Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue June 2020



              Editorial

  

               Covid-19 chata paru viana lâ a pangai ngâ kaw khiahmaw tah awpah châ ta, eima râh India lia cheingei chhao paru viana lâ pangai laih ta, hri a kiahpa chhao ama hluh ngaita kaw bâ. He editorial ro hai no heta North East India chhao angia hnao ha hra ta, Mizoram chhao pakha ta kiah hrapa ta, anodeikua Khazohpa ngiachhiena vâta a tlâh kawpa ta thohna o a vaw puasai haw.

              Paopa hri, Covid -19 he eimâ pachyhparyh lei hlâta eikhapi ta thata vei thei pi ta, “Aveipa chhao eima râh liata ama hmô mâh leipa tlai cha, khâpa ma asohsi byuh tly” tah thlâh ha awpah châ leipa ta. Eima râh he cha, opa lyuhri, viasa richâh apakyh leipa ta a y thei leipa châ pi ta, chyhsa pakha ta hri a vaw vei tlai khiahta cha, buakha hlâta chyhsa hluhpi â pakia thei thlâh ha awpah eima châ.

              Chavâta, he paopa hri, Covid-19 tawhta eima mo pakha, eima chhôhkha, vaih, râh â boh thei n’awpah ta cha, eima mo pakha chyu asohsipa ta, sawhkhâ nata Task force zy ta ryhraona ama taopa maih reingiah kawpa ta zyh lymâ ei sih la, zawpi ahmaohpakhyna pachhuahpanoh leipa ta, leithei leipa tah leipa ta cha khôtho pua tlâ leipa he eimâ boh n’awpah ta avaihna pha chaipa a châ.

              Tawhta, Task force nah chhao he vaw duty parei kaw bâ sai ei ta, ama riezy chhao a thei kaw sai bâ aw. Ama thachhâ kaw bâ aw ta, he hawhpa daihti lia heta cha pathichhiezy chhao a vaw nao kaw tyh. Zawpizy chhao ta, keimo châta riethei rairuna chatôhpa ta azo vâ a duty pa ama châna pahnokhei thaipa ta ama reizy angiah ei sih la, reihkah pasapa ta miah ama vaw chhoreipa chhao ta, eima râh, eima vaih, eima chhôhkha nata eima  mo pakha chyu abohna châta a hriatuhpa ama châpa pahnopa ta, viarithô khohnazy hnei leipa ta, zana tlao eima palâsa lyhlia awpah a pha kaw aw.

              Achhâchaina liata cha, he covid -19 tawhta eimâ boh pazao lymâ thei n’awpah ta, Khazohpa lâta thlahchhâ tiama via lymâ ei suh u.

 

 

 

 

 

 

 

LAKHER MISSIONARY  5 PAZY

NATA NUHBY 5 PA

 

~Machâ HC. Dahlu,

Local Church, Khôpai

 

 

 

              Khizaw râh nano nanopa liata Missionary nahzy heta thâtihpha chho lymâ ei ta, Missionary hluhpi cha thâtihpha ama chhona su liata luh apabupa ama chyh kaw. Keimo Lakher Missionary nahzy deikua cha ama râh lâ kua khao leipa ta, Rev. Reginald Arthur Lorrain nata a chhôhkhazy deikua cha, marapa râh leilô liata a pabu awpah ta Abeipa Khazohpa hnohta thlah ama chhâna cha, a hmeiseihpa ta ama patlô haw.

1.                   Marpa râh leilô liata eima Missionary nahzy luh a pabu chiehpa nata a pabu mâh leipa 5 nahzy palâsa sih la.

1)                   Rev. Reginald Arthur Lorrain he marapa râh liata kô 37 chhôh chakaona rai hriapa ta, kô 1944 liata Saikao Mission Compound liata pabupa a vaw châ.

2)                  Mrs. Moud Louisa Ulander he kô 53 chhôh marapa râh liata chakaona rai hriapa ta, kô 1960 liata Saikao Mission Compound liata pabupa a vaw châ hra.

3)                  Mrs. Louisa Marguerite Tlôsai Lorrain he kô 60 chhôh marapa râh liata chakaona rai hriapa ta, kô 1968 liata Ludhiana Christian Hospital liata, a chakao tyhpa Abeipa Khazohpa hnohta â vaw pahâ haw. A rureihpa he Saikao Mission Compound liata pabupa a vaw châ hra.

4)                  Rev. AB. Foxall he marapa râh liata kô 49 chhôh Missionary raizy hriapa ta, kô 1977 liata a chakao tyhpa Abeipa Khazohpa hnohta â vaw pahâ haw. Saikao Mission Compound liata paziapa a vaw châ.

5)                  Pihnô Violet Louisa Anne he târi 16th April, 1938 liata vaw pih ta, atahmâ he kô 82 châpa ta, eima missionary eima hnohta miah hrolâhpa a y chhôhpa a châ.

 

2.             REV. R.A. LORRAIN TA AWNANOPA A PADUAPA MOH 5 PAZY :

 

1)                   Kô 1906 liata Lakher Pioneer Mission (LPM) paduapa a châ.

2)                  Kô 1960 liata Lakher Independent Evangelical Church (LIEC) moh bipa a châ.

3)                  Kô 1967 liata Mara Independent Evangelical Church (MIEC) moh bipa a châ.

4)                  Kô 1976 liata Independent Church of Maraland (ICM) moh bipa a châ.

5)                  Kô 1989 liata Evangelical Church of Maraland (ECM) moh bipa a châ.

 

3.             REV. R.A. LORRAIN TA AWNANOPA A PADUAPA MARAPA CHI 5, REH 5 PAZY:

 

1)                   Tlôsaih Siaha

2)                  Hawthai

3)                  Vyhtu

4)                  Chapi

5)                  Zyhno zy ama châ.

 

4.             LAKHER MISSIONARY NAHZY TA, AMA HMOTAOPA NATA BIEREIPA MY THAI LEI AWPAH 5 PAZY :

 

1)                   Rev. R.A. Lorrain ta marapa châta a hmotaopa my thai lei awpah cha, châhnawh A AW Y B CH miah a taopa.

2)                  Mrs. Moud Louisa Ulander biereipa, marapa kyh ama pachâna palôh liata a y ngâthlâhpa cha, khizaw adyuhpi einona, second world war daihti, missionary hluhpi cha ama râh lâ kua khai ei ta, “Keimo la kua thei ma pi, eima chyhsazy siesai thei ma pi, marapazy ama thin alia maihta tlâ eima thi hra aw” ama vaw tah.

3)                  Mrs. Louisa Marguerite Tlôsai Lorrain biereipa my thei lei awpah cha, kô 1968 liata pasana khiakhipa, cancer vaw vei  haw ta, Ludhiana Christian Hospital pangai khei awpah a châpa vâta atlâhpa ta marapa râh a kaw tlô thei awpah a vaw pangiasa khao leipa a châ thlyu aw, “Marapa râh alei 2kg na phaopa u la, ei vaw thipa chhaota ei ri pabuna thlâ a ry lâta marapa râh alei he vaw soh u la, na za pahniehsa muh vy, cha chata marapa leilô liata ei zia tahna a châ aw” a vaw tah.

4)                  Rev. A.B. Foxall hmotaopa rônah kawpa cha, Rev. R.A. Lorrain missionary hmiatua chaipa rai chhâhchabâhpa zydua vaw hria pazao lymâ ta, Bible he kô 1956 liata hmâ thei awpah ta a vaw patlô haw. Mawrâh Awnanopa zydua hry liata Holy Bible hnei tua chaipa Awnanopa eima vaw châ.

5)                  Eima Missionary hnôh chaipa Mrs. Violet Louisa Anne ta eima Awnanopa hnohta a bietapa rônah kawpa cha, “Eima mahnô nata eima mahpawzy marapa Awnanopa a paduapa a vaw chhaih hapazy he, keima ei thi hlâta a vaw pôhkha khai muh vy” a vaw tah.

 

5.             BIBLE LIATA SÂ 5 A REIPAZY :

 

1)                   Genesis 45:22 liata Benjamin hnohta chysia apatly awpah zo 5 piepa a châ.

2)                  1 Samuel 17:40 liata Dâvi ta, a chôchahrei chaba ta, chavah liata alô miapangawh (5) hmâpa ta Kaoliatha a thie sao.

Achhâchaina liata Khazohpa ta marapa chi nata pho a paduapa he yzie hnei kawpa ta a paduapa a vaw châ. Chi chyhnawh kawpa, a leilô thlâh ha awpah ta a paduapa châ leipa ta, phopi, Nation tlai ta a paduapa na a vaw châ.

Marapa he chi 5, reih 5, Missionary marapa râh leilô liata luh apabu awpah 5, Awnanopa moh 5 yzie hnei kawpa ta Khazohpa ta a paduapa Marapa chi nata pho awnanopazy eima châ.

 

 

 

 

 

 

Mara reih he

eima pasô lei vâ khiah maw?

