Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue February 2020



              Editorial

  

               Board of Mara Literature chata atheina zydua papuapa ta Mara reih hmahsiena nata laiseihna châta hriapa ta,  hmahlana chi nano nanopazy vaw hnei tyh ta, hlaotlohna theilâpa chhao eima lyu pathao lymâpa ta pahno pi ta, eima thathyu ta, eimâ ly ngaita.

              Mara reih aboh n’awpah nata laiseih n’awpah heta BML tlyma, MWC, MTP, MCHP, MSO zy ngâlâh hriapasana he daih leipa ta, Mara zawpi zydua ta palôh miakha phaohpa ta keih eima chakâ khoh awpah he a peimawh hmeiseih.

              Khazohpa ta reih eihrâhpa maniah a piepa vâta eima râh châta hmopha a vaw tlôpa, alai viapa miano y ta, cha cha MADC nata Awnanopa he a châ.

              Reih anoeih ta miah a pie vâta nata chi nata pho ta maniah a padua vâta Khazohpa ta Baptist Missionary zy tlyma, Welsh Missionary nah tlyma miah pahlysa thlâh ha leipa ta anoeih tlai ta Missionary miah tuapa ta, eima reih tlaita ano eima palyupalih thei n’awpah ta Awnanopazy miah paduapa ta aly’pah a châ hmeiseih.

              Chahawh pyly ta reih noeihpa eima hneipa vâta sasyh ryu areih thei awpah ta MADC chhao maniah pie heih ta, aly’pah a châ ngaita.

              Anodeikua eima tah tua aw. Khazohpa ta Awnanopa nata MADC miah a piepa chhâpa he atahmâ cha mypa ta eimâ râsai ha khiahma tah thei awpah a châ. Reih vâta miah a paduapapa Awnanopa ta Mara reih hnôhchhy pathao pi ta, eima programme liata Mizo reih sai eima pakah liata achhaoh bâ ta a pei kaw. Khazohpa ta Awnanopa noeih ta miah a paduana chhâpa he Mara reih vâta a châ tahpa eima my awpah châ vei.

              MADC eima hneina chhâpa nata sawhkhâ rai hriapa ta hlao eima hneina chhâpa chhao he Mara reih vâta a châ pyly. MADC liata Mara reih a thai leipa ama hluh kawpa he eimâ mohpasia awpah â ngiah ngaita.

              Pho hluhpi hry liata a khokheina miah patosatuhpa Paw Khazohpa palôh eima patlâh lei tlamaw aw tahpa chi â chhih kaw.

              Eima Siaha khihpi chhôh liata eimâ khiekhâ no nata  viahdaoh liata nata ahy daoh lia raita eimâ ngia tita eima Mara reih cheingei he hmiapasah tyh ei sih la tahpa he eimâ pasyu khoh hmeiseih.

 

 

 

 

 

MARA REIH HMAHSIENA NATA

HMAHSIE VIA N'AWPAH

~ Ahnei Johly

VIT College (Pune)

Meisavaih East, Siaha

 

( He Essay he BML Essay aropasuana, 2019 liata lymâ sânona adaopa a châ.)

 

Khazoh Châbu Pathaihpa liata Âthaona, Bo 11-na chhôh eima reih khiahta la ria nata reih peimawhna nata hmo atao theizie eima hmô aw. Babel O sana daihti liata Abeipa chyhsa sawzy cha amâ pôhkhana pha tu hata, pakhâ thei rima awpah chhao châ khao veih ei. A chhâpa la reih miakha ama hmâh vâta a châ. Kha vâ khata Abeipa ta ama pôhkha thei khao lei n'awpah ta ama reih a panano pa ngâ kawpa a châ. Chavâta, khizaw khihsa tôhtuna kyh liata hmâhsiena awpah ta a peimawh chaipazy hry liata sâkha cha, 'reih' he a châ tah ei sih la, tah chhei thlyu ma pi!

 

Ch'awkhiah Khâmaw 'Reih' Cha?

Chyhsazy ta reipa nata ropa ta pahnona nata pachâna bie eimâ chhona he 'reih' a châ. Reih he eima Phoryh (Culture) liata â pabupa châ ta, eima chhichâna dopa maniah palâhâh theituhzy hry liata peimawh kawpa sâkha a châ. Chhâ vaw y lymâ awpahzy hnohta eima phoryh nata chhihthana sôh kawpazy apiepachhuahna nata apahnosana pha chaipa hry liata sâkha a châ.

 

Mara Reih Hmahsiena

Khazohpa ta Marasawzy kyh maniah pachâ ngaita ta, Pho chyhnawh kawpa hmah châ hra ei sih la, phohrozy ta maniah ama tlypabai awpah pasaih ngâsâ ta vei. Phoryh nôchâ nanopa, Reih, Ti nata Râh eihhrâhpa maniah pie ta, pho leidiapa eima châ awpah pasaih lei khâhta, leidia awpah tawhta tlao maniah a pachhapapuapa a châ.

Abeipa ta keimo, Marasawzy châta a tlyhpapuapa, Missionary Rev. R.A. Lorrain nata a chhôhkhazy ta kô 1908 khata Mara A AW B CH zy maniah taopa ei ta, ama hriapasana nata apiepasana zawhzi ta he na châ rei ngâ kawpa hawrawh chhao he a y theipa a châ. He dei châ vei, MADC ry liata châ achupa, Class I - VIII taih Mara reih achuna buzy atahmâ cha eima hnei ha bâ hra.

India ta British sawhkhâ avaona tawhta khotalainazy vaw hmô ta, kô hluhpi vaw khô ha bâ hra sala, State Sawhkhâ ryureina ry lia eima y ha tawh tly cha a leitheileita eima reih, Mara Reih chhao khoh dah hawhta vaw laiseih thei tu tlai vei. Châhrasala, châthaipa vaw pua tuapazy vaw y hôlô bâ ei ta, âmo nata Board of Mara Literature chhihthatuhpazy phahnaingiahna zawhzi ta atahmâ châ lâdo eimâ kaw chhih pathao ngâ kaw bâ hra, aly’pah a châ hmeiseih.

 

Mara Reih hmah a sie via lymâ thei n'awpah

Hmo rai rai he pabohsa ta, eima palaiseihsa khoh khiahta cha hneituh châna palôh eima phaoh chyu awpah a peimawh. Mara reih chhao eima palaiseihsa khoh khiahta la keimo eih a châna a thei ngâthlâhna chôta hmah eima pasiesa awpah a byuh. Mara reih ahmâhtuhpazy pi heta eima reih a hluh thei chaina dâh hawhta hmâh lymâ ei sih la, eima chheipâh liata a ypazy ta vaw thei hluh via ei ta, âmo liata thaina thata a pie aw ei.  

Gasper Rivera ta reih ta, "Reih a thi lei n'awpah ta hmo peimawh chaipa cha ropa he a châ" tah ta â do kaw ta ei pahno. Mara reih a thi lei awpah eima khoh khiata cha Mara reihta châ rohpa eima hnei hluh awpah a peimawh. Châbu nano nanopazy he kho thithawta reih thei awpah y ha sa la, a râh zawpizy chhaota a hluh thei chaina hawhta reih a chhuah hra ei sih la, atahmâ eima duasu hlâta thata hmah eima sie cheingei aw.

Hawti nahzy he palôh pachâna a hmâh chyhpa ama châ vâ heta ama palôh liata hmo/bie a ngiachhôhpazy cha ama pahnoparei thei kaw tyh. Chahnaihta, Mara reihta paliepa: Film zy, Animation/Cartoon zy, Hla zy, etc. chhao he a hluh via ta hmô/moh thei awpah ta pachhuapanoh theipa châ sa la, hawti tawhta machâ taihta Film nano nanopa, TV/Mobile tawhta moh thei awpah a y ngâthlâh ti ta la thata reih liata hmah eima sie cheingei aw.

Reih he hawti viapazy hnohta eima pachu lymâ vei khiahta la, atahmâ a thaiso kawpazy he mylâ-hânoh ama thi daihti a vaw tlô ti ta cha tlâ leidia lymâ awpah a châ. Kheihawhpa khih/râh lia rai reih he hmoto tao n'awpah châta peimawh kawpa châ tlôh ta! Eima râh chhôh lia cheingei ta eima reih hlâta reih hropa, apachaita, 'Mizo reih' (Lushai reih) vaw lai via ngâ kaw ha bâ ta, he kyh lia heta a râh zawpizy pita hmah eima la vei khiahta la, reih hropa ta thlai maniah a di sao lymâ aw. Eima reih ta reina eima hnei mâh leipa, mohchhozy he a hluh thei chaina hawhta palie/bi ta hmâh lymâpa chhao a byuh kaw.

Pho hropa, mara reih a thai leipa ama vaw y hapa chhaota Mara reih cheingei ta bie a chho lyhlia ta, pathaisa cheingei tlao eimâ chhuah tyh awpah a pha. Apachaita, Viah nahzy he Mara reih vaw thai lei ha ei ta, Mizo reih chhao chata pyly, thai kaw muarua hlei hra veih ei, a keimopa chhao chata pyly, thai kaw hlei hra ma pi. Cha tlai cha, a thai chai chaipa hawhta Mizo reihta a chhokhy chaimâh tyh pi ta, he hawhpa he pathleih ei sih la, tlaota Mara reihta a chho lyhlia tyh ei sih la, eima reih chhao thata hmah a sie thei awpah a châ.

Eima zydua heta eima chheipâh liata a ypazy cha Mara reihta a chho tua lymâ ei sih la, a thai leipa ama vaw y hapa chhaota pathaisa ngiathia tlao achhuah chyu ei sih la cha reih a thaipa thata eima pôh cheingei aw.

