BML Issue July 2020

              Editorial

 

                 Eima pahno chyupa hawhta khizaw liata hri chichhihpa Covid – 19 a charei haipa chata, India nata Mizoram hleikhô ta eima râh, Mara râh tlai chhao â vaw ngiahnao haw hra. Mawrâh liata Cpvid – 19 a veipa pakha ngâlâh a y hai no kha cha zawpi ta chi ngaita pi ta, khôtho pua lei awpah ta sawhkhâ nata Task Force zy ryhraona cha ahyrai ta pachâ peimawh ngaita pi ta, khôtho a pua ngâhpa chhao y ma pi.

              No-âhchhih kawpa cha, atahmâ eima siaha kihpi lia cheingei a veipa ama y tawhta nata, mawrâh liata a veipa ama hluh tawh heta zawpizy aspohsina kyh liata tha thata eima padaopa lyu ta, a pei ngaita. He hri chichhihpa tawhta eima râh, eima khih, eima vaih, eima chhôhkha nata mo pakha chyu eimâ boh lymâ thei n’awpah ta eima maohphaohna a châ tahpa pahnopa ta, asohsi via lymâ ei sih la, sawhkhâ nata Task Force nahzy ryhraona za thaipa ta, ama rei angiah via lymâ ei suh u.

              Tawhta, chyhsa athai sopazy ta, “Khizaw liata hri chichhihpa a charei khiahta la, chakâhna ta a pazi tyh” ama vaw tahpa hawhta he chakaâhna a vaw tlô thei awpah tawhta eimâ boh thei n’awpah nata, chhôhto niebaw eimâ phahla lei n’awpah ta atahmâ hlâta eima tiama via a byuh ngaita.

              Lyu atao hmâ leipazy chhao pi ta, eima sahdô, o sahdô lia chhâta kheihawhpa chhâ ma tao chyu ei sih la, chhôhto ta eimâ tivy thei n’awpah ta thata eima hriapsa a peimawh ha bâ. India râh economic chhiezie pahno khai pi ta, eima yna state Mizoram chhochhi cha Centre sawhkhâ ta a chyhpa deita tlâ châ pi ta, india ta rairuna âtyh tlai khiahta cha mawrâh liata a pahrâpazy châta chhochhi cha khatluta ta eima rairu aw, tahpazy pachâpasia ei sih la, sasyh ativyna he eima palôh liata lai chai bâ sala tahpa kho â chhih hmeiseih.

              Eima siaha khihpi chhochhi cha, hâta ei 2 tlai lockdown a vaw châ thlâh hapa cha, siaha khih lioata sahphâ chalei awpah rai vaw y khao vei. Chavâta ativyna he sawhkhâ maoh ngâlâh châ leipa ta, moto maohphaohna a châ tahpa a thiehpa ta pahno chanei chyu heih ei suh u.

 

 

 

 

 

COVID-19 UPDATE

(source : MoHFW & Worldometer),

as on 23.06.2020, 10:00 am

 

 

INDIA DUASU :

 

Hri veipa hmôpazie : 4,40,215

 

Athipazie : 14,011

 

Atlâhkheipazie : 2,48,190

 

A vei haipazie : 1,78,014

 

KHAWVEL DINHMUN:

 

Hri veipa hmôpazie: 91,92,309

 

Athipazie : 4,74,444

 

Atlâhkheipazie : 49,39,295

 

A vei haipazie: 37,78,570

 

----------------------------------

 

MIZORAM & ACHHEIPÂH DUASU

(Bracket chhôh liata a vei haipazie palâsapa a châ):

 

1. Bangladesh - 1,15,786  (67,529)

 

2. Assam - 5,586 (2,056)

 

3. Tripura - 1,237 (454)

 

4. Manipur - 898 (648)

 

5. Myanmar - 291 (85)

 

6. Mizoram - 141 (132)

 

Note : MoHFW-ta case thiehpa a update hmâ leipa a y hôlô thei aw.

 

 

 

 

India ta

adyuhna chhaichhi

 lâta hmah thata a la

 

CENTRAL SAWHKHÂ TA ARMY, NAVY NATA AIRFORCE TE 3 , CHARIAH CHHAICHHI CHALEI N’AWPAH  FINANCIAL POWER PIE PAPUA

 (Rs 500 crore per project)

 

India sawhkhâ eima tah aw tlyma, Central sawhkhâ chhao Defence lâ châta thata hmah ama la para ngâ kaw. Târi 15^th June, 2020 zâ ta Inia Pheisaih nata China Pheisaihzy Ladakh liata amâ pabuana vâta India Pheisaih 20 hrona pahlei tawhta cha eima nahkao charao ta, palôh liata khâ bie a reihpa a châ thlyu aw, Russia tawhta Fighter Jets 33 chalei awpah ta bie papuapa a châ tawhta Central sawhkhâ chata Indian Air Force, Navy nata Armed Forces zy chariah chhaichhi peimawh viapa/critical ammunition and weapons, per project liata Rs 500 crore hmâ theina financial powers ama pie haw.

Senior government official: ANI- " Indian Army, Navy nata Air Force zy financial powers ama chariah chhaichhi chalei awpah reizie ta Rs 500 crore  taihta hmâ theina biepiepa ama châ haw"

Eastern Ladakh, LAC liata ziza a tlô tawh heta sawhkhâ â pahy ngaita, Uri attack & the Balakot aerial strikes  Pakistan liata hnei khai tawh khata, Armed forces, Navy nata Air Force zy Financial power piepa ama vaw châ haw.

Balakot airstrikes khai tawhta Air Force zy ta amâ thôhkhei ngaita, Spice-2000 air to the ground stand off missiles, Strum Ataka air to ground missiles , air to air missiles zy ama chalei. Army zy ta Israeli Spike anti-tank guided missiles nata precision-guided Munitions , America tawhta ama chalei hra.

 

Biehnawh : Facebook, RALTHUAM LEH TUNLAI KHAWVEL

 

 

 

 

 

LOCHONA   DAIHTI

                                                                                                                                 

~ H. Beilaikô  Nôhro

 

He  lochona  daihti  sôh chaipa  he;

Ly palôhtlah  ta  hmâh  tyh  hr’aw  sala,

A sôhzie  pahno  thai  a  ru,

Kei thyutlia  lômaoh  paw  châ  heta,

Kô  hluh  châ  vaw  di  bâ  hr’aw  sala,

Daihti  sôhkhiahpa  he  hmâh  phahnai  thai  hlei  va  na.

 

 Vâpa ta  kua  heih  khoh  tyh  hr’aw  sala,

Awpa ta  vaw kua  thai  rima’ pah  châ  tlôh va !

Chhôhso   khiahlô  eina  paliesa  rili  tyh !

Aw !  kha  hroly  huasua  phana  zydua  ta  kha !

Za  my  beih  aw  va  na !  hrozô  chhâkha  lia  heta !

Nama  rohpady  beih  tlyma ? Lôhkhy-lômaohzy  saih  u.

 

Kheihta   ma  ei  hmâh  aw  vâ  tly..!

He  daihti   sôhkhiahpa   phasana   zydua  ta  hih,

Ahy  ma  na  vaw   chho  thei  aw  ei  chi ?

He  lo  haipa  Daihti-râkachâ  patu  thai  awpah  heta,

Hraoleipa ta  ei  pakhô  dâhdei  thlâh  aw  ma,

Hy  ngiachhietuh.!  palôh  sona   na  vaw  pie  teh.

 

Ei  Beipa  hnohta   tlôkhei  aw  sala,

Nohto  châta   pahnothai  novâhna  hiahpa ta,

Ryhrao  thaina  palôh  pathaihpa  ei  hnei  thlyu  aw!

Chata  vâdua  pachârôh  nôpona  khôkhâhpa ta,

Khotlyna   pathaihpa  cha  ei  hmâh  phahnai  thei  aw,

Ngiapachhi  ta  hnôhlâ  kua  heih  byuh  khao  lei  ta.

 

Âvyuh  nata  chiahchîzy  chata   pawh  chanei  tyh  ei ta,

Pavaw  nata  Râhsazy  chhao  ta  amâ  kao  pathi  heih  tyh

Chôthlahpinô  nata  Awhsizy  chhao,   ama  vaw  dieh  heih  tyh,

Chyhsapa  deikua  daihti  sôhpa  eikha  dei  piepa  eima  châ,

Chavâta  hy  Unawh,  pahlei  leipa ta  phahnai  khei  teh,

A ngiabâh  hropa  khâpahmah  hnei  khao  leipa ta.

Na  daihti  sôhpa  byhnâ  zydua  vaw  phakhei  mah  y.

