahna a châ. A sie awpazy he ama sanawh nahzy chhaota atlâhpa ta hmiazy amâ hmô heih aw tah thei’pa châ leipa ta, ama sie my ta cha pati lao-â apahâhpa to pie ei ta, Hawka taihta zawpi ta ama pathlie hra.

              Chatawh cha amâ thao tawhta ama vaw tlô heih hlâ via ta cha khih lâ chanôzy ta pala popaw vaw hria hrao veih ei. Hlâno Marapazy pachâna dâh ta, “Chapaw chariah lâta ama sie chhôh ta chanôzy ta pala popaw ama hria khiata la vâduana hmo na a tlô”, ama tah. Amâ thao tawhta zâ no/zâ thôh lâpi liata a rie ei ta, cha tawhta Tebu cha ama za tlô. He ama sie chhôh heta Rekenua (Riakianô) Khazoh pachao ei ta, ano chata a sie penawh thâtih cha a sia kawpa ta Zyhno khih lia a phuah ngâthlâh ha hra. Tebu khih cha azo ta pangai ei ta, a chhôh liata apahrâ penawh, Khumi-nah he Marapazy ta khâ ama siehnao tyhpa vâta âmo chhaota Mara chariah tawhta amâ boh thei n’awpa ta ama khih he thokhy ta pua amâ dôh khai ha tyh.

              He zâ he Tebu liata athihpa y ta, khihsawzy ta a ri kiah ei ta, khih padei awpa ama châ hra. Sahma doh ei ta, dawh nata khohzy thata tô ei ta, ama lâh ngâkaw hra. Zâ râh ta hawka sâkha cha apahy thlâh ha ta, Zyhno mo chhaota angia awpa nata angia mâh lei awpa a ruta lâta pachia ei ta, angia mâh leipa ta awhkho râhsâ ta angia awpa ta ama pathlu. Hawti mô rô a châ nahta Hawka ochhi chhao cha riahvaituhpa ta vaw khaw ha heih ta, Zyhno mo châta cha angia n’awpa y khao leipa ta, châhrasala thokhyh cha chahlô ei ta, Seih chô vaw  y chho ta, cha seih chô liata a ru lâta pakhata ta angia lymâ ei ta, athihpa yna o chahrih nata laitlâ ry lia anyu lymâ ei ta, I-zy ta nga tyh hr’ei sala, ri kia zâ a châpa vâta Tebu mo cha chariah na a nga tahpa pahno hlei v’ei. Zâcho chhôh ta angia ei ta, he zâ he meih â chhoh kaw ta, thlâpâ a lei râhsâ lâ a châpa vâta, khihchhôhpa châta chariah hmia pahno thei’pa chhao châ tlangiah vei. Chyhsa mokuh pahâh lichih nahta apachyhparyh lei chai nota chho’pa ama khohpa vâta awhkho râhsâ lâ na tah leipa ta cha chho’pa achhuah leipa ei ta, ei kha/ei no awh a vaw pa-ei pataw nahta athihpa o cha kapâ ei ta, avaw puapa chapaw ama thie theipa maih ama thie hra. Chanôzy cha patu ei ta, chanô pakha cha opâh lâ arâ ta, Zyhno mo ta a kei chadai ei ta, châhrasala cha chanô chata a hnorâh a râsai ta, patu palâh leipa ta ama kuasai ha heih.

              He chanô ta a pamosapa cha, “Ei hno ei poh a hi lei no na a châ”, a tahna châ ta, chanô hnopoh a hi lei nota achadai ta patupa cha ‘anapa’ ama tah tyhpa a châ. Chata ama kei chhopa vâta Tebu khihsaw sahlao cha lyurâhpa lâ arâ chili ei ta, thokha asihphi-zâlâh via penawh cha ama nôzy ta ama saw nahzy cha sahdô lâta pathla ei ta, sahdô liatazy amâ nyu hôlô hra. Tebu chyhsa nawhtaw akhoh lei penawh chhaota li ta Zyhno mo cha ama vaw ka ngâ hra. Tebu chhona liata ahlao hrapa Ngehnai (Lebaw Solo mahpaw) reina zie ta, “Zyhno chyhsa chhao thokha la vita ta eima thi tyh na”, a tah. Ano pa chhao li nahta za ka ei ta, a sâhrô pai ta liata a zâ hnaopa hawhta a reih.

