Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue August 2021



Editorial

 

               Chah, Covid-19 rimâ cha la, khizaw kaohki, India maw nochhi, Mizoram chho chhâna lâta a pahrâpa, Mararâh tlai chhao maniah a vaw patypamâ chaimâh na. Hla nata Bie chhao phahnaingiah kawpa ta tao hnolo ngâ kaw hra ei sih la, office zy a kiahpa hluh thei ei va, khih hro lâ paphao awpa ta paphao thei awpa vaw châ khao va, BML Office liata a hluhpi ta tlâ sohpakhy chy pi ta, daihti rypaoh pataw nahta tlâ vaw raih aw pi ta, nama pachâthaina eimâ haw hmeiseih.

              Middle School nata Primary School pachutuhpa, phahnaingiah kawpa nata veiseih kawpa ta Hla nata Bie a vaw latuhpa zydua hnohta chhao pachâthaina eimâ haw khoh kawpa cha, Lockdown vâta school zy pahypa a châ tlâ khao leipa vâta vaw raih thei mâh khao leipa pi ta, BML Office liata tlâ eima sohpakhy chy. Daihti rypaoh tua chaipa liata vaw raih aw pi ta, eima rairunazy maniah pahnokhei via lymâpa ta miah nama pachâthai kaw awpa ta eima châ haw hmeiseih.

              BML Meeting ta Mara reih aboh n’awpa nata laiseih n’awpa pachâpa ta tao awpa a vaw pathlupa nahzy atanoh taihta Lockdown vâta tao thei leipa ta y pi ta, pei eima tah ngaita. Khazohpa ta daihti phapa nata rypaohpa maniah a pie heih aw tahpa angiapâ ei sih la, khizaw hripipa, covid ta maniah a vaw pabua lei daihti liata eima zydua hriaparaohpa ta Mara reih nata Mararâh châta eima hria khoh chyu heih u khawh.

              Pachutuhpazy nata Hla nata Bie vaw pasô pakheituhpa zydua hnohta eimâ haw khoh kawpa cha, he Hla nata Bie liata papua awpa Châpaw (Article) nama vaw roh chyu heih awpa ta eimâ haw.

              Nama khih thâtih zy, nama khih chheipâh liata hmo ypatluapa, khih hropazy ta vaw pahno hra ei sala tahpa nama khoh kawpazy kha he Hla nata Bie Magazine hmâpa heta vaw palâhâh hra tuh u.

              Eima zydua hriaparaoh leipa ta la Mara reih nata Mararâh, eima chi nata pho he abohpa ta hmahsie thei aw vei.

 

 

 

KRIZYHPA HLA BU

 

~ Laicho Nôtlia

 

               Krizyhpa Hla Bu, Edition thiehpa pachhuahpanoh haipa he aly â chhih kawpa ta pahno na ta, pachhuahpanohtuh p’enawh chhaota a kawh via ta asaohiahna chhao ama hneipa vâta, kha hlâta Edition hropazy hlâta cha hnabeiseihna eima hnei sâh kaw. Biehrai nata Hla Bu he cha châbu hropazy hawh châ lei khâh ta, thlahpa chhâzaw hrona lâpi miah chhotuhpa hla nata bie a châpa a châ. He kyh liata pachâdâh nata khoziezy a khohpa châta tao theipa a châ tahpa ei pahnopa vâta ei hmôna dâh nata ei pahnonazie vaw roh aw  na ta, cha cha ahy reipachhiena nata thâ apachhiena hawhta eima pachâ lei awpa ta ei khoh. Anodeikua ei reihpado leipa nata pahno chheipazy liata deikua cha eimâ pachâthai awpa ta ei khoh.

 

1.                   HLA BU MOH : Eima Hla Bu moh he a thaby tawhta atanoh taihta siahliapa y leipa ta, Edition maih rô ta anano thlâh ha ta. 1st Edition tawhta 6th Edition liata kheihta ma â roh cha pahno leipa na ta. 7th Edition liata, ‘KRIZYPA HLA BU’ tahpa châ ta. 8th nata 9th Edition liata ‘KRIZYPA HLABU’ tahpa ta ropa châ ta. 10th Edition liata ‘KRIZYHPA HLABU’ tahpa châ heih ta. 11th Edition liata cha, ‘MARA KRIZYHPA HLABU’ tahpa a châ heih. He vâta pahruana ei vaw tao khohpa cha ‘Mara’ tahpa he bai a byuh hlei ma, cha leipa ta ‘Hlabu’ tahpa he roh pazao leipa ta, ‘KRIZYHPA HLA BU’ tahpa ta hmâh sih la, pha via vei ma?

2.                  EDITION KYH : Hla Bu Biehmiazy liata Edition zie nata kôzy ropa châ via tyh ta, he he eima moh pasia via awpa nata eima pado awpa a pha kawpa ta ei pahno. 1st Edition tawhta 6th Edition he cha rei awpa pahno van a. 7th Edition he Biehmiazy ropa liata kô 1966 liata papuapa hawhta â roh. He he a do leipa ta, kô 1967 tlao a châ. ‘Seventh Edition, Printed and Published by MIEC Assembly – 1967’ tahpa ta ropa a châ. 8th Edition liata Hla 448 a y tahpa ta a roh ta, châ sala Hla 449 tlao a y, cha cha –

 

‘Pakhyna tawh eima pai ti,

Beipa eima hnoh y thlâh la;

Eima o nah palôhru chhao,

Na o pathaih châ lymâ se.  Amen.

 

              9th Edition kô 1989 liata papuapa châ ta, Edition hawhta ro awpa my ha pi ta, roh pahlao leipa a châ. 9th Edition tho hmiatua chai liata, ‘Published by Evangelical Church of Maraland, Music Board Siaha, Copies 5000/1989 (All Right Reserved) tahpa ta â roh.

              9th Edition Tonic Solfa chhaopa he kô 1993 liata papuapa châ ta, chavâta Tonic Solfa chhaopa Edition he 9th Edition châ leipa ta, 10th Edition tlao a châ. Centenary Hla Bu, Edition – 2007 he, 11th Edition châ aw ta, tahmâ eima hmâ haipa he 12th Edition a châ. A vaw pua awpa he, 13th Edition a châ ha aw. Zô pha via ta eimâ chu laih awpa he a pha kaw. Chata châ leipa ta, â do ma do vei ma pachâ hlei leipa ta, a parohpa tlâ patlypa (copy)  he cha pha vei.

 

3.                  HLA BIE : Hla bie kyh he, reih hropa hla thâtih ama ropazy hmô hluh kaw pi ta, ahyhmah ta hla bie he panano veih ei, a taotuhpa/a palietuhpa paryhsana leipa ta.  Anodeikua cha keimo eima Krizyhpa Hla Bu dei he cha, a taotuhpa/palietuhpazy pahno leipa ta, khotaw ta paliepatheih pi ta, thokha thy pâ pi, eima kho viapa hlazy soh pi, eima tah thlâh ha. Thai châ n’awpa ta, “Thyutliazy pahno thai awpa ta na eima pado,” zy tah pi ta, cha chhao cha a do hlei vei. Hla taotuhpa ta a taopa/a paliepa kha, pha eima tah vei khiahta cha, Hla Bu tawhta tlâ eima thy awpa a pha. Biehmia liata, “Eima Missionary nawh hla paliepa nata taopazy deikua a châna (origin) hawhta so pakhuapa a châ laih nota, hla thokha Mara reih â do lei tu hapazy deikua padopa a châ” tahpa ta â roh. He ama padopazy he a origin nata moh sih la yzie â lyu khai rô thlâh hapa ama châ. Thokha lia chhochhi cha, eima Missionary nah Mara reih ama hmâpa he tlao eimâ pha leipa a lyu.

7th Edition he Rev. A.B. Lorrain Foxall a hro nota Edition pua hnôh chaipa châ ta, he he ano chhao ta reipasipasuana hnei leipa ta â pyhpa châ ta, he he a origin hawhta kei cha ei pachâ, Kô 1967 liata a pua. Eima puhpa he kô 1977 liata miah â pahâ sai. A thi tawhta kô 1978 pa liata 8th Edition he papuapa châ ta. He Edition tawhta hla bie he panano pathaopa châ ta, eima Missionary hla taopa thokha eima thy pathao pâ hra. Eima puhpa Vailipaw kha eima râh liata a y awpa chhao eima vaw khoh lei daihmâpa kha a châ. He kyh he Mara  chԩbu a puapa sâkha liata chhao hmô awpa a y.

Eima Missionary sahlao hla bie pananopa cha, kyh hro ta soh haw sih la, Rev. R.A. Lorrain hla zydua he, 194 a y tahpa Biehmia liata â roh khai. Hezy hry tawhta thokha thy lymâ pi ta, tahmâ cha hla 113 deita eima sopa. Rev. A.B. Lorrain Foxall hla 54 tawhta hla 6 thy heih pi ta, tahmâ hla 48 deita a y. Eima Pihnô Rev. L.M. Tlôsai hla deita he a ualua hawhta hla 27 cha a y. Miss Irene E. Hudley hla sâkha chhao eima thy ha hra.