 

~ J. B. Khaisia

(Mara Writer)

 

              Marapa sawzy pi hih, khâpa vâ sualuah tlyma a châ ha vâ ma, a pachu via pi, paru via rili ngâ khiah pi ma tah ngâ awpah eima châpa ta ei pahno cha maw! A chhâpa cha, Board of Mara Literature nata Mara Writers’ Club zy nata MADC Art & Culture Department zy ta, tiamapa nata phahnaingiah kawpa ta ama reihkah nata ropa ta nawh lao hmaopa hawh dâh deita, Mara reih aboh lymâ thei n’awpah nata a laiseih via thei n’awpah kâh châ khiahma tahpa ta, a châhta cha siehnao pâ ngâna chôta miah ama pachupahreih ngâna chô chhaota eima chhôh miah achha thei leipa ta ei pahno.

              A châhta cha kei, achuna liata thaina âsâhpa chhao a châ leipa bao hrana heta ei palôh a pasa kaw hra bao. Tlaichuh, Mara saw pi he chôpho lâ liata cha, reingiah kawpa nata a pachâpatie kawpa lyu kaw tlôhpa ta palôh lai kaw tlôhpa châ thlâh ha khiah pi maw tah ngâ’pah eima châpa ta ei pahno cha maw!

              Duah a pachâ pathi tua tlai ei suh u, eima mara reih padisao (assimilate)  thei awpah duasu liata aduah haipa he, zerusale kuh araopa paduapathi awpah ta hrohsopa Nehemia ta, zawpizy a hruapa hawhta, atanoh lia heta, keimo, mara zawpizy pi he, Board of Mara Literature nata Mara Writers’ Club zy ta miah hrua ngâ kaw ei ta, Izarei zawpizy ta, hrohsopa Nehemia hruana pachâ peimawhpa ta ama ku tha a patlô ei ta, zerusale arao hapa ama paduapathi heihpa hawhta, keimo mara sawzy chhaota eima reih padisao thei awpah duasu liata aduah haipa he pabohsa thei pi ta, eima palaiseihsa thei hra tahpa pahno thlâh hana chôta hnabeidy leipa ta, haih mawh tahpa ta lôraohpa ta hria lymâ awpah ta eimâ hruapa a châ.

              Chata tlyh, eima Siaha khihpi chhôh ei hlaihlâna nata athihpa ri ei kia ch♪1hta pathliena nata pabuna Programme zy ei hmô châhta, vaih thokha liata nata Local Church thokha liata Poster, sign board, programme etc.zy ei hmô châhta ei palôh eina pasasa kaw tyh bao! Kei, Tlôsaih-Siaha reih adopa ta a cheih thai leipa hmahta he tlu ngâsâ ei châ hraoh leipa tlai ta, Tlôsaih –Siaha reih acheihpa pizy tlai ta, Mara reih dopa ama roh thai leipa he cha a pei ei tah hleikhô ta, palôhpasa a pachhihsa kawpa ta ei pahno. A chhâpa ta ei pahnopa cha, amâ chu lei vâta nata veina (thapasana) hmeiseihpa ama hnei lei vâta châ sala ei pangiasa kaw.

              He hawh hra ta, ei palôh na pasasa kaw heihpa miakha hropa cha, mara râh chhôh (Nochhi Mara nata Notla Mara chhô) liana heta reih hmâpa Tlôsaih – Siaha reih, Zyhno-Heimâ reih, Tisi –Lôchei reih, Chapi-Ngiaphiah reih, Vyhtu reih, Sabyh –Tisi Ratu etc zy hmâpa châ via chai ta, he zydua he mara reih sai a châ. Anodeikua, Awnanopa – ECM, CCIM, MEC nata MADC ryureina ry liata nata Mara N.G.O liatazy cha, reihpipa (common language ) châta hmâpa deikua cha, “TLÔSAIH – SIAHA REIH” a châ. Châhrasala he Mara reih nano nanopazy eima vaw palâsa h’awpa zydua he eima pabohsa awpah nata palaiseihsa awpah angiahpa sai a châ tahpa eima pahno ngâthlâh ha awpah ei khoh kaw.

              Khazia sualuah tlyma, a pei ei tah kaw tyhpa miakha vaw reih thlâh ha tua sala, pamosana châta: Chapi-Châkhei saw ta, Tisipa ta bie achho sala, chapi –châkhei reih hmiapasah leipa ta, tisi reih ama cheihnao thlâh hapa zy, zyhnopa ta, a reih cheipa hmâpa ta a cheihnao awpah tlai ta, bie a vaw chhotuhpa reih ta ama cheihnao thlâh hapa he a phapa ta pahno van a. Eima reih cheipa tlai ta cheihnaoh tua sih la, ama thei vei ti deikua cha, â mo reih ta va cheihnao sih la, a phapa ta ei pahno cha maw! He ei vaw reipa (Pamosana ei vaw taopa) zy hawhta eima taopa a châ khiahta cha, eima reih cheipa eima zakhei tahna a châ aw.

              Chavâta, marapa nata marapa likawh biechho thâhchhona liata cha eima reih cheipa he hmiapasah lymâpa ta, eima reih athai leipazy pathaisa eimâ chhuah hri awpah a châ. Atl♪1hpipa ta cha, eima râh (Mara râh) lia heta, tahmâ no ta ei reithai kawpa khihzy cha, Saikao, Meisavaih, Siaha vaihpi, Tisi, Chhaolô, Tisôpi nata Palâ zy he ama châ. He khihzy he Mara reih aboh n’awpah ta aki liata atôh peimawh chaipa ama châpa ta pahno na ta, reithai tlâh châ ei ta, mopâtlâh ama châ hmeiseihpa ta ei pahno.

              Nochhi Mara lâ he cha reipachhie awpah ama ypa ta pahno leipa na ta, zakha liata zakha ta tao pha ei ta, ama reih cheipa chhao, matu, rakhaipa tlyma, hiakha-laizô reih ta padisao thei nahta pangiasa achhih leipa châ ta, tahmâ duasu liata cha, lôpanô hawhta a-ipa châ ei ta, khâchâ pabohsa pazao lymâ ei sala, ama palaiseihsa lymâ awpah he ama tao awpah ta ei raopa a châ.

              Reihchâ reizie nata rozie he achu chhyhpa ta thai theipa châ ta, ngiaroh muarua’pah a châpa ta pahno leipa na ta, mo hropa thai theipa nata pahno theipa cha, nâma nata keima chhaota eima tao thei hra tahpa eimâ thei ngâthlâh ha awpah ei khoh kaw. Thai tlai si, pahno tlai si tahpa eima khoh hmeiseihpa nata achhuah hmeiseih khiahta cha, Board of Mara Literature nata Mara Writers’ Club zy chhihthana ry liata a pha kawpa ta achu ei sih la, hlaotlohna khochhihpa hmô theipa a châ tahpa pahno suh vy. “CHYHSA DEI LEI CHA PACHU ANGIAH VEI”

 

Ei châ ly kaw.

TAULAI LÔCHEI

~ K. Pari

 

( He châpaw (Article) he Pihnô K. Pari châbu, “Hlâno Mara su peimawhpazy” tahpa tawhta lapachhuahpa a châ. Ed)

 

             

Lôchei khih apaduatuhpa he Lôchei châ ta, apaduatuhpa moh phaohpa ta khih moh he “Lochei” tahpa ta ama bipa a châ. Nochhi Mara khih liana heta Lôcheita, Lôcheipi nata Taulai Lôchei khih a y.  Taulai Lôchei râhchhôh liata (Salt) Alôh khaoh by nata Phaphiaby chhao tly pi ta, cha hawhna chata Pâkao chhao eima tly hra. Pâkao he eima Missionary ta Marapazy châta a mothlih a pathlana su, Beinô kiah liata ypa a châ (a eihhrâh ta Pâkao nata eima Missionary amâ pazaona thâtih ei roh aw).

              He su rachhôh he Tawle Lôchei râh châ ta, ama reina zie ta cha he ‘Alôh khaoh by kiah liata asi y ta, cha cha ‘Lôkhaoh si’ ama tah. Hlâno ta cha a yna su he râhhmâh chhohkaluhpa châ ta, pazu pavaw, râhsa chi to ngiaryhna su châ ta, cha thota asi yna a châpa vâta chyhsa thokha châta cha chahi-chaba achhih kaw ta, pasaiphazy châ deikua cha su ngiaryhchhihpa nata thapawhchhih kawpa su a châ hra.