              He liata Tebu ama thiepa he chyhsa pakih (20) rô ama châ. Thokhapa luh cha la ei ta, chanôzy chhao sei châta a chhi bâ ei ta, Tebu khih cha a pavâ hlâta ama puasai ha heih. Tebu-pa pakha ta ama khih luhchô tawhta, “Khataih chariah chi ma?”, tahpa ta za awsao ei ta, Zyhno chariah hryta ama chhihthatuh chaipa Hmôkhaw ta, “Zyhnopi pi na, Tlele chakeih na eima châ e, Tisi ti apakuapa na eima châ e”, tahpa ta â kaw chhy hra. Kaw sie ei ta Tisi chavah liata zy a kaw rie laih ei ta, chyhsa ama thiepa luhzy cha a thu lei n’awpa ta mei nahta amâ riena liata ama tô lymâ. Tebu chanô nah sei ta ama patu penawh cha ama ngiachhie tu ha ta, amo raita mo khoh veih ei ama tah.

              He chariah asiehnao penawh nata ama thie penawh thâtih he Rekenua (Riakia nô) khazoh ahneipa ta a phuah ngâthlâh ha. Zyhno khih sawzy chhaota ama kaw tlô n’awpa angiahtiah lei kawpa ta sahmazy chhaota ama vaw ydy hra. Chyhsa luh chhaota azo ta khih angiapa cha ânapa hawhta ama pachâpa vâta Zyhno khih cha my ta tlô ei ta, khihsaw sahlao ta viahdawh, dawhkhoh, paotlâ nata paro theipa chi nano nanopazy chhaota rônah kawpa ta ama vaw dy hra. Chyhsa luh ama kei tlôkhei no cha thata sahma doh ei ta, sawh-lâzy kiah ei ta, paotlâ, viahdawh nata dawhkhoh zy chhaota thata a ly ei ta, chyhsa luhzy cha tlyliah liata ama soh. A vaw zâlâ nahta chyhsa luh cha ratlyh lia tawh ei ta, Hmôlai thlâ cha chyhsa luhzy chata ama vaw chadôsa.

 

“Chaizah be iva tlua ra salah e..,

Zathah bei va tlua ra salah e..,

Moluh chadau Hmaulai lyale ne”.

 

              A vaw zoh nahta abeipa o liata sahma doh heih ei ta, cha zâ cha chariah lâta asie penawh cha niebaw liata chhao khokheina thata ama dao hra.

              A mylâpa ta ama o nochâchyu liata chyhsa ama thiepazy iana hnei heih ei ta, nie nata do ta ama daihti cha amah hmâh heih. A nohthôh (3) noh deikua cha sawh panana hnei ei ta, ahy hmahta khô pua leipa ta o lia akôh ei ta, paro pasyupa chhao khâpa hmahta tao v’ei. A noh palihna noh deikua cha apathai ei ta, Tisi chavah lâ zu ei ta, keipazy ny ei ta, ama ngaizy asi pâ ei ta, he he mâchhiesa paina chhâna a châ.

              He tawh heta cha ama beipa mâchhiesana pai ha ta, abei nah chhôhkha nata mâchhiesapazy cha kyh totie liata aly-uana liata amâ hmâh ha bâ heih. He thâtih he sawhkhâ ta vaw pahno ta, Deputy Commissioner, Arakan Hill Tracts ta Tebu chyhsa sei ta ama patu penawh nata chyhsa luhzy cha pakua awpa ta bie pie ta, sawhkhâ biepiepa hawhta ama pakua khai ha heih. Zyhno mo ta pakua awpa ngiaroh kaw ei ta, châhrasala sawhkhâ pi bie a châ hapa naihta ei leipa ta pakua ei ta, he hawhna heta hla ama vaw phi pâ ngâpa a châ:

 

“Araw Vepi Vake tazah,

Tawbu zinau sihnai,

A valei ta ne”.

“A ry (Notla) lâ tawhta Viahpi ama kaw lai tawhta la,

Tebu zuahzy chhao ama hnoh lâ(ama râh lâ)ama kua ha heih na” tahna a châ.

 

              He Tebu zuahzy he Zyhno liata thla sari rachhôh vaw y ha ei ta, amâ lie chyta la ama ngiazy chhao chhie kaw ta, Zyhno khih puasaipa chhao ngiaroh kaw bâ ei ta, ngiaroh kawna chôta na ama puasai hra, ama tah. Hmôlai a thi tawhta kô 1921 pata Savo khih liata Tevo Bôhia a bei ta, abei Tevo he ku raihria apasâhsa kawpa châ ta, khihchhôh liata charei chakhypazy a hmô khiahta cha, “Khazia lyu lâ na sie hra vei, na tlâh vei ma?”, tahpa ta chyhsa a hiahri tyhpa châ ta, Savo khih mozy chhao rai hria leipa ta O liata y ngâh veih ei, ama tah.

