Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue March 2020



              Editorial

  

             Chasipaw daihti chhâpa ta nopi daihti cha Khazohpa ngiachhiena ta vaw tlô ha heih pi ta, aly’pah a châ ngaita.

              Nopi daihti he nohzy palo kaw tyh ta, râhzy chawh ta, chhohhnazy araoh lichih a châ tyhpa vâta moto eimâ sohsi kaw awpah a peimawh ngaita.

              Râh lâ eima pua daihti liata chhao mei pakâ chakhyh thlâh ha awpah châ leipa ta, châhnamei tlôna eima thy chakhyh thlâh ha awpah chhao châ hra vei.

              Hraohrâ leipa ta râh eima pakâ tyhpa heta eima pachâ pha leipa ta râh ta tao ta, mei kâna chhôh liata râhsa, pazu pazaw nat lôvâpazy a pamua hleikhô ta, râhhmâhpa taopathi heih  awpah ta kô hluhpi a byuh heih tyh.

              Phoso viapa nata asosâh viapazy ta râhhmâhpa peimawhzie pahno ei ta, ama pabohsa hleikhô ta, râhhmâhpa tao awpah ta thodaw hluhpi bô chhi lymâpa ta râhhmâhpa ama tao chhi lymâ tyh.

              Keimo chhao atahmâ tawhta ahrapa ta thodaw hluhpi bô chhi lymâ sih la, râhhmâhpa eima tao lymâ a peimawh ngaita. Eima sawnahzy nata eima tusaw nahzy chhao he kyh liana heta pachuna phapa piepa ta, ama palôh liata râhhmâhpa pabohsana hleikhô ta, mei tawhta asohsi a peimawhzie eima pachu via lymâ a byuh.

              Nopi noh heta râhhmâhpa hleikhô ta, eima o chheipâh chyuzy chhao khâsiapa ta, o kâ thei awpah tawhta avaihpa ta moto eimâ sohsi awpah a byuh kaw.

              Khôtho eima puachy ta eima ochhôh electric  current zy thie khai ha tyh sih la, electric lômathu zy thiepa ta ari eima phia khai ha tyh awpah a pha aw. Buakha hlâta eima o nah lyuzy meipaoh lâta alie khai theipa châ tlôh ta, kô hluhpi hriapasapa ta eima osapazy he daodopa ta eima eima pabohsa awpah a peimawh kaw.

              Eima o chheipâh liata hawti nah meipaoh patipa tawh chhaota okâ theipa châ ta, eima sawnahzy hrâkyu chyupa ta he hawhpa lâta apachuna phapa eima hnei awpah he a peimawh ngaita.

              Palôhhâh leipa hawtizy ama châna hawhta meikâpa ta hmo pei a hria pathuzie pahnothai tlôh leipa ei ta, nôpawzy nata uhthei viazy ta hrâkyupa ta pachuna phapa eima pie via lymâ awpah he â ngiah chaimâh.

 

 

 

 

 

CHIPHO NATA REIH PABOHSANA

( Kôphuah saichhieliena)

   

~ FC. Chhuasa

 

Chi to pho to hnohta reih noeihpa piepa châ pi ta, pazupavaw, râhsa nata osazy chhao a chi chi ta, a pho pho ta sâ dâh eihpa ama hnei khai. Reih/ sâ dâh miakhapa ahlypazy cha chikhapa, phokhapa, hlykhapa ama vaw châ tyh. Chipho nata Reih he khâchâ apazao hapa, pachhaih thai lei awpah, a noeih ta eima soh khiah yzie a hnei khao lei awpah a châ.

              Atanoh he saichhieliena deita a châ vâta paki parai thei leipa aw pi ta, biehmia nata a lâthlôh a pahmôna hawh deita a châ. A rai hmeiseihpa ma kaw hria ti ta eima no a kaw vâh via aw ta, a hmahsie viana dâh, â thôh viana dâh nata chhaichhi eima peimawhpazy tlao â vaw lâ via laih hri aw.

              Â thlâzi via n'awpah ta eima kôphuah he hlyno lâta vaw pachhaih haw sih la a pha thlyu aw. He hawhta :-

 

CHIPHO PABOHSANA

 

1) Maluh hluhpa: Hmo to nata kyh to liata chyh tu hapa he cha vaw pha vei. Atahmâ ta eima duasua liata cha  India, Myanmar, Malaysia, Australia, Singapore, USA etc liata a pahrâpa marasaw zydua pakhypazi khai hana chô chhao ta, eima maluh he pho hropazy hmia liata za a chhih khi a khi leipa pi ta, nohhâh y khi a khi  leipa pi ta, chi a chhih khi a khi hra ma pi. Chi nata pho aboh awpah ta cha eima maluh chhâ a hluh ha tua awpah a châ. MTP zy pi ta he bie he pachâ peimawhpa ta, khizaw râh nano nanopa liata a ypa marasazy hnohta phuazâh laih ta, eima hiepatlah lymâ awpah â ngiah. MCHP ta cha he he vaw hmô pasia kaw ei ta, thata tlâh ama awh khei hai  hih.

 

2)  A hnei pahlao lei awpah:  Kheihawhpa hmo rai hmo miano eima pahlao ha khiahta cha, hiakha lâ hiakha lâ ama châna chyu vaw pahlei ei ta, vaw pata khao tyh vei. Chyhsapa lia chhao thisaih chinopa â vaw pahlao khiah cha, vaw padâh ta, pata khao leipa ta, a vaw kâpia ha tyh. Eima bie ngiapâpa Biehrai chhao ta a hnei pahlaona he vaw khoh vei. Israel sawzy kha pho hropa nata a hnei pahlao lei awpah ta ei hluhpi a chho ei. Pho lai viapa nata pho hluh viapazy châta la pei tu thlyu vei. Keimo pho chynawhpazy châta deikua la châmaih chichhih chaipa hawh châ ta, virus chichhih chaipa, chipho leidiana a tlôkhei theipa a châ.

 

3) Ativyna: Mo pakha, chhôhkha, khih, râh, chipho a boh awpah ta cha, nie awpah hnei sala, âtivy tua awpah â ngiah. Nie awpah hnei leipa ta nodi thachhâpa ta eima y khiahta cha, a duah parei thei leipa aw pi ta, thlai ta pao awpah he eima tovyuh awpah a vaw châ. He he khizaw ta a pahnopasia ngaita kaw. Tahmâhlâ khizaw liata adyuhna lai chaipa cha, Economic War a châ hai. Meithei nata Bomb hmâ ngâ kaw khao leipa ei ta, economic hmâpa ta pho hropa pahnie ta, tlybai ta, disao awpah amâ chhuah chai ha bâ. Political, language nata Culture liata a disaona hlâta economic hmâpa ta a disaona he a thatlô chai ta, a chatlie chai hra.

              Eima râh duasu sai tua ei sih la, mawmyhhna nata Âhrâ lia dâhdei chhao a tivy ma pi. Eima sôdaohna su (Bajar) zy cha pho hropa ta bie khai ha ei ta, eima phusâzy miah ama chhu khai ha hih. He hawhta eima sie lymâ khiah la, rei a daih khao aw ma pi. Pabohsana lâthlôh tlua para ei suh u.

 

4) Thaina sona: England râh, râh lai kawpa chhao châ leipa ta Nohtla tiah leina taih ta abeina râh ama pakawh theina chhâpa kha, khâpa hropa vâta vaw châ vei, ama thaina sona vâ deita ta a vaw châ. Keimo chhao maluh hluh châ hra vei ' sih la, thaina sona lia chhâ eimâ sâh khiahta la, kheihta nata kheihta ma chi nata pho hawhta aduah papuana dâh a y cheingei aw. Yh, cha thaina sona chata ativyna vaw tlôkhei pâ aw ta, economic assimilation tawh chhao miah a pabohsa thei hra aw. MTP ta he hmo he hnôh eima chhy awpah pathaih vei.

 

5) Räh pabohsana: Eima pahno chyupa hawhta khihpi laipa Delhi, Kolkota nata Mumbai khih miakha liata motor a ypa zie chhao eima maluh ta â kho lei no ta, tahmâ taihta pho laipa nata hluhpazy ta   miah ama disao leina miakha cha, rah eima hneipa he a châ.

              Hmaohkha siahkhata ta pahrâ n’awpah râh eima hneipa he eimâ bohna thokhy a vaw châ. Dyhphapa sawzy apalypa-uasana liahpahlô tieta tlâ châ ta, inches sâkha chhao eima pahlei awpah châ vei. Pahno leina vâta pho hropa zy hnohta eima vaw zuah hapazy he, a chhu pakhuana dâh MTP ta thlai eima pachâ awpah â ngiah. Miah chalei khai ei sala, miah papuapa ta eima viavi hlâna heta.

