BML Issue February 2021

Editorial

 

              Mongyuh nah ta cha daihti he phusâ nahta vaw pakhopâ tyh ei ta â do kaw. Daihti he sôh ngaita ta, phusâ hawhta hmâh thai ta hmâh pado awpa he a peimawh ngaita.

              Mara sawzy he daihti hmâh pado thai lei chaipa chi nata pho eima châ thlâh h’aw khiah maw. Khihto/vaihto liata MTP/KTP nata kheihawhpa py rai ta daihti a hmâh awpa eima hnei daihti liata a daihti liata tlô ta pathao thei tyhpa py he eima sôh kaw.

              Pamosana ta, zâ dawh 7 :00 liata Meeting awpa pahnosapa eima  châ khiahta la dawh 8:30 Pm liatazy daihti a pathao thei tyhpa sai eima châ. He he eimâ taopathi awpa a peimawh ngaita. Hmahsie awpa nata hmialâ tôh awpa ta cha daihti he eimâ hmâhpado tua chai awpa a peimawh.

              Sawhkhâ reaihriapazy chhao ta Office kia n’awpa daihti taipa ta liata tlôpa ta, a daihti ta liata bâh tyh awpa ta sawhkhâ ta hlao maniah pie ta, thokhazy pi cha dawh 9:00 Am – 5:00Pm taihta sawhkhâ ta hlao maniah a pie nota my dawh 11:00 Am – 2:00 Pm taih ngâlâhzy Office kiah pi ta, dawh 5 chhôh cha hrialeipa ta y pi ta, daihti eima nieparu tahna a châ. Phusâ hluhpi a nieparupazy nahta eimâ lyu leina rai y vei.

              Ngiapâtuhpa nata Zisu Krista pazituhpa eima châna hawhta eima pazipa Zisu Krista hro a mopâ ei sih la, eima hro ta ngâchhihna hro zi ei sih la, eima raihria liata phahnaingiahna hnei ei sih la khatlu eima râh heta a pha khei aw tly.

              Chahawh pyly ta ku raihriapa nata nohto niebaw tluachhyhpazy chhao pi ta, eima raihriana liata phahnaingiahpa nata daihti a vao pado kawpa ta hria ei sih la, hlaotlohna nata byhnâ ta miah a pazi cheingei aw.

              Ngâchhihna nata tiamana, pahnaingiahna he Khazohpa khozie châ tlôh ta. Byhnâ to awpa byhnâ zydua a hneituhpa Khazohpa khozie hawh tlai ta hrohpa ta, byhnâ pie tlâh ta hriapa ta, ngâchhihna hro hneina chôta daihti a vao pado chyu ei suh u.

 

 

 

 

KYH EI CHA PACHÂ ‘K’

 

~ Abie Nôtlia

 

 

 

              Ano kha la kyh ei pachâ hmeiseih tlai na! Kyh ei pachâ thlâhthlipa dei chhao châ vei, ei hrukhei hapa hawhtazy ei pahno tyh cha maw! Ano a yna maih cha kheihawhpa su rai châ hra sala, kei châta cha su ngiaryhchhihpa nata thadâhchhihna su châ tyh ta. A pahneipa hmizy chata thaphana nata alyna na pie tyh ta, a pachârôhpa hmi ta ei chhôhsolôh eina pasasa tyh. Thapha kawpa ta a pahnei châh heta cha kei rairao paw châta aly achhih ta, ei hro tlokhuh eina palysa khai ha tyh. Kyh eina pachâ vâta zy, eina za pakhei thai kaw tyhpa vâta zy nata kei châta ngâ â chhih kawpa vâta zy ta kyh pachâpa châ hlei va na. Khazia vâta ma he tlupo ta kyh ei pachâ ha tly? Pahno achhuahpa ta patuapalua beih va na. Kyh ei pachâ hmeiseih tahpa deikua ei pahnopasia.

Kheihawhpa chyhsa rai châ hra sala, ano a châ chhôhta cha kyh ei pachâ ngâthlâh ha aw. Khizaw chanôzy hry liata ngâtlâh châ chaipa nata eimo nâ dy chaipa, ei kyhpachâ chaipa a châ awpa vâta!

              Ano ta he haw tlupo ta kyh eina pachâ theina chhâpa chhao he pahno pyly hra va na. ‘Kyh ei cha pachâ’ tahpa ta lyuhbie eina hlâ tyhpa chhao he â nano tah na ta, a châhta cha kei chakoh chabaihpa saw tlai he pua ei ngiahma khai ha tyh. Dao kawpa nata ngiabâh kawpa ta na chaku ta, “Kyh ei cha pachâ. Kyh cha pachâ ngâthlâh ha aw na ta, na châta chhâzaw ta ngâchhihhpa ta ei y aw”, tahpa ta eina chho châhta cha ei ramâ khiama tah tyh na ta, keima tlai chhao he; keima châ khao va na khiama ei za tah ngâ kaw tyh cha maw! He tlupo ta kyh eina pachâna chhâpa he no-âh a chhih ta, keima ta kyh ei pachâ theina chhâpa deikua no-âh a chhih hlei vei. Ei kyhpachâ chaipa châ awpa ta kô hluhpi khôpheih chô tawhta a paru ta saduthlie tyh na ta. “Khati kei châ nohly chhi aw?”, tahpa ta ei vaw mokhâhna na vaw rei tu ha bâ.

              Vaih kha liata pahrâkhohpa châ pi ta, vaih kha liata chhao Awnanopa sâkha liata apakhypazikhoh tyhpa eima châ. Viahchao tôhpa chhaota si panyupa na a khoh ama tah tyhpa hawhta, keima hlâta kô 7 tlaita hawti via ta. A nôchâ hrozie nata a sâhmiapati â dy pha kawpazy vâna chata chapaw hropazy chhaota a kiahpâh lia y awpa he ama khoh chaipa a châ tyh. A kiahpâh liata ama y nahta he cha, reihpapua hlei leipa ta ama hmia phao zie tawhta amâ ly kaw tahpa he â lâ thlâh ha tyh. Keimo eima viasa sahlao chhochhi ta cha a diahna nata a reihtheina ta eima hmâh tyhpa, chanô eima pasâhsa kawpa kha a châ. Anodeikua eima zydua ta eima khona reihpapua ngâh tlâ ma pi.

Noh nata daihtizy vaw sie laih lymâ ta, ano chhao liahsa a vaw laihsa ha bâ hra. Khopazy chhao a vaw pahno pathao laih ha bâ hra. Hawti sawnawhpa hawhta eima diahdâ tyhpa chhao khoh khao vei. Bielôhawhpa reikhei awpa ta chhao liahsa a vaw pitloh ha bâ. A kiahpâh liata y hluh via laih lymâ na ta, ano ei khonapa cha nyuthu a ru via laih lymâ bâ! Ano hra cha, uhta hawhta khiama eina hmô tah thei awpa ta tlâ na ngâh ta. Ei kiahpâh liata a y no he cha a riarô chhao nyuthu achhuah hlei leipa ta, thapawh kawpa ta ypa ta, apanyusa kawpa nata samie kawpa ta alâ a chhuah beih vei. Hezy vâna he tlai ma a châ thlyu aw?  Chasipipa ta a patupa hawhta, nohchareih ta ano ei khonapa cha paru viana lâ a pangai via laih lymâ tyh.

              A kiahpâh liata ei y châhta ei palôh nâ eih kaw tyhpa cha, bierei thai kawpa nata asaomâ kawpa châ taraw hra vei sala, bie a rei tlakaihpazy he kei châta cha a nahthlie pha kaw tyh ta. A palôh liata a ypa nata a pahnopazy cha phihdâh leipa ta tlâ a reih papua tyh. Cha hawhpazy vâna chata kei châta cha kho a paoh via rili heih ta, ano ta palôhpatlâ kawpa ta bie a reipa he cha zo â chhih via pachaipa hawhta ei pahno tyh. A kô nata thla aphuh leipa ta pitloh ta, he hawhta moto mo â dyna chhâpa chhao he palôh pasoh kawpa a phaopa vâta chhao a châ thlyu aw?

              A hawti no tawhta ei chyhsa pahnopasiapa a châpa vâta a tlohleina tlyma, a chhiena tlyma rei awpa pahno va na. Chyhsa hropazy ta kheihta ma ama pachâ tahpa liata bua beih leipa na ta, pahno achhuah hra va na. Anodeikua, keima nata ei viasazy hmiakô liata deikua chanô khochhih chaipa, kho â paoh kawpa vâta phuhlei mo ta eima mo tyhpa a châ tahpa deikua ei pahnopasia. A tlaichhai viapa nata bie â chho pha viapa châ awpa deikua eima khoh chaipa a châ tyh.