Amah la paliepa eima pananopa cha roh khai tiah’pa châ leipa ta, amah la taopa cheingei eima pananopa thokhazy he moh tua sih la-

(a)               Ryureina lâ sie, hroh tlâh châ vei’ (No. 366. 7th Edition) He he 8th Edition liata thy hapa kha, 9th Edition tawhta so pathipa châ ta, a hla bie he eima moh khiahta la thata ânano.

(b)               ‘Ei paw nâ ota ei khy aw’ (No. 154. 7th Edition) He chhao 8th Edition liata thypa châ hra ta, 9th Edition tawhta so pathipa a châ. A bie thata pananopa a châ hra.

(c)                ‘Lyurâhhripa nata keima’ (No. 361, &th Edition) 8th Edition liata thypa châ heih ta, 9th Edition liata so pathipa châ ta. He hla he cha a biepa he panano tlâ leipa a châ. Anodeikua cha 7th Edition & 9th Edition liata châh 7 a ypa kha 10th & 11th Edition liata cha, châh 12 dua a châ ha bao. A chhâpa pahnopa châ vei.

(d)               ‘Khazohpa chhypa ta’ he chhao he 8th Edition liata thy heih pi ta, 9th Edition tawhta pahlao pathi heihpa a châ. He chhao he Edition hropa zydua liata châh 7 sai y ta, 11th Edition liata deikua cha châh 6 deita a y heih.

(e)               ‘Vâ pahy ta ei hmô’ (No. 413, 7th Edition) chhao he 8th &9th Edition liata thypa châ ta. 10th Edition tawhta pahlao heihpa a châ. 8th Edition tawhta eima Missionary hlazy he pananopa nata thy pathao lymâpa a châ.

(f)                 ‘Mothlih tla ta achhaihna y aw vei’ (No. 323 7th Edition) he 8th Edition liata cha thypa châ heih ta. 9th Edition tawhta dei pahlao lymâpa a châ taraw. Anodeikua cha, 7th Edition liatahpa kha châ khao leipa ta, châh 6 a ypa kha, châh 3 deita tlâ châ ha ta, cha chhao cha a hla bie phie pananopa châ heih ta, he vâta 7th Edition liatahpa he Rev. R.A. Lorrain paliepa châ, 9th Edition tawhta a chô lâ zydua he, Rev. R.A. Lorrain paliepa hawhta ro awpa châ vei, mo hropa paliepa a châ ha.

(g)               ‘Khih deih ta awhsi a diapa hawhna cha’ ( 240. 7th Edition) He he cha 8th Edition chhaota thy khao leipa ta, a hla bie dei a panano pâ laih. 9th Edition ta panano pathi heih ta, cha ualua ta 10th & 11th Edition liata cha so lymâpa a châ. He hla heta eima Missionary sahlao ama hria pasanazy miah patheisa ta, palôhlie â chhih ngâsâ. He vâta 7th Edition liatahpa he a origin chaipa hawhta ei pahnopa vâta Edition thiehpa liata eima pahlao heih awpa a châ khiahta la, tahpa vâta a bie ei vaw roh-

 

1.       Khih deih ta awhsi a diapa hawhna cha,

Ama khaihna cha noh thlaraw lia lei;

Cha hawh khizaw hriapasa tawh sie khoh pi,

Eima taona kyh vâ theipa ta y.

 

              Eima taona kyh, eima taona kyh,

              Eima taona kyh vâ theipa ta y;

              Cha hawh khizaw hriapasa tawh sie khoh pi,

              Eima taona kyh vâ theipa ta y.

 

2.      Miah ama vâ ma. Mo hro miah thla hra la,

Lyu eima tu chiehpa ama hria aw;

Y chi tu p’enawh hriapasa tawh sie byuh,

Eima taona kyh vâ theipa ta y.

 

3.      Hro chhôh bie hmeiseih eima reipazy kha,

Khizaw liata chi eima tupa dei;

Hezy sie laih aw, keimo miah my khai no,

Sâh hriana theizy eima tao no chhao.

 

4.      Hy miah Pachhatuh lôsôhzy pakhy no,

Thapha lakho thlarawpa hmô tawhta;

Cha ti ano deichhy p’enawh ngâchhihzy,

Ama zydua ta theipa ta y khai.

 

              Mizoram Press nata Baptist Awnanopazy cha ama Missionary hla bie he biekawh (word) kha chhao pananopa khoh veih ei. Pamosana hla sâkha No. 130 –na, ‘Isu Vânah a awm a, Khawvelah zuk lo kal a’ tahpa hla, Puhpa Ch. Saprawnga ta a comment dâh cha, “He hla hi Zosap te sak lar ber a ni a, a thute paw a la sek teng tawng hle hi” (Ka zin kawng; Page 35) tahpa ta a roh. Keimo châ sih la eima panano khai heih thlyu aw. Âmo deikua cha ama Missionary hla, 148 a ypa he a ualuata sai ta ama soh. Ama padopa y chhôhpa cha, ‘Isu’ he ‘Isua’ ama tah.

 

4.             HLA MIAKHA BIE Â LYU LEIPA (Thokha) :

 

(a)   7th 8th 9th &10th Edition : Vâ lia ao rôhnahpazy chuh.

       11th Edition : Vâ lia ao rôhnah pyu paro.

 

(b)   7th 8th & 11th Edition : Hrona viahchhâ Beipa ei chheih mah y.

     9th & 10th Edition : Hrona viahchhâ Beipa vaw raih mah y.

 

(c)    7th Edition : Zisu mohta hyrai pahkhu paneih tyh.

8th 9th & 10th Edition : Zisu moh ahyrai pahkhu paneih aw.

                11th Edition : Zisu mohta moto pahkhu paneih aw.

 

(d)   7th Edition : Beipa ta chiahmie a tô nota daihti a lei na ta.

8th Edition : Beipa ta chiahmie a tô tita daihti y khao aw vei.

9th & 10th Edition : Beipa ta chiahmie a tô tita daihti y khao aw vei.

11th Edition : Beipa chiahmie a paro tita daihti y khao aw vei.

 

(e)   7th Edition : Khataihlâ rain oh a chhi chhyh.

8th Edition : Khataihlia rai  noh china maih.

9th & 10th Edition : Khataihlâ rai noh china maih.

 

(f)     7th Edition : Khaihna tuah thlai vaw tuah muh vy.

8th Edition : Khaihna cha tuah para muh vy.

9th & 10th Edition : Khaihna tuah, hy thlai tuah teh u.

11th Edition : Khaihna cha tuah para teh u.

 

(g)   7th Edition : Pachhatuh ota akhy muh vy. He hla chhochhi cha, Edition to, 7th, 8th,9th,10th & 11th Edition zydua Rev. R.A. Lorrain paliepa nahta a lyu tlâ leipa ta, Edition zydua â nano khai.

 

5.             HLA NUHBY SO DO LEIPA.

 

11th Edition liata hla nuhby so do leipa cha nuhby 619 –na he, ‘Khazohpa byhnâ pietuhpa nata ‘Pakhyna tawh eima pai ti’ amâ hly. ‘Khazohpa byhnâ pietuhpa he nuhby hnei vei.

Index liata châhnawh (Alphabetical order) â pazinazie taopa alyu vei. 10th Edition Index liata, ‘NG’ he ‘E’ a pazipa ta sopa a châ. 11th Edition liata dei, ‘NG’ he ‘N’ pazipa ta tlao sopa a châ heih.

Rei awpa a hluh kaw, moh pasia awpa a hluh ngâsâ hra.

 

6.             HLA PAHLAO, PAHLAO LEI KYH :

 

11th Edition Biehmia No. 4-na liata â rohpa he â do kaw. Eima Hla Bu liata hla hluhpi he cha eikha dâhdei chhao eima sa beih leipa sai châ ta. Khahawhpa kha cha Committee ta ama thy lymâ tahpa roh ta. He palôhrupa vâta eima Missionary sahlao hlazy chhao thypa a châpa hawhta pahno na ta. Chavâta khahawhpa hlazy kha cha, taotuhpazy saiheina vâ tlyma, hmia mona vâta tlyma, khokheina vâta tlyma kâ eimâ pachhiesa awpa châ leipa ta. Khazohpa reithaina, palyupalihna Hla Bu a châ, tahpa pahnona chôta, pahlao lei awpa he a pha.

Anodeikua cha tlâ tlyhny leipa ta, Hla thiehpa Bu, Tonic Solfa chhaopa hnei thlâh ha pi ta, he liata khôpa châ sala. Sa beih leipa hlazy cha, Awnanopa motor ô heta pahno thei khai thlâh ha pi ta. Anodeikua Hla Bu nuhby a vaw chyh via ha awpa a châpa vâta, eima Missionary sahlao hla eima siesai hapazy kha cha a hluh thei chaina hawhta tlao khô sih la.

Kheihta rai châ sala, Edition thiehpa, (13th Edition) vaw pua awpa he cha, Joint Literature Committee, ECM & CCIM heta riahpha kawpa nata â do thei chaina hawhta ama hria awpa  eima hnabei a seih.

