Skip to main content



BML Issue October 2021

Editorial   Mongyuh reih ta cha ‘Typological Error’ tah ei ta, a chyunazie ta ‘Typose’ chhao ama tah tyh hra. Châropa liata chhuh chheipa reina a châ. Châ chhuhpa liata chhuh chheipa he ‘Pazu nata chaolahmei’ ama reipa hawhta hmô khoh awpa ta y tyh ei ta; eima khopa hmo châ leipa ta, khôkhâh lyh-lia achhuah tyh taraw pi ta, eima khôkhâh thei tyh leipa hmo a châ. Chhuhtuhpa mokhaoh liata phie a do khai ha tyh ta, asohsi lei vâ châ hra sala maochhie kaw muarua awpa deikua châ hlei vei. Chhuh chheipa he pei kaw ta, â chhuahpa nata yzie lei khaina taihta chhuh chheipa chhochhi he cha pei a hria pahthu thei kaw. Eima râh liata châ chhuhpa nata khiliah liata châ tawpazy he zôpha kawpa ta eima reih khiahta cha â do leipa a hluh kaw. Chhuh chheipa he cha pahnothai achhih via ta, ado bohbi leipa deikua maochhie âchhih kaw tyh. Zawpi rei thei awpa nata hmô thei awpa ta châropa rai rai he cha a rakhapa chhâta â do awpa â ngiah. Eima vaw pahnopasia leipa nata thai pasia leipa a y khiahta c

BML Issue August 2020



              Editorial

 

                Chi nata pho ta maniah padua ta, maniah a tluapapuatuhpa Khazohpa ta Rev. R.A. Lorrain cha chhaichhi ta hmâhpa ta, chi nata pho no-eihpa eima châna palâsatuhpa eima Mara reih aboh n’awpah ta nata hmahsie n’awpah ta Châhnawh, A AW Y B zy maniah taopa ta, Rev. R.A. Lorrain raihria rônah ngaitapa pabohsa ta palaiseihsa awpah he thyutlia zy, nôpaw, hawti machâzy nata Awnanopazy maohphaohna a châ.

              Kô 6 chhi a sie chiehpa rakha tawh khata Mara reih thapasana nata Mara reih palaiseihsa ta pabohsa khohpa, thyutlia hluhpi ta châ ro nata châbu papua liata hmah thata vaw la ei ta, he ama hmahlana zawhzi ta Mara châbu a puapa, kuparo thliepa ta reikhi ta a châ tyhpa kha, hmahsiena â zaw ta â zaw tah thei awpah ta Mara châbu hluhpi vaw pua lymâ ta, atahmâ cha reikhi tlai a vaw châ haw hra, aly’pah a châ ngaita.

              Zawpi chhao Mara châbu chaleina kyh liata thata ahra pi ta, mara châbu hra hro a chalei chhyh lymâpa chhao ama hluh  ngaita. Cha hleikhô ta, Mara châbu arohtuhpazy pasyuna nata reithaina ao reihkah ngia kawpa ta a vaw hlâ tyhpazy chhao hluh kaw tyh ei ta, he heta eima hriaparaohna a phazie a palâsa hra.

              He hawhta Mara reih liata ahrana a tlô hai no heta chyhsa thokha deikua, râhzohpa hawhta ama palôh zohkaluhpa ama hluh kaw chy, a pei ngaita. Khazohpa ta chi no-eihpa eima châna palâsa n’awpah ta reihngia ngaitapa, Mara reih maniah pie ta, he mara reih, reih no-eihpa eima hneipa vâta ryureina no-eihpa MADC chhao a hnei theipa châ pi ta, MADC eima hneipa vâta ary liata hria thei awpah ta, sawhkhâ raihriapa ta hlao hluhpi hneipa ta, Khazohpa byhnâ topa ta y pi ta, nohto khihsa, niebaw tluana pha ngaitapa eima vaw hnei chyu.

              He niebaw tluana phapa, sawhkhâ raihriapa ta hlao eima hnei theina chhâpa he my ha tyhpa ta, eima mara reih he eima vaw pasô thei khao tyh bao vei. Mara saw ta Mara châbu nata Music Video, Audio Album ama taopa ama vaw zuapa maihzy cha Mara palôh phaohpa ta eima chaleipa chyu tyhpa he Khazohpa khozie chhao châ aw ta, eima Missionary Rev. R.A. Lorrain eima zana eima palâsana chhao a châ. Eima byhnâ tona hnawh, Mara reih he pasô via lymâ suh vy.

 

 

 

 

 

 

KHIZAW COVID-19 UPDATE

 

Last updated-27.7.2020

~ By : Pâpa Syuhlô

 

Târi 27.07.2020 @ 7:25 am taihta Covid-19 nata Khizaw duasu:

1.  Confirmed case- 16,361,190

2.  Recovered- 9,973,096

3.  Total deaths- 652,016

4.  Territories- 218

 

Târi 27.07.2020 @  7:25 am taihta khizaw liata Covid-19 a vei hluh chaipa râh top 5 zy:

 

1.     United States

    Confirmed- 4,371,839

    Recovered- 2,090,129

    Deaths- 149,849

 

2.    Brazil

    Confirmed- 2,419,901

    Recovered- 1,634,274

    Deaths- 87,052

 

3.    India

    Confirmed- 1,436,019

    Recovered- 918,735

    Deaths- 32,812

 

4.    Russia

    Confirmed- 812,485

    Recovered- 600,250

    Deaths- 13,269

 

5.     S. Africa

    Confirmed-445,433

    Recovered- 265,077

    Deaths- 6,769

 

Source:

Covid-19 Tracker India_

Covid-19 Live World Map/Count

 

 

 

 

ALOSIHPA LIATA

A MOHÔHNA.

 

~ Shri. BM. Khaimeichho.

Dy Secretary DPAR&P.

                            

Disaster he Mara reih lâta cha notaleipa ta raona, pamosana : O, lyu, Sahdô, hmo hluhpi nata chyhsa thi theina etc. tahna a châ.  Disaster cha zawpi, vâtlâh, khitlâh, chhôhkha taona, buana vaw tlôna châ ta, chyhsapa ta a taopa raona ( man made disaster) heta rairuna thata miah a bai chhi.

              Disaster he chi hluhpi y ta, alosihpa, thlihpipa  nata aleichopa etc. zy a châ. Atahmâ cha a Alo asihpa chôchâh liata a mohôh n’awpah dâh ei vaw roh aw.

              Alosihpa he Disaster chi kha châ ta, â vaw sihna daihti rei chhielie (predict) thei leipa a châ. Alosihna daihti he pahchho kaw ta, seconds 15-30 / seconds 1 -15 rachhôh a châ via chai. A daihti pahchhona pachâpa ta a paraopa deikua  cha a hluh ngaita kaw. Expertise zy ta, “Alosihpa he notaleipa ta raona nô ama tah ( Earthquake is the mother of Disaster). Eima Mara râh liata alosihpa he thapita asih vei  hra sala, chyhsa tota a rahro awpah he eima  maophaohna a châ. John F. Kennedy ta “Na o chô / vâphuh raopa cha nohchhô nota  noh asa nota taopathi tyh ( the time to repair the roof is when the sun is shining ) a tah.

              Alo asihpa panaina ( Mitigation of Earthquake ) n’ awpah ta chyhsa tota sawhkhâ biezy eima zyh awpah a châ.

 

Alo asih hlâta tao awpahzy:-

 

*            Eima o, sahdô, lyu, nata hmo mâ ru viapazy cha  sokhâh ( insured)  awpah a châ.

*            O na sa daihti liata raona ( disaster ) a y thei awpah vâta  emergency door na tao awpah a châ.

*            Almirah, Pawpi zaona beih (pot) nata o bâ liata tawpa chi chyhsa tlathlu theipa zydua cha â i kawpa ta na khaipâ awpah a châ.