              He hawhta a châpa vâta Tevo Bôhia â bei chhôhta cha Savo khihsawzy ama kôvei chhiahvei pha ta, sa chhao tlô hluh ta, chyhsazy chhao pôh chatlie ei ta, ama khihtlâh liata chipa hnei leipa ta thlalôh kawpa ta khih ama sa ama tah. Kô 1924 ta Tevo Bôhia âbei nota Zyhno cha British ry liata amâ ngia haw. Lôlei SDO ta Mara bei nah awpakhy ta, Lôlei liata ama tlôpaki nota amâ kaw lie awpa nota abei Tevo cha Lôlei SDO ta pasô ta, a khokhei kaw hra, Lôlei tawhta Tipa taihta kaolivyh penawh a kaw pasysa ei. Cha cha hla ta phi ei ta:

 

“Heima Chhotlei ele tyh chi,

Kavai Beiva Ngôhchipa dei lymâ,

Kualivawhva ry toh ly se”, tahpa ta.

 

Ama bei Tevo heta Zaisei, Chhachhaih zuah nata Mezai Bôhia zuah hnei ta, Sawchapaw Kolai  nata Hniachai, Vachai nata Serozy ama sah. Abei Tevo he kô 1931 liata a thi.

              Kolai Bôhia ta a paw Tevo a thi tawhta a su a kaw thla heih ta, Kolai Bôhia chhâ liata Savo tawhta atahmâ ta ama yna Zyhno liata amâ kaw pasie laih. Kolai Bôhia ta lahpinô châta Sabyh bei sawchanônô hnei ta, cha liata Khainô II-na nata Tevo II-na zy ama sa.

              Zyhno Bei Kolai Bôhia he târi 15.10.1949 liata a thi. A sawnah ama hâti tupa vâta Iahmô Thlyutha ta â thla heih. Iahmô Thlyutha â bei daihti nota British sawkhâ ta abeina ama pachhâsa haw. Abei ama pachhâ tawhta abei/ryureina cha Village Council ku liata sopa a châ tawhta Zyhno khih liata VCP tuachaipa chhao cha Puhpa Iahmô Thlyutha he a châ.

              Khaino II-na ta Thiahra bei sawchanônô Pihnô Nobao Hlychho hnei ta, sawchapaw Beilaizi Bôhia ama sa. Tevo II-na ta Pihnô Nyuso Miehlo, Zyhno zuah hnei ta, sawchapaw Ngothaw–II (Sunday Bôhia) nata Hmôlai–II (Puia Bôhia) zy ama sa.

 

Toka Riahvaina

              Toka ta riah a vaina he lôpanô lai kawpa châ ta, a su nata lôpanô chhao tlôpa ta mokhaoh cheingei ta eima za hmô. Zyhno mo Savo khih liata khih ama sa no heta ama khih cha Thokhy/Diasua ta Savo lôkâhpa tawhta athaopa ta khih â dôna taihta dôh khai ta, cha dei hhao châ leipa ta ryhpaohna su lia maihta riahvaihtuhpa a soh khai. Riahvaina su kha liata a khihchhôh lâna heta lôpano lai kawpa he y ta, cha liana chata Puhpa Toka ta riah a vaih tyh ama tah.

Ei kha cha lôpanô chô liata â tyu thlâh no heta awhby sa ta, cha nota chariahpa ahnohky l;â tawhta vaw chadi ta,  a vaw thie ha ama tah. Tokâ he chyhsa ngâchhih kawpa nata khihsawzy châta chariah avaipa he thlalôhchhih kawpa hawhta ama reih. Khihsaw châta a hrona cha a hlâ ha tlai hra. Ama khih mo châta cha my thei’pa châ thlyu vei. Ano chhao a hrochhôh ta alô a bô ta, atanoh taihta a moh lei leipa ta ‘Toka riahvaina’ ama vaw tah ngâthlâh hapa a châ.

 

Sele Mahnô lôkhaoh

              ‘Sele mahnô Lôkhaoh’ tahpa ama bina chhâpa cha he lôkhaoh liata abeipa Deima lahpinô machâ karôpa he chariah tawhta â boh n’awpa ta azo lâta he lôkhaoh liata kei soh ei ta, my ta ama kei lapapua heih tyh, ama tah. Chavâta he lôkhaoh he ‘Sele mahnô lôkhaoh’ tahpa ta atanoh taihta ama bi.

