Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue December 2020



Editorial

                Di thla, eima Beipa nata Pachhatuhpa Zisu Krista pihna thlâpâ cha Khazohpa ngiachhiena nata chhihthana zawhzi ta vaw tlô ha heih pi ta, Covid -19 ta khizaw patypamâ ta, chhôhto, râh, khitlâh nata mo pakha chyu eima bua kaw sai no ta a palâ kawpa ta eima magazine, Hla nata Bie chhao papua pazao lymâ theipa ta, kô 2020 châta eima Issue hnôh chai awpa, December 2020 Issue cha vaw papua pazao heih thei pi ta, miah chhihthatuhpa eima Beipa Zisu Krista moh cha chhâzaw nata tlyzaw ta reithaipa ta y mawh sy.

              Eima reih chiehpa nata eima pahno chyupa hawhta Covid-19 ta khizaw patypamâ ngaita ta, atakô Christmas chhao kô hro hawhta eimâ hmâh thei awpa pangiasa chhao achhih leipa ta, palôh y â chhih ngaita.

              Anodeikua kheihawhpa duasu lia raita aduah hr’ei sih la, Achhyna o liata apakhypa ta eimâ hmâh thei leipa a vaw châ hapa chhaota, eima pathipalôh liata Bei Zisu cha papihsa chanei heih ei sih la, eima palôh chhao ano châta pahypa ta, pathipalôh hmeiseihpa ta apihna he eima o chhôh chyu nata eima palôh tlokhuh ta eimâ ly khiahta la, kô hro zydua hlâta eimâ hmâh pha chai kô chhao a vaw châ thei mâ tâ.

              Kô hro ta ziza hiahza pha kawpa ry liata haosai kawpa ta ochaki chabâ liata eimâ hmâh tyhpazy kha atakô cha pathleih khai haw sih la, Covid -19 vâta viasazy nahta apazipa ta, khiliah awhsâhpa ta eimâ hmâh thei leipa he rypaohna chalei thaipa ta, eima mo pakha chyu nata Zisu Krista eimâ hniana kô vaw châ sala, kô a sie chiehpa zydua hlâta Christmas eimâ hmâ pha chai kô vaw châ sala tahpa eimâ khokhei chyu.

              Kô thaona tawhta eima daihti hmâ chiehpazy saichanei chyu heih ei sih la, thla 11 a sie hapa liana khata Zisu Krista, eima moleina chatlai awpa ta alei liata chyhsapa hawhta a vaw pihpa châta daihti khazie tlaima eima vaw pie hra tahpazy saipalie ei sih la, a châta eima daihti nata pachânazy eima vaw pie thei leipa a châ nota a pina noh alyna châta niedona nata haosaipa ta eimâ hmâ thlu pâ lao tyhpa hela Zisu palôh eima pasasa kaw tyh aw.

              Chavâta atakô he la eima hroparohpa zydua siesai khai h’aw sih la, eima palôh, eima pôhpa, eima daihti zydua Birthday a hneituhpa Zisu Krista châta hlâ khaina chôta Christmas lypa nata thaphapa ta ahmâh chyu awpa ta khokheina eimâ hlâ chyu.

 

 

 

 

Châbu rei hluhpa

phana nata peimawhna

 

~ VL. Thakima Chozah

 

 

Biehmia

              Râh hmahsiepa nata asosâhpazy he pakhâta ta eima mopa a châ khiahta la chârei nata ro apapeimawhsapa chi nata phozy ama châ lymâ. Châ rohpa tahpa heta châbu, hla, dramma, essay, fiction, article, etc. zydua he a pahly khai. Châ rohpazy heta chyhsapa hro taopathi thei ta, lâthlôh dopa chhao maniah a pahmôsa tyh. Reih, chi nata pho a pabohsatuh chaipa a châ hleikhô ta râh hmahsiena thaby chaipa nata âpahniehna liahmari chaipa chhao a châ. He lâchhâh aheihpa ta châbu reih hluhpa phana nata peimawhna lâchhâh roh eimâ chhuah tua aw.

 

 

Châbu reipa peimawhna

              Pawpi sahdô angia ngaitapa nata châbu he ama vaw pakho pâ tyh. Châbu chhôh liata cha bie nata hla pha ngaitapa zy, hmo no-âhchhihpa thâtih zy, hmo rônah kawpa thâtih zy, chyhsazy ta ama hro ta hmo amâ tyh chiehpa thâtih ama sopakhypa zy, pahnona nata sona bie hluhpizy nata thâtih chi nano nanopazy sopakhyna nata ypakhyna su a châpa vâta pawpi sahdô angia ngaitapa nahta he ama vaw pakho pâ tyhpa a châ.

              Chyhsa sopa nata athaipa eima tahpa nahzy he châbu a reih hluhpa nata a hmâ phahnaipa chyhsa châ ei ta, ama nohto hro liata alyna ama hmô tyh. Châbu a reih hluhpa chyhsazy ta ama châbu reipazy tawhta ama hro châta pha awpa - alyna nata thaphana zy, palôhrupa thapathyusana zy, pachuna nata hmo pahnona hnawh châta ama hmâh hleikhô ta, ama chyhsa chyhsa châna liata nôchâphana lâta achhihtuh awpa châtazy chhao ama hmâh hra. Chyhsa châthaipa, philosophers nata Scientists nahzy chhaota châbu he amâ chuna nata hmo taona liata ama hlaotlohna thaby chaipa a châzie ama rei chyu hra.  Nuclear Scientist rônahpa, India râh President chhao a vaw châ chiehpa Dr A P J Abdul Kalam ta cha, “Châbu he pathlatuhpazy ryusôhpazy hawh tlupo ta hmosôhpa a châ” a vaw tah.

              Châbu he eima viasa phapa, ngâchhihpa nata chhihtuh phapa a châ. Eima pahrâna khizaw he aki leina râh châ ha ta, chavâta eima viasa pha chaipa hawhta eima pachâpa nah zydua he hmo dopa nata biedopa maniah chho khai hlei lei p’aw ei ta, eima duasu chhie chaina nata tlohleina daihti liata achhâna taihta maniah aduakhei khai thei hr’aw veih ei. Eima chhie chaina nata tlohleina chaina daihti, viasazy ta maniah amâ paphasaina khai hana daihti lia chhao ta eima chhâh khâ maniah a châhtuhpa, eima viasa phapa nata ngâchhihpa a y chhôhpa cha Châbu ngâlâh he a châ. Anodeikua cha, châbu zydua he chyhsa hro chhihthatuh awpa châta pha khai hlei hra vei tahpa he eima my awpa châ vei. Achhiena lâta maniah atlôkheipa hluhpi chhao a y tyh hra. Chyhsa hluhpi pi cha eima châbu reipazy tawhta alyna hmô pi ta, pahneiparâ khei pi ta, eima chakhei pâ ngâpa bie nata hla hluhpizy chhao a y tyh. Châbu thokhazy chhochhi cha abu chhôh eima za reih papua khai tawhta eima pachârôhna nata mothlihtlanazy taihta maniah papaipa khai ha ta, eima nohto hro liata a khaihna nata aphana lâta hmo sai thaina chhao maniah a pahneisa thei tyh. Chyhsazy pi he a châhta cha aly leina nata nôpo kawna daihtizy za hnei tyh pi ta, cha hawhpa daihtizy liata eima hro tha maniah apatlôtuh awpa châbu phapa hluhpi a y. Cha châbu nahzy liana chata chyhsa rônahpa, rairuna hluhpi nata pachârôhna thlihpipa a vaw chatô papua ha chiehpazy thâtih ropa châ ta, achu awpa nata pahno awpa, eima hrona tha maniah a patlô theituh awpa hluhpi chhao a y. Chavâta, châbu phapa reipa he a peimawh ngaita kaw.