He lôhkhao si he khahlâ ta cha a ti he la ei ta, ama ieh tyh. A ti liahsa a kua nahta alôh hly hawhta y ta, alôh hawhta ama hmâh tyh. He liata apahrâpa heta ama alôh taotiana dâh a rairu zie nata riethei â chhih zie a hmô nahta, a ngiachhie kaw ta, Vâsaih mâ liata a luah ta, “A hmi leipa eina pie khiah chi ta la alôhkhaoh si he cha pachhaih vâ ei na”, tah ta, Vasaih ta matu zuahnô cha hraipa ta, amâ lâ pyly ta a vaw luah heih ta, “A nakhaoh na kawh tu ha, a hropa na pie la”, tah ta, a hropa a pie khao leipa vâta cha su cha asi su lâta â lie haw. Alôh ti a suapa hnei khao leipa ei ta, ama nie’pa chhao y khao vei ama tah.

              Taulai Lôchei thâtih nata ama khih moh ama bina chhâpa Mc. Sr. Evan Khihkô ta a reizie ta cha Dawkei tlâh he Taulai tlâh châ ta, Vatlo Lôchei (Khihkô mapaw) ta Vasaih sietanô hnei ta, a puhpa Vasaih hnohta khihlô liata a lahpinô vâta khih a sa. Kô thôh a y tawhta khih (Lôchei) lâ alie’pa a chhuah heih ta, a puhpa Vasaih ta pasaih vei. Dawlei Choza (Tisy beipa a châ) he Vasaih unawhpa Matlei saw châ ta, a paw (uncle) Vasaih zy chhaota sukha liata ama y. Cha nota Taikua râh Taulai tlâh liata Vatlo chata khih a vaw sa tua. Taulai râh Dawlei nata Vasaih ta râh achhu ei ta, Dawlei râh a châpa vâta Vatlo cha Taulai tlâh tawhta a pasie ta, Deibau la â pasie haw.

              Cha Taulai tlâh liata apahrâ tuapa Vatlo cha Lôchei tawhta avypa a châpa vâta â vyna khih moh nata a yna tlâh moh Taulai moh cheipa ta ‘Taulai Lôchei’ tahpa a vaw châ. Cha daihti liata Pâkao liata Bungalow sa ei ta, cha aria-aipa ta (opposite) Beinô haosa lâta Bungalow hropa ama sa hra. British sawhkhâ ta râh â vao no châ ta, he su liata nochhi sawhkhâ nata notla sawhkhâ ta bie pachiana su ta ama hmâh tyh hra.

              Haosâ lâ Bungalow cha Ngiaphiapi mo ta za mohôh ei ta, heisâ lâtahpa cha Tylai Lôchei ta ama mohôh. He vâta eima Missionary nah chhao ama biebuapa vâta ama vaw tlô pâ ngâpa a vaw châ thlyu aw.

 ‘Lôcheita’ Nâpho Choza, Chapi liata â bei nota, Nâpho paryhsapa ta Zâhchei Zawtha he chapi mo ta abei châta ama kaw lachhi. Napho nata Zâhchei cha amâ ryh khao leipa vâta Nâpho nata a khihsaw ualua rô Thareby lâ ama pasiesai ha. Amâ pasiesai khai tawhta Zâhchei cha odyh dyh thôh dyhpali chhaota Sali liata khih ama za sa hra. Lôchei tawhta Beichai ta odyh dyh hrawh achhipa ta Tido tlâh liata khihchâ ama vaw zoh hra. Zâhchei nata Beichai cha khih ahnia kawpa ta khihsa ei ta, a hnôh lâta Tido tlâh nata Sathlu tlâh atyhna liata amâ pahlyh.

              Lôcheita khih moh a vaw puana he Lôchei tawhta ochâ avaw chôpa ama châpa vâta ‘Lôcheita’ amâ tah. Phaphe by he Beino haosâ lâta y ta, he su he Acres sâhno rachhôh by pha kawpa a châ. Leipalie châta pha kawpa a châ.              

              Lôhkhaoh tawhta 3:30 pm ta a vaw thao pi ta, Phaphe by lâ vawh pi ta, buakha Minute 5 rachhôh arâpa châ ta, thlai eima kei tlô ha. Phaphe by he Beinô kiahta liata y ta, cha su cha phei ta kei tly cheingei’pa eima khoh hapa vâta Beinô kei tai pi ta, eima kei tly ha tlai. A su liata buakha chô pi ta, nohthlahpazy a la pi ta, khih lâ thlai eimâ vaw lie ha heih.

              My khih vaw deih ta, avaw chhuanoh pi ta, maniah vaw pathliepazy chhaota vâro daihti hmâh heih pi ta, cha liata Mara hno nata poh eima  lapakhy khohpa cha Pala sopa tlaita ama sapa Lary poh zy, Laryteipa zy, Zai-ôh chei zy cha chalei pi ta, thokhapa deikua cha ama nohthlahpa la pi ta eima buabâ kaw. Phusâ hra vaw ri hluh leipa pi ta, he daihti no heta INR Re 1 liata Myanmar phusâ 15 ta eima ri.

              Poh chi nano nanopa eima lapakhyna chhâpa cha Mara poh eima hneina zie he Record khoh pi ta, a nothlahpa nata poh moh taihta ropa ta eima Record laih khaipa a châ. Liahsa eima pasia khai tawhta thlahchhâna ta miah pathlie ei ta, my dawh 7:15 ta Dawlei eima puasai.

 

 

 

 

 

 

VÂ-IA CHÂPAPHAOPA

(Love Letter)

 

~ H. Byhnadaorili (Andy)

Chhôchhôpaw vaih

images(13)

 

(He Love letter he, BML Love letter aropasuana, 2019 liata â vaw ngiapa hry liatahpa a châ.)

 

 

Khochai

 

              Daihti khô chiehpa liata ahy vâ-ia leipa ta ei lôhdupaw nâma nata eimâ kao khohna daihtizy kha rohpady tyhna...

Nâma leita hrona sôhzie chhao ei pahno pasia thai khao leina daihtizy liana heta, lôhpangâtuhpa chhao hnei leipa ta ei viavi tyh, he ei khizaw tawhna heta ei thlahpa nata ei pôhpa zydua heta 'A cha aw tyh' Hrona hlohzy ta na chhô ta, zohnazy ta na chahry ta, bohpi râhpathohpa liata hih ei pavia, zalâ nohtla awpah ngiaroh ngaitana chôta, ei pahrâna Opi chhôh tawhna heta, ei palôh heta vâ ngaitapa râh a hnei tyh. Cha râh cha ahy hro thâh ngiah lei ta nâma nata eimâ kao khohna tlâhzy a châ.... kha daihti zydua khawh na pahno ta tyh?

Ahy sikhôh riah chhao chi leipa ta, kypachâna pawti eima zyh nonazy khawh.... Na hnazô ngia ngaitapa nata, na reikah nai zualua khochhih ngaitapazy khata, ei chhôhsolôh pahnie chi ta,  lôh âdu ta atina râh liana heta, he chhaolei chô lia tlaina heta, nâ hawhta ei lôh nâ dutuhpa rai za y veih ei, khizaw chapaw athy a sâh hmah hnei thei hra aw sala, hnei va na, nâ hawhta kyhpachâpa, na kyhpachâna lyuhbiezy khata âchhuahna hluhpi na pahneisa tyh chi ta, hnabeiseihna thiehpa eina pie tyh chi lôhhdu, na hmô pha leina râh lia taih chhaota hih ngâchhihna bie eimâ taihpazy kha chahu pa-i tyh na ta, hnabeiseihna ta ei pakhaih sa tyh. Ei palôh chhôh lia heta kyhpachâna ta ryureih ta, dychhiepa saw hih na châ khaihna châ thei tyh hra vei sala, ei hnei chhôhpa chhao hih na châta la ipa chhao hih  hnei hra va na.

              Ei kyhpachâna he athu ta, ei kyhpachâna he zakhei chhih vei. Hmialâ daihti ei saina lia maih heta  'Ei saduthliena râh liana  heta'  A hneina viahkao aky khohpa ta, Khazohpa nata Awnano hmialia, lôh miakha phaohpa ta hrochhôh ta akao khoh awpah ta nata, thina ta miah pachhai hlâlei ta cha 'Tahpa bietaina hnei khohna chôta' cha daihti khochhih kawpa no cha saduthlie tyh na ta, ei hâ tyh. Daihti nata nohzy cha khô lymâ ta, daihti ta kôparohpazy siekhei hra ta, kô thiehpa hmia khochhihpazy cha vaw tlô khei heih, daihti he ti lohpa hawhta a siekhei lymâ. Tlô beih leina râh na tlô khei ha tawhta cha daihti ananopa hawhna chata, chyhsapa eima palôhzy chhao â nano lymâ hra ta, ngiachhiena, zawhngiana, âthlahsana, ngâchhihna ta chhôhmarihpa liata âzaona rai vaw hria thei khao vei. Ei saduhthliena râh cha naosia kawpa ta thlalâ hawhta na pakeichheihpa chi ta, chhaihna lyuhbie na hlâ chi ta, lailâh hro lâ na tleisai ha chi, a pasa......