              Deima he Bôhia beipa châ ta, Vahâ tawhta â zu nota râh pha viapa tluapa ta sie lymâ ta, Kiasie râh za tlô ta, cha liata amâ chhâ chy. A sawchapawpa Ratha Bôhia cha, cha liata pa-ysa ta, ano cha râhty pazawhpa ta mahthi via lâ sie ta, Kiasie tlâhpi liata khih padua ta, a hmiatua ta cha khih cha Tymaoh tahpa a châ. A chhâpa cha he su he râh chakipa, râhty râhmaohpa su châ ta, chavâta  Tôkalô moh tuapa he ‘Tymaoh’ ama tahpa a châ.

              Khih ama padua hlâ heta lôkhaoh aryh kawpa he y ta, cha liata Sele mahnô nata mahpaw cha ama y chy. Cha lôkhaoh cha ‘Sele mahnô lôkhaoh’ ama tah. Cha su liata lôkâhpa nata pâdawhpa su liata tikhaohzy y ta, ei kha cha Sele mahnô ti athai nota â chakhao tlamaw ha ta, alô khyrypa liata â hluah lymâ ama tah. Chavâta cha su liata tisao atlapa cha ‘Sele mahnô tisao’ ama tah. He Tôkalô râh liana heta Sele mahnô moh aphaohpa su a y bâ hôlô.

              Deima- Sele mahpaw cha he su liata thi ta, a ri deikua cha Savo liata ama kaw pabu. Chavâta a lahpinô Sele mahnô chhao cha khihsawzy ta za dy ei ta, khihsawzy ta ama uasa kaw. A nôpi karao hana taihta ama mohôh. Azo ta chariah ta khih vaw tlahnao tlamaw ei sala, tahpa ta â boh n’awpa pachâpa ta he lôkhaoh liana heta ama kei nyu tyhpa a châ. Sele he Deima samohpa châ ta, chavâta ‘Sele mahnô’ ama tah.

              He lôkhaoh he Savo khih luhchô liata Savo lôkâhpa, notla baih lâ lôkhaoh a ypa châ ta, a yna su he a ryh kaw ta, thlalôh chhao â chhih kaw.  Â thuna lâ he 4 feet rachhôh châ ta, a doh he 15 feet rachhôh a châ.

             

British lôkhaipa lâpi

              Hlâno ta ama chi chaipa cha chariah achhopa he a châ. Chavâta ama khih hmozy chhao he abypa â ryh kawpa hlâta cha chariah ta ama chho ryhpaoh leina su nata lôkâhpa ta adôh khai ha pa, chariah ama vaw chhopa chhaota ama hmô thei pâ awpa suzy he amâ vaw tlyh tyhpa a châ. Cha hawhna hra chata Savo khih chhao he lôkâhpa liata abaipa châ ta, lôkâhpa ta a chadô khaipa a châ. British ta Savo khih a siehnao daihti liata lâthlôh sienao via awpa rai a y leipa vâta ama khih pahlie n’awpa ta alô lai kawpa sâkha he lâpi châta khai ei ta, cha ama khaipa cha atanoh taihta y thlâh ha ta, Historical Monument châta pabohsa lymâ awpa a peimawh kaw.

              He lôkhaipa he Savo khih tlô chyta liata a ypa a châ. He su tawhta phei ta sie pi ta, Minute sâpangawh rachhôh eima sie tawhta saikaopa ti yna su tlô pi ta, cha su liata Thlabei he hluh kaw ta, nôpawpazy rei zie ta, “He su he Sa-ia chariah ta Savo chho awpa ta ama siehnao nota he su liana heta apahâ ei ta, thlabei hna he lyupa ta atyuhnie ei ta, ama chaozy thlabei ta a beipa vâta, “Savo nah he ama machhyu mahrâ ngâsâ na, ama chhohnapa taih na â hrâh”, tidiah awpa chi châ v’ei’ tahpa ta he su tawhta ama kua ha”, tah ei ta, cha saikaopa Savo khih angia chyta a ypa cha atanoh taihta ‘Sa-ia chariah apahâna’ tahpa ta a moh ama bi lymâ.

He British lôkhaipa he a seihna lâta metres 3 rachhôh châ ta, a kawhna lâ cha 2 feet rachhôh a châ. Savo khih he British sawkhâ ta Marapa râh khih â vao hawh chaipa châ ta, ama khih angiana dâh chhao British pheisaih rie ama pathei kaw. Zyhno khih ama lapa cha British pheisaih chhaota ama luh a lai kaw. Mara khihpi chaipa apahniepa hawhta pachâpa ta ama palôh a tlâh.