              Châbu reih hluhpa he ryhtlyhpa hawhta hneipa ngâlâh dei vaw châ leipa ta, sona zy, novâhna zy, hmo saipasina zy, chârozie thaina nata hmo mohchho pahnona châta zy, bie nata hla pahno pakawhna zy maniah a pietuhpa a châ heih hra. Chyhsa châbu a reih hluhpazy cha sasyh angâna hnei ei ta, chârozie phapa ama pahno hleikhô ta chyhsa hropa châropazy chhao thlai ta âchhuahna ama patu lymâ theipa a châ. Anodeikua cha, châbu momaih he reih chakhyh khaipa pha chai hlei leipa ta, kheihawhpa châbu he ma rei sihla a pha chai aw tahpa deikua eima pachâ peimawh kaw awpa a châ. Achhâpa cha, eima pahrâna khizaw liana heta hmo phapa a y nota hmo chhiepa chhao â pahlao pâ pyly hrana tahpa he eima my awpa châ vei. Châbu phapa hluhpi a y nota, châbu pha leipa, hro achhihthana châta hmâtlâh a châ leipa hluhpi a y tyh. He hawhta a châpa vâta English author nata philosopher rônahpa Sir Francis Bacon (1561-1626) ta cha, “Châbu thokhazy cha apahâhna apadi ngâlâh ta padi thlâhthli awpa chi y ta, thokhazy cha eima padipa hleikhô ta palâ pâ ha awpa chi y heih ta, châbu chyh viazy ngâlâh he eima cha-eihpa hleikhô ta eima nie pâ ha awpa chi a y” a vaw tah pâ ngâpa a châ. Chavâta, châbu eima reih awpa nata hmâ awpa atlyhna chôchâh liata eimâ sohsi thai kaw awpa a byuh tahna a châ.

              Tahmâ cha eima pahrâna khizaw he asosâh kaw bâ ta, Smart phones zy, internet zy, computers zy, TV channels chinano nanopazy ta eima nohto hro he maniah achhihtha pathu ngaita kaw bâ. Chyhsa hluhpi cha châbu pakaipa ta rei hoh khao leipa pi ta, châbu sôhna nata peimawhna chhao pahno thai tlâ khao ma pi. Achuhaipa nata pachutuhpa hluhpizy cha achu awpa châbu chhôh zydua nata references nano nanopazy reih pakawh hoh leipa ei ta, pachutuhpa thokhazy hra ta note zy ataochhyhpa ta exam-na liata ama Siku hawtizy ama pass thei n’awpa châ ngâlâh ta pachu ei ta, châbu chhôh hmeiseihpa âki chochâ kawpa nata zôpha kawpa ta pachu hoh lalih khao hra veih ei. Châbu tlyma, achuna bu tlyma tiama kawpa nata pahâh khei kawpa ta achupa eima râh chhôh liana heta eima chyh kaw tahpa achuhaipa nata pachutuhpazy hrozie tawhna heta hmô theipa a châ. He he hmo pha lei kawpa a châ hleikhô ta eima râh chhôh liata Quality education eima hnei thai leina chhâpa chhao châ ta, education achhuahna liahmaripa a paraotuhpa thaby chaipa chhao a châ hra. Eima khizaw kaw hmâ laih awpa he asâh tlôh ta, tahmâ hawhta châbu chhao a phathipa ta eima reih hoh leipa khiahta la eima mylâ hânoh awpa he pachâchhie â chhih ngaita kaw bâ.

              Ei viasapa pakha, châbu rei a pahâh kawpa ta eina chhopa ei my thai leipa bie cha he he a châ. “Châbu eima reipa heta palôhrupa râh liata hmo pahno thai theina maniah a pie hleikhô ta châbu roh (smell) zy, ahmiaphaozie zy, eima ku ta tlaita hria pi ta, a tho thota eima pakaipa zy chata châbu chhôh liata hla nata bie a rohpazy cha eima pathi-palôruhpa liahmari phiapa liata khâ châh ngâthlâh ha bâ ta, my thai khao ma pi. Chavâta, keila châbu he pasô ngaita na ta, a châhta la ei pahnâ pâ ngâ kaw tyhna” eina tah. He he â do ei tah kaw. Library liata tlyma, eima chhôhpadâhpa chhôh liata tlyma keimo deita ta palôhrupa zydua a pie khaipa ta châbu eima reipa cha pachâna thiehpa nata pachâpazi awpa hmo thiehpa hluhpi achu papua pi ta, eima palôhru liahmaripa liata a châh ngâthlâh ha bâ. Cha hleikhô ta châbu eima reih hluhpa he lathli hmâ thaina nata novâhna eima hneina thabypa chhao a châ hra. Eima lathli he eima hmâ chyh lymâpa a châ khiahta la chyhsa hmâtlâh a châ leipa, chyhsa hrupa lâta eima pua via lymâ aw tahna a châ. Chavâta, eima lathli hmâna pha chaipa nata exercise-na pha chaipa cha châbu reipa he a châ.

              Scientist rônahpa Albert Einstein ta cha, “Patuapaluana he pahnona hlâta a thatlô via syulyuna” a vaw tah. Einstein pachânazie nata angiapâna liata cha pahnona heta hmo châna pahno thaina nata hmô theina maniah pie ta, patuapaluana deikua chata hmo a kaw chhichâ n’awpa dâh maniah a pahmôsa chhielie thei tyh tahpa a châ. Patuapaluana phapa hneipa heta chhâ a vaw y lymâ awpa liata eima khizaw kaw y laih n’awpa dâh pahnona nata hmô chhielie thaina maniah a pie tyh. A yzie cha patuapaluana he chyhsazy hnohta hmo thiehpa nata hmo pha viapa pachâ papuana nata hmô papuana a pietuh chaipa a châ. Anodeikua, a chô liata eima za reipa pahnona nata patuapalua thaina chyhsazy ta eima vaw hnei theina thabypa deikua cha châbu reih hluhpa he a châ. Chavâta, châbu a reih hluhpa momaihzy cha pachâna pasohpa hnei pha via syulyu ei ta, patuapaluana phapa nata hmo taotia thaina nata âsaomânazy chhao ama hnei pha via syulyu hra.

              Châbu eima reipa vâta alyna eima hmôpa he bieta reipasia thaipa nata chhopasia thaipa chi châ leipa ta, a taota taopa ngâlâh ta a phana nata kho â chhihna liahmari hmeiseihpa he chapao theipa a châ. Châbu eima reipa heta eima yruzy maniah a papai hleikhô ta, eima hro liata âtymâna nata âtyhreina eima hneipazy tawh tahpa maniah thaohpapua ta, eima chhôhso palôhrupa liata thlalôhna zy, alyna zy, thapawhna zy maniah a pie hleikhô ta, lathli a patlâpaziana maniah a pietuhpa chhao a châ. Palôhrupa tlokhuh â pie khaipa ta châbu eima reina daihti liata cha châbu rohtuhpa ta ro â chhuahna palôhru liahmaripa a kaw hlykhei thei ha pi ta, khizaw hropa lâ maniah a chareisa thei tyh. Châbu rei n’awpa châta eima daihti hluh via eimâ parua thei lymâpa a châ khiahta la eima nohto hro liata chhao hmo pha viapa nata kho achhih viapa ahuah papua via lymâ aw pi ta, lâpi dopa chhao eimâ chhih thei lymâ hra aw.

              Châbu eima reipa ngâlâh he â daih leipa ta, châbu chhôh liata bie nata hla phapa eima reipa tawhta hmo thiehpa nata pachâna thiehpa eima hmôpapuapa nata achu papuapazy cha chakhiehcharieh kawpa ta eima pachâpazi tyh hra awpa a châ. Châbu eima reina daihti liata eima pahno awpa peimawh kawpa thokhazy cha a ry liata palâsapazy he a châ:

 

1)                   Châbu momaih zydua reih chakhyhpa hlâta cha châbu phapa rei hluhpa tlao achhuah awpa a châ.

2)                  Châbu eima reipa cha pakhâta ta rei ei sih la, châbu chhôh liata hla nata bie arohpa nata châbu arohtuhpa ta ro â chhuahna chhâpa pahno achhuah awpa a châ.

3)                  Châbu chhôh liata bie arohpa momaihzy cha pahnopasia leipa ta thlai thlai zyh chakhyh thlâh ha awpa chi châ leipa ta, a pha kawpa nata chakhiehcharieh kawpa ta châbu ta âchhuahpa pahno achhuah tua awpa a châ.

