Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue October 2020



Editorial

               Khizaw atymâna nata rairuna, hri chichhihpa Covid-19 ta a pabua haipa hry liata Khazohpa ngiachhiena nata chhihthana a topazy ta châhvâ daihti pha ngaitapa cha a vaw ngia ha heih pi ta, saopi paipa ta chasipaw daihti eima tlô daihmâ ha heih.

              Nohkhaih ngia ngaitapa hry liata charei hr’ei sih la, khizaw liata covid-19 hri chareipa hra cha pai viana lâ hlâta paru viana lâ pangai via ngâ kaw tlôh ta. Eima râh nata khizaw heta khatlu ta rairuna ma eima kaw chatôh via laih aw tahpa chhao pahno thei’pa châ khao hra vei.

              He hawhta rairuna eimâ tyh hai no heta kheihta ma eima hmiachhy aw, tahpa he pachâ lei thai’pa vaw châ tyh vei. He hawhna heta hmiachhy ei sih la eimâ boh chai thlyu’na.

1)                   Khazohpa lâ thlahchhâ hluh ei sih la, a pabohsana nata a chhihthana hiah via lymâ ei suh u.

2)                  Sawhkhâ nata khitlâh nôpawzy ta tao awpa nata tao lei awpa ama tahpazy reingiah kawpa ta zyh lymâ ei suh u.

3)                  A byuh kaw hlei leipa liata cha khôtho pua tlâ lei awpa.

4)                  Hmiapahlyna (mask) hmâh lymâ ei suh u.

5)                  Chyhsa nata chyhsa likah âpahla lymâ suh u.

6)                  Eima kuzy asi tiamapa ta a pathai para ngâthlâh ha ei suh u.

 

He hleikhô ta dawhtyzy ta ama reih dâh liata cha, chasipaw daihti, kahrao a hluh daihti thlai akaw ngia awpa châ pi ta, he daihti he Covid-19 a paru lichih a châ thei awpa ta ama saichhielie dâh châ ta, he vâ heta eima sawnahzy hleikhô ta keimo tlai chhao kahrao tawhta eimâ boh thei n’awpa ta asohsi kawpa ta, kahrao apasaohsa tlâ lei awpa ta eimâ mohôh pha chyu awpa a pha kaw aw.

Kahrao ta eikha miah a vaw sao ha khiahta cha a pha ru kaw tyh ta, cha nota Covid-19 eima vaw vei pâ lao khiahta cha, eima sapa ta a pahnie lei kaw thei aw. Chavâta moto he hri chichhihpa tawhta eimâ boh chyu thei n’awpa ta, Khazohpa lâ thlahchhâna chôta asohsi via lymâ ei sih la, khôtho lâ chhao abyuh kaw leipa ta cha pua chakhyh lei awpa ta eimâ pasyu.

 

 

 

 

 

 

DISASTER MANAGEMENT

 

~ Shri. B M. Khaimeichho

Deputy Secretary DPAR&P

MADC.

 

 

1.1  DISASTER :- Disaster cha zawpi, vâtlâh, khitlâh nata chhôhkha khihsana dâh thata pariarituhpa nata pabuatuhpa, riethei taona nota leipa vaw tlôna a châ. Hmo chichhihpa raona a vaw tlôkhei theipa, eikhapi ta vaw tlô ta hrozie dâh tyhpa a pariaripa vâta chyhsa hrona nata  O nata lyuzy pahlei hraoh leipa ta hmahla awpa ta a vaw peimawh tyhpa a châ ama tah. DISASTER MANAGEMENT ACT. 2005--- ta cha, ''Disaster is, catastrophe, mishap calamity or grave occurrence in any area arising from natural or man made causes or by accident of negligence which results in substantial loss of life or human suffering or damage to and destruction of property, or damage to, or degradation of enviroment and is of such nature or magnitude as to be beyond the coping capacity of the community of the affected area'' a tah. Mara reih ta cha, ''Eikhapi ta hmo a tlôpa, nota leipa ta raona, rairuna, vâdua chhâna, taona, khataih liata tlyma chhiena a tlôpa tlymâ, chyhsa diathlâna vâta tlyma, chyhsa taopa vâta tlyma chhiena eikhapi ta a tlôpa, cha chhao cha taopasina vâta tlyma, diathlâ vâta, tao awpa tao leipa vâta tlyma, chatlai chata, taona, chyhsa hrona taih ta pahlei theinazy, hmo sôhpa hluhpi o nata lyuzy, eima chheihpâh liata tho, ramawh, hmohhroh hneipazy châ taih ta raona/ chhiena a vaw tlôna vaih, khih nata vâtlâhzy taona nata pasiapanô thei awpa hlâta ru viapa ta raona a vaw tlô nota,'' tah na a châ eima tah thei hra.

 

1. 2  PARADIGM SHIFT IN DISASTER MANAGEMENT:  Kô 2002 hmialâ cha Disaster management tahpa heta sawhkhâ nata zawpi palôhrupa liata a hriana dâh cha TILAIPA nata NOHKAHPA he a dy via chai. He hawhta raonazy he avaih chhielie ta a boh thei awpa hawhta pachâna y thai hra vei. He disaster ta chicheipa lâchhâh ta a hria viapa vâta Ministry of Agriculture ta a mohôhpa a châ. Raona/chhienanazy a vaw tlô nota baona (relief fund) ama pie hleikhô ta hmahlana y tu vei. He hawhpa daihti nota raona alosihpazy, thlihpipazy, etc. vaw y lymâ ta, rairuna thata a pôh via lymâ nahta cha Disaster Management siezie he sawhkhâ ta yzie a hnei leipa hawhta a hmôpa vâta  High Power Committee On Disaster Management cha 1999/ August liata a vaw padua haw. A rei leipa liata 1999/ October liata Orrisa Super Cyclone vaw pathli ta, kô 2001, January/26, Gujarat liata Cyclone nota leipa ta vaw pathli heih ta raona INDIAN ta a vaw tyh ta DISASTER MANAGEMENT liata sawhkhâ cha a vaw hra pathao haw. Relief fund ngalâh ta ama pie tyhpa kha a daih tah leipa ta, Disaster a vaw tlô awpa tawhta abohna pachâpa ta a ry liata point-zy hmâpa ta hmahlana a vaw tao. Chazy cha; 1. Avaihna (Prevention) 2. Apatohpatiana (Preparedness) 3. Panaina (Mitigation).

             

1.3 DISASTER - CHI NANOPAZY:- High Power Committee On Disaster Management ta INDIA râh su nanopa liata a pahrâpazy châta chhiena/ raona chi hluhpi a vaw tlô tyhpa achu pasiapa ta he hawhta pachhaihpa a châ.

 

1. WATER AND CLIMATE RELATED DISASTER:


                             A. Flood and drainage (Tilaipa nata alona).

                             B. Cyclone (Thlihpipa).

                             C. Tornado/hurricane (Thlihpi).

                            D. Hailstorm (Vakatla/Pachiepareih)

                             F. Cloud burst (Ameih thlih).

                             G. Thunder and lightning (Tôhkalôh/Dôhla)

                             H. Avalenches(Dâhhaw akhaopa/tlapa)

                             I. Heat and gold waves (Thlilalôhpa nata chakuapazy)

                             J. Sea erosion (Tilaipi chatlaopa)

                             K. Drought (Nohkâhpa).


             

2. GEOLOGICAL RELATED DISASTER:

                             A. Earthquake.

                             B. Landslide and mud flow.

                             C. Dam burst/failure (Tikhaoh sahpa).

                             D. Mine fires. E. Volcaniceruption.

3. CHEMICAL, INDUSTRIAL AND NUCLEAR RELATED DISASTER:

              A. Chemical and industrial disaster (Thohna nata hmotaona su raona).

B. Nuclear disaster vâta raona.

 

4. ACCIDENT RELATED DISASTER:

             


A. Urban fires.

B. Village fires.             

C. Forest fires.

D. Electric fires.           

E. Serial bomb blast.

F. OIL Spill (Tikâtheipa Aleithapa).

G. Festival disaster.    

H. Air, road, rail accident.      

H. BOAT Capsizing     

I. Mine flooding.

J. Major buildingcollapse(O chopa)


 

5. BIOLOGICAL RELATED DISASTER:

 

A.Biological disaster and epidemics (hri chichhihpa hiezâh).            

B.Pest attacks (Lôvâpa ta chicheipa a niepa).

C. Cattle epidemics (Sahroh hri charei). Food poinsoning (Nie pathaih leipa, thina a tlôkheipa).

 

1.4.  DISASTER MANAGEMENT:

                             Disaster - zy ta pei nota leipa ta a vaw tlôpa panai nata pachyh thei n’awpa ta kao hluhpi ta hmahlana ama hnei. Chhiena/raona a vaw tlô awpa tawhta avaih awpa zy, a patohpatia awpazy nata amâ chhielie awpazy nata duahmo phaleipa liata a y haipazy, raona a tlô thlu thlyu awpazy châta hmahlanazy, raona a vaw tlôpa chhao ta, hmiachhy thei awpa ta a patohpatia chhielie awpazy, raona a vaw tlô khai tawhta pachhana rai nata a parao hapazy baona nata deichhyna zydua duahmo tyhpa liata paysa awpazy he a châ. Raona/chhiena tlô hlâ,  atlô nota nata a tlô khai tawhta hmahlana dâh zydua hleikhô ta abohna nata ângiahna hawhta pachâpazina zydua he  Disaster Management a châ.