Mara reihta reih hropa â kholei kawna sâkha cha châ ropa, reipa nata hmôtheipa liata zy he a châ.

Chyhsapazy pi he eima hmo pachâna nata khonazy a vaw lyucho tlâ leipa ta, Thâtihbu nata Châbu reih thei awpah chhao khohdâh hawhta a zâ ki tu vei. Chahnaihta, châbu, thâtihbuzy he hawti no tawhta ama hmo hmô awpah nata ama thei awpah liata Mara reih he vaw hluh sa la, a hla ta sa thei awpah: Hawti Hlazy chhao hnei hôlô ei sih la, reih liata hmah thata eima sie hra aw. He hleikhô ta atahmâ ta eima râh nôpawzy ta hla nata bie a phi/reih pasuanazy patohpatiapa ta hmah ama lapa chhao he reih hmahsie via lymâ n'awpah liata pha kawpa nata peimawh kawpa a châ.

He zydua pahly awpah ta eima râh liata Literature hmahsie n'awpah kyh liata thapi phiapa ta keih vaw chakâ lymâ tyhtuhpa, Mara Writers' Club nata Board of Mara Literature zy heta Local Channel liata anoeihta ta Channel hnei theipa châ sala, khatinorai (24X7 hours) reih hmahsie n'awpah lâchhâh moh thei awpah ta Programme nano nanopa pachhuahpanoh theipa châ sa la, a râh zawpi heta eimâ thôhkhei kaw sai aw. A pamosana ta, Pachyhnoh ta Grammar lâchhah pua sa la, Khazohnoh ta, hawti nahzy School chhuti ta O lia ypa ama hluh hnaihta Rhymes lâchhâh tlyma papuapa châ heih sa la, chahawh lymâta a nohhro chhao Programme nano nanopa papua tyhpa châ sa la, khatinorai hmô thei awpah ta a vaw y ti ta la hmah thata sie ta, eima palôhlia 'Mara Reih' pasâhsana chhao â vaw sâh via rili hra awpah a châ.

Tawhta la, Grammar apachunazy chhao he internet tawhta hmô thei awpah ta, a reina dâh (aony) zy taih pahlaopa ta Website liata Audio nata Video ta soh theipa châ sa la, su nano rah nano tawhta a khohpa maih, kho thithawta Mara reih eimâ chu khai thei ha bâ aw.

 

 

 

 

 

VÂ-IA CHÂPAPHAOPA

(Love Letter)

 

Rohtuhpa : Beikhotly L. Mara

Chhaolô

 

 

( He Love Letter he BML Love Letter aropasuana, 2019 liata lymâ sânona adaopa a châ.)

 

 

To

 

Marapawnô

Saikao

Siaha District; Mizoram

Târi 7th Tlazoh, 2019

 

 

Ei Lôhdunô,

Saopi vâsuazy paipa ta; châhvâ thlihuah naizualuapa a pathlina, Rainô aongiapa nata thoto pawto paryhna, laihna mara râh lia tlai cha; hnatlâna bynâ totie chhaota a chhô-zâ daihti nâ hmâh hai tahpa pahno na ta ei ly zie reih thei vana. Kei na kyhpachâpa lôhmaoh paw tlai na chhao he, na kyhpachâna nata ngâchhihna lyuhbie zydua vâta hnazô tyhheihna noh rohpadyna chõta tlâhzawh noh ri thapha ta ei pasi hai.

Hnazô tyhpa ta ahy thângiah leita lyuhbie eima paryhkhohna daihti zydua ei sapa nata thlahpa liata khâ a châh thlâh ha tyh. Molâhpa reih biesâ sâkha chhao pahlao leipa, vâpiahti pasohpa hlâ chhaota pasoh viapa ta mara ao ngiapa tlaita kyhpachâna lyuhbie eina hlâ tyhpa chi kha; ei hro zydua he paw hawhta a pakaisa tyh. Na kyhpachâna ao nata reih naizualuapa he kei mara khydi châ heta khizaw pyungiapa zydua khu ta, lailâhzy nata pasaiphazy pachâna chalihsa theipa châhvâ Rainô aongiapazy ta na aongiapa he khu thei beih veih ei. Na mara reih aongiapa tlai heta kei lôhmaoh paw pachâna nata thisaih sie haipa chalihsa tyh chita, ei pikhei ei reih cheipa mara reih lia tlai heta lôhngâhna lôbô eina taopa tyh chi.

Na hnazô ngiapa nata pôhraoh â tlaizie hleikhô ta; mara tobina ta nâ vaw tobi nahta chhochhi la e, kei rairao lôh nâ du patlua via rili tyh. Châhpidynô tlai na vaw châ hezaw! Ahy e na chô tawhta mara tobina reipachhie thei aw. Châhvâ, chasipaw nata nopi pawngiapa torai paryh tyh hra ei sala, mara tobina nâ ngiakhei patlua; cha khu theipa rai y veih ei.

No hrozie-nôchâ tobina tlai chhao he chhaolei pawmaih hry ta na pawhpatlua tah lei thei va na. Na hmao he biedopa ta tobi chi ta, na mokhaoh he zawngiahna ta. Na hmia he alyna hmia ta tobi chi ta, na kupazah panyupa chhao mohropazy châta apasaina nata na chhôhso zydua he kyhpachâna ta na tobi khai. Nâ ngiana bieru he kei khydi lôhmaoh heta ei lailâhzy hnohta phuah lei thei tyh va na.

Mara lâ chi nano nanopa thai paki patlua chi ta, zasâh manôh hryta chheikha-chheino nâ vaw pahiehpa chhochhi cha; chhaolei pawmaih zydua hryta pawhpatlua chi ta, pawmaih zydua vyuhpa ta khotalaina he na phuah chanei tyh.

Na kuzô thaina zydua chhao he kei mara khydi lôhmaoh paw châ heta achuna tlohpakipa sai tlai a vaw châ. Tichho-Beihchho to rai thai patlua chi ta, kumâ-pheimâ zydua taih chhao. Chô Khazoh heta mara phopi taozie thaina zydua he nâma liata ma a vaw chahyh khai ha tly i! Na cheihchalo patlua tlaina mara phopi he.

Châhvâ Rainô aongiapa khu pahnietuhpa. Mara phopi hla torai chhao thai paki chi ta, molâhpa hla rai ta pathluah beih va chi. Zasâh manôh lôh nâduzie nata molâhpazy sy pahnietuhpa. Mara hla tlaita pahniena poh na pazawh tyh. Lo leipa ta na pazawh via rili lymâ aw tahpa ta sadu ei thlie tyh.

Mara reih he reih zydua hlâta a ngiakhei patlua chi ta, reih ngia hropa zydua na khu tyh. Khizaw pyungiapa zydua tlai chhao he, na eikha pahneina ao pyungiapa nata khochhihpa chhôh liata amâ pabu khai thei. Pawngia torai chhao he, na hmia liata nohhâh rai hnei thei veih ei. My nohchhipa hlâta angia via chi ta, zâlâ noh tlapa hlâ chhaota nâ ngia via. Na kuzô puapa maih chhao he chô Khazoh kuhriapa hawh dei aza châ tyh.

Atahmâ eima laihna tlâh nata bypizy ananopa ta charei chy hra ei sih la, ei châta nâ piepasana nata laihna mara râh tha napasana zydua heta ei sapa nata thisaih zydua chahryh pahnie chi ta, molâhpa lâkô daih beih va na. Khataih su lia rai y hra aw sala ei thatlôna châ chi ta, ei hnabeiseihna pahro tyhtuhpa chhao na châ. Na kyhpachâna nata ngâchhina lyubie hleikhô ta, na thapasapa nata kyhpachâpa na rãh châta nâ pielyuna zydua vâ heta ei mara thisaih tha a patlô rili tyh.

Nâ ei kyhpachâpa vâta mara reih a pheisai beih leipa na ta, molâhpa hryta tlao ei palaikhei tyh. Lailâh hrozy ta ama nohto hro ta mara reih he a pheisaipa ta hny tyh hra ei sala, kei deikua ama hnypazy pakhypazi laihpa ta, a sôhzie nata â ngiazie tlâh-awhkhei lymâ awpah he ei sapa nata thisaih maophaohna hawh tlaita khâ ei pachâ tyh. Na chiheih khydi he na vaw sy pahnie tlai na.

Pati ei dôhna maihta na kuzô thâ ei ngiah pachai tyh. Ei aoh khopa tlai chhao heta na kuzô hnôh zi tyh ta; ei aoh khopa hmozy heta ei mara châna a pasia via rili tyh. Molâhpa kuzô ta ei aoh rai tiah thei beih leipa ta, ei palôh la beih hra vei. Kei la nâ kuzôthainô zawhzi ta mara âhmie iahzaipa tlaina eivaw châ ha bâ.

Kyh totie liata ei mara thisaih palaiseihsa chi ta, nohto ta ei chipho liata ei ngiarih via rili tyh. He zydua he na kyhpachâna pawti ei cha vaw zyhkheipa vâta a châ tah leithei va na. Khazohpa Châbie ta kyhpachâna a reipa zydua he nâma liata pakipa hawh dei a vaw châ he zaw! Khahlâ zydua liata kyhpachâna ama reih tyhpa he, biethâh deita ei vaw pahnopa sai tlao a vaw châ. Nâma eichâ tyh tawhna heta kyhpachâna yzie he ei sapa nata thlahpa ta pahnopasia ta, hmo ataotheizie nahta kyhpachâna chhôh liata hro hluhpizy thata eina pahnosa. Pahno via rili chhao ei khoh. Chipho thapasana zydua chhao he kyhpachâna tawh tlaita a châ vei khiahta la, thapasana thlâhthlipa dei a vaw châ tyh tahpa he lailâh hrozy ta ama patuapalua beih hra aw vâ tlyma i? Biehrai ta chipho kyhpachâ awpah ta maniah a pachuna zydua he nâma siepahliepa ta my khih hmia a vaw siapa tyhpa hawhta nohly a chhiki pasiapa ta ei y chanei tyh.