 

 

 

 

 

UNAWH PAPANGAWH

PHÔHPA

~ M. Nyusô

 

( He phôhpa he Pihnô M. Nyusô châbu, “Nôpaw ryusôh Mara phôhpa” tahpa tawhta lapachhuahpa a châ. Ed)

 

              Zâkhano he unawh papangawh thyupa he y ei ta, ama chyhta no he ama nô ta thisai ha ei ta. Chatanachata ama paw ta lahpinô hropa hnei ta, a lahpinô chata a saw nah cha â hao ngâsâ thlâh ha ta. Ama paw lyu lâ sie chhôhta Cheihchâlô cha a zia hnie a ziahnie tyh ta, ama paw a vaw tlô pataw nah chata, “Na saw nah hih ama molei zie vaw moh tua teh, na sie chhôhta Cheisiah ta na siah tyh ei ta, ei hmahzy a y khai ha hih”, tah tyh ta. Cha pataw nah ta ama paw chata ama saw nah cha ama nô biereipa cha â do nata do lei chhao pasia leipa ta, thata pazei/tu tyh ei ta. A sawnah deikua chata khâpa hmahta reih ngâh tlôh leipa ta â chalih thlâh ha tyh ei ta. Ama nô deikua a ru lâ chata a palôh â eih kaw tyh ta. Ama paw deikua chata cha hawhta ama nô ta a dôvei tyhpa cha pahnopha tlôh leipa ta. Chatanachata khih a vaw deih heih nahta, ama paw a sie chhôh chata cheihchâlô cha â hnieh heih ta. Ama paw zâlâ a vaw tlô pataw nahta, “Na vaw moh heih teh. Nâma na y no he na chi pakhei kaw tyh ei ta, na y lei pataw nahta ama unawh ta abaopasupa ta na tu tyh ei ta, chavâta ama unawh heta he o tawhta na papua ha lei khiata la cha ylâh thei khao aw va na”, tah ta.

              Chatawhcha, ama paw cha a nô he vaw po ngâsâ ta, kheihta ma ei tao sualuah aw vâ i tahpa ta thata pachâ ta. Hetana he la pha thai thlyu’ vei, lyurâhpa lâ siekhei ei sala, a ru lâta tlâ ei vaw siesai’ ei tahpa ta â pachhuah ha ta. Ama paw chata, “Ei sawzy saih u, a vaw chhuah teh u, lyurâh lâ pazu-pavaw abyh awpah ta sie ei suh u”, tahpa ta hrua ei ta. Chatanachata ama pawsaw sahlao cha sie ha ei ta. Râhhmâh viapa nata ahla viapa lâ cha siekhei lymâ ei ta, ‘atahmâ la kua n’awpah ama no â vâh khao leip’aw ta, ei kuasai thlâh ha bâ aw’ tahpa ta a sawnah hnoh chata, “He liana heta vaw y chy u la, kei cha hao liana hao ta Cha-ia va pahao tua sah y”, tah ta. Ahripinô he la ta, lôpanô chô liana chata soh ta, “Ahripinô y, ei saw nah ta eina vaw aw ei khiata la â vaw chhy mah y”, tahpa ta o lâ cha siesai syulyu ha ei ta. Chatanachata a sawnah chata a paw cha â vy hawh tah kaw ei ta, “Hy ei pâ y, â khy bâ ly”, tahpa ta awsao ei ta. ‘Ei pâ y’ ama tah pataw nahta avaw chhytuhpa y thlâh tlôh, ama paw a vaw di awpah cha y khao tlôh va a tahpa vâta ama paw yna hawhta ama pachâpa lâna cha vawh ei ta, “Hy ei pâ y”, kei tah heih ei ta. Ahripinô chata, “Y”, vaw tah heih ta, avaw chhytuhpa cha va moh bao ei ta, Ahripinô tlai cha tlâ vaw châ thlâh ha ta. “Nâ Ahripinô tlai he ma maniah a vaw chhy tyh hra chi”, tahpa ta Ahripinô cha diesao ha ei ta. Lyurâhpa cha ziahziroh thlâh ha bâ ta. Azo chhao vaw zoh daihmâ ha bâ ta. Chatanachata ama paw cha o va tlô ha bâ ta, a lahpinô hnoh chata, “Ei sawnah cha na reipa hawh tlaita ei thie khai ha ei khawh”, tahpa ta chho ta, ama nô cha a vaw ly ngâsâ thlâh ha ta.

              Chatawhcha ama saw nah cha ama paw hniehnôh chathô laihpa ta vaw sie lymâ ei ta, ama nozy cha vaw di kaw bâ ta. Chatanachata lâpi liata diahtizy cha vaw palie laih lymâna chôta khih cha vaw tlô ha heih ei ta. Ama nô chata ama sawnah hmi a vaw hmô pataw nahta hiehâh kawpa ta ama paw cha vaw rakhy lymâ heih ta. Ama paw chata a sawnah a hmô pataw nah chata, “Khazia nama vaw kua thlâh ha heih”, kei tah ta, a sawnah chata, “Ei pâ y, lyurâhpa liata nâma na y khao lei tawhta cha chi tlôh pi ta, eima no hra cha di kaw tlôh ta, chavâna chata na eima vaw kua haw”, tah ei ta.

Chatawhcha, Ama nô chata, “Ei chhôh dia ma pasa kaw, thohna na tluapa u la”, tah ta. Ama paw chata, “Kheihawhpa thohna ma na chhôh pasapa châta cha pha aw tly? na vaw chho la”, tah ta. Ama nô chata, “Awh pathi na paniesa u la a pha aw”, tah ta, a sawnah chata awh cha thie ei ta, a pathi cha paniesa ei ta. Buakha a y nahta, “Awh pathi la pha vei, I pathi na pie u la ei tlâh aw”, tah heih ta. Chatanachata I thieh heihpa ta a pathi cha paniesa heih ei ta. Buakha a y nah ta, “A pasa ha heih na, Paripi pathi na lapa u la ei tlâh thlâh ha aw”, tah ha heih ta. A sawnah cha â hao tu hapa vâta ama thi thei n’awpah lâthlôh a tluapa cha a sawnah chhaota vaw pahnothai kaw bâ ei ta. Ama uhthei chaipa chata, “Eima tâkô hra cha tiah tlôh va, chata tua ei suh u. Atahmâ cha thikhi-hrokhi eima pha ha bâ na, paripi cha siehnao ei suh u. Eima vaw thi hapa chhao a pha na, keimo châta la hro chhao tlaichhai a chhih vei hih”, tah ta. Chatanachata Paripi yna lâ cha thie achhuahpa ta sie ha ei ta. Paripi sie tyhna lia chata a vâ byh ei ta. Hetana heta hla ta aw ei ta:                  

 

“Ru ly ra ly,

Enua latle nô tla ô,

Chhôva va zaw lyu na ti”,

tahpa ta, Paripi cha a vaw chamieh-chamâ laihpa ta a khy ta. Ama uhthei chaipa ta kei chhawh achhuahpa ta Tâkô ahy pataw nah chata vaw palâ ha ta. A pazipa ta kei aw heih ta:      

“Ru ly ra ly,

Enua latle nô tla ô,

Chhôva va zaw lyu na ti”,

kei tah heih ta, Paripi chata vaw palâ ha heihpa ta, a pathôhna nata papalihna chhao cha vaw palâ khai ha heih ta. Ama unawh hry liata  aseihnai chaipa cha nôpo kawpa ta cha ngâ kaw ta. Châhrasala, chapawsaw ei thipa chhaota pei vei tahpa ta Paripi cha aw ha hra ta. Paripi cha a vy lymâ heih ta, vaw palâ awpah â chhuah ngânona chata, a rao liata kei chhawh chho ta, Paripi cha thi ha ta. Ama seihnai chaipa cha Paripi kiah liana cha atyuh ta cha ngâ kaw ta. Chatanachata cha su liana chata amô pâ ha ta. A mâ lâ chata baotuh awpah avâ lâ tawhta Pachhâhpa heta bie vaw chho ta, “E, chapaw hâtipa y, Paripi py liata na uhta nah ri kha la la, Hlachâhna chô liata soh khai ha la, chata va sie lymâ chi ta, lâpi liata Ti  na hmôpa maih hnohta, “Ti nâma he khâpa ta ma cha nie tyh?”, tahpa ta va hiahri lymâ la, “Pazu-pavaw to”, a tahpa kha la leipa la, “Vasi nata Vazô ngâlâh na na nie ei, tahpa ta châ vaw chhypa Ti maih cha la aw chi ta, vaw la/cheih aw chi ta na uhta nah cha na hiethlu aw”, tahpa ta a mâ lâna cha vaw chho ta. Ano chhao cha a vaw hra ha bâ ta, “Cha ei mâ cha dia ma â vaw nano kaw”, tahpa ta pachâ ta, “Ei tao tua rai aw”, tahpa ta a uhta nah ri cha thaohpa ta Hlachâhna pathaih kawpa liana cha pazia khai ha ei ta, hrona ti la awpah chata sie lymâ ha ta.