              Dawh chhao he chakhyh paropa a châ tlôh lei khiah cha Dawh châ tlôh leipa ta, Hla chhao he sa beih leipa a châ khiah cha Hla tloh vei. Kyh pachâna chhao he palâhâhpa a châ vei khiah cha, Kyhpachâna tloh vei!. Ei hluhpi kyhpachâna lyuhbie hlâ a chhuahpa ta teikhâ tyhna ta, ei hluhpi ei pathleih pakhua heih tyh. Châhrasala ano ei hmôna ri maih ta ei khonapa cha pasa via rili tyh ta. A chhâ chhâna liata cha, ei riahphana zydua syhpakhypa ta, a byuh khiahta la hmiachhie chhao tlâ â la lahvâ na tahpa ta, mochao sa patupa hawhta khâchâ patu achhuahpa ta kyh ei pachâzie cha chho tlavaih ha na ta. Ngâh leina chô nata thlazoh, ao achalyu, pathi sâhdaihna chôta lyuhbie paru ei hlâ no heta khâpa bie hmahta reih vei! Kawh kha chhâ ta einâ chhy cheingei aw tahpa ta â chhyna hâ thlâh ha na ta, ziahzi ta a roh thlâh haw. “K…ummm na hie ei cha pahâh khiahta la ngiachhiepa ta nâ ngiahthai mah y. Umm kyh ei cha pachâna he rei kaw bâ ta, K…ei cha khoh hmeiseih. Na hie a hâh tah tyh?”. Ao zazyh kawpa nata nai zualuapa heta a hie a hâh leizie cha na chho ta, cha ngâlâh cha einâ chhyna y chhôhpa cha a châ!

              Vâropi khâpa bie hmahta reih leipa ta eima y tawhna chata, a ei no n’awpa ta ei riahphana zydua cha syhpakhypa ta a ku nai kawpa nata panyu kawpa cha lapa ta ei kiahpâh lâ cha nâ hnia via awpa ta dao kawpa ta parai ha na ta. A ku lalôh kawpa nata hladi hawhta nai zualuapa patu thlâh hana chô chata, ei ku chachâh lâ chata a ôhkhaih khochhih kawpa cha padaopa ta, a hmao khochhih kawpa, kheihti hlâta thlôh pha viapa cha sy ha na ta. Huizz, ei phaohri zydua tlokhuh a lei khai haw! A hmao liata ei synapa cha nâ chhy palie taraw vei. Anodeikua, na dytha hra vei. Châhrasala, a paru ta ano liata thaphana nata alyna a y tahpa deikua hmô thei na ta. Cha raohpa ta noza kâchhiena vâta a mopadei chhao ei hmô hra. A paru ta keima liata hro yru kawpa hawhta ei pahno tyhna zydua kha tlokhuh a lei khai haw.

              Noh nata daihtizy chhao ti lohpa hawhta khô laih lymâ ta, ano cheingei ei tyhpa cha vâhnei ei tah hmeiseih. Ano ta â chu lei kawpa a châ vei khia keima lâ tawhta cha khati no hmahta achhaih beih aw va na! Chapaw hropa eih châ awpa chhochhi ta cha pasaih chacheita va na. Kyh ei pachâ chaipa nata ei khoh chaipa a châ ngâthlâh ha aw.

              Châhrasala khizaw he â vaw nano tlai na! He hawh tlai heta ma chyhsapazy heta eima khotlyna eima vaw hmâh chhei thei? Kheihawhpa molei raihria ta cha ma na dôvei ta, na pamaoh haw? Ei kyhpachâ chaipa, kyh na pachâtuhpa, keima châta ngâchhihh kawpa ta vaw y hnolo tyhpa chhao dôvei ta, Chanô hropa liata na papheisa hapa cha? Kyh ei pachâ zie chho ngâthlâh hana chôta a pahno lei chhôhta nata a pachâ pha beih lei awpa ta â paphasai ha tlôh na! Kyh ei pachâ kawpa, kyh na pachâ hmeiseihtuhpa heta ei ydâh he pahno mawh sala kha tlupo ta ma a palôh a pasa aw tly? Keima hlâta ‘luck’ viapa nata hmipha viapa hmahta ngâchhih kawpa ta a y thei nota, ano hawhpa cha rei lei, chanô hropa chhao hmô thei khao lei awpa keima heta khazia rimâ ma dôvei na ta, ei paphasai thlâh haw? Athaileina nata athlachhiena ta bie hra aw sala, keima liata taopathi thei khao lei awpa ta hmahchhiepa nata hniehnôh pasichhihpa, nozachhihpa cha hnei ha tlôh na!

Sasyh athaileina nata athlachhie kawpa ta y ha bâ na ta. A hnohta hmo nyuthupa lai kawpa ei hneipa vâta ei thlachhiena hra cha paruna lâ pangai via laih lymâ ta. Moleina lâthlôh ei chhihkheipa hra chata pathlie nâ chhuah beih leipa ta, nohto ta einâ chadai pazi ngâthlâh ha tyh. A chhâ chhâna lâ cha a râsai thei khao lei awpa          moleina theilâpa cha keima khotlyna tlai ta lyu ha na ta! Kyh ei pachâ chaipa nata hrochhôh ta akaolâh ta dyhchâ khôpheih kiakhoh awpa cha rei lei, ahniahni thei khao lei awpa ta ei moleina theilâ lyupa chata maniah pachhaih tlôh aw ta! Keima châta chyhsa pathaihpa nata ngâchhih chaipa hmiakô liana chata chyhsa pualei chaipa nata pasichhih chaipa châ bâ tlôh na ta. Thaileina nata taochheipa dikha chhao hnei leipa, vachhuh hawhta nônaipa cha keima taochheipa, khotlyna hmâ chheipa vâta chhâzaw ta ei pathlie awpa â ngiah ha bâ. Kyh a pachâ chaipa châ awpa chhao tloh khao va na. AIDS pasana hri akiahpa châ bâ tlôh na ta!!  

              Positive ei châ tahpa ei pahno thaoh no cha pua ei pahlaw! Keima châta cha he khizaw he tlokhuh thoh khai ha ta. Ei nahkao sâno liana heta pyury no-âhchhihpa nata palopasa kawpa a paro ngâthlâh hapazy vâna chata palôhru pasoh kawpa chhao phaoh thei va na. Hnabeidyna, china nata thlahzohnazy chata ei sapa nata thisaih zydua a patu khai haw. Ei mokhaoh tawhta mothlih puapazy cha chalihsa thei lei awpa ta ei ôhkhaih liata loh ngâthlâh ha ta. Ei mothlih loh ngâ kawpazy cha ei kyhpachâ chaipa ‘K’ ta na hrupa mawh sala cha, a hroh thlâh hapa, thina saikao sao ngâhaipa he hnabeiseihna nata alyna ei hnei thlyu aw? Châhrasala cha hawhpa a hnabeiseih awpa ta cha nozana châh pahno leipa saw châ tlôh na vâ. A Romol pathaih kawpa papuapaleituhpa châ awpa ngâh va na! Ei riahphana ta chhao â pha hra vei.

              Ei chyhsa pathaihpa ‘K’ deikua khati no hmahta â nano beih vei. Keima ei nanopa chhao pahno hra vei. Anodeikua, noh nata daihtizy khô laih lymâ ta, keima ydâh achu leipa vâta nata ano chô liata athlachhiena vâta nohchareih ta â hlasai ei chhuah tyh vâna chata, pachâ pha leina a vaw hnei ha bâ hra. Ei chô liata hmo tlôpazy chhao anyukhei thei leina daihti ei hnei aw tahpa chhao ei pahno. Anodeikua, kheihta ei chho aw? Keima châta ngâchhih kawpa ta vaw y hnolo tyhpa, kyh na pachâ hmeiseihtuhpa hnohta, ei paphasai dâh nata ngâ ei chhih leina moleina theilâpa HIV/AIDS ei châzie chho awpa cha ngâh chacheita va na! Chahrasala, ei chô liata hmo tlôpazy ei chho leipa a châ khiah cha palôh pahâh kawpa ta thlâ khaoh chhao a ngiah thei aw va na. Athaileina nata pei tahna nâ baichhi via lymâ awpa châ hri tlôh ta, ei chho cheingei awpa a vaw byuh haw.

