Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue January 2020



              Editorial

            

             Kôthiehpa, 2020 cha a vaw ngia ha heih pi ta, he he keimo thatlôna nata sona, eima hnatlâna a pha pachai vâta tlyma châ leipa ta, sôthih ta eima chaleipa chhao châ hra vei. Khazohpa ngiachhiena nata chhihthana vâ deita a châ.

              Khazohpa ngiachhiena topa ta, kôthiehpa a tlô theipazy heta Khazohpa lâta reihkah nata thlahchhâpa ngâlâh ta alynabie reihpa he khodaih thlâh ha leipa ei sih la, hmotaopa tlai ta eimâ lyna he eima palâsa awpah a peimawh ngaita.

              Kheihta ma Khazohpa lâta eimâ lyna cha hmotaopa ta eima palâsa aw? Nama vaw tah thei aw. Hmotaopa ta Khazohpa lâta alynabie eima reih dâh n’awpah cha he hawhna heta vaw reih ei sih la:

              A miakhana liata cha, hrozie nôchâ ta eima palâsa awpah a châ. Eima hrozie nata eimâ pielyuzy he Khazohpa khozie ta eima hroh awpah nata eimâ pileyu awpah châ ta. Hmoto eima taopa maih liata Khazohpa khozie palôh ta pachâ laihna chôta eima hroh tyh awpah a châ.

              A mianona liata cha, ngâchhihna ta eima palâsa awpah a châ. Nohto eima raihriana nata eima khihsana kyh liata zy, eima nietluana kyh liatazy ngâchhih kawpa ta rai eima hria tyh awpah châ ta, ngâchhihna he Khazohpa khozie a châpa vâta ano khozie tlaita hrohpa ta ngâchhihna eima zi lymâ awpah a châ.

               A miathôhna liata cha, ano chakaona ta eima palâsa awpah a châ. Eima hronoh daihti chyupa ta liana heta maniah taotuhpa Khazohpa chakaona he eima biepi chaipa châ sala, thina khôlâ, thlahpa pachhapa a châ thei n’awpah nata chhâzaw hrona eima hnei thei n’awpah ta Khazohpa chakaona rai he hria lymâ awpah eima châna khâ pahnopa ta, kôthiehpa, 2020 tawh heta cha chakaona raihria liata eima palôh nata pôhpa eima hlâ via lymâ a byuh ngaita.

              A chô liata eima reipazy hleikhô ta, kôthiehpa eimâ ngia hapa vâta eima palôh chhao pathieh ei sih la, hnôhlâ daihti, eima siesai hapa hmopha leipa zydua kha paza khao leipa ta, hmialâ ta hmo ypa, eima Awnanopa nata khitlâh, râh châta hmopha awpah nata chhôhkha ativy n’awpah châta hriapasa via lymâ sih la tahpa he eimâ pasyu khohpa a châ.

 

 

 

Mara reih hmahsiena

nata hmahsie via n’awpah

 

~ AZ. Beimopha, Amôtlâh

 

( He Essay he BML Essay aropasuana 2019 liata lymâ sâkhana adaopa a châ.)

 

 

              Eima pahrâna khizaw kawh ngaitapa liana heta Chô Khazoh ta reih nano nanopa maniah pie chyu ta, keimo Mara sawzy chhao chi nata pho châna siapa eima hnei thei n’awpah ta ‘Mara reih’ ângia ngaitapa maniah piepa he Chô Khazoh hmosai piepa rônah ngaitapa a châ.

Chavâta, reih hropa zydua hlâta Mara reih he angia chai ta, kho chhao â chhih chai hra. Khizaw reih hry liata reih hmahsiepazy hry liata chhao pahlaopa a za châ hra. A râh hneituhpa ‘Mara sawzy’ heta pasô thai kawpa ta eima palaiseihsa khiahta cha chi hro pho hropazy chhaota vaw pasô via hr’aw ei ta, kho â chhihzie nata â ngiaziezy chhao ama vaw hmô / pahno lymâ hra aw.

Atanoh khizaw hmahsiena anano lymâpa hawhta, Mara sawzy chhao eima reih ‘Mara reih’ palaiseihsana kyh liata hmahsiena lâpi eima pangai lymâpa ta â lâ. Mara reih ta ropa bie nata hlazy hmâpa ta kho-iah za hnei pathao lymâ ha hra ta, châbu nata thâtihbu hluhpi eima za hnei ha bâ. He heta Mara reih hmahsiena thata a tlôkhei tahpa â lâ pasia ngaita kaw bâ. Bieso miakha ta, “Kô nata khih hluhna lâ châ leipa ta, hmotaopa na tlao a châ tyh” tahpa hawhta Mara reih hmahsiena châta hla nata bie apahâhpazy hmâpa tap y nano nanopazy chhao â vaw duah lymâ ei ta, py thokha hluhpi ta ama tlô pha leipa ‘Mara Writers’ Club’ zy hmâpa ta Mara reih thapasatuhpazy ama za hluh ngaita kaw bâ. He heta Mara reih liata thata hmahsiena a tlôkhei tah lei thei ma pi.

He hleikhô ta mo pakha, py nata sawhkhâ (Department) nano nanopazy phahnaingiahna nata hriapsana zawhzi ta Mara reih hmahsiena khochhih kawpa za hmô lymâ pi ta, kô tota Mara reih ta châbu nata thâtihbu reih awpah hluhpi eima vaw hnei ha bâ. Chahawhhrana chata, social media nata print media siepahliepa ta Mara reih apachuna thiehpa siekhei pathao hapa vaw châ ta, khizaw su nano nanopa liata apahrâpa Mara sawzy ta facebook, whatsapp nata internet tawhta Mara reih amâ vaw chu thei n’awpah ta Mara reih achuna video zy chhao pachhuahpanohpa a vaw châ haw. He hleikhô ta hla nata bie apahâhpazy tha apathy via n’awpah pachâpa ta kô tota Mara reih châbu nata thâtihbu apuapa phachaipa atlyhna nata, py nata sawhkhâ nano nanopazy hriapasana vâta châ aropasuana (Essay/Article) zy ama vaw pachhuahpanoh tyhpazy heta kao totie liata Mara reih hmahsiena pha ngaitapa a vaw tlôkhei tah lei thei ma pi.

Reih awpah hluhpi a y. Cha hawhta Mara reih kao totie liata hmahsiena hluhpi eima za hnei ngânona heta kheihta e Mara reih he hmahsie via sala, Mara reih hmahsie via n’awpah ta eima tao aw? Khâpa hmozy hema peimawh? Tahpa he eima pachâ khoh chyu awpah he a byuh ngaita kaw.

Ahmiatua chai liata cha, chi nata pho châna liata eima sia tuachai awpah he a byuh. Mara reih pabohsa ta hmahsie via n’awpah ta chhaichhi peimawh kawpa sâkha cha, chi nata pho châna siapa eima hnei tuachai awpah he a peimawh ngaita. Na reih, ei reih, mara reih he nâma nata keima, mara sawzy ta eima cheih/hmâh vei khiahta cha chi hro pho hropazy ta maniah cheipa beih aw veih ei. Chi hro pho hropazy chhao Mara reih tlai ta eimâ chho/daoh hnolo khiahta cha mara reih he vaw thai aw ei ta, hmahsiena lâ a pangai via laih lymâ aw. Chavâta, chi nata pho châna â pahnopasiapa ta, a hneituhpa châna palôh eima phaoh awpah he a peimawh.

A mianona liata cha eima râh ryureina opi laichaipa (MADC) nata Awnanopa laichaipa (ECM) zy he Mara reih hmahsie n’awpah kyh liata hmahlatuh chai awpah ta peimawh chaipazy ama châ. MADC nata ECM chaipazy heta Mara reih ama cheih/hmâh hluh awpah he hmo peimawh ngaitapa a châ. Cha hawhta mara reih he lei leipa ta âbohpa ta a y lymâ thei n’awpah ta hmah a la thei chai awpahzy ama châpa vâta âlâhâhpa nata a sianô kawpa ta reih â chhuahna (policy) pha kawpa ama hnei awpah a byuh hra.

Awnanopa he py (Civil Society) thatlô chaipa a châpa vâta, Mara reih pabohsa ta hmahsie via n’awpah kyh liata sawhkhâ rei leipa ta cha a hria thei chai awpah hawhta pachâpa ama châ. Chavâta MADC nata âpakaohpa ta Mara reih (policy) sianô kawpa hneipa ta, ama tao awpah he a byuh. Zawpi, vâtlâh nata achhyna o apôhpakhyna su daihti lia maih ta cha mara reih he eima hmâh hluh awpah byuh ta, chi hro pho hropazy maniah a vaw pahlaopa ama y daihti lia chhao mo pakha pano vâta reih hropa hmâh thlâh ha leipa ta, eima pikheipa reih (Mara reih) he hmâh lymâ eimâ chhuah chyu awpah a châ.

A miathôhna liata cha Mara râh khih nata vaihto liata Mara reih he abei chai awpah a châ. Atanoh he kyh liata a hlaotloh thei n’awpah ta cha hmeiseihna ta hmahla awpah he a peimawh ngaita. Phoryhpa (Culture) aduana nata abohna cha reih he a châ. Chavâta athaipazy ta ‘Reih he phoryhpa cha a châ’ ama tah tyh. Chi hro pho hropazy eima râh lia a vaw paihpa/ a ypa zydua ta cha Mara reih he ama thai hra awpah he a peimawh kaw. Cha hawhta Mara râh lia a vaw ypa chi hropazy ta mara reih achu ta, ama thai thei n’awpah châta mara reih achuna siku (mara language center) MADC ta paduapa châ sala, tahpa he a peimawh ngaita kaw.

Chahawhhrana chata atanoh Mara râh chhôh liata khih nata vaih, chavah nata tlâh a ypa he Mara reih cheingei sai ta eima roh/reih hluh lymâ awpah he a byuh. Vaih thiehpa tlyma, moh thiehpa tlyma, kheihawhpa chhao rai moh bi byuhpa chi eima râh chhôh liata a ypazy he Mara reih ta bi lymâ ei suh u. Moh he chi nata pho châna maniah palâsatuhpa a châ tahpa pahno ei sih la, a pachaipa ta chyhsa moh eima bina kyh lia chhaota Mara reih cheingei ta bi lymâ awpah he eimâ chhuah bâ chyu awpah a châ.