 

6) Culture: Pho to ta taozie, khihsa tôhtu dâh, cheiô eihpa eima hnei khai. Chyhsa dei châ ma pi, hmotaopa chipho zydua ta hrozie eihhrâhpa ama vaw hnei khai. He hawhpa eima cheiô chyu he Culture ama vaw tah. Culture he chipho nano nanopa a paysatuhpa a châ. Eima culture nata traditon zy uasa leipa ta pho hropa cheiô eimâ hly khai khiahta cha, chipho leidiapa eima vaw châ aw.

 

REIH PABOHSANA

 

A thaipazy ta reih pabohsana dâh ama reipa kao hluhpi hry ta â lâluah viapa chyhta vaw palâsa heih tua ei sih la.

 

1) Cheih hluh/hmâh hluh: Kheihawhpa reih rai a cheihtuhpa (Speaker) ama hluh nata hluh lei tawhta rei lei haipa a châ nata châ lei a thaipazy ta ama thlie tyh. Eima reih he o chhôh, khiliah, zawpi a pôhpakhyna nano nanopa liata eima hmâh hluh via lymâ awpah â ngiah. A viapachaipa ta Awnanopa nata Politics hmo vâta eimâ hmaohpakhyna liata mara reih ma hmâh hluh thei leipa heta, leidiana lâthlôh eimâ chhih hai tahpa a palâsa. MTP zy pi ta a pasa kawpa ta adyuh ei suh u. Reih rai rai a hmâhtuhpa manôh 20000 (Thyno) chhâ ama tloh khao vei khiahta cha,  reih leipa hawhta pachâpa a châ.

 

2) Ropa ta so hluh awpah:  “Bible nata Hlabu hnei pi ta, eima reih he lei thei aw vei” chyhsa thokhazy ta ama tah tyh. Bible nata Hlabu tha patlô ta, deichhytuh awpah khôtho châbu hluhpi a y awpah â ngiah. Châbu, thâtihbu, magazine, Sign board etc hluhpi ropa ta a y awpah châ ta, eima hiezawh awpah â ngiah.

              Eima unawhpa Tlaikao nah cha zyhna kyh châbuzy ahlao leipa ta kô 1 ta châbu 150 a chhie chai ta ama papua tyh. Keimo deikua zyhna kyh châbu zydua rei pâpa ta châbu a pua hluh chai kô ta, bu 13 a pua, Magazine a pua hluh chai kô ta 12 a pua hra. Daily/Weekly News paper liata eima duasu nama pahno. Tiama papua a byuhzie pahnoh n’awpah châta ei vaw reih papua.

 

3) Achuna reih châta: Kheihawhpa reih rai achuna reih châta hmâpa a châ vei khiahta la, laiseih thei leipa ta, tlao hnôh â sy via tyh. Tlaikao nah cha University lia taih ta Mizo reih achu thei ha ei ta. Keimo deikua Middle level lia hmahta Subject sâkha hawh deita ta eimâ chu thei chyu chyuh. Mara nata Mizo reih liata kheihawhpa reih e â boh via aw ? Chavâta High School, Higher, College nata University lia taihta Mara reih achu thei awpah ta eima tei lymâ awpah ângiah.

              He he pahnopasiapa ta Mara Writets Club ta zâkô kha Mizoram sawhkhâ hnohta High School liata Mara reih (Elective) hawhta achupa a châ thei hra n’awpah ta tlôkhei ta, tahmâ taihta â chhyna y vei. A hluh viapa ta nata reiraoh viapa ta hmah eima la awpah â ngiah ngaita kaw.

 

4) Media: Tahmâhlâ khizaw lia cha kheihawhpa hmo rai tao ei sa la, media a hlao leipa ta a hlaotloh thei khao vei. Media ta apahlypazy cha :- Thâtihbu, T.V, Radio, Audio Cassette/Album, Film, Internet - Facebook, Whatsapp, instagram, Google etc zy a châ. Keimo chhao media ma hmâh thai vei khiah la, eima kôphuahpa he a hlaotloh aw vei.

 

3) Zyhna kyh:  English, Hebrew, Punjabi etc zy he hlâno la reih alâluahpa châ hra vei. Zyhna kyh vâta a kaw laiseihpa nata  a kaw lâluahpa a châ. Mizo reih chhao zyhna kyh lâ literature zy vâta thata a laiseih hra. Keimo deikua eima zyhna kyh ta Mara reih tlao a disao hai hih. Chipho ta miah paduatuhpa ta kheihta   pachâ hr’aw vâ tly?

              Manôh 3000 - 4000 rachhôh ta, pahrâna su â i kawpa chhao hnei leipa ta, chariah chipa ta tlâh laki nata lôkâhpa ry liazy ta achheina a tlua laih tyhpa kha, Khazohpa ta a Missionary hmâpa ta miah pakhypazi ta, chipho châ hr’awpah ta miah a  padua hleikhô ta, kô 100 hlei miah a chhihtha haw. Mara thyutliazy saih u, he chi nata pho he a leidia pakhua heih khiahta la, eima Khozohpa thai leipa châ khao aw vei. Keimo thai leipa tlai a châ aw.

              Nôpaw saih u, kôphuahpa heta kô 3 tlai ô aw ta. Daihti chyuta châ vei. Tiama kawpa nata lôraoh kawpa ta eima hria khiahta la, eima chipho nata reih hmia  panano cheingei aw pi ta, History thiehpa eima roh cheingei aw, tahpa ei ngiapâ.

 

EI CHÂ LY KAW EI

 

 

 

 

 

MARAREIH HMAHSIENA NATA

HMAHSIE VIA N’AWPAH DÂH

 

~ Felix T. Chozah

Amobyub ‘B’

                                                                                         

( He Essay he BML Essay aropasuana, 2019 liata lymâ sâthôhna adaopa a châ.)         

 

“Reih he râh pakawh n’awpah ta chhaichhi tiah chaipa a châ’’

‘‘Reih hmâpa ta, eima khopazy reih thei pi ta, reih y leipa ta bie achho thei leipa pi ta, reih ypa vâta eima palôhpasana nata eima thapawhna  daihtizy eima reih thei, reih hmâpa ta khizaw pahnie thei pi ta, reih hmâpa pyly ta khizaw eima pabohsa thei hra, chavâta chô Khazohpa ta miah piepa mara reih he a reih hneituhpazy ta eima palaiseihsa awpah he eima taozie awpah a cha’’

              Khizaw liata reih angiapa nata aony a hnei hrapa mara reih he Abeipa Khazohpa ta chi nata pho a châna palâpasiasa via n’awpah ta khizaw liata a taopa châ hra ta. Reih aony ahneipa a châpa vâta angia ta, anainyu ta, ahi-mualua thlâh ha heih tyh. Reih he peimawh ngâsâ ha ta, chi nata pho a châna palâsatuhpa chhaichhi a châpa vâta, eima pasô awpah he â ngiah ngaita.

Reih  eima hmâpa heta eima yna râh palai-pakawh thei pi ta, khizaw chhao eima pahnie thei hra. Chi lai viapa nata pho asâh viapa eima tahpazy he reih ta khizaw a pahnie thei tahpa ama sia kawpa vâta, âmo reih tlai ta châhnawhzy tao ei ta, châbu nata thâtihbuzy chhao âmo reih ta ama roh lyhlia lymâ. Mara reih chhao he châhnawh eima vaw hnei tawhta thata reih liata hmahsie pi ta, châ rei-ro eima vaw thai hapa vâta reih thiehpa thata hnei baichhi pi ta, anodeikua khodâh hawhta hmahsie thei mâh ma pi, reih ahmâhpa eima chyhpa vâta a châ.

          Reih he a peimawh ngâsâpa vâta Nelson Mandela ta hetana heta reih a peimawhnazie a chhopasia “Reih y leipa ta, bie nata hla pua thei leipa ta, reih y leipa ta eima hmo khopa reih thei leipa pi ta, reih a y leipa ta, eima history nata eima châna reih thei ma pi” a tah. Reih he chahawh ngâsâ ta peimawhpa a châpa vâta, râh asosâhpazy ta cha, âmo reih ta châbuzy thata papua ei ta, hmo peimawhpa nata ama chhaichhi rypaohpazy paso n’awpah ta ama hmâh tyh. Reih heta chyhsa palôh pahnie thei pi ta, chyhsapa chhao ama mothlih eima patlasa thei hra. Chavâta, marapazy ta reih chô Khazohpa ta miah piepa he pasô ta, eima hmâh lymâ awpah he â ngiah ngaita. Reih heta eima châna palâsa ta, a kheihawhpa chi tawhta vaw puapa ma eima châ tahpa chhao eima reih hmâpa tawhta eima pahno thei hra.