*            Raona a vaw tlô pathlei theipa a châ vâta emergency kit  tao awpah châ ta, chazy cha : Meirâh, Torch light, First aid kit, radio, Phone nos  nata battery thiehpazy chhao, ti doh awpah nata nie awpahzy chhao na soh awpah a châ.

*            Fire bucket nata extinguisher zy khôtho liata na soh awpah a châ.

*            Châhna peimawhpa o, lyu, sahdo passes,  Certificate, licence, account bu, Cards etc. chhao â boh thei chaipa liata soh awpah a châ.

*            Nama rakhô chheipâh liata  a pao theipa, a tla theipa na soh awpah châ vei.

*            O he aleichao thiehpa liata  tlyma, leizaih thiepa liata na sa awpah châ vei.

 

Alo asih ngâ nota tao awpah zy :

 

              Alo asih vâta palôhrupa a patypamâsa awpah châ leipa ta, palôhru paso kawpa phaoh awpah tlao a châ. Alo asih nota, noraihpa ta y khâ (Don’t panic during Earthquake )

*            O chhôh liata nama y no a châ khiahta la rakhô/dawhkâh ry liata nama nyu awpah châ ta, rakhô / dawhkâh cha â icha kawpa ta patu awpah a châ. Rakho / dawhkâh aryhpaoh leipa khiahtala, a bâ ki lâta namâ  nyu awpah a châ. Nama nyuna su liata second 60 chhâ nama y awpah a châ.

*            Rakhô liata nama y khiahtala, y lâlao ula, lahuah nata rizai ta nama luh nama vaih chai awpah a châ.

*            O chhôh liata hmo a tlah theipa Fun, Electric bulb, thlalâ etc. zy tawhta a vaih chyu awpah a châ.

*            Nama y na su cha ngâ â chhih thlâh khiahta la nama puasai awpah châ vei.

*            Khôtho liata nama y khiahta la thokô laipa, O laipa,  Electric wiring etc. zy tawhta abohna su liata y awpah a châ.

*            Motor na haoh ngâ nota  a châ khiahta la, su  kawhpa lâ  ngai awpah a châ.

*            Office, Sikul, zawpi ahmaohna daihti liata cha a paraparô leipa ta âthlazi thei chaipa ta nata a pazipata ta, pua awpah a châ khiah pua, a ngia awpah a châ khiah a ngia awpah a châ.

 

Alo-a-sih  khai tawhta tao awpah zy :

              Alo asihpa he â sih chanei theipa vâta a rahro pachie awpah a châ.

*            Alo asih chaneipa heta, â sih tua nota a rao leipazy kha a parao baichhi tyhpa a châ. Chavâta, hmo a rao thei awpah chheipâh liata y awpah châ vei. Alosih chanei tyhpa (after shock) he a pasa kawpa vâta, a rahro awpah a châ.

*            Chyhsa bao thei awpah liata na y khiahta la, heihlyuleipa zy, Machâ zy, hawhtizy na bao tua awpah a châ.

*            A pahleihpazy  ama y khiahta la Doctors tlyma, a thaipazy ngai khei awpah a châ.

*            Alo asihpa meikâpa ta a pazi  theipa  vâta pachhai thei leipazy cha Fire Department zy pahnosa awpah a châ. Fire Department zy raihriana liata pabua  awpah châ vei.

*            Alo asih daihti liata Radio, TV zy bie hneituhpazy tawhta pahnosanazy pachâ peimawh awpah a châ.

*            Bie sianô leipazy phuahzâh lei awpah a châ.

*            Keimo ta eima tao thei khao leipazy chôchâh liata District Disaster Management Committee tlôkhei awpah a châ.

*            Disaster Management Act, 2005 Chapter x section 54 liata chyhsa ta â doleipa ta bie a phuahzâh  khiahta la kô 1 Jail atâh theipa nata phusâ pacheisa theipa a châ.

 

 

 

 

KUNGFU BEIPA

BRUCE LEE THÂTIH

Bruce Lee

 

Bruce Lee he San Francisco, USA liata November noh 27 kô 1940 khata hlasa thaipa Lee Hoi Chuena sawchapaw papalihna  châ awpah ta vaw pih ta, ama unawh he chapaw pano (2) nata chanô pano (2) châ ei ta, phôryhpa lâta cha Catholic ama châ. A moh hmiatuapa cha Li Chen Fang châ ta, a vaw pih tawhta USA tawhta Hong Kong lâ apaih heih ei ta. Hawsaih sâhpi pazy haipa a châ no tawhta film a vaw châ syulyu ha ta, kô 6 a châ nota â châ heih.  Kô 7 a tloh tawhta Hong Kong liata school pha chaipa py Lhasa liata soh ei ta, châhrasala achuna lâ cha a palôh pahei thei tyh vei, apalypa-uasana chata a palôh cha la via syulyu ta, a paw pahno leipa ta a ru lâta Boxing a vaw chu ta, a paw ta a pahno nah chata thata ra ta, châhrasala âchuna pabua leipa ta  martial arts âchu awpah cha vâsâ ta a pasaih haw hra.

Kô 1959 liata Matrict pass ta, USA liata kiahpa ta Washington State University liata Psychology nata Philosophy achu ta, ama University Press-liata thlakha ta US Dollar 20 hlaopa ta hria ta, sasyh âchyhpa ta châ achu ta, a daihti ruapa liata Martial Arts a practice ngâthlâh ha tyh. Karate he All Karate Championship-liata ei sari vaw champion hapa Chuck Norris hnohta achu ta,  Hapkido he  Black Belt 7th  Dan Wang Ing Sik Korean chyhsa hnohta âchu tyh hra.

Press-liata ahlao cha â daihkhyh lei kawpa vâta lâthlôh pip alai kawpa liata martial arts cha pachu pathao haw hra ta, mo pakha tawhta $ 15 rachhôh thlakha ta la tyh ta, vâhneichhih kawpa ta kô 1964 khata Long Beach Karate Championship vaw y ta, cha liana chata ahlao hrapa ta champion haw ta, chavâ chata ahnohta achu khohpa cha eikhapi ta thata vaw pôh ei ta, dawhkha chhôh pachuna mâ châta $ 270 zy, Special-ta $ 1000 zy ta thata amâ vaw chu ha bâ. Long Beach karate Championship-liata Champion a châ vâna chata TV Producers pakha ta Bat Man achâ awpah ta vaw hrua ta, he khai nah heta The Green Hornet-liata Kato-hawhta â vaw châ heih.

He daihti liana heta Asia Film he khizaw ta pasâhsa lei  ngaita ta, a chhâpa cha thata azawpa nata zochhih lei kawpa ta amâ châ tyhpa vâta a châ thlyu aw. Chah nona chata Golden Harvest Group chata bo thiehpa kiah achhuahpa ta Film Star awpah tluapakhy ei ta, ama Director Lo Wei lahpinô Liu Lien Woi cha Bruce Lee yna America-liana chata avy ta, Bruce Lee-ta Martial Arts a vaw pachu haipa a hmôpa chata a palôh pahnie ngaita ta, Golden Harvest Group apazao awpah chata hrua pâ ha ta.

He daihti no heta  notla baih lâ chyhsazy ta Chinese chyhsa ama hmôdâh cha Opium pazy ahmâhpa nata a nie tyhpa hmô ta hmô ei ta, ama film chhao mopa tlâh ta ama hmô leipa a châ. He vâ heta Bruce Lee heta nawhtaw khohlei ngaita ta, Golden Harvest Group tawhta hruana cha a pachâpasia byuh leipa ta thlai apyh pâ ha ta.

Hong Kong lâ pangaipa chata thlai sie pâ ha ta, ama tlô pataw nah chata Thailand lâ siepa ta The Big Boss tahpa film cha achâ pathao pâ ha ei ta, hit ngaita thlâh ha ta, Hong Kong cinema Hall-lia chata thlakha tlai papua ei ta, Hong Kong Cinema Hall-liata film papua parei chaipa record aduah haipa cha lypâ ha ta, Hong Kong $ 33,00,000 ama lapangia thlâh hapa cha Golden Harvest hyutuhpa  Raymond Chow  chhao amo a pahlôpahlâ ngâ kaw.