A miapalihna liata cha eima reih aboh ta hmahsie via n’awpah ta tao awpah nata hmochhuahpa /ryhrao chhielienapa (programme/project) nano nanopazy hneipa ta tao lymâ awpah he a peimawh. Mara reih hmahsie via lymâ thei n’awpah ta eima râh nôpawpazy ta hmialâ daihti saithainapa (vision) pha kawpa hneipa ta programme nata project nano nanopazy a patuapalua lymâ awpah he a byuh hmeiseih. Mara language research and development department lai ngaitapa a hnei awpah he byuh ta, he department châ heta sôh chhao âdaihpa ta a soh awpah nata a hria awpah chhao a peimawh hra. A yzie cha mara reih hmahsie via n’awpah ta cha MADC ta sôh thata hmâpa ta, programme nata project hluhpi a hnei awpah tahna a châ.

A miapangawhna liata cha Mara reih ta châbu eima papua hluh via lymâ awpah he a peimawh. Mara sawzy ta châbu reih awpah hluhpi eima hnei via thei n’awpah ta châbu, thâtihbu nata magazinezy eima papua hluh awpah he a byuh. Cha hawhta a châ thei n’awpah ta eima râh nôpawpazy ta mara reih ta châbu arohpa nata a papuapazy hnohta baona pie lymâ theipa châ sala, chahawhhrana chata mara saw keimo nata keimo acheihchalo rairie thaipa ta châbu chaleina kyh liata eima ria a pha via awpah he a byuh hra. Eima reih (Mara reih) ta châbu a pua tlakaihpazy he pasôpa ta, chalei lymâ eimâ chhuah chyu hra awpah a châ. He heta Mara reih hmahsiena hluhpi maniah pie ta, chi nata pho reih thapasana chhao thata maniah a pahneisa hra.

A miacharuna liata cha Electronic media he a châ tah ei sih la eima reichhei thlyu nahta pangiasa achhih vei. Mara reih hmahsie via n’awpah kyh liata chyhsa pahnie chaipa nata râh la chatlie chaipa a châ hleikhô ta, nohto eima hmôpa nata theipazy hmâpa ta chyhsazy palôh liata rai a hriana dâh chhao â pahthu via.

Nohto ta eima mohkhaoh ta eima hmôpa nata theipazy hmâpa ta eima reih he hmâh hluh via lymâ sih la, eima phuahzâh hluh via lymâ awpah he a peimawh. A pamosana ta : Tlaikao. Hindi, English nata Korean Film (Video) zy he eima reih (Mara reih) lâta a hluh thei chaipa ta patohpatiapa ta hmahla bâ hra ei suh u. Chahawhhrana chata Mara reih ta hlasapa nat biereipazy chhao mopa ta nahthlie hluh via ei sih la, a kawh viapa ta eima pachânazy chhao hmâhpa ta, Mara reih programme zy chhao tao baichhi via lymâpa châ sala, tahpa he a peimawh ngaita kaw.

Chahawhhrana chata, keimo Marapa nata Marapa likah liata bie a chho n’awpah chhochhi cha Mara reih sai he eima hmâh bâ awpah he a peimawh. A nô nata a paw marapa châ thlâh ha tlôh ta mara reih ro athai leipa, cheih thei leipazy he khizaw liata zakheichhih chaipa chyhsa ama châ. Ama pahrâna nata ama khihsana vâta a pikheipa reih thai hra vei sala, a nô nata a paw, a chhôhkha tawhta thai thei ta, achu thei hra. Chata châ leipa ta thai achhuah hrahro leipa, achu chhao achhuah hra leipa saw, a pikheipa reih mohnaopatuhpa cha vârâh chhao to sala pangiasa achhih vei. Chavâta Mara sawzy he kyh liata thapi phia viapa ta Mara reih hmahsie via n’awpah pachâna chôta hmah eima la via lymâ awpah he a peimawh ngaitapa a châ.

A chhâ chai n’awpah ta cha hmo chynawh kawpa ta alâ tlôh ta, châsala Mara reih hmahsie via n’awpah liata chhaichhi peimawh kawpa sâkha cha Mobile phone he a châ tah leithei ma pi.

Atanoh khizaw thaina sona âsâh lymâpa liana heta moble phone hmâpa ta internet-facebook, WhatsApp nata Social networking etc, liatazy Mara reih he eima hmâh hluh via awpah he a peimawh ngaita. He hawhpa liatazy ta mara reih eima hmâh hluhpa nata phuazâh (broadcast) tawhpapua hluhpa heta Mara reih hneirôhzie palâsa ta, chi nata pho châna Mara reih laiseihna nata hmahsie via n’awpah ta chhaichhi peimawh kawpa sâkha a châ. Chavâta ‘Mara reih hmahsiena nata hmahsie via n’awpah châta tao awpah nata abyuhpa chhaichhi peimawhpa eima reipa zydua he Mara saw nâ nata kei, eima zydua ta ‘moto’ palôhlia rie sala, khizaw chi nata pho reih aiekhyhna thlihpipa tawhta abohpa ta eima y lymâ thei n’awpah ta chi nata pho châna liata sia ei sih la, thapasana nata kyhpachâna palôh phaoh bâpa ta eima reih hneichhôhpa Chô Khazoh ta maniah piepa “Mara reih” he zakhei leipa ta pasô via lymâ ei suh vy.

 

Ei châ ly kaw ei.

 

 


VÂ-IAPA CHÂPAPHAOPA

(LOVE  LETTER)

 

~ Rc. Beiduakhei Nohro, Tisi

 

( He Love Letter he BML Love Letter aropasuana liata lymâ sâkhana adaopa a châ.)

To,

             

                                          

                             Ei kho,

                             Siadi Mara.

                            

Keima dao,

                             Khizaw noh nata daihtizy heta, ei palôh khozie nâ hlykhei thaipa châ mawh ei sala, na châta la, iadi thosôh maihtôpaw hawh dei khâ pawh awpah ei khoh.

                             Nâma leipa ta kei châta nohkha chhao he, kô reipi vaw châ tyh ta, zâkha chhao he noh hluhpi nata zâ hluhpi hawh deita ta ei vaw pachâ tyh. Yru khiahlô pai n'awpah dei pachâpa ta, chhaolei lailâh tlâhzawh-nohri chhao pachâ lei ta tuhpikali yrunô hawh dei, na thâ khâ chângieh laih tyh na! Ei chô thlarâh nata Awhsicharu zy khita, ei 'di' vâna chhôhso he na taokhei hra mawh ei se; tahpa ta hâzohchhihki vyhai ry lia mokuh ramâ khaih tyh na. Ramâ lyuhchâ tuah thaipa châ mawh sala, 'di' ei cha vâna chhôhso he, zâto ta cha chhochanei’pah ei khoh tyh. Nâma leipa ta he chhiesana khizaw he kei châta la, zohna meihthâhpi â zawhna râh hawh deita a za châ! He khizaw liata ei charei chhôhta, lyna kipa nâ pietuhpa na châna he, khizaw zasâh-mahnôzy heta khâ na pahno khei ei sala, atanoh ta kyh ei cha pachâna hawh heta mylâhanoh ta, noh nata daihti a vaw y lymâ awpah taih chhaota khâ ei cha pachâ aw, tahpa chhao ei châ taih chanei.

              "Khizaw he na châta taopa châ ta, nâ deikua khizaw châta taopa châ va chi" tahpa bie na reipa kha, chhôhso lôhpi lia rai za thi thei vei. Na bie he, kei viavi lômaoh châ heta la, kyhpachâna lâthlôh dopa nâ pachhihsatuhpa khâ a châ; za tah lei thei tyh va na. He khizaw khaihna hmô awpah ta ei thlôhchho nôpih py chhôh tawhta ei sâh hluhpi hmahta vaw pih chanei hr'aw sala, nâma hawhpa he la â tyh khao aw va na. Ei khizaw khaihpa nata kyhpachâ chaipa na châ. Na mopadei nata nâ pielyuzie heta, kyhpachâna nata ngâchhihna yzie na pachu tyh ta, na hnazô khochhihna nata pawngianazy heta, kyhpachâna dopa a sôhzie nata kho â chhihzie khâ eina chhochanei tyh. Keima dao, kyh ei cha pachâna he bie ta reihpasia thai’pah châ mawh sala, luhchô-bydi thâ rai angiah lei ta, a chhô a zâ bâh leipa ta khâ cha chhochanei tyh awpah ei khoh tyh. Nâ ei châ tyh hlâta la, kyhpachâna yzie chhao pahno leipa na ta, khizaw pawngiana nata khochhihnazy chhao he, kei raihrao lôhmaoh paw châ heta, khatluta mah a za châ; tahpa chhao pachâ beih hra va na. Ei hrozô mopadei nata ei palôh zohna meihthâhpi ta a khu haipa chhao, khataih thlihuah naizualua bao cha ma, vaw papai aw!! tahpa chhao saduthliena chhôhso rai za hnei beih va.

Thyudyu chhôhso lôhpathaihpa ta ei khizaw noh nata daihti cha vaw hmâh laih na ta, sietuapazy ta leilô phôryh pakipa ta kyhpachâna lâhaw ama vaw sa chiehpa khôkhâh leipa ta, khizaw kyhpachâna pawti zyh hra awpah ta liahri taipa ei chânazie chhao a pahno va na. Tahmâ nâ ei châ tyh tawhta, ei khizaw hro he â lyna nata thaphana ta khâ eina bie, za tah leithei tyh va na. Ei khizaw khaihpa nata ei lôhngâhna chaipa cha na vaw châ tlai na! 'Rianai'!! Ei y ru châhta la - Cha Mawmâ thlihuah naizualua bao cha la..a iadi meihthâhpi hawh â zawh; tao thai a ru hawthai lômaoh chhôhso lia.. tahpa dei he khâ ei za reih tyh.

                Chhôhso lôhkipata eimâ kao laihna tlâhzy rohpadyna mothlaw lia rai za thi thei vei. 'Di' laihla hro thâ rai a ngiah lei ta chhôhso lôhkipa ta na kiah lia noh nata daihti hmâh bâ awpah ei vaw khoh dâh rimâ bao cha la!!. Hnah pangâhtuh hnei leipa hawhta zasâh molâh hry liata, noh nata daihti hmâpa he lôhiah â vaw chhih tlai na!! Nâ ei cha vâna yru chhôhso he ahyta hmahta na pahnokhei thaipa y tlôh ei va. Nâma leipa ta khizaw noh nata daihti hmâpa he, yru chhôhso vâsâhna sai na a vaw châ. Chhaohlei lailâh hrozy dei na, lôhkipa ta a kao laih ei, khati kei châ lyna noh  a chhi hr'aw vâ tly, hnazô hmô awpah hra cha y thai tlôh vâ, tahpa ta na thângiahna dei khâ ei za reih tyh.