4)                  Châbu chhôh liata bie nata hla peimawh viapa nata na kho viapa bie nata hla yna tlâhzy cha ngiana a sianô kawpa ta tao ha chhyh la, mylâ hânoh liata eima mohpathi khoh heihna daihti liata hmo phahnai kawpa a châ.

5)                  Châbu eima reina daihti liata cha eima châbu reipa liana chata a thei khiahta la eima palôhrupa tlokhuh zydua eima pie thai awpa a pha.

6)                  Châbu zydua he reih awpa ta âboh khai hlei leipa ta. Chavâta, châbu phapa, eima hro ta a phahnai khei awpa chizy atlyh thai awpa he hmo peimawh ngaita kawpa a châ.

 

Châbu reipa phanazy

 

1. Pachâna lathli pasohpa maniah pietuhpa a châ: Châbu reipa he eima pachâna lathli pasohpa maniah a pietuh chaipa a châ. Chyhsazy pi he eima vaw pih dyu tawhta achu lymâ ta eima thina noh taihta achu pazao lymâ awpa eima châ. He eimâ chuna liata eima pachâna lathli maniah pasosatuh chai awpa cha châbu he a châ. Chyhsa sopa châ’pa na kho khiahta la “Châbu rei hluh ma y” ama vaw tah tyhpa hawhta thaina hmeiseihpa hnei awpa ta cha rei hluh awpa a byuh. Stanley Jones ta cha, “Châbu rei awpa phapa na hnei leipa a châ khiahta la na viapakao aky haipa kha zuah la, chalei mah y” a vaw tah. “Châbu y leina o cha, chhôhpadâhpa opy y leina, azohkaluh thlâh hapa hawh deita a châ” ama vaw tah tyhpa hawhta châbu y leina o liata a pahrâpa chyhsazy cha chyhsa sovâh kawpa y lalih tlai hra veih ei. Arnold Bennet ta, “Châreih a pahâh leipa nata a reih bei leipa chyhsa cha, khizaw khaihna a hmô mâh leipa, nahta chhaota khâpa hmahta athei tlâ mâh leipa, nô pychhôh liata hawsaih a ypa hawh deita a châ” a vaw tah hra. Chavâta, chyhsa sopa eima châ thei hra n’awpa ta cha châbu eima reih hluh awpa a châ.

 

2. Hro chhihthatuhpa a châ: Châbu eima reipa heta eima hro maniah a taopathi thei.  Châbu tlyma, article tlyma, essay tlyma, fiction nata drama- hawhpazy tlyma eima reih tyhpazy heta eima hro maniah a chhihtha pathuzie he keimo mo pakha chyuta eimâ pahnothai chai nahta ei pangiasa. Krizyhpazy pi ta cha Bible zy, hlabu zy, Bible chhopasiana bu zy, chakaona bu chi nano nanopa nata Awnanopazy pha n’awpa nata laiseih via n’awpa ta Pastor nata Chakaotuhpa nahzy ta châbu ama rohpazy he hro dopa nata lâthlôh dopa  lâta maniah achhituh awpa châta eima hmâ chaipazy ama châ. He ama châbu ropa eima reipa tawhnazy heta eima hro a taopathina châta hmâh pi ta, hro pitlohna eima hnei thei n’awpa ta lâpi dopa maniah a pahmôsatuhpa chhao a châ hra. 

 

3. Hro asohsina maniah pietuhpa a châ: Chyhsa sopa nata châthai kawpa eima tahpa hluhpizy cha ama hro asohsi leipa ei ta, ama nohto hro liata ama diathlâpa vâta nohzaopa ta khih asa thlâh ha bâpa rei awpa hluhpi ama y. He hawhpa chyhsazy heta chhie nata pha pathlua-pathlâ thai leipa ei ta, a su nata daihti chhao pahno thai tyh hra veih ei. Zawpi mohmô liata cha chyhsa sopa nata châthaipa hawhta pahnopa châ tyh tlôh ei ta; anodeikua a hmeiseihpa râh liata abôchhâ tlâh awpa nata apahniehna hmeiseih awpa châ tyh veih ei. A pei ngaita kaw! Khitlâh nata râh châta chyhsa hmâtlâhpa eima châ theina awpa ta cha châbu eima reih hluh awpa â ngiah. Châbu reih hluhpa he pitlohna hro maniah a pietuhpa a châ hleikhô ta hro asohsi thaina maniah a pietuhpa chhao a châ. Thomas Jefferson ta cha, “Châbu ahlao leipa ta ei hrona he a ki thai vei” a vaw tahpa ngâpa tlai a châ.

 

4. Hmo â theithlâhna phapa pietuhpa a châ: Châbu eima rei hluhpa ta athôhna maniah atlôkheipa cha hmo eima pahnopazy âthei ngâthlâhna palôhru thatlônazy maniah a pahneisa tyh. Chavâta, châbu reih hluhpa he hmo peimawh ngaita kawpa a châ. Eima lathli he eima hmâ chyh lymâpa a châ khiahta la chyhsa hmâtlâh châ leipa, chyhsa hrupa lâta eima pua via lymâ aw. Chavâta, eima lathli hmâna pha chaipa nata exercise-na pha chaipa cha châbu reipa he a châ.

 

5. Sasyh angâna nata âsaomâna maniah pietuhpa a châ: Châbu a reih hluhpazy cha sasyh angâna nata âsaomâna ama hnei pha via lymâ. Châbu eima reih hluh khiahta cha eima pahnona vaw kawh via lymâ aw ta, thaina nata sona zy chhao maniah â baichhi via lymâ hra aw. Châbu a reih hluhpazy cha chyhsa zawmarâpazy hlâta ama pachâna pasoh via syulyu ta, vaih nata tlâh, ti nata râh châta chyhsa hmâtlâhpa ama châ lymâ. Cha hleikhô ta, ama chô liata rairuna nata âtyhreina a vaw tlôpa momaihzy cha riahpha ngaitapa ta ama chatôh papua lymâ thei hra.

 

6. Hmo yzie pahnona thabypa a châ: Châbu a reih hluhpa chyhsazy cha hmo pahno kawh ei ta, khizaw hmo yzie ama pahno hleikhô ta, su nano nanopa liata chihro pho hropazy phôhryhpa nata chhichânazy pahno ei ta, ama khihsana ti nata râh thâtih sianôpazy chhao ama pahno thei. Râh hmahsiepa nata thatlôpa, America râh thâtih he khizaw chyhsa tota eima pahnona chhâpa cha ama râh thâtih ama rona eima reih hluhpa vâta a châ. Cha dei châ vei, châbu eima reipazy tawhta râh hropa lâta ama taozie nata khihsa tôtuna ziezy pahno pi ta, hmo thiehpa hluhpi chhao eimâ chu papua hra. He hawhta a châpa vâta Dr. Seuss ta cha, “Na rei hluh khiahta la hmo yzie pahno hluh aw chi ta, nâ chu hluh khiahta la su hropa lâ na tlô hluh hra aw” a vaw tah. Châbu he a thi thai leipa châ ta, châbu eima reipa tawh heta kô hluhpi a khô ha chiehpa liata maniah pathlatuhpazy khihsana nata hrozie eima pahno thei. Chavâta, châbu a reih hluhpazy cha daihti nata nohzy a thla lymâpa nata khizaw hmo yzie nata chyhsa hro âthla lymâpazy hry tawhta kyh totie liata asaohiah tlâhpa nata chhihthatuh phapa ama châ lymâ.

 

7. Reih pasosâhsana thabypa a châ: Châbu reih hluhpa he reih pasosâhsana thabypa sâkha a châ heih hra. English he khizaw liata reih hneirôhpa nata hmahsie chaipa a châ theina chhâpa cha areituhpa nata arohtuhpa ama hluhpa vâta a châ. Abuah viapa pachâ sih la, atahmâ cha Mara reih he Tlaikao reih ta maniah a disao pathao lymâ ha bâ. A chhâpa cha Tlaikao reih he Mara reih hlâta rohpa ta vaw so hluh via syulyu ha ei ta, nohto ta thâtihbu eima reipa nata Siku eimâ chuna liata achuna reih châta eima hmâ chaipa reih chhao a châpa vâta a châ. Cha khiahta cha, Mara reih chhao he hmahsie via lymâ sala tahpa eima khoh khiahta la Mara reih ta châ eima roh hluh via rili awpa byuh ta, eima rei hluh via hra awpa a châ.