Âchhaina cha palôhpasana ta ei luhlia mathlaw pazawh ta saduhthliena pachâna pha leipa ta siepasi ta, chhiesana a châna khizaw paki n’awpah ta  siesaipa ta ei y hra........ tahpa ta pachânazy na za pahneisa chi ta, cha châh lâ nata chavei lâ heta, hmo hraoleipazy ta nasy ta, hnôhlâ daihtizy sai na ta, lôhliena pathyu ta, ei lôhlienazy cha paina lâ hlâta paruna lâ saita pangai hra ta keima lei ta na hro nâ ly khiahta la ei ly, nâ ly n’awpah hela ei pachâ peimawh chai hi! ta tyh hr’aw sala, keima leita D' hro nahta namâ ly awpah deikua ei pachâ nata he cha ei palôh hih pasa ta, he pachâna vâ heta, lyna hnei thei hra va na. He ei palôh chhôh heta, na palôh hnei theituhpa chanô cha pasâhsa ta, uahva hra ta, ei hiatlia ngaita hra... cha hawhta pachâpa ta daihti khâ hmâh tyh hra na, eima hnôhlâ daihtizy kha vaw kua pathi thai heih sala, tahpa ta awpakhua tyh hra na, yzie rai y khao vei. Eima hnôhlâ daihti ei vâ ngaitapa râh kha tly chanei thei khao tlôh leipa aw na ta, hmoto zydua my achhuahpa ta palôh tlâh chhuahpa ta hmialâ pangai bâ hra awpah ta hnabeidypa nata thachhâ ngaitana chôta rairu kawpa ta cha siesai achhuah ha hra na ta..  ato lia maihta phana ta cha pasia na ta, kei chhao ei sipasanazy dua chhao hih khazoh ngiachhiena vâta my lymâ bâ hra na ta, nâ chhao hroly kawpa ta nata thaphapa ta na y lymâ hra tahpa thâzy chhao vaw thei na ta, châ ly khei kaw hra na ta, nâma lia ei piepasanazy deikua kha la na châ athei khi la pha vei.  Kei chhao ta a pei ei tah, ei hneina rakha ei kho nâ khi lei tu va hih, nâ hra cha pahnothai lei ta, chhaihna bâlia na cha-ao ha chi.

 daih bâ sy, hrozô chhâ lia ei châ chyu thei lei tawh cha lôhdu... Hiahvâ ryhrao leipa a châ thlyu aw. Keima hawhta kyh cha pachâtuhpa a vaw tyh la, ato lia maih Khazoh pahno na chô ta na hro â vaw hmâ la, khokheina sâh chaipa cha hlâ hra na ta, chana raithlih chhaota, a phôhpa hawh deita eima thâtih ei reih laih tyh awpah deikua he la, khiahlô na palie rili.. Atanoh taih eima hnôhlâ daihtizy kha mothlawpa lia rie ngâthlâh tyh hra sala, ti lohpa hawhzy ta khô khai ha bâ tlôh, a tlâhpa ta khô mah y...

MARA  REIH  

HMAHSIE  VIA   N’AWPAH TA

 

~ H. Beilaikô  Nôhro

New Colony, Siaha

IMG_5809

 

                                                                                                                                 

 

 

Eima  mara  reih  he  eima  pachâpa  hlâta  vaw  hneirôh  via ta. Khizaw  reih  pipa  Mongyuh (English)  reih  hlâta  chhao   a hneirôh  viana  kao  a  y  hôlô. Mohchho  sâkha  heta  hmâna  nata  yzie  nanopa  a hnei  hluh  ngaita  kaw. Cha  cha Mongyuh reih  ta “Homonym  Words”  tahpa  ta  ama  vaw  bi. Chazy  cha verb, Adverb, Adjecive, Auxiliary  verb  nata  Noun  zy  ta  hmâh  via  chaipa  ama  châ. A aony (Pronounciation) yzie  ta  chhao  â  nano  laih  hra. Cha  hawhna  chata  mohchho (Word) sâkha  â  paliepachhupa ta (reverse) eima  hmâh  tyhpa  hnei  hra  pi ta,  cha  cha  Mongyuh reih  ta “Palindromic  Or  Tanspose  Words”  tahpa  ta  ama  vaw bi  heih. Chazy  cha  vaw  moh  tua  ei  sih la.  

 

Homonym Words :

             

1.       Chi       : Chi  awpah  dopa  cha  Khazohpa he  a  châ. (Adj)

  Avâ  suah  hlâta  chi cheihpa  he  a pha  chai. (Noun)

2.      Doh     : Tî  a  doh.(verb)  A  doh  nata  a  hâh (Noun)

  He  hawti  he  hawti  do  kawpa  a châ. (Adj)

3.      Dyh     : Chief  Guest  dy  awpah  amâ  thao  haw. (Adv)

  Nama  khih O dyh, dyh  khazie  nama  pha ? (Noun)

4.      Moh    : A  mo  padei  â  ngia kaw. (Verb)

  Na vaw  moh  tuah. (Adv)

  Na  moh  a  hy ? (Noun)

5.      Hao     : A y  dâh ei  haopa  chi  a  châ. (Adj)

 Cha-aw  vaw hao  tua ? (Adv)

 Motor  a hao. (verb)

6.      Hoh     : A  sie  hoh vei  cha  maw ! (Adj)

 Sâh  a daih  ngâpa  he  a vaw  ho  tua tyh ? (Avd)

7.       Hmah : Rai  a  hriana  liata  hmah  â hmô  tlamaw ha. (Noun)

 A ma py  hmahlana  a pha  ngaita  kaw. (Adv)

8.      Hie      : Hie  patlana  cha  pôh  rilina  a châ. (Adv)

 Na  hie  a hâh  chakhyh  ngâthlâh awpah  châ vei. (Adj)

9.      Lyu      :Lyu    a  sie. (Noun) A nô  a lyu  thai  dâh. (Adj)

 Thei  theipa  kaw  lyu  tua  teh ? (Adv)

10.   Pie       : He  he  eina  piepa  a  châ. (verb)

 A pie  â  lyu dâh he  ei  khozie  a  châ  kaw (Adv)

11.    Paryh : Hla  a paryh. (verb)

  He  hmo  he  a  phata  ta  vaw paryh  tua  tyh ? (Adv)

12.   Rao     : Na  rao  liata  khâchâ  a chazei  ha  teh. (Noun)

 A  rao  lei  n’aw pah ta pakhâta  ta  soh  pha  teh. (Adj)

13.   Ru        : A ru  lâta khâpa  hmo  hmahta  na  tao awpah châ vei. (Adj)

 A hiahrina  a ru  tu  haw ! (Adj)

14.    Khai  : Thuakhai  na  khai  thai ma ? (Adv)

  Electric Current  a vaw khaih  ha. (verb)

15.   Kha     : Fit  kha  liata  kha  khazie  a y  aw ? (Noun)

  Âvi  khapa  hela  a  kha  tu haw ! (Adj)

16.   Khih   :   vaw  khieh  chy tyh ? (Adv)

 Khataih  khihpa  na  châ ? (Noun)

17.     Kia     : Tanoh  Office  na  kiah  aw ma ? (Adv)

  He  Colour  ta  eina  kia  khai  he  maw ! (Adj)

18.   Khoh  : Khoh  tiarâh  va na  chuh ! (Adj)

  Khoh  na    thai ma ? (Noun)

19.   Nohkhih : Chyhsa  nohkhih  kawpa  a châ. (Adj)

Tanoh  ta  nohkhih  y  dâh  hela  pha  vei ! (Noun)

20.  Soh      : Chyhsa  so  kawpa  a châ.(Adj)

He  liata  vaw  soh  thlâh  tyh. (Adv)

21.   Sa         :Saw  a  sa. Poh  a  sa. Hla  a sa. (verb,Adv)

 Sa  eina  vaw zâ  hra  ei. (Noun)

22.   Sy        : Chata  sy. Mâpha sy. (Adj)

 He  khaoh liata    sy  thei  aw   ma ? (verb)

23.  Tlao    : Ti  â  tlao  haw.(Adv)

  Tlao    di  thlâh  tua  sa y.(Adv)

24.   Thlao               : Tî  na vaw  thlao  tua  tyh ? (verb)

  Khataih  zuah  Lahpi ta  â  thlao ? (Adv)  

25.  Thei    : Ei  thei  thei. (Adv)  Ei  tao  thei (Avd)

  Thei  a  pahthei  ma ? (Noun)

 

 

Palindromic Words :

 

1.       Chakhie-chalie         :             Chysa chakhie-chalie  kawpa  a cha.

Chakhiehcharieh    :            

2.      Ku-phei                         :             A  ku-phei  â ki ma ?

Phei-ku                          :

3.       Pachhu-patlai         :             Pachhu-patlai  hra  tua  rai tyh.

Patlai-pachhu          :            

4.      Pahâpahô                     :             A Pahâpahô  thai  ngaita kaw.

Pahôpahâ                     :            

5.      Pachaw-paraw         :             A  pachaw-paraw  tu haw.

       Paraw-pachaw         :