 

 

  

NGÔNÔ PHÔHPA

 

~ M. Nyusô

 

(He phôhpa he Pihnô M. Nyusô châbu, “Nôpaw ryusôh Mara phôhpa” tahpa tawhta lapachhuahpa a châ. Ed)

 

              Zâkhano he khih miakha liana heta nôvah baokha he y ei ta, sawchanô pano hnei ei ta, a uhthei viapa cha Ngônô châ ta, a seihnai viapa cha Darmenô tah ei ta. A nô nata a paw cha lyu taopa châ ei ta, nohchareih lyu lâ sie tyh ei ta. Ama sawchanô nahzy chhao atahmâ cha vaw laihsa ha bâ hra ei ta. Nohkha cha ama paw chata, “Atanoh la ei riethei tu ha ta, nama pano ta lyu lâ va sie u la, chhâmeih zy sâh zy rie za hâ muh vy”, tah ta. Chatawhcha, ama pano ta lyu lâ cha sie ha ei ta. Ama lyu kiah liana heta Si he y ta, cha liana chata Parihpi he pahrâ ta. Parihpi cha chyhsapa lâ a paliepa ta kaw charei tyh ta. A kaw charei ngâthlâh ha tyhpa vâta Ngônô nah chata a chhâna lâ cha akhoh (kyh a pachâ) ha ei ta. Chatawhcha, Ngônô cha rai chhao hria khao leipa ta Paripi nah chata apakyh tyh ei ta, a nawhtanô dei saita hria tyh ta.

              Chatanachata, o lâ amâ kaw lâhna daihti lia chhao a uhtanô cha, “Atanoh la ei viahpakao zy, hnorâh zy na ei bieh tua aw. Rie ei hâna liata â hrie khai ha ta”, tah tyh ta. A mylâpa cha lyu lâ sie ha heih ei ta, a nawhtanô hnoh chata, “Khuatahli ma na aw hoh via ma, mei ma na patih hoh via?”, tah tyh ta. A nawhtanô chata, “Kei la Khuatahli na ei aw hoh via”, tahpa ta hla ta hetana heta aw tyh ta:

 

“Khuatahli, khuatahla,

Ka-u Ngônô na raw sa ly,

Rawsy salyu chata e”,

Khuatahli ta â vaw chhyna hla,

Sahe ka he ri lo,

Sa hme ka hme ri lo”, vaw tah tyh ta.

              Chatanachata, lyu lâ ama siena daihti lia maihta a nawhtanô cha pa-awsa tyh ta. Paripi cha a khy ta, Ngônô cha rai chhao hria khao leipa ta, notla khideih chhao pahno khao leipa ta a chatôh tyh ei ta, a nawhtanô cha ano deita rai hria tyh ta. Noh â vaw hnai nahta chapu lâ a kaw di ta, “Â uh, sie bâ si”, tahpa ta vaw sie tyh ei ta, lâpi liata a nô nata paw hnohta reih lei awpa ta chho tyh ta. He vâna heta a nawhtanô chhao cha khâpa hmah reih beih leipa ta, a chalih thlâh ha tyh ta. O ama tlô nahta Paripi nata amâ chatôhna liata a viahpakao nata hnorâhzy ahriepa cha, “Rieva chahra tu ha ta, ei viahpakao ahrie khai ha ta, vaw bie tua sah y”, a tah ngâthlâh hapa cha Ngônô paw chata zo tu khao leipa ta.

              Nohkha cha a ru lâta kei ngiapathli ta, ama yna dâh zydua cha pahno khai ha ta, a ru lâta o cha vaw tlô ha ta. Ngônô cha a tao tyhpa hawh pyly ta, “Ei viahpakao a hrie khai ha ta, vaw bieh heih tua sa”, tah heih ta. A paw chata, “Mylâ khih a vaw deih tita nâma cha na viahpakao nata hnorâh ahriepazy vaw bieh la, na nawhtanô nata keima eima sie aw”, tah ta. Chatanachata, khih cha vaw deih ta, Ngônô cha a paw pahno awpa chi ngâsâ ta, a nawhtanô hnoh chata, “Va reih rai khah y, na reih rai khiatala keima la ei thi thlâh ha aw”, tahpa ta chho ta. A paw nata Darmenô cha lyu lâ cha sie ha ei ta. Lyu ama tlô pataw nahta a paw chata, “Darmenô, na tao tyhpa hawhta na aw tyhpa kha aw heih teh”, tahpa ta Tâkô cha chata ngâkaw ta. Darmenô chata, “Ei pâ, ei tao tyhpa y vei”, tahpa ta khâchâ aphih ha ta. A paw chata, “Ei pahno khai thlâh ha mâhtâh, na aw tyhpa kha na aw vei khiata la ei cha chhawhsao ha aw”, tah ha ta.