Lâpi liata Ti a hmôpa maih cha, “Ti, nâma he khâpa ta ma cha nie tyh?”, tahpa ta hiahri lymâ ta, “Zu to vaw to”, tahpa ta a vaw chhypa maih cha siepakhô lymâ ta. A chhâna liata Ti chata, “Vasi nata Vazô ngâlâh ta na nie tyh ei”, vaw tah ta. Cha pataw nahta Ti cha thaih ta, aly kawpa ta a vaw râkhei lymâpa ta a uhta nah ri yna su cha thlai vaw tlô ta. A mâ lâta Pachhâhpa ta  a vaw chhona hawh khata Ti chata a uhta nah cha kei thia lymâ ta. Chatanachata a uhta nah cha ‘Hâthih, eimâ môkua’ tahpa ta kaw thyu khai ha heih ei ta. A seihnaipa chata, “Khâpa a môkua cha ma nama reih?”, tahpa ta hmo ydâh zydua cha chho khai ha ei ta. Paripi pathi cha la ei ta, ama nô o lâ cha hawti chaipa chata kei soh sala, a vaw tlô heih tita cha o lâ kua khao leip’aw pi ta, râh hro lâ siepa ta khih eima padua ha hra bâ aw, lahpinô chhao hnei khi eima pha khai ha bâ na, tah ei ta. Ama seihnai chaipa chata Paripi pathi cha o lâ a ru lâta va sohpa ta thlai a vaw lie pakhua ha heih ta. Chatanachata ama nawhtapa a vaw tlô pataw nah chata khih padua awpah ta râh hrolâ cha sie syulyu ha ei ta.  

Râh pha kawpa he kei hmô ei ta ‘He liana heta khih cha eima  padua aw’ tah ei ta, cha su liana chata thokô-rihkôpazy cha vapa ta Ohmo-lyuhmo awpahzy cha pathai ei ta, khih cha sa ha ei ta. Nie’pah ama hnei leipa vâta lyurâh bia cha nohchareih ta chao ei ta, cha cha ama vaw nie tyh. Chatanachata Bia ama chao pâ chata pavaw â byh ei ta, Vachhuh ama siapa daoh liata Sâhho cha pachô lymâ ei ta. Chatanachata lyu cha vapa ta Vachhuh daoh liata Sâhho cha tu ei ta. Sâh â vaw daihpa chhao cha nie’pah pasaih leipa ta pachô lymâ ei ta. A chhâna lâ cha Bokai hmokha tlai vaw tloh ha bâ ta. Lyu liana chata tu heih ei ta, kô chhâna lâ cha hykha vaw pavei ha bâ ei ta. Ama unawh papangawh chata kyh a pachâ kawpa ta ama rei â raoh kawpa vâta vaw hneirôh kaw bâ ei ta. Chatanachata ama lyupâh lâ cha Pavaw â byh tyh ei ta. Amâ byna châhki ta, “Ei luh hmahta siah lah chi, ei saw hmahta siah lah chi”, vaw tah tyhpa he y ta, chi ngâsâpa ta a vaw râ ha tyh ei ta.

Nohkha cha ama seihnai chaipa heta, “Keima ta he pavaw he ei thie tua rai aw”, tahpa ta lyupâh lâ cha pavaw abyh awpah ta vawh ha heih ta. Cheisiah a kei sia pataw nahta, “Ei luh hmah siah lah chi, ei saw hmah siah lah chi”, vaw tah heih ta. Ano chata, “Na luh siah hr’aw sa, na saw siah hr’aw sa”, tahpa ta a chhy ta. “Tu awpah na ngâh ma?”, tahpa ta avaw chhy heih ta, ano chata, “Tu ngâh hra na, thie ngâh hra na”, kei tah ha heih ta. Thatupi cha za chô ta, â tu chaimâh ei ta, a chhâna liata cha Thatupi cha pahnie ha ei ta. Thatupi chata, “E, eina pahnie ha chi na, ei hrona chhâ la rie na pahlôhpa mah y, Seihkingialâh cha pie lah vâ na”, tah ta. “Chakhiata la na pie ha tua teh”, tah ta, vaw pie ha ta. “Chakhiata la na khopa maih na aw thei aw na tah chi ta, vaw aw tua s’y, ‘Sa a vy la”, kei tah ta, Viakua sai a vy ta. “Sa a vy la”, tah heih ta, A vo sai tlâ a vy tah ta. “Khazia eina dôvei chi? Ei cha thie h’awna”, tah ta, Thatupi chata, “A hropa ei cha pie aw, ei cha pie chhei tlamaw ha na”, tahpa ta a pha viapa cha pie ta. A khopa a awpah maih cha vaw y lymâ thlâh ha ta.

Thatupi chata, “He he cha pie aw ei na ta, Bei nama Beina daihti lia deikua cha tlyhmia, Raki pathlao liata vaw soh aw ei chi ta, Kahrai vaw tah aw ta, ‘Cha cha khâpa maw?’ ama vaw tah khiata la, ‘Kahraipa bao na’, nama vaw tah aw”, tahpa ta chho ta. Seihnaipa cha chapu lâ cha khy ta a uhta nah cha Buarapi Leihnge cha pahmô ei ta, âmo chhao cha a ly ngâsâ ei ta. A uhta uhthei chaipa hnohna chata, “Â uh, lahpinô na khoh khiata la ei cha hiapa aw”, tah ta. A uhtapa chata, “Ei khoh kaw na”, tah ta. Chatanachata ama zydua ta aki khai awpah ta chanô papangawh cha aw ta. Ama hry liata a hmipha chaipa cha Meimyh hnia khai ha ta, a vyhkaluhpa ta a duah thlâh ha ta. Chatawhcha  a unawh penawh cha aw ta, “Â uh saih u, lahpinô awpah nama khopa chyu avaw tlyh teh u”, tah ta, a uhta penawh cha aly ngâsâpa ta ama khopa chanô cha a vaw tlyh chyu ei ta, a chhâ chaina liata ama seihnai chaipa cha a vyhkaluh thlâh hapa kha, “He he keima sy”, tah ta. Ti ta pasi pasi ta a vaw puakhei thlâhpa cha a hmi he vaw pha ngâsâ thlâh ha ta. A uhthei chaipa chata, “Seihnai, khazia eina chho vei chi?”, tah ta, a seihnaipa chata, “nama khoh lei chaipa ma ei tlyh ta, ei vâhneipa tlâ a châ hra khaw”, tahpa ta a chhy ta. Chatanachata ama khopa maih sôh nata thih awpapua lymâ ei ta, rai chhao hria khao leipa ta thadâh kawpa ta khihsa ei ta.  

Cha kô liana cha a paw nah khih he chakâh ngâsâ ei ta, lyurâhpa bia he ama nie chaipa châ ta. Nohkha cha ama nôvah ta Bia chhiana lâ sie heih ei ta, ama nô chata, “Ei chai pasa muarua cha la”, tahpa ta â kaw duapa cha mahthi lâta mei khaihpa khih za hmô ta. Ama paw hnoh chata, “Eima paw, Khu liata mei khaihpa na ei za hmô, zu la kâhsâ za zyh thlâh tua teh”, tah ta. Chatanachata ama paw cha mei khaihpa za mo pady laihpa ta sie lymâ ta, khih tlô daihmâ tawhta khih cha za sai ta. Cha no chata ama unawh hry liata seihnai chaipa chata kaw hmô ta, a paw a châ nahta a pangiasapa vâta tlâh pa-awhsa ta, “Khichhai a vaw tlôpa y ta, ahy hmahta patlôsa leipa u la, dyhtha khai ha muh vy”, tahpa ta tlâh cha pa-awhsa ta.  