 

 

Biepachhâna nata pahruana

 

Châbu rei hluhpa peimawhna nata aphanazy âki chochâ lei kawpa ta za reih pi ta. Eima biepipa “Châbu rei hluhpa phana nata peimawhna” tahpa eima reina khaihna tawhna khita eima nohto khihsana liata châbu rei hluhpa a peimawhzie eima pahno khai thai chyu nahta ei hnabeiseih. Châbu reipa he peimawh tlôh ta, chavâta he article nawh kawpa areihpazy nata a eih pachaipa ta achuhaipazy hnohta ei cha hrua khoh kawpa ei sâkha cha, châbu eima reih tita pahnopasia achhuahna chôta châbu reih awpa he a châ. Châbu reina chôchâh liata chyhsa hluhpizy ta eima taochhei chaipa sâkha cha pahnopasia achhuahna hnei leipa ta châbu eima reih tyhpa he a châ. Chavâta, atanoh tawhta cha châbu eima reih tita pahnopasia achhuahna chôta eima reih tyh bâ awpa a châ aw.

              Châbu reih awpa phapa eimâ tlypasu thaipa a châ khiahta cha eima nohto hro liata âthlana hluhpi maniah a tlôkhei aw. Châbu phapa eima rei khiahta cha eima pachâna palôhrupa liata sasyh angâna zy maniah pie aw ta, thatlôna nata laiseihna zy maniah a pie hleikhô ta eima hmotaona kyh totie liata hlaotlohna chhao maniah a pie hra aw. He dei châ vei, châbu heta eima hrona he thata maniah chhihtha ta, eima châbu reipazy tawhna heta keimo liata ânanona nata âthlana maniah a tlôkhei thei. Chavâta, châbu reih awpa eimâ tlyh thai awpa he hmo peimawh ngaita kawpa a châ.

              Achhâ chaina liata cha, Mara sawzy chârei nata ro liata athiehpa ta tiama papua sih la, châbu rei apahâh leipa nata a reih hoh thai leipazy eima ypa a châ khiahta la atanoh tawh heta châbu rei he pahâhkhei achhuah chyu bâ hra sih la tahpa ta ei cha hrua ei.

 

“Châbu phapa he viasa ngâchhihpa nata pachutuh pha chaipa a châ”.

 

Ei châ ly kaw ei.

 

 

References:

 

1.                   Dr. Muhammad Amin Malik, “How important is book reading?”. The author is Associate Professor & Head Dept of Physics, Amar Singh College, Srinagar.

 

2.                  David K. Dickinson, et al. Article review, How reading books fosters language development”, in Hindawi Publishing Corporation Child Development Research, Volume 2012.

 

3.                  Rev. Dr. Rick Warren, “Purpose Driven Life”, Zondervan, South Asia & Gulf Edition, 2002.

 

4.                  VL. Thakima Chozah, “Châropa so hluhpa phana nata peimawhna”, unpublished article.

 

5.                  VL. Thakima Chozah, “Mara reih he reih thi haipa a châ thei hra aw ma?”, in www.maraland.net  

 

 

 

 

MARAPA NATA MOBILE (MAWBAI)

~ JB.Khaisia, Siaha

 

Keimo Mara sawzy pi ta, Mawbai (mobile) nata eimâ vaw hmiapahnona he, kô 30 (sythôh) rachhôh a châ nata pangiasa â chhih. Keima mo pakha ngiahngao ta cha mawbai mâ naopa chi ei vaw hneina he kô 20 (syno) rachhôh a châpa ta ei pahno.  Tahmâhlâ ta eima thyutliapazy mawbai hneipa he cha a thy chô lâ sai a châ hleikhô ta, keimo paw nohkhih leipa nata pahno chyhpazy châta hria thai sa thai leipa sai vaw châ ta, kao khâ lâ pachâ ta cha eima râh Mararâh hmahsiena (kiathyna) miakha châ ta aly’pa a châ kaw. He hawhta a châ ngâhaino heta a pha via ta eima pachâ pâ awpa deikua a ypa ta ei pahno. Tahmâ he mawbai chôchâh liata a phana kao nata pha leina kao a chyuta ta keima mo pakha pachâdah vaw pahripaziah thlâh ha tua sala. Essay type – riarita duah ei vaw chia tua rai aw:

 

Mawbai(MOBILE) Phana : Mawbai he râh hmahsiena kaokha cha châ rai ta, a nawh chaipa tawhta â sâh chaipa taih, dyhchhie chaipa tawhta dyhpha chaipa taih nata molai nata mochyh, chyhsa to eimâ ngiah chaipa hryta miakha, a leipa ta y thei leipa tluta rei thei awpa a châpa ta â lâ. Atanoh daihti liata cha khizaw râh, su to rô cha, movi likawh chhôhta bie a chhona ta hmâ theipa vaw châ ta, achuhaipazy achuna châta nata ezâhna(exam-na) châta hmâh thei ei ta. Pastors zy, Awnanopa chhituhpazy nata Fellowship chhituhpazy hleikhô ta, zawpi ahyrai akhohpa maihta,   Biehrai (Bible) a chakaih ngâ byuh leipa ta Biehrai biezy nata Hlabu chhôh hlazy dua ta mawbai liata khô theipa vaw châ ta, Satlia nata Laihsa likawh ta Vâ-iana châ paphao (Love Letter) kuta roh byuh khao leipa ta, ama khopa maih, biechhie, biepha kheihawhpa rai pakah(verbal) cheingei ta a chho theipa châ ha ta. He hawh hra ta hawtipa kô 3 (kôthôh) pa tawhta cha palaopalâna (games) zy akhaih n’awpa ta hmâpa châ ta, mawbai hmâ phahnaina cha reih ngâ sih la, rei khai tiah’pa châ thlyu’ vei. He ei za palâsapa hlâta hluh via syulyu ta a reih thei awpa nata a pahno viapa sai nama châ vâta, he ei reipa rakha tawhta nâmo ta eina pazaopa awpa ei chi ta, ei châ haw ei.

 

Mawbai (Mobile) Pha leina: Atahmâ liata Mawbai (Mobile) pha leina eima za tah no heta, a mawbaipa hra hropa pha vei ei tahna châ leipa ta, mawbai phana cha hmiatua lâ liata za reih haw pi ta, tahmâ liata rei ei chhuahpa he cha, eima râh (Mararâh) ta mawbai eima hmâh pado lei vâta eima raokheina lâchhâh he rei ei chhuahpa a châ. Mawbai he râh hmahsiena miakha a châ eima tah hai no heta, râh chyhsa, eima hro raona a tlôkheituhpa miakha a châpa ta ei pahno. Eima Ochhôh liata eima sawnahzy ta mawbai iahzai hôlô bâ ei ta, chhôhkha khihsa rairunazy pachâ khao leipa ta Mawbai mâ rupa chalei (hnei cheingei) achhuahnazy  lai kaw ta, nôpaw rai bao ngâ hlâta rakhô liata azia hmahta  mawbai diedâzy palaisa via ei ta, thokha ta khihliah, Network phana su ngaipa ta a zozâ khihdei mosaw paso mahlah leita daihti a hmâhpazy y heih ei. Hawti kô 3-uhtheipazy dâhdeipa chhao ta, Games- akhaihpa ta ama nô nata paw mawbai pahmô khao leipa ta parikhei hôlô heih hra ei ta. Eima Khazohpa Achhyna-Ochhôh lia bawlaw chhaota Sermon nahthliepa nata Abeipa reithaina hlasa hlâta mawbai a buakhei viapa eima y hawpa  a lyu kaw bao! Thokha pi ta, Local Church Secretary zy ta pahnosana ama phuah hai no nata Speaker ta sermon a rei hai nota Switch off leipa ta, mawbai a vaw paro nata khôtho lâ pua eimâ paoh kawh heih chuh! Cha rima bao chala, a pei dâh la a peitu ngâsâ haw. Rei awpa hluhpi y ta, atahmâ liata cha châti nata châsôh ta a khi (a daih) thai rimâ’pa châ tlôh va ! Nâmo ta na vaw baichhapa kaw teh u.