Ei pakah ta chho awpa ei khoh kaw nota, a chô liata ei hmo taochheipa nata ei paphasaina vâ chata pakah ta chho awpa ta cha ngâh va na. Ei ngâchhih leina theilâpa AIDS pasana ei la tawh chhochhi cha zâ chhao amô pha hlithâ beih khao leipa na ta, ei sapa hnatlânazy chhao hmôtheipa tlaita azyh zy ta tlapahnai via laih lymâ ta. Ei kyhpachâ chaipa ‘K’ hnohta ei chô liata hmo tlôpa nata ei tyh ngâhaipazy ei pakah ta chho awpa ei ngâh thei leipa vâ chata, zâ kha cha châpaphaopa roh awpa ta a pachhuapanoh ha na ta. Anodeikua, kheihta rimâ ma ei pathaopatô aw? Ei châpaphaopa pualei kawpa he aku pathaih kawpa nata nai zualuapa papuapaleituhpa dâhdei châ thlâh ha aw vei mâ? Châhrasala, ei duahmo ei chho cheingei awpa cha a vaw ngiah ha tlôh? ‘K’ na hrochhôh ta eina vaw maochhie hapa chi chhaota mao tiarâh va chi. Kei chyhsa ngâchhih leipa nata pasichhih kawpa heta thaichâna bie kawhkha dâhdei chhao reih awpa hnei va na.

              Ei chhôhpadâhpa liata Sana cha, hroh thlâh hapa thi ngâhai tlôhpa rakhô tawhna chata kaw moh na ta, mydi dawh 2 he vaw paro ha bâ ta. Ei rakhô kiahpâh liata roleipa bu nata châti cha lapa ta, ei kyhpachâpa ‘K’ châpaphaopa roh awpa chata châbu cha pakai pâ na ta. Pathaopatô dâh n’awpa chhao pahno va na. Noraih kawpa ta vâropi ei chalih tawhna chata hetana heta roh pathao na ta. “K.. na kyhpachâna dao tlâh chhao châ khao va na. Châhrasala, kyh ei cha pachâna he pai beih aw vei. Keima châta ngâchhih kawpa ta na y tyhpa vâta ei châ ly hmeiseih. Anodeikua…”, roh pazao thei khao va na. Ei mokhaoh tawhta mothlih loh ngâ kawpa hry tawhna chata ei châropa cha phiephuh a sianô lei kawpa heta hmô thei na ta.  Khati no kha ma ei vaw mô tahpa chhao pahno va na. A mylâ khih vaw deihpa cha thohna o liata vaw y thlâh ha na ta.

              Chanô pakha thlazoh noraih kawpa ta na awsao ngâ kawpa ao cha ei nahkao liana chata a sianô lei kawpa heta thei na ta. Ei kaw hrapa cha ahy hro vaw châ vei, ei kyhpachâ chaipa ‘K’ vaw châ ta. Ei ku chachâh lâ cha patupa ta, mothlih chhaota ei kiahpâh liana chata a vaw tyuh thlâh ha ta. A hmi khochhih kawpa ei kaw hmôpa cha ei lyna ma hluh via ma, kâchhiena ma rei thei’pa châ vei. He nô heta cha khati no hmahta nâ paphasai beih leipa ta, thina saikao saopa ta ei y no chhao eina ypâ thlâh ha he zaw!

              A ku nai zualuapa nata pathaih kawpa chata ei ku na patupa ta, a ku chavei lâna chata ei mathlai alohpazy cha a Romol pathaih kawpa chata na hrupa ta.  He tlupo ta he ma kyh eina vaw pachâ? Keima liata athaileina nata athlachhiena cha a lai via ngâ kaw.

              “K.. na pathlie tyh, na ku patu tlâh chhao châ khao va na..”, tahpa ta mothlih chhao chata ei ku eina patunapa cha lapa ta, a hmia khochhih kawpa chhao moh ngâh leipa ta hiakha lâ cha a heihsai ha na ta. Châhrasala, khati no hmahta nâ paphasai beih vei. Kyhpachâtuhpa nata deichhytuhpa ei ngiah chai nota ano cha ei kiahpâh lia ypa ta, ao khochhih kawpa nata tlâ kawpa chata, “B..khataih lâ hmahta cha siesai thei va na. Ei cha ypâ ngâthlâh ha aw, kei dao…”, cha ao tluta ei nahkao liata paro ngiapa cha y chacheita khao aw vei! Ei kyhpachâ chaipa chata, “Ei dao, thadâh kawpa ta amô achhuah tyh. Na sapa riethei tlôh ta, ei cha ypâ ngâthlâh ha aw”, tahpa ta ei ku cha patupa ta thlah na palôh ngâ kaw ta. “K, châ vei, khazia he su liata nâ vy?”,  “B, na yna su a châ vâta ei vy”. “K.. na yna awpa su châ vei, kyhpachâ tlâh chhao châ khao va na. AIDS…”,  ei biereipa ei patlô hlâna chata ei hmao cha na chahupa ha ta. “B, ei pahno khai ha, kheihawhpa duasu lia rai ta aduah hra la, kyh ei cha pachâ ngâthlâh ha aw, châ chhai thei va na”. A biereipa chata thlalôhna thiehpa nata hnabeiseihna thiehpa eina pie. Alyna vâ chata ei mothlih rai hi thei vei, a ku cha patupa ta, “K, kyh ei cha pachâ, khataih lâ hmahta na siesai khah y..”. “Kei dao, na kiahpâh liata ei y ngâthlâh ha aw!”.

              Ei khotlyna hmâchheipa ta, hrochhôh ta hmahchhiepa âla na ta. Keima châta khati no raita ngâchhih kawpa ta vaw y hnolotuhpa cha dôveipa ta, a paphasai hr’aw sala, ano chata nâ paphasai beih vei. Khizaw liata pasana chhichhih chaipa nata pasichhih chaipa â lapa ta, thina saikao ei sao ngâhai no chhaota, ano cha ei kiahpâh liata a y ngâthlâh haw! Thlah eina palôhna aozy chata thaphana nata hnabeiseihna thiehpa na pie tyh ta, Thohna o liata thi daihmâpa ta ei y nozy chata, ei thlahpa pachhapa ta a y thei n’awpa ta Bible eina reipa tyh. Ano he y leipa sala cha hro hnabeidypa nata nôpopa ta keimasasyh ta ei hrona kha ei la syulyu ha aw. Anodeikua, sasyh hrona alapa he Khazohpa kho lei chaipa châ ha tlôh. Chavâta, Krizyhpa ei châna hawhta he bie he ei zyh cheingei awpa a châ. Ei pôhpa nata sapa liata pasana chichhih kawpa a ypa heta ei hrona chhao a la thei tahpa ei pahnopasia. Ei sapa nata thisaih zydua he na niepa ta, parao khai ha hra sala, keima liata ypa, Khazohpa ei ngiapâna nata Zisu Krista ngiapâtuhpa ei châna deikua he cha na nie paraopa thei beih aw vei. Chavâta, khati no hmahta keimasasyh ta ei hrona he âla beih aw va na. He hawhpa palôhrupa ei phao theina chhâpa he khâpa hro vâta châ vei, ei kyhpachâ chaipa nata kyh na pachâ hmeiseihtuhpa ‘K’ vâ chyu chyuh ta a châ.

 

“Cause everybody hurts,

Take comfort in your friend.

Everybody hurts,

Don’t throw your hand

Oh! No don’t throw your hand

If you feel like you’re alone

No..No.. No.. You are not alone”

 

              A vaw châ tlai na! Pasana chichhihpa vâta daihti rei leipa ta liata thi awpa châ hr’aw sala chi aw va na. Vâdua pachaipa hawhta a pahno tyh na ta, hro hnabeidypa ta sasyh hrona taihta la achhuahpa ta ei y tyh. Anodeikua, ei vaw pachâ chhei haw. A thiehpa ta keima hawhta rairuna atyh ngâhaipa hluhpi ama y tahpa pahno na ta. Sasyh hrona alapa ta vaw thi ha mawh sala ei tovyuh awpa cha moleipazy hriena su meitipo châ tlôh! Atanoh tawhta cha he pasana HIV/AIDS heta eina pabua khao awpa châ vei. Moleipazy châta a hrona sôh chaipa tho Kraws liata hlâtuhpa, Zisu Krista moh vâta ei tiah tahpa he ei pahnopasia. Keima hawhta thina saikao sao ngâhaipazy pachha papua awpa ta keih ei chakâ bâ aw. He hmo he kyh na pachâtuhpa ‘K’ châta ei taopa hawhta châ sala, mohropazy châta byhnâ châ awpa ta  kei HIV/AIDS pasana akiahpa he keih ei chakâ bâ aw.

              Chatanachata, ei theina rakha ta keima hawhta HIV/AIDS pasana hri akiahpazy ama thlahpa hro pachhapa ta, hnabeidyna khaoh tawhta thaohpapuapa ta ama y thei n’awpa chata hria pathao ha na ta. Cha hawhta su nano nanopa liata ei khiekhâ laih no chata noh kha cha ei kyhpachâ chaipa nata kyh na pachâ hmeiseihtuhpa thina saikao, hnabeidyna khaoh tawhta na thaohpapuatuhpa ‘K’ Office bâhpa cha a tyh na ta, hmô lei apachâsa achhuahpa ta lâ hro tlei awpa ei chhuah no chata na vaw awsao ngâ kaw ta.