Chatanachata ama paw cha khih za tlô ta, pakha lâ vawh vaw patlôsa khoh ei va, pakha lâ vawh heih vaw patlôsa khoh heih ei va tah ta, hnabeidy kawpa ta a y thlâh ha nota ama tlyhmia liata aduah thlâh hapa ama seihnai chaipa chata kei hmô ta. “Khichhaipa y, avâ suah tlôh ta, a cha chasi tu tlamaw na, ochhôh lâ avaw ngia teh”, tah ta. A paw chata a sawchapawpa cha pahno khao leipa ta, “Ei châ ly kaw na, Abeipa y”, tah ta, ochhôh lâ cha a kei ngia ta. A sawchapawpa deikua chata a paw a châ tahpa a pahno thlâh hapa vâta a chysia dâpazy â thla n’awpah pie ta, a ngiachhie kaw ta. Zâlâ pati ama nie khai tawhta, chakoh liata mei amâ aih nota, “Ei pâ, nâma he machâ ha tlôh chi ta, saw ma na hnei vei? Khazia nâma tlai na sie laih ngâkaw?”, tahpa ta hiahri ta, a paw chata, “Abeipa y, sawchapaw papangawh hnei na ta, ama nô cha thi ha ta, lahpinô hropa hnei na ta, ei sawzy cha a hao ngâsâ ta, ama thi thei n’awpah sai teikhâ ta. Nohkha cha, ‘Ei pathi na pasa, Paripi pathi na tluapa u la, Paripi pathi ei nie khiata la ei tlâh thlâh ha aw, a tahpa vâta ei sawnah cha Paripi pathi tlua awpah ta sie ei ta, vaw kua tlâ khao veih ei, ama thi khai ha thlyu na”, tah ta, “Khiata la Abeipa nâmo he zaw unawh pakha zie nama châ? Na nô nata pawzy ama hroh ma?”, tahpa ta hiahri ta.  A sawchapawpa chata, “Nâma na reipa hawh tlaita keimo chhao unawh papangawh châ pi ta, Paripi pathi eima tluana liata maniah amâ hao kawpa vâta , o lâ kua khao leipa ta he lâ he za sie laihpa ta, he liana heta khih eima padua pâ ha”, tahpa ta a chhy ta. A paw chata, “Ei saw, keima saw mah na vaw châ ei tâ”, tahpa ta a ngiapachhipa ta thata cha ta. A sawchapawpa chata, “Ei pâ, khazia ma na pahneih ngâ kaw tly? Na palôh a chamâ tlamaw bao na”, tah ta.  

A mylâpa khih vaw deih ta, a paw cha a phao theinazie sa paphaosa ta, a phaona seihnâ cha a rao rie thei awpah ta tao ta. A nô châta lâchao theih naochôpa (châmaih) pahlaopa cha paphaosa hra ta. Chatanachata a paw cha sie lymâ ta, O a tlô nahta ama nô hnoh chata, “Chhiechainô y, na vaw patupa tyh. Na saw nâ hao kawpa khata na nie awpah lâchao cha vaw chatypa ta, nie mah y”, tah ta. Ama nô cha a nodi kawpa vâta lâchao cha thlaita pathlâ ta nie para lymâ ta. Châmaih a niepâ hapa vâta a niena su liana chata thi pâ ha ta. Ama paw chhao cha, “Ei saw nah bao kha la”, tahpa ta â hipa vâta a seihnâ chata a rao riesao ha hra ta, hmo â chhôna su liana chata a thi pâ ha hra.

Chatawhcha a saw nah sahlao chata, “Atanoh la Bei na eima bei tua aw”, tahpa ta a pachhuahpanoh chaimâh ei ta. Thatupi ta a chhopa hawhna khata Baorapi Leihngia cha ohmia liata rakipa thlao lia kaw chaluah ei ta. Zawpizy cha sahma-satlâ paziapa ta a palysapa ta lâh hôlô ei ta.

              Chatanachata, zâ liahsa a rei ha tawhta Thatupi chata Baorapi leingiah cha vaw la ha ta, Rakipa thlao tawhta a za chôpa pyu cha khihsawzy ta thei ha ei ta, “Cha cha khâpa pyu maw?”, tahpa ta hiahrina tao ei ta, unawh papangawh penawh chata, “Kahraipa pyu bao na”, tahpa ta palôh pahâh kawpa ta a mô ha ei ta. A mylâ khihdei tawhta ama kaw mopa cha vaw y khao leipa ta, Thatupi ta â râkhei syulyu hapa a châ tahpa chhao pahno ei ta. Kheihta tao thai rimâ awpah châ khao tlôh leipa ta. Chatanachata ama peimawhpa maih aw ei ta, thadâh kawpa ta khih ama sa tyhpa kha a thei rimâ awpah vaw châ khao leipa ta, lyuzy ataopa ta nie nata abusai tluapa ta khih ama sa bâ awpah â ngiah ha bâ.

                           

 

 

 

Mara reih rozie dopa

 

 

 

 

 

Mo (m)              : Mo pano amâ vy (noun)

Mo (r)                : A mo a chao(Noun).

Moh(d)              : A moh na pahno ma?   (noun)

 

Mô (m)              : Amâ mô haw (verb)

Mô (r)                : A saw a pamô  (verb)

Môh (d)             : Ti liata â pamôh (verb)

 

Na (m)              : Na tao ma (pronoun)

Na (r)                 : Hlâno ta ‘âna’ ama tah (noun)

Nah (d)              : A nah a pâ (noun)

 

Nâ (m)               : Nâ vy ma (pronoun)

Nâ (r)                 : Ei nâ a y thlâh ha  (noun)

Nâh(d)               : Pâhchhô a nâh (verb)

                            

Naw (m)            : Naw ama thie (noun)

Naw (r)              : N’aw pie teh (pronoun)

Nawh(d)            : Nawh a hnei (noun)

 

No (m)               : Pati eima nie ngâ no a châ (adv)

No(r)                  : Thopi nyu no a doh (adj)

Noh (d)              : Noh a vaw chhi (noun)

 

 

 

 

US PRESIDENT TRUMP CHA

WHO APAZAO HEIH AWPAH TA

EUROPE RÂHZY TA REIPASAO THEI VEIH EI

20.6.2020:Esther r Fanai

 

France, Germany nata Italy zy ahlao pâpa ta President Trump cha The World Health Organization apazao heih awpah ta reipasao tyh ei ta, anodeikua reipasao thei veih ei. President Trump ta WHO cha ataopathai awpah ta thla 1 rachhôh daihti pie hra sala, WHO ta WH Assembly liata ama bietaipazy ama patlô vei tawhta cha US ta bieheihpa y hlâ via châta WHO he eima vaw puasai chy tua aw ama vaw tah haw. Daihti khachâ rakha tlyma WHO chhao sie hnolo ei ta, anodeikua Coronavirus ta khizaw chahryh t5a, raihria awpah hluh via lymâ ta, sôh adaihkhyh leina hluh via lymâ ta, President Trump deikua hnôhlâ aheih awpah â chhuah leipa a châ thlyu aw.

President Donald Trump, Fox News "Coronavirus pandemic he khati daihti liata ma cha pai daihti a hnei aw. Coronavirus vaccine tao awpah heta The United States heta theina zydua eima papua, Vaccine nata therapeutics chhao eima hnei daihmâ. Virus he pai daihti a y cheingei aw, Vaccine eima hnei tita cha aly âchhih kaw aw".

US lia heta Coronavirus vâta chyhsa 117,000 hlei thi ha ei ta, Anthony Fauci, the head of the U.S. National Institute of Allergy and Infectious Diseases ta 2020 kô chhâna lâta vaccine tao papua hmâ awpah ta amâ hnabeiseih. World Health Organization ta a hihsâ dâhta  vaccine 130 rachhôh buakhei haipa a châ.

 

Biehnawh : Facebook, RALTHUAM LEH TUNLAI KHAWVEL

 

 

 

 

 

Abortion: Chi nata Pho hmiahaopa

 

Pachhuahpanohtuhpa: R.V.Bôhia

 

Chennai Marasawzy ta ‘Missionary Day 2014’ advance ta amâ hmâna liata St. R.V. Bôhia ta paper a present pa a ry liata khizaw suto liata Marasaw a ypazy ama rei thei hra awpah ta vaw tawpa a châ. ( He Article pha kawpa he a pha kawpa vâta pasaina la tua leipa ta Facebook tawhta lapapuapa a châ. Rohtuhpa nata post tuhpa hnohta pachâthaina eimâ haw. Ed)

Biehmia:

Khizaw râh su nanopa liata rairuna thata eimâ tyh ngâpa hmo sâkha, eima chi nata pho châta chhaota chi achhih kawpa cha Abortion he a châ. Abortion vâ heta sâhhluhpi paraona ahnei leipa nata amâ dona-tovyuh a reihpapua thei/thai leipazy cha ama hrona sôh kawpa pahleipa châ ei ta, kô chareihta âmo aphaotuhpa nô hluhpi ta hrona ama pahlei hra. He hawhpa duasu liata eimâ duah ngâno heta keimo krizyhpazy pi nata a viapachaipa ta keimo Marasaw, khizaw liata pho aduahpapuapa châ hr’awpah ta hmah a la haipazy châ pi ta cha Abortion he tlâ pachâ pakhô thlâh h’awpah chi châ vei. Cha hleikhô ta Abortion apyhkhei thlâh hapazy eima khihtlâh liata vaw y pathao hra ei ta, he heta eima chi-pho hmialâ ta eima sie laih lymâ n’awpah liata eima châta raona lai kawpa a tlôkhei thei kawpa a châ. Chavâta Abortion chôchâh lia heta eimâ pahra awpah nata no eima pavâh via awpah he a peimawh kaw.