              Darmenô cha a paw a chi hapa vâta hetana heta aw ta:

“Khuatahli, khuatahla,

Ka pa Hekha na raw salyu,

Raw salyu chaty e”,  tahpa ta aw ta. A paw chata, “Khazia ma ei moh na reih, na aw dâh tyhpa hawhta na uhta moh ta aw teh, cha lei khiatala ei cha thie aw”, a tahpa vâta a uhta Ngônô mohta aw heih ta:

“Khuatahli khuatahla,

Ka u Ngônô na raw salyu,

Raw se salyu cha tah e”,

Khuatahli chata hetana heta avaw chhy ta:

“Sahe ka he ri lo,

Sa hme ka hme ri lo”,

kaw tah heih ta.

Buakha a y nah chata Paripi cha chapu lâ a khy ta, a paw Hekha chata chhikao liana chata a vaw byhkhâh ta, chhikao chakâ awpa ta â zâ ngia pataw nahta a rao lia vaw chhawh chaimâh ta, Paripi cha thi ha ta. Chatanachata, a sapa cha pachhaih ta,  a rih cha chapu osiari lâta pasi ta, a byhpi cha chakoh liata meiny ta tao ta, a chaolahmei cha alô ta pavi ta, a kuparo cha iasoh lâta loh ta, a luh cha bâlu lâta loh heih ta, a sâ cha khâchhao diehpa lâta loh ta, a tihmô cha Leilaw lâta loh heih ta. Chatanachata, akhotyhpa deikua cha chavah kaopa lâta pahluah ha ta, Darmenô nahta o lâ cha kaw sie ha ei ta. Lâpi liana chata, “Na uhta chho rai khah y”, tahpa ta a sawchanô seihnaipa cha chho ta. Chatanachata ama pawsaw ta o cha va tlô ha ei ta. A uhtapa nô ta a nawhtanô hnohta, “E, atanoh cha kheihta ma nama za tao?”, tahpa ta hiahri ta. A nawhtanô chata a paw riah achi hapa vâta, chho ngâh leipa ta. A mylâ khih a vaw deih nahta a paw ta, “Nama pano ta lyu lâ cha va sie u la, Reiva a hluh tu hapa hnaihta Khyuri cha pasipa khai ha ei na ta, nama tha a dâh kaw bâ khaw”, tah ta. Chatanachata, ama narô ta lyu lâ cha sie ha ei ta.

              Chapu za tlô ei ta, a uhtapa chata, “Ei nawhta, na taopa kha vaw tao heih teh, keima ta mei ei vaw patih aw”, tahpa ta, mei patih â chhuahpa cha Paripi byhpi cha hmô ha ta. “E, khazia eina phih chi?”, tah ta a palôh pasa ngâsâpa ta cha ta. A nawhtanô chata, “Ei pâ ei chipa vâta ei cha chho ngâh vei”, tah ta. Chatanachata, a pathi zy, a rih zy, a kuparo zy, akhotyhpa zy, a tihmô zy yna cha hiahri lymâ ta, pakhy-pazi lymâ ta, a zydua ta akhotyhpa a sona chavah kaopa lâ cha sohpakhy lymâ ta. A chaolahmei deikua charâta hmô thei leipa ei ta, pavaw sâkha he a vy ta, “A chaolahmei lô ta kaw kaw”, vaw tah ta. A nawhtanô chata, “E, â uh, Pavaw ta a chaolahmei lôta kaw kaw, a vaw tah ngâpa cha va hy tua sah y”, tah ta, a kei hypa cha vaw y thlâh ha tlai ta. Chatanachata chavah kaopa lâ cha sohpakhy khai ha ta, ano cha a liah liata a duah ta, hetana heta hla sa ta: “Ti bu bu ly rara bu ly,

Meme chô zaphe”, tahpa ta hla a vaw sapa cha a pheipai taihta ti cha a vaw o ta. A nawhtanô ta, “Â uh, kei chhao ei vy hra aw”, tah ta. Ngônô chata, “E, nâma cha nô nata paw hnei chi ta, o lâ va sie ha mah y, kei deikua la Khuatahli na ei pahlyh ha aw”, tahpa ta a lâkyu zy, kusadi zy cha pahluh ta vaw thypa ta. A nawhtanô cha O lâ sie khoh tiarâh leipa ta, a uhta kiah liana cha khâchâ a duapâ thlâh ha ta, Ngônô cha hla sa heih ta:

 

“Ti bu bu ly rara bu ly,

Meme chô zaphe”,

tah heih ta.