 

7.              AHAWNA :

 

(1)                11th Edition Biehmia liata 1st to 4th Edition zy he eima Missionary Rev. R.A. Lorrain hla paliepa sai châ ta, tahpa a paliepa sai châ leipa ta, a taopa a y hrapa vâta, roh pado awpa ta ahawpa a châ.

(2)               Rev. R.A. Lorrain Hla 194 tawhta Hla 63 thypa châ ta, 10th Edition liata Hla 131 a y. He hla 131 tawh Hla 18 thypa (ie, 10th Edition Nuhbyzy 39; 84; 87; 90; 103; 212; 239; 263; 268; 351; 359; 448; 491; 517; 566; 572; nata 574) zy he a châ. Chavâta atahmâ 11th Edition liata cha Hla 113 tlâ sopa a châ.

He vâta Hla 63 eima thy hapazy kha cha, a copy chhao hmô awpa ru kaw bâ thei ta, 10th Edition liata Hla 18 pa chhâ he cha, khô pathipa châ sala tahpa ahawpa a châ.

(3)               Rev. A.B. Lorrain Foxall Hla he, 10th Edition liata Hla 54 y ta, he hla 54 tawhta hla 6 (ie. 10th Edition Hla nuhby – 83; 102; 237; 238; 278 nata 427) zy he thypa châ hra ta. Chavâta 10th Edition liata eima Missionary nah hla a ypa, 11th Edition liata eima thy hapazy chhâ he cha, 13th Edition vaw pua awpa liata cha pahlao/khô pathi khai awpa ta ahawpa a châ.

(4)               Rev. L.M. Tlôsai Lorrain Foxall Hla 27 –pa deikua cha thypa châ hraoh leipa ta, aly’pa a châ kaw. Anodeikua Miss Irene E. Hudley hla, 10th Edition liata nuhby 462, ‘Ei pahnopasia Zisu kei eih’ tahpa thy hapa chhao he, khô pathipa châ heih sala tahpa he ahawna a châ heih.

 



 

LITERATURE : CHIPHO ABOHNA HLEIDY

 

~ Robert B. Syuhlô

 

Indian Sociologist mohpathâh kawpa, MN Srinivas ta mohchho sâkha, ‘Westernisation’ tahpa vaw papua ta, a chhopasiana dâh ta cha, ‘Westernisation cha British ta India kô 150 hlei â vao chhôhta India Chyhsa a thaiso viapazy ta British hrozie kyh totie liata amâ mopâna khana a châ e’ vaw tah ta. Cha notla Phopi hrozie hâ alana chata India râh,  zohna ta a khu haipa cha aphana lâta chhihthapa ta, ama nôchâ hrozie atobina dâh deita a mopâ leipa ta, ama hmo pasôpa (Value System) zy cha ama hro liata vaw la pangia ei ta. Notla Phopi Literature liata pasaiphapa - _William Shakespeare, Rousseau, Machiavelli nata Russian Literature Khizaw liata pasaiphapa Leo Tolstoy-zy_ nata mo hropazy bie ropa ama reipazy nata ama theipazy chata âmo liata athata raihriapa ta, novâhna/ahrana (Enlightenment) vaw tlôkhei ta. Notla Phopizy hmo pasô chaipa, ama Literature liata a liahlôh chaina su atotuhpa, Khotalaina (Liberty), Chyhsa zydua he araohâh khai awpa ta taopa eima châ (All men are created equal) tahpa sypahmaohtuhpa ‘Equality’ nata adyhryh kawpa ta laihzaolaona (Fraternity) chata ama palôhrupa pahnie ta, a chhihtha ngaita kaw.

India râh liata Taopathina (Reformation), India khotalai n’awpa ta zawpi hriaparaohna (National Movement), Râh kyhpachâna (Patriotism) nata Pachâna thiehpa (New Intellectual Thinking) thlihpipa kô zabi 19-na liata vaw pathlipa zydua kha notla phopi Literature ti pahsopa ama dopa tawhta vaw y pathaopa sai a châ tah ei sih la reichhei tu thlyu aw ma pi.

Europe râhhlypi liata ahrana rônahpa nata khizaw panano khai hatuhpa, ‘Rennaissance’, ‘Europe Pihpathina/Pih chaneina’ ama vaw tah tyhpazy chhao kha Literature tawhta avaw thaotôpa na a châ tah leithei aw ma pi. Thaina, pahnona nata sona, chi nata pho kyhpachâna liata Europe râhhlypi liata pho to chi tozy cha avaw hra chaimâh ei ta, pho rônahpa nata hmotaotheipa lâta amâ vaw lie haw!

He Rennaissance he kheihta avaw thaopa  ma a châ tly i? Kô zabi 15-na rachhôh liana khata, hlâno chi so pho sopa, Greek nata Latin-zy ta ama bie nata hla (Literature) ama vaw ropa, chati-kôsy palâhâh leipa ta a ypa cha, Europe râh liata pasôpa ta achu chaimâh ei ta; Chi nata pho thapasana, chyhsapa zachhihna nata hmahsiena cha Chi nata Pho thapasana dopa tawhta a kaw thaotôpa na a châ, tahpa Greek nata Latin Literature tawhta amâ vaw chu na daihti nata pahnona daihti liata la, ‘A hrana’ (Awakening/Enlightenment) âmo liata patlôsapa ta, Khizaw liata pho rônahpa nata hmotaotheipa lâta amâ vaw duahpapua hapa a châ.

British ta India râh rônahpa âvao nona khata, India râh liata sôh nata thih, chyhsapa apahrâpa zydua khata, British sawhkhâ châbu sona byh liata Châbuzy kha _a vaw kho chahcheita vei ama vaw tah tyh cha maw!_ English Hla nata Bie liata pawhrâh chaipa hry liatahpa, Geofrey Chaucer, William Shakespeare, Rudyard Kipling nata mo hropazy cha British sawhkhâ ta nohtla tiah leina râh liata ama Beinarâh (Empire) hlâta ama sôh via vaw tah tyh ei ta. Ama râh avaopa hry liata amâ palaina chaipa nata Britons hmotao theizie palâsatuh chaipa ta ama vaw reih tyhpa, India tlai chhao he hmahta, ‘William Shakespeare nata a ri awpa châ ha mawh sala, Shakespeare eimâ tlyh via aw’ ama vaw tahna ama tah cha maw! Literature hmotaotheina ama vaw pahnopasia ngaita kaw tlai na!

Khâpa vâta he tlupo ta ama bie nata hla a thaipazy avaw pasôpa ma ama châ tly? Literature hmotaotheizie la ama vaw pahnopasiatu ha. Khizaw tyhreihna nata nôpo pachârôhna hry tawhta amâ nyuna cha, ama bie nata hla vaw châ ta. Adyuhna liata tiahpa ta ama y nota nata daihnypa ta ama y no chhaota, thathiehpa nata hnabeiseihna thiehpa chhaota amâ kaw duah papua heih theina cha, ama Literature pyly a châ. Khotalaina ama tlaichhai nota Literature liata hmô ei ta, ama ti nata râh hneirôna nata ama râh ta â vaopa râhzy tawhta sôh nata thih ama la pangiapazy chata thlalôhna pie thei leipa ta; ama bie nata hla liata pylyna amâ chhai ha heih tyh.

PB Shelley, Hla nata bie khizaw liata Awhsi khaih ngaitapa pakha khata, “Hlaphôh tu thaipazy (Poets) he â lâ leipa liata khizaw dâh nata phôh a taotuhpazy ama châ” vaw tah ta. Ama bie nata hla,  ama châ ropazy chata a râh zawpi hro taopathi ta, ama chi nata pho laiseihna kyh liata chhâhchabi hmiatua chaipa – reih pabohsa ta, ama pachârôh nôpona daihti liata amâ chhai n’awpa ta ama bie nata hlazy cha hmâh tyh ei ta. Cha chata thathyuna, tiamana, riahphana, adona nata ngâchhihna chhaota râh chakao khohna a sapapua tyhpa a châ. Chi nata Pho ngâchhih leipa nata riahchhiepazy ta Hla nata Bie phapa hnei beih veih ei.

Mara sawzy chhao eima pikheipa Reih cheingei ta ‘Châhnawh’ eima vaw hneina chhao tahmâ cha kô 100 hlei tlai a vaw pha ha bâ hra. Châhrasala, khâpa duahmo liata e eimâ duah tly ? Hla nata Bie, châ ta ropa eima hnei hluh leipa vâta vei mâ atahmâ taihta zyhna kyh liata chhao rai châ sala, â phawhlawpa ta eima y thlâh ha chy vei ? Hla nata Bie phapa rei awpa eima hnei leipa vâta vei mâ chi nata pho liata eima sia thei mâh vei ? Literature liata eima sipasa kawpa vâta vei mâ pitloh thlâh ha tlôh ta, hawtipa reih a cheihpa eima châ vei i? He vâna heta vei mâ eima reih he a leidia hai vei tly i?

Chi hro pho hropa Literature ahlyna chôta la, râh rônahpa tlô leipa aw pi ta, chi nata pho liata sia aw ma pi.