 

1.5. DISASTER MANAGEMENT CYCLE: Disaster Management Cycle he nota leipa ta raona chôchâh liata hmahlana hmo peimawhpa chi hluhpizy a pazipa ta pamosana a châ.

 

1.5.1 AVAIHNA (PREVENTION): Raona nota leipa a vaw tlô awpa tlyma, pei a hria awpa tawhta khôhkhâhna pachâ chhieliepa he a châ.

           1. Meikâ theipa tawhta abohna châta Mei lâpizy taopa, apuapa pathaipazy etc.

          2. Tilaipa tlyma, aleichopa tlyma tawhta chyhsa eimâ boh thei n’awpa ta O nata lyuzy , ie O nata pazô Ozy he su rypaohpa, su pha viapa liata eima padua/tao awpa a châ.

 

1.5.2 PANAINA (MITIGATION): He he chhiena/raona nata rairuna a vaw tlô tyhpa panaina, pachyhna lâta hmahlana a châ. Chhiena a vaw tlôpa cha pakhâ thei thlyu aw mapi. Châhrasala, eima O nata lyu zy, lâpi zy, office nata school, tilona nata apuapa thyna su zy, tihry lonazy he a pha kawpa nata a chao kawpa ta eima tao khiahta la nata sawhkhâ dâhzy eima zyh khiahta la chhienazy thata eima panai thei nahta pangiasa â chhih.

 

1.5.3 PRECAUTION: Avaih chhieliena tahna châ ta, chhiena a vaw tlô awpa chôchâh biedaopa a châ pataw nahta a kawh thei chaipa hawhta hmahlana a pahnosa parana a châ. Office - zy, School-zy khaw ta, chhiena a vaw tlô awpa liata abohna chhaichhi hmâ thei awpazy chhaota a a hrohhrua awpa a pahnosana a châ.

 

PREPAREDNESS:

                             He he chhiena nata raona chôchâh liata a patohpatiana a pahly khai. Sawhkhâ tao awpa zy NGO tao awpa zy vatlâh tao awpa zy nata mo pakha tao awpazy chhiena chôchâh liata ama tovyuh chyu liata amâ pielyu thei n’awpa ta hmahlana dâhzy tao thai’pa a byuh kaw. He hawhpa kyh liata apatohpatiana chi thôh lâta pachhaihpa a châ.

 

WARNING:

                             Chhiena a vaw tlô thei awpa pahnopa a châ vâta zawpi a hrohhrua awpa ta pahnosana zy bao angiahpazy ama ypa chhaota bao lymâ awpa ta pahnosana a châ.

 

THREAT:

                             Hmo chichhihpa/chhiena a vaw tlô awpa chôchâh a pahnosana a châ. A chô liapa nata â lyu pâ thlâh haw. Threat tahpa deikua he chhiena chôchâh liata a pahnosa chakhyhpa châ leipa ta, chhiena a vaw tlô awpa cha a sia kawpa ta a pahnosana a châ.                                                                                                                                                                                   

 

1.5.4 DISASTER IMPACT:

                             Chhiena/raona a vaw tlôna su nata chhiena ta aparaopazy tahna châ ta, chhiena a tlôna daihti liata a hriana dâh chhao a châ thei hra. Disaster Management siezie ta cha chhiena a vaw thaotô dâh nata chhichâna hawhta a hriana dâh he â nano thei. Pamosana ta, alosihpa cha eikhapi ta vaw tlô ta, a daihti pachho kaw ta, a paraopa deikua nota leipa a châ. Thlihpi deikua cha a patohpatiana daihti pasi kaw ta, a pathlina daihti chhao a pasi kaw. A paraopa chhao nota leipa a châ. A châhta cha a vaw pathli chanei tyh.

 

 1.5.5 RESPONSE:

                             Chhiena/Disaster a vaw tlô nota eikhapi ta hmahlana a châ chai. Hrona pachha awpa zy, hmobaoh pahlei thei awpa vaihnazy, chhiena vaw tlô sala nota leipa ta raona a tlôkhei awpa vaihna zy, a parao via lymâ thei awpazy tawhta hmahlana a châ. Hmahlana thokhazy cha a patohpatia chiehpa hawhta (Implementation of plans) hmahlapazy, thata hmahla thei awpa ta peimawhpa zydua chhaota amâ pachiepa (activation of the counter disaster system) zy, bao angiahpazy tluata pachhapazy (search and rescue) a chatliepa hawhta niepa raipazy a nyuna châta poh O tao awpazy thohna nata apahleihpazy mohôhpazy (provision of the emergency food, shelter, medical assistance) chhiena vâta hryuhna nata a thipaziezy (Damage assessment) taopazy a châ.

 

1.5.6 RECOVERY:

                             Chhiena atyh hlâta duahmo parohpa liata aduah heihna châta chhôhkha, vâtlâh nata sawhkhâ hmahlana awpazy a châ. A daihti he kô no tawhta kô hrawh chhao a châ thei.

 

1.5.7 DEVELOPMENT:

                            Mara reih liata cha hmahsiena eima tah thei aw. Disaster management liata deikua cha a taopathi heihna tlyma, chhiena â tyh hlâta râh nata khihzy, O nata lyuzy, duahmo parohpa hlâta pha viapa nata rônah viapa ta a duahna he a dy chai.

 

 

 

 

 

EIMA KHIH  TISI

 VAW  DUAH  LAIHNA  THÂTIH

 

~  H. Beilaikô  Nôhro

New  colony-II

Siaha

TISI KHIH

 

 

 

                  Eima  khih  Tisi  he  Nôhro  Bei (Hawthai Bei)  nah (nawh) ta  khih  ama  za  sa  laih  lymâna  a za  sie  laih  lymâpa  tawhta  â vaw  duahpa  a vaw châ. Hawthai Bei (Nôhro Bei) nawh  he  atahmâ ta  Myanmar (Burma) Sôthla  râh (Sunthla)  tawhta  â zupa châ  ei  ta, Chhie-râh  liata  kei  pahrâ tua  ei  ta, he  tawhna  heta  amâ  vaw  pasie  laih  lymâ  heih. He  chhie  râh  liata  ama  vaw  pahrâ  nona  heta  Rôkhai-I  nata  Sôbei-I  cha ama  unawh  pano  chata   Lâpi  â  tyh  pakhyna (Main Junction  of  Roads)  Hawka  liata  Byh-sarao  vaw  baih  ei  ta. A sievawhpa  to  nata  khi  atlyhpazy  nata  sôh  a paliepazy  hnohta, “He Byh-sarao  liana  heta  nama  hmo  phaopa  nata  zuapa  kheihawhpa  rai  chhie (Tax)  châta  nama  vaw  khô  lymâ  awpa  a châ. A  soh  khoh  leipa  cha  nama  chi  nata  pho  zydua  eima  châ  laichadai  lymâ  aw  ei.”  tahpa  ta  bie  ama  vaw  pie.  He  hawhta   chhie (Tax)  ama  vaw  khei  tyhpa  vâna  heta  chyhsazy  chata, “He  nawh  unawh  hela  chhie  haw  to   a  haw  thaipa  na  ama  châ.”  Vaw   tah  ei ta, “Hawthai”  tahpa  ta  moh  ama  vaw  bi  pâ. He  he  tanoh  taihta  moh  ama  vaw  phaoh  pathlah    hapa   a  châ.

Hlâno  tawhta  khih  ama  vaw  sa laih  lymâna  nata  khihchâ  ama  vaw  zoh (khih  ama vaw padua) laih lymâna  zydua cha  kaw pahno  khai  thei vei  hr’ei  sih la,  eima  kaw pahno  theina  rakha tawhta  â vaw  laichadai  tua  ei  sih la. Tiriah  haosâ (Beinô  chava haosâ) ama vaw  zoh (ama vaw chaka), India râh  amâ  vaw ngia  tawhta  reipa ta  eima    laichadai laih tua aw. Nôhro Beizy hry  tawhta Tiriah  haosâ  vaw  zoh ta, India  râh   â vaw  ngia  tua chaipa  cha  Mapaw  Hrâhlei  he  a  châ. Keimo  (Tisi) Hawthai  nah (nawh) pih  he  India  Mara  chi  chi-pangawhpa (5 Brothers) zy  hry ta Tiriah haosâ vaw zoh ta, India râh â vaw ngia hnôh chaipa chhao eima châpa ta pahnopa a châ  hra. Mapaw  Hrâhlei   heta Tiriah  haosâ  vaw zoh ta, India  râh  â vaw  ngîa  tawhta  Sâhia  khih  Mawmâ Tlâh  thaby  liata  khih  a vaw  sa  tua chai. He  Sâhia  khih  liata  ama  vaw  y  no  heta  mapaw  Hrâhlei  sawchapaw  thatlô  mohpathâhpa  Laithâ-II  cha,  Chakeih  a zohpa(Sakei zawl) nata  sai  amâ  vaw  sona  liata (Play Games / Wrestled  with  Tiger), chakei  cha  vaw thiesao  ha ta.  Chakei  tôhpa (keihpî) chata  a hnôhlâ  tawta  â vaw  zawhnao ta  a rao (Neck)  liata  vaw  sie ta,  Laithâ-II  cha  a  vaw  thi  pâ haw  hra.