              Cha rimâ cha khâpa sualuah ma a châ aw tahpa ta ei kaw hrapa cha ei viasa, eima opa ta liata a ypa John Calvin chata na vaw pahra ngâ kaw ta, ei kaw hrapa cha ei ramâ deita a vaw châ tahpa vaw pahno na ta, chatanachata ei viasa John Calvin nah chata a vâ-ia nô charei awpa ta College Vaih lâ athao ha pi ta…

 

 

Ei pahneih ha hra

 

~ L. Beimokhai

 

 

1.         Tahmâ la hmialia meihthâhpizy chhao,

Hiahvâ ryhraopa hawh apai ha na;

Lôhdu nah Kei châ lyna noh vaw chhi,

Bâlia cha-ao ta laizaolao pi,

Saliah nawhhlyzy chhao.

 

Nâ ei châ tyh hlâta,

Ei hro khala Kali yrunô hawh angieh laih na;

Tahmâ la lôh nâ dupa kiah liata,

Nohly chhiki ei pahneih ha hra.

 

2.         Lailâ hro thâh rai angiah aw va na,

Na kiah lia lei lyna âki thlyu tyh;

Zasâh hry lia nâ ei châ tlyh lôhdu,

Na ngâchhihna he Kei châ â daih,

Kyh ei cha pachâ chai.

 

3.         Vâry khizaw lia nâma hawhpa he,

Atyh aw va na hrozô chhâkha lia;

Kaolâh awpa ta ei châ tlyhpa he,

Ngiapachhi va kei nawhhnai heta,

Chhâ palo khoh ei si.

 

 

 

 

ADONA (JUSTICE)

 

~ JB. Khaisia

                                          

              Tahmâhlâ daihti liata ei palôh liata a lai chaipa châ taraw ta, a rei n’awpa dâh deikua ei thai tlôh leipa, I ta “Ei palôh ta la ei pahno thlâh taraw na, ei pakah ta na ei reih thai vei e”, a tahpa hawh ei châpa ta ei pahno.

              Huh! Adona he chyhsa tota eimâ phahla kawpa miakha a châpa ta ei pahno. Eima râh liana heta adona hmôpa nata pahno awpa a sôhkhiah kaw bâpa ta ei pahno. Biedopa, hmodopa nata taodopa eimâ phahla kaw saipa ta ei pahno. Alai chaaipa tawhta a chyh chaipa taihta, a no paw la, a no nô la â do kaw na tah awpa he eima y lalih leipa ta a lyu kaw. Ahyma a pahno aw, ahyma a hmô aw tahpa ta, biedo leipa(bieruapa) rei zy, hmo do leipa taozy eima riah a pha kaw saipa ta ei pahno cha maw!

              Tlai chuh! India phozy Paw tahpa ta ama aw (reih) tyhpa Mahatma Gandhi reihkah ei pasâhsa kaw tyhpa miakha cha, ama sahdô (garden) chhôh liata, a paw ta chicheipa a pasô ngaitapa nata dao ngaitapa cha, Mahatma Gandhi chata hawti kô 4 (kôpalih) rachhôh uhtheipa a châ nota a tâkô chhiepa a hria tyhpa ta chhawh sao hawhta, cha cha a paw (Gandhi paw) ta sahdô chhôh liata â hlaihlâ nota hmô ta, chicheipa a pasô ngaitapa nata mâ ru ngaitapa a châ vâta a palôh pasanazie a reipa cha Mahatma Gandhi ta a vaw pahno nahta cha, a paw yna lâ cha va pangai ta, a paw hnohna chata, “Ei pâ y, haipa bie reih thei va na, sahdô chhôh liata chicheipa mâ ru kawpa, na pasô ngaitapa kha pahno leipa na ta sihna chakhyhpa khiah ma a châ tah na ta, he ei tâkô heta ei chhawh pâ tlamaw hawhpa a châ”, tahpa ta a paw hnohta ngiahthaina ahaw ta, cha cha a paw (Gandhi paw) ta, a sawchapawpa ta biedopa a chhopa cha a vaw pahno nah chata, alytu ha ta mothlih chhaota, “Pâchhie y, he chicheipa ngôh tâkâ thyhluhpi mâ a châpa hlâta la, haipa bie reih leipa chi ta, biedopa na reipa he ei ly via syulyupa a châ” tahpa ta â chhy cha maw.

              Cha khiahta la keimo hry liana heta Mahatma Gandhi nata a paw hawhpa he khazie tlai ma a y thei aw vâ pi tly? Ahy nawh chhôhkha nata ahy nawh sawzy nata ahy nô nata pawzy ma adona a pasâhsa ta a hrokhei tyhpa châ aw vâ pi bao ma? Mika 6:8- liata Abeipa Khazohpa ta a chyhsa (Israel) zy lâta â hnawpa (tao awpa ta â hnawpa) hry ta miakha cha, Âdo ngaitapa ta taopa he a châ tahpa eima hmô. Amosa 3:7; 5:24- zy liata chhao adona a pachâ peimawhzie eima hmô heih hra. Cha khiahta la, keimo, Mara sawzy pi he ngiapâtuhpa a tah tlôhpi ta Abeipa khopa nata miah âhnawpa hawhta eima nohchareih hro he Adona hro ta eima hroh lymâ awpa châ aw vei tlyma i?

              Cha khiahta la he a ry liata eima vaw palâsapa points (duasu) tawhta zawpizy ta kheihta ma miah ama hmôna dâh nata miah ama reina dâh a châ tahpa nata keimopa chhao pi ta eimâ hmôna dâh nata eimâ pachâna dâh a châ vâ ma duah pachâ khoh tua suh vy.

1.                   Siku-Pachutuhpazy: Keimo Siku Pachutuhpazy pi heta eima chakaona he, Abeipa Khazohpa ta miah a raopa (miah a piepa) a châ tahpa eimâ pahnopasia tlai ma? Eima siku kiana attendance a pha thlâh ha ma? Eima subject – lâta siku hâtizy ta ama taopha lymâ ma? Sawhkhâ tawhta siku châta baona (grats) eima hmôpazy â dopa ta eima hmâh lymâ ma? Khihtlâh chhituhpazy nata zawpizy rethaipa eima châ mâh ma? Pachuna daihti (period) chhôh liata class- chhôh liata ma eima y hluh via ma khôtho lâ ma? Eima pachuna su (khih) liata chhôhkha ta a pahrâpa ma eima châ ma, su hropa tawhta a viapa (a pachupa) ma eima châ thlâh  ha tly? Duah a pachâ sih la, a taopathi awpa a hneipa eima châ pathleipa a châ khiahta la bâh a taopathi bao suh u, tahpa ei châ naoh ei.

2.                  Molaipa (Officer) zy: Mara saw molaipa (Officer) eima hneipazy hry liata ama staff- zy nata zawpizy ta ama reithaipa (thâpha ama reipa) ma a hluh via ei ma, ama nô-upa vâ ma tahpa ei pachâ châhta, ahyzy ma ama nô-u via chai vâ ma, khâpa vâta a nô-upa nata ama reipachhie thlâh hapa ma ama châ vâ ma tahpa eina pachâsa pahthu kaw cha maw! Chysahpa pi he a chhâpa na a vâpa y leipa ta cha, anô-una nata kyhchhie a reina he a y chakhyh taraw tlâ bao vei. Staffs – zy chôta bie eimâ pahneisa tupâ hapa vâta tlyma, sôh (finance) hmâna dâh âdo âh leipa vâta tlyma, baona piepa â do leipa vâ tlyma a châ thei hra lah y. Chavâta, a pachâpasia ta, Abeipa khopa nata miah â hnawpa cha, Krizyhpa nata Krizyhpa râh liata cha, eima tao cheingei awpa châ aw vei tlyma i? Abeipa ta miah â hnawpa cha adona châ tlôh ta, chavâta adona he pasô ta, eima pasâhsa awpa a peimawhpa ta ei pahno.

3.                  Râhluhpa (Political Leaders): Marapa pi ta, ryureina eihhrâhpa ta eima vaw sie tawhta chhituhpa (Râhluhpa) cha, Marapa chyhsazy cheingei ta ryureina vaw siekhei ei ta, ryureina khaw lai viapa vaw hnei laih pi ta, sôh (finance) chhao dao (hmô) hluh via hra pi ta, anodeikua a hmâ n’awpa dopa hawh deikua la eima hmâ âh leipa a lyu kaw. Party to heta, sawhkhâna a chabapa maih ado leipa ta reipa châ ei ta, opposition party maih he â dopa ta reipa ama châ cha maw! He he cha a râh zawpi ta eima pahnopasia khai thlâh ha nahta ei pangiasa. Chavâta, Mara râh liata cha â do viapa ta rei ngâ kawpa eima y hmeiseih leipa ta ei pahno. Ruling party nata opposition party he a seitia ngâ kaw awpa ama ypa ta ei pahno vei cha maw. Cha leipa ta, party ticket- a to (pie) lei vâta party hro lâ ta a paihpa (a râpa) zy chhochhi he cha, âmo liata adona a y leipa châ ei ta, ama vaw tloh hapa chhaota mietaku vaituh tlâh châ leipa ta rao ei na ta, chavâta khatlu ta pakahpaleih athlâzipa nata bierei thaipa châ hra ei sala pazi tlâh a châ leipa ta ei rao thlâ pyly ei. Ama pathaona dâh â do lei vâta châna ama patu daihti lia chhao ama hmahdawpa a thyu thlyu thlyu awpa ta raona ta chhituh châ awpa ta cha, râh nata zawpizy châta chi chhihpa ta ama châ aw tahpa eina pachâsa kaw cha maw!