Nâ ei kyhpachâ ngaitapa; kei mara khydi châ heta nâ vaw ngia patlua tlai na. Reih sâh hluhpi leidia hapazy hnohna khata nâ hawhta chhaolei pawmaih pihpatluapa he chô Khazoh ta papawhsa ha hra mawh sala, ama khydi bâlia cha-ao aw ei ta, pasaipha hrâsie ta taopa ta reih sâh hluhpizy kha amâ boh thei hra awpah tlai.  

Hâzo Chôthlahpinô vaw khaih ta cha liata y chi ta; noh thiehpa vaw chhi ta cha lia chhao na y lymâ. Zâ mokuhramâ khaihna khôpheih chôta ei pachâna Opy khawtuhpa nata noh thiehpa hmiachhy awpah ta ei pachâna Opy pahytuhpa na châ. Khataih su lia rai ypa ta, ei mokhaoh ta â tyhpa maih liata y chita, ei nakhaoh liata na kyhpachâna ao ngiapa nata nai zualuapa cha dawh pyungiapa hawhta a paro chanei tyh. Daihti reizie ta hmotozy cha âthla ta, noh chhiepa tahpa ta Khizaw ta â chahi haino chhaota kei rairao nawhnai châta deikua; noh pha leipa zydua chhao he noh phapa hawhta na vaw pachâsa khai ha tyh. Na hrozie-nôchâ zydua lia chhao Krista hmia â lâ patlua. Awnanopa hmi pangiatuhpa thyutlia riahpha na châna he chhôhso liata khâ châh ta, reithaina chysia nâ ngiakhei patluazie nata A Byureih pathaihpa nohhâh na paysa tyhziezy mothlawpa liata khâ a châh thlâh ha tyh. Khizaw ta a tiah thei leipa pahniena 'KRISTA' hro hnei hra awpah ta nâ chhipapuatuhpa chhao na châ tah leithei va na. Khataihlia rai y hr'aw sala khâ ei hnohta y chi ta, molei chariah tiah thei awpah ta ei sapa nata thlahpa thatlôna hnawh chhao na châ.

Ei laihna su tawhna heta hnazô tyh heihna noh vaw chhi awpah he ngiatiah leipa ta khâ daihti ei pakhô tyh. Hnazô tyhpa ta Opi miakha paryhkhohna vaw chhi sala, mara moh tlai pachyupa saliah nawhhly apykhohpa ta; laihna mara râh châta lôh miakha phaohpa ta paw pakai hra awpah rai a ngiatiah va na. Chô Khazoh ta saduthliena hawh tlai sâhmia m'iah patisa mawh sala, khatlu kei khydi lôhmaoh chhôhso lyna â ki aw vâ tly. Hnazô tyhpa ta kyhpachâna lyubie to paryh khoh awpah rai a ngiatiah khao va na.

Nâma nahta kyhpachâna bâlia eimâ cha-ao khohpa he kei khydi lôhmaoh châta la hlaohna sai a vaw châ. Na thângiah vâsâhna dei leipa cha; kei nawhnai heta nâma liata lôhhiana rai ta hnei beih va na. Kyh ei cha pachâna nata na thâ ei ngiahna zydua he, he Awhsitlana râh tawhna heta hawrawh ta chapaih khai thei rimâ awpah rai vaw châ chacheihta vei. Ei kyhpachâna lyuhbie hawhrawh ta chapai n'awpah heta Mara hmiakhuti tlai he châti vaw châ thei sala ei tah ngaita dia! 

Laihna mara râh châta na pawngiana khâ vaw pakai la, khydi nata pawmaih zydua châta sapa nata thlahpa syhpakhyna Opi ngiapa vaw châ lymâ mah y!

Eima Lei hrona hu chhâpa ta; sapa a chhaihna khôlâ taih chhaota kyhpachâna bâlia cha-ao khoh lymâ awpah ta ngâchhihna lyuhbie eima paryhpa zydua hrokheipa ta, laihna mara râh lia hnazô tyh heihna noh achhi hlâ lei ngâchhina poh khâ eima pazawh lymâ sy!

Kei na kiahlia y hra vei sala, piepatla beih aw va chi. Chô Khazoh tuapa Vâlyuhchâ siapakipazy ta cha ypâ aw ei ta, bohpa ta hnazô eimâ tyh heih aw tahpa he ei ngiapâna a châ.

Tyh heih hlâ lei a tlâhpa ta mâphasy!

 

Na kyhpachâpa nata kyh cha pachâtuhpa,

 

 

Beikhotly L Mara

Ram Nagar

A-32/AK. Chauhan

Nagpur; Maharashtra

 

 

 

 

 

 

Eima  lapangiapa  nata 

eima  khihsazie

 

~ H. Beilaikô  Nôhro

New  Colony, Siaha

04-1430726150-labour-day1

                                                                                                    

                                                                                                                                 

              Ei  biepipa  tawhna  khita  ei  reih  chhuahpa (kho pa)  cha  eima  pahno  thei  ngyu  aw. Châsala  thokha  hluhpi  he  biepipa  liana  heta  eimâ  vaw  chapia  hluh  kaw. Pachâ  pahria  leipa ta  khih  vaw  sa   laih  pi ta, eimâ  vaw  chhua-ua  laih  theipazy  he  aly  â  chhih  kaw   no  ta.  Thokha  hluhpi  deikua  ta la  kao  hluhpi  liata  thata eima  vaw  pao  khei. Chyhsapa   tlohleina  vâtazy ta  la   a châ  thei  ngyu  aw, anodeikua  keimo  taochheipa  tlaih  nata  eima  papeimawhsa  leina  vâta  nata  eima  patuapalua   thai  leina  vâta  eimâ  vaw  chapia  laihpazy  a châ  via  chaipa ta  â  lâ.  

Hlâno  eima  mahnô  nata  mahpaw  daihti  no  tawhta  khih  eima  za  sa  laihnazie  he   â zâ  laichadai  ei  sih  la, hmah  thata  eima  vaw  sie  ngaita   kaw  bâ. A      ta  tlyma, a  chhâh (generation)  chhâ  ta  tlyma  eima  khihsazie  he  â    nano  laih  lymâpa ta  ei  pahno (Trend  of  our  Civilisation  with  Significant Development). Atanoh  ta  eima   duahmo  chhochhi   he  cha  hlâno  eima  mahnô  nata  mahpawzy ta  ama   za  pachâ  pha  beih leipa  tlai  a vaw châ. Khizaw  râh   hmahsiepa  Europe  râh  nata   nohtla  beihlei  râh  England  râhzy  nahta   chhaota  â  pahlie  tu  leipa  eima  lyu  kaw ! Eimâ  tobina  nata  eima  nohto  hro (life  style)  zy  lia  chhaochhi  cha,  ânanona  eima  hnei  khao  leipa  hawh ta  reithei’pah  a  châ.  

Cha  hawhta  a  za  châ  nota  a  ti  nata  râh  chyhsa  eima  mo pakha  lapangiapa (Per  Human  Income),  chhôhkha  lapangiapa (Per family  Income) nata  eima  râh  ta  a  lapangia (Per  Capital  Income) zy  deikua  â  pahlie  ngaita  kaw  heih. Cha  dei  châ  leipa ta  eima  mo pakha, chhôhkha  nata  eima  râh  ta  a  hriapapuapa (Gross  Domestic  Product) chhao  eimâ  pahlie   hmeiseih  heih. Cha  hawh  tluta  a  chyhsa  mo  pakha, chhôhkha  nata  a  râh  chhaota  eima  lapangiapa  nata  eima  hria  papuapa   â  hlie  thlâhpa  tlai ta, eima  khihsa  dâh  nata  eima  nohto  hro (life style)  zy  lia  deikua  ta  eimâ  lyu (kho)  thei   thlâhpa  deikua  he  pahnothai  a ru ! A  yzie  ta  la, keimo  nata  eima  mo  pakha,  chhôhkha  lapangiapa   chhao  pachâ  beih leipa ta   chyhsa  ta  ama  hneipa  maih  hnei  awpah  hawhta  pachâna  palôhru  khâchâ  a hneipa  eima  lyu  kaw.

He  lia  tlai  heta  chyhsa  hluhpi   ta  eima  pachâchhei  ha  tyh. Eima   peimawhpa  nata  eimâ  ngiahpazy  hlâta   eima  khopa  maih  hnei  khai  eimâ  chhuah  tyhpa  hi. Ei  uhta  ngôrei  nô (Pinô  N. Maki)  ta  eina  chho  tyhpa, “Chyhsapa  khihsa  lia  he la  eimâ  ngiahpa (needs)  nata   eima  khopa (wants)  he  eima  pachhaih  thai  awpah  a châ”  eina  tah  tyhpa  ei  thei  ngâthlâh  ha  tyh. He   he  chyhsa  hluhpi   ta  eima  pachhaih-pachhi   thai  tyh  leipa  tlai  a  vaw  châ. He  hawhta   eima  khopa  maih  a   hnei theipa  maih  he  chyhsa  hneirôhpa  hawhta  pachâna  chhao  keimo  liata  a lai  kawpa ta  â   lâ. Kei   la  ei  chyhta  no  tawhta  ei   khopa  maih  hnei  beih  va  na !  ei  ngiahpazy  deikua  ei  chhôhkhazy ta  eina  pachâpa  tyh  ei. Thotlâh  khihsa  liata  la  ei  paw  he  atahmâ   chhâ  khizaw  reikah  ta, “Middle  Class  or  Upper  Class”  ama  tahpazy  hry ta  â  hlao  hra  aw. Abeipa  ngiachhiena  vâta  hlao  chhiehrupa   ei  vaw  hnei   tawh  deikua  heta,  ei  kho  kawpazy  cha  ei  chalei  tlai  hra.