 He  Sâhia  khih  tawhna heta Paimai (Pehme) khih, atahmâ  ta Tisi  râh  liata  amâ vaw pasie  tua chai.  Paimai (Pehme )  liana  heta    reipi  tlai cha khih  ama vaw  sa. A chhâ chaipa  cha  a suhmo  â ryh  hleikhô  ta, chariah  tawhta  amâ  vaw  boh  kawpa  vâta  nata  riah  vaih byu leipa  ta  ama vaw  y  theina (khih ama vaw sa)  theina su  a châpa vâta. He Paimai (Pehme) liata  khih  ama vaw  sana  daihti  he  kô 1800 ( 18th Century ) chhaichhôh (hryh) a châpa  hawhta  ama vaw  pahno. Paimai (Peme)  khih  cha,  Siata  Bei Hmolai-I (Rôkhai Pathla) chata  Thlatlâh  Bei  nata  Sa-e (Fan-ai) zy  a vaw  pahruapa ta  â vaw pakaoh (Secret Solemned  and  Conspired) ei ta  vaw  tlahnao  ei ta,  mei (Fire)ta  ama  vaw  rao pâ  hapa vâta, he su tawhna  heta puasai  ei ta, Aw-chhyh  tlâh  ryh  Peikiah  chavah (Peikiah River) hnawh  thaby  Ravaw  khih liata  khih  ama vaw  paduapathi  heih.  Paimai  khih  cha  vaw  chho (Tlahnao) ei  ta,  mei (fire) ta   ama  vaw  rao    hapa  vâta, khih  ama vaw  chho (Tlahnao / Parao) hapa  tahpa ta ‘Khih chhoh’ tahpa  moh ama vaw  bi pâ. Atanoh  taihta  he  paimai  râh  he ‘Khih chhoh’ tahpa  ta  ama vaw  aw tyh.

              He paimai  ama vaw  tlahnao  nona  heta  mapaw  Hralei  cha  â vaw  râ (Flee / Run a way) kho  hra leipa ta, chariah  nah (nawh)  chata  a o chhaota  mei (fire) ta  vaw rao pâ ei ta  a  vaw  thi  haw. Ravaw khih  liata khih ama  vaw  sa  no heta, “Ravaw khih” tahpazy ta   ama  vaw  reih (Aw)  tyh.  Ravaw  thih  liata  khih  ama  vaw  sapa  vâta. He Ravaw  khih  tawhna  heta   atahmâ ta  Noh-aotlâh liana  khita  amâ  kaw  pasie  haw  heih. He Noh-aotlâh  liata  khih  ama vaw  sa no  daihti he  mapaw  Vâkia  â Beina  daihti  nata  a lochono daihti  a vaw  châ. He Noh-aotlâh  liata  khih  ama vaw  sana daihti  heta  khihsawzy  cha  thata  vaw  pôh  ei ta, “Hawthai (Hawthe)  Khihpi”  tahpa ta moh  ama vaw  bi pâ (Ama vaw  aw tyh).  Noh-aotlâh  liata  ama  vaw  y  nona  heta  Vâkia cha  thata   sa ( Animals )  vaw  ka ta. He  hawhna  heta Vâkia  sakapa  cha  ama vaw  reih  tyh. 

  A  O (Vakia  O) cha   a doh lâ (Length)   lâh (Kuh  nata Kuh pakaipa ta a chhâna  rairie ) sari (7), a  hâ (Wide) lâh  palih (4), Châkeih(Threshold)  tawhta  Laikah (Varanda) lâ  lâh  thôh(3)  ta  sapa  a châ. Cha  a  o  châ  Vakia  chata  saluh  chi  nanopazy ta  a padô  khai haw. Cha  a  o cha  vâduapa  ta  chyhsa  pakha  ta  pavaw  a  pakiana  liata  Meithei (Gun) a papa(Kana) liata  mei (fire) ta  a kâ khai haw. Cha hawhna chata  khihsawzy  chata  mahpaw  Vâkia  cha  o  sapa   chanei  heih  ei ta. Cha hawh  pyly  chata  Vakia  chata  a  o cha  saluh  chi nanopa  sai ta  a  pabie chanei khai  ha heih.  Cha  a  o chhao  cha  vâduapa ta, Viah (Mongyuh) kaw pua  ei  ta,  mei (fire) ta  khih  to  ama  kaw  rao  laih  lymâna  liata, Noh-aotlâh  khih chhao cha  mei ta  ama  kaw rao  hapa  vâta Vakia  o  cha  mei  ta  a kâ  chanei  khai  heih  hra. He  Noh-aotlâh  liana  heta  kô 16  chhaichhôh  tlai cha  khih  ama  vaw  sa. Noh-aotlâh  tawhna  heta  a zâ  pasie  ei ta, atahmâ  ta  Theiri  khih  khô liata  lytlâh  liata  khih  ama vaw  padua  heih. He  liata khih  ama vaw  sana he, “Tlâh Khih”  tahpa ta  moh ama  vaw  bi.  He Tlâh  khih liata  khih  ama  vaw  sa  nona  heta  khihsawzy  chata  Vakia  o  cha   a doh (Length) lâ  lâh pangawh(5),  a    (Wide) lâ  lâh  thôh(3) nata  laikah(Varanda)  cha  lâh  noh (2) ta  vaw sapa heih  ei ta. Cha hawh pyly   chata  Vakia  chata  cha  a  o  cha  a sa  kapa  luh  chi nanopa  sai ta  a pabie  chanei  khai  ha heih.

              Tlâh  khih  liata  ama  vaw  pahrâ    he  kô 1911  pa  liana khata châ ta  Mawtâh  kô (Bamboo Flower) a vaw châ. Tlâh  khih   liana  heta  kô 10  hlei tlai cha  khih  ama vaw sa  heih hra. Tlâh  khih  tawhna  heta  By-khih, Atahmâ  ta ‘Taikhia-lyubyu’  ama  vaw tah tyhpa liana  heta  khih  amâ vaw  pasie  chanei  heih. He  By-khih  liana  heta    8-10  chhaichhô h tlai  cha  khih  ama vaw  sa  heih hra. By-khih  tawna  heta Meikâh  khih  lâta  khih  amâ  kei pasie  via heih. Meikâh  khih  he  By-khih  kiapâh  liata  a  ypa   a châ. Meikâh  khih  liana  heta  y  parei  leipa  ei ta, Ama  khih  cha  mei ta  a    hapa vâta  kô 5 chhaichhôh  khih vaw  sa  ei ta,  amâ  vaw  pasie  sai haw.

Meikâh  khih  tawhna  heta  ama khih  kiapâh  liata  khih  â  kei pasie  heih ei ta, Thina  khih  tahpa  ta  khih   a ma kei padua  hei. He Thina khih  liata  ama  vaw  y  nona  heta  khihsawzy cha   thata  vaw  thi  ei ta, Chavâta  vaw  y  parei  leipa  ei ta, Atahmâ  ta  eima  pahrâna  Tisi  khih  lâna  heta  thlai  amâ  kaw  pasie  haw. He  thina  khih  liata  ama vaw  y nona  heta  chyhsa  hlupi, khihsaw mozy cha  ama vaw thi  tlai  thlyu  aw, atanoh  taihta  he  ama  khih  vaw  sana  kiapâh (Near their Village)  liata  Tisi  chavah (Tisi River) hnaw  liata  Tilih moh  sâkha  châ, “Thina Lih” tahpa  ta  moh  ama vaw  bi  pâ.  A chhâpa cha  he Thina  lih  ama  tahpa liana  heta  chyhsa  hluhpi, khihsaw mozy  ama  vaw  thi  tyhna  su  nata  sasyh (Âmosasyh)  â  thiepa (Suicide) ta   a zawsaopa  ama  vaw  y tyhna  su  a  châpa  vâta. He  Thina  Khih he Parihpi (Large Serpent) lai ngaitapa  nata  a chaolahmei (Tail) chô  hapa  a  yna (Pahrâna) su  a châpa  vâta, vaw  y  parei  leipa  ei ta,  thlai  ta  amâ  vaw  pasie  hapa  a vaw  châ.

He Thina   khih  liata  ama  vaw  y  no  heta  Tisi  Beinô,  Manô  Nochia (Nichiaii) (Lôtia  Bei  Dôkula, Dyuku  sawchanô) cha  â  vaw  pahâ (Thi)    ha  hra. He  tawhna  heta  Tisi  khih  liana (lâna)  heta  amâ  kaw  pasie    haw.  He Tisi khih  lâta  amâ  kaw  pasie  tuachai no  he, atahmâh  ta  eima  khih  Field (Tisi  field) y-na  su  liana  heta  khih  ama  vaw sa  tua chai. He  Field  tawhna  heta  atahmâ ta  eima  Middle  School  â duana  su  liana  heta  amâ  kaw  pasie  via heih.  He su eima  Middle  School  â  duana  su  he  Nôhro  Bei  Hnôh chaipa N. Laikô (Tisi  Beipa) o  hmo (o sana  su) a  vaw  châ. He  tawhna  heta  iachia  khih  ama vaw  tahpa, atahmâ ta  eima  Thlâsu  liana  khita  amâ  kaw  pasie chanei  hei.