              Mara reih he châhnawh eima vaw hnei tawhta reih lâta thata a kaw hra pi ta, eima hmahsiena dâh deikua khodâh hawhta hmahsie vei. Châhnawhti eima vaw hnei tawhta reih lâta eima hmahsiena thokhazy vaw palâs’aw sih la, heta na heta :

1. Châ rei nata ro eima vaw thai haw.  Châhnawh eima hnei hlâ via kha cha, eima phôhpa nata eima hmobaoh paso n’awpah ta châbu liata roh thai leipa pi ta, cha chata khachâ rakhama eima reih angia viapazy lei ta. Châhrasala, châhnawh eima vaw hnei tawhta deikua cha, keimo reih mara reih tlai ta châ rei ro vaw thai ha bâ pi ta. Mara reih ta cheingei châbu nata thâtihbuzy eima vaw papua thei ha bâ hra. Chadei châ leipa ta, eima reih ta cheingei HOLY BIBLE eima vaw hnei ha hra. Hla nata bie thata a biesaka thlâh leipa ta, roh pi ta, chyhsapazy hmô thei awpah tlai chhaota eima vaw papua thei ha bâ. Cha cha reih liata eima hmahsiena lâthlôh miakha a châ.

2. Reih angiapa nata châbu phapa reih hropa ta ama ropazy, mara reih lâta eima lapangia thei lymâ ha bâ; Khizaw liata reih angiapa ama tahpazy, châbu phapa reih hropa ta ama ropazy cha, mara reih lâta paliepachhuah ha bâ pi ta, eima reih ta cheingei eima vaw reih thei ha bâ hra. Thokhazy ta sôdaoh n’awpah châ chhaota amâ mâ ha bâ. Cha cha mara reih hmahsienapa a cha hrâ.

 

3. Mara châbu siku lia amâ chu ha bâ hra; Achuna he khizaw ta achakaihpa nata achhâ thai leipa châ ta, khizaw pahnie n’awpah chhaota chhaichhi khochhih chaipa a châ hra. Chavâta, Mara châbuzy mara reih ta cheingei siku liata amâ chu bâ ha hrapa he khizaw hmahsiena lia keih eima chakâ hra tahna châ ta, cha cha mara reih hmahsienapa a châ hra.

 

4. Film nata music video zy chhao marapa ta, mara reih tlai ta khizaw mohmô lia achaluah ha hra bâ; Film nata music video he peimawh ngâsâ ha ta. Film achâtuhpa nata music video ataotuhpa khata a vaw saituhpazy palôh thata chamieh thei ta.Y chahawhpazy cha marapazy ta mara reih ta ama vaw papua ha hra bâ, cha chhaichhi hmâpa chata khizaw liata mara reih he a y hrana tahpa nata marapa chi eima châna palâsatuhpa a châ hra. A kheihawhpa movies a pha viapa chhochhizy cha, mara reih lâta palie ei ta, marapazy hmô thei awpah ta ama vaw tawh ha hra. Cha cha hmahsiena miakha châ hra.

 

5. Mara reih palaiseihsa ta pakawhsa awpah ta BOARD OF MARA LITERETURE amâ duah haw; A kheihawhpa rai pahmahsiesa ta palaiseihsa awpah ta cha chhihthatuhpa he peimawh ta, y cha hawhpa hmahsiesa ta palaiseihsa awpah py cha mara rah liata cheingei ta amâ vaw duah haw. BML he peimawh ngâsâ ta, reih athi hapazy pathyu ei ta, reih thiehpazy hmô baichhi ei ta, reih a peimawhnaziezy zawpi liata tlâzawh ei ta, âmo vâ heta mara reih chhao alie- asâh ta hmah a sie. Reih hmahsie n’awpah ta cha LITERATURE he peimawh ngâsâ ha ta, literature a pahâhpa yna maih liata reihkah ngiapa nata reihkah thiehpa thata a pua tyh. Chavâta, marapa chizy chhao literature eima pahâ hra awpah he â ngiah.

              Mara reih he eima pahno chiehpa hawhta; ahmâhtuhpa hnei chyh kaw ta, reih hropazy ta eima reih a vaw daihny lei n’awpah nata eima reih mara reih a hmahsie thei via n’awpah ta hetana heta vaw reih heih sih la :

 

1.       Mara reih ta châ rei-ro eima thai cheingei awpah a châ :

Marapa chi châta cha, marapa châ a roh thai vei khiahta cha, a chi nata pho a châna cha a daihny tahna a châ aw. Marapa chi nata pho eima châ khiahta cha, chô Khazoh ta miah piepa mara reih he eima thai cheingei awpah nata eima roh thai awpah he â ngiah. Chadei châ leipa ta, eima reih mara reihtazy ta châ ro eima pahâh hualua awpah he a byuh hra. Chi hropa nata pho hropazy chhao eima reih he pachu ta, eima pathaisa awpah he angiah ta, cha cha marapa ta eima râh eima pakawh theina miakha a châ hra.

 

2.      Marareih tlaita châbu nata thâtihbu eima papua hluh awpah ângiah ngaita;

Châbu he peimawh ngaita ta, châbu liata chyhsapa ta ama thaina nata sona ama pabupazy thaohpapua thaipazy he chyhsa rônahpazy nata athaipazy châ ei ta. Chadei châ leipa ta, reih hmahsiena nata reih pakawhna chhaichhi tiah ngâsâpa a châ hra. Chavâta, marareih ta cheingei châbu eima hnei hluh awpah he ângiah ngaita.

Châbu arohtuhpazy he atahmâ cha niebaw tluana ta ahmâhpazy y ha bâ ei ta, chavâta marapazy chhaota niebaw atluana châta châbu ropa he eima hmâ hra awpah ângiah. Thâtihbuzy chhochhi he cha eima hnei awpah nata eima reih tlai ta eima roh hualua awpah he a byuh. Thâtihbu he reipa hmah pasiesatuhpa nata reih a pakawhtuhpa châ ta. Thâtihbu he hmo apahnosana nata achuna bu sâkha hawhpa a châpa vâta, marapazy ta thâtihbu reih hluh ta, eima reih tlai ta eima roh hluh awpah he  â ngiah hra.

 

3. Thâtih apahnosana nata zawpi yna su liata mara reih ta bie eima phuah awpah he ângiah. Marapa yna râh liata chi hropa reih ta biephuahpa he, eima Paw Khazoh hmo miah piepa pasô leina châ ta, chavâta eima tao lei hialia awpah tlâ a châ. Marapa yna nata programe ahmâna maih liata cha mara reih ta cheingei bie eima phuah tyh awpah he ângiah. Chi hropa nata pho hropa a vaw hlaopazy ama ypa chhaota, eima reih mara reih he eima hmâh awpah châ ta, cha tawhna chata eima râh liata a pahrâpa chi hro pho hropazy ta mara reih a peimawhnazie vaw pahno ei ta, amâ vaw chu hra aw. Cha chata, eima reih pakawh pi ta, eima reih eima pahmahsiesa hra tahna a châ.

 

4.      Eima reih mara reih he chi hropazy eima pathaisa awpah he ângiah ngaita. Eima yna maih liata chi hro pho hropazy ama vaw y khiahta la, eima reih mara reih pachu ta, eima pathaisa awpah he ângiah ngaita. Y cha hawhta chi hropazy pachu sih la, eima pathaisa lymâ khiahta cha eima reih mara reih cha palaiseihsa aw pi ta, eima râh chhao eima pakawh ngâ kaw hra tahna a châ aw. Chadei châ leipa ta, chi hro pho hropa eima hneipa chhaota mara reih he eima pathaisa awpah he ângiah hra. Cha cha, mara reih hmahsie n’awpah chhaichhi miakha a châ hra.

 

5. Hla nata Bie eima pahâh awpah ângiah. Hla nata Bie he reih hmahsie n’awpah hmobaoh khochhih ngâsâpa nata atiah ngâsâpa châ ta. Chi lai viapa nata pho asâh viapa ama tahpazy he hla nata bie pahâh ei ta, cha chata ama reih pahmahsiesa ta. Ama chi châna liata ama sia hra. Chavâta, marapazy pi chhaota eima reih lâta HLA nata BIE eima roh hluh awpah nata eima phi hluh awpah he ângiah ngaita hra.

Hla nata bie tawhna heta reihkah thiehpa nata reihkah ngiapa thata a pua tyh vâta,eima pahâh hialia awpah he a reih hneituhpazy eima tao awpah a châ. Hla nata BIE a pahâhpa maihta ama chi nata pho châna sia ei ta, ama pikheipa reih cheingei ama pasô tyh hra.

 

6. Khitlâh nata vaih to, siku O nata zawpi ypakhyna liatazy mara reih a peimawhnazie nata hmah asie via thei n’awpah he eima pachu tyh awpah ângia; Achuna he khizaw ta âchakaih hapa vâta, a kheihawhpa hmo rai he eimâ chu awpah nata eima pahno awpah he ângiah. Khitlâh nata vaih to liatazy, siku O nata zawpi ypakhyna maih liata mara reih a peimawhnazie nata hmah a siethei via n’awpah lâthlôhzy he eima pachu tyh awpah ângia. Chata a vaw pachu sih la, eima vaw thai ha khiahta la, mara reih tha vaw pasa aw pi ta, mara reih tha eima vaw pasa ha khiahta la, eima chi nata pho châna vaw sia aw pi ta, marapazy kyh a vaw pachâ via aw pi ta, eima reih cha hmah a kaw sie lymâ ha bâ aw.