He  hawhta  eima  khopa  mai  hnei  khai  awpah ta  pachâna  keimo  liata  khâchâ  â  tu  ha   vâta,  chyhsa   khih  a  sa  thei   viapazy  ta   hmo  thiehpa  ama  hneipa   hawhpa  mai  cha  a  khihsa  riethei   viapazy  chhaota    hnei   hra  cheingei  awpah   hawhta  pachâna  nata  khona  keimo  liata  eima  vaw hrokhei  tyh. He  heta  eima  khihsa   nata  â  pha  leina  taihta  khih  maniah  pasasa  ta, a  byuh  leipa  nata  â  ngiah  leipa  liata  dyuchei  maniah  a  pahneisa  tyh. Cha  chata  chhôkha   eimâ  mohôh  tyhna  hlâ  ta   â  sâh  via  syulyupa  liata  maniah  chareisa  ta, eima  Economic  phie   maniah  a  parao  khai  ha  tyh ! He  hawhta  lapangiapa   hlâta  a  hmâna, a  puana  a hluh  via  tyhpa  he  mongyuh reih  ta  ‘Deficit’ tah  ei  ta, a  râh  ta(country wise ) a  châ  khia  cha ‘Inflation’ ama  vaw  ta.     

Chyhsa  o chhôh  hro    a hyhmah  ta  bie  va  hnei  thei  tlôh  pi  va !  He  he  palôh  siepasina  chikha  cha  a  châ. Cha  dei  châ  leipa ta  khizaw  hmo  kho  pasana (Materialims) hro  maniah  pahneisatuhpa  chhao  a  vaw  châ. Eima  bie  ngiapâpa  (Bible)  ta  la, “Chyhsapa  hro  he  a  hmo  hnei  hluhnazie  ta  thliepa   châ  vei (Human  life  is  not  messure  by  how  much  he  own) ”  tahpa  ta   maniah  a chho. 

              Eima  Chheipâh  liata  a  ypa  khâsi  nawh  khu  chyhsa  hluhpi  tahla  eima  pahno  kaw  sai  nahta  ei  pangiasa. A ma  khihsazie   nata  â  mo  ama  hro (life style)  zy  liata  la  reih  papha  awpah  hnei  hluh  ngyu  veih  ei. Châhrasala  ama  khihsazie  liata  a mopâtlâh  ama  châ  kawpa ta  ei  pahnopa  la,  a hneirôh  kawpazy  chhao  khi  a  dyhchhie  kawpa  hawhta  âlâ  amâ  chhuah  thlâhpa  khi.  Khâpa  leipa  hmo  kheihawhpa  tlyma  chalei  khoh  ha  ei  sa  la, kha  hmo  va  chalei  n’awpah  châta  phusâ  a  lie   thôh  daihmâ  ta  ama  hnei  ha  tua  leipa ta   kha  hmo  kha  chalei  momai  vei. 

He    tlaita   chyhsa  thokha  ta  pahno  leipa ta  eima  mohnao  chhei  tlamaw    ngâ  tyh ! A  ma  khihpi (Shillong)  chhao  khu,  a chô  vâphuh  tawhta  mopa  ta la  pasâhsa  â  chhih  tlai  vei. Châhrasala   a  chhôh  lâta   a  hneirôna  khi  rei  khi  a  tlohpa   a  châ. He  kao  liata  keimo  mawrâh  chyhsazy  pi   nata  eimâ   pahlie  kawpa ta  ei  pahno. Atahmâ  chhâ  (modern  words) reikah  ta,  Keimo    cha, chyhsa  ta   1  Lakh  mâpa  hmo  chalei  n’awpah ta  Rs. 50,000/-  hnei   mawh  sala,  a hropa  Rs. 50,000/-  chyhsa  hnohta  dyu  chei  chhi  papa ta   chalei  eimâ  chhuah  tyh. He  hawhpa  taozie  (System)  he  moto  ta  eima  hmâh  tyhpa  ta  ei  pahno. Tlaw  Rs. 2,5000/-   a  hlaopa  chyhsa  ta  tlaw Rs. 6, 00,000/- mâpa   hmo  eima  chalei    thei  thlâh  ha. Tlaw  Rs. 15,000/-   a hlaopa  chyhsa  ta  tlaw  Rs. 4,00,000/-  mâpa  hmo  eima  chalei  thei  thlâh  ha  hra. Thokha   chhochhi   cha   o  lyu  taihta  a padua  theipazy  eima  châ.  Abeipa  byhnâ  tah  leithei  ma  pi, anodeikua  eima  lapangiapa  (income)  nata  â  ei-châh (match) lei  kawpa ta  deikua  ei  pahno. Tlaw  Rs.  50,000/-   hlei  a  hlaopa  chyhsa  ta  deikua   la  tlaw  Rs. 7,00,000/-     hleipa  taih  chhao  a  kaw  chalei  theipa  chhaota   â  ngiachâ   kawpa ta  ei  pahno.

He  kao  liata  chyhsa  hluhpi  ta  eima  pachâpahlia  tyh  leipa  a lyu  kaw. Eima  khihpi  Siaha  liata   chhochhi   cha   moto  taozie  awpah  hawhta   ma   eima  pachâ   ha     tly, a  mohta  ta  office  liata  a hria  hrapa  maih  cha  Car  a hnei  cheingeipa  hawhta  pachâna  a  hneipa  eima  lyu  kaw. Eimâ  chalei  phuchu  ha  bâpa ta  â  lâ.  Kei  la   ei  hlao  ta  a  pahnie  mâh   leipa  vâta  ei  phei  ta  office  kiah  ei  no  na  za  hlei  vei. (Barefoot  officer  châ  ei  noza  hlei  vei)                            

              He  hawhta  eima  khopa  to  maih  hnei  cheingei  awpah   hawhta  pachâna  palôhru  eima  hneipa   heta  hro  dolei  ngaitapa  lâta  maniah  chhihtha  ta. Cha  hawhta  hmo  eima  khopazy   eima  hnei  thei  khao  vei   nata  eima  vaih (o pah neighbours)  zy   hmo  hneipa  hiatliana (I-si) keimo  liata  vaw  hnei  pathao  pi  ta.  Cha  khopasana nata  hiatliana   pathipalôh   chata  eima  vaihzy  hmo  paru  khohna, a vyuhna  do  leipa, nieparu-baw-paru  khohna  palôh, piepie  aohraohna  palôh  maniah  pahneisa  via   heih  ta. Eima  chhiepha  pahnona   chhao  hmâh  phahnai  thai  khao  tyh  leipa ta  hmo  pha  leipa  eima  vaw  tao  tlamaw   ha  tyh.

Eima  khihsa  nata  eima  lapangiapa (income) â  vaw  balance  thai  khao  tawh  vei  tly  cha, kheihawhpa  hmo  chhao  rai a  rainao  kawpa ta  lapangiana  lâpi  tlua  pi ta,  eima   vaw  siechhei  khei    ngâ  tyh. Keimo  liata  thlachhieraona  zy, a  chhie-pha  pathlua-pathlâh  thaina  zy, â  ngia  nata  ngia  leipa  pahnothainazy  eima  pahlei  via  lymâ. Abeipa  bie  ta  deikua  la  eima  tovyuh  liata  palôhtlâh  awpah  nata   eima  byhnâ  topazy, eima  hmo  hneipazy  reizie  thai   awpah  nata  cha  chô  liata  aly dâh  thai  awpah  ta  maniah  a  pachu. (to  count  our  many blessings )

Cha  hawhta  eima  hmo  hneipa zy  reizie  nata  eima  byhnâ  topazy  alyzie  eima  thaina  liana  chata  Abeipa  chhaota  eima  chôta  aly  via  aw  ta, byhnâ  chhao  maniah  a  pie  via  tlai  hra  aw. Eima  Beipa   Zisu  ta  hmo  no-âhpa  a taopa  hluhpizy  kha  pachâ  tua  ei  sih  la, a  y  leipa  tawhta  châ  leipa  ta, a  y  chiehpa  chyhpa  ta  cha  byhnâ  piepa  ta  tlao  a  papôhsa  hri  tyh. Cha  dei  châ  leipa  ta  eima  byhnâ  topa,  daopazy   cha  eima  pasô  thai  awpah  nata  eima   kohki  thai  awpah  chhaota  maniah â hnaw.

Papeipahliasa  lei  kawpa ta  eima  thyvawh  chakhyh  thlâh  ha  awpah   deikua   châ  vei. Chyhsa  sâhsari (7000)  nata  chyhsa  sâhpangawh (5000)  zy  nga (fish)  nata  viahchhâ  ta  a  papôh  nona  khata  a  laibâhpa  kha   thyvawh  chakhyh  thlâh  ha  awpah  pasaih  tiarâh  vei, â  huah  khai  awpah ta  bie  tlao  a  pie  ei. He  kao  lia  heta  keimo  marapazy  pi   he  eima  tao pado  lei  ngaita. Puhpa   Hiphei  Ex.  M.P.(LB) chhaota  a reipa  ei  pahno  hrapa  cha, “Keimo  marapazy  pi  cha  kô 1  chhôhta  eima  pati  niena  laohmô  eima  pathlaopa  he  pachôpakhy  khai  ha  mawh  ei  sih  la, kô 1  heta  chhôhkha  to ta  quintal-1  eima  pathlao   chyu   aw ” a vaw  tahpa  kha  â  do kawpa ta ei  pahno. Keimo    cha  he  hawhta  eima  nie  laibâhpa  thyusaipa, siesaipa   he  taozie  angia  kawpa (politeness)  hawhta  eima  pachâpa  a  lyu  kaw.