4.                  Râh Zawp: Keimo, a râh (Mara râh) zawpizy pi ta eimâ pachâpasia awpa a phapa ta ei pahno. Râhlupazy ma a molei via ei ma, râh zawpi he maw tahpa hiahrina taopa ta a chhy awpa châ sala, Kei ta cha, “Zawpizy eima molei via”, tahpa ta ei chhy aw. Eima râhluhpa sahlaozy he, Political field- liata amâ ngia hlâ nata amâ ngia thaoh rachhôhzy liata cha, hrozie nôchâ liata reipachhie awpa y hraoh tlâ veih ei tah thei’pa sai ama châ taraw. Anodeikua râh chakaona su (political field) lâta a vaw ngia ei ta, biehneina (hmotaotheina) ama vaw to (chaba) tawhta Ruling party liata a ypa sahlao-party unit members-zy, v/c members zy nata party workers-zy ta, ano cha cha vote vei, âmo sahlaozy nata âmo chhôhkhazy cha vote- tlâ veih ei, chavâta , Sawhkhâ tawhta baona, NLUP (or) SEDP- zy nata o sa baona Housing Scheme zy nata sawhkhâ raizy liata nata contract- rai liatazy khokhei tlâhpa châ veih ei tahpa ta eima leih (report) ngâpa ei palyusa kaw. Chavâta rahluhpa palôh pathaih kawpazy pachâna pha kawpa nata â chhuahna pha kawpazy cha, keimo, zawpizy ta ano leipa (a mâ chhuah leipa) lâta eima pataosa hapa a lyu kaw. Chavâta hmodopa tao awpazy-nôhmei hârapa nata khihsa riethei viapazy ta ama to (hmô) awpa ama to (hmô) thei leina chhâpa he a tlâhpipa ta, râhluhpazy pha leipa hlâta cha keimo zawpizy pha leina vâta a châpa ta ei pahno. Chavâta eima râh liana heta adona heta khotalai mâh tlai vei tahpa â lâpasia kawpa ta ei pahno.

5.                  Awnanopa lâta chhituhpazy: Awnanopa zawpi chôchâh he cha râh zawpizy chôchâh eima rei hapa kha zâ hly (angiapâ) thlâh ha sih la a phapa ta ei pahno. Tahmâ liata ei rei khohpa deikua cha, Pastors- zy nata Awnanopa Machâ zy, Khichhôh Machâ zy nata Py (Fellowship Deptt) zy chhituhpa sahlaozy he a châ via chai aw. Keimo Awnanopa liata luhpa (Chhituhpa) zy hry liana chhao heta adona (justice) he a y lalih leipa a lyu kaw. Eima mopakha chyu he eimâ mohpasia via awpa nata a taopathi awpa a hneipazy pi ta, eimâ taopathi awpa ph’aw khiah maw ei tah cha maw! Biatuhpa Pastorszy ta ama bia liata chhôhkha ta y (pahrâ) lalih khao pi va, Siku pachutuhpa Awnano Machâ nata Khichhôh Machâ pi ta eima pachuna khih liata y (pahrâ) lalih leipa hluh kaw heih pi tah thlâh ha ta, chavâta adona he eima râh lia heta la khotalai tlai ei vei aw ei ta cha maw.

              Adona (Justice) chôchâh varo tlai (lô eih châlâ lei) ta vaw reih haw pi ta, Greek chyhsa sopa, Plato ta cha,’ “Adona he Politics-liata cha âbei chai awpa a châ”, a tah pâ ngâpa a vaw châ. Keimo he zaw, Plato reipa he eimâ hly khei thei suah luah aw vâ ma i? Thokha ta he ei châpaw (Article) ropa heta ama hro a chakie h’awpa a châ khiahta la, ahao kaw aw ei ta,  “anozy bao hrapa ta he hawhpa bie a roh hrapa he’’ ama tah hôlô hra aw tahpa ei pangiasa. He châpaw a rohtuhpa heta cha ahyzy palysa n’awpa tlyma, ahyzy tahchakia n’awpa ta a rohpa châ leipa na ta, chysa to pha chyu n’awpa kâh châ aw vei mâ tahpa vâta a rohpa tlao ei châ hri tahpa pahnokhei awpa ei kho chaipa a châ. Biedopa (Adona) nata adyhna cha pasô teh u-(Zak.8:16-18). Khazohpa ta hmeiseihna a khoh tahpa my kh’ei suh u (Hlazy 51:6,10;ZH 4:23-24)

              A chhâ chaina liata ei rei khoh kawpa cha, he châpaw (article) ei roh chhâpa he Mara sawzy maoh a paphyuhsa awpa ei khohpa vâta châ leipa ta, mo pakha panozy chhâ ta kâh phahnaikhei ei sala tahpa khopasana vâta a châ tahpa pahnokhei awpa ei kho chaipa tlao a châ.

Ei châ ly kaw

 

 

 

 

 

Mara reih rozie dopa

 

 

Kao (m)             : Âteih amâ kao (verb)

Kao (r)               : Chavah kao ama sao (verb)

Kaoh (d)            : He vao he a kaoh kaw (adj)

 

Kai (m)              : A kai kai (a ngiahly) a pasa (noun)

Kai (r)                : A phei a kai (noun)

Kaih (d)             : Mei nata kaih (noun)

 

Kei (m)              : Thlalâ a kei (verb)

Kei (r)               : Awhtachhih a kei (adj)

Keih (d)             : A keih a seih (noun)

 

Kua (m)             : Vaw kua ha mah y  (verb)

Kua(r)                : A chakua kaw

Kuah (d)            : A kuah a seih kaw (noun)

 

Lyu (m)             : Lyu lâ a sie (verb)

Lyu (r)               : Amâ lyu kaw (adj)

Lyuh (d)            : Lyuh eina tuah (Noun), Lyuh a châ (Noun)

 

Lei (m)               : Alei liata â duah (noun)

Lei(r)                 : Eima vao a lei, pihsi a lei (adj)

Leih (d)             : Ti a leih, Thopi â leih (verb)

 

Mao (m)            : Mao va chi (verb)

Mao (r)              : Amao ta hnorâh ama nô (noun)

Maoh (d)           : A maoh kaw (Hmo my thaipa)  (adj), He poh he a maoh kaw (adj)

 

 

 

 

MARALAND POLITICS

EI HNABEISEIHPA.

 

~  Thylua Hlychho,

ECM Vaih Siaha.

 

Biehmia :  Mara râh liata Politics ei hmôna dâh he duah vaw reih tua sa. Politics heta zawpi maniah a pabua kaw. Politics châ leipa he politics hawhta pachâpa ta eima buakheipa a hluh kawpa ta ei pahno. Politics cha ativyna nata hmahsiena a tlôkhei awpa hawhta ei pachâ nota Politics heta eima palôhrupa (Moral) maniah parao ta, a nao kawpa ta hneirôh theina hawhta hmô pi ta, chavâta eima thathi khai haw. A noh hlao ta raihria khoh khao leipa pi ta, contract ta raihria awpa eima khoh khai haw. Politics vâta abaibâ leipa ta hmia ahao khai ha pi ta, apakhy khona taih a lei khai ha he zaw! Khazohpa ta Covid-19 (Coronavirus) hmâpa ta eima achhyna-o zy he a khawpa  châ thlâh ha vei ma? Eima Politics he Thâtihpha nahta âhmie leipa a hluh tu haw, pakhâta ta a pachâpasia tua ei suh u. Politics dopa hmâpa ta Maraland Politics he siekhei achhuah tua ei suh u. Adona, ngâchhihna nata pathaihna hneipa ta Abeipa china chôta Maraland Politics he siekhei ei suh u.