              Ei palôhrupa nata ei chhôhso pachânazy heta, na kiah liata khatino raita noh nata daihti hmâh awpah khoh ei ta, khizaw sôh nata piah ta a chalei thei leipa, alyna nata lôhtlâhna kipazy cha pie ta, ei saduthlienazy nohto ta cha chho tyh awpahzy he, ama vaw khoh kaw tyh. Daihti nata nohzy cha lei lymâ ei ta, kô nata khihzy chhao a sie lymâ hra, leilô pawngianazy chhao pawna daihti nata nohzy hneihra ei sala, lona noh ama hnei thlyu heih tyh. Ei 'di' nâ deikua chhôhso lia na thieh via rili tyh. Chô-Khazoh ryhraopa noh nata daihti vaw chhi tyh bao sala, lôhliena meihthâh hawh papaipa ta, lôhkipa ta na hnazô sâhmia hmô awpah ei vaw ngiatiah lei dâh rimâ bao chala aw!!.

              Khizaw sawhkhâ phana padipa ta achuna o phapa nata supipa liata y hr'aw sala, hezy heta lyna kipa na pie thei tlôh ei va. Chysia phapa nata mâ ru kawpazy a tao hr’aw sala, ei pawngiana a pakituhpa cha nâ dei he châ tlôh chi. Khizaw hneirôna tlaichhaipa ta ei pahrâna suzy chhao he, 'Taj Mahal' hawhta a rônahpa hmah châ hra sala, rônahna a cheihchalotuhpa na ta, lyna nâ pakituhpa cha, nâma dei he na châ. 'Di' nâma leipa ta khizaw he kei châta la, chhiesana khizaw deita tlâ a vaw châ he zaw!!. He khizaw khaihna hmihmô hra awpah ta kyhpachâna ta a sapapuapa ei châna he khatih no hmahta my leipa aw na ta, he khizaw lei rietheina, nôpo pachârôhna nata rairuna hluhpi hry lia chhaota, kyhpachâna a rônahzie nata a sôhzie padi lâh awpah ta ei châta nâ piena zydua ta chhao, my thei beih hra aw va na. Thlihpi rupa nata alosihpazy chhaota ei kyhpachâna he, pahleipadia thei beih leipa aw ei ta, tisaihpi nata tilaipizy chhaota vao pathlah theih hra aw veih ei. 'Di' nâ ei kiah lia na y khiahta la, râh rôhchawhpa nata Siberian noh palopa hry lia chhaota hmahta nodi thachhâpa ta y beih aw va na. Nâ he ei khizaw lôhngâhna, abohna nata ei lyna chaihpa cha na châ. Ei ngâchhihna chhôhso he, na iadi zôh ta khâ chazai sala, ei palôh phaozie chhao he na pawngiana (serafim) rohpahâh cheingei khata, zasâh molâhzy hry lia chhaota tleih beih lei awpah ta khâ panano tyh mawh sy.

             

              Yna tlâhzy a vaw lyu vei chy hra sala, 'di' na châta ei ngâchhihna chhôhso he khati no hmata tleih beih awh vei. Ei hnazô pawngiana nata khochhihnazy heta, Molâh pawmaih chhôhso vaw tiah tyh hra sala, ei palôhru nata chhôhso ngâchhihna deikua la, khatino hmahta châ heihsai leipa aw ta, cha tleisai beih hra aw vei. Leihkah haihpazy ta na palôh pahnie leipa ei sala, tiah hra khah ei se!. Na châta ei ngâchhihna he Chôkhazoh pahnokhei lymâ awpah ta, ramâ lyuhchâ (luchô care of) vaw tuah tyh aw na ta, â chhyna khâ vaw hâ tyh mah y. Hmiahmô hlâlei zâto châta mâpha.

 

             

            "Kyhpachâna ta râhri ahnei beih leipa hawhta, yna nata chareina tlâhzy a vaw lyu vei hra sala, lôhmiakha ta syhpahmaotuhpa cha, kyhpachâna he a châ".

 

 

 

Na châta khatino rai ta ngâchhihpa,

                                                                                                    

Rc. Beiduakhei Nohro

Tisi

                                                                                     

                                                                                     

 

 

MORAL  REFORMATION

 

                                                                                                                                               

~ H. Beilaikô Nôhro

                                          

 

              He biepipa  he  a  rainao  vianazie ta  he  hawhta  mongyuh  reih (English) ta vaw soh na ta. A yzie  deikua  cha  moto  ta  eima  pahnothai  chyu  nahta  ei pangiasa. Keimo  reih (mara reih) ta cha “Palôh phaozie” tahpa  ta  eima  palie  thei aw. Tlaikao reih (maw reih) lâta  cha “Rilru  sukthlêk / Rilru puthmang” tahpa  ta  eima  soh  thei  hra  aw. He  morality (palôh phaozie) tahpa  he  Latin reih “Mos” tahpa  tawhta lapa châ ta. Cha yzie cha, taodâh(custom) tahna a châ.

Mongyuh reih (English) lâta  cha “Ethic” tahpa  nata  â chhuahna â lyupa  châ ta, a sâno  lâh  heta hmo dopa nata  hmo  do  leipa  pathluana  châta  hmâh  rairiepa  ama châ (concept  of  knowing  Right  and wrong ). Morality  tahpa   reihkah  heta cha  pachâna dopa (good attitude, positive thinking), hmo dopa taona, hro dopa ta hrohpa (good character) tahpazy  dy  via  chai ta. Ethic  tahpa  reihkah  ta deikua cha, yzie ngiapa (good manners) palôh-hâh, nokhihpa, pachâna pahnopa (good behaviour) pachâna  dopa  tahpazy  a  dy  via  chai  aw.

              Khâpa rai châ sala, a yzie  nata  â chhuahnazy  hlâta a peimawhna nata eimâ ngiahna lâchhâh  he  tlao  reih  tua  ei sih la. Chysapazy  eima  thaina  â  sâh via lymâpa vâta  eima  hmahsiena  chhao  a chatlie  ngaitapa ta  avâ  ziza  hawh  dâhdei  ta  â thlathlâ  ngâhthlâh  hra ta. He hawhta  thaina  nata  hmansiena  â thlathlâ  ngâthlâhpa  daihti  liata  eima  y  vâ tlaina heta,  eima khihsa tôhtunazie, eima  hrozie  nata eima  palôh  phaozie  chhao  buakha  dâhdei  ta  â thlathlâ  ngâthlâh  hra  ta. Maniah  taotuhpa  eima  Khazohpa (Abeipa) tlai  chhaota eima pachâna (palôh phaozie) nata eima khotlyna  maniah  pakhâ vei tawh tly cha, ahy  saliah,  hrozie, palôh phaozie nata pachâdâh hmahta  panano  thei  tlôh  pi va !  Taopathina  nata  padona    hlâta  cha  paraona    he a rainao via  lao  heih !  Khizaw  lia  eima  vaw  pih  noh  tawhta  eima  vaw  laiseihna  ochhôh  liata  eima    nata  paw, eima  unawh  chhôhkhazy ta  thata  maniah  pachu  ei ta. Khizaw hmahsiena achadaipa ta thaina  sona  eima  tluana  su  siku (school) zy  liata  eima  pachutuh  penawhzy ta thata maniah  pachu  heih  ei ta.

Chadei  châ  leipa ta  achuna  asâh viapa  College  nata Universities  zy  liata chihro  pho  hropazy  hnohta  â  pahlao  hrapa ta  achuna  lâta  dawhty  degree  taihta  ahnei ha penawhzy ta  maniah  chho  via  heih  ei ta. Cha  khôlâ  liata  Krizyhpa  eima  châna  hawhta  eima hâti  no tawhta  eimâ  vaw chu  tyhpa  Khazohpa  noh  siku (Sunday school) liata Abeipa ta sathaw athu penawhzy ta  maniah vaw  pachu  tyh  ei ta. Cha tlu ta  achuna  kao (su) nanopa hluhpizy liata thata  eimâ  vaw  chu  patlô  khai  ha  tawh  chhaota. He  palôhru  phaozie  dopa  he  phaoh thei  hlei  mapi ! khâpa  hema  a chhâpa lai ngaita kawpa  a  châ  haw vâ tly ?

Chyhsapa ta eima  vaw y no tawhta  moleina â vaw  tlyh  viapa  nata  a vaw  khoh via hapa, a vaw  hrokhei tyhpa eima châ  vâta  a châ  nahta  pangiasa  â chhih. He hawh  tlupo  ta  pachuna  phapa  nata  pachuna dopa eima vaw dao ha tawh  chhaota  a  hrokhei  thei leipazy cha  eima  khotlyna  eima hmâh  chhei    nata  moleina  lâta  palôh  eima  pahei  tu vâ  a  châ  thei aw.

              Aduah hmahta  a siepa chyhsa  to ta  he  palôhru  phaozie  dopa  he  peimawh  ta, khâpa chi nata  pho  chhaota  peimawh  ta, py aduahpa (Association/ Organisation) to ta  peimawh ta, Angiapâtuhpa  ta  peimawh  hmeiseih  ta, eima  râh  ta  eimâ  ngiah  via  pachai  heih.

He palôhru phaozie dopa  heta  eima  mo (eye / eye  sight ) maniah  pahvâsa ta, eima  khotlyna  siapa  nata dopa maniah pahneisa  ta, pachâna  dopa (insightness)  nata  hmialâ  daihti  sai  thaina  maniah  a pie.  Hmoto  khâpa rai a châna  dopa  maniah pahmôsa ta, cha  hmo  dopa  hmô  pasiana  nata pahnopasiana  chata riahpha ngaitapa ta  adona  liata  â duah lymâ  thei awpah ta maniah  bao ta, hro ta  tao ta, maophyuhkhei ngâh  awpah  taihta  riahphana  nata  thatlôna maniah  a pie.

He  hawhta  palôhrû  phaozie  dopa   aphaohpazy  heta, kheihawhpa  hmo rai  he  a châna  dopa hawhta  ama  hmôdâh  hawh  tlai ta  reih papua  ngâh ei ta, reipachhie  ngâh  hra  ei  ta, amâ  dyuh  ngâh tyh.  