A toh  atao  theipa  eima  beipa  tlai  chhaota   nie   laibâhpa  thy  a pasaih  vei  khiahta  cha  keimo  nohto  nie  awpah  atlua  chhyhpazy  pi  ta  la  eima  tao  awpah  châ  vei. A  lapangiana  nata  a  hmôpapuana  lâpi  eima  pachâ  peimawhpa  hawhta  eima  hnei  chiehpa  pasôna  dâh  nata  pasopanôna  dâh   chhao  eima  thai  hra  awpah  a  châ.

Cha  cha  eima  byhnâ  topazy  reizie thaina  chhao  a  châ  hra. Cha   liana  chata  Abeipa  ta  eima  châta  hmo  a pachhuahpanohpa  no-âhchhihpazy  chhao  eima  hmôpapua  thei  hra  aw. Hneirôna  heta  chyhsa  mo pachaosa  tyh ta, Lâthlôh (Lâpi)  dopa  nata  kyhpachâtuh  dopa  a pahmeisa (pahlei)  tyh. Rietheina  deikua  chata  chyhsa  mo  pavâsa  ta, Lâthlôh  dopa  nata  kyhpachâtuh  dopa  a pahnopasiasa  tyh. A  châna  dopa  ta la   rietheipazy  he  Ngiapâna   lai  viapa  pie  awpah ta  awpa  tlao ama  châ.

Eikha  cha  office  kiah   awpahta  lâpi  liata  ei  sie  laih  ngâhai  no ta, paw  pakha  heta   he   hawhta  eina  vaw  chho, “Tahmâhlâ ta  eima  hmo  hneipazy  hela   eima  khihsana   nata  chhao  â  hmie  khaopa ta  pahno  va  na” tahpa  ta. A no  cha   ahyma  a  châ  tahpa  chhao   pahno  leipa  nata  tlâ  eina  khôsai ha. A  bie  eina  chhopa  deikua  ei  pachâpazi  nahta  â  do  ei  tah  kaw. Tahmâhlâ  eima  khihsazie   he   ei  vaw  reih  chieh  hapa  hawhta   eima  mo  pakha, chhôhkha  lapangiapa  nata   â  phuhphia pâ  khao  leina   taihta  hmodâh  eima  hnei   hôlô bâ.  Kaokha    liata  cha  eima  chipho  taozie  nata  eima  pho thyukheipazy  eimâ   râsai  kawpa ta  chhao  â  lâ. Keimo  eima  society  ta  eima  vaw  tao  tyhpa  nata  eima  vaw  hrokhei  tyhpazy  thypa ta  western  cultures  nata ama  living  styles  zy  eima  la tuna  vâta  chhao  a chapa ta  ei  pahno. Eima   society  nata  eima  community  ta  eima  vaw  pahno  beih leipa  hmo  hluhpi eima  khihsana  liata  eima  hnei  hôlô.

Pakho   n’awpah ta  Motorzy  chhochhi  cha  a so n’awpah   hnei leipa   nata   a pachâ  chhao  hmahta  eima  pachâ  tua   leipa ta  hnei  thomo  khoh  pi ta, vâtlâh  lâpizy  liata   soh  pi ta,  zawpi  siena  tla  eima  pakhâ. Khihsaw  vâtlâhzy  hnohta  khih  a sa   hrapa  eima  châ  khiahta  cha, eima  vaihzy  pachâ  peimawhna (Civic  Sense)  eima  hnei  cheingei  awpah   a  châ. Khizaw  liata  hmoto  he   eima  hnei thei  khiahta  la  eima  hnei  awpah  tlai  a châ.    pakhâ  thei’pah  châ  vei, anodeikua  cha  hmo  cha  ei  khihsana  ta  a peimawh  ma, ei  khihsana  ta  a  pahnie  ma, ei  lapangiapa  nata  â  phuh ma ? a  so  n’awpah   su  phapa   ei   hnei  ma?  Tahpazy  he  eima  pachâ  tua  tyh  awpah  a  peimawh  kaw.  

Leibâh  he  chyhsapa  khihsana  liata  hmo  â  chakaihpa, â  pataih  khâchâ  hapa  sâkha (part and percel in life),  hmo  leithei  leipa  miakha  a châ. Sawkhâ (Goverment) pi  tlai  chhao  ta  leibâh  a  hnei  tyh  tlai  hra. Chavâta  a lei  thei leipa ta   hnei  â  vaw  ngiahna  daihti  a  y  tyh. Anodeikua  cha  a  hnei  n’awpah  ngâlâh  khohpa ta  a  thô  heihna  nata  a pie  lilawna    pachâ   leipa ta  eima  uasa  khao  tyh  leipa  deikua  he  hmo  pei  ngaita  kawpa  a  châ  tyh. Maniah  ama  vaw  hiah  daihti  nahta  sy  ma  hie  â  pahâhpa ta  a  tlie  chaimâh  ta  heih  pi ta,  eima  bua  heih  tyh. Chavâta  Leibâh  he  cha  eima  vaihzy  hmiahaona  alana   nao  kawpa  a vaw  châ. Chyhsa  thokha  hluhpi  ama  leibâh  pachâ  peimawh  leipa  ei ta, khotho    ta  deikua  khih  a sah  thei  kawpa  hawhta  â    amâ  chhuah  tyh.

Awnanopa  nata  kheihawhpa  pyzy  liata  deikua  ma  a  thyu  thei  chaipa, a pie  pha  chaipa  châ  ama  khoh. He  hawhpa  hro  he  chakeih  vo  â    pakheina   a  châ. Ama   thyuna (piena)  chyu  avâ    tawhta  a    mohtuhpa  mohmô  ta  rohchhiepa, pasi  â  chhihpa  a  châ  nahta  ei  pangiasa. Eima  peimawh  chai  daihti  no  ta  maniah  vaw  baotuhpa  cha,  a thei  sala  a  pôhna (Interest)  chhaota  thô  awpah   chhao  â  phuhpa ta  ei  pahno. Tlawkha  chhao  he  eimâ  bâh  ha  khiahta  cha  eima  thô heih    cheingei  awpah  a  châ. “Leih  â bâhtuhpa  cha  â kei  bâhtuhpa  hnohta / châta  sei (slave)  a châ. (A borrower  is  a servant  to  the  lender) ” tahpa ta bieso  liata  eima  hmôpa  hawhna  khata. Leibâh  hnei  leipa ta  khih  eima  sa  thei  khiahta  cha, chyhsa  a hneirôhpa  pakha  eima  châ  tahna  châ. Khihsana  he  eima  Bible  chhao  ta  a  vaw  papeimawhsa  ngaita  kaw, “Awnano  chhihthatuhpa(Church  Elder) a  châ  awpah  chyhsa  cha  a  khihsa  â  ipa,  a  chhôhkha   a pachâ   peimawhpa  a châ  awpah  a châ” tahpa ta  maniah  a  chho.  “Kyhpachâna  deileipa  heta  khâpahmah ta  namâ  bâh  awpah  châ  vei ”        

              Khihpi  liata  a pahrâpa  chyhsa  he  thotlâh    ta  a  pahrâpa  chyhsazy  hlâta  cha  hmo  to  liata  nata  kao  to  liata  hmahsiena  a  hnia  via (Advance) ei  ta. A ma  khihsa  tôhtuna   nata  ama  nohto  hro  chhao  thotlâh    chyhsazy  nata  amâ  pahlie  kaw  tlai  hra. Châhrasala  he  hawhta  hmoto  a rainao  kawpa ta  hmô  theina  nata  hnei  theina  su  liata  ama  ypa   heta  â  mo  liata  hmoto  a  sôhna  nata   a hnei  rairunazie  pahnopasia  thei   leipa  ei  ta. Khâpasaw ta  rei  leina  â  mo liata  a  lai  ngaita  kaw  tyh.

Hmo  pahâh  kawpa  chhao  he   eima  padi  pachhi  tua  leipa ta   cha  a  pahâhzie  eima  pahno  thei leipa  hawh  tlai  heta, riethei   rairuna  he   taopachhi  tua  leipa ta  pahno  khei  thai  a ru  tlai  hra. Khihpi  sawzy ta  he   kao  liata  phahlana   ama  hnei  lai  ngaita. He  hawhta   hmoto  a  rainaona  su  liata  a  vaw  laiseih  tyhpa  ama  châ  vâta  thathina  ta  bie  ei  ta. Cha  chata  moleina  chiah pachiahpa  thokha ; A vyuhna do  leipa, haih  khohna, paru  khohna, nieparu  khohna  nata  moleina  chi  nanopa  lâpizy  liata  a chhihtha  tyh ei. He   hawhta   khihsa  â  sosâh  ngaita  kawna  su  liata   a pahrâpa  ama  châ  vâta  a  hneirôh  viapazy  taozie  la  khohna   thlai  ta  hnei  ei  ta, ama  hneina  ta  a  tloh  khao   vei  nahta  haiphiahna  chôta   avyuh  awpah  nata  paru  awpah    chhao  pei   tah  khao  veih  ei.