Ti cha a chai kaw pha ha bâ ta. A nawhtanô hnohta, “O lâ va sie ha bâ mah y”, tahpa ta a chairi zy, pachhi zy pahluhpa ta kei thy heih ta. Ngônô cha hla sa heih ta, adoh avao ha bâ awpa a châpa vâta, “Ei nawhta y, keima la na hmô khao aw va chi, eima khihsana dâh alyu khao tlôh leip’aw ta, o lâ va sie ha bâ mah y”, tah ta, Ngônô cha ti ry lâ angia syulyu ha ta. Ti ry liana cha a kyhpachâpaw nah chata ahmô ha heih ei ta, ama pano ta aly kawpa ta ama y ha bâ.

              A nawhtanô deikua cha o lâ sie khoh khao leipa ta, cha ngâthlâh ha ta. Cha chavah kiah liana cha pati nie’pa chhao y vei hrasala a uhtanô cha siesai awpa pasaih tlôh leipa ta. Chatanachata, a uhtapa chata a vahpa hnoh chata, “Ei nawhta nô he eima yna chô liata Dawh-O eima sapa thlâh leipa khiata la a thi dâhdei aw na”, tahpa ta khôtho lâ kaw pua ei ta, a nawhtanô O cha sapa ei ta, cha liana chata pahrâ ha hra ta. Darmenô cha a hmipha ngâsâ ta, a sâ chhao a seih ngaita kaw.

Nohkha cha ama yna kiah liata khih beipa chata (Beibei) Khochei a chhuah ta, a sei pano pathôh cha Chiahro hna la awpa ta tuah ta. Darmenô yna mahthi lâchhâh he sie ei ta, sei pakha ta chavah a chaka ngâno heta sâ heta a phei liata vaw chavia khai ha ta, ngiahkâ a pua pataw nahta sâ cha hlô ta, sâbu sâkhapa tlai kha cheihchâlô tie tlai pha ta, “He chanô sâ pha dâh cha dia, ei kaw tlua tua rai aw”, tahpa ta mahchha lâ cha khy laih ta, Dawh-O liata a ypa laihsanô cha kaw hmô ta. Chatawhcha o lâ va sie ei ta, o ama va tlô nahta abeipa chata, “Khazia ma chhohna he zie ngâlâh nama vaw phaoh? Eima hmâkhi a pha tiarâh vei he zaw. A  nohno-ykha khâpa nama tao?”, tahpa ta vaw ra ei ta. A sei pakha chata, “Abeipa y, hao liana haota a laihsanô sâbu seih kawpa hmô na ta, cha sâbu cha hlô chaimâh na ta, ei hlô khaipa cha Cheihchâlô tie tlai vaw pha ta. Na lahpinô awpa ta khoh tlôh pi ta, a ynazy tlua laih pi, eima tahpa vâta chhohna he eima hlaih hluh hmâ khao vei”, tahpa ta chho ta.

              Cha pataw nah chata Abeipa chata, “Vawh u la, ei lahpinô awpa ta va hiah teh u”, tah ta. Chatanachata Darmenô hiah awpa chata a seizy cha sie ha ei ta. Darmenô o cha kei tlô ei ta, khichhai a vaw hmôpa cha vaw chi ngâsâ ta, “Khichhai pha ma, khichhai chariah ma nama châ?”, vaw tah ta. Abeipa ta atuapa nah chata, “E, chariah châ ma pi, eima Beipa lahpinô awpa tan a eima cha vaw hiah”, tah ei ta. Darmenô chata, “E, keima rei châ vei, ei uhta nah he ti ry liata y ei ta, âmo rei sai na a châ aw”, vaw tah ta. “Chakhiata la na uhta nah cha bâh aw la, keimo ta eima vaw chho aw”, tah ei ta. Ngônô nata a vahpa cha Darmenô ta aw ei ta, ti ry lâ tawhna cha vaw pua ei ta, a nawhtanô cha ama beipa lahpinô châta ama vaw hiapa thâtih cha khichhai nah chata chho ei ta. A uhta nah chata paryhsa ha ei ta.

              Darmenô ta, “Nâmo â hla awpa la khoh va na, dyhchâ lei tlâ y lahvâ na”, tah ha ta. A uhta nah chata, “Va y la, eima yna chavah he nama o kiah liata vaw pasie lahvâ pi”, tah ei ta. Chatanachata, Darmenô cha abeipa lahpinô awpa ta a chhi ha ei ta. Abeipa o cha kei tlô ei ta, abeipa chata Darmenô cha hmipha-sâseih vaw tah kaw ta, a ly ngâsâ ha ta. Anodeikua a lahpinô nôthonô chata Darmenô cha a hao ngâsâ ta.