China  nata  thlazohnazy ta  pachhipary  thei leipa  ei  ta. Reipachhiena  nata  ahaona ta pahnie  thei  hra  veih  ei. Hmo do  leipa  reipa  nata  taopazy  amâ  dyuh ngâh vâna  chata ama hro tlao  a  thatlô  via  ta, ama  thapha  via  ta, riahphana  nata  alyna  ta  ama  bie  hri  tyh. Daihti  nata nohzy  a  khô  lymâpa  chata  â mo cha, “Chyhsa  rônahpa, chyhsa  chônô  viapa”  tahpa  ta  a  vaw  pahno  tyh ei. Chhâ  nata noh  a  vaw  tlô  lymâpazy  chhao ta, Reithaina  nata  palyupalihna  a vaw  hlâ  lymâ  hra ei.

Tahmâhlâ  khizaw  chyhsazy  eima  laiseihna  liata  deikua, chyhsa  hluhpi  ta  he  palôhru  phaozie  dopa  he  phaoh  thei  khao  leipa  pi ta, hnei thei  khao  hra  leipa  pi ta, hrokhei  thei  khao  hra  ma  pi !  chavâta  hmoto  eima  hmôna  dâh  a do khao leipa ta, hmô pasia  thei khao leipa pi ta, palôh  ta  hmo  eima  saizie nata  thliezie  a do  thai  khao  leipa  ta, eima  khotlyna   nata  bie  pathluna  chhao  a do  thei  khao  hra  vei.! A râhpa (white) cha,  a râhpa  ta  ngâh  khao leipa pi ta, avyhpa (black)  tlao  tah  pi ta. Chahawhna  chata  avyhpa cha, avyhpa  tah  ngâh  khao  leipa pi ta,  arâhpa  tlao  t’aw  heih  pi ta. Hmo  dopa  nata  hmo  phapa  cha, “A do vei,  pha  vei ” tah pi ta. Hmo  do  leipa  nata  pha  leipa  cha, “Â do, a pha” tlao  tah  heih  pi  ta. Eima  pathipalôh liata, “A châ  tlaina, ‘Yes’ ” eima  tahpa cha  eima  pakah (mouth) ta, “Châ vei, ‘No’ ” tah  heih  pi  ta. Eima palôh  liata, “Châ vei ‘No’ ” eima  tahpazy  cha  eima  pakah  ta, “A châ  tlai na ‘Yes’ ”  eima tah heih tyh. He  hawhta  palôhru  do  leipa  a phaohpa  eima  châ vâ  heta  eima  Beipa  Zisu  Krista  chhaota  khizaw  liata  â  vy  nona   khata, “Nâmo  hawhta  palôh  haihphiahpa  a phaohpa, nama palôh  ta ‘Yes’ a châ,  nama  tahpa  mai  nama  pakah  ta châ vei ‘No’ a tahpa, nama palôh ta châ vei ‘No’  nama  tahpa  cha  nama  pakah  ta  a châ  ‘Yes’ a tah  tyhpa  hawhpa châ va na. kei la ei palôh liata  â  do ‘yes’ ei  tahpa  cha  ei  pakah  chhaota  a pha ‘yes’ ei tah  hra. Ei palôh ta châ vei ‘No’ ei tahpa mai cha ei pakah  chhaota, ‘No’ ei tah tyh hra.”  Maniah  atahpa  hawhna  khata.   

He  hawhta  palôhru  do  leipa  eima  phaoh  tyh  vâna  heta  bie  dopa  cha â  dozie hawhta  a châna  reihpapua  ngâh  khao  leipa pi ta. Hmo dopa  pahno  thlâhna chôta  tao  awpah ngâhna chhao  hnei thei  khao  hra  ma  pi. Bie  dopa  reih  vâta   nata  hmo  dopa  tao vâta  maophyuh awpah  nata  rairuna  â  tyh  awpah  ngâh  chacheita  khao  ma pi. Chazy vâta  siana  nata  mohpha  lâthlôh  liata  â  chhih  awpah chhochhi  cha  eimâ  hla  ngaita  kaw  bâ.! Khazohpa chyhsa Lyuhchâpa Pawla (Paul) cha, bie dopa  a reih  vâta  mo hropazy hmiahaopa  a châ  awpah  kha â papeisa vei.

Tahmâ  hlâ  chyhsazy pi  deikua  cha  eima  palôh  phaozie  â do  tlâ khao lei vâta, adona nata  ngâchhihna  lia  aduah  ngâh  tlâ  khao  leipa  pi ta. Keimosasyh  kyh  a pachâna  ta  eima  biepakhô hapa  vâta  mo  hropa  pha  n’awpah  rai  pachâ  thei  khao ma pi.

Eimâ  ngiapâpa eima Beipa bie hrohpa  pachuna  nata  la  eimâ  eivâ  lei  ngaita  kaw ! Keimosasyh  â  hmô pha  ngaita  kaw pi ta,  mo  hropa  deikua  cha  khâpa  hrao leipa  nata  a thlâhthlipa  hawhta  pachâna  eima hnei. Hlâta â hnai  viapazy  cha  mohnaona  chito  ta  mohnao  pi ta, hlâta  â  sâh viapazy deikua  mokana, ahaona, a iekhyhna  ta  moh  pi ta,  pakah  ta  reithai (rei papha) thei  hra  ma pi.

A hneirôhpazy cha  a lei  eima  khazohpa  dâhdei   hawhta  â  chhy  pi  ta, rietheipazy  deikua cha  eima  pachih (saliva) dâhdei  ta  eima  pachhao!  Mo  laipa  nata  hmo  taotheipapazy cha  palôhpatlâh  achhuahpa ta reithaina  nata  palyupalihna  hlâna  chôta  ama  hmialia   â  thyvawh  khâh  chaimâh  pi ta, keimo  châta a phahnai  lei  awpah  nata  eima  peimawh  lei  awpahzy   deikua  cha  chavyh (bear) ta  a veithlupa  hawhta  eimâ  râsai  ha  tyh.

Samari  chyhsa  phapa  ta  deikua  cha  moto  ta ama  khôsai  khai  hapa  kha  a  bâh (by  the  hand) ta  pathyupa ta  a mohôhpazi.   Nôhmeinô    palohru  phaoh  pi ta, keimo ta  eima  to  tlôh  vei   khiahta   cha  mo  hropa  chhaota  to  hra  lei, hmô  hra  lei  tlâ  y  ei  se  tahpa  palôh  eimâ  chakaih  tyh.

 

Hmo  phapa  eima  pahnopazy  â  pahmô  ta  â  baokhâh (promote)  ta,  â palaipaseih via lymâ awpah  hlâta cha  eima   hneipazy  â  niekhei   ta  â pahleipadia  awpah  khona  he keimo liata lai via  syulyu  ta. Keimo  hlâta   hmo phapa  hmô  ta  â sâh  viapa  liata  a  y awpah  cha  khokhei  thei leipa  pi  ta. Keimo  hawhta  hro  thachhâpa  nata  hnabeidypa ta  a  vaw  y  hra  thei  n’awpah lâpi   lia  cha  khâchâ  â chhih  thomo  eimâ chhuah tyh.   

Keima   hawhta  vaw  hlaotloh  sala, â sâh  ngaitapa  liata  kaw  y  hra  sala, phasa ngaitapa ta  khih  kaw  sa  hra  sala  tahpa  khokheina   he  ahy chô lia  hmahta  hlâ  thei  ma pi. Abei  Sawla (king  soul) palôh  phaoh  pi ta,  keimo  hlâta  â  kaw  sâh  via  thei awpah chyhsa cha, atahmâ  tlai  ta  paraoparâ  ta  pahleipadia  awpah  khona  eima  hnei  lai  ngaita. Py liata vaw y  heih pi ta, châna  khohpa ta  bieru  to  â  khiekhei  pi ta, a luhpa  châ  thei  n’awpah  lâpi  eima  tlua  tyh.

Hyutuhpa   châ   awpah ta  keimo  he  atlâh  eima  châ  ma?  Zawpizy  ngâtlâh  awpah  chyhsa ei  châ  ma ? tahpa  rai  pachâ  beih tyh ma  pi !   do ma, do vei tlyma, a pha tlyma pha vei tlyma chhao  pachâ tyh leipa pi ta, eima  bie  cha  mo hropa  chhaota  maniah  amâ  pyhkhei  khai  cheingei  awpah  âhnawpa ta  eimâ  duakhei  chanei  ngâthlâh  ha tyh. Py  ta  maoh  a phyuhkhei  awpah  chhao  pachâ  khao  tyh  leipa  pi ta,  keimo  bie  thyupa  cha  pahniena  a  to cheingei awpah eima  khoh  tyh. Hmopha  tao  hra  awpah  cha  khoh  tlôh  pi ta, châhrasala  keimo  pachâna  do leipa   thla  thei  hlei  ma pi. Zawpizy pahnona  taihta  mohphana  to ta  chyhsa   hluhpizy  reithaina  nata palyupalihna  to hra  awpah  ta  hmopha  tao  hra  awpah  cha  khoh  pi ta,  châhrasala  cha  zydua  tlô  thei  hra  awpah ta  riethei  rairuna,  pasana, noza  hmiachhiena  nata  maophyuhnazy  deikua  tao  ngâh  leipa  pi ta,  a  khôkhâhna  eima  tlua  ha tyh. Tiamana  nata  hriapasana   liata  zachhihna  nata  moh  phana  a  y   tahpa  pahno  tyh  mapi. Mohphana  tluapa ta  â    teihtâ  tyhpazy  he  chyhsa  tlyuh leipa  ama  châ  tyh. A  chhâna   liata  cha  â mo  châna  dopa (real natures / pictures) amâ  zâ hmô  pasia tyh. Chahawhna  chata  chyhsa  thothâh  liata  khih  a sah  tyhpa (parasites)  zy  he  chyhsa  ngâhtlâh  lei  awpah  ama  châ  thai  kaw  hra.