Kô 1971-liata Fist of Fury achâ pathao heih ei ta, châhrasala Martial Arts chhihthana key palâsa âchhuah dâh cha ama Director Lo Wei chata paryhsa khao leipa ta, palôh châ lei kawpa ta achâ papua ei ta, châhrasala khizaw pôhpalôhpa liata cha alâluah pathao ha ta.

Bruce Lee palôh pasapa cha tlâh thei khao leipa ta, Fist of Fury ama launched rachhôh chata ama director Lo Wei nah chata ahryuh haw ei ta, chhâzaw ta achhaih ha awpah ta puasai ha ta, ano mo pakha châta SHEH HO Company cha padua haw hra ta, châhrasala Golden Harvest Group hneituhpa Raymond Chow chata Bruce Lee talent cha ahmô pasia kawpa vâta hriaparaoh awpah chata hrua ta, SHEH HO Company peimawhpa maih Raymond Chow ta pie lymâ aw ta, châhrasala ama film taopa maih cha Golden Harvest Company Presentation tawhta piepapua lymâ awpah ta agreement tao ei ta.

Lo Wei cha a vâdua pathao haw ta, a lahpinô kyh a pachâ kawpa chata Bruce Lee ta  ano vâta a pua hapa cha ra ta, ano hra chata vaw pachâthai hra tlôh leipa ta. Â hryuh haw ei ta,  â chhaih pâ thlâh ha ei ta, film star nahzy ta abailyu khoh khao leipa ei ta, a moh châta The Single Wolf bi ei ta, he a vâduana chhâpa he Bruce Lee vâta a châpa ta pachâ ta, thâtihbu lâta a thâtih a chhienazie ta thata a rohpa hawhta ama reih.

Bruce Lee deikua cha SHEH HO Company tawh chata The Way of Dragon achâ haw ei ta. Nora Miao nata Chuck Norris zy chhaota achâ khoh ei ta, he heta cha notla baih lâ chhao â ngia pahthu ngaita ta. Khichha lâ mopahnai kawtuhpazy chhao ta mopha tahpa ta thata moh ei ta, film alâluahpa Papillon, God Father zy hlâ chhaota tataw via vei tah ei ta, ama launched tawhta hâta eikha ta liata  Hong Kong Dollar 500000 tlai ama hmôpapua thlâh haw.

Bruce Lee film moh khohpa vâta khizaw liata khihpi alâluah viapazy liata  Cinema Hall zy cha bie khai ha tyh ei ta, Golden Harvest chata Bruce Lee film Copy thata paphao pachhuah ei ta. Hollywood lâ chhao avaw lâ ei ta, Warner Brothers ta film taokhei awpah ta vaw hrua ei ta,  Enter the Dragon achâ ei ta, he chhochhi cha America râhhlypi nata Europe zy cha a chalyusa tah thei’pah a châ. Cinema Hall laipa zapangawhzy ta â raohpa ta ama papua tyh tah thei’pah a châ.

Enter the Dragon film ama tao khai nah chata The Games of Death buakhei pathao heih ei ta, Film star alâluahpa George Lazenby nata Negro doseihpa feet 7.4 âsâhpa Raoul Jabber zy chhaota achâ khoh ei ta, he film ama buakhei hai no heta  a vaw thi haw.

The Way of the Dragon amâ châ nona khata Studio-liata rai ama hria hai nota aluh pahiahpa vâta pao ta, thohna o liata admit pâ ei ta, Dawhtyzy chata a taksa a sapa a riethei tu ha tahpa ta a kungfu practice tyhpa cha apahâsai chy awpah ta chho ei ta, châhrasala a rai lâlao tlôh ta, Enter the Dragon film ama tao khai tita apahâ awpah ta decision tao ta, châhrasala The Games of Death aachâ pazao heih tlôh ei ta, a sapa ta a pahnie khao leipa a lyu kaw.

July noh 20. 1973 châ ta, Hotel Parlour-liata George Lazenby, Raoul Jabber, Betty Ting Pei nata Raymond Chow zy chhaota ama film tao haipa kyh reihpahmaoh ei ta, George zy ama vaw hâ haino chata Bruce Lee chata, “Ei luh a pasa, thohna na hnei ma?” tahpa ta Betty cha hiahri ta, ano chata pasapachhana pie ta, Betty rakhô liana chata akei pazawh ta, Raymond Chow nata Betty zy chata George zy amâ vypa cha vaw hâ hnolo thlâh ha ei ta, thlai ama vaw tlô leipa vâna chata Raymond chow chata  Betty nata Bruce Lee zy cha puasai ha ta.

Betty chata Bruce Lee cha pathyu achhuah ta, châhrasala pathyu thei leipa ta, a thlahzohpa chata  a dawhty cha thlai chho ta, o liata vaw y leipa ta, Queen Elizabeth’s Hospital lâ cha thlai phaoh pâ ha ei ta.

Dawhtyzy ta ama theina zydua ama papuana chôta zâ dawh 11:15 PM liana chata a lahpinô Linda Lee Anglo Swiss chyhsa nata a sawchanô Li Shang Lin nata a sawchapaw Li Kurt Howe (Brandon Lee) zy cha a siesai haw.

Bruce Lee thi dâh he Hong Kong thâtihbu laipazy chata a mohnaonazie nata â do lei kawpa ta papua ei ta, thâtihbu miakha chata Betty nahta sex ahmâh khoh ei ta, Bruce Lee ta thohna a hmâh vâta a thi tah ta, châhrasala sawhkhâ ta  Hong Kong Dollar 10,00,000 pacheisa ei ta, thâtihbu hropazy chhao a pasa kawpa ta a chhorei ei.

July noh 22, 1973 zâlâ dawh 3:30-liata  Oakland khih Catholic Cemetry-liata pabupa châ ta, a thi no heta zawpi thypangawh hlei ta pathlie ei ta,  United State-liata Chinese chyhsa ahlao khai ei ta, cha dei châ vei. Mongyuh nata movyh singhnih thyno hlei vaw pôhpakhy hra ei ta, California state-liata cha pathlietuhpa ama hluh chai thlyu aw tah thei awpah ta chyhsa ama hluh.

No-âhchhih kawpa ta Bruce Lee thi hlâ khata vâchhie ngâthlâh ha ta,  châhrasala a thi tawhta deikua vâ a pha khai ha heih tlôh.

Bruce Lee pasâhsa âchhih kawna cha notla lâta khichha film khâpa sawta ama reih lei no ta a film ta khizaw chahryh ta,  mo hropa kungfu star alâluahpa Jet Li, Jackie Chan zy châta thata lâhaw a vaw chhawpa ei.

 

 

 

 

 

Mara reih rozie dopa

 

 

Khao (m)           : A chao lâ â khao (Verb)

Khao (r)             : Tao khao khâ (Adv)

Khaoh(d)          : A khaoh a vieh (Noun)

                               Eina khaoh (Verb)

                               Ei ky eina khaoh (Verb)

 

Khai(m)             : A tao khai haw (Adv)

Khai(r)               : Alô a khai (Verb)

Khaih(d)           : Mei-ôh a khaih(Adj)

 

Khei(m)             : Tavia nie’pa a pakhei mah y.

Khei(r)               : Sôh a khei (Verb)

Kheih(m)          : Akheih ta a sie(Noun)

 

Khia(m)             : Â khia kaw (Adv)

Khia(r)               : A khia lymâ (Verb)

Khiah(d)           : Na tao khiah a pha (Conj)

 

Khie(m)             : A hykua â khie (Verb)

Khie(r)               : A khie khao khâ (Verb)

Khieh(d)           : A khieh kaw (Adj)

 

Khua(m)           : Sâh khua kha a pie (Noun)

Khua(r)             : Lôkâh khua lia â duah (Verb)

Khuah(d)          : Khuah a reih ha tyh (Adj)

 

 

 

 

 

MARA REIH

 

~ Puhpa Hiphei (L)

 

 

1.       Nopi ti hawh eima hâpa,

Eima reih ta châ achuna;

Daihti phapa a vaw tlô haw,

Ly ta awh s’u Mara sawzy.