He paper liana heta abortion nata âzaopa hmo peimawhpa nata Abortion taopa he eima Zyhna nata chi nata pho châta chichhih kawpa a châna thâtih ei vaw palâsa aw.

Abortion he khâpamaw?:

Mara reih ta cha Abortion he ‘Sawpathlana’ eima tah thei aw. Sawpathlana he achyunazie ta reipa ta cha, nôchhi (pychhôh) liata nawh ypa a pih lei n’awpah ta chyhsapa thaina nata thohna chhaichhi pha kawpazy hmâpa ta nôchhi khôtho lâta a y thei mâh lei awpah nawh/hawsaih pahleipahlôna he a châ. Dâhta sawpathla awpah cha hâta ei 20 hlâta a uhthei via awpah châ vei tahpa a châ.

Abortion pachhaihpachhuahna:

Abortion he chi no (2) – Spontaneous nata induce- ta pachhaihpa châ ta. Spontaneous abortion yna chhâpa cha nô pychhôh liata nawh a ypa kha rairuna khâpa vâta tlyma chhiena a chô liata a tlôpa vâta a daihti tlô hlâta pihpa tlyma, nô chhi liata a y no khata thina taih a tlôkhei tyhpa tlyma he a châ. Induced abortion deikua rairuna/chiehleina y hlei leipa ta tahraruahna ta nawh chhi chhôh liatahpa pathlapa he a châ. Khizaw râh su nanopa liata kô chareih ta 35 million rachhôh he tahraruahna ta nawh a pathlasana he a y tyhpa hawhta reipa a châ.

History of Abortion:

Abortion he kô hluhpi vaw sie hapa tawh tlaita vaw y hapa châ ta. Zâkhano ta Hammurabi (Babylonian law code) dâh-phôh ama tahpa liata sawpathla pasai leina dâh he ama vaw pahlao haw. Hlâno Greek-nah chhaota sawpathlasana he saw pihpa pachyh via n’awpah ta ama vaw hmâh tyh hra. Chyhsa sopa Plato chhaota chanô cha kô 40 ama tloh khiah saw âpathlasa raruah lymâ thlâh h’awpah ta a vaw reih hra. Romans nahta cha nawh/hawsaih, nô pychhôh liata a ypa he chyhsa tlohpa châ vei tah ei ta, chavâta sawpathlasapa cha pasaih ei ta, ama pathla tyh hra.

Middle Age daihti no chhao sawpathlapa cha reichho hlei leipa ei ta, pakhâna dâh-phôh chhao y hlei hra vei. Pope Sixtus V (1585-90) he Pope hry liata Sawpathlapa he chyhsa hrona-lana na a châ, tahpa reih tua chaipa a châ.

Kô zabi 17^th  nata 18^th  liata USA lia cha sawpathla pakhâna dâh he y mâh hra leipa ta. He vâ heta kô zabi 19th na lia rachhôh cha sawpathlapa hluh ngâsâ ei ta, chanôsaw (female) pihpa cha  athata ama maluh a pachyh. Kô zabi 19^th  chhâna lâchhâh deikua ‘Anti-abortion’ tahpa ta hmahlana hnei pathao ei ta, American Medical Association ta Anti-Abortion committee paduapa ta sawpathlana adyuhna lâchhâh nata sawpathla a pha leina lâchhâh ta no-âpavâhna hnei pathao ei ta. Roman Catholic Awnanopa chhaota sawpathlasa a pha leina lâchhâh apachuna ama hnei pathao hra. Kô zabi 19^th  chhâna liata sawpathlana cha khâhpa/pasaih khao leipa a châ tarawpa ta, sawpathlapa deikua ama y thlâh ha chy.

Kô zabi 20^th  liata Soviet Union (1919), Iceland (1935) nata Sweden (1938) râhzy cha kô zabi sâkhana liata sawpathlana cha râh dâh-phôh ta a pasai tuapa râhzy ama châ. Kô 1935 liata Nazi sawhkhâ ta cha nawh/hawsaihpa a nô pychhôh liata a y nota a tlâh pha leipazy cha pathlasa awpah pasaih ta, anodeikua German chyhsa cha sawpathlasa pasaih veih ei.

India râh chhôh liata Abortion:

India râh liata cha sawpathlasapa he pasaipa châ ta, sawpathlasapa chhao ama hluh kaw tyh tlai hra. National census for medical Abortion in India ta a reina dâh ta kô chareih ta 11 million sawpathlasapa hawhta a reih. Abortion nata â zaopa vâ heta kô chareih ta chanô 20,000 ama thi tyh.

India râh liata Abortion pasaina chhâpa:

Maluh pôh chatliena vâta: Maluh pôh chatlie kawpa pachyh via n’awpah ta Sawhkhâ ta chhôhto hnohta saw hnei chyh via awpah â hnaw ta. He kyh liata hmahla n’awpah ta Family Planning Projects nata program zy cha media zy hmâpa ta hmah thata a la. He vâ heta tahmâ cha chhôhkha hluhpi ta ama sawna maluh pachyh via ei ta, maluh chyhpa cha amâ tlyh via haw.

Induced Abortion hmâchheina vaih n’awpah ta: India sawhkhâ ta sawpathla a pasaina chhâpa sakha heih cha, achhâpa y leipa ta sawpathla chakhyhpa vaih n’awpah a châ. India sawhkhâ ta sawpathla a pasaina dâh hawhta cha Qualified dawhty nah ngâlâh nata sawpathla abyuhna chhâpa siahliapazy angiah ta, saw he thohna O suphapa, sawpathla thei awpah ta ama pasaina nata pykheina Thohna O liata ama pathla thei.

Indian abortion laws he Medical Termination of Pregnancy (MTP) Act liata pahlaopa châ ta, he dâh-phôh he India parliament ta kô 1971 liana khata â pyhkhei. Anodeikua he dâh he April 1, 1972 lia tawhta hmâ pathaopa châ ta, kô 1975 liana khata eikha ama moh pathi.

MTP Act (Medical Termination of Pregnancy Act) ta sawpathla a pasaina chhâpazy:

Therapeutic reason: Nô sawphaohpa kha a nawh phaopa vâta a hrona châta chichhihpa ta a y hapa vâta tlyma, cha leipa ta nô pychhôh liata nawh kha khâpa rairuna vâta a hrona dadiehpa ta a ypa vâta tlyma vâta MTP Act heta abortion he a pasai.

Eugenic reason: Nô pychhôh liata nawh kha hri-iahpasana (German measles, chicken pox or small pox, viral hepatitis, toxoplasmosis or radio-activity ahrpz) a nô pychhôh liata a y no khata vei ha sala, cha chata a sapa nata pachâna/pahnotheina lachhâh taih hriapa ta, rairuna hluhpi a tlô khei theipa vâta.

Humanitarian ground: He he chanô sawphaohpa kha patupakhina vâ nata tahraruahna vâta sawphaohpa a châ khiah cha chanô nawhphaotuhpa â ryh tahna hawhta sawpathla theipa a châ.

Social concern: He he cha sawpachhâsana chhaichhi khâpa hrao leina vâta rairuna a yna daihti liata.

India râh chhôh liata chapawsaw kho viapa vâta sawpathlana:

Tahmâ cha technology lâchhâh ta hmahsiena vâta saw pih mâh leipa chanô-chapaw-châna (sex) cha Sonography nata amniocentesis zy hmâpa ta pahno thei hapa châ ta. He vâ heta chyhsa hluhpi ta ama kho lei viapa nawh/hawsaihpa cha ama pathlasa lymâ thlâh ha bâ.
India râh liata cha Dowry vâ nata phôryh dâh-phôh hropazy vâta chapaw saw he amâ tlyh via. Kô 1985 nata 2005 likah lia amâ chuna liata ama hmôpapuana dâhta cha nô pychhôh liata ypa chanô hawsaihpa 10 million rachhôh ama pathlapa ta ama reih. He hawhta tao dâh pha lei kawpa athata ama hmâhpa vâta Sawhkhâta kô 1994 liana khata nô pychhôh liata saw cha moh chhielie awpah pasaih khao leipa ta, chanô-chapaw-châna kho viapa vâta sawpathlana chhao a vaw pasai khao leipa a châ.