Chahawhna  chata  chyhsazy ta  na  pahno  ei  sala, na  hmôpha  ei  sala, na  chî  na  za ei sala  tahpa  khopa ta  a  khaohrâh  tyh  chaimâh  pi ta. Châhrasala  keimo  chhôh lâ  liata  a do leina, ngâchhih  leina,  sia  leina  nata  pachâna  do  leipa  eima  hneipazy  siesai  â  chhuah  beih  hlei  ma  pi. Khotalaipa  eima  châpa  â  pahno  ngaita  kaw pi ta, keimo khodâh hawh  tlaita  hroh â  chhuah  tyh  pi ta,  mo  hropa  châta   deikua  khizaw  he  hriena  su  pachâsa  â chhuah  pi ta,  riethei rairuna  eima  taopa  tyh. Chyhsa  ta  eima  thâtih  a phana    saita  maniah  reih  ei sala  tahpa  khoh pi ta, mo hropa  thâpha  chyhsa  ta  eima  kiapâh  lia   ama  reipazy deikua  thei  thei  ma pi. Keimo  pachâ  ta  eima  hrozie  nata  ytu   khihsa  he  a pha, â  ngia, tah  pi ta,  mo  hropazy ta  kheihta  e eina  hmô  ei, kheihta  e  eina  pachâ  awh  ei,  tahpa  deikua  pachâ  tyh ma pi. Keimo  pachâdâh  nata  khodâh  hawhta  khataih  su lia  rai ta  hroh  eimâ  chhuah tyh.  Lyuhchâpa  Pawla (St. Paul)  ta cha, “ Khataih  su  lia  rai ta  y  dâh  nyupa / y  dâh  parupa  cha  ei pahno ” a  vaw  ta. (I’ve  learnt  the  secret  of  living  in  every  situation). 

Khizaw  sôh  he  khizaw  liata  a  pahrâpa   chyhsapazy  pi  ta cha  a  peimawh leipa  rai  y  cheita  ma  pi. Hriapapua  ta,  tlua  papua  awpah ta  eima   theina  zydua  papuapa ta  eimâ  khaohrâh  chyu   tlai  hra. Châhrasala  he  khizaw  beipa (Phusâ / Tâkâ)   heta  Byhnâ (Thlaochhina )  nata  Bychhie (vaduana / châmaih ) â  chakaih  rairie  ta.    do  ngaita  kawpa  nata a  sia  kawpa ta  hlao  papuapa  ta  cha ;  alyna,  thaphana, vâhneina  nata  byhnâ  hluhpî  tlôkhei  ta.   do  leipa  nata  a sianô  leipa ta  hlao  papuapa  ta  deikua  cha  vâduana, pochhina,  rietheina  tlao  a  tlôkhei  tyh. Chavâta  he  hmotaothei  ngaitapa   Phusâ, Tâkâ   eima  tluana  kyh  liata  eima  palôh  phaozie  â  do  awpah  a peimawh  hmeiseih. Eima  hriapa  â  phuhpa ta  eima  hlao  papuapa  khôlâ  tahpazy  he  cha  khopasa  tûna  vâta  hnei (avyuh)  thomo eimâ  chhuah awpah  châ  vei. Chyhsa  dopa  nata  chyhsa  ngâchhih   hmeiseihpa  pasiana  pha  chaipa  chhao  a châ. Zu  (jews) nawh   bieso  ta  cha, “Chyhsa  dopa  cha  ei  kha  laichai  ta hneirôh  beih vei ”  ama vaw tah.

              He  hawhta  palôhrû  phaozie  dopa  phaoh  leina  chôta  a chô  vâphuhpa liata  vaw  chareipa ta  eima  vaw laiseih  tyhna    heta, hmo  phapa  eima  hmô  awpah  hawhta  hmô  thei leipa  pita, hlaotlohna  eima  to  awpah  hawhta  toh  leipa  pi ta, vâhneina  nata  khokheina  eima  hmô  awpah  hawhta   hmô   hra   leipa  pi ta, A lei  nata  avâ  byhnâ  eima  to  n’awpah  hawhta  to khao hra ma pi. Cha  chata  aly  thei leina  maniah  pie  ta, hro   thaphana   maniah  pie  thei  khao  vei. Tovyuh  palôhtlâh  leina  nata  mo  hropa  mokana(ahaona)  keimo liata  a  palaipaseihsa  via  tyh.

Chatanachata  eima  tovy  cha chhie  via  ngâ kaw ta, riethei-sipasanazy ta  maniah  tlathlu  via  lymâ  ta, eima  palôh  deikua  â palai  via  ngâ  heih  ta. Hro  palôhtlâhna  nata   aly thaphana  rai  hnei thei  khao  leipa  pi ta, hiehâhna  nata  bie  pha  leipa  reih  khohnazy  cha keimo liata  kaw  pua  via  lymâ  ta. Keimo  thai  â  pachâ  kawna  chôta  mo hropa  maochhie  awpah kha tlua  pi ta, keimo  deikua   â  taopathi  a chhuah  beih leipa ta  mo hropa  taopathi  eimâ chhuah tyh. Hro ta  a  pahnie  khao leipa hro chhâna  taih eima kaw  tlô ha nahta deikua maniah  taotuhpa taih maochhie  khoh  pi ta, eima  hrona sôhpa  taih  chhao pahleipadia  awpah  pei  tah  khao  ma pi.

Cha  khiahta  cha  kheihta  e  cha  palôhrû  phaozie  dopa (good Morality) cha eima hnei thei aw? A hy  tawhta  e  hmô  thei  aw  pi ta, eimâ  chu  thei aw? Khataih liata  e  a  y   aw  vâ tly i? Tahpazy  cha  hiahrina  a ypa  a  vaw  châ  haw! Atakô - 2019  pa  châta  apahrana  achuna bu bo-20  na  liata  râh  raona  kyh  a za  reipa  nata  a  paduapthina (taopathina) awpahzie a reipa hawhna  tlai  khata, he  liata  eima  biepipa  chhao  he  a vaw   châ  hra. Eima  palôhru  phaozie a do leipa  he  ahy  vâta  hmahta  châ  leipa ta, keimo  thai  leipa  nata  eima  khotlyna  hmâh  pado lei    tlai  he  a  vaw châ. Cha  hawhta  a châ  vâna  chata  palôhru   phaozie  dopa  nata palôhru  pathaihpa, palôh  khochhih  ngaitapa  hnei thei  n’awpah  ta cha keimo tlai he eima peimawh. Eima  chhiepha   pahnona(conscience) do  ngaita  kawpa  he  eima  hmâh  pado  thai awpah  a peimawh.  

He  eima  chhiepha  pahno  hmâh  pado  thai  awpah  heta ; eima  ochhôh  liata  eima nô  nata paw  pachuna  nata  chhoreina  eima  nahthlie  pha  awpah  a byuh. Khôtho  lâta  eima  hlâta  uhthei  viapazy biereipa  nata  pasipa-aona (Advice) eima  nahthlie  thai  a  byuh  hra. Awnanopa liata a pahlao  hrapa ta  ama  pachuna  nata  pasyuna  eima  nahthlie  hluh a byuh. Achuna  sâhpa  eimâ  chunazy  liata  heih  sohtlâh  â la  hrapa ta  hmo  dopa  nata  phapa  eimâ  chu  paru  thai  awpah  a peimawh.

Eima  khotlyna   hmâna  kyh  liata   biethluna  taozie  eima thai  awpah  â ngiah  ngaita. Chyhsa  hrozie  do  leipa  a phaohpazy  tawhta   eimâ  pabohsa  awpah a châ. Eimâ ngiapâna vâta  hmopha   taona  kyh  liata  keih  eima  chakâ  lyhlia  awpah  nata  eima  tao  hualua  hra  awpah  a châ. Reipachhiena  nata  mohnaona  no-ai  tah  kha  ei  sih  la,  ahao  hra  kha  ei  s’u. Hmo  do  viapa  nata  hmopha viapa  pahnopapua ta, taopapua  via  lymâ  thei  n’awpah ta  tha maniah  patlôtuhpa  tlao  vaw  châ  se.  

Eima  pathipalôh  he   eimâ  vao  pahnie  awpah  a  châ. Khâpa  hrao  leipazy  liata  eima  hie  a hâh  chakhyh  ngâthlâh  awpah  châ  vei. A  pathi  a  ia  ngâthlâhpa  chyhsa  cha  chyhsa  hrupa  a châ. Nônai  nôphana  hro  he  hnei  achhuahpa ta  eimâ  chu  lyhlia  awpah  a châ. Zawngiah theina he  chyhsapa  hro  liata  a rônah  chaipa  miakha  a châ.

A ngiahthaina  hro  he khâ eimâ chakaih awpah  a châ. Eimâ  ngiahthai  theinazie  lymâ  hawhta  eima  taochheipa  chô  liata  ngiahthaina  eima hmô  hra  aw. Ahaona  he  phahnaina  hnei vei,  keimosasyh  hro  rie  â  patheina  dei  a châ. Tovyuh palôtlâh  thaina  he  hneirôna  dopa  a châ tahpa  he  hrokhei  lymâ  ei s’u. Isina  nata  hiatliana  palôhru   deikua   he  keimosasyh  ru  â pahmyna  tlao  a châ  tahpa  pahno  ei  si. Chîna  he  â  thôhbiena   hnei  hlei  vei, keimo  hro   rie  â  patheina  dei  tlao  a châ.

Alyna  thaphana  he  tlua ta  hmô  thei’pah  châ vei, keimo  tlai  ta, taopapua  ta  hriapapua  awpah  tlao  a châ  hri. Hmo  dopa  pachuna  nata  khokheina  he  keimosasyh  châta  vahneina  lâpi  pahyna  a châ. Pakahpaleih  asohsi  theina  nata  hro  asohsi  theina  he  maniah  vaihtuh  pha  chaipa  tlao  a vaw châ. Bible he hrona  chabu  dei châ leipa ta  eima  nohto (every  day  life) hrozie  awpah  nata  ytu  khihsa  n’awpah  maniah  pachutuh  pha chaipa  a châpa  vâta  bâh  leipa ta  khâ   reih  tyh  suh vy. “Na  pathipalôh  vaih  pahnie  teh, hrona  a vaw  puana  châ  tlôh ta.” Tahpa  hawhna  khata.

Chatanachata  he  hawhta  palôhru  dopa  phaoh thei  awpah  nata  hnei thei  awpah  heta, chyhsa  hropa  liata  a  pahnieh leipa ta. Pachuna   nata  chhoreina, pasyuna  phapazy, dei  châ  hra leipa ta,  keimo  tlaita  pahno  â  chhuahpa ta  achupa ta  hrokhei (experience) eimâ  chhuah  awpah he a  vaw châ. Ti (water) thâtih   na  pahno  khoh  khiahta  cha  nga (fish) hiahri  khâ. Tahpa  bieso hawhna khata  he  hawhta  hmo  phapa  eima  pahnopazy  he  cha   keimo  tlaita  taopachhi ta (tao pazih), hria  pachhi  ta,  pahno ta, tlua papua  awpah  a  vaw  byuh   ha  tyh.