6.      Sangai                         :             Ei  sangai  y  dâh hi  a do vei.

Ngaisa                         :

7.       Saliah-salô                  :             Ama unawh  liata a  salia-salôpa  a châ.

Salô-salia                     :

8.      Sie-chaw                       :             Unaw sie-chaw ama cha.

Chaw-sie                       :

9.      Zaotao                         :             A mâ  zaotaonazie  he  pahno  thai a ru.

Taozao                         :

 

Eima  reih  a  vaw  hneirôh  via  lymâ  n’awpah ta  cha  reih  hropa  eima lapangia  thai  kaw  awpah  chhao  a  peimawh ngaita. He  hawhta  reih  lapangiapa  he  Mongyuh  reih (English)  ta   cha ‘Loan-Words  or  Calque’  tah ei ta, Reih  pi  viapazy  chhao  ta  ama  vaw  tao  laih  tyh  hrapa  a  châ. Mongyuh  reih (English)  liata  chhao ‘Latin, Hebrew, Greek, French, Spanish’ reih  lapangiapa  hmô  awpah  a  hluh  kaw. Zâhnia tlia liata  Oxford  Dixionary  a pua  hnôh  chaipa  liana  khata  Indian  English (Hindi-English / Hinglish) cha   26 words  tlai  lapangiapa  a  châ. Cha  hry  liata  ‘Samvidhaan’  tahpa  reikah  cha  Oxford  University  Word  of  the  year  2019  ta  atlyhpa  a  châ. Eima  unawh  tlaikao (Mizo) penawh chhaota  reih  hropa thata ama  vaw  lapangia hra. Eg. Dailua, Chini, Phakar, mamuli, tahpazy  he  Via  reih (Hindi)  tawhta  ama  lapangiapa  sai  a  châ. Maicham, Tangka,  tahpazy  he  Bru  nawh  tawhta  ama  lapangia  heihpa  a  châ. Ama  reih liata  ama  hmâh  hluh  chaipa ‘Nuam’  tahpa  reikah  chhao  he  Py (Lai / Hiakha)  reih  tawhta  ama  lapangiapa  a  châ. Eima  chheipâh  liata  Py (Lai)  nawh  khihpi   Lytaih(Lawngtlai)  khih  moh   chhao  khi  Hiakha  reih ‘Lawng  ka tlai’ tahpa  reikah  tawhta  lapa  châ  ta. A  yzie  cha, ‘Balyh  ei  patu’  tahna  a  châ. He  hawhna  heta  reih  hropa  tawhta  a  yzie  â  lyupa (Identical  Connotation)  ta  ama  reih  chyu  lâta  ama  vaw  lapangia  tyhpa  he   mongyuh  reih  ta  Cognate  word ’  tlyma  Etymological  word’  tahpa  ta  ama  vaw  bi.

 Keimo  mara  reih  liata  chhao  he  hawhta  reih  hropa  lapangiapa  he  eima  vaw  hnei  pathao  laih  lymâ  hra.  Tahmâ  chhao  via  reih (Hindi)  tawhta  eima  lapangiapazy  eg. Chini, Alu, Pisâ, Mawzâ  etc. he thata eima  hmâh. Eima   unawh  tlaikaopa (Mizo) tawhta ; Chia  chia, nuam, enchhin, chibaih / chibeh   etc. tahpazy  he  thata eima  hmâh kaw  bâ. Tawhta la  eima  reih  liana  heta   a  reih  or  a chei (Speaking)  nata  eima  roh (written)  dâh  liata  eimâ  palyu  leipa  he  a  hluh  kaw. A pachaipa ta  H  hmâna  kyh  liata. Pakho  n’awpah ta ; Puhpa, pihnô, mahnô, mahpaw, chyhsa  etc.  tahpazy  he  eima  reizie  nata  eima  rohdâh  liata  alyu beih  vei. Eima  rohdâh (written)  lia  hawhta  reih  awpah ta  cha, Puh-pa  or  puhpa, pih-nô  or  pihnô, mah-paw  or  mahpaw, mah-nô  or  mahnô,  chyh-sa  or  chyhsa,  tahpa  ta  tlao  reih  awpah  a  châ  hripa ta  â  lâ. Tlaikao   reih  lia  chhao  ta  H  hmâna  heta  yzie  a hnei  lai  ngaita  kaw, Eg.  Chu  tah  chuan, chumi  ah  chuan, siaha  ah  chuan. He  heta  Proper  Noun  a  chânazie  a chhopasia  kaw. A  tlâhpipa ta  hmo  moh-chho (Noun)  zy  lia  heta  cha  H  he  hmâh  lei  awpah  â  doh  chai  aw. Eg. Hrochhua, Beizachhi.      

Tawhta  la,  eima  reih  liata  eima  hmâh  hlu  ngaitapa miakha ‘Samaw’  tahpa  he  hlâno  eima  manô  nata  mapaw  daihti  noh  liata  khitlâh  hmotaona  liata  a palypa-uasana (Community  Entertainment)  châ ta,  A-piah (Châhpia, Wrestling) ama vaw  hmâh  no  ta. Nâ    haw (ready) tahna  châta, “Khei, Chhei  maw, Chheikhaw, Seimaw, Samaw ” tahpa  ta  â khokheina (Wish / Warning) amâ  vaw  hlâ (pie)  tyhpa  tawhta  lapa  châ  sala  â  ngia  kaw. Ama  vaw  hmâh  tyhna chhao  chyhsa  pahnie  awpah ta  amâ  ngâpâpa  liata  ama  vaw  hmâh  via  chai.  Cha leipa  heita  A-thihpa  chyh-hu  sana  liata  a  thipa  puhpa  ta  a  vaw  hmâh  tyh  hra. Cha leipa  chhaota  Atheihna  hlâno ta  chhao  hmâh  tyhpa  hawta  reipa  a  châ. Khâpa  rai   châ  sala,  zana  palâsana  (welcome  or  Greetings  speech ) châta  vaw  hmâh  tyh pi ta,  tlao   a pha  kaw. He  hawhna  heta  eima  reih  tawhta  chhao  ta  eima  reihchâ (Literature)  palaipaseihsa  via  n’awpah ta  mohchho (Word)  eima  tao  pachhuah  laih  awpah  nata  eima  lapachhuah  thai  laih  awpah  he  hmopha  kawpa  a châ. He  hawhta  mohchho  taopa (Word  Composition) he  Mongyuh reih ta cha “Orthography”  tahpa  ta  ama  vaw  bi.   

Ei paw ta  eina  chho  tyhpa  miakha  cha, “Mara reih liata  ‘ie’  he  keima  ta  ei  baipa  na  a  châ  tahpa  vaw pahno  mah  y ” tahpa  ta. Eima  Bible  parohpa “Lorrain Version”  liana  khata  ‘ie’  he  hmâh  leipa  châ ta, ‘i’  ta  parosapa  a  châ. Pakho  n’awpah ta. Eg.  Ei  ie  ei  ie. Awh  ei  thie.  Ei    ei  zie.  He  hawhta  cha  eima  reih sentence  siezie  phie  â do  via  ha. A no  RA. Lorrain  he  eima  Alphabet  maniah  vaw  taopatuhpa  a  châ. Mara  reih  zydua  siezie, hmânazie  nata  achhuahna  ziezy  â  vaw  chu  khai  ha  tawhta  “Tlôsaih  reih”  he  reih  eimâ  hly  khai  thei  awpah “Common  Language ”  châta  maniah  taopa  ta. He  hawhta  reih  eimâ  hly  khaipa “Linguafranca” a  châpa  vâna  heta  eima  marah  reih  hropa;  Hawthai, Vyhtu, Chapi, Zyhno  etc.  reih  zydua  chhao  â  tlôh  khai  hr’awpah  nata  eima   lapangia “Inducted”  khai  thai  laih  hr’awpah  he  a peimawh  kawpa ta  ei  pahno. Cha  cha  Literature (Litteratura, Literratura in Latin) ta  â  chhuahpa  nata  a  châ  n’awpahzie  chhao  a châ. Chatanachata  eima  mara  reih  lapangiah  awpahzy  cha  a  aony (Phonology) nata  a  ao  paro  dâh (Phonetics) a  phata  ta  eimâ  chu  pasia  tua  tawhta. A mohchho (word) yzie  (Semantic) chhao  achu  pasiapa ta, eima  sentence  tao  n’awpah (Syntax) zie  nata  â  hmie  kawpa ta  eima  hmâh  awpah  a châ. He  hawhta  hmo  miakha  achu  pasia  laihpa  he  mongyuh  reih (English) ta  cha “Morphology”  ama  vaw  bi.   

 

 

 

                                                                                                    

                                                                                                                  

 

 

 

Mara reih rozie dopa

 

 

 

 

 

Lô (m)               : A hmah liata a y (noun)

Lô (r)                  : masu khih lâ a sie.