Eima reih a leidia ngâhaipa chôchâh liata, “Chata vâ, khata vâ” tahpa ta a ei ngâ hra ei sih la, a liahmaripa deikua cha, “Literature liata na eimâ vaw hnai tu ha” tahpa pyly he a châ ha tyh.  

He deikua thlahlôh â vaw chhih kaw - Eima reih cheingei ta ropa, Marapa pachâna tawhta puapa hla nata bie, Marapa saina tawhta ropa nata Marapa chhôhso liahmaripa tawhta a puapa pachâna aphuahluahpa hla nata bie vaw y pathao ha ta, he ahrana mei a ia ngâpa he, a ia pazao lymâ theina awpa nata, Mara Rennaisance patlôsa awpa ta, Mara thyutliapa, mylâ ta eima râh nôpaw a kaw châ awpazy, thapi phia lymâ chyu suh vy..


 

Mara reih rozie dopa


Thao (m)           : Theihluh a thao. (Adj)

Thao(r)              : Tho chhyh a thao. (Verb)

Thaoh (d)         : Tilih tawhta a thaoh, (Verb),

 A thaoh ta nota na reih leipa vâta a châ. (Adverb)

                            

Thai (m)            : Châ a thai kaw (verb)

Thai (r)              : Thai a sa (noun)

Thaih (d)           : Ti a thaih (verb)

 

Thyu (m)           : A thyu haw (verb)

Thyu (r)             : Sôh thyuna a y aw. (verb)

Thyuh (d)         :

 

Thei (m)            : A kô liata a thei y vei.  (Noun)

Thei (r)              : Tao thei vei (Verb)

Theih (d)           : Sahroh ta amâ theih tyh (verb)

 

Thia (m)            : Thiapawh â vy  (Adv)

Thia (r)              : Ti ta a thia (verb)

Thiah (d)           : Lihkoh ama thiah (verb)

 

Thie (m)            : A thie ama hlaoh  (Noun)

Thie(r)               : Seih ama thie (verb)

Thieh (d)           : He poh he a thieh kaw (adj)

 

Thua (m)           : Thua a châ (noun)

Thua (r)             : Siphiah ama thua (Noun)

Thuah (d)         : A phei a thuah (verb)

 

PALÂ TIPO THÂTIH

 

~ Puhpa K. Chatlai, Tôkalô

 

Kô 50 a khô hapa rakha tawhta atahmâ kô 2021 likah liata Palâ Tipo thâtih roh thei awpa ta hnatlâna phapa na pietuhpa eima Khazohpa hnohta alynabie ei reih. Tlohlei kawna chôta nata ei phana nata ei pahnona rakha ta Palâ Tipo thâtih he ei vaw rohpa a châ.

 

Palâ Tipo yna su nata Lyuri bâhkhâh thâtih tlâhpipa: Palâ Tipo he Phurâ nata Tôkalô likah âkhona liata a ypa châ ta, Tôkalô tawhta Phurâ lâthlôh Agriculture Link Road kiahpâh liata a ypa a châ. Tôkalô khih tawhta 6 km râchhôh âhlapa abyna su liata, lâlai kiah liata a ypa châ ta, a Tipo chhôh liata râh ahneipa rakha ei pahnona dâh hetana  heta a châ. Machâ viapa nata hmo yzie pahno viapazy ta maniah ama chhona dâh cha; Palâ Tipo cha Tôkalô râh, Palâ râh chhôh liata a ypa Tipo a châ. A Tipo yna su hmeiseihpa cha Salyu Chavah (River) tihnawh chhâna abyna su liata a ypa a châ. Lâthlôh pipa tawhta 1 km râchhôh ta â hlapa a châ.

 

Palâ Tipo chhôh liata hmohrohneipazy nata Tipo chô liata zôhri âzawhpa ahna ahneipa Water Lilyzy chhao taihta a y : A chhôh Tipo liana heta hneirôhna chi nano nanopa y ta, kô 1980-1990 rachhôh liata cha Tipi chhôh liata Parihpi Lôhnah (Diamond) ahneipa y ta, cha Parihpi Diamond a hneipa cha zâ dawh 6:00 p.m tawhta zâ dawh 10:00 pm taihta Tipo chhôh zydua âkhiekhâ ta, a chahlô tyh. He lia heta a khaihna dâh cha zâkhano ta Torch Light Cell-3 pa Eveready Battery 1.5 Cell khaihpa hawh tlaihta a khaih tyh. Chatanachata Tipo chhôh zydua cha âkhiekhâpa ta a chahlô pariepa khâ hmô tyh pi ta. Khâpa leipa hmodâh chalei awpa ta Phura lâ eima viasa sahlao ta eima sie vaw kua heihna daihti âchhyh nahta la mopha kawpa ta moh tyh pi ta, khih lâ siena châh chhao rao/pahno thai khao leipa ta cha Parihpi Diamond ahneipa cha eima moh tyh. He daihti no rachhôh heta cha keimo sahlao he sapa kôta kô 15 rachhôh eima châ.  

A khaih pha ngâsâ. He Diamond ahneipa Parihpi he âkhiena daihti cha a chavei nata chachâh ta Parihpi hropa miapalih miapangawh raihrie ta ama pazi tyh. A mopha ngaita ta, kha daihtizy kha pachâ tyh na ta, palôhlie âchhih kaw tyhpa ta ei pahno. Chô Khazohpa hmotaopazy he no-âh âchhih hmeiseihpa ta ei pahno. He Palâ Tipo liana heta kô 1990-2000 likawh taih rakha liana khata Masiah (Elephant) zy chhao hmôpa y parie hra ta, ânano kaw hrapa a châ, he Masiah sahlaozy he ama thi âdaih/ama thi chyta Tipo lâ cha pangaipa ta Tipo kiah liata thi ei ta Tipo chhôh lâ ama tla syulyu ha tyh. Palâ Tipo he Indian Zoological Surveyor zy chhaota vaw mohpasia tyh hra ei ta, Palâ Tipo chhôh liata Masiah naohzy Parih chi nano nanopazy ama y tahpa ta reipa a châ.

Tipo râh chhôh liata Pazu Pavawzy he chi nano nanopa y ta, Varâh zaw sahlao sypangawh-zakha likah heta ama chahlô tyh. Keimo chyhsapa Tipo moh awpa ta eima siena daihti lia chhaona heta Varâh zaw sahlao ta Tipo ama chahlô haipa he hmô awpa a y ngâthlâh ha tyh.

Tyhphy chyhpa chi chhao hluh kaw ei ta, a zaw ta ama y tyh hra. Tawhla Ti Pavaw chi nano nanopazy chhao hmô awpa a hluh kaw. Tipo kiah zydua he Bôhchhieh ta chadô khai ta, cha kô rachhôh cha 1985-1995 a châ. Cha no rachhôh cha Chô Khazohpa kuhria ta hawhta a yna daihti a châ.

Tipo chhôh liata Zôhri ahna ahneipa cha Tipo chô zydua liata âzawhpa ta Tipo cha khu ta, Chô Khazohpa ku hria a châna hawhta a pangia/palyupalih ngaita. Atahmâ taih chhaota hmô theipa ta a y hra Water Lily chhaota. Abeipa Khazohpa hmotao rônahzie he Palâ Tipo hneirôhnazie heta a chhopasia ngâsâpa ta ei pahno. Kô 15 eima châna daihti ta cha he Palâ Tipo su he keimo richâh kha viapa sahlaozy cha Saturday nohta Tihâh/Âhmie lasipa tluana daihti ta eima hmâh tyh. Tihâhzy a kiah liata a ypa cha  Ridy, Meibu, Âkha , Iahtlâ, Chhyhkao, Theisaihpa, Theipawkiahpa, Dynô etc. cha leipa chhaota Ngadipa Tipo chhôh liatahpa cha Keipa ta eima thua pâ ty hra.

Cha no rachhôh cha Rest House miakha y ta, cha cha Tôkalô daih lâta a ypa a châ. MADC ry tawhta Balyh Tho ta taopa miakha y ta, cha no daihti liana ta cha Siaha lâ tawhta eima Politician C.E.M, E.M etc nata Official hropa D.C, B.D.O nata Tourism tawhta Tipo moh awpa ta a vaw tlô awpazy ama y khiahta cha Tour eima hmô khiahta cha Students, Head Master, Teacher nata Hlasa thaipa thokhazy chhaota eima za ydy tyh.

Tawhta hmo miakha ama reih tyhpa Tipo asaih nata yzie ahnei hmeiseih hra. Tôkalô daih lâ a saih khiahta cha Tôkalô baih lâ Kahrao hriabu a chahra/a hluh. Palâ daih lâ a saih khiahta cha Palâ lâ kahrao hriabu a hluh tyh hra. Cha leipa chhaota Vahia daih lâ a saih khiahta cha hri nah iah a hluh hra. Cha leipa chhaota he Tipo a saihna daihti liana heta eima viasa sahlao ta sie pi ta, he Tipo saihpa hawhta âlâpa he a chô liata zôhripa hna ahneipa athuzaona daihti tlao vaw châ ta, Tipo cha a yna su lâ eima pangai/vawh nahta Tipo chhôh cha ti panôpa hawhta â lâ.