He iachia  khih  tawhna  heta  eima  châta  thâtihpha ly y  ngaitapa, Pachhana  thâtih  phapa (Gospel / Good News) cha  â  vaw  thao  haw. Eima  khih  Beipa  N. Laikô  chata  khihsawzy  hnohta  he  hawhna  heta  bie  a vaw pie  ei, “Nama  hnohta  khâpa  hmahta  reih  beih va na, nama  reipa to  maih cha  châ  pyhpa (Accept)  tyh  ei na ta,  cha-ei (Argue / Reject) beih  veih ei na. Atahmâ  deikua cha  ei Bei (Chief / King) châna  Power  ei  hmâh  hra    aw. Avâ  lâta  Beipa, Abeipa  Khazohpa  Hrohpa(Living God) eimâ  Ngiapâ  khai bâ aw,  a  ngiapâ  khoh  leipa  maih cha  ei  chalyh (Fine) (Pacheisa)  lymâ  aw ei. Nama  Sahroh (Domestic Animals) zy  cha  kapa (Thiepa)  lymâ  aw ei  na ta,  a  khoh  leipa  maih cha  khih  tawhta  chhao  nama  pua  lymâ  hra (bâ) aw ” tahpa  ta. khihsawzy cha  thata  â pachâpasia (Reihpahmaoh) ei ta. Khihro    kei pua  mawh ei  sih la  Bei  a hneipa  sai  châ  tlôh  ei ta, “Khâzia  e  namâ  vaw pasie ? nama vaw pua  haw? ” tahpa ta  maniah vaw  hiahri  mawh  ei  sala. “Eima  Beipawpa  Rei angiah  leipa  pi ta  na  eima vaw pua, eimâ vaw pasie ” tah mawh  ei  sih la,  ahyhmah ta  maniah  vaw  ngiachhie  ta  maniah  â vaw  pyh (Welcome)  khoh  tlôh  leipa  aw  ei ta, maniah  vaw  dytha (Reject)  khai   ha  tlôh  aw  ei ta,  eima  y  n’awpa  hropa  hnei  aw ma pi. Tahpa ta  â  pachiapa ta  â chhohia  ei ta, ama  beipa  hnohna  chata, “Cha khiahta la  eimâ  vaw  ngiapâ  thlâh  ha hra aw na, nâma ta eimâ  theihna(Altar / A Place  for Worship) zy he maniah  phiepa (Paraopa) lymâ mah y ?” tahpa  ta  vaw palie (chho) ei ta, cha tawh  cha  khihsaw  zydua ta cha  amâ vaw  ngiapâ   khai  haw hra. Atanoh taihta  cha  Thâtihpha  chata  eima  hnohta maniah  a pahrâ  lâh  thlâh  haw. Eima  khih  Tisi  Beipa  N. Laikô  he Mara  râh  Bei (Chiefs / Kings)  zy hry  chhaota  â vaw  ngiapâ  tuapa (Khazohpa  a vaw pahno tua chaipa)  a vaw châ.

                 He  atahmâ  ta  eima  pahrâna  Tisi  khih  he, cha  daihti  nota cha, “Viareh / Viraina”  tahpazy ta  moh  ama  vaw  bi, ama vaw  aw tyh. A chhâpa  châ  he  daihti  no  heta  he  su  liana  heta  machâ nô  pakha a  moh  ‘Disai’  ta  Viahchhâ (Kaliah Viahchhâ) (Bread) a vaw raihna  su a châpa  vâta. Chatanachata  he  atahmâ ta  eima  pahrâna  khih  Tisi  he  kô 1928  pa  liata  eima  vaw  pahrâ  pathao. Tahmâ he a  kô 92 na  eimâ  hmâh  ngâhai. “Tisi ”  tahpa ta  moh  ama  vaw  bina  chhâpa  chhao  he Tisi  chavah (River Tisi) moh  bihnâpa ta  ama  vaw  awna  a châ. He Tisi  chavah  he  vaw chakua (chasi) (Cold) kaw  ta, chavâta  khisaw mo (Hawthai mo) zy  chata, “He chavah (River) he la Ti (Cold Water) na a châ” vaw  tah  ei ta. Ti chakuapa  tlyma  Ti  chasihpa  tahpa  ta “Tisi” moh ama vaw  bi  pâpa  a châ.  Cha  Ti  chakuapa  tlyma  Ti  chasi  pa moh ‘Tisi’  tahpa  ta  khih moh  ta  atanoh taihta  eima vaw  phaoh (Named  after  the River Tisi)  pâpa  a  châ.  

He Tisi chavah (River Tisi) hlâta  ti  chakua (Chasi)  viapa  cha Tisi  chavah  liata  â  zâ hlyh (Â zâ  tyh) hrapa  châ  ta, Cha  cha, “Vâhâ ” tahpa ta hlâno  eima  manô  nata  mapawzy chata  moh  ama  vaw bi. Cha  hawhta moh ama  vaw awna  nata  ama vaw  bina  chhâ  chaipa  cha, he chavah ‘Vâhâ ’ liana  heta  hlâno eima mapaw nata  nôpawzy ta  râbaoh (râh lâ) (Hungting)  ama  vaw  sie  tyhna  daihti  liata  he  chavah su  liana  heta  amâ vaw  hâ pakhy (Place for Wait) (Tyh) pakhy tyh ei ta. Chavâta he su he, “Vah…hâ  tlyma, Â hâna Chavah ” tahpa ta moh ama vaw bi pâpa  a vaw châ.

Eima Khih  Tisi  moh  maniah pathâhsa  kawtuhpa  cha Tisi chavah (River Tisi) liata  Kaopi  he  a châ. Kaopi  cha, Lôkâh  â sâh  kawpa ngazo (Clift, Lengkir) liata  tisao (Water Fall) a  za tla  ngâpa he  a châ. Kaopi  khasôh  heta  eima  khih  kyh  maniah  vaw  pachâ  kaw  tyh  ta, hlâno tawhta  âzaotaona (Relationship) pha  kawpa  vaw  hnei  tyh  hra pi ta. ‘Kaopi khasôh’ tahpa ta  a moh  ama (eima)  vaw  aw  tyh. He kaopi  khasôh  a pahrâpa  he  a moh ‘Vâcho Nô’ tahpa ta  ama (eima) vaw pahno  tyh  hra. Kaopi a  moh  a  vaw  pathâh  pachai  kawna  chhâpa  cha, ‘  thyukheipa’ a vaw hneipa  he  a châ.  Kaopi  tawhna  heta  eima  Mara  râh    chi kha ‘Athih lâ’  he  eima  vaw  hneipa  a  châ.

Theiri khih chhao  he Tisi  khih  tawhta ochâ a vaw chôpa (Khihchâ a vaw zohpa) (Provincial Village)  vaw  châ  ei ta.  Tisi mozy nata  Tlâh khih  liata ama vaw  y  pahlao (khoh) nota  ochâ  a vaw  chôpa (khihchâ  ama vaw pazohpa) a châ. ‘Theiri’  tahpa ta  moh  ama  vaw  bina  chhâpa  chhao  he hlâno ta cha  he  su, atahmâ ta  ama  vaw  pahrâna  khih hmo (Su) liana  heta Ramawh  châpa  chikha Thei (Sa kana châta hmâpa) (Trap for Animals) châta  ama  vaw hmâh  tyhpa  nata  hlâno ta riapaw-keipawpa (Chyhsa riahphapa) (Brave Wariors) zy ta amâ vaw patahsa-theina nata moh amâ vaw chhuahna (Amâ vaw reithaina) (Self Exultation)  châta  ramawh châpa  (Bamboo) ama  vaw    tyhpa  Rih  cha  he  su  liana  heta  vaw  hluh  kaw  tyh ta.  Cha ramawh  Rih  tlyma Thei  A-rih  ama  vaw  lana su  a châpa  vâta  he  su  he, ‘Theirih ’  tahpa  ta  ama  vaw aw tyh, cha  cha  tanoh  taihta  ama khih  moh  ta  ama  vaw phaoh    hawpa  a châ. (Named After the name Thei-rih).  

Theiri  khih  padua awpa ta Puhpa  Mawlo (Mathy-Paw / Lailiamapaw) zawthâhpa chata  a  Unawhpa  Haothy  nata  machâ  thokhazy nah  chhaota  Tisi  khih  tawhta  vaw  pua  ei ta,  kô 1920 pa  tawhna  khata  he Theiri  khih  liata  ama  vaw pahrâ  pathao.  Atanoh  taihta  Tisipa  sawnawh nata  eimâ chhôhkha  pasai  ta  khih  a vaw  sapa  ama  châ. Chavâta ‘Tisi  khih  Dohseipa’  eima tah  aw  tlyma, Mongyuh nah (nawh)  reizie ta  ‘ Fâr Tisi ’ eima  tah  thei  aw. Theiri  khih chhao  he  Tisi Beipa N. Laikô chata Thâtihpha (Gospel / Good News) vaw chho  ei ta, amâ theihna(Altar/ A place for Worship) zy cha  vaw  phiepa (Paraopa) ei ta, Khazohpa  hrohpa  a vaw  ngiapâ  khai  hra  awpa ta  a vaw  hrua ei. Chatanachata Thatihpha cha vaw  zyh ei ta,  rei leipa liata  Khazohpa  hrohpa  cha  amâ  vaw  ngiapâ  khai  haw hra. 