Eima chhôhto chyu ta eima pachâ peimawh chyu awpa nata padyh (solve) a chhuah awpa he eima tao hialia  awpa  a byuhpa ta ei pahno. Athaohta nohta eima pachâ peimawh vei khiata la mylâ hânoh liata la Awnanopa nata râhta rairuna eimâ tyh tlamaw aw, tahpa ngiaroh â chhih kawpa ta ei pahno. Chavâta chhôhtozy pi ta eima ochhôh liata apasipa ao hluh via lymâ ta, N.G.O lâta – M.T.P, M.CH.P nata M.S.O zy nata Awnanopa lâta – K.T.P,K.N.P nata K.H.P zy pita eima su chyu ta apachu ta apasipa ao hluh via lymâpa nata ECM Assembly nata CCIM Assembly ta tôhpi phiapa ta, seminar nata Awareness campaign zy chhao, a byuhpa ta a pahno khiahta cha miah hneikhei ei sala a phapa ta ei pahno. Atahmâ nota a nawh raih kawpa ta eima pachâpa heta mylâ hânoh liata Awnanopa nata khihtlâh rairuna a tlôkheituhpa châ aw vei, ahyma a tah thei aw? Chavâta a sahlama no heta hriapazi achhuah chyu awpa ta a khokhei pi ta eimâ hruapa  a châ.

                                      

Ei châ ly kaw .

 

 

 

 

KÔ 2020 KRISMAS

ALYPA TA HMÂH MAH Y.

 

~ Rev.Thylua Hlychho,

ECM Vaih, Siaha.

 

 

“Chi khah u la; nahthlie teh u, moto châta thâtihpha aly y ngaitapa ei cha vaw tlôkheipa ei hih; atanoh he nama châta Davi khih liata Pachhatuhpa a pih haw, Beipa Krista khawh” (Luka 2: 9-10).

 

Khazohpa ngiachhiena vâta Krismas daihti lychhihpa eima vaw tlô ha heih, aly ei sih la, Abeipa moh cha reithai ei suh vy. Kô 2020 chhôhta hmo tlôpazy eima pachâ khiahta la China râh tawhta a vaw puapa Corona virus hriiah ta khizaw pôhpalôhpa maniah patypamâ ta, cha rimâ cha!Chyhsa hluhpi hrona lei ta, chyhsa hluhpi tlâhleipa ta y ei ta, chyhsa hluhpi ta Covid-19 hriiah chipa ta eimâ chalyu ngâ kaw. He Covid-19 hriiah vâta eima nietluana liata rairuna vaw y ta, nohto ku raihriapa ta nie â tluapazy ta nie a phahla ei ta, Economy rao ta, sawhkhâ chhao ta â tymâ kaw. Cha nota Adyuhpi ei-3 na a tlô awpa hawhta reina vaw y ta, sawhkhâ nano nanopazy ta ama chariah chhaichhizy chaluah hôlô ei ta, thlazoh ama pachhihsa kaw.

Châhrasala Vâlyuhchâpa ao nahthlie tua u, “Chi khah u; nathlie teh u, moto châta thâtihpha aly y ngaitapa ei cha vaw tlôkheipa ei hih; atanoh he nama châta Dâvi khih liata Pachhatuhpa a pih haw, Beipa Krista khawh” maniah tah ta, thlalôh âchhih chaimâh dia! Krismas hmâh awpa ta nâ mâ ma? achhuah para suh vy.

 

Khataih su lia ma Krismas nâ hmâh ? : Krismas he vaw hmâh tyh pi ta, eima hlaotloh leina chhâpa miakha cha Krismas eima hmâna su he â do leipa vâta a châ. Keimo alyna su liata Krismas he hmâh tyh pi ta, cha liata Zisu y vei. Atakô Krismas he khataih lia nâ hmâh?  Krismas hmâna su dopa cha Bethlehe khih, Viachao o liata a châ. Mietaku vaihtuhpazy cha ama Mietaku vaina su tawhta thyu ei ta Bethlehe khih lâ thlai sie ei ta, Viahchao o liata Hawsaih vaw pihpa cha abôhpa ta amâ naohpa a châ. Cha hawhna hra chata, Nochhi chyhsa sopazy chhaota Hawsaih anaoh awpa ta lâhlapi tawhta Bethlehe pangaipa ta ama sie hra.  Âmo hawhta keimo chhao ta eima yna su, eima rai hriana nata hmobaozy siesaipa ta Zisu anaoh awpa ta Bethlehe lâ thlai sie suh vy. Zisu cha bei Herawdâ o liata pih leipa ta, Bethlehe liata tlao a pih. Nochhi chyhsa sopazy hawhta pavia pathlei lah pi, Mietaku vaituhpazy hawhta Bethlehe lâ sie ei sih la, cha liata Hawsaih Zisu cha anaoh ei suh vy.

 

Ahyzy nahta ma Krismas nâ hmâh? :  Krismas eimâ hmâh pado heih leina chhâpa cha eimâ hmâlâhpazy vâta a châ.  Chyhsa thokha ta chhôhkha âkipa ta Krismas hmâh achhuah ei ta, chhôhkha amâ ki leipa khiahta la Krismas chhao hmâh khoh veih ei. Chyhsa thokha ta viasa phapa, a kyhpachâpa nahta hmâh awpa khoh ei ta, a viasapa a y leipa vâta Krismas hmâh veih ei. Zisu a hlao leipa ta Krismas a hmâhpa eima hluh kaw tyh nahta ei pangiasa.Bei Herawdâ o liata Zisu a y leipa vâta Nochhi chyhsa sopazy ta Krismas hmâh thei veih ei, Bethlehe viahchao o liata Zisu y ta, cha liata Krismas cha amâ hmâh theipa a châ. Krismas eimâ hmâlah awpa dopa cha Zisu a châ.  Atakô he kô chhie kô châ ta, Awnanopa programme taopa ta Krismas he eima hmâh lei thei aw, apakhyna hnei thei khao leipa ta kô 1 daihmâ vaw y ha pi ta, pahno thai a ru kaw. He he Khazohpa ryhraopa chhao a châ thei hra. Krismas hmâ dâh thiehpa ta eimâ hmâh awpa a byuhpa a châ thei. Awnanopa zawpi chhaota a lôhawh kawpa ta Krismas eimâ hmâh tyhna he Abeipa ta a phiepa chhao a châ thei aw. Keimo deita ta y hra ei  sih la, Zisu nahta Krismas lychhihpa nata hlaotloh kawpa eimâ hmâh thei tahpa my khah ei suh u.