He  he  eima  râh  raopa  taopathina  pha  chaipa chhao  a  châ. Hmo  phapa  nata  hmo  dopa  eima  pahnopazy  he  a  hmeiseihpa ta  taopazi  ta  pachâsa  lymâ  awpah  hi. Palôhru  pha  pakipa (Perfect  morality) he la  hnei thei  aw  ma  pi, anodeikua  la  atahmâ  ta  eima  palôh  phaozie  do  leipazy  he la  eimâ  taopathi  thei. He  hlâta  pha  viapa  nata kho  â  chhih  viapa  liata  eima  hroh  thei  hra. Keimo  mo  pakha  nochâ  liata  a  ypa, a  phapa  nata  a  pha  leipa(a chhiepa) pahnothaina, Pathluapathlâhthaina ( conscience ) eima   chhiephahh  pahnona   he  hmâh  thaipa ta  a phapa  maih  he  achadai  tyh  ei  sih la, hmialâ  daihti  sai  thaina  chôta  tahmâ ta  eima  hro  he  pakhaihsa  a chhuah tyh suh vy.

“ If   we  keep  Judging   ourselves, we  should  not  be  judge ” kjv. 1 cornt. 11 : 31

 


Mara reih rozie dopa

 

Tao (m)             : Khâpa na tao? (verb)

Tao(r)                : Riethei a tao? (Verb)

Taoh (d)            : A taoh, (noun), A sâh lia pala â taoh (verb)

                            

Tai (m)               : A sâ a tai (verb)

Tai (r)                 : Alô vaw tai teh (verb)

Taih (d)             : Bie amâ taih (verb), He taih he a vy teh. (Adv)

 

Tyu (m)             : Maityu a pahâh kaw.

Tyu (r)               : A tyuhnie khâ.

Tyuh (d)            : Atyuh chy teh. (Verb)

 

Tei (m)                             : Pâhchhô liata â tei (Verb)

Tei (r)                 : Eina tei ngâ kaw (Verb)

Teih (d)             : Ramawh teih â kao (verb)

 

Tia (m)               : Hmiahkhu a tia tu haw (Adv)

Tia (r)                 : Eina tia na.

Tiah (d)             : Tâkô a tiah ngâsâ (Adj)

 

Tie (m)                             : A tieta a pasa (Noun)

Tie(r)                  : A no tie pha vei (Adj)

Tieh (d)             : Atiehtâ khao leipa ta y molo teh. (Verb)

 

Vao (m)             : Poh ta cha vao vei (Adj)

Vao (r)               : Vao a châ (Noun)

Vaoh (d)            :


MARA REIH

HAWTIPAZY LIATA

 

~ T. Ngôtha


 

 

Reih laiseihna kyh liata ei paveih kawpa vaw chapaipa ta vaw pahripaziah tua’pah dia ei khoh kaw....

Mongyuh reih eima pasâhsapa he a pha, châhrasala khazia eima pikheipa reih (Mother tongue) he tlao daihnypa ta eima siesai tyh tly i..? Tahmâhlâ Thyudyupa cha reilei, Satlia nata Laihsa Nô nata Paw zy taih chhaota roh dâh dopa rai pachâ peimawh leipa pi ta, â do leipa ta roh pi ta, Thyudyupa nah chhochhi ta cha, a aony taih chhao pado khao leipa ta, âpheih lâta eima siekhei khai ha bâpa a châ.

Eima Sawchapaw, sawchanô kô 2 - 10 he Pre School liata pakiasa pi ta, a school mate nata a viasa pakha nata Awh kyh liata âvaw eichhia ei ta, eima Sawchapawpa ta, “Awh tachhih/ Awhtaw a châ hih” tahpa ta, a viasapa ta “châvei Chicken mâh a châ bao” tah heih hra ta, kha Marapa Hawti pyly khata Chicken kha Awhtaw/Awhtachhi na a châ tahpa rai pahno khao leipa ta, eima sawnah ta Mongyuh reih thai veih ei tahpa eima chi tu ngâsâ hapa vâta, a pikheipa reih he saw rai ta sa khao leipa pi ta, chhopasia’pah hlâta tlao daihny hapa ta eima saw nata nawhzy he chhihtha ha khiah pi maw? Châthaipa thliena he, Mongyu reih nata Tlaikao reih thai kawpa he a châ khai hlei rai ma?

 Kei ei pachâna dâh nata saizie liata cha, a no pikheipa reih chhao a thai leipa ta cha kheitarai ma Pho hropa reih chhochhi cha a thai thai aw, Mara Hawti nah chhochhi ta la, Second language Environment eima hnei chhie tu ha, Mara reih heta hmoto he a siahlia kawpa ta thai khai ei sa la, chah khai tawhta Mongyu reih nata reih hropa cha eima thaipa chhaota Bonus tongue hawh chyuh ta eima thai khiah nokhihpa nata reih hropa thai theipa tahpa ta pasâhsa achhihpa ama châ aw, Reih hropa na ei thai tah tlôh ta, a pikheipa reihta palie thai leipa cha, Châ thaipa hmâtlâh châ leipa, Ti châ hra tlôhta doh tlâh nata nietlâh châ leipa hawh dei ama châ.

Siaha liata Private School sâkha lia chhochhi ta cha, Principal ta Mara subject he English ta tlyma, Tlaikao reihta palie ta pachu awpah a tah thlâh bao. Khapaw khata Mongyuh reih nata Tlaikao reih he kheihawhpa thliena ta thlie ha ta ma, khatlu a pasâhsa tly pahno thai’pah chhao châ vei. Zâkhanoh nô pakhapa nata Viahpa Kuvâ hna zuahpa bie achho ei ta, Viahpa ta, Tlaikao reih ta, "Kapi khawi vengah nge i awm?" tah ta, hiahri ta, Nôhrâpa ta, “Meisavaih ah”, a tahpa â daih tah leipa ta, paliepa heih ta, “Meisaveng ah” tahpa ta a chho, A ky liata kei hria na ta, ei pihnô Meisavaih na tahpa kha â daih kaw kha my ei tah pâ ngâpa a châ. chihro phohropa Viahpa nata Matu Marâpazy tlai ta Tlaikao reih ta bie eimâ chho thlâhpa he kheihta ma Viahpa nata Matupazy tlai cha Tlaikao reih ama thai rai aw tahpa chhao pachâ leipa pi ta, eima paleih âsie daihmâpa ta cheipa pi ta, bie eimâ chho bao. Marapa ngâthu, "Momo bailaina a chao thu", ama tahpa thlailai lah y eima lyu.

M.phil taihta achu patlôpa, English Language Education achu patlôpa pakha ta cha, "Ei Research taopa nano nanopazy liata ei hmô papuapa cha Pho hropa reih (foreign languanges ) a chu hlâta first language he a vaw peimawh chai tahpa ei hmô papua" tahpa ta a reipa he eina pahnie ngaita kaw.

Tahmahla chhâ tawh chhochhi cha eima sawnahzy ta O lâta amâ chuna awpah Educational toys ama hnei pha ngâsâ ha, youtube tawhzy chhaota amâ phana rakha ama vaw pahno khai thei ha, chavâta ama pikheipa reih (Mother tongue) châta ama Nô nata ama ypâpazy he ama Educational toys pha chaipa eima châ tahpa he my khah ei suh u!.....

Siaha liata Pre school sâkha liata eima nô he pachutuhpa châ ta, a reipa sâkha cha, "Eima Hawti nahzy ta second language ama thai raohpa heta, Mara reih he ama thai ngâsâ awpah a châ no ta, one word play hawhta chhao Mongyuh reih he cha ama thai ngâsâ sai, thokha he la, keimo reih tlaipa ta ama pahno khao leipa deikua hela ei palôh eina hria kaw tyh" tahpa ta na chho ta, ei palôh eina pahnie kaw.

Cha dei châ vei, Hawti Keimo reih, pikheipa reih (mother tongue) achu khipa nata thai ngâhaipazy tlai ta, Mongyu reih (second language) thai via sala tahpa ta khâchâ eima pachâpa he khâpa châta ma hmâh sala eima tah tly? Amâ chuna baotuh awpah ta eima khoh khiahta cha, School kiah ei ta ama thai pyly aw.

Mara Hawti Monday pahno kawpa, Hriatuanoh pahno khao leipazy, Banana pahno kawpa, Bâhla pahno khao leipazy eima hlut ngaita bâpa a châ.

Pikheipa reih za ta pasô thai awpah nata pasâhsa n’awpa kyh liata Marapa Nô nata Pawzy heta thapi phia via rili ei suh u....!

Na reih na pahlei khiah nâma nata na chhôhkha, chi nata pho cha na pahlei hana tahpa pahno mah y!....

 

 


HÂRATIE PHÔHPA

 

~ M. Nyusô

 

 

              Zâkhano he nô nata paw ahnei khao leipa Hâratiepa he y ta, a riethei ngâsâ thlâh ha ta. Khihsawzy hra chata a hao ngâsâ ei ta, sa ama zâpa chhao a pahâh-pahlohpa chhao zâ khoh leipa ei ta, a sa chhiehrupa nata a vozy tlâ pie tyh ei ta. Niebaw tlâh a châ leipa vâta a palôh cha pasa ngâsâ thlâh ha tyh ta. Nohkha cha nie’pah a hnei khao leipa vâta chavah-chahaoh lâ sie laih tua sa, tahpa ta chavah lâ cha sie ta.

              Chatanachata, chavah cha za tlô ta. A hnaw lâ cha kaw sao laih ta, cha nona chata rohpahâh kawpa roh he thei ta. “Cha cha khâpa roh tlyma?”, tahpa ta a kaw heih ta. A mahchhata liana chata pawpi angia kawpa cha kaw hmô ta. Thlai khyhnao ta, pawpi cha kaw lyu ta. A roh a pahâh kawpa vâta  pahnâ ta, chatanachata a rih cha vaw bie ha ta, a nodipa chhao cha vaw pahno khao leipa ta. Chatanachata, a khô n’awpah byh tao ta, cha liana chata pawpi cha khô ta, sie ha ta.