 

 

 

 

 

 

 

Mara reih rozie dopa

 

 

Khei (m)            : Tavia nie’pa a pakhei mah y

Khei (r)              : Sôh a khei (verb)

Kheih (d)          : Akheih ta a sie (noun)

 

Khia (m)            : Â khia kaw (Adv)

Khia (r)              : A khia lymâ (Verb)

Khiah (d)          : Na tao khiah a pha (Conj)

 

Khie (m)            : A hykua â khie (verb)

Khie (r)              : A khie khao khâ (verb)

Khieh (d)          : A khieh kaw (adj)

 

Khua (m)          : Sâh khua kha a pie (noun)

Khua (r)            : Lôkâh khua lia â duah (verb)

Khuah (d)         : Khuah a reih ha tyh (adv)

 

Phao (m)           : Ravaw phao a chakhia (verb)

Phao (r)             : Â phao ma ) A phao vei (verb)

Phaoh (d)          : Ti ta a phaoh (verb), A saw a phaoh (Adj)

 

Phei (m)            : Â phei haw (verb)

Phei (r)              : A phei a pasa (noun)

Pheih (d)           : Lâpi â pheih kaw (adj)

 

Phie (m)            : O ama phie (verb)

Phie (r)              : Sôh a phie (verb)

Phieh (d)           : Viahpakao a phieh (verb), A sâ a phieh (verb)

 

 

 

 

 

Mara reih liata 'H' nata 'Â'

 

~ HC. Malsawmthanga

 

 

Rev. Dr Laiu Fachhai ta Mara reih rona dâh Facebook liata a vaw ropa hmôna ta, pha ei tah kaw. Pazao nata pazao lei awpa he bua chai pi ta, he he cha eima hnôhlâ kha ei thaina rakha ta ei vaw roh ha khawh. 'H' nata 'Â' hmâna chhao he eima bua via heihpa miakha a châpa ta ei pahno. Mara reih liata cha peimawh ha tlôh ei ta, thata eimâ chu via chyu â ngiah kaw.

Pazao awpa nata pazao lei awpa he cha, Grammar achu pasia ta thai awpa nata pahno awpa â ngiah. Machâ A. Zakia ta a ropa Mara Grammar Bu reihhluh via chyu awpa ta ei cha hrua ei.

Reih (language) he thai awpa ta cha thata achu ta, pahno ta, avao ta ngia awpa â ngiah.

 

Mara reih he a aony siezie ta 'H' bai pi ta, 'A' luh eima chhô tyh. Chavâta, Mara reih eima ro nota cha Common Language Tlôsaih reih he eima palôhrupa liata parosana chôta eima roh awpa a châ. Eima kaokâh reih chyu parosana chôta eima rohthlâh ha khiahta cha bai lei n'awpa liata bai aw pi ta, bai n'awpa liata eima bai lei thei. Cha hawh pyly ta, 'A' luhchhô awpa liata chhô thei pi ta, chhô lei awpa liata chhô a nao kaw hra aw. Bie eima reipa liata ahnai bohbi leipa liata 'H' baipa eima hluh kaw.

 

Pamosana ta:

1. Châ ei roh.

2. Châ rona bu.

3. He bie he ei pyh.

4. He bie he apypa a châ.

5. Ei khoh kaw.

6. Khona ei hnei.

7. Eimâ tlyh.

8. Atlyna eima hnei.

9. Pavaw ei siah.

10. Pavaw  siapa a châ.

11. Film eima moh.

12. Film mo pha kawpa a châ.

 

He a chô liata biezy he pakhâta ta eima moh khiahta cha, biesâ miakhapa nairu liata eima aony parosazie hawhta 'H' bai â ngiahna nata ngiah lei daihti a y. Aony parosana liata ahnai bohbi leipa lia taihta 'H' he eima bai thlâh ha tyh.

Rev. Dr Laiu Fachhai ta a reipa hawhta, biekawh (syllable) 2/3/4 etc liata 'H' thata eima bai tyhpa, 'H' apakaoh ngâ tyhpa thokhazy he cha angiah leipa hawhta pachâna ei hnei hra. Pakhâta ta aony parosana dâh eima nahthlie khiahta cha kha hawhpa hluhpi kha cha 'H' vaw bai ngâ kaw awpa chi a châpa ta pahno va na. Pamosana ta:

 

1. Rôhnah - Rônah tahpa ta tlâ eiroh tyh.

2. Hmeihseih - Hmeiseih tlâ ei tah tyh.

3. Khihnahrâh - Khinarâh tahpa ta ei roh tyh.

 

Anodeikua, aony liata ahnai bawlaw thlâh hapa, 'H' nata hawrawh hropa â vaw pakaoh nahta parosa chhei rainao kawpa thokha y ta, thokha ta he hawhpa liata la a buabâ tahpa eima y. He deikua a pyhkhei hlei va na. He hawhpazy cha â ngiah ha tawhta cha parosana dâh tlâ ngia laih hr'awpa a châ.

Pamosana ta:

1. Hriakhohna

2. Khaihna

3. Palôhrupa

4. Angiahna etc

 

Tawhla, 'H' sâno â pakaoh awpa â ngiahna daihti a y hra. Â pakaohpa hrohrâ ta chhyh thai leipa, H a hluh tahpa chhao eima y. English lia cha S sâno apakaohpa a hluh kaw. A buabâ tah ngâ kaw hlei veih ei.

Pamosana ta:

1. Râhhmâhpa

2. Lyurâhhripaetc

 

Noun liata la 'H' bai byuh vei, a tahpa eima hluh kaw. Eima bai leipa Official Name ta sie hapazy he la pei leipa ta, moh eimâ bi thiehpazy liata deikua la bai thlâh ha ei sih la pha a tahzie Machâ A. Zakia chhaota eina chho; ei pachâna a châ hra. A aony siezie hawhta tlâ siepa he â thlâzi chai. 'Â' nata 'Ô' chhao tlâ hmâh laih ei sih la a phapa ta ei pahno.

Pamosana ta:

1). Beicho nata Beichô.

2). Chavah nata Chava.

3). Pasâhsa nata Pasasa.

4). Zotha nata Zôthâh.

5). Pawzô nata Pawzoh etc

 

Rei chhei a nao ha. He vâ heta Idol zy liata chyhsa moh ama phuah tita ama phuah chhei hluh kaw. Noun liata 'H' bai lei awpa nata 'Â', 'Ô' luhchhôpazy hmâh lei awpa, tahpa ta BML ta vaw pathlu beih vei.

 

'Â' he hmâh hluh tu ha pi ta, hmâ lei n'awpa liata thata eima hmâh pâ tyh.

Pamosana ta:

1. Achhyna-O tah awpa liata Âchhyna-O.

2. A vymah y tah awpa liata  vymah y.

3. Ahneina tah awpa liata Âhneina.

4. Akhohna tah awpa liata Âkhohna.

5. Angia tah awpa liata Ângia.

6. Arâpasua tah awpa liata Ârâpasuaetc

 

He hawhpa liata 'Â' he hmâ awpa a châ:

 

1. Â ngia kaw.

2. Â râ haw.

3. Kho â pao kaw.

4. Â dopa ta tao teh.

 

A tlâhpipa ta Prefix (biesâ hmia liata pakaohpa) châta eima hmâna liata  he hmâna a sôh kaw.

 

👏🏻_M____A____R____A💚

 

 

 

 

 

 

 

 

 

'PUHPA  K.LAIHEI (L)'

 

~ K. Beirona, Teacher ,

Gov't. M/S. Chheihlu.

 

 

PIHNA :

Puhpa K. Laihei, he Puhpa Maka Khaimeichhô nata Pihnô Thlada Azyu  zy Sawchapaw seihnai chaipa châ awpa ta kô 1945 pa ta Marapa râh Khih hryta , Achuna tlaichhaipa  Khihpipa  Satly (Chakhei) khih liata a vaw pih. Unawhpa Puhpa K. Tiakhao (L) , f/o K. Pawngia (w/o Pp. Mawbi R. Azyu 'L' ) nata Sietanô Pihnô K. Thleiso, w/o Machâ (Rtd.) & Head Teacher (Rtd.) A. Zakia 'L' (National Padma Shree Awardee),   zy  ama châ. A nopa he chysa reih hluh leipa nata chysa peihria awpa a chi ngaita  kawpa, ochhôh lyukahzy  liata chybâ-lâkhâ a châ rai rai leipa chyhsa a châ. Chysa pôraoh phapa nata Mara Chapaw nohâh y kawpa, hmi nata sâ, chyhsa â tlaitlâ kawpa, uhthei viapazy mokhaoh-Nahkhaoh mohpânazy ta, â pielyu achhuah hnolo tyhtuhpa nata  Marasaw Châthaipa hmiatuapa hryta chyhsa pakha châ thei hra awpa ta a palôhrupa a zâ hmâh ngathlâh tyhtuhpa chyhsa a châ.