 

               Reih he peimawh ngâsâ ha ta, chi nata pho achâna palâsatuhpa hmobaoh miakha châ ta. Reihkah ta khizaw pahnie thei ta, reihkah pyly ta khizaw eima pathyu heih thei. Reih a ypa vâta chysapazy bie achho thei pi ta, eima hmo khopa nata eima thâtihzy eima reih papua thai. Cha hawh tlupo ta peimawhpa nata pabohsa byuhpa a châpa vâta, chô Khazoh ta miah piepa mara reih he pasô ta, hmah pasiesa ta, eima hmâh lymâ awpah he a reih ahneituhpa marapa sawzy eima tao hialia awpah a châ.

 

     

 

 

 

MARA REIH HE

MARAPA CHÂTA BYHNÂ A CHÂ

 

~ HC. Dahlu,

Headmaster, P/S – I, Khôpai

 

 

Mara saw thokhazy cha eima ochhôh liata Mara rieh pyu thei’pah y khao vei. Khazia ma reih hropa eima cheih thlâh ha tly? Chi nata Pho he khataih liata ma a y? Sâkhana liata ‘REIH’ liata a y. Marapa chi nata pho châ tlôh ta, Mara reih athai vei khiahta la, Marapa saw a châna a lei ha tah thei’pah a châ.

Keima mo pakha ta ei pasâhsa kawpa chyhsazy cha chi hropa, a vahpa tlyma, lahpinô tlyma a hneipazy he, Mara reih ama pathaisa thlâhpa he, Mara reih a pasâhsapa chyhsazy ama châpa hawhta pachâ na ta, ei pasâhsa kaw.

Chi nata pho eima châna miah chhotuhpa cha, ‘REIH’ he châ vei mâ? A reih cheipa tawhta he chyhsa he cha,, chahawhpa chi a châ chuh miah ama tah tyh. Marapa saw zydua he, chi hro pho hropa reih cheih khai ha sih la, Mara reih thai tlâ khao leipa ta y khai sih la, Marapa chi nata pho cha a lei pathaopa tlâ châ vei mâ?

India râh liata chi nata pho reih a hluhpi a leidia ngâhai. Cha hry liata reih a leidia hapa, 325 a y tahpa pahnopa a châ. He leipa chhaota reih a leidia awpah a hluhpi a y ngâhai. Mara sawzy pi ta eima Mara reih he pasô chai sih la, eima moral zy he taopathi suh vy. Eima leidia pathlei aw na.

Marapa sawzy pi he eimâ nano kaw. Eg :- Aviahpa (kalâhpa) eima hnohta y ta, Tlaikaopa reih thai hra vei. Mara reih thai hra vei. Eima thaileina chôta, Tlaikaopa reih ta bie eimâ chho tyh cha maw! Ânano thei dâh, Siaha khihpi liata Kalâhpa daoh liata Mara reih cheihpa hlâta tlaikaopa reih sai ta, abie thlâh cha maw. Mara râh liata chi hro pho hropa a vaw ypazy hnohta atanoh tawhta Mara reih pathaisa achhuah chyu suh vy.

Mara reih he, Marapa sawzy châta Byhnâ rônah kawpa a châ. Kô 1968 liana khata India Central sawhkhâ ta Marapa chi nata Phozy he Ryureina eihhrâhpa District Council pie tlâh ama châ ma tahpa mohpasia awpah ta Assam Chief Minister B.P. Chaliha nata Pheisaih Molaipa Lieutanant General Manekshaw Mara râh lâta tuapa a vaw châ. Mara râh ama vaw tlô nahta Mara saw nata Tlaikaopa saw eima hmi nata sâ ânanona hmô veih ei. Châhrasala eimâ nanona cha, reih he a vaw châ. Bible nata Hlabuzy pie ei ta, Mara reih a châna hawhta reihpapua ei ta, atahmâ la chi hro pho hropa tlai, reih hropa cheihpa tlai nama châ, tahpa nah tlai ta ei theipazy kha ei mo cheingei ta ei hmô haw. Nama khopa nama hiapa cha piepa nama châ aw, a vaw tah.

Dated 29th April, 1972 liata Marapa, keimo ta ryureina eihhrâhpa Autonomous District Council cha piepa a vaw châ haw. Marapa chi eima châna he ahymaw chhopasia thei aw tly? Pakah nata paleih ta nata theina ta chhopasia thai’pah châ vei. Eima pôraoh tlyma, eima hmia nata sâ tlyma, eima rôh tlyma chhopasia thai’pah châ vei. Marapa eima châna a chhopasia theituhpa a y chhôhpa cha, ‘MARA REIH’ deita he eima chi nata pho Marapa eima châna a chhopasia theituhpa a y chhôhpa a vaw châ. Chavâta Marapa sawzy pi ta eima pina, eima reih he pasô via rili sih la, chi hro pho hropa reihzy he nuby 2 na vaw châ bâ sala, Mara reih he Nuby 1 na vaw châ bâ mawh sy. Eima ochhôh, khiliah liazy office liazy Mara reih cheih tua sih la, a pahno thai leipa liata reih hropa chhao eima cheih awpah a châ.

Mara reih he, Marapa sawzy ch♪1ta eima Byhnâ hmôna hnawh a châ. Eima Bible nata Hlabuzy he, Mara sawzy châta Byhnâ miah tlô kheituhpa a châ. Pasô via rili suh vy.

 

 

 

 

Nopi meihthâhpizy

a vaw zawh ta

 

 

~ L. Beimokhai

 

Rhyme Scheme : abab, bcbc, cdcd, ee

 

Nopi meihthâhpizy a vaw zawh ta,

Rainô aongia to ama vaw sâh chuh;

Thlihuah nai zualua ta pathlipa cha,

Machhyuzy taih lôh a palie heih chuh.

 

Sai tua u, tho to chhyhpakapa khuh,

Nai zualuapa ta thlihuah ta a hmô;

Cha tawh Rainô sâhpa ao nahthlie tuh,

Rairao raithlih chhaota ei biepakhô.

 

Pachâpadyna ta su to ei tlô,

Taoraihpa y, sâh ngâ kaw khao khah y;

Na aongiapa ta raithlih a pazô,

Kheihta lôhlie ei tao thei rai aw tly.

 

Kei hawh vâsâh lôhlie ma na tao ngâ?

Kei hawh raithlih na palo ngâ kaw mâ?

 

-----------------------------------------------------------------------------------------------------------------------------

 

 

LÔMASU LÔPANÔ (AZINÔ)

 

~ K. Pari

 

              ‘Lômasu’ tahpa moh a phaona chhâpa cha he lôpanô lai kawpa he Lômathu hawhta Lôpanô sâthôh â supa y ta, he lôpanô âsupa hry liata lai chaipa cha chapu tie tah thei awpah châ ta, lôpanô sâno (2) apatlâhpa deikua cha chyh via ta, he lôpanô apatlâhpa he a hmao apatyh leipa ta, a chô lâta a lai chaipa ta âtyhna dady ta za vi ta, â zâ patyh. Chavâta ‘Lômasu’ tahpa ta bipa a châ. Chavâta he moh phaopa ta Lômasu khihparoh nata khihthieh likawh ta lôpanô suthôh liata a ypa cha ‘Lômasu lôpanô’  tahpa ta bipa a châ.

              Ama yna su cha Lômasu khih tahmâ ta ama pahrâ ngâhaina su tawhta Beinô lâ Motor ta Minute sâpangawh daihmâ a râ pi ta, beinô kiah eima tlô. Cha tawhta a hnaw lâ Minute sâno rachhôh Speed Board ta a râ pi ta, lô sâthôh âsupa cha beinô heisâ lâta y ta, Beinô kiah alô y hluh kawna tawhta 50 feet ta âhlapa ta tlâh via lâta a ypa châ ta, a yna su liata alô hropa y tlâ leipa ta, lôpanô sâthôh asupa he y ta, mopa hlâta â hnia tawhta cha a lai kaw sai.

              Cha tawhta Minute sâhrawh rachhôh Speed Board ta eimâ râ tawhta Lômasu lôpanô a sânona tlô heih pi ta, he he ‘Ahlihpa’ ama tah. Ahlihpa ama tahna chhâpa chhao a mahchha via lâ ‘Azinô’ a ypa vâta Ahlihpa (a chahpawpa) ama tahpa a châ. Cha su tawhta Minute sâthôh eimâ râ tawhta ‘Azinô’ cha eima tlôpa a châ. He Lômasu lôpanô sâthôhpazy he miakha miakha ta ama thâtih chyupa reih tua ei sih la.

             

Azinô:

              ‘Azinô’ ama tahpa he alai chaipa nata asâh chaipa a châ. Nochhi lâ tawhta Lômasu chavah nata notla lâ tawhta Siava chavah, Beinô chavah a za puana liata a ypa a châ. He lôpanô he Beinô chavah â khona liata a ypa hawhta pachâpa châ ta, châhrasala nochhi lâ a chadie viapa ta pahnopa a châ. A yna tawhta notla lâta atyuna a pheiphawh/a tlyhmia ngiahkâ ti ta avao phana taihta alô a phaw ta, nopinoh ta hmô thei’pah a châ, sao ti lai nota la a lâ thei vei.