“Politics” tahpa reikah he Greek reih châ ta, “Polis” tahpa tawhta lapa châ ta, a yzie cha “Khihpi” (City) tahna a châ. Zâkhano Greek abeina râh âduana daihti liata cha khihpi sâ kha ta ryureina eihrâhpa hneipa ta a mohôh ei ta, cha hawhta a mohôhna cha “Politics” ama tahpa a châ. Cha hawhpa khihpi liana chata ryureina phapa a y khiahta cha a chhôh liata a pahrâpa chyhsazy châta abohna, niebaw liata ativyna, apôhkhana nata thlalôhna a châ.  Atahmâ cha khihpi sâkha châ ngâlâh ta hmâh khao leipa ei ta, râh kha amohôhna châta Politics he hmâpa a châ ha bâ.Chatanachata Politics ta âchhuah chaipa cha râh nata pho hmahsiena, niebaw liata ativyna, chyhsa châta abohna nata thlalôhnazy a châ.  Cha hawhna chata Maraland Politics chhao a châ hra awpa a byuh. Politics dopa a y khiahta la Mara râh liata chyhsa a ypazy pi he apôhkha aw pi ta, kyh a pachâ aw pi ta, kyh to liata hmahsiepa ta, eimâ tivy aw tahna a châ. Maraland Politics ta âchhuahpa hluhpi y thei aw ta, châhrasala ei pachâ peimawh viapa thokha deita ei reih aw.

 

1.  Ryureina phapa :  Khazohpa ngiachhiena eima topa rônah kawpa cha Mara Autonomous District Council eima hneipa he a châ.  MADC heta ryureina nata biehneina, Semi- Government hneipa châ pi ta, keimo ta dâh a taopa ta, sasyh ryu a rei theipa eima châ.  MADC chhôh liata ryureina he a pha ma?  Ryureina phapa a y thei n’awpa ta Ryureihtuh phapa hnei byuh ta, Ryureihtuh phapa chata a Vision hneipazy hlaopatloh awpa ta Plan tao ta, a chhâna taihta a hria pazi tyh. MADC heta a Golden Jubilee (1972- 2022) tlô daihmâ ha ta, kô – 50 daihmâ eima vaw sie hana liata ryureina kha a pha ma? A siezie a châ thai tlyma? Râh châta hmo phapa pachâna kyh liata Ruling Party nata Opposition Party ta pachâ khoh ei sala, ama bie pathlupa cha  Ruling Party a châpa maihta hmahla/hria tyh ei sala, pha thlâh ha vei tly ma?Ryureina phapa châ sala e.g. K-T road (Kaochao - Tôkalô) he lâthlôh pha kawpa a châ bâ nahta ei pangiasa. Cha hawhna hra chata Ryureina phapa châ sala Palâ by nata Salyu by liata leipaliezy he a pitloh khai bâ aw. Eima râh ta Ryureina phapa eimâ ngiah, Maraland Politics ta Ryureina phapa hnei awpa he â chhuah chaipa miakha châ thei sala ei tah kaw.

 

2.  Niebaw liata ativyna :  Maraland Politics ta khâchâ â nua heih awpa cha Niebaw liata ativyna he a châ. Politics liata pahâh kaw ta, Niebaw liata ativyna a pachâ peimawh leipa cha Maraland Politics liata a failed tahna a châ. Eima râh luhpazy nata Politicianzy ta cha eima râh niebaw liata eimâ tivy thei n’awpa he thata pachâ peimawh ta hmah ama la awpa a byuh. Hmah ama vaw la chiehpazy mopa ta ativy mâh ma pi, pachâna thiehpa hneipa ta hmah la awpa a byuh hmeiseihpa ta â lâ.

1).  Leipalie :  Eima râh liata leipalie a ypazy ; Palâ by, Salyu by nata su hropazy he sâh hluh via papua thei awpa ta thata hmah lapa châ sala a pha aw. Mara râh liata leipalie theina su he Hac. 4,284 y ta, cha liata Hac.495 ngâlâh he paliepa a châ.  Leipalie su eima hneipa zydua he eima palie khai tita cha niebaw liata eimâ tivy via cheingei aw. Leipaliezy tawhna heta sâh dei châ leipa ta âhmie hluhpi papua thei awpa ta hmahlapa châ sala, su hropa lâ tawhta âhmie chi nanopazy la byuh khao aw vei.

2).  Sahroh pasana :  Bible liata nietluana chi no peimawh kawpa eima pahnopa cha lyu/leipalie taopa nata sahroh pasapa he a châ. Sahroh pasana he nietluana phapa nata hneirôh theina a châ. Cha nota eima râh liata sahroh eima pasana dâh he pachâ tua u, eima hmahlana dâh he adidua kaw, hneirôh cha rei lei, eimâ ngiahpa châ chhao dâdei ta eima hnei leipa he! Biehneituhpazy ta tha viata hmah maniah lapa ei sala, plan pha kawpa taopa ta hlaotloh cheingei achhuah sih la a pha aw.

3).  Sahdô taona :  Ei pahno chhei leipa khiahta la, eima râh liata sahdô taopa, nietluana châta a hmâhpa, sadô pitlohpa a hneipa ama ypa tlai ei pahno vei cha maw! Sahdô a taopa thokhazy pakah tawhta ei bie theipa cha, “Eima chicheipazy cha ama paru khai haw, sahdô tao hoh khao va na” ama tah.  Chyhsa sahdô liata chicheipazy paru tyh ta a pakah pahâh kawpa eima hluh kaw chy ei aw. Ama paru khita, paru awpa chhao â daih leipa sahdô eima taopa a châ he maw, paru tiah lei awpa sahdô tao ei sih la, eimâ tivy thlâh ha aw. Sahdô he chi no ta reih ei sih la : o sahdô nata râh sahdô hnei theipa a châ. Eima râh liata khih hluhpi liata o sahdô tao leipa ama hluh kaw.  Yzie hnei kawpa ta o sahdô taopa châ sala, atâhmâhlâ thaina hmâpa ta eima tao khiahta la chhôhkha peimawhpa vâro tlai eima hria papua thlâh ha aw.  Râh sahdô (lyurâhpa sahdô) chhao yzie hnei kawpa ta atahmâhlâ thaina hmâpa ta tao ei sih la, pamosana ta Rubber, Kuvâ, Siathlu, Ramawh, Oil palm, Grape, Iaso, etc. zy taona châta sahdô tao ei sih la, kô 10 khô lâ cha niebaw liata eimâ tivy thlâh ha aw.

 

3.  Education (Achuna) :  Maraland Politics ta âchhuah heih awpa cha Education he a châ.  Education cha “All round development” tahpa châ ta, kyh to liata eima hmahsie thei n’awpa ta Education he eima pachâ peimawh kaw awpa a châ.  Eima râh nata pho he asosâh awpa eima khoh hmeiseihpa a châ khiahta la eima sawhkhâ liata biehneituhpazy ta Education he pachâ peimawh ei sala, a pha thei chaipa ta ama mohôh awpa a byuh.

1).  Student :  Râh hmahsiepa nata asosâhpa maihta hawti pachâ peimawhna ama hnei tyh. Khazohpa bie ta, “Sawnawhzy he ABEIPA tawhtapa eima ryuto châ ei ta, sathei he a lymâ maniah a piepa a châ” tahpa a châ. Hawtizy (students) sôhzie nata peimawhzie he eima pahnopasia awpa a byuh kaw. Studentzy he mylâ hânoh liata maniah deichhytuhpa nata eima râh chhihthatuh awpazy ama châ. Chavâta eima sawnahzy he ochhôh tawhta school taihta mohôhna pha chaipa pie ta, eima pachu awpa a byuh. Atahmâ ta ama duahmo he cha a mohta ta py a pasiepa, thai tlôh leipa ama hluh kaw.  Chahawh penawhzy cha achuna liata hlaotloh lei, ku raihria hoh khao lei, chhôhkha nata khitlâh châta atymâna deita ama tlôkhei thlâh haw. A yzie dopa cha âmo molei vâ châ leipa ta, nô & paw nata Pachutuhpazy mohôh pha lei vâ nata pachu pha lei vâ a châ.

2).  School building :  Sawhkhâ ta School o nata a compound y n’awpa dâh liata a kho pahâh kaw ta, studentzy châta a pha awpa pachâ ta, school o hmo hnei pha leipa cha school padua pasaih vei. Châhrasala, atahmâ ta school o hluh via syulyu yna cha studentzy laiseih n’awpa châta pha tiarâh vei. Sawhkhâ dôvei pi ta, âryhpaoh leina chôta school o eima sa thlâh haw. Eima râh liata school he hluh kaw ta, pachyh via ei sih la, su phapa nata compound pha kawpa liata school o padua ei sih la, pha via vei mâ? Hawtizy pachâ peimawhna hnei viapa ta school o padua suh u.