 

Krismas cha kheih ta ma na hmâ aw?: Kô to ta Krismas hmâh tyh pi ta, eimâ hmâna dâh tlâhpipa cha he hawhna heta a châ. Awnanopa ta programme taopa ta Achhyna o liata apakhyna hneipa nata hall liata chareipakhyna (Fellowship) hneipa châ tyh ta, kyhchhina chhaota Krismas cha hmâh tyhpa a châ. Chhôhto ta Krismas chysia nata hmo thiehpa khâpa chhâ tlyma chalei ta, Krismas noh my châta âhmie pahâh kawpa :  vaosa nata awhsa nata ngasazy ama pachâ tyh. Chadei châ vei, Krismas decoration nata  Krismas present chhao eima tao tyh hra, a pha kaw. Awnanopa programme khôlâ ta Krismas hmâna dâh chi nanopa rei awpa a y hôlô hra aw, chazy cha reih tia’pa châ vei. Khei hawhta Krismas eimâ hmâpa he ma a pha chai? Atakô châta kheihta nâ hmâh aw? Krismas hla liata “Vâ su rônah khôta a za tlô haw molei hry...” tah ta, khizaw moleina vâta nôpo pachârôh ta, riethei taopazy châta Khazohpa ta a sawchapaw hnei chhôhpa tuapa ta Krismas a vaw patlôpa a châ. Nâ zaw kheihta ma Krismas cha na patlô thei hraw ma? Sapa nata thlahpa liata hâra viavipazy nata dyhchhie rietheipazy châta Krismas kyhchhi nâ chhuanoh thei hr’aw ma? Ahy hnoh chhâ tlyma Krismas Presence na pie thei hr’aw ma? Krismas hmâna dâh pha kawpa miakha cha Krismas presence piepa he a châ. “Khazohpa ta khizaw kyhpachâ ngaita ta, chatanachata a sawchapaw matlupa pie ta” (John 3:16) tah ta. Khizaw  ta hmopie rônah chaipa a daopa cha ‘ZISU’ he a châ. Khazohpa ta a sawchapawpa a saipa ta maniah a piepa hawhta keimo chhao ta eima chyhsa heihzy hnohta Krismas hmosai piepa eima pie hra awpa a châ. Ahy hnohta ma Krismas hmosaipa na pie aw? he he Krismas hmâna dâh pha chaipa a châ. “Palôh ano lâ pahy la, ryu hmo hropa byuh khao aw vei”.

 

 

 

 

 

“CHRISTMAS CHYSIA”

~ L. Beimokhai

 

ALÂ EI-1-NA

 

(Ngiachhie Paw nata a chhôhkha a vaw lâ ei ta)

 

Ngiachhie paw          : Atakô Christmas eima vaw tlô heihpa he la a ly   awpa a châ kaw na ta tyh, Nôpih?

 

Ngiachhie nô             : Â do kaw tlai maw, Ngiachhie paw.

 

Ngiachhie paw          : Atakô cha Christmas aly n’awpa nata Khazohpa eima palyupalihna châta, rietheipazy  baona pie hr’ei sih la tahpa sai he ei palôh liata y thlâh ha tyh ta, kheita ma na pachâ hra rai Nôpih?

 

Ngiachhie nô             : (Hiehâh pâ kawna chôta) Rietheipa rietheipa sai he tah thlâh ha chi ta, khâpa ta bao sih la na tah, na ie ta ma na bao aw?

 

Ngiachhie paw          : Nâ he la aw... bie phapa raita reikhei thei awpa châ va chi. A rarai lei ta KNP chhithatuhpa rai lyu va chi, na ria na khieh tu ha.

 

Ngiachhie nô             :Rietheipa nah cha nôpy nah ma? A rarai lei ta rietheipa nah eima bao tah ei sih la, eima sawnah chysia khâpa ta eima chaleipa aw? Na iekhie ta ma na cha leip’aw ei? Lyu tua lyu tua..!

 

Ngiachhie paw          : Nâ he la khâpa rai eima rei pat’aw nah heta na hiehâh pâ lymâ thlâh ha ta. He hawhpa la pha thai vei. (Cha hawhta amâ ei ngâno na chata Apakhyna dawh vaw paro ta).

 

Ngiachhie nô             : Khâpa hmah rei byuh khao vei chuh, pakhyna dawh chhao a paro ha chuh, a vy tyh eimâ kaw pakhy hi. (Ama pano ta  apakhy awpa ta pua ha ei ta.)

 

ÂLÂ EI-2-NA

 

(Nohmeipa nata a saw a vaw lâ ei ta.)

 

Nôhmeipa saw          : Ei nâ, khatita Christmas chysia eina chaleip’aw chi? Ei viasa nah la amâ chalei khai ha, â ngia dâh sai la e....

 

Nôhmeipa                    : Eidao, atakô la eima riethei tu ha ta, cha hleikhô ta na paw ta maniah â vaw pahâsai pâ lao ta, a tao n’awpa raita pahnothai khao va na. Chalei leita tlâ y si e?

 

Nôhmeipa saw          : (Thata chana chôta) Be be, byuh vei eina chaleipa vei khiah chi ta la e, a pei kaw aw.

 

Nôhmeipa                    : Ei saw, na pahnothai vei dâh la aw.. (A ru lâta a mothlih a hru ngâkaw ta). Hneipa châ sala, khazia ma ei chalei vei aw ei dao...!

 

Nôhmeipa saw          : Na hnei thlâh khaw, hmo na zuah ngâthlâh khaw.

(Cha hawhta amâ eichhia ngâno na chata, a viasa nahzy cha â vaw ngia ei ta).

Viasa 1-na                    :Keimo la atanoh Bazar lâ khy pi ta, chysiazy eima chalei hnasa, â khy hra lei chi ta..

 

Viasa 2-na                    : Kei la naw, Barbie zy, Jeans chaopasypa zy chhao ei chalei. Na vaw charei tita ei cha pahmô sy.

 

Viasa 1-na                    : Nâma zaw khatita na kaw chalei hra aw? (A nô ta â vaw chhy ta).

 

Nôhmeipa                    : Keimo la eima riethei tu ha ta, atakô la khâpa hmahta â chalei thei aw vei.

 

Viasa 2-na                : Keimo la ei pâ zy ta miah ama dao kache ha ei châ..

(A viasapa nah chata puasai ha ei ta).

 

Nôhmeipa                    : Eidao, avy tyh. A vâ pakhy hra si e. (Apakhy awpa chata pua ha hra ei ta).

 

ÂLÂ EI -3-NA

 

(Ngiachhie paw nata Ngiachhie nô a vaw lâ heih ei ta)

 

Ngiachhie nô             :  Eima paw, atazâ eima Speaker biereipa kha dia maw eina pahnie ngâsâ..!

 

Ngiachhie paw          : Kheihawhpa a reipa kha maw? Cha tlupo ta cha vaw  pahniepa cha?

 

Ngiachhie nô           : “Christmas chysia,  rietheipazy châta” , tahpa lâ a heihpa     ta a reipa kha tlai maw...!

Ngiachhie paw          : A yzie cha rietheipazy bao awpa cha na vaw paryhsa ha hra tahna a châ naw?

 

Ngiachhie nô             : Lialô cha la, ei paryhsa kache ha bâ. Ei vaw pahnothai lei tu ha. Abeipa ta byhnâ hluhpi maniah a piepa tawh heta chyhsa   châta byhnâ châ hra tua si...

 

(Cha hawhta ama reih ngano na chata a ma sawna nahzy â vaw ngia ei ta)

 

Ngiachhie                    : Ei pâ khâpa rimâ nama vaw reih ngâkaw?

 

Ngiachhie paw          : E khai, he na nô nata atakô cha Christmas chysia rietheipazy   chaleipa hr’aw sih la vaw tah pi ta, nâmo zaw kheihta nama pachâ hra tly?

 

Ngiachhie nawhta: Kei la a pha ei tah kaw. Tao cheingei sih la ei khoh. Â uh, nâ zaw kheihta na pachâ hra?

 

Ngiachhie                    : Kei chhao tao cheingei awpa ei khoh.

 

Ngiachhie nawhta: Cha khiah ahyzy eima bao aw?

 

Ngiachhie      :Eima khih chao lâta  nôhmeipa nah khi na kei la za bao ei sih la ei khoh kaw.

 

Ngiachhie nawhta  :Kei chhao âmo haona ei khoh hra khi. Ama riethei hleikhô ta, ama   pawhrâhpa ta thisaih pâ lâlao heih ei ta, ei ngia na eina chhie kaw tyh ei.

 

Ngiachhie paw          :Cha khiahta la â chhuah t’u. Atahmâ za bao lâlao ei s’u, eima rai a tly via nota.

 

(Ama zydua ta thathyu kaw saipa ta pua haw ei ta).

 

ÂLÂ EI -4 –NA

 

(Nôhmeipa nah a vaw lâ heih ei ta)

 

Nohmeipa saw          : (Palôh pasa kawna chôta) Kei nô, Christmas chysia cha hneithei tlai va na mâ?

 

Nôhmeipa                    : Eidao, na pachâthai thlâh tyh  khaw e, eima nie awpa hmahta eima  chaheih daihmâ ha tyhpa he!             