              He a Foundation (a pheiphawh) he “Azinô seih-hnie’, ‘a seih pathliena’ tahpa châ ta, lâpaw tawhta, seih hnie lyu leipa ta, â hniata tawhta cha lyu kaw ta, a rôhna kawpa ta â lâ hra. Zâlâ dawh 4-5 likawh liata a mopha via pahchai.

              Ama reina zieta he “Azinô” Lôpanô he kô 1996 liata BRTF zy ta Beinô haosa lâ tawhta lâpi vaw Survey ei ta, Azinô he hleidy dao n’awpah ta vaw pady ei ta, Azinô lô he liahsa thlie khaipa a châ. Beinô ti âtyuna ry lâ tawhta thliepa châ ta, â sâhna lâta 30 Metres rachhôh châ ta, a laina lâta 80 Metres Circumference rachhôh a châ. Beinô ti a lai chai nota â sâh chaina he vao tyh ta, zâkha nata nohkha deita ti laipa ta a vao thei chyu chyuhpa a châ.

              Eikhano tawhta he Lôpanô ‘Azinô’ he lyurâhhripa (khasôh) a pahrâ cheingeipa ta pahnopa a châpa vâta, chyhsa ta chi ngaita ei ta, a moh chhaota aw ngâh leipa ei ta ‘Azinô’ tahpa ta ama awpa a châ. Azinô tahpa yzie he ahneituhpa (Khasôh) chichhihpa awna tyhpa a châ. Chyhsa hluhpi ta Khasôh /Ahripa a pahrâ cheingei tahpa ta ama rei tyhpa a châ.

              Nohkha cha Puhpa Thytu Tlâpyu a tha y no, a lochono nata Kri a zy tawhta Azinô chô lâta kiah ta, a sie chyta lôpanô liata apopa athaopa cha a chaizôh ta cha-â ta, “Azinô y, na kâhhhmi ei cha ngyu tua aw”, tah ta. Siesai ta, dawh khophie a sie hlâta, avâ nata thlih ta thata daih ta, ama rie a thei ngâsâ tahpa ta ama reih tyh. Chavâta, khasôh a pahrâ cheingei na tahpa pahnopa a châ.

              Azinô lô, Beinô Chavah adaihpa lâna heta alô tlâhkhai adaopa chhâh 3 y ta, cha liata ti a lai nata para/sadi soh tyh ta, para/Sadi a hluh kô cha khihtlâh lyu taopazy châta kô vei/sâh hnei kô hawhta pachâ ei ta, para/sadi a so chyh khiahta cha khihtlâh liata kôvei-chhiahvei y lei kô hawhta pachâpa a châ. He ama pachâna he âmo ngiana liata cha â do ngaitapa hawhta ama reih hra.

             

Abei dyuchhai :

              A tlyhmia lia heta a ryureina Beidyuchhai nata Dawhkâh y ta, he he kaw kiah awpah ta keih kha a kaw sua ta, kaw kiah thei’pah châ thlâh ha ta, a chô heihna lâ deikua cha a ru ngâsâ tyh. Chyhsa hropa alei lâ tawhta apatutuhpa y leipa ta chô ngâh’pa châ khao vei, â thyu ta athyu ngâh’pah châ leipa ta, keih za rai tah alei za tly thei’pa châ heih tlôh leipa ta, hmo lâlao ngâsâpa a châ. Pakha deita sie nota kiah ngâhpa ama sôh kaw, Pasaipha nata chyhsa noh laipazy tah leipata cha a kiah ngâhpa he chyhsa chyhta ama châ tyh. He Abei dyuchhai ry lâ syulyu heta a rakhô y ta, chyhsapa angia thei n’awpah rakha ta a chhikao y ta, a ry liata paradipa/leisadi saita â raih kawpa ta chyhsa papangawh chhi azia theina a y. Thlih nata avâ ru nota achhai thei’pah a châ. Anodeikua, pano deita ta angia ngâh rimâ awpah châ vei, a rarôh-y kawpa a châ. He su he lôhlie achhih kawpa hawhta ama reih. Atanoh daihti lia deikua cha he he â do tlaima tahpa pasiapa ama y nahta y lei pahnopa châ vei. He a rakhô he kô tota tilaipa ta parao beih leipa ta, chhâ vâro avaw siepa tawhta a parao tahpa reipa y mâh vei.

 

Lômasu lôpanô ahlihpa:

               ‘Ahlihpa’ tahpa he ‘a chahpawpa’ tahna châ ta, Vachari hlihpa tahpa yzie hawhta awpah a châ.  Azinô nohdi lôtlâh hawhta â sâh pâ kawpa ta apyuhpa/aduahpa a châ. Apahrâpa (Khasôh) a ypa ta pahnona eihhrâhpa y hlei vei. Anodeikua la, ama chi thlâh ha pyly. Ahlihpa heta thâtih hnei tu vei.

 

Lômasu khih moh phaohtuhpa Lôpanô:

              He Lôpanô he, Lômahthu hawhta Lôpanô sâthôh âsupa a châ. He kiahpâh ta liata zâkhano cha Lômasu khih a vaw y. Kô 1938 no rachhôh khata odyh 20 rachhôh pha ei ta, chyhsa thata thi ei ta, ama thi khai thlâh ha rôpa ta ama reih. He nota apahrâ hrapa S. Ngôchyu nata a viasa nahzy ta a sia kawpa ta ama pahno. Cha tawhta khih he a pasiesai ei ta, atahmâ he ama y pathi heihpa a châ. Atahmâ ta Lômasu Lodge ama sa ngâna su cheingei he a châ.

              He Lômasu asupa lôpanô he Beinô kiah alô y hluh kawna tawhta 50 feet ta âhlapa ta tlâh via lâta a ypa châ ta, a yna su liata alô hropa y tlâ leipa ta, lôpanô sâthôh âsupa he y ta, mopa hlâta â hnia tawhta cha a lai kaw sai. A lai chaipa cha chapu tie tah thei awpah a châ. Lôpanô sâno (2) apatlâh ta, a hmao apatyh leipa ta, a chô lâta a lai chaipa ta lô sâno âtyhna dadyh ta za vi ta, a zâ patyh hra ta, cha ry liata Mie zy, Mietaku zy ahripi ta nohsa vâsua nota amâ nyu tyh. A khupa kawhna lâ he a lai kaw.

              Kô 1948 rachhôh liata Burma pheisaih pakha ta moh chaimâh ta, “He Lôpanô he a naoh thao ta, â hrâh kaw, chavâta chi achhih ngâsa ta, Meithei ta ei ka aw”, tah ta, Meithei Rifle ta ka ta, cha tawhta a lai chaipa â pathopa cha â zâ hnai via haw”, tahpa ta reipa a châ. Pheisaihpa Rifle ta akatuhpa he dyuthaipa hawhta ama reih. Cha tawhta he lôpanô he chyhsa ta ama chi kawpazy a pai via ha ama tah. He he Lômasu ‘LÔPANÔ’ moh aphaotuh chaipa cha a châ. A laikachhua lâta a lai chaipa cha ‘AZINÔ’ tahpa a châ. A liah liahtapa he ‘Ahlihpa’ tahpa a châ.

 

Mara reih rozie dopa

 

 

 

 

 

Cho (m)             : A cho kha, Cho ta ta a chalih (adv)

Cho (r)               : Âhrâ cho a panyu, alei a cho (adj0 (verb)

Choh (d)            : Awh a choh a saih kaw (noun)

 

Chô (m)             : O chô liata a y, za chô teh (adv) (verb)

Chô (r)               : A py liata â chô (verb)

Chôh (d)            : Sari a chôh (verb)

 

Chu (m)             : Achu vei (verb)

Chu (r)               : Parih ta a pachu (verb)

Chuh (d)           : Chuh, â vy ngâ chuh (adv)

 

Dâ (m)               : A poh a(adj)

Dâ (r)                 : He tâkô he a y vei (adj)

Dâh(d)               : A dâh karo haw (Verb)

                             A tao dâh a pha(adj)

 

Dy (m)               : Chaizôh ta a dy (verb)

Dy (r)                 : Ei cha vaw dy aw (verb)

Dyh(d)               : Amâ dyh kaw (verb)

 

Do (m)               : Na do kaw na (adj)

Do (r)                 : Nâma a do va chi (adj)

Doh (d)              : Ti a doh  (Verb)

 

 

 

 

 

 

NO.MADC. 18/EDN/M&P/2019
MARA AUTONOMOUS DISTRICT COUNCIL

SCHOOL EDUCATION DEPARTMENT

SIAHA

Siaha, the 13thFebruary, 2020

 

 

PAHNOSANA

 

 

 

            Model Students’ Scholarship Exam târi 25.03.2020 pa ta MADC ry liata Middle School nata Primary School Py IV tawhta Py VII taih châta pachhuahpanoh heihpa châ aw ta, MADC ry liata Primary nata Middle School Headmasterzy ta ama student zydua ama pa exam sa cheingei awpah a châ aw. He Scholarship Exam châ heta Selection (atlyheihpa) hnei pasaipa châ aw vei.