3).  Teacher :  Eima ryuto sôhpa, eima sawnahzy pachu ta, mohôhtuh awpa cha sawhkhâ ta â hnawpa hawhta Teacher Qualified-pa tlai châ ei sala, a thai leipa nata a pahâh leipazy cha la leipa châ sala a pha chai. Department hropazy liata rai a hriapazy nahta a lyu veih ei, Teacherzy cha chyhsa mohôhna rai a hriapa châ ei ta, ama peimawh via syulyu.Chavâta Teacher lana kyh liata chhôhkhapa a châ vâta khokhei ta, la thlâh ha awpa châ vei, a thaipa tlai, qualified-pa cheingei la awpa a châ. Teacherzy cha eima râh nata pho â pahniehna lôbô ama châ tahpa my khah ei suh u.Mara râh liata Teacher hmiatuapazy cha Pachutuhpa, Dawhty, Missionary nata Ryureihtuhpa hawhta pachâpa ama châ. Atanoh ta eima Teacherzy duahmo deikua cha thata ânano ta, ama zachhihna nata sôhna thata ama pahlei haw. Maraland Politics a vaw hlaotloh thei n’awpa ta eima râh liata Teacherzy ta phahnaingiahna thiehpa hneipa ta school ama mohôh awpa a byuh hmeiseih.

Conclusion :  Maraland Politics cha Ryureina phapa hnei awpa, Niebaw liata ativy awpa nata Education phapa hnei awpa he âchhuah chaipa a châ. Party he Politics châ leipa ta, party cha Politics hmo chhuahpa hlaopatloh n’awpa chhaichhi deita a châ. Party he a pha chaipa y thai vei, eima râh luhpa nata politicianzy chhaota ama châta ryhpaoh nata pha via ama tahna daihti liata party hropa lâ amâ palie thlâh ha tyh, zawpi châta noraih  âchhih kaw. Cha nota vote- 1 ta a hneipa pi ta, hiakha lâ, hiakha lâ a palie pi ta, mohzy a parosa pi ta, News lia taihta paphuahsa pi ta, eima right eima zuah tahpa pahno leipa pi ta, a pei chaimâh. Maraland Politics a châ leipa liata thata eima bua tyh bao. Politics dopa tlâ reih thlâh ha leipa pi ta, Election no maihta thata a reipachhie tyh pi ta, palôhrupa riethei âchhih chaimâh. Atahmâ tawhla, Politics dopa apachu ei sih la, Politics dopa pahnopasiapa ta, eima râh châta taotheina eima hneipa chyu hmâpa ta eima râh he paduapathi ei suh vy.

 

 

 

 

MO LUH KYHCHHI LIATA SAWHLÂKIA

 

~ Laicho Nôtlia

 

Mara râh liata eima mohnô- mahpaw daihti liana kha Khazohpa hmeiseih he vaw  pahno mâh leipa ei ta. Anodeikua cha chyhsa hrona kyh liata biehneituhpa nata byhnâ pietuhpa he cha a y nahta khâchâ amâ ngiapâ heih tlôh. Chyhsa thlahpa chhao a y tahpa cha ama pahnopasia heih kaw tlôh. Thi tawhta thlahpa y zia n’awpa chhao ama palôh liata pachâna i ngâsâpa chhao ama hnei. He vâta ama phôryhpa/ryphôhpa (tradition) liata lyurâhhripa he khazohpa hawhta amâ vaw pyhpa a châ. Chavâta lyurâhhripa he palôh patlâh ta, panaopapâ awpa he ama hro chhôh châta nata ama thi khôlâ châta peimawh chaipa ta ama pachâpa a châ. Eima Khazohpa hmeiseih he vih vih ama vaw pahno daihmâ. A thlapuhpa(nohpa) ta cha ama vaw  pahno hra.

              Ama khih nata râh pabohsa awpa kyh liata cha, ama hro nata thisaih chhao sokhâh ngâhpa ama châ. Sôh natah thih vâta hrâ chhao cha ama sie tyh. Hrâsie nota ama patupa chyhsa cha sei châta hmâh ei ta, moluh ama lapa chhao khih lâ ama phaoh lymâ. Ama phôryhpa liata momanôh thietuhpa he ziechhôh veih ei. Ziehchhôhpa cha rei lei, nohhâh yna nata zachhihna sâkha hawhta tlao ama pachâ. He vâta hrâ ama sie nota moluh ama phaopa cha ama ia lymâ. Ama iana chhâ he kao no y ta-kao khana cha, ama thiehpa thlahpa sawh ta a kiah lei n’awpa châ ta, kao nona liata a thietuhpa thi tita a thiepa thlahpa kha sei ta a y lymâ n’awpa chahnao pa-ina châta a châ. Moluh latuhpa nata a viasazy khata mo luh kha sawhlâkiapa ta lâ chahlô ei ta, mo luh pakah liata sa natahlao ama tu pâ hra. He he mohnaona pamosana chi kha hawh a châ.

              Moluh iana lia heta lâpa chi thôh y ta, Sawhlâkia, Chhôhchhipa natah Dawhlâkia zy a châ. Moluh lahtuhpa kha Sawhlâkia liata hmia a sah ta chysia pha chaipa â tobi awpa a châ Meithei apia aw ta, a hnôh lâta a viasa sahlao ta pazi aw ta, a ku liata vainâh â chaba pâ  awpa a châ. A hnôhlâ ta a viasa sahlao ta pazi aw ei ta, viahdawh-viahkhoh etc. a chabapa ta ama pazi aw. He hawhta ama lâ no heta chanônahzy ta sahhma sâhti ama pakah liata ama tu pâ laih aw. Moluh he ei thôh ama lâ chahlô tawhta amâ pahâ chy aw. Chhôhchhipa lâ chhao he Sawhlâkia hawh khata mo luh ama lâ chahlô hra. Dawhlakia lâ deikua cha bâh anano ta. A tyuhpachhohpa ta moluh kha chadô ei ta uphawh hawhta â cho ta, a cho laih ei ta moluh kha ama lâ chadô hra. Dawhlâkia lâ he cha riethei â chhih pâ kaw. Aviapahchaipa ta Chhôhchhipa lâ nata Dawhlâkia lâ he Chapi kaokâh liata lâh via chai ei ta, Sawhlâ ama kiah khiahta cha Chhôhchhipa nata Dawhlâkia he ama pazao pâ ngiathia a byuh tyh.

              Mo luh ia khai a mylâpa heta ahyhmah ta khô ama zoh awpa  châ leipa ta, a hânoh (a mylâ heihpa) pa liata moluh latuhpa khata vao thie aw ta, vao thi khata a ku phiephuh â si aw. He heta a thipa khata a thietuhpa hmia siah thai khao aw vei ama tah. He moluh ama ia chhôh liata moluh latuhpa kha a lahpinô hnoh â zia awpa châ vei.

              Tlôsaih nata Zyhno kao liata  moluh kha khih angia kheipa zieh hlei leipa ei ta. Châhrasala Hawthai nata Sabyh kaokâh liata cha moluh kha khih chhôh a ngia khei leipa ei ta hawka liata, Pazi tho ama bôpa liata tlao ama chaluah. Thokha heih cha, mo luh ama tawh (chaluah) pa, luh chôta liata, i luh ama tawh pâ heih. He heta a pamosapa cha a thipa sawh ta a thietuhpa a kia lei n’awpa a châ. I luh ama tawhpa khata, a thipa thlahpa kha nga tyh ta, he vâta sawh a kiah thei vei, ama tah.

              He iana kyhchhi (ceremony) a chhâ tawhta Sawhlâkia lâna liata paropasyupa a tôtuhpa zydua chhao kha mo luh latuhpa o liata noh 5 (noh pangawh) chhôh amâ hraikhôh awpa a châ. Noh 6(nohcharu) a châ nahta, moluh latuhpa cha mydi ta thyu aw ta vahtiepa â hnia chaipa liata angai â si awpa a châ. A ngai a si khai ta o lâ a vaw ngia nahta, noh 5 (pangawh) chhôh â khôkhih kheipa viasazy chhaota tlyhmia liata a sieh tho ama bôhpa kha patu chyu aw ei ta moluh latuhpa khata, “Tahmâ cha chyhsa ei thiepa thlahpa cha a pua haw, a sie haw”, tahpa ta awh ei ta, moluh iana cha a chhâ pâ haw.

              Zâkhano cha Sawhlâkia he, chapaw saita ama kiah, chanô ta Sawahlâ kiah beih veih ei.

                                                                                                                                          (Source: The Lakhers)

 

 

 

 

LYUVA KHUTLA

 

~ T.A. Chhôhu

 

              Marapa ta apalypa-uasana daihti a hmâ tyhpa Lyuva Khutla he thyutliapazy ta ama hmia pahnona rei tu vei. Machâ viapa reina dâh ta he daihti he rai hrâhpa lyuva-thotu patlô khai ha ei ta, lyurao â daih hlâta amâ hmâ tyhpa hawhta reipa a châ (Lyurao khai tawhta he cha rai hropa, chichei awpa, chhâmeih tupa zy, chichei-bialo hropazy ama pabuna daihti châ ta, lyurai â pazao lymâ heih). Amâ hmâna dâh tlâhpipa chhao nie nata do kyhchhina nata PAKHUPI ODÔH LÂ ta amâ hmâh via chaipa hawhta reipa a châ hra. A hmâh parei kaw tyh ei ta, CHA-YPI tah ei ta, haosai lôhlia ama paphasa kaw.