 

Tiama thapiphiana chô ta,

Cheihchalo’ si Mara reih he;

Eima chi he lei khao aw vei,

Sâh rili aw he khizaw lia.

 

2.      Ryhraotuhpa Chô Khazoh nah,

Eima râh luhpazy zawhzi;

Eima châta khih deih haw,

Eima reih he a sâh via aw.

 

3.      Chi hropazy mopakhôna,

Ru hra sala thihpipa hawh;

Nawh khao aw vei ei reih cheipa,

Sâh rili aw thyutlia hry lia.

 

4.      Thyu’ la hria s’u Mara sawzy,

Nônai, reisi, ngâchhihpa ta;

Hmia lâ tôh’ si eima râh châ,

Mara reih he a sâh via aw.

 

5.      Chhihtuh Khazoh hmo to taothei,

Eima cha hlâ eima ti nah;

Râh nah reih nah zawpi zydua,

Chhi la byhnâ miah pie mah y.       

 

 

 

 

 

 

Pahmaoh daihti

 

~ Pa-u Fachhai,

New Colony – II

 

 

Biehmia : Covid – 19 vâta sawhkhâ tota ama chyhsa chyu pahmaoh lymâ ei ta, avaihna nata patlâhna kyh liata buakhei chaimâh ei ta, Department tota rai phapa chhao hria khai hmâ khao leipa ei ta, ama chyhsa chyu, pha n’awpah ta totie ama pachâ lymâ haina daihti a châ.

                                

Papai chhâpa : Abei photlypa Izarei nata keimo ‘Lakher chipho’ he alyu kawna eima hnei. Izarei chipho chhihtha awpah ta sathaw thupa, Mawsi, Abaraha, Zawsua etc zy cha, Abeipa vyuhpa ta aduahpa ama châ khai. Izarei chyhsa hry ta chhituhpa thokha nata zawpi thokha hmoparaona vâta Abeipa cha a hiehâh ngaita ta, chavâta phohropa sei liatazy ta patâhpa ta a papai tyh ei.

              Chahawh hrana chata, keimo Lakher chipho hry ta Pastor thokha nata Abei thokhazy ta eima Missionary reingiah leina vâta phohropa sei liata miah a patâh hleikhô ta, py sei liata miah patâh lymâ ta, papaipa ta eima y hai hra.

 

Missionary reingiah leina point zy :

 

1.                   Kô 1948, Tlôsaih reih Medium Siku cha, Mizo Medium Siku lâta ama thla. He siku he Rev. R.A. Lorrain lobo/hmotaopa a châ.

2.                  Awnanopa moh châta, ‘Lakher Pioneer Mission Further  India” (LPM) cha, Lakher Independent Evangelical Church (LIEC) lâta kô 1960 liata ama thla. He chhao he Rev. R.A. Lorrain lobo/hmotaopa a châ.

3.                  Awnanopa moh châta, LIEC cha MIEC lâta kô 1967 liata ama thla. Rev. R.A. Lorrain lobo “LAKHER” cha “MARA” lâta thlapa a châ haw.

4.                  Awnanopa moh châta MIEC cha kô 1976 liata Independent Church o Maraland (ICM) tahpa ta thlapa a châ. Missionary Foxall cha parih khaoh eithôh tlai ama chapaosa haw.

5.                  Kô 1971 liata Missionary Foxall cha a lao chapaolâhpazy ta pabâh ei ta, eima râh ama kaw tlô nota pohvyhpa ta ama dy.

6.                  Biehrai nata hlabu, Rev. R.A. Lorrain & Foxall kuhria ori- cha kô 1975 liata panano tua chaipa a châ khô lâta atanoh taihta panano via lymâpa a châ.

7.                   ICM cha ECM lâta thlana & Hqrs. pasiena kyh vâta kô 1989 tawhta atanoh taihta Awnanopa nata Politics liata apôhkha thei khao ma pi.

8.                  Kô 30 chhôh tlai ta Awnanopa apôhkha awpah ta ahaw ta, châhrasala khoh veih ei. Missionary Vaili & L. Mark ahawna cha lôpanô chô liata tibaopa a châ khai haw.

 

He tlupo ta Missionary hmotaopa (Lôbô) ama parao tawh chhaota ama thailei châna rai  a pahno veih ei. He vâ tlaina a châ thlyu aw, Abeipa byhnâ eima to leina chhâpa hih.

Zisu lao chapaolâhpazy ta a chariahpa lâta amâ liepa hawhta, Missionary lao chapaolâhpazy ta Missionary cha hmotaopa ta amâ dyuh khai haw. Abeipa ta thei hmiatuapazy pasia n’awpah ta point 8 tlai ahluana lô vaw soh khâh ta, amâ vaw chapia hawpa vâta papaipa eima vaw châ haw.

 

Papai daihti liata tovyuh chhiezie:

 

              Missionary Awnanopa moh bipa thyusaipa tam oh hropa nata Denomination hropa lâta eimâ bai lymâ hawpa vâta Abeipa pathi pa-ia haw pi ta, chavâta papaipa eima châ.

 

Papai theinazy photlyhpa chyhsa hluhpi châta:

 

1.       Missionary pasôna nata reingiahna a lei haw.

2.      Awnanopa py doleipa sei liata amâ ngia.

3.      Tâkâ/sôh sei liata amâ ngia.

4.      Chipho hropa reih nata dâh amâ hly.

5.      Chi pho hropa sei liata amâ ngia.

6.      Politics doleipa sei liata amâ ngia.

7.       Chanô chapaw hiatliana/sikhôsei liata amâ ngia.

8.      Paritheipa sei liata amâ ngia.

 

Pahmaoh daihti:

 

              Lyu liata sâ suh hluhpi cha sukha liata pahmaoh awpah ângiah hawpa vâta a sona ‘su’ sawvâ tao awpah â ngiah. Chahawh hrana chata, Awnanopa py hluhpi tawhta pykha liata pahmaoh awpah ta cha, a pahmaoh n’awpah su dopa py â ngiah haw. Kô hluhpi chhôhta eima râh awhhmia tiepa, a chhôh liata Awnanopa py hluhpizy eimâ pôhkha thai leipa nata rei eimâ raoh thai leina chhâpa cha, Abeipa sathawthupa, eima Missionary lobo/hmotaopa py moh, LPM kha Abeipa apyhkheipa nata ordained pa, byhnâ awpa hmâchhâh, paraopa ta lobo hropa liata apôhkha awpah amâ chhuahpa vâta a châ.

 

Awnanopa apôhkha awpah kyh liata pachâdâh miano :

 

1)                   Assembly pachâdâh taochhyhpa : Py moh nata Awnanopa kuphei châna zydua nata hlao chhao, siesai/thyusai tlâ leipa ta Hqrs. nata Biehrai & Hlabu nata achhihthana dâh zydua chhao, a totie kyh liata Missionary hmotaopa alâ khaolei awpah pei tahna rai y leipa liata apôhkha awpah amâ chhuah.

2)                  Abeipa pachâdâh : Awnanopa py he Abeipa eih châ ta, a chhôh liata chakaona rai a hriapa zydua nata zawpi chhao Abeipa eih eima châ khai. Abeipa ta a sathaw thupa hmâpa ta Awnanopa py moh a vaw bi hawpa kha, parao, panano awpah ta taopa châ vei. Avârâh châbu liata ropa a châ haw. Chavâta eima râh châta Awnanopa py, apôhkha n’awpah su cha “The Lakher Pioneer Mission Further India (LPM) Founder Rev. R.A. Lorrain, The Father of the lakher’s a châ.