            Class IV-V châta Subjectzy- (1). English. (2). Mara. (3). Maths (4). EVS

            Class VI-VII châta Subjectzy- (1). English (2).Mara (3). Maths

(4). Science

 

            Subject to ta Marks 25 phaoh aw ta, Kô 2019 – 2020 chhôhta achupa zydua Question ta a pahly aw.

 

            Examination Centrezy châta Centre parohpazy kha angiapâpa  châ aw ei ta Siaha Town chhôh deikua bâhta pananopa a châ aw.

 

 

Note: He Scholarship Exam apachhuahpanohna châ heta pachutuhpazy ta ama Students chyu Coaching/Tuition Classa ama hneikhei awpah a châ aw. Exam na lia ahlao leipa School Headmaster nataTeacherszy chô liata action lapa a châ aw.

 

Sd/- K.Vanlalliana

Senior Education Officer

Mara Autonomous District Council

Siaha

Memo No.MADC 18/EDN/M&P/2019 Siaha, the 13thFebruary, 2020

Copy to:-

1.      All Headmasters, Middle School and Primary School under Mara Autonomous District Council ama vaw pahno awpah nata Scholarship Exam châta hmah la awpah ta pahnosapa ama châ.

2.     The Information & Publicity Officer, MADC for information with a request to publish through the Local News papers of Siaha & Tipa.

3.     President, MSTA and MPTA ama vaw pahno awpah nata hmahla pazi awpah ta ahawpa ama châ.

4.     Guard file.

5.     Office copy.

 

 

Senior Education Officer

Mara Autonomous District Council

Siaha

 

 

 

 

NO.MADC. 11030 / BSE / 2019 – 20

BOARD OF SCHOOL EDUCATION

MARA AUTONOMOUS DISTRICT COUNCIL

SIAHA

Dated Siaha, the 11th Feb. 2020

 

PAHNOSANA

 

 

              Mara Autonomous District Council Executive Committee paryhsana hawhta Model Students Scholarship Examinations 2020 cha târi 25 . 03 . 2020 (Pakhynoh) ta hnei awpah a châ. Mara Autonomous District Council ry liata P/S, M/S nata UPS zydua, Py  IV tawhta Py VII na taihta a exam khai awpah châ aw ta, Subject a exam awpahzy cha :-

 

Class IV – V châta

 

(1)    English              (2) Mara            (3)Mathematics            (4) Environmental Studies

 

Class VI – VII châta

 

(1)    English              (2) Mara            (3)Mathematics            (4) Science

 

Subject to ta Marks 25 phaoh aw ta, kô 2019 – 2020 Academic Session chhôh liata Course zydua a pahly aw.

Exam n’awpah su nata Superintendent awpahzy cha enclosure liata palâsapa hawhta a châ aw.

 

 

 

Sd/- Nazee Khailah

Secretary

Board of School Education

MADC : Siaha

 

 

 

 

 

Vâ-ia châpaphaopa

(Love Letter)

 

Rohtuhpa : Sachhua Chozah

 

 

( He Vâ-ia châpaphaopa he BML Love Letter aropasuana 2019 liata lymâ sâthôhna adaopa a châ.)

 

Khochai Vâpawngia,

 

                             Ei dao, ei vâ chainô y, na hnazô hmô leinazy rei ta, na ao nai kawpa nata rohpahâhpa rohzy ei thei leinazy vaw rei kaw bâ hra sala, ei chhôhso liata la zâhnia tliata lia hawh deita a châ. Na ao nai siahlia kawpa cha ei nahkhaoh lia khâ châh thlâh ha ta. Na rohpahâhpa rohzy cha ei hnapasu lia khâ â bai thlâh  haw. Ahy thâh angiah leipa ta eimâ kaona tlâhzy cha raithlih palotuhpa dei a vaw châ tyh. Ei dao y, na châ paphaopa liata ei moh châta ‘keima pathipalôhru’ eina tahpa chi khawh naw, kei châta la khizaw ngôh zydua hlâta sôh via ta, pawpi ‘rose’ paw hlâta chhao â ngia via.

              Ei dao, khâzia e he tlupo ta ei cha vâ thlâh haw tly i! Hmoto zydua heta ei palôh na paliesa ei ta, vâsuapa zy, thlih vaw pathlipa zy, thlâpâ, Awhsi khaihpa zy nata nohchhô tan oh khaihpa zy, motor pyu zy, pavaw sâpa pyuzy taihna heta ei Dinô na pathei papuasatuhpa deita ama châ. Achâhta la chô Khazohpa chhao heta he tlupo ta palôhliepa ta ei y awpah tlai cha khâzia e eima sâhmia miah a patyhsa tly tahpa ta maochhiena thata eina pahneisa. Zâ vaw châ ta, thaina achuna vâta châbu pakaipa ta reih awpah achhuah tyh hra sala, ei palôh lia rai angia thei leipa ta, mokuh ramâ khaih awpah ta aziana su pangai hr’aw sala hâti a palao ngâpa pamô achhuahpa hawh deita ta ei tlâ khai ha tyh. Kri azyh leipa (muslim) nahzy ta ‘Ala’ tahpa ta ama khazoh ama awnazy taiahta palôhliena thata eina pie.

              Ei dao, ei cha vâna thâtih he khatlu hmahta cha chho hr’aw sala chhâ thai tlôh leipa aw ta, châhrasala he deikua he na pahno awpah ta ei khoh  ngâsâ. Mydi vaw thyu na ta, ei pathipalôh liata khâ bie thlâh ha chi ta, achuna opi pangai na ta, nâma hawhta na palysatuh awpah rai hmô leipa na ta, ei chareina vaih liata palôh na patlâh thei awpah rai y veih ei. Nâma cha pach♪1 tua leipa ta eikha dâhdei chhao mokuh ramâ khaih beih hra van a. Ei dao, he khizaw liana heta kei hlâta athaiso viapa, hmipha viapa nata dyhpha viapa hluhpi ama y tlaina. Châhrasala he deikua cha chho awpah ei khoh, keima hawhta kyhpachâtuhpa nata châ paphasai beih lei awpah deikua la he khizaw hmah chahryh khai ha hra la atyh leip’aw chi ta, hmô beih hra va chi. Ei paw moh pataih papa ta ei cha chho aw.

              Ei dao, ei khochai, ei hiehâh chai no chhaota na moh ta cha aw awpah ei pasaih leipa châ chi ta, na palôh ei patlâh lei awpah he ei chi chaipa nata ei kho lei kawpa a châ. Dao, na kiah liata ei y tyh no ta eina pachâna nata eina daodona zydua kha athei thlâh ha na ta, lâpi dopa lâ khâ na chhihtha hualua chi ta, keima châta a pasaiha leipa rai hnei leipa chi ta, ei palôh tlâh n’awpah ta a châ khiah khâpa raita ngiaroh leipa ta eina taopa tyh chi kha, reihkah nai kawpa tan a chho tyh chi ta, khizaw sôh nah piah ta a chalei thei leipa hluhpi na taopa chi ta, nâma vâta khizaw paritheipa sei tawh puapa ta hrona hmeiseihpa Bei Zisu Krista chhao ei vaw hnei ha hra. Keima châta na sôhzie pahno via rili na ta, nâma leipa ta daihti rei leipa ta chhao ei y a ru hmâ tyh. He tlai hema kyhpachâna ama vaw tah tyhpa cha. Ei viasa lôhkhyzy ta ama vâ-iapa ama vâ tyhziezy maochhie amâ chhih leiziezy pahnothai via rili na ta, kei chhao ei noh nata daihti zydua na kiah lia hmâh awpah ei khoh via rili.

              Khizaw sôh nah piah tam oh pathâhpa hlâta chhao ei tlaichhai viapa châ chi ta, nâma vâna heta kyh totie lia ei thathyupa ta hnabeiseihna hluhpi ei vaw hnei. Nâma châ palysa awpah he ei maohphaohna lai chaipa ta pachâ na ta, nâma he khizaw liata ei ryusôh chaipa na châ. Hmo hluhpi rairuna a chatôh papua dâhzy, a taodâhzy khâ na chho hualua tyh chi ta, khâpa rai ei chô lia vaw tlô hra sala palôh apao thai kawpa ta khâ pachhuahpanoh hr’awpa ta cha eima chareina khizaw muarua cha chô Khazoh ryhraona pahnothai a ru bao cha la. Phusâ taka tlaichhai lei awpah ta khâ na pasyu hualuatuhpa, eima duasu liata khâ aly thlâh ha awpah na tahtuhpa, ei khizaw, ei ryusôh chaipa hawhta ei vaw pachâ ngâpa cha ma khizaw sôh nah thih tlaichhaina vâta tlaikao satlia lâ na tleisai ha chi. Cha keima dyhchhie saw a tao ru bao cha, khizaw thiehpa ei vaw hmâh dyuta khiamaw ei vaw tah ngâ no ta cha a tao ru bao cha, khâzia e ei chô liana heta he hmo he na tao thlâh haw.