Lôh(d)               : A lôh a iah.   (noun)

 

Lu (m)               : Âlu ama chalei (noun)

Lu (r)                  : Amâ lu (paw ama hmô) (verb)

Luh (d)              : A luh a chaih (noun)

 

Ma (m)               : Â mana liata a khai (noun)

Ma (r)                 : A lahpinô a ma (verb)

Mah (d)             : Tao mah y (verb)

 

Mâ (m)               : A lâta a hmô (noun)

Mâ (r)                 : Lahpinô ama pie  (noun)

Mâh(d)              : Tao mâh va na (adj)

                            

Maw (m)           : Mawmaw ama nie (noun)

Maw (r)             : Masiah maw (noun)

Mawh(d)           : Tao mawh sy (adv)

 

My (m)               : Ei my haw (verb)

My (r)                 : My ta a vy mah y (adv)

Myh (d)             : Mawmyh a pathei (noun)

 

 

 

 

EI LIAHRI TLONA MARARÂH LIATA

EI ROHPADY TYHPA THOKHA ZY :

 

~ Mc. N. Pasua

Founder of Mara Film,

EX. Producer, DDK & PPC (NE)

 

 

              Eima khizaw hro he rohpadyna nata patipavyna sai châ ta, atei hnolotuhpazy ta mohphana nata hlaotlohna ama hnei tyh. Motherland, ei liahri tlona Marapa râh liana heta ei saduthliena thokhazy cha châhvâ nônai râhsa ta noh hawh azeipa hawhta khôkhei tyh hra sala, nopi a vaw lie ta, chhohhna uahpa-raohpazy tla khai ha ta, a cho thiehpa a kaw parâpa hawhta hnabeiseihna khizaw liata a vaw thieh rili heih tyh.

              Sâkha ta duah eima za pahripaziah heih tua sy.

 

1.                   NÔVAH AHNEINA LIATA : Hlâno manô mapawzy nata chô Khazoh hmo paryhzie he Marapa sawzy châta ryusôh chaipa a vaw châ. Mâchhao kyh cha eima Awnanopa nata MADC ryhraonazie tlâ châ sala, kei ta ei chhôhso liata ei paveihpa deikua cha AHNEINA NOH HIH. My dawh 11:00 Am pa ta ahneina dawh paropa châ ta, kupatuna apakhy bâh tawhta zâlâ dawh 3, 4 alyna kyhchhi pati dôhna eima hnei ha tyhpa hih. Siaha Town vaih nano nanopa tawhta sanawhrinôpa nata viasa rihchâhpazy nata chyhsa thokha miah alykhei awpah ta ama vaihzy â hla thlâ bao nah ta, ama rai zy, daihti sôhpazy paruapa ta â vypa châ ei ta, pati dôh hmâ khao leipa ta, miah adisaipazy, saihei â vaw chhih kaw tyh.

Ahneina dawh paropa he zâlâ dawh 1 : 30 Pm châ bâ sala, 2 : 30 Pm tawhta vaih hro lâ tawhta âvypazy pati padôhsa lymâpa châ sala, zâlâ dawh 3:00 Pm pa tawhta a vaih chhôh liatahpazy ta pati dôh lymâ hra ei sala, a pha via, âthlâzi via thlyu aw. Myuh nata myuhhneituhpa ama FAWR tyhpa hih. He he âhneituhpa chapaw châta hryuhna âbaichhapa châ ta, motor sâ 3, 4 nata bus sâkha châ pachâ byuh ta, dyhchhiepa nat khihsatôhtu rairu viapazy châta â ryh vei. City Park phapa Seramaidinô Park chhao hnei mâh leipa pi ta, circuit house, Dz tlâh nata tourist lodge liata a kaw hlaihlâ ta thopi tlâ va doh awpah ta cha amâ a rut u haw. Khizaw liata eima pahrâ chhôhta cha, zyhna chhihthatuhpa Pastor zy nata, politician zy he aki liata lô peimawh chaipazy châ ei ta, kupatutuhpa V.I.P chaipa pati nie hâ thei beih veih ei.

Râh so viapa lâta ama tao tyhpa hawhta vao phei sâ 1 chhâ la pie tyhpa a pha thlyu aw. Khihsa rairu viapazy chhao, Vaosa kg 2 chhâ cha pie tyh ei sih la â ngia kaw dia ! Râh sosâh viapa lazy cha coat, neck tie zy ama present tyh.

Marapa chanôzy ama sôh pachaina, mâchhao nata kyhchhina pakhâpa chi châ mâh thlyu aw vei. Chathota, kia zâ ta tourist lodge liata myuh nata myuhhneituhpa nata viasazy amâ rie tyhpa chhao he pha vei. Room 2, 3 chhâ hire awpah byuh ta, myuhhneituhpa chhôhkha châta hryuhna a baichhapa a châ. Room mâ hra ahnai tlôhlei khâhta.

Cha thota, myuh nata myuhhneituhpa chhôhkhazy kupatuna Achhyna –o liata viahpakao, poh â lyupa sai ta aky ta, chapaw nata chanô chhôhkhazy a eihpa ta atyuhpazy chhao â pha mâh mah pi, khati ta hmah English nahzy la â kho thei pyly thlyu aw ma pi.

 

2.                  EIMA SIAHA KHIHPI : Tihry kyhpazy nata  lâpi sinôpazy cha sawhkhâ biehneituhpa nata eima MADC sawhkhâ rei châ sala. Hezy chhao he palôhtlâh â chhih vei. Kei ta ei reih tyhpa cha eima khihpi chaipa châ ta, thotlâh khih tawhta zy, khih chheipâh tawhta zy, Siaha khihpi lâ vaw tlô ei ta, hri-iah pathaihna dâhzy alyu tlâ aw vei. 1) Siaha bazaar, 2) MST Stand, New Colony 3) New Siaha, 4) Siahatlâh, 5) Meisatlâh liata â pathaipahâna, ie-o nata pazôsâna-o a y leipa hih â ryh vei. Tahmâ cha Abeipa ngiachhiena vâta eima MADC sawhkhâ liata hriatuhpazy apôhziah kaw bâ ei ta, thokhazy chhochhi ta cha over staff na tah pâ ngâ kaw ei ta, taopa ta, duty tuhpazy soh bâpa châ sala, aly’pah a châ kaw aw. Ti â daih vei khiahta la eima su peimawhpa roh hiah pachhietuhpa na a châ aw. Chyhsa thokhazy nama tah ma? Eima leilô, eima ti nata râh, chavah chahaohzy he council sawhkhâ biehneina cha hrochhâ vei ma, chyhsa-hrasa nata khichhaizy chô Khazoh ryhraonazie hawhta vaw pôhziah via lymâ aw pi ta, 1) Bazar 2) New Colony 3) New Siaha liata Over bridge y thei bâ sala kho â chhih kaw bâ. Abeipa ngiachhiena vâta motor, vehicles etc zy vaw pôh via lymâ aw ta, eima hrona sôh kawpazy pabohsana nata, eima Siaha khihpi cheihchalotuhpa a châ thlyu aw. Eima town planning board zy kheihta pachâ hra tly?

 

3.                  MTP KAWPA TA SY : “Khazia ei reih ei pahlei aw, chô Khazoh eina piepa cha, pasô ei si â ngiazie, thlyutlia eima daihti chyu ta.”

 

Eimâ pôhpapakhyna su liata zy : Eimâ pôhpakhyna su liata zy hih, eima râhluh penawh khiah, eima zyhna chhituhpazy khiah, eima unawh penawh (MZ) nah reih sai ta maniah chhihtha thlâh ha ei ta, vâdua âchhih kaw tyh cha maw ! Political Party campaign zy, eima Assembly zy hih pachâpasia a byuh kaw bâ. A thei leipazy châta cha, a tlâhpipa HEAD LINE he tlâ chhopasia ei sala a pha kaw.  

              Chô Khazoh ta miah a piepa râh, reih, Hlabu, Biehrai, Rev. R.A. Lorrain hmâpa ta, Khazohpa ta miah a piepa vâta Mara Autonomous District Council eima, UT taihta miah tlôkhei awpah cha tlao châ vei mâ?

              “Pâpuh, Vailipaw Khazohpa ta nâma hmâpa ta Marapa sawzy thobuh lôpu achhypa ta eimâ theih tyhpa kha, khizaw pahnopa ta, chi pho ta miah taotuhpa, reih nata râh miah pietuhpa, na hnohta alynabie Marapa sawzy ta eima cha hlâ hmeiseih. Eima tlohleina nata sialeina vâta Marapa saw eimâ pachhaihpazaohna zy, râhri (boundary) eima pabuah khaipazy he maniah a ngiahthai mah y, India râh state laichaipa Uttar Pradesh liatazy khizaw hmahsie viapa England râh liatazy, Marapa râh padua awpah ta a thata tei hra ei sih la, hlaotloh beih aw ma pi, nâma hmâpa ta Khazohpa ta Marapa râh miah a piepa he eima pabohsa thei n’awpah ta eima Khazohpa hnohta Mara thyutliapazy maniah hiakhei mah y. Marapa râh leilô nata a chhôh liata pahrâpazy hnohta adyhna nata aryhna  charei sala, Zisu Krista he vaw rônah chai sala, palyupalihna zy, reithaina zy vaw to khai mawh sy.”