 

 ACHUNA (Education):

Primary tawhta High School zy he Siaha Khihpi  su liata a daihti zydua Achuna vâta za hmâh ta;  Kô 1968 pa khata Matric (HSLC) cha High School Siaha  tawhta a vaw patlô.  P.U. nata B.A. he St.Edmund's College, Shillong tawhta patlôpa ta, Châkhei Leilôsaw hry tawhta; Matric (HSLC-1968),  P.U.C (HSSLC-1970) nata Graduate (B.A.-1973) ,  hmiatua chaipa a châ. Kô 1973 pa ta a vaw Graduate pa a châ.

 

CHHÔHKHA :

Kô 1972 pa ta Siaha zuahnô Pihnô Lyki Khithie nata  chhôhkha ama vaw padua. 'Pachhapaw nata Pachhanô' tahpa ta 'aw' tyhpa nata chyhsa hluh via ta ama pahnonazie chhao a châ. Siaha Vaihpi, Siaha liata a chhôhkhazy nata ama pahrâ. Khazohpa byhnâ rônah kawpazy to lymâpa ta, sathei-byhnâ Ryuto pha kawpazy chhao ama vaw to hra.

 

Saw Uhtheipa tawhta:-

(1). Pp. K. Beipachha

(2). Pp. K. Beipatha

(3). Pp. JB khaimeichho

(4). Pn. Mary K. Vanlalneihi

(5). Pp. K. Beichakhei

(6). Pp. Dominic K. Beirachhuasa

 

Pihnô Pachhanô, a pilâhpazy ( a Uhtheipa tawhta) :-

(1). Pp. K. Beisa H/o Pn. A. Ngotlua

(2). Pn. K. Lyki W/o Pp. K.Laihei (L).

(3). K. Tanô

(4). Pn. K. Parthanmawii w/o Pp. Ng. Silla (L).

(5). Pn. K. Tlani w/o Pp. N.Lybei (L).

(6). Pn. K. Mari w/o Rev. Fc. Beicho

(7). Pn. K. Lawmzuali w/o Pp.  V. Samson

(8). Pp. K. Sawma h/o Pn. A. Nuta

(9). Pp. K. Johnson h/o Pn. K. Zirpuii.

 NIETLUANA:

Kô 1974 pa ta Mara District Council, Siaha liata Education Officer rai a hmô. He daihti no heta Deputy Superintendent of Police (DSP) rai chhao Mizoram U.T. Sawhkhâ ry liata a vaw hmô hra. Chhôhkhazy nahta bietluna ama tao hnôhlâ ta Education Officer rai hria awpa ta he E.O. rai he â pazaopa ta, kô 1978 pa taihta a hria.

 

District Council (MADC) ry liata a raihriapa zy:-

(1). Education Officer: 1974 - 1978.

(2). R.O.Headquarters : 1978 - 1983.

(3). R.O. Sub.-Hqrs, Tipa: 1983 - 1984.

(4). Judicial Officer : 1984 - 1994. 

(5). L.A.O. : 1994 - 1997.

 

 AWNANOPA :

Awnanopa chakaona liata, Thlanoh : 2.11.1980 pa ta Khichhôh Machâ ta pa-ipa châ ta, thlanoh : 8.01.1989 pa ta Machâ awpa ta Theiri Khih liata Presbytery Pakhypi no ta Rev. Ithra Tluma, ta a vaw chahnaopa (ordained) a châ. Machâ a châ tawhta Pastor Bia, Presbyteryzy liata;  Chairman, Vice Chairman zy vaw châ chiehpa nata, Siaha Local Church (Vaihpi) lia chhaota;  Asst. Secretary, Finance Secretary, Treasurerzy nata  Building Board liata Chairman zy, Secretaryzy chhao a vaw châ haw hra. Mission Board lia chhao ta tovyuh a hnei pazao lymâpa, Awnanopa kuphei  châ hnolo tyhpa, Awnanopa manôh a châ.

Fellowship lâ liata KTP Hlapy Conductor zy, President zy, Vice President nata Advisor chânazy chhao a vaw patu khai haw hra.

 

RÂH NATA KHIHTLÂH:

Mara Students' Organisation, Gen.Hqrs.: Siaha liata President tovyuh he  kô 1970-1971 nata  1980-1981  daihtizy liata  a vaw hria.

MTP Branch Siaha nata Gen. Hqrs liata  Advisor tovyuh nata maohphaohnazy vaw chaba lymâ hrapa ta MCHP lia chhaota Advisor a vaw châ haw hra.

Alpha Boxing Club nata Chhimtuipui Boxing  Association liata Adviser maohphaohna rai vaw hria chiehpa a châ.

 

 A KHITLYNA HNÔH CHAIPA:

Chhôhlâ chhâh ta pasana khiakhi ngaitapa a hneipa vâta,  Thlanoh : 06.10.1997 pa ta Helicopter ta Aizawl Hospital pangai kheipa vaw châ ta, Doctors nata mohôhtuhpazy ta ama theina zydua papuapa ta ama mohôh tarawpa ta, a sapa nata  thisaih ta a pahnie khao leipa vâta, Thlanoh : 23.10.1997, zâlâ dawh 3:00 pm pa ta a Chakao tyhpa Abeipa Khazohpa hnohta â vaw pahâ hawpa a châ.

 

LÔBÔ :

Kô 2003,  Phiapi noh 1, pa ta a kyhpachâpa a Lahpinô nata a Sawzy ta, ano Atheithlâhna hnôh chaipa  Lôbô  chhao ama vaw bô haw hra.

 

RYUTLOHPA:

              Marapa râh (India) Khihpipa hmiatuapa hryta Khih miakhapa, Châkhei Khih tawhta  'Matric, P.U.C. nata Graduate,'  hmiatua chaipa a vaw chânazy he ryu pitloh kawpa ta a vaw siesaipazy cha a châ.  

'Mara Lei Awhsi' hryta reih ngâthlâh thei hra awpa ta hniehnôh rônah kawpa a siesai theituhpazy he manôh hluhpi vaw châ thei tlai veih ei....!

 

 

BIE TLÂHPAKYUNA:

Khizaw tawhta  pathliepa ama châ khai  hnôhlâ lia chhaota, Marapasaw hry  tawhta Achuna vâta Lâhaw daih tuatuhpa nata diasai hlohzy vaw hmiachhy ngâh awpa ta Keih vaw rai tuatuhpazy Zana hlâ ngâthlâh  ha awpa hmo  a zâ ypa he, Khizaw  Noh khaihpa heta pahli diechie khah sy....!

Kô 1988 pa kô ta,  Chheihlu Khih liata Mawtaw (Vehicle, i.e. Jeep) â ngia tua chaipa he ano/ Pp. K. Laihei (L)  ta â kaw chhipa a châ. He nota Council Driver he Puhpa  A. Zalei /Merry-paw(L) a châ.

 

Mâpha, Mâphasy, Mahpaw..!

 

 

 

 

 

 

 

Machâ reih

 

 

1)       Ahraih             : Atôhpa, sa chahpawpa, hriahraih reina a châ.

2)      A vao                : Sawphaoh, sa ( saw sa)

3)      Aparuta          : A ru lâta

4)      Aria                : Nôchâ, hrozie

5)      Alaih                 : Dyhchâ leipa

6)      Alaihpaw       : Dyhchâ leipa chapaw

7)      Alaihnô         : Dyhchâ leipa chanô

8)     Asyuh               : Sazy chakhao n’awpa nata thie n’awpa ta ramawh pazaopa, râhsa chôhkhâhna ta hmâpa.

9)      Awhsi tlana  : Viah râh, râh hlapa

10)  Awhlaisâh     : Awhsâh laihpa, khiliah akhiekhâ hohpa

 

1.    Editorial                                                                                   2

2.   Disaster management     

                                          ~ BM. Khaimeichhôh                    3

3.    Tisi khih thâtih             ~ H. Beilaikô Nôhro                                 8

                                   

4.   Mara reih liata ‘H’ nata ‘Â’

                              ~ HC. Malsawmthanga                           15

5.    Puhpa K. Laihei            ~ K. Beirôna                                 18

      6.   Thyutliapazy nata Politics

                                                ~ Abie Nôtlia                                   22

7.   Su moh nata khih mohzy         

                                                  ~   TA. Chhôhu                            27

8. Covid-19 duahmo                                                    30

9. Mara reih rozie dopa                                                             31

 

 

 

 

 

 

 

SU MOH NATA KHIH MOHZY

~ TA. Chhôhu

 

              Hlâno tawhta su moh nata khih mohzy he yzie hneipa nata bina chhâpa y ta, Chavah moh zy, tlâh moh zy nata lyupih moh zy chhao a moh tawhta amâ bina chhâpa â pahnothei. Pamosana: Lôhba (Palâ), alôh ama bana tlyma, pangiehna tlyma a châ vâta Lôhba tahpa ta reipa a châ. A tlâhpipa ta Marasaw he tlâh liata pahrâpa ama châpa vâta, Chavah moh phaohpa ta khih moh abipa y hlithâ veih ei. Tisôpi (Siaha khitaw) nata Tisi zy he chavah moh abipa y chhôhpa ama châ thlyu aw. He he Tisi chyhsa ta Tisi chavah ahniapa liata ama y vâta tlyma, Siaha khitaw chyhsa ta Tisôpi chavah ahniapa liata ama y vâta abipa ma ama châ pahno a ru kaw.