Cha leipa chhaota Palâ Tipo he chi thôh-3 ta y ta, atahmâ ta Marapa sawzy ta eima pasâhsa ngaitapa nata Mara Râh Thlalâ ta a châ ngâhaipa Tipo he a Chahpawpa (Male) a châ. A mianona liata a chahnôpa (Female) y hra ta, cha cha Mara reih ta a Pinô ama tahpa Tipo a châ. He a Pinô he Tipo hawh tlaita ti âpa o ta, a chiatlao nienaohpa ta a y. He he Miepu lâthlôh tawh ta Tôkalô nata Palâ râh lytlâh khô lâta a ypa Tipo a châ. Tawhta a tawtaw a hnei heih hra. He he Tipo a Pinô khô lâta a ypa châ ta, he Tipo Pinô nata a tawtaw râh chhôh liata Lyurâhhripa a pahrâpa deikua cha a hiachhie ngaita. A kiah liata Khâchhao hna zy, Basuhzy y ta, chazy cha a su liata cha nie theipa a châ khai. O lâ deikua â phao thei’pa châ vei. Âphao chhuahpa ta eima la/lyu khiahta cha sie sie pita cha Basu thih nata Khâchhao thih lia cha eima tlô pakhua lilaw heih tyh. Cha leipa chhaota Pasaihpha Sa aka thaipa thokhazy rei dâh ta cha Tipo Pinô nata a Tawtaw yna su liata Râhsazy cha ka tyh ei ta, châhrasala meitheilô a  sievawna chhao hmô thei veih ei. Ama reih leita ta khih/o lâ ama vaw tlô heih tyh.

              A chhâ chaina liata cha he Palâ Tipo he Marapa Râh hneirôna a châ hleikhô ta moto Marapa saw zydua chhaota phahnai ângiah kawpa ta mohôh chyu ângiah hmeiseihpa ta ei pahno. Râh hropa chyhsazy chhaota maniah ama uahva kawpa Tipo a châ hra. A hneituhpa châna he khâchâ â thei thlâhna chôta Tipo chheipâh liata khih a ypa zydua nata Marapa saw zydua chhaota Marapa Râh hneirôhna a châ tahpa pahno thlâhna chôta Râhsa, Pazu, Pavawzy he pabohsatuhpa châ âchhuah chyupa ta Palâ Tipo he eima mohôh â ngiah/a byuh hmeiseihpa ta ei pahno.

              He leipa chhaota MADC Environment & Forest Department hmahlana bie zyh chyu awpa ta eimâ hrua hmeiseih hra. A chhâ chaina liata Chô Khazohpa Ryuto he alynabie reina châh pahnona chôta Marapa manôh zydua ta apyh thaipa ta, Abeipa lâ khatino raita alynabie reih chyu suh vy.


 

Mara reih

eima roh pado lei viapa thokha

~ HC. Malsawmthanga.

        

Mara Alphabet

              Mara reih Alphabet â vaw thaotôna dâh he eima pahno hra rai awpa ta a chyuta ta he hawhta ei vaw palâsa tua aw. Mizoram nata Chin State (Myanmar) chhôh liata chipho hropazy Alphabet vaw hnei pathaona kôzy chhao vaw palâsa na ta, Mara reih he uhthei chaipa a châ zie nata Khazohpa ta hmia miah a vaw pasah laihna zie na pahnothei aw. Mara reih Alphabet vaw tao kô nata taotuhpazy cha he hawhta a châ:

1). Capt S.R. Tickell – 1852

2). Capt Lewin – 1869

3). Rev. F.W. Savidge – 1908

4). Rev. R.A. Lorrain – 1908

Mizoram nata Chin State (Myanmar) liata chipho hropazy Alphabet hnei kô nata taotuhpazy:

1). Mara (Capt S.R. Tickell) – 1852

2). Mizo (T.H. Lewin) – 1874

3). Lai (A.G.E Newland) - 1897

4). Laizo (Rev. Dr Herbert Cope) – 1924

5). Khami (Rev. Lyman Stilson) – 1949

             

Mara reih rozie liata eima pado lei viapa thokhazy

              Marasaw châro pahâhpa (writer), pachutuhpa, Officers, NGO’s chhihtuhpa nata châthaipa â tahpazy taihta eima roh pado tyh leipa hluhpi a y tyh. Châbu nata Châpaw (Article) thokha zy, Office tawhta châ papuapa thokha zy, khih-liah liata Sign Board eima tawpa thokhazy cha rei pahâh thei lei awpa taihta ado leipa a châ tyh hra. Mara reih eima rona liata eima pado leipa alâluah viapa thokha vaw palâsa tua ei sih la.

              1.Nata, na ta, nahta, nah ta: A hmâ n’awpa reizie ta pazao awpa nata pazaolei’pa; ‘h’ bai awpa nata bai lei awpa ta yzie a hnei khai. Pamosana tawhta eima pahnopasia thei aw:

              1). Byhnâ nata Beibei; alyna nata hnabeiseihna etc (Conjunction)

              2). Lyu lâ sie na ta; pati nie na ta etc (Pronoun)

              3). Kei ei sie ha nahta cha ano â vy aw; a kho lei nahta cha tao n’awpa y vei etc(Verb baotuhpa/Adverb of time/Conjunction)

              4). Nah ta thei pi ta; England nah ta cha he hawhta ama tao tyh etc (Noun &Pronoun)

              2. Pi: ‘Pi’ he Pronoun nata Verb châta hmâpa liata cha khei hawhpa biesâ (word) nata hmahta pazao lei awpa châ ta; pazao n’awpa kao he a chyhta deita a y. He hawhta pamosana vaw tao tua sih la:

              1). Sie ma pi; Sie pi ta etc (Pronoun)

              2). Hawsaih ama pi tyh; he chyhsa he a pi kaw etc (Verb, Adjective/Adverb)

              3). A pipaw kaw na; pitlohpa, eikhapita etc (Adverb)

              3. Châhrasala/châ hra sala; anodeikua/ano deikua: Châhrasala nata Anodeikua zy he Conjunction châta hmâpa liata pazao khai awpa châ ta, Pronoun chhopasiana lia deikua pazao lei awpa a châ. He hawhta:

              1). Khoh na ta, châhrasala hnei thei va na; Pha taraw vei, châhrasala eima khoh pyly etc (Conjunction)

              2). He paw he M.A châ hra salathai tu vei; He alô he châ hra sala ei pakei pyly aw etc (Adjective)

              3). Sie awpa tah pi ta, anodeikua sie khao ma pi; Pha taraw vei, anodeikua eima khoh ha tyh etc (Conjunction)

              4). Kei sie na ta, ano deikuavaw sie vei; He nô he pha ta, ano deikua kha la pha vei etc (Pronoun)

              4. Vana: He liata ‘na’ he Pronoun châ ta, pazao lei awpa a châ.  Noun nata biesâ hropazy lia deikua pazao awpa a châ. Pamosana ta:

              1). Sie va na; Khoh va na etc He he Pronoun châ ta, pazao lei awpa a châ (Computer liata eima chhuh (type) tita ‘Van a’ tahpa ta Automatic Correction y tyh ta, he he pado tyh â ngiah).

              2). Ngiapâna, Phana, Narô etc

              5. Châta, châh ta, châhta: He chhao he eima hmâh pahlao kaw tyh. He hawhta pamosana tao sih la, eima sia thlâh ha aw:

              1). Keima châta cha a pha kaw; Râhsazy châta cha sôh vei etc (Postposition)

              2). He he Parih châ ta; He he Vao châ ta etc (Adjective)

              3). A châhta ta cha ei charei tyh hra (Adverb of time)

              4). Ei hnei lei châh ta (Adverb of time)

 


              6. Einâ/ei nâ; eina/ei na: He chhao he eima pazao chakhyh khai thlâh ha tyh.

              1). Ano ta la einâ thei ngâthlâh ha tyh; Eina my ha chi ma? etc (Pronoun)

              2). He he ei nâ a châ; Chho ei na ta etc (Noun & Pronoun)

              7. ‘Yu’ he chyhsa thokha ta a hmâna eima pado lei kaw. Pamosana ta:

              1). A lyu tah awpa liata, a tahpa zy;

              2).Lyu lâ ei sie tah awpa liata, lô lâ ei sie tahpa zy;

              3). Palyupalihna tah awpa liata, palôpalihna tahpa zy etc

              8. ‘bi’ nata ‘bie’: He chhao hih thata eima hmâh pahlao hra. ‘Bi’ he cha ‘Ei moh bituhpa cha Laila a châ; He su he AOC Vaih tahpa ta ama bietc tahpa liata eima hmâh. Bihrai tahpa zy, bi nata hla etc tahpazy he a do vei. He liata cha ‘Bie’ tahpa hmâ awpa a châ. ‘Ie’ hmâna he a pahnothai mâh leipa eima y hôlôpa a lyu; thokha ta ‘thiehpa’ tah awpa liata ‘thipa’ tahpa a hmâh thlâh ha chypa chhao eima y.