 

Politics liata : Eima râh luh penawhzy he, Marapa râh luhpa châ khao leipa ei ta, Party luhpa ama vaw châ khai bâ he zaw, a riethei kawpa vâ tlyma, talent hnei pha kaw hra sala, Party khokheina sai ta a bie thlâh haw bâ he zaw? Chô Khazohpa khozie la châ thlyu aw vei.

              “Pachâ teh u, chi chyhta châ ei chi ta, nâmo hlâta pho laipa liata chi pho ta ei cha tao ei hih” tahtuhpa ta kheihta pachâ hr’aw vâ tly?

 

4.              AWNANOPA : Awnanopa liata chhao diabola sâtâ khoheih chôna he bâh hlei vei. Politics lahpasu leina tawhta apanano khohnazy nata a pachhaihpazaohna khohnazy bâh hlei vei. Committee, ryureina liatazy site hnei chhieliepa ta move- na zy, â vote tyhnazy he eima Awnanopa riepathei ta, a pathu pâ kaw tyh. He vâna heta py apachhaihna zy, Local puana zy taihta a tlôkhei tyh. He kyh liata cha Puhpa FC. Minela hla phipa kha ei thei kaw tyh. “Thlahchhâ hoh kaw, lâh tiama kaw tlôh, hrozie liata hmô’pah y tlôh va, chyhsapazy nata opa lyuhripazy dyhryh thai tlôh va,” tahpa hla khawh. “Na khaihna cha chyhsa mohmô ta khaih se, mei-ôh cha bairy lia soh soh beih veih ei” a sona tôh liata tlao ama soh tyh.

Ochhôh liata pahrâpazy a vaw khaih thei n’awpah ta, tlâh laki liata kih ypa cha my thei’pah châ vei. Chatanachata, na khaihna cha chyhsa mohmô ta tlao khaih se. Ngiapâtuhpazy he khizaw khaih awpah tlao eima châ. Hla sâkha liata, “Zisu khaih awpah ta maniah tuah, sathaw mei-ôh zâ ta a khaihpa hawhta, he khizaw zohna lia khaih awpah ta, nâma nata kei eima yna su chyu ta”

“Areisipazy amah u â hieh na, khizaw ryu ama to awpah vâta, palôh pathaihpazy ama nohhlaona, Khazohpa ama hmô awpah vâta,” tahpa tlao châ se.

 

Marapa Thyutlia riahphapa Baal hmiakô liata pahkhupaneih beih leipa, vaw thyu bâ teh u. Khazohpa Vaili mapaw hmâpa ta, Marapa râh, reih, chi nata pho miah a piepa râh liana heta, adona, ngâchhihna, siana cha tihnawh hawhta nata vahpizy hawhta vaw loh bâ sala, eima patuapaluana achhuahna rohpadyna cha Mawmâ tlâh hlâta asâh viapa nata Palâ/salyuh tipo hlâta â thu viapa natal ô siarôpa, sâphao lôpanô hlâta cha karôh viapa tlao vaw châ bâ sala, tialaipi haosâ taihta khaih bâ hra ei suh vy.

 

 

 

 

 

 

 

Pachâthai ahawna

 

 

              Khizaw liata pasana hri chichhihpa Covid-19 a chareipa vâta eima Magazine, Hla nata Bie liata Puzzle cha vaw papya hnolo hr’ei sih la, raihpapua thei’pah a châ leipa vâta achhytuhpa vaw y leipa ei chi ta, achhytuhpa ama y leipa vâta atahmâ âchhyna chhao vaw palâ leipa eima châ.

              Atahmâ he Puzzle no. 45 cha vaw tao heih pi ta, Siaha khôtho nata School lazy eima vaw raihpapua hmâ thei khiahta la namâ vaw chhy heih chyu awpah ta eimâ hrua.

 

 

 

 

 

 

 

HLÂNO HLA NATA LÂ

 

~ T.A. Chhôhu

 

(He Châpaw (Article) he Puhpa TA. Chhôhu châbu, “Eima vaw pahno hra awpah ta” tahpa tawhta lapachhuahpa a châ. Ed)

 

              Hlâno hla nata Lâzy he arohtuhpa y hôlô ei ta, pahnona dâh deikua â lyu lei thei. A chyuta ta  vaw pahripaziah hra tua’ sala. Achyhta roh awpah  a phapa ta pahno na ta, ei vaw pahripaziah hra.

              AWHKHY HLA (Awhkhy hla ama sa nota lâpa ta a pazi pâ ha tyh):  Hlâno daihti liata Awhkhypa hla he khati daihti tawhta vaw sa pathaopa ma a châ, alaichadai a ru kaw. Siaha kaokâh lia cha Machâ thokha rei dâh ta, Siaha beipa KHAOTHA HLYCHHO (ano he Zany nata Bihmô paw a châ) abei daihti nota vaw puapa hawhta reina y ta, ATHIH HLA nata a vaw puana he â raohpa hawhta reipa a châ. He hla he ama sa pathaona khih nata reih hawhta “A ao” nano nanopa hnei ta, ama sa no daihti rei ta angia kaw sai ta, palôhlie a pachhih kaw sai hra. Pahno theipa rakha ta he aozy he a châ:

1.           Ao lâhpa

2.           Ngiaphia Ao

3.           Ngiaphia Ao (Sachhei)

4.           Châdy Ao

5.           Zipai Ao (Thiahra Zipai)

6.           Hnaro Ao

7.           Zipa Ao (Ao rariepa)

8.           Vaipa Ao

9.           Khocheinô Ao

 

              Vaipa ao he All India Radio liata khô (record) tua chaipa châ ta, H. Tholua nata a pyzy ta ama khôpa a châ.

              Awhkhy Hla vaw pua tuana daihti he alaichadaituhpa y hôlô ei ta, a siahliapa rei a ru kaw. Â hla via ta alaichadaituhpa HT. Philip (2nd Mara Literature Seminar Paper-1994), he a ualuata ta patly sih la, noh hro châta a phahnai nahta pangiasa â chhih.

              Awkhyhpa Hla he (Folk Song and Folklore) hla nata bie pitlohpa a za châ tarawpa ta hlâno daihti liata cha châropa nata reipa ta pasopa a y leipa vâta pakah ta ahlâ chhyhpa (pachhuahpa) a za châ laih. Â do chai awpah nata a zâ thaotôna siapa rei dâhzy a lyu thai tyh leipa ta, thata alaichadai hrapa ta machâ sahlaozy tawhta ei daopa keima chhao tlai ta ado via chai awpah ta ei pachâ vâta atahmâ he reih tua ei sih la:

              A VAW PUANA: Hlâno liana heta Chhocho beipa heta Matu râh lâ za tlyh ta. Matu râh liata vâropi a za châh tawhta â kaw liena lâ liata Lôchei nata Satly likawh liata Beinô chavah liata â rie nota (he daihti liata atahmâ ta Satly khih he y mâh vei) azo a mâ lâ liata reikah ama pathlie ngâpa he thei ta, he daihti nona heta Lôchei khih chao liata, chanô ano dei sai ta ariepa, saw aphaohpa he y ta, cha chanô thie awpah chata Lô Awhkhypa nata Kaukao Palepa ta hla ta bie amâ chhopa, ama hlasapa cha Chhocho beipa chata  a pahno (Lô Awhkhypa he Lôchei khih chao Beinô chavah liata ypa nata Kaukao Palepa he Satly râh lôkhaoh liata a ypa a châ). Lô Awhkhypa nata Kaukao Palepa heta he chanô thie awpah amâ chhuahpa cha bie ta ama reih khiahta cha he chanô amô thlâhpa he, â hra pathlei aw tahpa pachâ ei ta, hla ta ama sa khiahta deikua cha chanô heta pahno aw vei, tahpa ama pachâ vâta hla ta ama sapa a châ.  

Ama hlasapa he pha ngâsâ ta, palôhlie chhao â chhih kaw. Chatanachata, Chhocho beipa cha a kaw hra ta, thata pachâ pazi laih ta, khih lâ kaw siepa ta Hnaro liata Tlau Tlaupa nata Sawhmô cha hmo yzie liahsa a chho. Tlau Tlaupa nata Sawhmô chata Chhocho beipa ta Awhkhypa hla a chhopa hawhna chata Awhkhypa hla cha sa ei ta, ama kiahpâh liata chyhsa a ypa sahlao chata, “Cha cha khâpa maw?,” tah ei ta, cha tawhna chata chyhsapazy ta Awhkhypa hla cha ama sa pathao haw tahpa pahnopa a châ. He tawhna heta Awhkhypa Hla a vaw pih haw tahpa nata a vaw puana a châpa hawhta reipa a châ.