 

Nôhmeipa saw          : Ei nâ, cha hawh khiah, atahmâ he Khazohpa hnohta thlahchhâpa ta hiah ei sih la, Christmas hlâta miah a pie hmâ khao vâ ma...?

 

Nôhmeipa                   : Ei saw, eidao, keima thaileipa a châ. Thlachhâna ta Khazohpa hiana châh rai ta vaw pahno leipa na ta. Eima pano ta thlah cha chhâ thlâh ha tua si e..

 

(Thlah ama chhâ ngâno chata, ochhi vaw chakhyh ei ta)

 

Ngiachhie paw          : Nama y ma?

 

Nôhmeipa                   : Eima y thlâh ha ny, vaw charei t’u.

(Ngiachhie paw nata a chhôhkhazy cha ama zydua ta a vaw ngia ei ta)

 

Nôhmeipa                    : Atyuna phapa chhao hnei ma pi hi. Â ryhna lia maih khata avaw tyu thlâh ha t’u.  Khâpa rima e, atazâ cha nama chhôhkha ta nama za charei thlâh haw? No-âh lâta dia maw â chhi!

                                                                                                    

Ngiachhie nô             : Atazâ la he Christmas zy a vaw hnia ha heih pi ta, chahrânaihta  nunu he tlawkha-tlawno chhâta bao awpa vaw khoh hra pi ta, a hluh mawh la hluh vei, cha deikua eima chakaona hawhta miah pachâpa thei u la eimâ ly kaw aw.

 

Nôhmeipa                    : Cha, a ly nama pachhihsa dâh cha la aw! Khazohpa ta eima thlahchhâna miah a chy-eih chatlie dâh cha i..Atahmâ kha eima pano ta thlah eima vaw chhâ ngano ta namâ vaw ngia pâ bao. Halleluia Amen!!

 

(A saw chhao cha  â ly ngâsâ ha hra ta)

 

Ngiachhie paw          : Chakhiahta la eima zydua ta Bei Zisu thlahchhâna miah a pachupa hawhna khata thlahchhâ ei sih la, eima daihti tlâ eima pachhâ u khaw e..

 

(Ama zydua ta a duah ei ta, thlahchhâ ei ta)

 

A CHHÂ HAW.

 

 

 

 

 

EIMA MY THEI LEIPA DAIHTI

 

~ Laicho Nôtlia

 

Khazohpa chhihthana ta 10th Pachawh, 2020 (Good Friday Noh) kha, ei Kô 80-na kô nata noh a châ. Abeipa liata  alynabie ei reih. He kô 80 ei vaw sie chhôh liana heta alyna, thaphana, thadâhna nata pachârôhna, rietheina, rairuna hluhpi a pahlaopa ta ei vaw sie lymâ. He daihti chhôh liata ei my thei leipa daihti sâkha cha, 19th Di, 1957 nata 28th Di, 1957 chhôh he a châ.

              Shillong Government High School liata Class VI eimâ ezâh khai tawhta, khih lâ chhuti awpa ta ei chhuahnoh khai sie n’awpa phusâ chhao ei pâ tawhta hmô ha na ta, ei phusâ byh (purse) liata veivâ khao lei awpa ta, cho tata ei paso ha. Cherrapunjee liata Bible â chupa, ei puh p’enawh satlia KT. Nocho nata satlia Ithra Tluma zy ta Shillong liata keima nata thyudyupa K. Thailu zy pi cha khih lâ sie khoh awpa ta miah ama vaw hrua pâ. Eima yna Earle Hostel liata a pachia pi ta, sie n’awpa kyh a châ. Aizawl tawhta Lunglei Jeep kiana mâ he Rs.25 dua a châ, he chhao he a sôh kaw tyh. Hostel liata eima thla kha mess (nie mâ) he Rs.25 a châ. Rs.25 he eima khotlâpa chalei tah, Aizawl tawhta phei ta tlâ sie awpa kha, eima kho raohpa a châ hapa vâta, Rs.25 khata Shillong Bazar liata khotlâpazy cha tlao eimâ chalei khai ha.

              Dt.19.12.1957, 6 A.M ta Shillong tawhta Assam State Transport (Bus) ta za sie pi ta, Guwahati cha my dawh 9:30 A.M rachhôh ta eima za tlô. Guwahati tawhta Silchar lâ sie awpa Rail cha Pandu tawhta zâlâ ta kaw tlô awpa châ ta, Rail Station liata eima hâ thlâh ha. 4 p.m rachhôh ta Rail cha kaw tlô ta, 3rd Class Compartment cha ama bie khai thlâh ha rô. Compartment to rô moh lai pita, chyhsa bie khai thlâh ha sai ei ta he vâta sâkha liata tlâ eimâ hnaoh hra. Pandu tawhta â khypa thokha cha azia ei ta amâ mô. A hluhpi cha eimâ duah. Lumding tlô pita, eimâ duapa cha ei rie bâh vaw thei pâ ha ta, â mô penawh sahlao cha â hrâhhnao ei na ta, ei pathyu ei, ei chaisaihna liata chaizôh apataoh na ta, Cowboy lakhu phiapa liahsa ei khupa vâ tlyma, thokha cha na chi kaw ei ta, thlai ama thyu lymâ. He vâta atyu n’awpa a kaw y laih, thokha a tyuh laih ei ta, kei cha a tyuh khoh va na. A duah p’enawh sahlao kha cha einâ ly kaw sai ei. He nota pakha â ziapa kha a vaw hra ta einâ vaw hryuh. Kawh kha kawh no a chho na ta, mongyu reih ei thai tu leipa vâta palie khao leipa na ta, cho tata ei chalih ha.

              Vâsâ ta Silchar cha my dawh 6 p.m pa rachhôh ta tlô pi ta, zâ chhôh zydua ei duahpa vâta, Beri-Beri vei pâ pi ta, ei pheipai he pua a thloh ha. Silchar liata Badam heipa chalei pi ta, cha cha nie pi ta, a thlohpa a vaw zy laih, a vaw pha kaw bao! Silchar tawhta Bedford liata kaw sie pi ta Aizawl eima kaw tlô. Aizawl tawhta cha eima hmo chhaota phei ta zua vaw sie pi ta chhutla chô ta chakhâ kiahpa ta Sialsuk cha eima tlô. Tlô o thlai vaw zyh pi ta, kei cha dyh 13-na liata vâsâ ta zua eina patlôsa ei. Opy liata a tyuh na ta, ei sie lâhpa hry liata pakha cha, tlô o hmô mâh leipa ta, a hmo chhaota â khie laihpa cha ei za hmô thei. Ei puhpa KT. Nocho tlôna O kha sahma zuahpa vaw châ ta, he vâta angia a ryh leipa ta, Khazohpa Noh chhao châh khao leipa ta, nie khai tawhta eima vaw sie lymâ heih.

              Atanoh tawhta cha eima pheizy vaw pasa pathao ta, eima byh zy miah a hrei pathao ha. Dusaw tata vaw sie hnolo lymâ pi ta, Thenzawl cha zâlâ noh tla hlâ tata eima vaw tlô. Thenzawl eima tlôpa cha, tlô o thlai zyh lymâ heih pi ta, eima zydua ta tlô o eima hmô thei khao vei. He vâta daoh sâkha liata kawtai sôkha chalei pi ta, sie lymâ heih pi ta noh a tla pâ hapa vâta thothihpa liata hlachâh hna lâpi liata phaw  pi ta eimâ zia . Eima nodi pahla n’awpa ta kawtaih kha thlai chaih pi ta, buakha pha a vaw tah nahta eima dâh thlai vaw phi ta,  eima zydua ta meihreipeih tao pi ta, myta eima sie n’awpa lâ kha, ti a y ma, eima tlua lyma. Vâropi sie pi ta, ti a y leipa vâta vaw kua lymâ heih pi ta, eima dâhphi ngâsâna chôta a zia heih pi ta eima riethei-khaotupa vâta zua a vaw mô pi ta, my khih vaw deihpa hmia eima hmôpa cha eimâ ly kaw sai.