Phôhryh nanopazy abortion ama pachâna dâh:

Buddhism: Chyhsapa he thlahpa a hnei leipa hawhta pachâna ama hneipa he sawpathlana liata ama pachâ dâh â bôchhâ/pahnieh via chaina a châ. Nawh/Hawsaihpa he hrona hneipa hawhta pachâna hnei ei ta, anodeikua nô hrona pachha n’awpah a châ khiah sawpathlapa he a pasai thlâh ha.

Islamic: Islam nah he cha atlâhpipa ta sawpathlasapa he khoh veih ei. Anodeikua Hanafi school of thought reina liata cha nawh nô pychhôh liata a y nota khâpa rairuna vâta tlyma thlapalih (4) hlâta sawphaotuhpa nô hrona châta chi chhihpa rairuna a y khiah sawpathla theipa a châ.

Hindu: Nô hrona pachh’awpah abyuhpa duasu liata a ypa a châ khiah ama pachuna heta sawpathlana he pahly khao hlei vei. The Susruta Samhita (Hindu medical text), ta sawphaoh daihti nota rairuna daihti liata tao-tâ n’awpah dâh a siahlia viapa ta a reih hra.

Christian: Krizyhpazy deikua pi kheihawhpa duasu liata âduah hapa chhaota sawpathlapa he pasaipa châ vei. Roman Catholic Church ta chyhsapa he thlahpa (soul) a hneipa eima châna lâ tawhta sawpathlapa he amâ dyuh hra.

Abortion he chyhsa hrona lapa a châma?

Abortion chôchâh reina daihti lia maihta sawpathlapa he chyhsa hrona lapa a châ ma i, tahpa he eima pachâna liata a vaw ngiatua chaipa a châ tyh. He kyh liana heta py sâno pachâna nanopa a hneipa y ei ta, chazy cha- sawpathlana apyhkheipa Pro-Choice nata apyhkhei leipa pro-life zy ama châ.

He a chô liata eima hiahrina pasia n’awpah heta, ary liana heta kheihta ma chyhsapa hrona he â vaw thao tlai tahpa he duah moh heih tua ei suh vy.

Phôryhpa lâ tawhta apyna dâh:

Phôryhpa lâ tawhta apyna dâhta cha chyhsapa thlahpa (soul) a y nah heta hrona he a y pathao hrapa hawhta apyhpa a châ. Anodeikua khati ma thlahpa cha a y pathao tahpa lia deikua pachâna nanopa a y heih. Roman Catholic nahta amâ pyh dâhta cha thlahpa ta nawh/hawsaihpa chô liata â ngiana daihti he chapawsaw liata cha nô ta saw a phaoh tawhta noh sypalih (40) tawh heta châ ta, chanôsaw lia deikua cha noh sycharie (80) khôlâ a châpa ta amâ pyna dâh a châ.

Science thaina ta nawh/hawsaih nô pychhôh liata a ypa he chyhsa tlohpa or hrona ahneipa a châ tlaina tahpa pasiana:

Science thaina ta âpyhna dâhta cha chyhsapa hrona he sawphaoh thaoh no tlai heta a y pathao ha hrana tahpa a châ. Nawh/Hawsaih chanô-chapaw-châna (sex) chhao he sawphao pataw nah tlai heta âpahno theipa na a châ ama tah hra. Sawphaoh no, chapaw chi nata chanô chi a pahlyh nah heta chromosome chyhta 46 heta chyhsapa he vaw tao papua ta. Sawphaoh no tawhta thina taih heta chi thieh-hlâhpa he apahlao-pahli tlâ khao vei. Hmo abaichha chhôhpa cha pati, ti nata Oxygen zy he tlâ a châ bâ ama tah.

Kô 1981 nota USA liata Science lâta athaipazy chyhsapa hrona âthaona dâh ama reipahmaohna liata Dr. Hymie Gordon ta hetana heta a reih, “Atahmâ cha asia kawpa ta khatima hrona he âthao tahpa cha theological tlyma philosophical lâ tawhta hiahrina byuh ngâ kaw khao leipa ta eima reih thei ha bâ. He he science thaina ta mopasiapa a châ haw. Theologians nata philosopher-zyta hrona âthaona nata hrona chhâpa he amâ ei-chhia ngâ kaw thei, anodeikua hrona zydua, chyhsapa hrona chhaota, he sawphaoh noh tlai heta âthao/ a ypâ ha hra na” a tah.

Biehrai (Bible) tawhta:

Khazohpa lyupa/kakuapa ta taopa tahpa heta chanô nata chapaw a pahlao (Gen 1:27), anodeikua science thaina ta cha chanô-chapawna he sawphaoh noh tlaita pahno theipa a châ.

Saw pih mâh leipa he chyhsapa hro liata a ypa, cha cha Moleina (Hlazy 51:5) nata alyna a hnei hra.  

Bei Zisu Krista chhao kha a nô ta a phao daihti no tlai khata chyhsa tlohpa a châ haw. Bei Zisu, a nô ta a phaoh pathao no tlaita chyhsa tlohpa a châ khiah keimo chhao eima châ thei thlâh ha hr’aw veima? Hebrai (2:14-17, 4:15) liana khata Ano (Bei Zisu) cha kyh totie liata keimo hawh tlai châ ta, tahpa miah a chho. Chavâta keimo krizyhpazy pi ta cha sawphaoh pathao noh he hrona âthaona a châ tahpa eima ngiapâ thei aw.

Py thokha nawh/hawsaih pih mâh leipa he chyhsa tlohpa or hrona hneipa châ vei tahpa reina dâh:

Self-consciousness: Thokha apyhna dâhta cha nawh/hawsaihpa he Self-consciousness a hnei hlâlei la chyhsa tlohpa châ vei ama tah. Nawh nô pychhôh liata a y thlâh ha chypa cha cha hawhta Self-consciousness a hnei leipa vâta chyhsa tlohpa ta a pyh thei veih ei.

Physical dependence: Nawh nô pychhôh liatahpa he cha a phaohtuhpa nô pôhpa pachiahpa hawhta châ ta, ano ta hrona eih-hrâhpa hnei vei. A phaohtuhpa nô lia khata tlâ â pahnieh. Chavâta chyhsa tlohpa ta rei thei’pah châ vei.

Actuality Principle’ of Functionalism: Nawh/Hawsaihpa he chyhsa tlohpa châ vei. Chyhsa ta rei theina daihti la hawsaihpa kha a sapa, thlahpa, thaina zy hmâpa ta â pielyu thai/thei nah heta na chyhsa ta rei theipa a châ tahpa ta amâ pyh heih hra.

Biehrai tlychakapa ta nawh/hawsaihpa he chyhsa tlohpa châ vei tahpa ama rei dâh:

Âthaona 2:7. He liata a reina dâhta cha, chyhsapa ta hrona hneipa a vaw châna he Khazohpa ta husona/hrona a pie tawhta a châ. Nawh cha a pih hlâta ano khota ‘hu a so’ thei leipa vâta, a pih mâh leipa nawh/hâsaihpa cha chyhsapa châ vei.

Zawba 34:14-15. Khazopa ta “chyhsa thlahpa cha la pakhua sala, a‘husona’ cha a hnohta ala pakhua khiahta cha, sapa zydua leidia khai ha aw ei ta, chyhsapa cha dohlei lâta a kua ha aw”. Hrona cha ‘hu’ nata â zao ha ta, ‘hu’ a y hlâta hrona he y vei.

Mathai 26:24. Bei Zisu ta Zuda thâtih heta he a reih “cha chyhsa cha pih leipa sala a châta tlao apha via awh”. He heta a palâsapa cha chyhsapa hrona he pi noh ta â thaopa hawhta a lyu.Cha leikhiah, Bei Zisu khata “cha chyhsa cha a nô khata vyhpi lia vaw phaoh leipa sala apha via awh” a tah awpah a châ.

Hawsaihpa he chyhsa tlohpa châ vei tahpa âchhy paliena:

Self-consciousness:

1. Self-consciousness he chyhsapa châ awpah ta byuh hlei vei, achhâpa cha chyhsapa pi he âtheihlô leita eima yna daihti he a hluh kaw. Eima mokuhpahâh kaw no nata tlâhlei- chiehleina parutuna vâta âtheihlô leita eima yna daihti he a vaw hluh ngâsâ. Cha hleikhô ta hawtipa he kô 1 kô 2 ama tloh hlâ leila Self-consciousness hnei veih ei. Châsala chyhsapa hawhta eima pachâ thlâh pyly.