              Rairuna hry tawhta a chatôh papuana dâh hluhpi na chho taraw chi ta, he deikua atao rut a, pahnothai hra va na. Ei pachârôh noh zy, ei ly noh zy nata ei bierupazy ahymaw ei chho khao vâ tly, khâzia e, heta eina tleisai thlâh awpah tlai chi cha kyhpachâna eina pahmôsa chi. Lyuhbie eina hlâ zâ chi kha la ei pathipalôh keichheihpa ta ei hmia liana heta ei raithlih deita a bie. Y n’awpah dâh pahnothai ru ta, khatlu ta ei palôh a pasa thlâh hapa kha hro awpah chhao ngiabâhna hnei chacheita va na. Khizaw ahmâh heih n’awpah ngiarohna thata na bie ta, kheihta e viasa lôhkhyzy ei pakyh ngâh khao aw. Na chhôhso lôhpi cha kei châta khaw ha tlôh chi ta, kei châta hnôhlâ daihtizy cha raithlih palona dei châ ta, ei hmia lâ daihtizy cha ngiarohna nata lôhliena deita a châ.

              Daihti nah nohzy a vaw palie aw ta, kyh ei cha pachâna hawhta kyhpachâtuh hmeiseihpa a vaw tyh chi ta, cha tita la kyh ei cha pachâ tupa vâta noza hmiachhie, a nawhtawna châh  chhao pahno khao leipa ta ei y dâh zy, ei pielyu dâh zydua kha eina pahno khai thai hr’aw thlyu nahta ei pangiasa. Na vaw kua heih thei n’awpah ta khâpahmah ngiarohpa nata chipa hnei leipa na ta, châhrasala ei thaisonazy na lôh cha patlâh thei khao ngyu va na. Khatlu hmahta nâ haopa tan â dyuh hra la, ei chhôhso lôhpi liata khâ na y thlâh ha bâ aw. Hrochhôh akaolâh awpah aryh thai khao hra vei sala, na pasyupalina bie deikua khâ ei vaw thei thlâh ha aw. ‘Chô Khazohpa ta hmo eima khopa zydua miah pie khai leipa ta, a châhta la hmopha viapa eima hmô thei n’awpah ta rairuna athu viapa lâta miah â chhi tyh’. Cha hawhna chata ei chô liata na hmotaopa zydua he keima châta byhnâ a châ awpah hawhta tlao ei vaw pachâ aw.

              Tlaikao satlia dyhphapa saw kiapâh liata lôhhrâtlô kawpa ta charei ha chi ta, phusâ taka hmâpa ta cha daodo ngyu aw ta, hmo hluhpi liata nama paphasa kaw thei aw. Sâkha ta ei cha hiah khohpa la kyhpachâna sôh nah thih ta chaleisa leipa la, palôhpasoh kawpa ta pho hropa lia na hroa vaw hmâh la, Marapa na châna he lei beih tlôh leipa aw ta, pho hropa châta a mopâtlâhpa châ awpah achhuah la, na reih nata na chi he zakhei chachei ta khah y. Kei chhao Marapa ei châna hawhta chô Khazohpa kei châta Mara zuahnô eina pie cheingei’pah pangiasa na ta, ei chi nah pho châta phahnai vei hr’aw sala ei theina dâh hawhta ei reih nata ei chi pabohsa awpah ta hmah ei la lymâ hra aw. Mara satliapazy pi ta tlaikao satliapa ta a tao theipa cha tao thei hra pi ta, ama tao thei leipa chhao eima tao thei hrana tahpa he ei palôh a pangâna nata ei thlalôhna a châ.

              Achhâchaina liata ei cha chho khohpa la khizaw sôh nah piah nata hmiphapa he tlaichhai kawpa châ ha sala, nâma he cha tlaichhai leip’aw na ta, cha uahva chachei ta hr’aw va na. Châhrasala nâma tawhta kyhpachâna vaw puapa khata ei pathipalôh zydua pahnie ta, khâchâ angiabâh ha. Cha kyhpachâna muarua cha la aw! Kyhpachâna vâta ei kyhpachâ chaipa cha pasaih leina chôta lôhtlâh kawpa ta ei pathlie’pah a byuh thl♪1h ha. Nâna nata eimâ vaw chhaih tawhna khata kyhpachâna ei pahnothai via rili. Kyhpachâna ta lôhtlâh theina zy, pahnothaina zy, ngiachhiena zy, daotheina zy, zawngiahnazy eina pie. Hro hnabeiseihna nata tiamana hmo hluhpi eina pahneisa. Chô Khazoh ta he hmo zydua he ryhpaohna pha viapa eina pahypa awpah hawhta ei pachâ. Hmoto zydua vâna khata ei châ ly hmeiseih. Na sie lymâ n’awpah liata khokheina sâh chaipa ei cha hlâ. Ch’aw khiah atlâhpa ta mâpha bâ sy, Vâpawngia.

 

 

Nâma cha tlaichhai kaw tyhpa,

Sachhua Chozah

 

 

 

 

 

“JEN! WE SHALL MEET

BEYOND THE RIVER”

 

~ Samuel Hnaihly

                

                                                                       

 

Bei pihna daihti cha a vaw hnia bâ kaw ta, nô nata pawzy cha sawnawhzy Krisamâ chyhsia chalei awpah vâna chata atymâ sai kaw ei ta. Keima chhao Krisamâ holiday eima râh lâ a kaw hmâh na ta, ei kaw tlô zâ cha khih liata Krisamâ carol amâ hmâh zâ châ ta, nô nah paw, satlia nah laihsa, hawti-machâ taihta krisamâ carol awpah ta a pachhuahpanoh sai kaw ei ta.  

Cha zâ lôhlie a chhih kawpa liata thlâpâ khaihpa tlai cha ei palôh na palie kaw ta, ei chhôhso he a rua kawpa ta ei pahno. Ei kyh pachâ hmiatua chaipa cha a thei kaw na ta. Anodeikua, dyhchâ khôpheih eina kiah sai tawhta cha a thei ngâthlâh awpah cha khoh muarua hra leipa na ta, ei niedonazy bâhsaipa ta ei vâ-ianô vahpa hlâta achu sâh via awpah ta, ei theina zydua papuapa ta ei hmotaopa liana chata ei palôh saoh thlâh ha na ta. He bie he hrokhei awpah achhuah na ta. “Na ku hriapasana thei cha nie tlôh aw chi ta; aly ngaitapa ta y aw chi ta, palôhtlâhpa ta na y hra aw” (Hlazy 128:2 )  

Ei ngaizy ei si khai tawhta Christmas carol awpah ta eima syna opi nawh kawpa tawh na chata keima deita ta pua na ta. Carol cha Achhyna o tawhta pathao ei ta, paphasa kaw sai ei ta, lôhlie â chhih ngaita. “Laihlâ hrozy khiahlô tlâh hr’aw vâ ma, lôhpasa ta eimâ chhaih chiehpazy kha, vâ hr’ei sihla vaw kua thai châ tlôh ei va, Beipa khiahlô na pangâ la” tahpa Christmas hla cha hawti machâzy ta vaw sa eita, ei palôh â lie ngaita. Carol chhôh zydua cha ei laihlâzy hry liata hmah a pahlaopahli hoh leipa ta, keima deita awh hawhta viavi laih na ta. Ei chhôhso liata phaohrinazy he tilih liata thy thaipa châ mawh sala, Beinô chavah liata tilih âthu chaipa Rôhsiarô liata thy khai h’awpah eina khoh.

Dawh 11 a vaw hnia laih ta, ei hohnazy ta tloh thlâh ha hra sala, ei yruna chata mohropazy hnohta y awpah cha â ryh ta khao leipa ta, o lâ adi awpah ta ei palôhzy tao na ta. Azâ pahieh na ta, keihkha keihno za chakâ hmâ na ta, chanô pakha chhutlapa liata azu laihpa hmô na ta, ei pahno beih leipa molâh dizuah vaw châ ta, ei nâ!!! Cha nota ei hmo hmôpa vâna chata, ei mokhaoh ta su hropa lâ moh thei khao leipa ta, moh thei awpah vaw châ hapa rai châ sala, moh khoh pyly va na. Abeipa ta ei kârupa châta khiahma eina vaw tuapa tahpa pachânazy cha vaw hnei khai hmâ ha heih na ta.

Alei liana heta vâlyuhchâpa siapazy chhao he ama vaw y tlai khiahma tahpa pachânazy cha thata a vaw ngia ta, ei laihzaolaona râh liata, Mara chhivaw he tlupo ta chhithaipa ama vaw y aw tahpa rai pachâpha beih va na. Eima mo nata mo cha â tyh ha ta, ei no chhao a za kaw. Anodeikua, su hro lâ ei mo pasie awpah khawh pasaih leipa na ta, vaw pasaihpa rai hmah châ sa la, pasie pyly va na. Mongyuh nah ta Kyhpachâ he (Love at first sight) eikha a hmôna liata a pih theina ama tahpa kha â do thlâh ha khiahma i tahpa pachânazy chhao thata ei za hnei tyh.