              Nodi kawpa chhaota mel 9 eima sie tawhta Phulpui khih zua kaw tlô pi ta, pati thlai eimâ hia lymâ heih. Keima nata ei puhpa hra, KT. Thailua cha o kha liata kei hiah khoh pita o chhôh liata nô pakha cha thai vaw sa ngâ hai  ta, he he siku hyutuhpa lahpinô a vaw châ. Vaw pha ngâsâ ta “Aw, beih liana kha lao y aw ta, Ukâ(kaubel) liata bietie kha hâti nah ama vaw bâh tita amâ hmie awpa tlâ nama pahlôh bâ aw”, miah tah ta eimâ lyzie nata eima nodizie kha po â kho thlyu aw. Chapawsaw, eima nodi pâ tlai ta zua eima vaw niepa cha lao chhao tihâh chhao phie nôh khai pi ta cho tata chhiehruh pi ta, alynabie reih pi ta eima pua para syulyu ha. (Nohchhô) ama sawnah vaw bâh aw ei ta, beih ruapa tlâ ama hmô bao aw, châhrasala âmo cha o lia a ypa tlâ châ ei ta, keimo kha pachâ viapa tlao eima châ via rai rai. Thai miah ama pachâ lei hapa chhaota reih awpa hnei tlai ma pi).

              Vaw sie lymâ heih pi ta, eima py cha a bie kaw, anodeikua eima phei padaohpazy vâta sie chatlie thei khao ma pi, chabiah pâ lymâpa ta eima vaw sie. Ei pahneichhi kaw tyhpa sâkha cha, Myanmar viahchao hri vaw hao ei ta, thokha a phei pasapa chabiah laih ta a siepa ei hmô nahta kha daihti liata eima chabiahpa kha ei vaw thei tyh bao. Noh tla haih ta Haulawng khih vâsâ ta eima vaw tlô. He liata a rie awpa hawhta a pachâ pi ta, eima riethei zy chhao pua a vaw pai hapa tlai cha, tlô o pakha hmahta eima hmô thei khao heih bao vei. (Zâkô kha Aizawl lâ ei sie nota Haulawng Hotel liana he pati nie na ta, tlyhmia tawhta Haulawng miavaih yna hiahri na ta, ei palôh â vaw lie pâ kaw) Ei puhpa Chera liata Bible amâ chuna liata ama viasa Rila, Haulawng miavaih liata a ypa kha a vaw thei ei ta, eima riethei-thachhâ kaw hra sala nie n’awpa nata a rie nawpa eima hnei vei tawhta cha mel 2 â hlapa chakhâ lâ cha eima kiah pathao lymâ heih. Haulawng khih hawka liata Christmas seih vaw tlô awpa a dypa satlia nata laihsa cha hluh ngâsâ ei ta, ama tha a pha ngâsâ chuh. Keimo deikua cha eima nodi thachhâpa tho ta, eima phei pasapa chabiah laih pi ta, Haulawng miavaih cha vâsâ ta zua eima kaw tlô. Satlia Rila o yna cha hiahri pi ta, eima kiapâh ta liana kha vaw y thlâh ha ta. O eimâ zâ ngiapa cha miah a vaw ly ngâsâ ei ta, sietanô pa3 pahreih ngâsâ sai ei ta, amah hmi chhao chhietu leipa ei ta ama a-dawh siphiah liata zuah zuah amâ vaw hlai hlâpa thopi pa eih bâ, viachhâ pasyupa a tao ngâ bâ, eima nie awpa bahly-maityu viah âvi etc a chhoh ngâ bâ a vaw sa ei ta. Eima sapa nata thlahpa tha a vaw dâh theizie cha, Vârâh tawtaw ama reipa hawh tlâ a châ. Mokuhpahâh ngâsâ ta eimâ mô theina chhâpa cha eima palôh lyna vâ kha a châ.

              A  mylâpa ta awhpanô a tihthla haipa sa nata tihâh liahsa pahrao khai tawhta vaw sie heih pi ta, Zâlâ dawh 4-pa rachhôh ta, Zotlang vaw tlô pi ta, ei puhpa nah KT. Nocho nata Ithra Tluma zy cha Pastor Thanchungnunga O liata tlô ei ta, Keima nata KT. Thailua cha Pihnô Z. Thangliani (Ngiachhie Nô) paw o liata eima tlô. Atazâ tawh he cha, eima o a tlô hapa hawhta eimâ pachâ ha bâ. A myla Christmas cha kei cha Chandmari, Puhpa A. Saimaw o liata ei zâ hmâh ha. Noh 3 sie heih awpa a bâh thlâh hapa ta Christmas kyhchhi cha ei dôh hra.

              A mylâ Dt.26.12.1957 ta Lunglei tawh sie heih pi ta, Tawipui khih mel 24 ahlapa cha a zoh pâ hapa ta tlô pi ta. Keima tlônapa cha tihâh vaw pachhâ ha ei ta, kaliah bâhla hmohpa he pô 3 na pie pâ ei ta, cha cha lao nata ei hmie, tihâh leipa hnaihta ei rao â taw pâ ngâ kaw. A mylâpa ta sie heih pi ta, Lawngtlai he mel 18 a hlapa châ ta, nohtla hlâta eima tlô. Lawngtlai liata Ei paw, Rahmo Notlia nah O liata ei tlô. Mylâ cha eima khih eima O eima tlo thei ha awpa vâta azo ta chhao thlai amo na ta ei thyu patoh ngâsâ. Noh vaw chhi ta, eima khih Saikao a vaw lâ ta, eima chhôhkha nata ei viasazy kha mothlaw liata a vaw lâ ta, tlô rai a ngiahtiah khao va na. Ei phei padaohpazy chhao ei my pâ daihmâ.

              Lawngtlai liana he February 1957 ta Shillong lâ sie awpa ta eimâ zâ thaopa kha Puhpa zy L. Mark nata M. Hlychho zy hnohta eima za siepa kha châ ta. Puhpa Tanmanga (Thangmawii Paw) ta Puhpa L. Mark kha, mie thiepa ta eima châh pâpa kha châ ta.

              Lawngtlai tawhta vaw sie pi ta, zyuhsy chavah liata buakha apaha pi ta, zâlâ dawh 4 p.m rachhôh ta eima khih cha eima tlô haw. Lawngtlai nata Saikao likawh he mel 24 a châ. Lunglei nata Saikao he mel 64 a hlapa a châ. O eima tlôpa cha chhôhkhazy vaw tlâh khai ei ta, kuzy a chalyu pi ta, ei Nâ ta thopi nata viahchhâ pasyupa thlai na taopa ta, a pahâh pachaipa ta ei pahno. Thopi ei do hlâta, ei Nâ hnohta, “Ei Nâ, ei y vei chhôhta khichhai dythapa nama hnei ma?” tah na ta. Ei Nâ ta, “Pachhie khichhai dythapa hnei tlâ ma pi, Khazia?” eina tah. “E… Ei Nâ nâ, eima vaw  siena liata tlô-o hnei leipa ta y laih pi ta, ei nozy di ngâsâ ta zâkha chhochhi la, nie leipa ta na râhhmâhpa liata eimâ rie. Khichhai rai rai ta dytha awpa châ vei lah y”, tahpa ta Ei Nâ kha ei chho pâ ngâ kaw.

              Atanoh kha daihti kô 63 a khô hapa, a daihti liata ei rietheina zydua tlai kha khôpheih chô tawhta ei za rohpady thlâh hapa cha, lohlie n’awpa sai a vaw châ thlâh ha bao!! Ei puhp’enawh pa 2 chhochhi cha he khizaw rietheina, nodi-dâhphina, khichhaina râh he vaw puasai khai pâ ha ei ta. Keimo chhao tlai khatita ma cha he a hlô leipa, chhôhto ta achhaihna râh he puasai hra aw pi ta. Chhaihna râh tlai chhao he, hnopoh hawhta lohpa tlâ a vaw châ hra bao aw.

 

 

Source: Board of Mara Literature, MADC, Siaha.

 

 

 

 

 

 

 

 

 

 

 

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II