              9. (’) so byuhna kyh: Apostrophe (’) he soh leipa ta châ eima roh thei taraw nota châropa rei pha via n’awpa nata rainao via n’awpa ta eima hmâh tyh. He hawhta Apostrophe hmâ n’awpa biesâ hmâh tlôh pi ta, a sona awpa eima pahno khao lei nahta cha eima châropa kha a do khao vei tahna a châ. Pamosana thokha vaw palâsa tua ei sih la:

              1). Hlaotloh theina awpa ta – Hlaotloh thei n’awpa ta (nawpa ta tahpa ta eima roh thlâh ha tyh)

              2). Pahno thei awpa châ vei – Pahno thei’pa châ vei (theipa tahpa ta eima roh thlâh ha tyh)

              3). Tao beih aw va na – Tao beih’ va na (beih va na tahpa ta eima roh thlâh ha tyh)

              4). Tao hra awpa a châ – Tao hr’awpa a châ (hrawpa  tahpa ta eima roh thlâh ha tyh)

              10. ‘A’ nata ‘Â’ bie hmia liata pazaopa (prefix) nata a hnôh lâta pazaopa (suffix): He he aphapa ta pachâ pasia tua leipa ta cha hmâ chhei a vaw nao kaw. He hawhta pamosana pie ei sih la eima sia thlâh ha ngyu aw:

              1). He hmo he apazaopa a châ; he hmo he a pazao vei.

              2). Apôhkhana a peimawh (â ngiah) kaw; He nah he a pôhkha thei veih ei.

              3). Aly kawpa ta y teh; A ly vei.

              4). Aphapa ta y teh u; A pha  kaw.

              5). He hmo he angiana rai hnei vei; He hmo he a ngia  tlai vei.

              11. ‘Â’ he thata eima hmâh pado lei pathao ngâkaw: He chhao he kaokâh reih ado leipa tawhta a râh vaw kawh laihpa châ sala a lyu kaw. A hmâna hluhpi a y nota a hmâ lei n’awpa lia taihta ahmâhpa eima hluh kaw. Pamosana ta:

              1). Apakhyna (Âpakhyna)

              2). Achhyna (Âchhyna)

              3). A ly â chhih kaw (Â ly â chhih kaw)

              4). Eima châ ly (Eimâ châ ly)

              5). Amâ ly kaw (Âmâ ly kaw)

              6). A vy teh u (Â vy teh u)

              7). Angia pasaipa châ vei (Ângia pasaipa châ vei) etc

 

Reih hropa ta phopa Mara reih

Reih hropa ta a pho hapa Mara reih/mohchho a hluh kaw. Mara reih liata a y thei ngâsâ leipazy cha kao nanopa ta soh’ sih la, a y thlâh hapa nata a y theipazy he cha hmâh thei lymâ sih la a pha kawpa ta ei pahno. Hmo pachâ pazi hoh hlei leipa ta ‘A pha laih bao’ na’ sai eima tah thlâh hapa vâta, Mara reih ta phi chhyh thei awpa nata a y thlâh hapa, alâluah leipazy pho hropa reih ta eima paphosa/padihsaosa khai ha tyh.

Tlaikao nah ta ‘Chiah’ ama tahpa he eima reih hawh tlaita eima hmâh tyh. Pamosana ta: Ei nie khai chiah, Ei thyu chiah etc. Mara reih ta he hlâta angia viapa ta hmâ n’awpa a y thlâh hapa tlai; Pamosana: Ei nie khai ta/ Ei nie khai dyuta, Ei thyu ta/ Ei thyu dyuta/ Ei tao khai sikhua etc. ‘A nuam dâh la e’ tahpa hlâta cha ‘Â tluatlâ dâh la e’ zy tah sih la pha via ta, â do via hra bao.

‘UAR’ tahpa chhao hih eima aoh liata â chhaoh via ngâkaw. He hawhna heta hmâh achhuah lymâ sih la, a pha thai vâ ma?

1). Na Uar kaw na = Na parawpachaw kaw na.

2). Atobina a Uar kaw = Atobina a tlaichhai kaw.

3). Nâ tobina dâh khaw na Uar pâ tu ha = Nâ tobina dâh khaw na laothao/laikhô pâ tu ha.

4). Uar kawpa ta hla sa t’u = Khopahâh kawpa ta hla sa t’u.

5). Hla a sana dâh a Uar pâ dâh la= Hla a sana dâha laikhô/laothao pâ dâh la.

Maw nah ta ‘HO’ ama tahpa chhao hih, eima reih khiama thyudyupazy pi ta cha eima tah thlâh bâ he zaw. Mara reih a hneirôh dâh la vaw moh heih tua rai si:

1). Na ‘ho’ kaw na = Na lualâ kaw na.

2). Na hrozie hi a ‘ho’ tu ha = Na hrozie hi â zawvaw tu ha.

3). A ‘ho’ tu chuh = A chyhnawh/nawh-raih tu chuh.

4). Bie ‘ho’ tupa reih khao kha = Bie thuthâ leipa reih khao kha.

He hawhna heta hmâh laih ei sih la, Tlaikao reih hmâ ngâkawpa hlâta cha a pha via thlâh h’aw vei ma? A yzie a chhei tlâ hlei rai ma? He tawhta a vaw lâpa cha Tlaikao reih hlâta Mara reih he reihkah hneirôh via ta, ‘UAR’ nata ‘HO” tahpa he Mara reih ta eima biereipa nata taopa reizie ta reikah nano nanopa eima vaw hnei thlâh ha tahna a châ.

 

Bie pachhâna:

He a chô liata eima vaw palâsa hapazy he phie â do khai tah ngâh leipa na ta, ado leipa nata he hlâta pha viapazy chhao a y thei aw.Pahruana hawhta pachâ laih ei sih la, â dopazy deikua thai achhuah chyu sih la, hmâh chyu ei suh u.

 

“Reih he chi nata pho abohna a châ”.

 

Ei châ ly kaw ei.

 


THOBUH

PHA NGAITAPA SÂNO

 

~ Machâ A. Beikhai

 

(1)    Thobuh pha ngaitapa a pahtheipa.

(2)   Thobuh pha ngaitapa a pahthei leipa.

 

THO BÔ CHHÂPA

 

(a)   Pahthei awpa nata nie awpa.

(b)   A nohdi ry lia a pahâ n’awpa.

(c)    O nata a chheipâh pangia n’awpa.

(d)   Oxygen mia pietuhpa.

 

He alei râh liata eima hrochhôh daihti rei leipa liata, ABEIPA Khazohpa ta eima hrona dadieh kawpa miah pazao chy ta, keih eima chakâ hai nota, â ngiapa, a pha chaipa, a lâluah chaipa eima pathipalôh saduthlienazie hawhta ro (hnei) awpa âchhuahna eima hnei chyupa a vaw châ. Cha nota thokô buh pha ngaitapa, athei nie awpa nata a nohdi ry lia a pahâ awpa hnabeiseihna hneipa ta ama pangai nahta ama hnabeiseihpa hawhta thothei nietheipa a pahthei leipa thokô buh angia ngaitapa he nohto eimâ ngiapâna hro eima laiseihkhei haipa nata pakhopangapa ta eima za palâsa khoh ngaitapa a vaw châ.

              Eima hrona chiehlei ngaitapa na hrôbieh ta, kô 47-a khô hapa liata, ei hawti nota, hru ngâ kawna chôta, Primary stage ei zâ chu laih lymâna Pythôh (CL-III) kô 1973 liata eimâ chuna bu liata, Paw Machâ kô-80 hleipa ta, sahdô chhôh lia chicheipa Theihiah (Iphô) daw a bô haipa thâtih, Thyudyu pakha nata bie ama hiahrina nata amâ chhyna bie za pahripaziah laih tua ei sih la, Thyudyupa ta, “Mahpaw, he Theihiah (Iphô) daw na bô ngâpa he nâma ta athei nie daihti taih a ô thei’pa châ khao chi va, khazia na rie hiah nâ pathei ngâ kaw?” tahpa bie a chho ei ta, he Paw Machâ karôpa ta âchhyna cha, satliapa hnota, “Pâpâ y, a châ tlai tarawna, kei he thothei a pahtheina daihti taih a ôpa ta ei hrona a kaw châ khao aw vei, tahpa ei pahno thlâh haw. Anodeikua la, ei tusaw nah nata samoh sahlâhzy chhâ liata vaw nie ei sala tahpa ei saduthliena nata ei hnabeiseihpa a châ” tahpa ta â vaw chhypa a châ.

Chavâta Machâ karôpa Mahpaw palôhru liata kyhpachâna “hro” apabupa he atanoh daihti liata Awnanopazy eima hmialâ châta saduthliena eima hnei haipazy, keimo lia sona, novâhna eima hmâ haipa he mia taotuhpa miah hnabeiseihna lâpi achhih haipa eima châna hro he kyhpachâna hro hneipa ta hmialâ tôh awpa eima châzie za mohpasia laih awpa eimâ khokhei ngaitapa nata eimâ hruana a vaw châ.