Bie reih leipa ta eimâ moh ngâthlâhpa cha â supa ta pahno leipa na ta, â su leipa chhao rai hmah châ sa la â supa dâh hawhta apyh awpah ei chhuah. Anodeikua, eima yna lâta chyhsa amâ vypa vâna chata, ei ngâh leina chôta carol cha a hlao chy awpah ta tlao hrua na ta. Carol p’enawh hnohna chata carol laih lymâ ha hra pi ta, chhutla chakhâ kiah/chô hr’ei sih la, maniah ai vei. Seven wonders of the world liata chhao âhlaopa, Great Wall of China seih kawpa a chô liata hmah ahli patlô awpah châ sala, eichhiana hnei leipa ta ei hli lymâ thlâh h’aw. Cha zâ ngiatlâh a châ kawpa cha alypa nata thaphapa ta a hmâh khoh pi ta. Cha zâ cha mobile phone nubyzy a hiah pi ta, thâtihzy cha mobile tawhta a chho pi ta. Viasa pha kawpa vaw châ ha pi ta. A moh cha Jennifer a châ.  

Krisama programme nata kô thiehpa daihti cha a ly kawpa ta a hmâh khoh pi ta, ei lyna deikua a ki vei. Kô thiehpa khô khai tawhta eima y n’awpah dâhzy cha za rohpady na ta, khiahlôh rai za tlâh thei vei. Buakha khih liata a y chhôhta, kyh a vaw pachâ hmâ ha tlôh pi ta, anodeikua, ano liata pachârôhna hih khâchâ a ypa ta ei pahno tyh. Hronazy la thlih eikha vaw pathli ta, hnaraohpa a pazô pathlah khai tyhpa hawh deita a vaw châ tyh.

Kô thiehpa khai tawhna chata a pahrâna su khihpi lâ cha sie pakhua ha awpah vaw châ bâ ta, keima chhao bypi râh lâ viapa châdi achuna lâ sie pakhua awpah châ ha bâ na ta. Delhi university liata MA (History) final exam awpah ngâlâh ei hneipa vâna chata sie awpah ei ngiaroh kaw nota chhao, keimasasyh ta thlah a palôh na ta. Eima palôhzy chhao âlie ngaita. Ei chuna ei patlôpata nahta ahnei awpah ta bie ataih pi ta. Chatanachata, ei rianainô cha Siaha khihpi lâ sie ha ta, keima chhao a hâta heihpa liata ei khihbôhpi cha achuna vâta puasai ha hra na ta.  

Mizôram to Guwahati Capital Travel liata ei sie nona chata ei palôh â lie ngaita, Nawh thlâpâ liata ei kyhpachâ nô Jen (Jennifer) ta a sie awpah chyta bie einâ taihpazy cha athei kaw na ta, “Keidao, eimâ hmô heih hlâ lei zydua ngâchhih kawpa ta ei cha vaw hâ aw, nâ chuna ngâlâh khawh vaw pachâ mah y. Keidao, eimâ hmô heih tita deikua la na siesai pakhua awpah ta la a hmô khao aw ma pi sy. Anodeikua, thinazy ta maniah a pachhaih khiahta la Vâpeih râh liata tlâ eimâ hmô heih aw, cha liata chhao na châta ei vaw y ngâthlâh h’aw Keidao” eina tahpa cha a thei na ta, ei chhuah lei pi ta ei mokhaoh tawhta raithlih vâpiati hawhta vaw loh ha ta. Zâmie 4:14 tlai cha ei palôh liata a vaw lâ kaw ta, “Mylâ khâpa a y aw tahpa pahno tlôh eichi va. Nama hrona cha khâpa e a châ? Tihu buakha a vaw lâ ta, a lei thlâh ha heihpa hawhpa he châ tlôh eichi ta.” Ngiaryh lei kawna chôta bus liana chata a ru lâta raithlih palo laih ngâ kaw na ta.  

Ngiaryh leina lai kawpa cha keima liata y ta, achhâpa cha a biereipazy kha yzie a hnei kawpa ta ei pahno vâta tlao a châ. Ngiaryh leina chôta Guwahati zy cha tlô na ta. Airport lâ thlai pangaipa ta, my dawh 8:30 ta Guwahati to N.Delhi a zaw awpah ta airport liata security check ei hnei ngâ nota phone vaw paro ta, ei bie theipa vâna chata EI KHIZAW VAW ZOH KHAIH HA TA, KEIMA RIANAI ROSE PAWPI HLÂTA CHHAO KHOH A CHHIH VIAPA CHA KHIZAW TAWHTA EINA VAW PUASAI HAW. Airport liana chata, pao na ta, buakha tawhta cha ei y tyhpa hawhta y pakhua ha heih na ta. Ei viasanô Jen cha Motor accident vâta khizaw tawhta keima nata a chhôhkha sawnawhzy cha maniah a vaw puasai hapa a châ.  

Ei viasanahzy chata, Guwahati tawhta motor na vaw hire-pa ei ta, eima râh lâ na cha a paraparôh kawpa ta kaw sie pita, MA (History) ei chu lâhpa khâsi paw ta na kaw zi pâ hra ta, A thi tawhta a mylâ zâlâ kariepa ta ei laihna râh khihpi Siaha su cha tlô na ta, a ri deikua o tawhta puakheipa ta thlâsu liata chyhsa hluhpi ta na vaw hâ thlâh ha ei ta. Nozana ta na vaw bie ha ta, anodeikua, Jen kyh pachâna vâ chata a ri thobyh lâ cha kei chakâpa ta pangai hnolo na ta, ei mohthlih thata vaw tla ha ta, a ri thobyh za pahy na ta, Jen hmi ei za hmôpa cha ei palôh a pasa ngaita, “Last kiss”cha ei chhuah lei pi ta ahmao saih kawpa liana chata zâ pahnâ na ta, he bie he hlâ na ta, “Jen!! Vâpeih râh liata eimâ hmô heih aw, chati ta la ahy thângiah leipa ta a kao khoh lah vâ pi.” tahpa ta a ri cha pathlie na ta. Mo hropazy nata ei chhôhkhazy amâ di khai tawhta, ei viasa Khâsi paw nata hnôh khawpa ta thlâ liana chata y pi ta, thata cha na ta, ei ao pyu deikua pua thei vei. Thlâsu tawhta ei kaw lie awpah chy ta, a thlâ liata Rose pawpi soh pâpa ta he bie he reih na ta, “Rianai, thlalôh kawpa ta va sie mah y, keila pachâ chhie a chhih va na, na hroh noh ta na kho chaipa, officer châ awpah hlâta chhao eina khokhei viapa chi, ‘Khazohpa chakaotuhpa’ cha châ cheingei awpah ei vaw chhuah aw. MA ei patlô tawhta Khazohpa bie cha ei vaw chu cheingei aw. Jen, Zawdâh chavah na va chaka tita, tilih panôpa nata âthupa liata la va chaka khah y, cha liata chakapa la ahyhmah ta pua thei khao tyh veih ei, anodeikua, eima Missionaryzy chakana tilih pasopa nata âphohpa liata va chaka la, Vâpeirâh liata aly kawpa ta va charei mah y. Nohchhâ noh ta Vâ Kâna hawka liata na vaw dy mah y” tahpa ta (keima thei khipa ta) lyubie hlâ na ta.  

Chatanachata, MA cha Abeipa baona vâta cha vâchhie kô liana chata vaw pachhâ thei na ta, cha kô liana chata Khazohpa Bie ‘Bachelor of Divinity’ a chu awpah ta bypi râh lâ cha sie na ta, ei palôh â lie ngaita. Aizawl to Guwahati Capital Travel Bus liana chata sie heih na ta, Silchar bypi liata eimâ râ nota Puhpa A. Thâzi hla phipa, Mara chhivaw chhie lei kawpa Mâsi B. Hrâsai ta hla a sapa “Heihleipaw” hla tlai cha he ei palôh liata thata a vaw lâ ta, “Za rohpadyna daihti khô chiehpa, ei kyhpachâ lôhdu (Jen) ei zâ thei tyh, ahmia hnazô rai ta y khao vei, pasaih leina chô mohtlei na châ sai haw, raihrao keichâ vaw kua thai khao vei.” Châhvâ vaw chhi nopi vaw lie, thosôh paw to vaw pawh chanei ei, ei kho lôhdu deikua paw chanei khao lei ta, HEIHLEIPAW eina thliesai haw.” Ei nahthlie khaipa cha mokhaoh tawhta raithliti cha za lo pâ ha ta. He bie he ei pakah tawhta kaw reih papua na ta, “Jen! We shall meet beyond the River (Chavah haosâ liata eimâ tyh heih aw JEN.)”

 

THE END

 

    

 

Source: Board of Mara Literature, MADC, Siaha.

 

 

 

 

 

 

 

 

 

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II