              Chatawhcha, khâpa hmah tao byuh khao leipa ta, a nodi pataw nahta pawpi cha pahnâ ta, a rih vaw bie khai thlâh ha tyh ta. Chavâta sie khao leipa ta O liana chata amô heih thyu heih tlâ tah tyh ta. Chatanachata, ama khih beipa (Pale) chata, “He saw he khâpa ma a nie tyh, za moh paru tua u”, tahpa ta a sei pakha cha tuah ta. Sei pakha cha Hâratiepa o lâ cha zu ta, za mohparu ta. Khâpa hmahta a hmôpa a y leipa vâta kua ha heih ta, “Abeipa khâpa hmahta hmô tlâ va na”, tah ta.

              Hâratiepa cha khâpa hmah hria leipa o lia sai a y thlâhpa cha ama beipa cha a no-âh kaw ta. Mohparu awpah ta a sei pakha cha tuah heih ta. Bei seichanô cha Hâratiepa ochhôh lâ cha a ngia ta, a heihhâpa ta a beiphiahzy cha moh laih ta. Khâpa hmahta hmô tlâ leipa ta, a no-âh ngaita ta. Beih chhoh awpah ta saphâ chhao hnei tlôh va tahpa ta a heihhâ laih ta. Cha nona chata obâ lata hmobyh a baihpa cha kei hmô ha ta. Kei pahy ta, a roh a pahâh kawpa vâta pahnâ hra ta, chatanachata a nodi kawpa kha a rih phie vaw bie ha ta. Abeipa o lâ cha a kaw râ lymâ ta, “Abeipa, Hâratiepa nie tyhpa ei pahno ha na”, tah ta. Abeipa chata, “Khâpa rimâ maw?”, tahpa ta thlai vaw hiahri ta. A seichanô chata, “Pawpi roh pahâh kawpa hnei ta, cha chana a pahnâ tyh ngyu aw. Cha pawpi dei leipa cha a ochhôh liata khâpa hmahta hmô’pa y vei. Keima chhao cha pawpi cha a roh pahâh kawpa vâta pahnâ hra na ta, ei no a di kawpa tlai kha ei rih a vaw bie khai ha hra”, tah ta. Chatanachata, abeipa chata, “A châ tlai bao na, Hâratiepa cha za aw tua u, bie na ei chho khoh”, tah ta. Hâratiepa cha za aw ei ta, abeipa o lâ cha a khy ta.

              Abeipa chata, “Hâratiepa y, na pawpi rohpahâh kawpa hawhpa kha ei khoh hra na. Na kei lapa hra mah y. Na la leipa a châ khiahta la ei cha thie aw”, a tahpa vâna chata Hâratiepa cha thi riahchipa vâta pawpi la awpah chata sie ha ta. A siena lâpi liana chata Babaoh (Maityu) thih ataopa chanô pakha he va hmô ta. Ano chata, “Hâratiepa, khataih lâ na sie aw?”, tahpa ta vaw hiahri ta. Hâratiepa chata, “Paku chiachi la awpah ta ei sie aw”, tahpa ta a chhy ta. Laihsanô chata, “Nâ vaw liena lâta na vaw awpâ mah y”, tah ta, Hâratiepa cha sie lymâ ha ta.

              Chatanachata, Tisaih zuah Laihsanô yna su cha kei tlô heih ta. Tisaih laihsanô chata bie vaw hiahri heih ta.  Hâratiepa chata Paku chiachipawnô la awpah ta siepa a chânazie ta achhy heih ta. Laihsanô chata, “Nâ vaw liena lâta na vaw awpâ mah y”, tah ta. Hâratiepa cha sie lymâ heih ta, Meisaih zuah yna kei tlô heih ta. Laihsanô chata khataih lâ a sie awpa ma a châ tahpa ta vaw hiahri heih ta, Hâratiepa chata Paku chiachipawnô la awpa ta a siepa a châna zie chho heih ta. Laihsanô chata, “Nâ vaw liena lâta na vaw awpâ mah y”, vaw tah heih hra ta.

              Chatanachata, sie lymâ heih ta, chylao sa ngâhaipa laihsa he kei hmô heih ta. Laihsanô chata a hmia lâta laihsa nahzy ta ama vaw hiahrina hawh pyly ta vaw hiahri heihpa ta, hâratiepa chhao chata Paku chiachi la awpah ta a siepa a chânazie pyly ta vaw chho heih hra ta. Â vaw liena lâta awpâ awpah ta vaw tah heih hra ta. Sie lymâ heih ta, Awhsi zuah he va hmô heih ta. Awhsi zuah chata Hâratiepa cha khataih lâ a sie awpah ma a châ tahpa vaw hiahri heih hra ta, ano chata Paku chiahchi la awpah ta a siepa a chânazie cha chho heih hrapa ta, â vaw liena lâta awpâ awpah ta laihsanô chata bieta heih ta.

              Hâratiepa cha sie lymâ heih ta, Thlâpâ zuah he kei hmô heih ta. Thlâpâ zuahnô chata bie vaw hiahri heih ta, Hâratiepa chata Paku chiahchi pawnô lyuna lâ sie awpah  a chânazie chho heih ta. Laihsapa chata, “Paku chiahchi pawnô lyu awpah na châ khiahta la hmo nâ phao awpah ei cha pie aw, ochhôh lâ a zâ ngia teh”, tah ta. Ochhôh lâ cha a ngia ei ta, Buchâh nata hmo peimawh hropa â phao awpahzy cha pie ta. Paku chiahchi kô liata a yna dâh awpah zydua chhao cha vaw chho khai ha ta. Laihsanô chata, “Nâ vaw liena lâ na vaw awpâ mah y”, vaw tah heih hra ta.

              Chatanachata, Hâratiepa cha sie lymâ heih ta, Paku chiahchi yna su cha kei tlô ha ta. Pawpi kô cha kiah ta, a ry liana chata Syuki (Hrailâpa) penawh chata vaw mokhâh thlâh ha ei ta. Chatanachata Paku pawpi cha lyu lymâ ta, hykha a lyu tawhta za chô’pa a chhuah ta. Syukipa nah chata a vaw byh thlâh ha ei ta, a laihsanô ta Buchâh sô a chatypa cha pathlâ ta, “Na vaw moh tua u la”, tah ta. Syukipa nah chata kaw moh ei ta, cha pataw nah chata ama hmia lia tlai chata Buchâh cha za hiethlu ei ta, ama chanaoh-chahmiah chhôhta za chô ta, a râ lymâ ha ta. Chatanachata, Thlâpâ zuah yna su cha va tlô ta, hetana heta hla ta kei aw ta,

“Thlâpâ zi y zi y Vânô ô,

Paku chechi panô chy;

Ve lyu lyu”

(Thlâpâ zuah zua vânô,

Paku chiachi pawnô cha;

A vaw la la).

              Chatanachata, Thlâpâ zuah chata, “E, na vaw hâ la, ei cha vaw zi hra aw”, vaw tah ta, vaw zi ha hra ta. Vaw sie lymâ ei ta, Awhsi zuah yna cha vaw tlô heih ei ta, hetana heta va chho heih ta,

“Âsi  zi y zi y Vânô ô, Paku chechi panô chy;

Ve lyu lyu”

(Awhsi zuah zuah vânô,

Paku chiachi pawnô cha;

A vaw la la).

kei tah ta. Ano chhao chata, “Ei cha vaw zi hra aw”, vaw tahpa ta, thlaita a vy pâ hra ta. Chatanachata, sie heih ei ta, Tisaih zuah yna cha kei tlô heih ei ta. Hmialâ ta a taodâh hawhna khata kei tao heih ta. Chatanacha, Tisaih zuahnô chhao chata vaw pazi pâ ha hra ta. Chatawhna chata, Meisaih zuah zy, Maityu zuah zy chhao chata vaw pazi khai hra ei ta. Chatanachata, ahripi ta Hâratiepa O cha kei tlô ei ta. Laihsa sahlaozy chata hâratiepa cha ama daona dâh cha, ti pasi ngâ bâ, a phei nâ ngâ bâ, a luh die ngâ bâ tah ei ta. Cha nona chata abeipa (Pale) chata a sei pakha za tuah ta, a za tlô pataw nah chata, “Pale na”, a tah pataw nah chata, “Na paleih pachhao tua teh”, tah ei ta, a paleih pawhmao cha taipa ei ta. Ama beipa lâta bie a tlôkhei awpah cha reih thai khao leipa ta. ‘Bale Balaw’ tlâ tah bâ ta. “He saw he khâpa hmah a pahnothai leipa he, a hropa kha zu heih t’u”, tah ta. A hro penawh cha pakha pakha ta zu taraw ei ta, a hmia lâta azu tuapa ama taodâh hawh pyly khata vaw tao lymâ ei ta.

Chatanachata, pale cha a hiehâh ngâsâ ta, “Keima sa zu tua lahvâ na”, tah ta, â zâ ngia thlâhpa cha Hâratiepa cha laihsa hmipha-sâseihpa saita vaw chadô thlâh ha ei ta. Pale cha a no-âh kaw ta. Cha hawh khiahta la, “Meisaih na eimâ zaw pasua aw”, tah ta, â zaw pasua ei ta, a zaw thei haw. Tisaih tah heih ta, a zaw papua thei ha heih, ato pahao ta, laihsa â vaw chhi penawh khata bao lymâ ei ta, pahnie thei tlôh leipa ta. A hro lâta pahao heih ta, “Â chhawhta na eimâ chhawh aw”, tah heih ta. Amâ vaw chhawhpa cha Hâratiepa cha chhawhsao ha ei ta.

              Hâratiepa a thi ha tawhta cha laihsa nah zydua cha a lahpinô awpah ta khoh ta. Ama o lâ akhy bâ awpah ta a pa-awsa tyhpa ei cha laihsa nah chata, “Mylâ vâ, hânoh châ lahvâ”, vaw tah ha tyh ei ta. Cha hawhta ama tah chhôhta Hâratiepa ri cha rao ei ta, a rupa hry liata ‘Takai takai’ a tahpa maih cha la ei ta, ‘Takaw takaw’ a tahpa maih cha pazaw/thy lymâ ei ta. ‘Takai’ a tahpa maih cha poh râhpa ta pahly ei ta, tihnawh liata kaw pabu ei ta. Nohthôh a pha nahta kaw moh ei ta, hmia lâta Hâratiepa hlâta hmipha viapa ta vaw kua pathi ha heih ta. Chatanachata, aly kawpa ta O lâ cha va sie ha ei ta.