 

Conclusion: Beizy Beichaipa ta, “Awnanopa py hropa sei tawhta pua u la, nama pina LPM liata a vaw pahmaoh bâ the u, nama paraona zydua châ ngiahthai aw ei na ta, byhnâ hluhpi ei cha pie aw ei. Pho pathaihpa ta ei châ tlyh hawpa vâta cha paduapathi aw ei na ta, chaolahmei châ khao leipa aw ei chi ta, luhpa ta ei cha tao aw ei. Khizaw photo chito, reihto hry ta chyh chai hra u la, ryureina, biehneina nata hmotaotheina piepa châ aw ei chi ta, nama Khazohpa nata Missionary moh cha khizaw liata ei chaluah lymâ aw” a tah.

              ‘Myuh ta, myuhhneituhpa o lâ â dipa hawhta, Abeipa nata eima Missionary cha, myuhhneituhpa châ ei ta, eima zydua cha, ama myuhzy châ pi ta, chavâta myuhhneituhpa o (LPM) lâ adi bâ suh vy. Abeipa ta byhnâ pie mawh sy. Amen, Halleluia…

 

 

 

 

 

 

LAILA NATA A HLAZY

 

~ T.A. Chhôhu

 

( He Châpaw (Article) he Puhpa TA. Chhôhu châbu, “Eima vaw pahno hra awpah ta” tahpa tawhta lapachhuahpa a châ. Ed)

 

Laila he Khithie pho châ ta, a paw moh  Lialy nata a nô moh Tohnai a châ. Kô 1874 liata Theiva khih kiahpâh Chhaolô liata Saikao mo ama y nota a pihpa a châ. Kô 1914 ta Krizyhpa lâta a vaw palie ta, kô 1924 ta bâti (baptisma) a châ. Kô 3 (thôh) chhôh Vaili mahpaw (Rev. R.A Lorrain) hnohta y ta, pasana khiakhi kawpa vei ta, kô 1927 January noh 8 (charie) ta â pahâ (thi) haw. Sawchapaw 1 (pakha) hnei ta, a moh cha Dyuly châ ta, Amôbyu (B) khih liata khih a sa. Â ngiapâ hmeiseihpa a châ thlyu aw, a thi chyta a biereipa cha, “Ei saw he cha mosâhpa nata Khazohpa ta vaw mohôh lymâ aw ei ta, ei theina rakha ta ei vaw pachô hnualuapa ei tâkâ Rs. 20/-(syno) deikua he cha a zydua ta Khazohpa sôh liata vaw soh khai muh vy,” a tah.

              Saikao khih tawhta laihsa hnohta Paitha (Paithar) lâ a paih hra ta, daihti rei leipa ta Amôbyu (B) khih tawhta KARANI (khih reihpa/VC Secretary) rai hria thei awpah ta Lôlei (Lunglei) lâ tuapa a châ. Anodeikua châ a thai thei leipa a châ thlyu aw, ama Siku O cha ano (Laila) palôh liata cha châ â chu n’awpah hlâta cha Laihsa nahzy chhaota sahmazy dokhoh ta, palao-palâ n’awpah ta a pha viapa ta a pahno/pachâ ei ta, a hla liata:

 

“Viahpa châhdi thaina lo vaw châ e,

Dawny Sahei dawh-O nohchhi;

Zyu ria pahla na pha e.”

 

Laila hla he pahnona rakha ta vaw roh laih tua’ sala:

 

“Khiahlô vâh rairu ta morâhpa,

Vahpi tai pakhâh ta ngôhleiri;

Ei molaih na ai vei.”

He he Tlabô (Tlabung) lâ a sie nota Tichô (Tuichang) chavah liata hleidy ama daopa a phina a châ (Hleiri he mongyuh reih ta Suspension Bridge ama tahpa he achâ).

 

“A si chah-rao saphia viah zuahnô,

Phôhpa tlô tlei, pawnô vaw moh la;

Hnazô ngôh kâto chhaota.”

He he viah laihsa (chanô) nah ama hnapasu liata kâto (rahy alyupa) a ba pâna chôta ama lâpa a hmôpa a pha ta kaw hra ta, a phipa a châ.

 

“Lailâh lochona tleih leipa ta,

Thopôh vâpiah taih pakhâsana;

Rihkha haosai sahna he.”

He hla he Saikao lâ â paih nota daitly ama daina hniehnôh a hmôna a palôh liata ypa a phina a châ.

 

“Sôsi buzyu lâh thai sualua cha;

A hnazô ta Dinô Pawtlai;

Awh lai sâh daihmâ na ta.”

He he Meitei laihsa nah Saikao khih liata ama lâpa pha a tah vâta a phina châ ta, Pawtlai he a laihsa kho kawpa a châ vâta a pakhopâ ei.

                            

“Tlôsai Thylai a lai hmeiseih vâ ma?

Azyu kaohzy a chahryh khai na;

Aw pypitai a thâ na.”

Saikao (Tlôsai) beipa Thylai a nôchâ phana nata a moh pathâhna a phina a châ.

                       

“Siaramainô dawh-o taihta a sah,

A chô atyuhpa ta luhpi;

A ryh kâto sahna taih na.”

Saikao beipa Thylai hnohta Kolkota lâ a sie nota o chhâhsâhpa a hmôpa a phina a châ.

 

“Sôhly hnohta vâdei luah laih na,

Phaovyh laihno thlati leih lai;

Vâchy ei ri no kha la.”

Saikao beipa Thylai nata Kolkota lâ ama siepa pha a tahna a phinapa châ heih ta, abei Thylai chhao a palôhtlâh ngâsâ ta, Laila he a pazupathâ pâ ngâkaw ei aw.

 

“Laty tlâhpi tawhta râh sai suah na,

Ngôhia paw pivaw O moh na;

Ngôh thlalâ na a lyu e.”

(Dawh thlalâ – Pachi Hlychho).

He daihti nota Palâ beipa cha Laivu châ ta, â ly tu hapa vâta Râchâ sô 9 (chakipa) a pie (Ref. S. Mokia). Sahma beih-rai lai kawpa a pie (Ref. Pachi Hlychho).

 

“Ngôhia paw asopa siahnao cha,

A chao a luah paku lônah;

Khi zathôh lyma.”

He he Palâ a za tly nota Palâ beipa Laivu ta Masiah naoh sô thôhpa a ka nota a phipa a châ.

             

“Ki maihnô ta ei khitlâh vaw tlô e,

Vyhai ry tawhta Lama vazôhpa,

Laihmoh a chhô ha na.”

He hla he Amôbyu beipa Siatô ta a khih liata Chaoliah vaw puapa a kapa a phina a châ.

                      

“Tipi meihdo thyu hlâ mokhâh ei sa,

Nohly a kâ hneichhyh a vaw tao e;

Sawtlu lôh a sa na.”

He he a laihsa kho kawpa Thleichhai dyh a châpa, a vaw kua awpah hâpa ta nohchhô hlâ via a mokhâhpa vaw kua leipa, a hnabeidypa ta a phina a châ. Thleichhai he Dukhaw O lâ dyhchâpa hawhta reipa a châ. Hnabeidyna hla a châ thlyu aw.

                            

“Viahpa pâpi, pohchi soh bao cha,

Cheihdô laihna kiah ta tlâhtla;

Zahchy ei rahmâ khiah ma.”

He hla he Paitha (Paithar) khih liata a y nota laihsa nahta Hradô (Abei machâ ama châ thlyu aw) ta lyh (pacheisa) ei ta, Sisâ nata Seihhrâhpa ki lapa ei ta, pei tah ngâsâ ta, a phipa a châ.

 

“Dinô sakha pua lei y cha la,

Chhôhno ry lia tlôh palâh mawh se;

Viahzuanô tlupa naihta.”

He he Amôbyu liata kyhchhina ahlao awpah ta ama hrua ngâpa Laihsa ahlao khoh leipa a phihnâpa a châ (Ref. Pachi Hlychho).

               

“Awhby chhiepa na palôh lai cha,

Zâcho Awhkho na chahryh laih;

I hro ta cha nga pâh ei.”