 

              Lyuva Khutla he, he arohtuhpa (TA. Chhôhu) ta thata a vaw pachâ. Ano he tlaikao nah ku rônahpa Chapchar Kut liata Committee Member zy a vaw châ laihna zawhzi ta ama ku hmâpa he uahvana thata a vaw hnei. He zawhzi ta Marapa chhaota ama hnei hra nahta pangiasana khâchâ a hnei. A pahno chhôhpa cha, Pakhupi Odôh lâ nata ama tao dâhzy machâ nah biereipa tlâ châ tlôh ta, cha patuapaluana zawhzi ta Siaha liata machâ ngâ viapazy a vaw saohiah ta, â saohiah penawhzy cha H. Mawlo (Mawlo Hnaihly) nata HC. Riatli (Riatli Hlychho) zy ama châ. H. Mawlo heta Lyuva Khutla chôchâh reih hluh leipa ta, Lôtia (Lungtian) khih liata Beibei-khohchei a thyudyu nota â hlaopa thâti reih ta, pha a tahzie nata niedo a phana zy, haosai a phana zy thata a pahripaziah. Nahthlietuhpa chhao heta nahthlie pha tah ta, a mo chhao vi vei. A nahthlie pahâ tu vâta â chhuah chaipa Lyuva Khutla thâtih hmâchhâh hiahri hluh khao vei.

 

              HC. Riatli (Thakô paw tahpa ta pahno viapa a châ hra) ta ama hmâna tlâhpipa reih ta, ano he Awnano Machâ a châ vâ ma a châ tly, a haosai phana lâchhâh reih hluh leipa ta, hla thokha a reihpapua. He arohtuhpa heta hiahrina a taopa cha, “Tlaikao nahta Chapchar Kut zy, Mim Kut zy, Pawl Kut zy hnei ei ta, Mara nah chhaota ama hnei hr’aw vei mâ?” tahpa a châ. Â chhyna cha, “Hnei ma pi,” tahpa a châ. A mianona ta, “Cha khiahta la Biehrai liata chithieh ku zy, sâhhria ku zy y tlôh?,” tahpa châ heih ta, â chhyna cha, “Pahno na, he he la Biehrai liata arohpa châ ha ta, khizaw lâ liata Marapa ta ‘KU’ hnei ma pi,” tahpa ta â chhy. Lyuva Khutla ama hmâna dâh nata Pakhupi via penawh ozy dôh laihpa ta sa (Vao thawpa) ama pathiesa laihpazy a pahripaziah.

 

 

MARA THYUTLIA PY NATA LYUVA KHUTLA

 

              Mara Thytlia Py chhihthatuhpa nata Thyutliapazy hry liata he Lyuva Khutla ahmâ hra awpa kho kawna vaw lai lymâ ta, he hawhpa hlâno Marapa taozie deichhy awpa nata cheihchalo awpa he MTP achhuahna liata â hlao hrapa a châna hawhta, 8th MTP General Conference Amôbyu (B), Dt. 27.01.1987 liata Official Agenda ta taopa châ ta, lôraoh kawpa ta apypa nata pathlupa a châ. He kô (1987) liata ahmâ thei leipa châ ta, a kô heihpa 9th MTP General Conference Indoor Stadium, Siaha liata pathlu chaneipa a châ. Ahmâ n’awpa daihti chhao 5th March (Pamih thlâpâ târi noh 5) châ sala tahpa châ ta, he raohpa ta Lâdawhdai chhao 15th September (Thlarâh) târi noh 15 liata ahmâpa châ hra mawh sy, tahpa a châ.

 

              He hawhta MTP General HQ ta a vaw pathlu tawhta cha ngiaroh kawna chôta nata rairuna hluhpi chatôhpa ta kô 1988 liata Siaha Vaihpi Tlyliah liata ahmâ tua chaipa a vaw châ. He kô (1988) tawhta ahmâh pathaopa ta kô 1989 nata kô 1990 taihta ahmâ pazaopa a châ. A hmâna dâh liata deikua palôhtlâh a chhih tu hlei vei. MTP pachhuahpanohpa châ ta, sôh lâchhâh ta rairuna zy thata y ta, zawpi vâtlâh nata MTP Member zy cheingei chhao ahlaopa ama chyh kaw. “Chi hropazy hmiakô liata noza eima tla tlamaw na aw,” tahpa reihkah he MTP chhihthatuh penawh tawhta a pua hluh kaw. A hmâna dâh tlâhpipa cha pho lâ (Sawlakia nata Awhkhypa lâ) zy pamosapa nata hlasanazy châ via chai ta, chanô laihsa atobina (Cultural Dress) pha viapazy atlyna hneipa a châ hra. Lyuva Khutla ahmâ nawpa dâh patohpatiatuh penawh he MTP HQ chhihthatuh penawh tawhta raopa châ ei ta, kô 1990 liata ahmânapa liata  Chairman châta Puhpa T.A. Chhôhu raopa châ ta, he kô lia heta ahlao penawh nata tovyuh hnei penawh hnohta Certificate chhao taopa châ ta, pie papuapa a châ hra. He he ama tovyuh chyu aphapa ta ama patlô theipa vâta alykheina a châ nota a heihpa liata thapi ama phia via thei n’awpa ta nata mohropa ahlao hoh lila lei penawhzy châta pahaona a châ awpa hnabeiseihna chôta taopa nata piepa a châ hra (Ano, Organizing Chairman chhao he Certificate adaotuhpa hry liata â hlao hra).

 

              Certificate cha he hawhta taopa a châ:

 

 

LYUVA KHUTLA

(FESTIVAL)

1990

 

CERTIFICATE OF APPRECIATION

 

              This Certificate is awarded to Shri / Smt. __________________________ in appreciation of his / her time performance in the Lyuva Khutla Festival held on 5th March 1990 at Siaha field.

 

 

(MTP Emblem)

(Pahmôpi azaw ngâpa)

 

 

Sd/- on 05.03.1990

  (T.A.CHHOHU)                              Sd/- Pachi Hlychho,

        Chairman,                                                 President,

Lyuva Khutla Festival, MTP (Hqrs) Siaha.

 

Note: Xerox copy chathi pâpa a châ.

 

              MTP Member phahnaingiah viapa nata nôpaw palôhhâh viapazy ta he Lyuva Khutla he pasô via ei ta, zawpi-vâtlâh lâ tawhta thathyu kawpa ta ahmâkheina y leipa ta, hâti nah chhochhi mohtuhpa pakha pano ngâlâh hmô’pa ama y. He daihti nota MTP chhihthatuhpazy palôh pasasa kawpa cha, chi hropa ta ama cha-ypi (KUT) amâ hmâna liata Marapasaw thathyu kawpa ta ahlao ta, Lyuva Khutla liata ahlao hoh tlôh leipa ama ypa he a châ. MTP chhihthatuhpazy ta hnabeidy leipa ta he cha-ypi ahmâ pazao n’awpa chôchâh liata thata tei ei ta, ama palôh liata MADC chhihthatuh penawh ahlao (Participate) hrapa ta hlaotlohna a y nahta pangiasana nata hnabeiseihna ama hneipa vâta MADC nôpaw penawh nata chhihthatuh penawhzy asaohiah pathaopa a châ.

 

              Daihti vâro tlai ahmâ pazao leipa ta a y tawhta, târi noh 10 Hmypi, kô 1997 noh ta Organizing Committee paduapa ta a daihti raopa târi no 5 Pamih, 1997 liata MADC nôpaw penawh Puhpa K. Paichhô, CEM nata Puhpa TT. Vakhu, EM (Art & Culture) zy chhaota thathyu kawpa ta ahmâ pazao heihpa a châ.

 

              He Lyuva Khutla noh 5th he MADC ta a ry liata Department zy châta cha-y noh (Holiday) ta phuah sala tahpa khona a y vâta, MTP HQ nôpawpazy ta MADC nôpaw penawhzy asaohiahpa ta Holiday ta phuahpa a vaw châ haw.

 

              He kô tawhta MADC nôpawpazy nata MTP HQ ryhraona hawhta yzie hnei kawpa ta ahmâ pazao lymâpa châ ta, he arohtuhpa cheingei chhao nôpaw penawh khokheina ta kô 2014 ahmâna liata Chairman ta raopa a châ hra (A Chairman tua chaina tawhta kô 24-na liata).

 

 

Source: Board of Mara Literature, MADC, Siaha.