Cha hawhna hra chata keimo, he alei chyhsazy miah taotuhpa ABEIPA avâ Khazohpa ta a chyhsazy kyh miah a vaw pachâna chhochhi cha khatluta a rônah aw tly? A sawchapaw matlupa ahnei chhôhpa chhao i thei (tlaichhai) thei khao leipa ta, lei chyhsa zydua eima hro n’awpa ta, thina taih kyhpachâna, Agape kyhpachâna, kyhpachâna mozohpa tlaina a vaw châ ei aw, lei chyhsazy a leidia awpa pachhâ n’awpa ta a sawchapaw hneichhôhpa miah a vaw pie pasai thlâhpa he, kyhpachana rônahpa, eima sapa nata thlahpa hro hnei n’awpa kyhpachâna, kyhpachâna kipa, ano yna su lia eima pahrâ thei n’awpa ta miah azâ chhuahdy thlâhpa he pachâ via tua rai ei suh u, he tlupo ta kyhpachâna rônahpa he Khizaw kawh ngaitapa lia tlua hra ei sih la, hmô thei’pa y thai aw vei, avâ Khazohpa deita he kyh miah pachâ ta, a sawchapaw hrona moto châta aza hlâ khaina he hla phituhpa heta a vaw hmôpasia tlai na, tah lei thei’pa châ vei, leidia awpa eima châpa miah a vaw pahronazie he a rônahna cha reithai tlâh Khazohpa a châzie, lei chyhsazy hno aza paluahsa thlâhpa he Krizyhpa nata nothlah achhy hai chy penawhzy pahno thai mâh vei hra ei sala, eima vâhneizie he thata a vaw châ tlaina tahpa a thie viapa ta pahno chanei heih awpa a pasyu pi ta, eimâ hruana a vaw châ.

                             Chavâna chata avâ Khazohpa ky hpachana cha chhâ hluhpi a sie hapa nata atanoh daihti a hmâh haipazy chhao pi eima daihti hnôh chaipa liata eima thaina, sona, novâhnazy hmâh theipa nata âchu theipa duahmo liata eima y haipa he eima vâhnei pahchaina tlao a vaw châ. Cha nota Khazohpa kyh miah pachâna, a sawchapaw Zisu Krista pasaih ngaitapa ta Vâbeidyuchhai rônahna su za siesaipa ta, he alei chhiesana lia azupa ta, a chyhsa taopazy eima hmô thei n’awpa ta, Keimo hawhta  azâ taopa ta a panawhna ziezy pachâ chanei heih tua ei sih la, a sawchapaw thisaih vâta, ano â ngiapâtuhpazy chhâzaw hrona to thei awpa eima châpa vâta aly pahchai awpa eima châ nota, atanoh Khazohpa Kyhpachâna a sawchapaw lia a za loh papuapa a chakanazie, â  dyuhnazie ta Awnano hry lia eima y thlâh ha tyhpa deikua la Khazohpa palôh pasasatuhpazy eima châzie atheipa ta pahnopasia via heih awpa eimâ khokhei ngaitapa a vaw châ.

Chavâta ABEIPA Khazohpa miah a paduana chhâ chaipa hlao patlohtuhpa eima châ chyu awpa a châ nota, thokhazy molei hmo â heihsaipa ta hmo phapa tao hualuapa ta ABEIPA ama pazi hnolo tahpa pahno pi ta, cha hawhta chicheipa Theihiah (Iphô) daw cha eima bô ha tawhta cha laiseih lymâ ta, kô 3,5,7,10 etc a pahthei tyhpa hawhta a theipa cha eima châta laiseihna eima sapa thisaih thatlôna nata hriselna miah pietuhpa eima sapa hro laisehna châta eima nie tyhpa a vaw châ. Cha thokô nohdi ry liazy a pahâna châta hmâh pi ta, eima o nata sahdô eimâ chhai nyuna châta zy, o nata o chheipâh pangiasa via ta, ngiaryh chhao â chhih kawpa a vaw châ. Cha hleikhô ta ziza eima husona nata syna oxygen miah pietuhpa etc a vaw châpa a châ.

              Cha hawhna hra chata Krizyhpa motozy chhao pi nohto eimâ ngiapâna hro a laiseih lymâ awpa eima châpa hawhta, a thei pahthei awpa ta ABEIPA bie ta miah â hnawpa nata hnabeiseihna eima vaw châ, “Keima liata y thlâh teh u, a chiah cha krezôh liata a y thlâh ha leipa khiahta la, anodeita ta a pahthei thei leipa hawhta, nâmo chhao Keima liata nama y thlâh ha leipa khiahta la pahthei aw veih ei chi.” (Zhn 15:1-5) lia eima hmô. Cha vâna chata Krizyhpa dopa cha laiseih lymâ aw ta, a thei pahthei hra aw ta Unawhzy châta kao nano liata Khazohpa thlahpa nata amâ kaolâh  vâta, ABEIPA Khazohpa chhaichhi châta aza hmâh tyhpa a vaw châ. Thâtihpha ama chakaona liata â parônahsa ta, byhnâ patosa ta, chyhsa tota pahnopa ama vaw châ tyhpa a châ. Eima unawh heihzy châta kheihawhpa kyh lia chhâ tlyma, a mopâtlâhpa, â chhaitlâhpa, thlahpalôh ta, ama Krizyhna hro deichhypa ta, tha patlôsa ta, ama hro palaiseihsa ta, a baotuhpa ama vaw châ tyhpa a châ.

Khazohpa a kaolâhpazy chyhsa hnohta ypa cha eima hrozy miah palysa ei ta, achu awpa lession hluhpi mia pie papua ei ta, eima thapha ta, eima ngiazy miah  paryh kaw ei ta, eima nie nata baw kyhzy eimâ tyuduana ytuzie hro liata eimâ ly hleikhô ta achu awpa hluhpi eima hneipa a vaw châ. Âmo vâ châ leipa ta ano lia Khazohpa thlahpa apahlao ha vâta tlao a vaw châ. Chavâta Awnano Py nano nanopazy nata moto chhao pi eima Awnano chyu liata eimâ kaolâhpazy hro eima palysa ma? Cha leipa ta tlao reipachhiepa nata hnabei a padysatuhpa hry lia eimâ hlao ma? Miah amâ kaolâh thei awpa eima châ awpa tlao châ vei mâ? Eima hnohta Khazohpa kaolâhpa eima châ khiahta cha miah ama tlaichhaina hro kha eima hnei awpa a vaw châ. Eima krizyhna ngiapâtuhpa motozy eimâ zâ mohpasia chyu awpa a khokhei pi ta, eimâ pasyupa a vaw châ.

              Cha tawhna chata thobuh pha ngaitapa a pahthei leipa hawhta, atanoh Krizypa thokha hluhpi cha eima sapa  o nata lyu nata tôhtu khihsana nano nanopa liata deikua cha  hmahsie hai pi ta, hmialâ eima tôh ngâhaipa a châ. Eimâ ngiapâna thlahpa hro lia deikua cha laiseih awpa hawhta eima Krizyhna kô uhtheipazy pachâpa ta laiseih thei leipa eimâ lyna kao hluhpi a y thlyu’na, chavâta thobuh pha ngaitapa a pahthei thei leipa nie awpa chyhsazy hnabeiseih hra ei sih la, thothei nie awpa a papua thei leipa hawhta, Krizyhpa ngiapâtuhpazy eima châ thei thlyu’na. Chavâta heihzy châta ama thlahpa hrona laiseih n’awpa ta thlahpa lâ pati a pie thei mâh leipazy hnohta, he thobuh a pahthei thei leipa hawhna heta Awnano motozy hnohta miah a vaw pachupa a vaw châ.

Eima pahthei thei mâh leipa vâta nata unawhzy ama sapa nata thlahpa lâ liata dâhphi papai n’awpa ta eima pie papua thei mâh leipa vâta eima nohdi ry liazy a pahâpa ta charei lâh awpa miah tlaichhai thei hra leipa ei ta, ama hnohta ama y no chhao ama hrozy tlao â hri via ha ta, aly thei leipa ei ta, a ziza hiahza â hri kawpa vâta, ama nohchareih lâh hoh hra veih ei, tahpa miah a vaw chho pahmôna a vaw châ. Cha vâna chata eima Krizyhna hro he heih/unawhzy châta byhnâ châ awpa eima châ tarawpa ta heihzy châta a pahthei thei leipa thokô buh phapa hawhta eima châ khiahta cha eimâ ngiapâna chakaona eima laiseih khei haina cha tlao eima rohzy chhie aw ta, heihzy nata pahrâ lâh , kaolâh khoh awpa châ thei thlyu aw ma pi.