Zâkha cha a sahma doh-lâhpa Laihsa ta hla chhiepa ta a paliena châ ta, ano (Laila) ta he liata a palie heih.

                            

“Ô kali ta hawhta pua thlâh e,

A hno hro daih, karô chhathôh;

Nohto a chathleikhei e.”

Laihsa nô cha a palôh pasa ngâsâ ta, a mothlih a pathla pâ ngâ kaw ei aw.

                    

“Dawhnô ngôh lakhu chhao hra mawh sala,

Tlâhpi khih khô ei lailâh leipa na;

Lôh hia na pahreisa ei.”

He hla he Manipuri (Meitei) laihsa buakha a hmôna liata a tlaichhaizie nata a sie tawhta a palôh â lie vâta a phina a châ.

             

“Laila kei la i vei awh veipa na,

Laphôh â lie lâta ngiah khuh vy;

Chhihroh a pawthazy vyh.”

Viasa rihchâh nô-u riah a chi kawpa vâta a hlaphipa ta hmahta ama palôh ahnao pathlei lah a tahpa vâta a phina a châ.

                            

“Mokuh rah-mâ ei khaih laih nota,

Mawpôh pahri chô lia dawh-ei;

Vapiati papua pâ na.”

Sahma a pari tu vâta azo â mô nota â pazôthlu tlamawna anosasyh ta â phina a châ. He hla tawh heta chyhsa areisipa a châna aphuah ngâhpa a châpa â lâ kaw. Hla phi thai penawh he a tlâhpipa ta ama palôhru a pathaih kaw tahpa, he hla a phipa tawhta â pahno thei kaw.

                            

“Hraithlao pawtho thluna sawtlupa,

Saira mainô awna tliatlâ la;

Khâ hma na nainôh khao vei.”

He hla he thohaw awpah ta tho thlu hra ta, châhrasala a hnabeiseihna hawhta laihsa nahzy ta phaopa (pahreih) khoh tlâ leip’ei ta, a phina a châ. Laila he chyhsa areisipa a vaw châ hmeiseih.

             

“Lâ ma tlei cha kei la lôpha pi va,

Khataih paly tilih soh lia ma;

Lôhdu ei châ ti heih aw?”

 

“Lôhdu viana chyuhlei vâsâh cha la,

Râh lâ Uliah nô hawh rôh laih na;

Noh-ly a chhina ki y.”

 

“Lôhdu kha la mythâ pawh aw sa,

Ei tah rawlaw, chhôhso thâ liata;

Ahlei châ ngiah via tyh na.”

 

“Ei heihzy la saro kiathâ khai na,

Keima dei na titha ngapeih hawhta;

Satly lai za hâ aw na.”

 

“Mo la lôhdu a châ lei naih ta,

Keima lama khydi Hrany paw;

Chhâ thôh kho a tôpa na.”

A chô liata hlazy khi a rihchâh kha penawh ta dyh châsai khai ha ei, ano hra cha ama riethei tu vâ ma, kyh hropa vâta ma dyh charâta châ leipa ta (lahpinô charâta hnei leipa ta), he vâta kyhchhi no nata Awhkhy hla sana lia maih ta khoh tôtuhpa sai ta hmâh ei ta, cha cha anosasyh ta a ngia â chhie kaw thlyu aw. He hawhta hla a vaw phipa heih (J. Vialua hla ‘Viapa thlalâ amoh na keima hmah lôh a du va na’ tahpa nahta â vaw lyu kaw).

 

“Awhkhypa ta a choh palai dih,

Chathlia siesu a lao dyh lai;

Awh hlaonô chapia pâ na.”

He hla he chasipaw daihti nota my kha cha nohsa â aih nota awhkhypa ta Awhpinô a charia ta, a ria nainô a tao ngâpa a phina a châ.

Laila he hla a phi thai tlai ei aw, ano chhâ liata hla phithaipa chapaw hry liatahpa Hratlai chhaota he hawhta hla a vaw phipa:

 

“Khâpa lyuhbie na lailaoh e,

Awhkhy laphôh rohhnâh nô cha;

Ei palôh thotawna a pua,” tahpa ta.

 

Laila he a lochono cha a hla phi thaina vâ heta a pahno leipa y veih ei, he hawhna heta  ama reih tyh, “Laila nata Ra-awh a pahno leipa ama y aw ma?” tahpa ta.

He châbu chyhpata liata Laila Hla palâsapa khô lâta hla hropa a y hôlô nahta pangiasa â chhih. A pahnopa maih ta roh thei ei sala kho â chhih kaw. Laila Hall hnei pi ta, Laila thlâ reih via heih ei sih la. Hlihchhy Road-zy chhao khawh?!             

 

“Tipi meihdo thyu hlâ mokhâh ei sa,

Nohly a kâhnei chhyh a vaw taw ei,

Sawtluh lôh a sa u.”

              He he a laihsa kho kawpa Thleichhai dyhchâpa, a vaw kua awpah hâpa ta nohchhô hlâ via a mokhâhpa a vaw kua leipa hnabeidypa ta a phina a châ. Thleichhai he Dukhaw o lâ dyhchâpa hawhta reipa a châ. Hnabeidyna hla a châ thlyu aw.

 

“Viahpa papi, pohchi soh bao cha,

Cheihdô laihna kiata tlâhtla;

Zachyh ei rahmâ khiah ma.”

 

 

 

 

Pa-ôpazy nata Mo

(Tobacco and Eye)

~Thati Khithie
Sri Sankaradeva Nethralaya

Eye Hospital
Beltola, Guwahati

http://www.opticalprism.ca/wp-content/uploads/2013/05/Smoke_MayJune_13.jpg

 

Mara lei Awhsi a khô hapa Puhpa J. Vialua ta reithaina hla a phipa sâkha liata Vârâh pha zie awpah, he hawhta a vaw palâsa: “Raphyu lia nohchhi phana thlihuah nai zualua a pathli”….Puhpa J. Vialua kha mochaopa châ ha sala he hla bie he a reih papua thei vâ ma tahpa ei pachâ tyh!!!  Raphyu liata nohchhi a ngia kawpa nata lôh-lie chhih kawpa cha mokhaoh ta hmô ta, cha liata nai zualua kawpa ta thlihuah a vaw pathlipa cha, nahkhaoh ta a pyu thei ta, sapa pachiah hropazy ta a chakua phana ama pahno theipa a vaw châ. Mochaopa ta he hla bie he âchieh kawpa ta a phana a chapao thei nahta pangiasa beih va na. (Ngiapâna mothlaw ta hmô pasiapa chi chhao châ hra vâ!) Sapa Mokhao ta hmôtheina he a vaw peimawh kawpa na a châ thlyu aw?

Heta ei pachâ tyh: Athaona 27:1 “Chatawh cha Aisika cha machâ ta, hmô thei khao leina taihta a mo a zoh tawhna chata……” A mo zoh (mochao) leipa sala Aisika kha a sawchapaw seihnai Zakaw khata a dôvei thei nahta pangiasa thei va na! Athaona 27:22:  “A ao cha Zakaw ao châ tlôh ta, a kuzy deikua cha, Esaw ku châ tlôh” A ku hria pahnotheina nata nahkhaoh thei theina pahnona deita ta bietluna tao ngâh khao vei. A ku hriapa zy, hnapasu nata nahkhaoh theinazy ta a sawchapaw seihnai Zakaw a châ tahpa ta a lathli (brain) lâ ngiana (signal) kei pie ngâ kaw hra sala, mokhaoh ta ngiana (signal) a pie thei khao vei tawh cha dôveipa ta a y thlâh ha kha zaw. Esaw châta mothlih tlana nata chana dei a vaw châ.