2. Nawh/Hawsaih he nô pôh pachiahpa châ veih ei. Achhâpa cha nô ta saw a phaoh pathao daihti no tlai heta, chanô-chapaw-châna (sex) ama hnei ha. Sawphao tawhta noh rei leipa ta nawh cha ano-eih ta lathli lâchhâhta thari-tha-â, thisaih group nata finger print ahrpz ano-eihta ama hnei khai ha.

3. ‘Hu’ (breath) he chyhsa hrona nata â khopa a châ khiah ‘huso’ khao leipa heta chyhsa châna a lei ha aw tahna a châ. Anodeikua Biehrai liata chyhsapa châna he ‘husona’ a chhâ tawhta chhao a y thlâh hana tahpa a sia kawpa ta a reih (Phil 1:23; 2 Cor. 5:6-8; Rev. 6:9). Davi chhaota “Moleina hneipa ta ei nô ta eina phaoh” (Ps.51:5) a tah hra. He heta a reih pasia kawpa cha, chyhsapa hrona he ano khota hu a so thei hlâ, nô chhi liata yno tawh tlaita â thao tahpa a palâsa.

Abortion supporter (Pro-choice) nahta ama reina dâh:

Nô hrona pabohsa n’awpah ta: Heta he ama reih. Dâh pasai leipa ta sawpathlapa he chi a chhih ta. Dâh ta Sawpathla pasaipa heta nô sâhhluhpi thina tawhta a pachha thei.

Ataopasina: Saw pih hlâta khaw hmâpa ta hawsaih duahmo moh khai ha chiehpa pathlasapa heta khochhih leipa nata pahnai leipa saw hneina a pahlei thei.

Patupakhina: Ama rei chaipa cha ahy chanô hmahta ama khona hnypa ta, tahraruahna ta saw ama hnei awpah châ vei. Patupakhina vâta saw phaohpazy cha âmo khona liata pasiesa awpah a châ. Ahyhmah ta tahraruahna ta saw pahneisa awpah châ vei (A yzie cha saw ama pathlasa thei, tahna a châ).

A chô liata a chyhta eima vaw palâsa hapazy tawhna khita abortion phaleina hluhpi eima reih thei aw. Khizaw su nanopa liata Krizyh penawhta abortion he a vaw dyuh kâlâ ei ta. A pha ta eima za pachâ khiahta cha, abortion he chyhsa hrona lapa hawh tlaita eima pachâ thei aw. Ataopasina vâta tlyma, hawsaih chanô-chapaw-châna (sex) kholeina vâta tlyma, dyhchhie sipasana vâta tlyma, nata satlia-laihsa daihti nota apiepasina vâta sawpathlasa pei eima tah lei khiah cha hawtipa nata pitlohpa chhao eima rei hapa chhâpazy vâta eima pahlei pahlô thei hra aw tahna a châ. Thohna hmâpa ta chyhsa hrona lapa (euthanasia) nata hâti hrona lapa (infanticide) zy nah heta abortion he ânanona y vei.

Abortion he adâh tlâhpipa ta cha chyhsa hrona lapa hawhta pachâna y ta, anodeikua therapeutic abortion, nô hrona pachha n’awpah ta saw ama pathlasapa deikua he reipasia ru kawpa a châ. Awnano nôpaw (Church father) pakha Tertullian ta therapeutic abortion kyh cha“Cruel necessity,” tahpa ta a reih. Kho kawpa vâ châ leipa ta nô hrona pachha n’awpah ta nawh pychhôh liata a ypa cha a hrona lapa a byuh na daihti a y tyh. Anodeikua tahmâ cha thohna lâta thainazy â sâh kaw bâpa vâta nô hrona pachha n’awpah ta sawpathlapa chhao he a sôh kaw bâ. Cha nota sawpathla a vaw byuh hana daihtizy vaw y thei kaw tyh hra tlai ta, he daihti lia deikua cha eima chhie nata pha pahnona ta pachâpa chhaota thai eima châ thlâh hapa ta eima reih thei aw.

Achhâpa cha:

Nawh/Hawsaihpa hrona la awpah eima chhuah raruahna vâ châ leita nô hrona pachha n’awpha tlao a châ hri. Hrona nata hrona kyh liata a châ ha. Hrona âripa hawhta a châ. Achhâpa y leipa, Sawpathla khoh muaruana vâ châ vei.

Hmiahaopa tawhta mopakha hrona pabohsa n’awpah ta cha, he nô hawhta, ahy chhao rai ta mohropa (a hmiahaopa) hrona a la thei. Cha cha achhâpa y leipa ta liahnycheipa châ hlei leipa ta, sasyh avaihna hawhta tlaoh a châ.

Eima Biehrai nata Science thaina lâ tawhta mopa ta chyhsapa HRONA he nô chhi chhôh liata y thaoh no tawh tlaita âthao haw tahpa pahno thei ha bâ pi ta. Chavâta abortion cha paraona-hnei-leipa-chyhsa (innocent) hrona lapa hawhta a châ eima tah thei aw. Eima Krizyhna lâ tawhta pachâpa ta, eima Khazohpa hmiakô liata hmo khochhih lei kawpa taopa, moleina hmo ataopa hawh eima châ. Sapa lâ tawhta pachâpa ta eima chi nata pho a pahleipahlôna a châ heih.

Khizaw photo ta he khizaw liata aduahpapua achhuahpa ta kyhtotie liata amâ râpasuana hry ta keimo tlao eimâ pahleipahlô ha khiahta cha he arâpasuana lia heta a duahpapua thei aw mapi tahna a châ.

Chavâta Keimo marasawzy châta cha ‘ABORTION he Sapa nata Thlahpa liata eima hmiahao lai chaipa na a châ’ tahpa he my kh’ei suh u.
Note: He paper he târi 21.09.’14 liata  “107^th Missionary Day” MCF Chennai zy ama hmâna liata R.V. Bôhia ta paper present châta a pachhuahpanohpa a châ. R.V. Bôhia s/o B. Tlâhua (L) he Laki khihpa châ ta, tahmâ he Madras Christian College liata III BA â chu ngâ hai.

BIBLIO  GRAPHY

Atkinson, David J., David H. Field. “New Dictionary of Christian Ethics and pastoral
Theology.”  England: Inter Varsity Press, 1995.

Geisler, Norman L. “Christian Ethics option and issues.”Michican: Baker Book House, 2003.

Jeyaraj, Jesudason Baskar. “Invisible Children: Infanticide, feticide and Abortion“,Tamil Nadu,  India: Jubilee Institute, 2008.

McCarthy, Donald G, Edward J.Bayer and John A.Leies, eds. “Handbook on Critical life issues.” Bangalore: Theological Publications in India, 2004.

Peschke, Karl H. “Christian Ethics Moral theology in the light of Vatican II.” Bangalore: Theological   Publications in India, 1999.

Roth, John K. ed. “International Encyclopedia of Ethics.”England: Fitzroy Dearborn Publishers, 1005.

Willke, Bedr. &Mrs.J.C. “Abortion Questions and Answers.” Ohio: Hayes Publishing Company, 1985.

WEBLIOGRAPHY:

 

 

 

 

 

SIAHA KHIHPI

(The Golden Town of South end)

 

~ Beihlaotlo Syuhlô (Beibei)

 

Hro liata peimawh kawpa nata khâchâ âbai hapa cha khihpi paduapa he a châ. Chyhsa ta khâpa vâta ma hlâno bei nawhzy tawhta khihpi he padua ngâpa châ ei ta, tahmâ khizaw lia chhaota sawkha heta a khihpi tobi pathi ta, palai ngâpa he  a châ? Ryureina naosia ta chyhsa hluhna lia maih ta, nohto niebaw hra khia, bu nah sai chhao a naosia kawpa ta a pado khai thei. Tanoh Siaha sai ei sih la, eima khihpi padua khoh dâh nata khihpi eima hmâna dâh hih eima hmâh thai lei kawpa a lyu. Nohto phei ta siepa chhao, mawtaw kiah theipa châta chhao mo riethei a chhih ta, palôhru rai ta maniah pahuasua thei vei. Âthlâthlyu lei dâh rimâ nata âthuhny dâh he hawti chhiepa O chhôh liata palaopalâ ta, O taw a châpa hmo paryhpari dâh nata a thyvawh chakhyhpa he a lyu.