Chavâta  khihpi  liata  a pahrâpa   chyhsa  thokha  hluhpi  he  ngâchhihna  amâ  phahla  ngaita  kaw. Mongyuh  reih  ta, “Easy  comes  easy  goes” ama  vaw  tahpa  hawhpa  tlai  he  ama  hmâh  thlâhpa ta   â  lâ.  A  naosia  kawpa ta  lapangia  ei  ta, a  naosia  kawpa  tlai  ta  ama  pahleipadia  ha  heih  tyh.    

Atahmâ  cha  khihpi  nata  thotlâh  chhao  eima  khihsa  dâhzy  liata  eimâ  pahlie  leivia  ngâ kawpa   a  lyu. Khihpî  via     he  cha   hmoto  alasana  a rai  nao  via  laih  hapa  vâta   khihsa  chhao  a nao  via  tlai  hra. Châhrasala  eima  sawhkha   phana  vâta  eimâ  zaotaona  lâpî  a  vaw  pha  via  laih  lymâpa   heta  thotlâh  khihsa  chhao  hmahsiena  thata  maniah  pie  ta. Kha  hlâ  no  ta  eima  khihsa rairu  ngaitapa, a  chhi  nata  a lôh  dâhdei  chhao  alasana  a  y  leipa  hawhpa   a  châ  khao  lei  vâta   khihpi   mo  taozie, khihsazie  hawhta  khihsa   khona  vaw  hnei  via  laih  hra  pi  ta. Eimâ  vaw  sosâh  via  kaw  tlai  hra.  Thokha  nôpaw   chhochhi  cha  khihpi   liata  officers  nahzy  hlaozie   tlai  he  hlao  ei ta, ama  khihsa  chhao  â  hnai  cheita  khao  veih  ei.

Abeipa  byhnâ  eima  to  chaimah  tah  leithei  mapi. Cha  hawhta   a  châ  no  ta  eima  chhôhkha   tozy   economic  deikua   pha  viana      nata  â-sâ  viana     hlâta   â  hnai  viana     nata   raokei  viana    eima  pangai  ngâhaipa  a lyu. Eima  sawnawhzy ta  khihpi   hrozie  a pha  leipa  nata  western  cultures  a  pha  leipa  to  lapangia  chaimâh  ei  ta, media   tawhta  hmopha  leipa  to  achu   heih  ei  ta.  Cha  liana  chata  eima  nôpaw  sôh  nata  eima  chhôhkha  lapangiapa (income) cha  patlaithlu  chaimâhta   pi ta. Yzie  hnei leipa  liata  eima  sôh  nata   eima  daihti  thata  eima  pahlei. A  pei  via  heihpa  deikua  cha,  eima  thyutliapazy ta   ama  hro  phapa  nata  ângia  ngaitapa,  kho  â  chhih  ngaitapa (Good Characters, Attitudes  &  Behaviors)  ama  pahleipa  hi !  Sôh  hluhpî  eima  pahleipazy  hlâ  chhaota   i   âchhih  viapa  a  châ.  Sôh   he  chyhsa  khihsa  liata   a peimawh  chaipa  a  châ  no ta chyhsa  hro  a  parao  chaituhpa   tlao   a  vaw  châ  ha  tyh.

Eima  nôpawzy  ta  sawzy  maniah  ama  vaw  daodona  he  reih  khai  thei  awpah  chhao   châ  vei. Ama  pakah (mouth)  chhôh  liatahpa  dâhdei  chhao   hmahta  maniah   thaopa  ta   maniah  pie  khohpa  ama  vaw  châ.   mo  daihti   no  ta  khizaw  zohna  liata  vaw  laiseih  ei  ta,  riethei  to  vaw  tao  ei  ta,  â  vaw  duah  papuapa  tlai  ei   khata. Keimo  ama  saw  nawhzy  deikua   cha,   cha  hawhta  rietheina  eima  padipachhi  awpah  chhao  maniah   vaw  pasaih  cheita  veih  ei. Anodeikua   cha  keimo  thyutliapazy  pi  heta  pahno  thai  leipa  pi  ta, eima  nôpawzy   maniah   ama  vaw  daodona   cha   âmo  dôvei  n’awpah ta  hmâh  tyh  pi  ta, khizaw  moleina  to  achadaipa ta  eima  daihti  nata  eima  thazy  hmâh  pi  ta. Châhrasala  âmo  dôvei  cheita  leipa  pi ta  keimo   nata  keimo  he  tlao  eimâ  vaw  dôvei  tyhpa  dei   tlao  a  vaw  châ.

He   kao  liana   heta   Eima  nôpawzy  chhao  maochhiena  a  chyhta  za  hnei  hra   na  ta. He  hawhta  maniah  ama  vaw  daodo  tupa  he   vaw  pha  khai  leipa ta,  keimo  liata   thathina  dei  maniah  pie  ta.  Cha  chata  moleina  pachiahpa  totie   maniah  a pataosa  ha  tyh. He  hlâ  heta  eimâ  phuhphiapa  nata  eima  hria   thei   hra  awpah, eima  pahniena  rakhata  raihria  he  maniah  vaw  pachu   hri  mawh  ei  sala. Keimo  khota tao  ta,  hria  papua  hra  awpah  a phana, a lohâh  y na, za  âchhihna  he  maniah  vaw  pahmô  laih  tyh  ei  sala, thyutliapa  hluhpizy   heta  moleina  lâpi  he  eimâ  chhih  thomo  nahta  pangiasa va na. Thokha   hluhpi   cha  chyhsa  hmâtlâh  a châpa  nata  chyhsa  rônahpazy  ta  eima   pua  hr’aw  nahta  ei  pangiasa. Nga  nie  awpahta   maniah   ama   piepa   hlâta  cha, a patu  n’awpah  dâh  maniah  vaw  pachu  hri    ei  sala  eimâ  thôhkhei  via  tlai  aw.               

              Khâpa   rai  châ  sala, ahy  khihsa  tôtuna  liata  hmahta  bua  thei  tlai  ma  pi. O  tôh  saohpa ta  khih a sa hapa cha khota alaipa (Independent) chyhsa  a vaw  châ  haw. Châhrasala  eima  khihsa  tôtûna   liata  eima  peimawh  ngâthlâh  ha   awpah  nata  eimâ  thei  ngâthlâh  ha  awpah  deikua  he   a  y.  Chazy  cha  eima  pahno  lei  pathlei  tlamaw  awh  tahpa  pachâchhie  â  chhih ! keimo deita  khih a sa  thai lei  awpah  eima  châpa  hawhta, keimo  pachâna   ngâlâh  dei   châ  leipa ta, eima  khihsa  laipa  nata  khizaw  liata  keimo  hlâta   chi   â-sâh  viapazy taozie  ngiapa nata ama  pachâna (Idea) pha  viapazy  he  eima  lapangia  thai  hr’awpah  he  a  peimawh  ngaita  kaw. Cha  pachâna pahnona  chata  chyhsapazy  eima  khihs zie  liata  â  pahliena  hluhpi  a  tlôkhei  tyh. Cha   khiahta la   cha  hmo   pha  viapa  cha   â  chadai  hra  ei  s’u.

Chatanachata  tanoh  ta  eima  khihsa  tyhzie   hlâta  a  pha  viapa  nata  â-sâh  viapa  liata  khihsapa ta  eima  charei  thei  n’awpah ta. Western  râh  rônahpa  nata  khizaw  chhihthatuhpa   râh  rônahpa  USA  râhzy  eima  hmô byuh  kawna  chhâpa  chhao  khâpa  hropa  châ  leipa ta,  ama  khihsa  tôhtu  â  sâhzie  nata  a  taozie  ama  pahno  viapa    dei  a  châpa ta  ei  pahno. Keimo  chhaota  â  mo  hawhta  pachâna  pahnopa ta  eimâ  chu  thei  hr’aw  vei  ma ?   

“ Na  lapangiapa  nata  â  phuhpa ta  khih  na  sa  thaina  liata  ahy ta  hmahta  cha  mohnao  khah  ei  se         

    

             

                                                                                                                                                                                          

                                                                                     

 

 

 

 

Eima pachâ beih

hr’aw vâ ma i?

 

~ JB. Khaisia (Mara Writer)

 

 

              Ahyzy reihchakiana tlyma châ hraoh khah sala, Board of Mara Literature ta hmah vaw la chaimâh ta, a thatlô thei n’awpah ta thatlôna zilih (Oxygen) pha ngâsâpa, MADC Art & Culture Department zy, Mara Writers’ Club zy nata Mara Hlasa Pyzy nata Mara reih nohto thâtihphia – The Times of Maraland nata MTP Branch College Vaih – Siaramozy thata amâ vaw pielyu suachuah nahta cha, Mara reih hmahsiezie chhao my nata zâ ta alâ lymâ ta. Chadei naih kaw ma châ bao va, Mara reih sâsua tlaita châbu ropa, thlachareih daimâ tah thei awpah ta palâhâh thei awpah y hôlô lao heihpazy heta Mara reih hmahsiezie palâsatuhpa châ thlâh ha vei ma ei tah cha maw ! Chavâta hmopha taona kyh liata cha eima tlai châ via lymâ thei sala tahpa kho â chhih kawpa ta ei pahno.

              Anodeikua hmo miakha ei reih khoh kawpa nata ahaw khoh kawpa cha, he a ry liata ei vaw palâsapazy he athei lymâna chôta, eima châpaw (article) papuapa nata eima châbu papuapazy he châ lymâ thei sala a phapa ta ei pahno. Pamosana ta MTP Branch College vaih ta hâtato thâtihphia “SIARAMO” papua ta, a chhôh bie â rohpa cha, Mara reih abohna nata hmahsiena chhaichhi a châ thota zawpi manôh zydua pahly khai theipa nata athôhkhei hialia awpah tlai vaw papua thei lymâ ei ta, reithai tlâh châ ei ta, mopâtlâh a châ hmeiseihpa ta ei pahno.