Sapa Mokhaoh ta hmôtheina he a vaw peimawh tlaina. KHAZOHPA KUZÔ PAHNOTHEINA 5-ZY (5 SENSES) Chyhsapa he Khazohpa ta Ano kakuapa (lyupa ta) ta maniah a taopa châ pi ta; (Athaona 1:26,27). PAHNOTHEINA chi 5 maniah a pie, chazy cha:-

Hmôtheina (sight – Ophthalmoception)

Nah thei theina (hearing – audioception)

Ku/hriapa ta pahno theina (touch – tactioception)

Roh pahno/pahnâ theina (smell – olfacoception)

Pahâhna pahno theina (taste – gustaoception)

Pahnotheina 5 zy heta Khazohpa zôphazie nata rônahzie a palâsa ngaita. A peimawh chaipa atlyh awpah châ ha sala; khâpa eimâ tlyh aw vâ tly? A ru ngaita aw…. sâkha â ki lei khia chyhsa châna paki thei leipa aw pi ta; Khazohpa ta maniah a pachhuahpanohpa hawhta hrochhôh daihti reih thei hra aw ma pi.

Hmôna awpah ta MOKHAOH (eyes) maniah pie ta. Theina awpa ta NAhKHAOh (ears) maniah a pie hra. Hriapa pahno theina awpaH ta THARI (nerves) maniah a pie. Roh pahno/pahnâna pahno theina awpah ta HNAPASU (nose). Pahâhna pahno theina awpah ta PAKAH – PALEIH, DÂHZÂ (mouth – tongue, pharynx) maniah a pie.

Pa-ôpazy hmâpa ta chyhsapa ta Pahnotheina sâ 5 (Khazohpa O) hry liata sâkhana MOKHAOH a paraona dâh a chyhta palâsa ei si la.

 

PAHNO TUA AWPAH: CHÂMAIH  

Pa-ôpazypa (châhnamei, sâdâ, khaini, karao, etc.,) heta hmo (substance or chemical) hluhpi 4,000 hlâta hlu viapa a chakaih ta. Hezy hry liana heta chyhsapa châta pha lei pachaipa carcinogens (cancer tlôkheituhpa), irritants, inflammatory agents – chhôh lâ liata hmah pa-una tlôkhei theipa châmaih hmo (toxic) mokhao (eye) a parao theipa â chakaih hluh ngaita.

 

MOKHAOH A PARAONA DÂH: Eima sapa heta anosasyh avaih theina (antioxidants) hnei ta, cha cha pa-ôpazy châmaihzy heta a thatlôna a chyh chyhta ama parao tyh.

Mei pazypa (smoking) heta eima pôhpa liata thari – thisaih lâpi zydua pabua thei ta; cha chata Thisaih sâhpa (High Blood Pressure)  a tlô khei. Mokhaoh (eye) lâta angiapa thari – thisaih  lâpi chhao pabua thei ta; mo hmô padâhna tlyma, hmô theina tla pahnaina (degeneration) tlyma a tlôkhei thei.

Pa-ôpazypa châmaihzy heta eima thisaih liata oxygen y awpahzie pachyh ta; eima mokhaoh ta oxygen a dao awpah zie padaosa thei hra vei. He heta mokhao châta rairuna chi nanopa  thata a tlôkhei hra.

Pa-ôpazypa a tao hluhpazy he machâsâlâ pangai nao via ei ta; cha hawh hra ta Mokhaoh chhao bâh hlei vei.

 

HAWTIPAZY LIATA: Hawtizy he pa-ôpazy tao hra vei ei sala a châmaih heta a hlasai/râsai hmeiseih thei vei. Ama pahrâlâhpazy tlyma, ama kiapâh liata pa-ôpazy a taopazy vâta tlyma nôpaw (apachaipa ta nô) zy vâta a boh pyly veih ei.

 

Hawtipa zy Mokhaoh liata Pa-ôpazy châmaih raihria:

Strabismus/squint (Mo law – mo âsia): Mo asia – mo law (Strabismus/squint) eima tah tyhpa he mokhaoh asiapa, apatlâ/ady leipa he a châ. He hawhpa he sawphao nota pa-ôpazy (apachaita châhnamei pazy) a taopa Nô liata nawh kaw pih awpah cha Mo âsia theina – ryhpaohna (chance) 8% ta, a tao leipazy hlâta, â sâh via.

Allergic conjunctivitis:  Allergic Conjunctivitis he mo (motlâh chhôh lâ nata mohmô chheipah zy) ta hmo âzie leipa a hneipa vâta a hmah vaw pa-u tyhpa he a châ. Hawtipazy he ama sapa panyu kaw ta, chavâta châhnamei khuh he amâ zie lei ngaita. Châhnamei khuh ta a hria phapa liata a ypa hawtizy he 20% rachhôh ta Allergic Conjunctivitis ama hnei nao via.

PITLOHPA LIATA:  Pa-ôpazy pata pitlohpa Mo liata pasana a tlôkhei theipazy:

Cataract (Mo zohna):  Manô-mapaw daihti tawhta eima hmia pahno kawpa mohmô thlalâ (lens) râhpa/pawhpa (mokhaoh chhôh liata meido â zaw/chhoh) eima tah tyhpa kha a châ.  Cataract he kô kaw uhthei lymâpa ta â chakaihpa (ageing process) sâkha a châ. Châhrasala, Pa-ôpazypa he risk factor (chichhihna pa-ysatuhpa) lai kawpa a châ.

Châhnamei pazy hluhpazy liata cataract y theina he a sâh via ta, meipazy beih leipazy hlâta a pazy tyhpazy ta Cataract chi kha nuclear cataract (sub-capsular posterior cataract) ama tahpa chi, a lie no(2) ta ama hnei nao via. Mohôh (treat – Cataract surgery) leipa ta a y parei khia mo zohna/chaona, thlai ta a tlôkhei thei.

Age-related macular degeneration (AMD): Hmo eima hmôpa, mokhaoh chhôh liata a vaw sypahmaohtuh chaipa he retina (mohmô pahlytuhpa radâpa) tah ei ta;  cha retina liah-lôh liana chata macula – alialôh hmô theina (central vision) su y heih ta, he macula heta a sia kawpa ta hmo eima hmô theina rai a hria. Khâpa hmo vâta tlyma macula he hria pananopa ta y ha sala, eima mokhaoh ta alialôh (central vision) a hmô theina cha pabua ta, eima hmo hmôpa sia khao leipa ta y ta, eima mo a zoh (padâh) ha ty. Thokha liata ama hmo hmôpa rai rai he â chahmie (distort) khai ha tyh.

Alialôh (central vision) hmô theina eima pahlei ha khiah cha; noto ta eima tao tyhpa nata peimawh kawpa – châ reipa (reading) zy, ropa (writing) zy, mawtaw haohpa (driving, riding), TV mopazy tao thei’pah châ khao leipa aw ta, near work  tlâ tah ei si la – âhniapa liata rai eima hria/tao tyhpa tao thei khao mapi tahna a châ.

Châhnamei heta eima sapa liata oxygen raihria patypamâna (oxidative stress) tlôkheipa ta retina a parao tyh. Thari liata thisaih siepa pachyh ta, mokhaoh lâta thisaih a ngiapa a pachyh hra. He heta mokhao ta thisaih phahlana (ischaemia) zy, oxygen phahlana (hypoxia) zy nata retina liata hmo didaoh a pahmaohna (micro-infarction) zy a tlôkhei tyh. Châhnamei liata châmaih ypa chikha – benzo(e) pyrene heta retina(l) cell zy thie tyh ta. He hawhpa cell thi hapa (death cell) he chyhsapa thaina ta taopathi/patlâh thaipa châ khao vei; Abeipa tawhta tlâna deileipa ta cha.

Pa-ôpazy a taopazy ta Age-related macular degeranation (AMD) he, a tao leipazy hlâta a lie thôh (3-fold) ta ama hnei nao via.

Diabetic retinopathy:  Diabetic retinopathy he mo pasana khiakhi kawpa – pazô-thlôhpa (diabetes) pasana a hneipazy liata alâluah kawpa; thisaih liata a thlôhpa hluhtu hapa vâta mokhaoh (retina) chyhtuhpa thisaih tharizy a parao/papyu hapa he a châ. Retina chyhtuhpa thisaih thari a rao ha nahta cha retina liata thisaihzy cha pyu (leak) papua ta; hmahdawzy tao ta, hmo eima hmôpa sia khao tyh leipa ta – âchamiehpalao (distort) khai ha tyh. A nao kawpa ta mochaona a tlôkhei theipa a châ.