Pheiky rohchhiepa akypa kiah lia y lâh a ru kawpa hawhta eima châ pathlei aw na. Eima pahthei thei leina cha khâpa hropa vâ châ leipa ta, keimo lia moleina raihria meihdo hawhta miah pahnypakhawpa eima pahthei khoh leina vâ tlao a châ. Cha moleina cha Khazohpa thatlôna ta eima tiah thei awpa a châ nota, keimo deikua cha eima thatlôna lia apahnieh ta tiah awpa eimâ chhuah tyhpa he eima pahthei thei khao leina cha tlao a vaw châ. Eima Awnano chyu liata moleina raihria chi nano nano vâta a pahthei thei mâh leipazy pi, hnabeidy leipa ta a pahtheisa theituhpa avâ Khazohpa lata pathipalôh hmeiseihna kyh ta, eima pie pasaih awpa deikua la eimâ ngiah ngaitapa tlao a vaw châ.

Eima hro tlokhuh eima piekhai thei mâh leipa vâta a pahthei thei mâh leipa eima châna my leipa ta, tlao a hlâ khai chyu ei suh u. Chatanachata vaw laiseih aw  pi ta eima pahthei thei chyu aw, tahpa eimâ hruana nata eimâ khokhei ngaitapa a vaw châ.

              He Thobuh sânopa he a phapa sai châ ta, anodeikua a pahtheipa nata a pahthei leipa sermon ei ropa he eima nohto Krizyhna hro eima laiseihkhei haipa liata a pahthei thei leipa thobuh phapa hawhta châ leipa ta, a pahthei theipa  thobuh hawhta eima châ chyu thei n’awpa ta nata tlohlei kaw na chôta ei theinazy papuapa ta ei ropa he a nahthlietuhpa nata a reihtuhpazy hnohta, ngiapâtuhpa a pahtheipa manôh eima châ chyu thei n’awpa ta avâ Khazopa ta nama chô lâ lia ei ropa hlâta pha viapa nata athieh viapa ta sapa nata thlahpa lâ liata a ngiachhiena vâ byhnâ cha vaw patlôsa via rili mawh ei sy. Haleluia  Amen

 


-----------------------------------------------------------------------------------------------

 

THYTU TLÂPYU

MARASAW TAWHTA

KRIZYH HMIATUAH CHAIPA

 

~ Beihrua Lodua

 

Thytu Tlâpyu he Marasaw tawhta krizyh hmiatuah chaipa châ ta, târi noh 16th September, 1910 khata Krizyh awpa ta Rev RA Lorrain hnohta moh a parosa ta, kô 19 a châ nahta târi noh 22nd December, 1918 khata Missionary pyly heta Bâti a pachâsa heih. Ano he Mararâh liata thâtihpha chho pakawh awpa ta Kraws pheisaih liata chyhsa hmiatuapa a châ hra.

Ano he Kô 1899 khata Zyhno khih parohpa SAVO Khih liata vaw pih ta, a paw he Liekô châ ta, anô cha Khochhai a châ. Pilâhpa unawh hnei leipa ta Sietanô pano Nohchhai nata Viathlei hnei tarawpa ta vâduachhih kawpa ta kô 8 a châ nota amâ pahâsai rairie haw. Hawtipa hmah châ hra sala a vâduana a baichhi heih ta, a nô nata a paw ta vaw thisai patoh ha ei ta, kô 11 uhtheipa cha hârapa ta sanawhzy hnoh a y pathao haw. Châhrasala, Khazohpa ta ano kyhpachâtuh pha ngaita kawpa Missionary Rev RA Lorrain nah nôvah (Vaili mapaw nata manô) vaw tuah ta, âmo heta ama vaw deichhypa a châ.

Missionary nah o lia a pahrâ nona heta ama sawchanô nô Tlôsai Lorrain (Vaili Nô) he vaw palaokheipa ta vaw mokhâh tyh ta, ama vaw phahnaikhei kawpa a châ. Mission Siku liata châ achu ta, rei nata ro vaw thai ta, kô 19 a châ nahta târi noh 22nd December, 1918 khata Missionary Rev RA Lorrain ta Bâti a pachâsa haw. Thytu Tlâpyu he satlia pôraoh pha kawpa nata chyhsa riahpha kawpa a châ. Târi noh 6th May, 1926 khata laihsa hmipha kawpa Laihsa Tapawh nata ahnei ei ta, sawchanô papalih nata sawchapaw pathôh ama hnei.

 

CHÂ ACHUNA NATA CHAKAONA CHÔCHÂH:

 

Kô 1916 khata Lower Primary achu awpa ta Aizawl lâ sie ta, cha liata ama pachutuhpazy Chawnga, Rongura nata Laia zy liata Class V achu ta, kha daihti liata Siku Inspector Puhpa Pasena chhaota a vaw khokhei ngâsâ tyh hra. Aizawl liata kô 3 a y nahta Saikao lâ vaw tlô heih ta, Mission Siku lia vaw hria ta, pachutuh hmiatuapazy hry liata pakha a châ. Kô 1923 khata Siku ama chhuti nota Amôbyuh, Siaha, Amôtlâh, Thiahra nata Zyhnozy tlypa ta Krista Thâtihpha a vaw chho laih pathao haw. Mara reih lâta Biehrai ama palie nona heta Missionary Rev RA Lorrain thata vaw bao tyh hra ta, kô 1925 khata Missionary chhôhkhazy ta Mara Biehrai (Bible) pachhuhsa awpa ta Culcutta (Kolkata) lâ ama sie nota Thytu Tlâpyu nata Zahia Hlychho chhao ta ama zi pâ hra. Culcutta liata thla 6 ama y tawhta Mara râh lâ a vaw lie heih ei ta, kô 7 tlai Mission ry lia chakaona rai a vaw hria tawhta a pahâsai ha chy.  

Kô 1927 khata Puhpa Edwind Roland cha Matu râh liata chakaona raihria awpa a khohpa vâta Missionary RA Lorrain he a vaw hmô ta. Anodeikua, RA Lorrain chakao n’awpa ta râhri taipa chhôh liata a ypa vâta â ryh tah leipa ta, cha tawhta Edwind Rolland cha Hiakha lâ sie laih ta, Hiakha tawhta Rangoon lâ a pangai heih. Rangoon tawhna heta Paletwa (Phila) lâ kaw hria ta, he liana heta Puhpa Thytu Tlâpyu chhao cha a za hmô ta. Puhpa Thytu Tlâpyu, Kaite nata Buanga zy cha rai vaw pahriasa ei ta, âmo chakaona tawhna heta chyhsa hluhpi cha Pachhana hro topa ta  Krizyhpa lâta amâ vaw palie haw. Cha nona chata Church of England, London tawhta missionary Hatting, Scott nata Francis zy amâ khypa vâta Matu râh cha âmo ku liata vaw hlâ ha ei ta, chavâta, Puhpa Thytu Tlâpyu chhao cha bao khao leipa ta kô 5 tlai a hria tawhta a chakaona tawhta â vaw pahâsai ha hra.

Puhpa Thytu Tlâpyu cha raihria leipa ta a y thlâh nota Paletwa (Phila) a vaotuhpa Deputy Commissioner he police zy chhaota Burma liata Mizo a ypazy leimâ (tax) khei awpa ta kô 1938 khata vaw tlô ei ta. Patheitlâh, Heima nata Lialaipi zy ama tly khai tawhta ama zâ liena lâta Diku chavah tlana liata Puhpa Thytu Tlâpyu chata a kei hmô ta, leimâ khei tyh awpa ta Circle Chairman rai a vaw pie. He liata a lymâ awpa cha leimâ tawhta 1% lymâ reipatipa ta thla kha liata Rs 60 a vaw pahlaosa. Khizaw adyuhpi-II liata Japan chariah thatlô tupa vâta Burma râh liata y thai’pa a châ khao leipa vâta mararâh lâ a khy ta, Labour Commander (5000), Sidar (Sawda) 8 a vao ei. Japan chariah a nawh tawhta Salyutlana lâ zu heih ta a raihriana vaw pachhâsapa ta Palyupalihna Tâkâpinô nata Rs 2000/- ama vaw hlâ.  

Burma râh liata kô 35 chhi a y tawhta kô 1979 khata India râh lâ a khy heih ta Saikao râh Moud Ville khirypa, ka-ao tichhi kiapâh liata leipalie taopa ta khih a vaw sa. Kô 2 chhi a y tawhta Tipa ‘V’ kaw pangai ta, Tipa Salem Awnanopa ta vaw deichhy ei ta, a pahrâ n’awpa O ama sapa hleikhô ta thlachareih ta â môhôh n’awpa lymâ ama vaw pie tyh. Kô 1994 khata ECM Assembly ta Krizyh tua chaipa a châna lâ tawhta lymâ Rs 10,000/- ama vaw hlâ hra. Su nano nanopa lia chakaona hneipa ta rai a vaw hria tawhta târi noh 6th February, 1996 khata a chakao tyhpa hnoh a pahâ awpa ta Abeipa O lâ â vaw di haw.  Puhpa Thytu Tlâpyu he â paha nota kô 97 uhtheipa châ ta, Tipa V thlâsu liata pabupa a châ.

 

(Source - The Lakher Pioneer Mission & Hriatuhpazy by Rev RC Nôhro)

 

 

Source: Board of Mara Literature, MADC, Siaha.

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II