              Chavâta eima châbu papuapa nata châpaw papua daihti liata eima pachâ peimawh awpah nata pahno pâ awpah ta ei khoh kawpazy bâh vaw reih thlâh ha tua sala :

1)       Eima châbu ropa papua awpah nata eima châpaw ropazy he, chyhsa to –Pastors, awnano chhituhpazy, râh luhpa (Politician ) zy, Molaipa zy, châ thaipa, University, College, High School achuhaipazy nata hawti machâ zydua pahlypa ta reihtlâh châpa a châ awpah he a pha chaipa ta ei pahno.

2)      Mara reih aboh n’awpah nata hmahsie n’awpah tah leihkâ ta eima rao achhaohpa nata eima palôh liata â lâpa maihta roh ta papua thlâh h’awpah he pha chai hlei thlyu vei tahpa eina pachâsa kaw.

3)      Eima châbu papuapa nata eima châpaw ropazy cha zawpizy châta pahno awpah peimawhpa nata ryusôhpa a châ thei awpah lâchhâh châ thei sala khoh hialia a châ.

4)      Châbu ngiahngao cha eima saw chhâ, nawh chhâ taihta achuna tluahmiapa achupazy ta, Thesis rona nata Research rona daihtizy liata hmâtlâh awpah châ thei sala a pha kawpa ta ei pahno.

Tahmâ ta ei vaw palâsapa hlâta, nâmo achuhaipazy chi ta, reih awpah hluhpi nama hnei aw tahpa ei pahno vâta he rakhata he ei vaw palâsapa châ ta, a reihtuhpa zy lâta nama pachâthaina asâh chaipa ei châ haw ei. Ei châ ly kaw.

 

 

 

 

 

Mara râh liata Achuna

(Education in Maraland)

 

~ K. Vanlalliana

 

 

            Mara sawzy pi he Achuna kyh liata eima vâhnei ngaita. Eima Missionaryzy ta kô 1911 Sunday School ama vaw padua no khata châ reipa nata ropa vaw pachusa ha ei ta, cha cha achuna eima râh liata â vaw thaona a châ. He tawh heta Missionaryzy heta Mission School padua lymâ ei ta, phahnaingiah kawpa ta achuna ama vaw siekhei lymâ. Eima Missionary nahzy vâ heta eima râh liana heta châ reih thaipa nata roh thaipa ama vaw pua lymâ.

              Kô 1947 ta India ta Independence vaw hmô ta, a kô heihpa 1948 lia khata Mission Schoolzy kha Sawhkhâ ta la khai ta, he kô heta Mission School angiapâ pâpa ta Primary School 20 tlai eima râh liata paduapa a vaw châ. Middle School he kô  1948 lia pyly khata Saikao liata paduapa châ ta, khi hro lâ chhao padua lymâpa châ ta, 1994 khata Middle Schoolzy he MADC ku liata hlâpa ama châ. High School he eima râh liata 1957 khata Siaha liata padua tuachaipa châ ta, College he 1978 khata Siaha liata paduapa a châ hra.

              Eima râh achuna kyh eima reih no heta eima Missionary hmiatuapazy ta phahnaingiahna nata hmia saichhieliena (Vision) ama vaw hnei phazie he my thei awpah châ vei. Sawhkhâ School â vaw duah hlâta Awnanopa liata nôpaw hluhpi vaw papua ei ta, khizaw lâ chhaota châ thaipa hluhpi ama papua hra. Cha chata achuna kyh liata thata hmah pasiesa ta, cha zawhzi ta châthaipa hluhpi eima vaw puapachhuah theipa a châ.

              Eima Missionaryzy vâta eima râh he châ achupa y hluhna râh nata châthaipa y hluhna râh a vaw châ ! Eima population zie pachâpa ta India râh District zydua liana heta châ achupa (Students) hluh chaipa District chhao eima châ thei ngyu aw. Line hro hropa khizaw lâ nata zyhna kyh lâ lia chhaota chyhsa hlaotloh kawpa ama y hôlô. Achuna vâ heta eima râh thata âsosâh tah lei thei ma pi.

              He hawhta achuna lâchhâh liata nohhlaona nata vâhneina eima to no heta atahmâ ta eima siezie liata deikua cha thaina hmeihseih (quality) hlâta a hluh ta hluhna (Quantity) lâchhâh heta eima sie via khiahma tah ngâ awpah ta eima ypa ta â lâ. Eima râh Education siezie pachâ hmeihseihpa châta cha palôhtlâh achhih leipa ta, hnabeidy â chhih kaw. Chhôhto ta eima pachâ peimawh chaipa nata phusâ eima hmâh hluh chaina cha achuna (Eima sawnahzy châ pachusana) he  châ tlôh ta.

              Eima sawnahzy châ amâ chu thei n’awpah ta cha eima hneina khôlâ taih leibâh la khoh pi ta, loan taihta eima la tyh. Abyuhna nata ângiahna ta miah a vi thlu ha tawh cha eima râh/ohmozy chhao zuah awpah ngiaroh ma pi.

              He tlupo ta achuna pachâ peimawh pi ta, eima daihti nata tha nata zâh, sôh hryuh tlôh pi ta, châ athai hmeihseihpa nata hlaotlohpa khazia eima chyh kaw vâ? A likah kheihawhpa liata ma cha hmo asu leipa (lapse) a y thlyu aw. Cha cha pachâ papua ta, pado awpah he eima zydua maoh a châ. Kei la achuna kyh liata taotheipa sâkha hmah hnei va na tah thei ma pi.

              Khitlâh tlyma, vâtlâh liata tlyma eima taotheipa chyh kaw hra sala, eima ochhôh lia chhâta cha achuna kyh lia heta taotheipa eima hnei chyu tahpa pahno ei suh u. Eima râh ta ângiah chaipa cha moto ta eimâ phana rakha chyu papuapa ta eima sawnahzy nata eima nawhta nahzy châ pachu ta, eima pachu thai leipa chhaota achuna ziza taopa ta eima sawnahzy deichhy awpah he a châ. Bie paso kawpa nata yzie hnei kawpa ta eima pasyu lymâ awpah he achuhaipazy ta amâ ngiah kawpa a châ. He hawhpa lâ he eima râh ta â phahlapa kao a châ thei hra.

              Kao kha lâ eima pachâ nahta cha, eima râh liana heta achuna pha sala, degree hnei thlâhthlipa hlâta athai hmeihseihpa, hmâhtlâh a châpa, kheihawhpa Competitive Exam chhao hmiachhy theipa nata tloh theipa achuhaipa ama hluh awpah he eimâ ngia bâh. Cha hawhpa châna chata khitlâh nôpawpa (VC) nahzy he achuna kyh liata thata amâ chahraoh awpah a byuh kaw. Cha hawhta NGO – MSO, MTP & MCHP zy chhao achuna kyh lâ heta hmah ama la awpah a peimawh kaw hra.

              Mawrâh liata atahmâ he thata achuna kyh liata ahra ei ta, atakô YMA General Conference ta kô phuahpa biepi cha, ‘Achuna pasâhsa’ tahpa a châ. He heta yzie hnei pahthu kaw aw ta, achuna heta thata hmahsiena lâ ama pangaikhei cheingei aw.

              Awnanopa lia chhao achuhaipa nata Pachutuhpazy châta Abeipa bie tawhta reihpapuapa châ sala, chakaona nano nanopa lia chhao biepi hmâpa ta pahlao tyhpa châ sala, achuna liata thata hmah eima sie cheingei aw.

              A chhâchaina ta cha eima râh achuna hmahsie hmeihseih awpah ta cha pachu awpah ta â piepa, thla hlao piepa Pachutuhpazy pi achuna kyh liata cha eima maohphaohna â sâh chai. Tiamana nata phahnaingiahna hmeihseih hneina chôta pachuna rai eima hria awpah châ ta, hâtinahzy ngiachhiena nata kyhpachâna chôta eima pachu awpah a byuh ngaita.

              Pachuna liata taozie parohpa phahnai leipa thypa ta, taozie thiehpa phahnai kaw awpahzy hmâh bâ ei s’u. Eima hro ta palâsapa ta, hmo dopa nata tlyuhpa yzie hnei kawpa (Logic) châbu khôlâ tahpazy chhao achuhaipazy chho awpah peimawh ta, achuhaipazy palôhru phaozie (Morale) chhao thata Motivate ngâthlâh ha awpah a byuh aw. Cha chata eima râh achuna liata hmophapa a sa papua cheingei aw tahpa ei hnabei a seih.

 

Ei châ ly kaw ei.

 

(He Article pha kawpa he Tipâ High School Golden Jubilee  Souvenir tawhta lapapuapa a châ. Ed.)

 

 

 

 

 

Machâ reih

 

 

Chaw                              : Rilâhpa

Chhânô                         : Chhâ (Daihti)

Châdi                              : Châ, châpaphaopa, châropa

Châhdi                         : Lyu sâh tai khaina daihti

Cheihdô                        : Abei, khih beipa

Cheihdôripa               : Abei hlôpa, abeipa saw

Chhivaw                       : Abei zuah laihsa chhithaipa

Chhivawhronô        : Abei zuah chhithai ngaitapa

 

 

 

 

 

NO. MADC. 1/M/EDN/2019

MARA AUTONOMOUS DISTRICT COUNCIL

SCHOOL EDUATION DEPARTMENT

SIAHA.