              Chatanachata, Darmenô cha nawh vaw hnei ha bâ ta. Noh nata daihti vaw sie laih ta, nawh pi daihti liana chata abeipa cha khih tlyh ha ta. Ano y lei chhôhta nawh vaw pihpa cha nôthonô khata isi ngâsâ ta, hawtipa cha ama tlyhmia liata chavah aloh ngâpa liana chata thy ha ta. Hawsaihpa cha a nô uhta nah tiry liata a pahrâ penawh chata a vaw huah ei ta, mohôh awpa ta ama ku liata y ha ta. Abeipa Pale cha khitlyna lâ tawhta vaw tlô ta, “Hâtipa cha a pha ma? Na vaw pahmô tua u la”, tah ta. A lahpinô pakhapa chata hetana heta vaw tah ta, “Na lahpinô he chyhsa saw hmah a phao leipa he, lôta na tlâ a châ”, tahpa ta vaw pie ta. Abeipa chata, “E, hetana he ma a vaw châ”, tahpa ta a chalih thlâh ha ta.

              Abeinô cha nawh vaw hnei ha heih ta, a pina daihti liata abeipa cha khih tlyh ha heih ta. Hawsaih a vaw pi pataw nahta a nôthonô chata ti lâ cha thy ha heih ta. A nô laipa chata hawsaihpa cha a vaw huah heihpa ta, ama ku liata y ha heih ta. Abeipa cha vaw tlô ta, nôthonô chata, “Na lahpinô he chyhsapa saw raita a phao thei leipa he”, tahpa ta, Thothu Darmenô thi ta a hniapa cha vaw pahmô heih ta. Abeipa chata khâpa hmahta pahno tlôh leipa ta, a hnabeidy kaw ta.

              Hawti penawh cha ama nô laipa chata vaw mohôh lymâ ta, vaw satlia ha bâ ei ta. Nohkha cha abeipa chata chyhsa saw hmahta asa thei leipa cha tahpa ta Darmenô cha a sâ ngyu khai ha ta, awhsa rie pahâsa ei ta. Laitlâ liata â tyu thlâhpa cha ama nô laipa chata Darmenô saw nah hnoh chata, “Nama nô khi moh tua u, ngiachhie â chhih dâh khi. Atahmâ cha satlia ha bâ ei chi ta, kaw dy muh vy”, tahpa ta hmo yzie nata ama nô hnohta bie ama rei n’awpa dâh zydua vaw chho khai ha ta. Chatanachata, unawh pano penawh cha ama nô yna lâ cha a khy ei ta, ama nô chata vaw pahno tiarâh leipa ei ta. A nôthonô cha Karao pa-ôsa awpa ta a vy ta, unawh pano penawh chata, “Abeinô, nâma pi ta Karao maniah na vaw pie thlâhpa cha la, na tua pahaipa na sei chanô khata maniah vaw pie bao lah vâ”, tah ei ta. Nôthonô chata pahnei pâna chôta Darmenô cha kei tuah ta, ama nô chata khâpa hmah pahnothai tlôh leipa ta, “E khai, atazâ ta unawh pano penawh cha amâ nano kaw na”, tahpâ laihna chôta Karao cha kei pie ei ta. Unawh pano penawh chata, “A vaw tyuh chy la, bie eima cha chho aw”, tah ei ta, hmo yzie zydua cha chho khai ha ei ta. Ama nô chhao chata, “Ei saw saih, keima saw tlai ma nama vaw châ?”, tahpa ta cha ngâkaw ta.

              Chatanachata, a mylâ khih a vaw deih nahta abeipa hnoh chata, “Na saw na khoh leipa, ti liata na thy hapa eima châ. Eima nô he eimâ chhi ha aw, ngiachhie â chhih tu ha”, tah ei ta. Ama paw chata, “E, ei vaw pahnothai leina vâta na a châ, a vaw pei dâh rimâ cha!”, tahna chôta a nôthonô hnoh chata, “Nâma vâ saina a châ, nâma tlai he ma ei cha thie h’aw na”, tahna chôta chhôcha lâ tawhta vaw chapiekhy ta, obâ a kaw daina ta, a py liata Titheih pua pazâ khai ha ta, nôthonô cha thi ha ta. Chatanachata, unawh pano penawh chata ama nô cha ti ry lâ cha a chhi syulyu ha ei ta, he tawhta cha ama nô laipa nah nôvahzy chhaota aly kawpa ta khih ama sa haw.

 

Source: Board of Mara Literature, MADC, Siaha.

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II