              Khih moh liata rei via angiah kawpa miakha cha KHAIKHY he a châ thlyu aw. He su he nochhi Mara ta kô 1981-1982 liata za pahrâ pathao ei ta, Râhhmâh Thothih a châpa vâta a râh ty a râh-maoh kaw. Arohtuhpa chhao he kô 1983 liata za tlô hra ta, khih opa liata Pazu-pavaw, Râhsa a hluh kaw chy. A su/khih moh ama bina chhâpa cha, he su he Chakeih hluhna su châ ta, zâlâ noh saih bualua nohtla hrahripa ta cha Chakeih nah pyury he ru kaw tyh ta, “Arakhai-rakhy,” (a palopasa, a pyury a hluh tahna a châ), he su liana heta ahyhmah arie ngâh veih ei. Siaha beizy chhiekhei awpa ta Matu râh lâ ama siena lâpi châ ta, nohchhô a pavâ nota ama khôsai tyh/sie palâh tyh. He daihti liata ABEI CHÂLAI (Thiahra beipa) he Matu râh lâ chhiekhei awpa ta sie hra ta, Bei Machâ â chhi penawh ta “Khaikhy” su a châ tahpa abei Châlai chho tlâ lei awpa ama tah nota, Bei machâ pakha ta a chho tlamaw haw. Cha pataw nahta abei Châlai ta, “He su he ma Khaikhy cha?,” tah ta, byureih tu awpa ta pahrua ta, amâ rie hra.

              Nohtla hrahri ta Chakeih nah amâ khiehlaipa pyu cha rakhaih rakhy ha ta, âmo cha abei Châlai biepiepa hawhta Meihô thy (Patih) ei ta, alô pasah ei ta, meihô kâ lâta chadôpa ta ama soh. A vaw zoh nahta Chakeih nah cha a vy ei ta, alô sahpa saih hôlôpa cha thokha ta a vaw tyuhnie ei ta, sah ama tah tu vâta thata sâh ei ta, amâ râ lymâ. Cha tawh raita cha Chakeih ta he Khaikhy su he a thyusai ha. Abei Châlai moh a chhuana liata, “Keima Châlai na, Laichi sapaw na, Khaikhy a pathyupa na,” tah ta, a moh â chhua tyh. Ano he abei riahphapa châ pâ tlai hra ta, chyhsa ta pasâhsa ei ta, ama mochhyu ngâsâ. Khaikhy khih he Khaikhy chyhsa ta ama pahrâ ha vâta Khaikhy châ leipa ta, Khaikhy y ta, cha su liata nochhi Mara ta ama za pahrâ tahna a châ. He chôchâh liata eikha cha Politician pakha ta Deputy Commissioner, Chhimtuipui District hnohta a reina liata KHENGKHAWNG tah ta, he arohtuhpa chhao y thlâh hra ta, arohtuhpa heta khôtho liata, “Pâpuh, khazia ma Khaikhy tah molo thlâh leipa chi ta, Khengkhawng na tah e?,” tah ta, cha Politician ta â chhyna cha, “Pahnothai vei ngyu sala ei tah kha maw,” a tah. Reih via heih ei sih la, nôpaw hmiatua penawh khata hmo vaw sai pasi kaw hra ei ta, Mara sawzy ta Siaha khihpi vaw ngai ei sala amâ sosâh via hra awpa ama khopa vâta Siahatlâh khih liata pahrâ penawh kha Siaha lâ azâ paih awpa ta ama chho. Ama y n’awpa su châta New Siaha khô Saikahpa THINA SAIKAH amâ tlyh. He daihti nota khihthieh kiah tahpa zy, khihchâ zoh tahpa zy liata Lakher District Council ta maohphaona a pahnieh chaipa cha Puhpa HC. Sadô S/o HC. Laihnao châ ta, Rural Administration Officer a châ. Ano (Puhpa HC. Sadô) ta a saisopa châ thlyu aw ta, “Siahatlâh tawhta a zu ei chi ta, nama za y n’awpa su he Thina Saikah châ ta, chavâta nama vaih moh he Thina Saikah a châ aw,” tah ta, âmo ta, “Pâpuh, chata la châ thai vei, Siahatlâh eimâ tah aw,” tah ei ta, ano (Puhpa HC. Sadô) ta, “Tahmâ cha Siahatlâh lia y khao leipa ei chi ta, Thina saikah lia nama y ha tawhta cha kheihta Siahatlâh namâ tah thai khao aw?,” tah heih ta, a chhâna lâta cha, “Â do na, vaih moh tlaita thina ahlaopa cha,” tahpa ta Siahatlâh tahpa ta ‘Tlâh’ achâ leipa saikah kha Tlâh lâta ama palie haw. Thosaih khih chhao he Bykhih lia vawh ei ta, Thosaih moh phaoh thlâh ei ta, khih hmo chôchâh liata pasaina ama hneipa châ thlyu aw ta!

Reih via ei sih la, Siaha liata su moh â nano kawpa miakha cha, Ra-awh saw sana tlâh, atahmâ ta C.E.M Bungalow yna su he a châ. He su he hlâno ta cha Tho chi kha a moh Thochhiehriepa tah ei ta, a buh a hnai kawpa Thochypa chi châ ta, he tlâh byuhpa liana heta Ra-awh ama y thai kaw. He vâ ma a châ ma Ra-awh saw sana tlâh tah ei ta, no-âh â chhih kaw. Pavaw hropazy cha a tih pathlasa ei ta, khazia ma Ra-awh leihkâ ta a saw ama pasasa? A moh ama bina chhâpa a y thlyu aw. Miakha vaw bai heih sih la, Thlâtlâh dyna su he atahmâ ta Siaha Bazar Traffic Point he châ ta, he su he Siaha Beinô Thlâtlâh zuah ama dyna su châ ta, chavâta Thlâtlâh (Thlantlang) dyna ama tah. He he Marapa râh liata Arâ (Horse) â ngia tua chaina a châ (A khôlâ he cha Historian nah alaichadai awpa ta soh ei sih la).

              Thina Saikah he chariah daihti nota Diahsua chhôh lâ angia hmâ leipa ta nô pakha Meibu nô ama tahpa cha chariah akhiehlai penawh ta ama thiena su a châ vâta ‘Thina saikah’ tahpa ta bipa a châ.

 

 

 

 

 

 

 

THYUTLIAPAZY NATA POLITICS

~ Abie Nôtlia

 

 

 

 

 

                                                                       

Reih awpa thathyu achhih lei kawpa, anodeikua rei cheingei awpa ta khâchâ keima liata nâ hnawtuhpa y tlôhpa vâta ei reih cheingei awpa abyuhpa ta ei pahnopa cha, Marapa thyutliapazy nata Politics he a châ.

Politicianzy ngâlâh he râh, chi nata pho atao pathituhpa nata, kyh apachâtuhpa châ vei ei: Eima kho apahâhtu hapa vâ chhao a châ thlyu aw. Tlyma, eima Politician nahzy chô liata eima hnabeiseihna nata eimâ pahniehna â sâh kawpa vâ ma a châ ha aw tly? Marapa zawpi, a pachaipa ta thyutlia sawzy pi heta Politician nahzy ngâlâh he chi nata pho, Râh kyh pachâ via pachai awpa hawhta pachâna eima za hnei tyh. Anodeikua la, vaw châ hlei vei! Râh, Chi nata Pho kyhpachâ ta, taopathi awpa he Politicianzy ku liata ngâlâh apahnieh leipa ta, keimo mo pakha nochâ chyu liata tlao â pahniehpa a châ.

              Chavâta, thyutliapa athai sopa nata achuhaipa thokhazy heta liahsa amâ chunazy kaw patlôpa ta, ama thaina sonazy amâ chuna kao liata ama ‘Specialized’ nazy kha Mara râh châta hmâh awpa ta hiatlia â chhih kaw nota, pangiasa leipa pi ta Politics liata amâ ngia thlâh ha heih tyh, a pâhria ngaita kaw. Eisaduthliena liata khâ ei rohpady tyhpa cha, MA History khata Politics lia angiah thlâh ha leipa ta, hlâno Marapa ‘histry’ zy kha tlao alaichadaipa ta achu sala, Marapa chi nata pho châta ryutlohpa ta reih thei awpa ta abu ta tao sala, cha hawhta a châ khiahta cha Marapa châta hmahsiena sâkha a vaw châ aw. Cha hawh pyly ta, mohropazy chhaota amâ chuna, ama Subject liata ama Specialized-na chyu liata râh châta keih vaw chakâ chyu ha ei sala cha, cha tluta eima râh, chi nata pho châta a phapa cha y aw vei. Chavâta, Marapa thyutlia sawzy eimâ hra â daih kaw bâ. Politics ngâlâh he eimâ pahnieh n’awpa châ vei tahpa he a thiehpa ta pahno chyu ei suh u.