Siaha, the 27th August, 2019

O F F I C E   O R D E R

 

 

                             Thla hlao la daihti liata teaching nata non-teaching staffzy ta School puasaipa ta, âmo cheingei ta thla hlao Siaha nata Tipa liata ama la tyhpa heta achuna thata tla pahnaisa ta, achuhaipa hawti nahzy ta ama tao kaw tahpa pahnopa a châ. Chadei châ leipa ta thla hlao la a chhuahpa pachutuh thokhazy cha hlao la daihti a châ mâh hlâta Siaha kaw pangaipa ta vâro châh ei ta, hlao ama la tawh chhao ta vâro ama châh heih tyh. He heta âmo dei châ leipa ta mohro pachutuhpazy discipline nata morale thata parao ei ta, achuhaipazy ta thata ama tao tahpa pahnopa a châ hra.

                             Chavâta atahmâ tawhta cha teaching & non-teaching staffzy ta Cheque nata ATM hmâpa ta School sâkha tawhta ama ngâ viapa pakha tuapa ta thla hlao ama palasa bâ awpah a châ. Hmohropa tao byuhpa kyh lia chhao ama School tawhta ama tuapa cha bie ta/pataosa pâ awpah a châ aw. He hawh leipa chhaota Tipa nata Siaha liata chhôhkha a pahnieh tlâhpa a hneipazy ta cha thla hlao ama palasa (entrust) thei hra.

                             He hawhpa a châ bâ awpah vâna heta Middle nata Primary School Headmasterzy ta Monthly Working Statement ama pangia cheingei awpah a châ. He Working Statement Form liana heta âsohsi kawpa nata â do kawpa ta Headmasterzy ta pabie aw ei ta, a thla heihpa noh 15 (Hleipawngawh) hlâta a ry liata moh ropa hnohta pangia awpah a châ aw. Working Statement pangia leipa school liata ahriapazy thla hlao cha patâhpa (detained) a châ aw.

                             Thla hlao he Bank liata Creditpa a châ tawh ngâlah ta hlao la awpah ta tuapazy ta School ama puasai awpah a châ aw.

 

Sd/- K. Vanlalliana

Senior Education Officer

Mara Autonomous District Council

Siaha

MEMO NO. MADC. 1/EDN/2019                                 Siaha, the 27th August, 2019

Copy to:-

1.       P.S/P.A to all Elected Office Holders for information.

2.      Executive Secretary, MADC, for information.

3.      The Headmasters, Middle School & Primary School ama vaw pahno awpah nata Teaching & non- teaching  staff zydua he Order he pahnosa awpah nata hmah la pazi awpah ta pahnosapa ama châ.( School Notice Board lia taw hra awpah).

4.      H.A ( Working Statement i/c ) for information.

5.      Guard file.                                                                         

 

         ( HC. BEIKHAI )

Education Officer

Mara Autonomous District Council

Siaha

 

 

 

 

SOCIAL MEDIA LIATA

TAOZIE NGIAPA!

 

~ Robert B. Syuhlô

 

Atahmâ cha Social Media - Whatsapp, Facebook etc-zy he zawpi hmiakô liata bierei tyhpazy nata, zawpi hmiakô liata bie a reih beih leipazy châta biereina su phapa, pachâna palâhâhna phapa nata, su, eima khôkhâ thei lei awpah a vaw châ ha bâ. Nôpaw eima tahpa - Awnanopa nôpaw, khihtlâh nôpaw, py nano nanopa chhihthatuhpa nata râh chhihthatuhpazy châta chhao, a naosia kawpa ta Khazohpa bie phuahzâhna, khihtlâh amohôhna châta hmo angiahpa phuahzâhna, py nano nanopa hmahlana nata hmo a pahnosa awpah angiahpa palâhâhna nata phuahzâhna châta eima hmâh ha bâ.  

‘Awnanopa chhihtuhpa, KNP Chhihtuhpa, Râh nôpawpi tlai ta Social Media liata a hluh kaw bao’ tah thai'pah châ khao vei! Eima khizaw daihti a pahieh lymâpa heta - chakaona nano nanopa liata eima tha miah patlôtuhpa châta Social Media he tlao miah a vaw tlôkheipa a châ.

Chyhsa hluhpi châta cha, Social Media he byhnâ châ ta; eima paveihpa nata eima pachâna, khatita hmahta keimo tlaita zawpi hmiakô liata a duahpa ta eima reih papua thei lei awpah kha, Social Media siepahliepa ta - atahmâ cha eimâ ziana, chareina nata raihriana su tawhta eima phuahzâh thei ha hra!

Thâtihthiehpa papuana kyh liata chhao, khatino hmahta Journalist a châ beih lei awpahzy châta chhao, thâtihthiehpa hiezawhtuhpa lâta Social media heta miah pachâsa khai ha ta; anodeikua, Journalism Ethics  kyh liata deikua eimâ hnai kaw chy..

Social Media heta atahmâ cha Marasaw, alai-achyh, hawti-machâ miah phâkhoh khai ha ta, eima khoh ma khoh vei ma, khizaw hmahsiena raohpa ta keih eima chakâ khoh hra khiahta cha, eimâ pachie via lymâ awpah â ngiah aw. Cha nota, Social Media liata taozie ngiapa eima zyh hra awpah a y hra. Cha cha a chyhta dâhdei eima reih tua aw.

 

1. NA POST HLÂTA PACHÂ TUA TYH MA Y : Social Media he, hmo eima pachâ raohpa ta, eima pachâna kha movi hlâta hiezawh pâ theina, hmo chatlie-chakohpa nata naosiapa a châpa vâta pakhâta ta hmo eima tawhpapua awpahzy cha - Â do ma?, Ei pachâna he â su chai ma? Mohropazy a pasasa thei ma? Ei pachâna heta hmophaleipa a sapapua thei ma? Ei hmo pahnopa he ngâtlâh a châ ma? tahpa nata a hropazy he eima pachâ tua tyh awpah a pha kaw.

 

2. MOHROPA ZO MOH THAI AWPAH : Social Media group sâkha liata vaw y pi ta, eima yna Group liata Khâpa hmo ma ama reipahmaoh hai? Khâpa hmo ta ma ei yna Group he palôhpahawh hai? tahpa moh tyh tua'pa he taozie ngiapa a châ.

Zikyu ama tawhpapua nota azaokhileipa ta hmohropa kei reih syulyu hapazy, Bie hmeiseihpa reipahmaohpa ta pachâna athata ama vaw thyu sahlao nota, saisona heilyu kawpa kei tao thlâh hapazy apaoh lei awpah a pha kaw.

Eima yna Group eimâ ngia pataw nahta, khâpa hmozy ma ama tawhpapua hai, ama reipahmaoh hai? tahpa phie mohpasia ta, reih khai ha tuapa he taozie phapa a châ.

 

3. HLÂTA UHTHEI VIAPA ZANA REIKAH NGIAPA HMÂH LYHLIA AWPAH : Social Media vâta atahmâ cha, nôpaw uhthei viapazy chhao thyutliapazy hry liata y hrapa ta, bielôhawhpa ama vaw reih tyh hra. He Social Media vâna heta - Politician nata zawpi, Awnanopa machâpa nata awnano manôh, nôpaw athaisopa nata zawrâpazy likah pahniasapa ta y ta, dawhkâh miakha chadôkhohpa ta atyuhpahmaohpa eima lyu khai ha bâ!

Cha nota, thyutlia thokha - Mara hrozie ngiapa pahnoleipa ta, Social media liata nôpaw viapa nata uhthei viapazy, ama rihchâhpa nata âmo hlâta hâti viapa hawhta a hriahrâ thaipazy eima vaw ypâ tyh. He he tao rai rai lei awpah a pha.

Pâpuh, Nônô, Pihnô, Uhta etc tahpa ta keimo hlâta uhthei viapazy Social media siepahliepa ta eima kei aw/tahpa khata, eima zachhihna tlyma, eima thaichâna tlyma dikhata hmahta chokua via leipa ta, Tlao Mara hrozie ngiapa pabohsa pi ta, tlao chyhsapa likah liata azaokhina phapa eima tao via tyh tahna a châ.

Khi a chô liata eima reipa zydua dei châ leipa ta, reih awpah vâro tlai a y thlâh ha chy. Anodeikua khizy khi atahmâ duasu liata eima pachâ peimawh awpah ta ei kho kawpazy a châ.

 

Ei châ ly kaw ei

 

 

 

Sai tua u,

chô lâ vâ meihdo hry lia

 

~ L. Beimokhai

 

Rhyme Scheme : aba, bcb, cdc, ded, ee

 

Sai tua u, chô lâ vâ meihdo hry lia,

Tlâhto hryh laih sopavaw rielanô;

Lôhlie taopa ta ma awh hawh na via.

 

Litohpa ta vaw to nâ zaw pakhô,

Nâ hawh mathlaw hnei ei byuh hra bao cha;

Saipa ta 'd' laihna tlâh chhao na hmô.

 

Luhchô bydi lyuhchâ thai chaipa kha,

Ei bieru na pahnopa kaw mah y;

Ei châ tlyh ha lyuhbie hlâ awpah ta.

 

Khâpa biethâh ma na vaw phaoh aw tly,

Avâ ziza liama na lei khei aw;

Ngiahtiah lei ta ei vaw hâ thlâh ha ny.

 

Luhchô bydi lyuhchâ na vaw kua haw ,

Luhchô Beinô a vaw sâh ha cha zaw ;

 

 

Source: Board of Mara Literature, MADC, Siaha.

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II