 

O sana kyh:  Khihpi padua ta lai lymâ awpah liata peimawh kawpa sâkha cha khihpi chyhsazy ta O eima sa dâh nata padua dâh he a châ. Khiliah saina a y lei ngâna taih ta O nata O likah chadiesa pi ta, eima O hri paw O laikathi daih lâ ta pyhlie awpah lia cha, mo pakha paw ta O kaw sa heih chaimâh ta a O ki chhâna cha ama O hripaw pyhlie liata â ngiah haw khiahma tah tlamaw ngâ kaw’pah ta amâ chadie. Hupo â chhih rimâ cha la, Lâpi kiah liata O eima sa khiahta cha sôhdaoh nawh tlô thei n’awpah sai ta pachâ pi ta, lâpi kiah tawhta 6 fit chhâta a sy saipa ta O padua awpah hlâta cha lâpi(zawlâ) 4 or 6fit kaw paru palie ta, zawpi siena eima O di tlana ry liata soh ngâhna taih ta O sa thei pi ta, zawpi hlâta cha eima O lyukyh he â dolei kawpa ta kyh eima pachâ hleikhô ta, zawpi khâpa sawta reih leina a châ, sawhkhâ (revenue deptt) ta hmahta lâpi pachhaihna taihta râh maniah pie hra ei sala, O sa awpah ei châ khiahta cha ei chhiepha pahnona chhao ta zawlâ awpah nata natla baikhai awpah cha ei O a laina chyh hlâta eima pachâ tua awpah a châ.  

O sa patlô pi ta, lâpi chadie ta Zawlâpi râh paru hluh thei viapa maih ta ama Mawtaw so n’awpah ta zawlâpi maniah ama hmâpa lao heihpa cha pheita siepa chyhsazy khâpa sawta maniah ama reih lei dâh nata zawpi amâ thana leizie a lâ pasia ta, cha raohpa ta eima ryureihtuhpa sawhkhâ chhao a thatlô leizie nata khihpi lymâ awpah eima hnei chhôhpa kyh ama pachâ leizie nohto ta ahy chyhsa rei ngiah leipa ta eima hmotaopa nata ydâh khihsa dâh ta a phuah ngâ hai. He tawhta o sa via lymâ awpahzy ta eima pahno awpah peimawh kawpa cha, na râhri tawhta 3 fit chhâta a sypa ta O pathao la cha hawh pyly ta na O hripa awpah chhaota 3 fit a sypa ta O pathao hra sala ngiapawdi tla n’awpah y h’aw ta, nama likah a pathai pa-ao via thei ha aw. Tahmâ ta eima O sadâh hela eima âhmie roh viata o hri nah chhôhpadâhpa liata a khi khi hlâ haw, ngiapawdi hmahta tla thai khao lei ngâna taih ta a chadiepa hela hmo ngiapa a châ lei raohpa ta, hri-iah pathaihna châta chhao pha vei.

 

Râh hneina chôchâh: A pastor tawhta Awnano machâ pahlôh leipa ta O hri a hryuna a tao hoh chaipa nata ngiapâna eima dadieh chai tyhna cha râh chôchâh vâta Opalyuhrizy nata buana he  a châ aw, khâpa vâta a bua thei ngâpa ma eima châ, eima râhri sia kawpa ta ngiana (land mark) hnei khoh rai ma pi, eima O hri paw râh eima chhu thei n’awpah a châ khiahta cha piepie awpah chhao pei tah hra ma pi. He hawhpa hro he bâhsai sih la ngiana sia kawpa pillar ta tao khai bâ s’u. A lô phapa nata ngiana tao n’awpah phapa eima hnei pazai tu haw.

 

Lapi avao phana chôchâh: A hneirôh viapa O pha a hnei theipa maih ta eima motor so n’awpah ta O sa hlei leipa pi ta, zawlâpi liata eima motor paduapa he a sosâhna châ vei….. Garage siapa hnei bâ s’u.  Meisatlâh tawhta siahatlâh taih O phapa â zai ta, motor so n’awpah dâhdei chhao a tao leipa Lâpi liata motor so hmâhpa eima hluhtu haw, sôhdaoh chyhsa patlôsa awpah hlâta cha eima hmo hneipa sona pachâ peimawh via bâ tua s’u… So n’awpah a hnei mâh leipa ta o tlôhpazy chhaota a mâ hneipa ta â boh viana liata soh awpah ta la phusâ cheipa chhaota ama cheih khohthlâh ha… dâh eima pahnona rakhapa hra cha zawpi a hnykhawna rakhapa nata bie ei chahrana rakhapa heta pahno pi ta, keimo tovyuh cha-ia (kala)ngâta he eima pachâ, he hawhpa hela bâhsai ngâ bâ  ei suh u. Keimo tovyuh hmahta chhie pha pachâ khao leipa ta eimâ khaohra theipa nata hohpa a châ khiahta cha eima khihpi kyhpachâna a chyhta chhâ Marasaw moto heta hnei sih la, khihpi a thlâzi via n’awpah nata a chyhsa palaopalâpazy a huasua via thei n’awpah pachâ peimawh tua s’u.

 

Lâpi kiah liata O hneipazy ta, O eima sana dâh panano ngâh sih la, chata a thôhna a tlô khei theipazy: Lâpi(road level) via ta he sôhdaoh tao penawh patlôsa awpah ta sa khao leipa sih la, motor parking thei n’awpah ta sa hri sih la, chata athôhna hluhpi a y.

Motor sona a hnei leipazy ta, mâ cheipa ta â boh via n’awpah vâta cha ama hmâ khoh aw. Ama motor lai nata chyh reih ta thlato ama cheih awpah cha eima bitaipa thei.

Light bill a hryuh byu leipa ta a zo a vaw di ei ta, ama so (park) chhôh ngâlâh ta pakhaih â ngiah. Toilet pahryuh hra vei. Ti pahryuh vei. Noh nohkha chhienoh-phano liata Lâpi laikachha lâta beih chhona tao ta, zawlâpi liata a lâ kaw ta, beih chhoh ngâ k’awpah a ngiah leipa aw ta, a hmâh thei. Sôhdaohpazy patlôsa awpah ta room partition tao ngâ kaw byu leipa ta, sô la pangia thei ngâna a châ.O chheipâ papuapaleituhpa a chyh aw.

Tahmâ hawhta he khodâh hawhta lâpi kiah liata motor a chhiema a pha ma? Soh ngâ awpah ta, sawhkhâ dâh ta maniah a pasai khao lei daihti a tlô cheingei aw. Eima khoh ma? Khoh vei ma? Dâh ta zyh awph order maniah ama vaw pie tita cha zyh cheingei awpah a ngiah aw ta, O phapa hnei thlâh tlôh ta motor sona dâhdei chhao a hnei leipa hela noza â chhih kaw aw. Khihpi a lai ngâ haipa nata a laipa liata a pahrâpa chyhsazy he eimâ mopâ khohpa a châ khiahta cha ama hmo hneipa a so na pha leipa nata motor garage pachâ peimawh leipa y tlâ veih ei. cha cha chyhsa taozie ngiapa chhao a châ.

Eima siaha eima mopa a châ khiah deikua ta cha, lâlai khachhua lâta motor Chapâ ta a su ngâna taita padua hôlô pi ta, buana nata rairuna sâkha hmahta hnei veih ei. he kyh liata eima râh ryurehituhpazy chhao eima ku eima pako rei tu ha bâpa ta ei pahno. He leipa ta khihpi hropa eima hnei tlôh leipa a châ khiahta cha, a vaona chôchâh liata tiama maniah papuapa via thei ei sala, a taotuhpa he la nâmo O lyuphapa liata ku chakhi khaita a tyuh thlâhpazy châ leipa ei chi ta, motor phapa ta, nama khona mai a tlô para theipazy châ v’ei chi. Noh to pheita niebaw tluata driver nokhih leipa thokhazy ta eimâ rypaoh ma? Rypaoh vei ma? Eima hnôhky lâ tawhta hailamaw chiamie (horn) piethlu ngâpa vâta châh-ao rao khai daihmâ hapazy heta eima tao chai. Motor â duah leina lâpi a kawh via na lia hra, Hmâhkhy(khoheih) hawh tlupo ta chichhih ta, thozuahpa nawhta maniah padua khâh lao khai heih ei.

Biehneituhpa nata ryureituhpazy ta eima khihpi â thlânô ta mothadâh chhih via n’awpah kyh liata biehneina nama hneipa maih cha a hneipa nata khihsa theipa taihta biehnei theituhpa dâh hmâpa ta thlai ta ryu maniah reipa u la, tahpa eimâ châ haw raohpa ta, vaih tota chhienoh phanoh eimâ lôngâhna chaipa pyzy chhaota eima khitlâh nata vaih pathaihpathaoh via n’awpah ta, ryureihtuhpazy charo vaih khei sih la, Siaha khihpi pathai, mo thadâh chhih (the Golden town of south end) padua tua ei suh u.

 

 

  

 

Source:  Board of Mara Literature, MADC, Siaha.