              He daihti he kô khazie ma a châ rei thei’pah châ hra vei sala, kô 900-1000 AD châ sala â ngia kaw. Marapa khihsa pareipa a y chhôhpa cha:- Hlaipao, Tlôsai, Lôchei, Hawthai nata Teisa zy ama châpa ta pahnopa a châ. Hnaropa deikua Kahnaupa, Lautupa hawhta reipa a châ hra.

 

              Awhkhypa hla he kheihta ama za sa pazao laih tahpa deikua rei a ru kaw. Ama hlasapa alâ kawpa miakha deikua cha–

              Hlaipao bôhpi tlâh a-na,

              Tlôsai ngalâh tla aw,

              Viasi puana thisô siena a za hno thei aw va na.

 

              He he â zâ lâ tuana hawhta reipa a châ hra. (P.13, Mara Literature Seminar Paper, 1994)

              Awhkhy Hlabie he ama sana su liata ama hlasa pahânazie hawhta phichhyh thei lymâpa châ ta, bie pha kawpa nata chhiepa chhao ama phi papua lymâ. A satuhpa hry liata ama reithai khohpa, reithaina, luh palaina chhao a phi thei. Pamosana: A liah liata alâhpa paw cha la pahmôhpi li tohpa na a lyu e.

              Ama sa nota chanô nata chapaw â i-âhpa ta atyupachhohpa ta a tyuh via chai ei ta, beitlâh phawpa chhaota amâ tyuh hra. Ama lâ patlapanô n’awpah ta Seih ki nata khoh ama hmâh via chai. Lâpa Awhkhy (pa) Lâ eima tahpa he Ao to lia momaih ta lâh leipa ei ta, lâpa nata â khy viapa ao liata ama lâh tyh. Chapaw he lâh via chaipa châ ei ta, chanô he cha lâh awpah ta pachâpa châ veih ei. Lâh awpah ta ama pathyupa chhaota a mohta ta thyu ei ta, amâ tyuh lilaw tyh. Awhkhypa Hla liata ao to he lâpa nata a khy hlei vei. Khocheinô ao ta ama sa no chhochhi la ama palôh â lie pachai khiah ma tah awpah ta ama mothlihzy pa-ô khaina taihta pahâh ei ta, Seihki pyu nata khoh pyu chhao a pyu azyzyh kaw khiah ma i!, tah thei’pah a châ.

 

              Sâhti Râchâ lôhry hawhta,

              Saw matlupa Rotia paw Laichhô,

              Tilipa paveina a lyu ……………..

              Seki sala khohchei nô y,

              ……… Rahmâ ei ziachaphanô y.

 

PHO LÂ HROPAZY

 

              Atahmâ ta pho lâ hropazy tahpa ta eima za rei awpah nata bipa he areihtuhpa thokha ta cha, “â! hezy he cha kheihta ma pho lâ (Cultural Dance) liata â hlao thai aw?,” eima za tah thei ngyu aw. Anodeikua cha Culture tahpa heta athai via penawh za reina yzie ta HLÂNO tahna ngâlâh he za dy leipa ta, daihti sie lymâpa liata chi nata pho ta a hmo taodâh (athla laihpa) anano laihpazy he tlao vaw châ hri ta, chavâta, atahmâ ta Lâ 2 (miano) eima za ropa chhao he Marapa pho lâ rairie, ama vaw lâ pathaona deikua a kô nata thla ananopa a châ eima za tah thei aw.

 

 

HLIHCHHY LÂ

 

              Kô 1971 Nawh thlâpâ kô thiehpa kyhchhi amâ hmâ khai tawhta Zyhno satlia nata laihsazy cha Tisi chavah lâ sie ei ta, he no heta ama chhihthatuhpa thokhazy cha Puhpa S. Tlachai chhaota Kahrie tlâh lâzy khypa ta Hlihchhy nata Hly-â amâ pakyh tyhna lôpu ‘CHHUAH PU’ ama tahpazy taih kaw tlô ei ta, he su tawhna heta lâ thiehpa (Lâ thiehpa tlâ tah ei sih la) he hmôpapuapa a châ.

              He lâ hmôpapuatuhpa he palôhliena hnei kawpa a châ thlyu aw. Cha leipa chhaota hlâno Marapa vâ-ia aparôhpa liata mohpathâh chaipa hawhta rei tyhpa Hlihchhy nata Hly-â lôpu zy, lahuah zy a kaw hmôpa vâta chhao a châ thei hra; he lâ he a hmôpapua. Cha dei châ vei, he lâ nahta akhy kawpa hla he a vaw phi hra:

 

Eima chareina tlâh ei sai châh ta,

Lailâh hrozy lôhdu (ei) chhôhhno ry lia;

Nâ lei ta khiahlô tlâh thei va na,

Hnazô vâtihria chyu lei nô y;

Khiahlô tlâh na n’aw pie la.

             

He hla palôhliechhih kawpa he târi noh 11 Nawh thlâpâ kô 1971 ta a vaw phi. He lâ he hmôpapuatuhpa Puhpa S. Tlachai ta Zyhno satlia nata laihsazy cha Tisi chavah raphyu liata pachu ta, he tawhta lâ pathaopa a châ. Zawpi mohmô ta lâ tua chaina (pamosana) cha Siaha Tlyliah liata châ ta, kô 1981 liata a châ. A lâ moh he Modern Sawlakia tlâ tah ei ta, he he Sawlakia lâ dâh chhâhchabi (step) nahta â lyu pâ vâta a châ thlyu aw. A hnôh lâta ahmôpapuatuhpa khozie hawhta ‘HLIHCHHY LÂ’ tahpa ta bipa a châ.

 

 

KHOCHEI NÔ LÂ

 

              ‘Beibei’ ‘Khohchei’ tahpa he hlâno Mara bei hry liata khihsa thei via penawh nata abei châ thathua leipa chhao, adaihkhyh viapa nata ‘kei’ atah viapazy ta cha tao thomo achhuahna hnei ei ta, ama vaw tao tlai hra thlyu aw. “Ano paw na Beibei ta khoh a chei” tahpa a y thlyu awpah châ ta, sawtliapazy ta pahno pha awpah ta beibei-khohcheipa deikua ama sôh kaw.

              He Beibei-khohchei noh heta lâ a y tarawpa ta ama lâ dâh yzie reih theipa y ei ta, mokhaoh ta ahmôpa deikua sawtliapa hry liata y thlyu’ veih ei. Alyna daihti liata lâpa a châpa vâta ama lâzie chhao Marapa pho lâ hropa hlâta cha â nano via nahta â ngia. Marapa heta ama lâ liata alâlua viapa Sawlâkia zy, Bei lâ zy hleikhôpa heta lâ hropa a y laih thei hra na tahpa pachâna chôta kô 1992 Saikao MTP Conference liata lâ papua thei awpah ta Puhpa N. Lybei, Siaha Vaihpi ta vaw hmôpapua ta, Siaha Vaihpi MTP Member zy ta Saikao khih liata ama lâh tua chai. He lâ he paropasyupa (Music) nata Hla chhaota lâpa châ ta, Zachia Chhachhai hla ‘Mawrâh nochhi Byma râh-ri’ tahpa hla pasasana chôta ama lâpa cha mo-ai a chhih vei.

              MTP Conference liata lâ tuachaipa a châpa vâta MTP Lâ (MTP Dance) tahpa ta pahnopa châ ta, daihti a vaw sie via nahta a lâ yziezy mopa ta kô 2014 Lyuva Khutla Organising Committee ta Lâ hmôpapuatuhpa nata MADC Art & Culture Department paryhsana ta KHOHCHEI NÔ LÂ tahpa ta a moh a thlah ha hra.

 

             

Zâ Beinô

Spencerian Sonnet

Rhyme Scheme : abab, bcbc, cdcd, ee

 

~ L. Beimokhai

 

 

Vâdei tawh vâtei khaihtuh zâ beinô,

Syna opi tawh sai ai thei leipa;

Sôh-malynô y, eima cha pasô,

Saihza châ pawmaihdi na vaw lyu na.

 

Awhsitlana taih na khaih tawh tly cha,

Ei chhôhso liah-nô laihna chhôhnoh ry;

Noh-ri hawh dinô meihkia va khai la,

Siali lyuhbie na va hlâpa mah y.

 

Vâchhohpi nata tôhkalôhpazy,

Pyury chhaota amâ vaw luah heih aw;

Cha ti lôhdua lei ta khaih lymâ sy,

Chariah hry lia siki taih khaih la naw.

 

Vâ-iahparôh châ rohpiti na châ,

Na khaihna meihthâhpi hawh pai beih khâ.

 

  

Source: Board of Mara Literature, MADC, Siaha.

 

 

 

 

 

 

 

 

 

 

 

 

 

 

 

 

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II