              Ama beipa chata khâpa hmah pahno tlôh leipa ta, laihsa nah pa-awsa heih awpah ta chyhsa tuah heih ta. Laihsa nah chata a chyhsa tuapa hnoh chata, “Va kua la, abeipa cha a zu mawh sy”, tah ei ta, ama beipa cha kaw chho ta. Abeipa cha ama chhopa hawhta Hâratiepa o lâ cha a zu ta, lahpinô châta tao khai awpah â chhuah ngâno chata Hâratiepa cha a hmô thlâh ha heihpa vâta a no-âh kaw ta. Hâratiepa hnoh chata, “Kheihta ma na vaw hroh thei thlâh ha heih?”, tahpa ta hiahri ta. Hâratiepa chata hmo yzie zydua cha vaw chho ta. Chatanachata, abeipa chata, “Keima he vyh tu ha na ta, bâh na taopathi hra u la”, tahpa ta ahaw ei ta. Laihsa nah chata, “Na khoh khia eima cha taopathi thlâh h’aw tlai”, tahpa ta abeipa cha thie ei ta, mei ta rao ei ta, a rupa cha chakhyh lymâ ei ta ‘Takai’ a tahpa maih thy ei ta, ‘Takaw’ a tahpa maih cha la lymâ ei ta. Poh vyhpa ta pahly ei ta, tihnawh liana cha va pabu ha hra ei ta. Nohthôh noh ta ama kei mo thlâhpa cha ano hlâta hmichhie via syulyupa ta vaw pua ta.

              Chatanachata, o a kei tlôpa cha ama chhôhkha zydua ta no-âh tahpa ta vaw moh ei ta, a vâsâh ngaita ta. A tao n’awpah hra pahno khao leipa ta, “Kheihta tao thai’pa châ khao tlôh leipa ta, hetana heta ei hrochhôh ta tlâ ei y bâ hih”, tahpa ta a palôh cha a patlâh thlâh ha bâ ta. Hâratiepa nata a lahpinô sahlaozy cha pabuatuhpa hnei khao leipa ta aly kawpa ta khih ama sa ha bâ. Phôh patlô, lâ patlô, Mâhleinô awhchhi phie chapie.

 


 

DÂNIA HÂTA

 

~ Machâ N. Samson, Thosaih,

CCI(M) Local Church

 

 

              Eima Beipa Zisu Krista ta a mopathaihpazy vâ meihdo hry liata a mopathaihpa a myuhzy miah a vaw dy n’awpah â hniazie nata Krista Awnanopa zydua pi amâ chiehpa ta y a byuhziezy eima pahno thlâh ha chyu tarawpa ta, khizaw hmozy pachâna heta eima chhôh miah pahmohsa tyh ta, Awnanopa zydua amâ chiehpa ta eima Beipa Zisu Krista mokhâh chyu suh vy.

               Eima Biehrai pathaihpa liata Hrohsopa Dânia ta daihti chhâta alaichadaina miah a chhopa he duah mohpasia tua suh vy. Khizaw noh nata daihti he khô lymâ ta, daihti chhâna eima tlô haw bâ hih.

              Dânia hâta he pachâna dâh, kao nano nanopa y ta, chazy cha :

(1)    Critical View

(2)   Dispensational View

(3)   Conservative or Traditional View zy ama châ.

 

(a)   Dânia 9 : 24 liata hâta 70 eima hmô.

(b)   Dânia 9 : 25 liata hâta 7 nata hâta 62 eima hmô. Hâta eikha a lei ha, tavia eima reihpasia aw. Chatawh la, hâta 7 nata hâta 62 a reih nano khohna chhâpa eima reih aw. Hâta liata noh ynazie he, kô zie a châ lymâ. Dawh 9 : 2, chatawh la, he he pahno ei sih la :

(1)    Hâta 70 he noh 490 châ ta, cha cha kô 490 tahna a châ, tahpa ta chhopasiatuhpazy ta amâ pyh khaipa a châ. Khâpa daihti kha maw? Tahpa deikua amâ lyu tlâ vei. Hâta eikha (1) cha noh 7 y ta, cha cha kô 7 a châ.

(2)   He hâta 70 he 9 : 24 liata, na chyhsazy nata na khihpi pathaihpa châta nohsari sysari raopa a châ tahpa châ ta, Izarei pho nata Zerusal chôchâh eih viapa reina a châ tahpa pahno pâ awpah a châ. ZENITAI ahlao ma pi tahna a châ. He Dânia hâta 70 (Kô 490) cha chhâhthôh (3) ta sie ta.

 

HE HAWHTA

 

(1)    Hâta 7                = Kô 49

(2)   Hâta 62             = Kô 434

(3)   Hâta 1                = Kô 7

Total                = Kô 490

 

Chatawh cha, he daihti akhaihpachhuahpa (Âpachôpachhuahpa) chi 3 he eima reih pasia tua aw.

 

1.       Hâta 7 kô 49 Zu nah sei atâhna kua heihna Biepipa tawhta, Zerusale Temple Paduapathi heihna taih ta. He daihti he atahmâ no ta pachâdâh a lyu leipa y ha ta, BC lâchhâh syulyu a châ hapa pahnopasia a ru kaw. Zu nahzy sei atâhpa puana kha châh 3 ta pua ei ta, BC kô alaichadai heih ta, he hawhta reih ei sih la :

(a)   Persia Beipa Kôrâsâ Abeina kô 1-na liata Sei puana Biepipa a châ. Ez. 1 : 1 Kôrâsâ he, kô 9 abei ta, a hnôhlâ ta, a sawchapawpa Cambyses ta, kô 7 â bei heih.

(b)   Cha khai tawhta Daria abei ta, kô 2 abeina liata sei tawhta puana bie a phuah heih. Kô 21 â bei.

(c)    A hnôhlâ ta Âhasuara avaw bei ta, Âbeina kô 20 na liata Sei tawh puana biephuah heih ta, he he final order cha châ ha ta, he tawh tlai heta, Dânia Hâta kô 490 kha â thao. Âthaona tawhta kô a khy lymâpa Zisu (Sathawthupa) taih khata he hawhta Dad. 9:25 – 26 lia hmô pi ta, a chô liata eima reipa kô 49 nata kô 434 pahlyhpa ta kô 483 châ ha ta.

 

2.      Hâta 62 (Kô 434) Temple paduapathi heih tawhta Zisu taih tahpa lia heta, pachâdâh aphiehpa y heih ta, (a) Bâti a châna taih tahpa nata (b) A thina taih tahpa ama y. Chata hâta 70 = Kô 490 tahpa liana kha kô 483 reih ha pi ta, hâta 1 = Kô 7 ahlao khao vei. Khâpa a chhâpa a châ haw? Khataih lia a y haw ? Khatita a vaw tlô awpah maw? He tlai he, khizaw zydua ta eima hâpa, khizaw chhâhchabâhpa a châ.

Kô 490 liata kô 483 Zisu (Sathawthupa) taih reih ha pi ta, Zisu tawhta atahmâ taih kô 2000 chô lâ châ ha bâ ta, kô 7 ngâlâh byuh tlôh ta, khâpa a yzie a châ haw? A chhâpa cha he he a châ. He kô 490 he Izarei pho nata Zerusale chôchâh reina a châ eima tah ha khawh.

Chatawh cha Zisu liata Zunahzy cha ama râh tawhta papuapa ta y haw ei ta, râhto liata paipatla khai haw ei ta, thâtih History siapa hnei khao veih ei. Daihti achalihpa silent years y ta, atahmâ kô 1948 tawhta, ama râh ama pahrâ heih tawhta khi ta, ama kuhchha pazi lymâ ta, Zerusale khihpi cha hnei hra ei sala, Temple hnei thei khao mâh veih ei, a su awpah ama buakhei ngâhaipa tlâ a châ.

Ama hnei thei tawhta, he kô 7 pa he â thao aw ta, mopathaihpa lana â thao pâ aw ta, mopathaihpa lana khai pataw nahta ryhpaparaotuhpa vaw pua aw ta, a sahlaozy chhaota. “Nohsari eikha châta chyhsa hluhpi hnohta Biehraina â i ngaitapa tao aw ta, nohsari khophie liana chata (Ama Biehraina ryhpa parao aw ta) Âtheihnazy nata hmohlâpazy a pabâhsa aw; chatawh cha rohrypahrasatuhpa cha pasichhihna mathlaw chô âchohpa ta â vy aw ta, chhâna a vaw tlô tlai awpah ta, raochiehpa taihna chata” Dan 9 : 27, Isai ta, “Thina liata Biehraina eima tao haw, Sheol nata Bie eimâ taih haw,” 13 28 15 – 18 a tahpa hawhta, hâta khophie rachhôh liata rohryhrana pasichhihpa cha Temple Supathaihpa liata aduah aw ta. Thes 2 : 4, Mt 24 : 15 sahrâhpa nothlahpa a vaw duah awpah cha, apanawhsa raruah aw ei, Hrohsopakheipa hmotaotheina ta, sahrâhpa nothlahpa cha, husotheipa ta sapa pasasa theina taih a hnei aw. Biphuah 13 : 14 – 15.

Abeipa ta vâlyuhchâpazy hmâpa ta a hiehâhna Biebu a lei lâ mia 7 leihtha aw ta, riethei pasana athata a y aw. Biphuah 16 : 1-21. Chatawh cha hâta 70 atloh pataw nahta eima Beipa Zisu Krista cha, “Meihdozy nah chata azu aw ta, mokhaoh to ta hmô aw ta, ano achôtuhpazy chhao. Biephuah 1 : 7” Cha noh liana chata, Ôli tlâh nochhi lâta Zerusale avaw daihpa liana chata a phei pahnieh aw ta, Ôlitlâh cha nochhi nata notla ta, a lialiah ta â pachhaih aw. Zek 14 : 4 Izarei pho pôhpalôhpa, athi bâhpa zydua cha ropa ta Mesia Krista amâ pyh ha aw. Rm 11 : 26 – 27 Chatanachata, Biehrai thiehpa arao thei khao lei awpah a pie ha aw ei. Heb 8 : 7 – 13, Zer 31 : 31 – 34, Chatawh cha Zerusale liata Beidyuchhai patyuh aw ta, A mopathaihpazy chhaota kô 100 ryu eima reih aw. Biephuah 20 : 1 - 10

Eima Beipa Zisu Krista ryureihlâh awpah ta, meitipa chhaota amâ chiehpa ta hâ chyu suh vy.

 

 Source: Board of Mara Literature, MADC, Siaha.

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II