             

Thyutliapazy ku liata eima râh he hlâ ei sih la, thlalôh â chhih hmeiseih aw ma?:

Eima râh Politics he zakha liata zakha thyutliapazy ku liata hlâ ha ei sih la. Tlyma, eima râh ryureina sâh chaipa District Council chhao he thyutliapazy ku liata vaw ypa châ ha sala, thlalôh â chhih aw ma? Apahnieh tlâh a châ hmeiseih aw ma? He hiahrina he achhy a ru kaw. Mara thyutliazy atahmâ ta eima duahmo saipa ta kei la ngâh mâh va na chamaw! Nohchareih Mara râh kyh ei pachâ âtahpa pôh via laih lymâ pi ta, eima râh deikua raona lâ a pangai via laih lymâ!  Khâ ei rei tyhpa hawhta, thyutliapa saw râh kyhpachâ âtahpazy he ahluh via cha, nô nata paw kalachhôh liata achiepa nie ta, khôtho lâ deikua sia chaipa nata pha chaipa hawhta y achhuahpa, nawhtaw akhoh leipa nata keima pachâna nata biereipa he na ado chai tahpa pachâna ahneipa eima hluh tu ha chy. Cha hawhpazy chata eima râh he chhihthapa ta, mohôhna rai hria ha ei sala eima râh duasu achhie ngaita kaw aw. Chavâta, thyutlia sawzy pi heta sasyh ativy achhuah ha tua ei sih la, Khazohpa asaohiahna chôta ti nata râh châta keih eima chakâ awpa tlao a châ.

 

              Thyutlia sawzy Politics liata angiah  awpa ta Chi nata Pho, Râh kypachâna hmeiseihpa eima hnei awpa a byuh:

              NGO’s nata Pressure Group, Awnanopa liata â hmâ nota, he paw he la râh chakaona ‘Politics’ liata angiah hapa châ sala, eima râh heta eima phahnaikhei kaw thlyu khiah maw? tahpa ta eima pachâpa nata eimâ pachy kawpazy chhao he, a hmeiseihpa ta Politics liata angiahpa ta, bei dyuchhai liata amâ tyu ha nahta cha ama ZERO khai ha heih ty! Eima hnabeiseihpa nata âmo liata ngâna eima pahniehpa hawhta vaw châ khao tyh veih ei! Khazia ma a châ aw tly!! Râh, chi nata pho kyhpachâna liata ama sia leipa vâta tlâ châ vei ma?

              He kyh liata ei reithai kawpa nata amopâtlâh a châ kawpa ta ei pahnopa cha, eima chheipâh liata apahrâpa ‘Tlaikao’ nahzy he ama châ. Thyutliapa athaisopa pôh via lymâ ei ta, Chi nata Pho châna liata ama sia ngaita kaw! Chho chaimâh ta, thata pachu angiah leipa ta; âmo liata ‘nationalism’ palôhrupa â-icha kawpa hneipa ta, phopi padua achhuahpa ta reiraoh kawpa ta tlao hmah ama la. Keimo Mara sawzy pi deikua cha, chho chhyh, pachu chhyh angiahpa eima châ hleikhô ta, Marapa chi nata pho châna liata asianô leipa nata thapasana palôhrupa hnei hmeiseihpa eima chyh tu ha chy. Khâ ei reih tyhpa hawhta Marapa phopi padua awpa ta cha, Marapa râh, chi nata pho kyhpachâna hmeiseihpa hnei ta, Nationalism palôhrupa eima hnei ha tua awpa a ngiah ta, ‘Baptisma’ ha tua awpa eimâ ngiah. Cha hawhpa palôhrupa phaoh tlôh leipa ta nata achhuahna sianôpa hnei leipa ta Râh, chi nata pho châta keih chakâ eimâ chhuah thlâh hapa a châ khiah cha khâpa sisaw leipa deita a châ aw. Na hlao a tloh hapa chhaota nâma nata na chhôhkhazy châta la â thôh ngaita kaw ngyu aw. Anodeikua, Mara râh châta deikua ‘Raona’ tlao a za châ aw!! Chavâta, ei thyutlia heih atanoh nata mylâ liata Marapa chi nata pho chakaona liata a hmeiseihpa ta keih chakâ achhuahpa, Politics tlyliah liata angia chhuahpazy pi ta cha Marapa râh, chi nata pho kyhpachâna liata eima pihpathi ha tua awpa a ngiah ta, chi nata pho liata sia tua ta, Nationalism chhôhso lôhpi eima hnei ha tua awpa â ngiah. Cha hawhpa palôhrupa hnei awpa ta cha Khazohpa asaohiahna chôta eima sie awpa â ngiah ngaita kaw.

 

Mara thyutlia sawzy pi ta chhihthatuh phapa hnei ma pi. Mara phopi padua awpa ta thyutlia sawzy pi ta chhihthatuhpa phapa eimâ ngiah :

Thyutliapa thisaih lalôhpa sahlao a vaw tyuhpakhy pi ta, eima râh siezie nata eima saduthliena bielôhawhpazy eima rei daihti ta, eima khopasatu hapa vâta a chhâ chhâna lâta, “Marasaw tlâ ‘Sawhkhâ adyuhpa ta riah-ru’ suh u” tahpa bie eima rei châh ahluh kaw tyh. Anodeikua, a hmeiseihpa ta pipatlohsana deikua y tyh hleivei.  Eima râh thapasana vâta eima reipa a châ tahpa deikua â hno. Marapa chi nata phozy pi he, hlâno cha Chi nata pho reiraoh kawpa, Opa lyuhrizy kyhpachâna hnei kawpa eima châ tyh. Chavâta, hmopha taona kyh liata chhochhi cha pahmaohpakhy nao kawpa eima châ. Anodeikua, atahmâ ta eima duasu liata cha hmopha taona kyh liata pahmaohpakhy ru chaipa chi nata pho eima châ bâ thlyu aw? Maniah pahmaohpakhy ta, Marapa châta abâh pazawh thei awpa chhihthatuhpa Mawsi eimâ ngiah kaw bâ.

Eima râh Politics duasu he na pachâ beih hra ma? Thachhie â chhih ngaita kaw.  Ahyzy eima reipachhiena kyh châ leipa sala, râh kyhpachâ âtahpa, eima Politician nahzy ta eima râh amâ chhina dâh he lôh-eih â chhihh lei ngaita kaw! Thyutliapazy pi heta ama chô liata ngâna pahnieh ngâh hmeiseih mapi tahpa a sia kawpa ta â lâ. Mara râh châta ‘Vision’ phapa hneipa, adona nata ngâchhihna pasâhsapa, ano chhao apaky ngâhpa ama sôh ngaita kaw! Atahmâ ta eima duahmo liata cha MDC atloh thei khao leipa a châ khia cha, achhie chaipa ta atlyna liata sôh nata thih ahryuhna zydua thôpakhua n’awpa ta Contract thysy/thyza hlei mâpa eino (2) chhâ hria achhuahpa eima hluh tu ha. Cha dei châ vei, vaw tlohpa ta biehneina a vaw chabana daihti liata, a chhôhkha sanawhzy sawkhâ rai nata Contract pie thlâh hapa eima hluh tu ha. Cha hawhpazy ta râh ama chhihtha thlâh hapa cha kheihta e eima râh he â duahpapua thei aw?

Chavâta atahmâ ta duahmo liata Marapazy ta Marapa phopi padua awpa ta hmahlana, keih eima chakâ n’awpa kyh liata cha, chhihthatuh phapa eimâ ngiah ngaita kaw. Chhihthatuhpa phapa eima hnei to leipa vâta thyutlia sawzy eima palôhrupa a viavi ngâhai. Chhihthatuhpa phapa nata riahphapa, adona nata ngâchhihna chabapa, Râh châta ano chhao apaky ngâhpa he patluah bâ ei suh u. Cha dei châ vei, nâma cheingei chhao kha chhihthatuhpa phapa na châ thei hra. Chhihthatuh phapa eima hnei tita cha Marapazy pi he eikha tlaita pananopa ta y cheingei aw pi ta, eima râh ‘Change’ hmeiseihpa vaw tlô aw ta, paw pakha ta a rei tyhpa ‘Better Maraland’ chhao a hmeiseihpa tlai ta eima hnei thei aw.

              A chhâ chaina liata ei rei khohpa nata ei pachâ peimawh kawpa cha ‘apôhkhana’ he a châ.  Kao totie liata eima râh hmahsie ta, Marapa phopi padua awpa ta cha, keimo a chhôh liata pahrâpa, ahneituhpa Mara sawzy sapa nata thlahpa liata eimâ pôhkha ha tua awpa â ngiah. Reiraohna nata apôhkhana eima hnei tlôh leipa a châ khiahta cha, eima chheipâh liata apahrâpa chi hro pho hropazy hmiakô liata disaopa ta thlai eima y aw.

 

‘Khazohpa nata eima râh châta’

 

 

 

Source: Board of Mara Literature, MADC, Siaha.

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II