Pa-ôpazypa (a pachaita Châhnamei) châmaihzy he Diabetic retinopathy a tlôkhei theituhpa/pa-ysatuhpa alâluah kawpa (significant risk factor) a sâh kawpa sâkha a châ. Pa-ôpazy a taopazy ta a lieno-liethôh (2,3-fold) tlai ta, he diabetic retinopathy pasana khiakhi kawpa he ama hnei nao via.

Thyroid eye disease (TED): Thyroid gland he eima rao liata chhia a ypa he a châ. Thyroid gland heta eima pati/hmo niepa sapahti lâta paliena rai (metabolism) zy, sapa châta a peimawh awpah hawhta raiparuahna nata â vao padona (regulate) rai zy, sapa laiseihna nata â tao pitlohna (growth and development) raizy ama hria.

Thyroid gland ta rai a hria pakhô (overactive) tu pâ ha nahta heta, hormone (sapa chahthli thisaih lâta angiapa) chikha thyroid hormone thata pazâ papua(pie papua) ta; mo pasana chikha khiakhi kawpa thyroid eye disease (TED) a vaw y tyh.

Thyroid eye disease (TED) heta mohmô (eyeball) byuhpatluana, puapatluana (protrusion – proptosis) zy, hmo hmô paphieh – pakaoh (double vision) zy, hmô theina pahleina (loss of vision) zy nata mochaona (blindness) zy a tlôkhei tyh.

Pa-ôpazy a taopazy liata Thyroid eye disease (TED) he a hluh ngaita. Royal College of Ophthalmologists Research, UK ta apalâsana liata cha Thyroid eye disease (TED) he mei a pazy leipazy hlâta a pazypazy ta a lie palih (4-fold) ta hnei nao via ei ta, Mei a pazy hluh (heavy smoker) zy ta a lie sari (7-fold) ta ama hnei nao via tahpa ta a palâsa hra.

Optic neuropathy, Anterior optic neuropathy (AION) : Optic neuropathy, Anterior optic neuropathy (AION) he mo pasana chikha, pasa chhieliena y tlôh hlei leipa ta, eikhapi ta mo zohna a vaw ypa, mochao pathlahna taihta a tlôkhei theipa pasana chichhih kawpa a châ.

Eima châh-ao (heart) tawhta mokhaoh lâta thisaih achyhtuhpa tharipipa (artery) liata thisaih akhypa a chyh (â khi lei) pa vâta pasana a vaw ypa a châ via chai. Atherosclerosis – (thari liata thisaih a siepa pakhâna/pabuana a ypa) he Optic neuropathy, Anterior optic neuropathy (AION) a tlôkheituhpa liata a tôhpi chaipa sâkha châta, maohphaohna a hnei lai kawpa a châ.

Châhnamei a pazy tyhpa (smoker) zy heta a pazy leipazy hlâta a lie 16 (16-fold) ta Optic neuropathy, Anterior optic neuropathy (AION) he ama hnei nao via. A pachaipa ta kô 45 – 55 likawh uhtheipazy liata, he pasana hri he âlâ papua via chai tyh.

Optic neuritis, Optic neuropathy, Optic nerve atrophy:  He pasanazy heta mokhaoh ta hmo a hmôpa syhpahmaotuhpa (retina) tawhta lathli (visual cortex – brain) lâta ngiana (signal) piena rai a hriatuhpa pahnona thari (optic nerve) zy ama parao tyh. Khizaw thaina ta patlâna a hmô papua mâh leipa pasana, mo zohna hri a châ. Arao chhivia awpah vaih awpah dei he thohna thaina tawhta a taotheipa a y chhôhpa a châ chyh.

Châhnamei, Karaoti (tobacco in liquid form) aomâ tawhta taopa, aomâbeih (tobacoo exposure through pipe) zy ta, he hawhpa pasana he, ama tlôkhei khoh pachai. Kô liah-lôh (middle aged) pazy tlyma, machâ viapazy tlyma hria pabua via chai ta, pasa leipa ta dusaw ta ta mo zohna tlôkhei ta, mokhaoh ta rôh (colour) a pathlua theina zy dusaw tata tlapahnai ta, hmo hmôpa zy â chamieh (distort) khai ha tyh. He pasana heta mokhao sâkha dei châ leipa ta a sâno ta a hria pakao tyh.

Toxic  amblyopia: Toxic amblyopia he mobaina (spectacle) nata contact lens hmâpa ta patlâh thai lei awpah hri châ ta, mo sâkha tlyma sânoh tlyma hmôtheina, dusawta ta tla pahnai lymâ pa pasana hri a châ. Mokhao sâno zy ama hmôtheina (power) a lyu leipa tahpa chhaota eima reih thei aw.

He hawhpa mo zohna he pa-ôpazy (tobacco) liata a ypa châmaih sâkha cyanide ama tahpa ta a tlôkhei tyh.

Sapa pasana, mokhaoh a parao theipa thokha zy: 

Diabetes mellitus (DM) – pazô-thlôhpa

Hypertension (HTN)– Thisaih sâhpa

Rheumatoid arthritis (RA) – Ru pasana

Thyroiditis – Rao liata chhia pasana chi nano nanopazy

Autonomic nervous system (ANS) disease – Sapa pahnona thari pasana nano nanopazy.

A chô liata palâsapa pasanazy khi mokhaoh raona/mo zohna tlôkhei theipa a lâhâh viapazy châ ta; kô 5 hlâta hluh viapa eima hnei ha khiah cha Kô 1 ta eikha chhâ. Mo Dawhty (Optometrist/Ophthalmologist) a pamosa (check up) tyh awpah a pha. Pasa chhieliena (symptoms) y tlôh leipa, mochaona taihta a tlôkhei theipazy châ tlôh ta. “Patlâhpa hlâta avaihpa a pha via” tahpa a châ khaw.

Bie baina:  Pitlohpazy liata a y theipa mokhao pasana eima reih chiehpazy khita Mara râh nata Maw râh liata thata thari a thla ngâ hai. Maw râh tawhta tlâhleipa ama za refer pa nata a pamosa awpha ta Guwahati a zâ ngaipa hluhpi he retina liata rairuna a hneipa ama hluh ngaita. Age-related macular degeneration (ARMD) zy, Diabetes retinopathy (DR) zy, Thyroid eye diseases (TED) pasana a hneipazy chhao bâh hlei veih ei.

Retina nata optic nerve liata rairuna a hneipa ta Maw râh tawhta a zâ pamosa tyhpa zy he pa-ôpazy a taopa nata sahma a doh tyhpa ama hluh ngai ta. Chapawzy  hlâta chanôhzy ta he pasana he ama hnei nao via tyh.

 

Bie pachhâna:

 

1 Kawrini Mozy 3:16,17:  “Khazohpa O nama châpa nata Khazohpa Thlahpa nâmo liata a y thlah haw tahpa pahno veih ei chi ma? Ahyrai ta Khazohpa O cha a parao khiata la, cha chyhsa cha Khazohpa ta a parao hra aw. Khazohpa O cha pathaih tlôh ta, cha O cha nâmo nama châ”.

Achô liata Abeipa bie eima hmôpa hawhna khita, Ano lyuhpa ta taopa, eima sapa he Khazohpa O cha a châ tahpa eima hmô. Khazohpa O cha Kyhpachâ kawpa nata daodo kawpa ta mohôh awpah eima châ nota eima sapa ta â zie leipa hmo – pa-ôpazypazy eima tao ngâthlâh ha tyhpa vâna heta Khazohpa ta maniah a parao palie hrapa châ thlâh ha aw vei ma??? “Ahyrai ta Khazohpa O cha a parao khiatala, cha chyhsa cha Khazohpa ta a parao hra aw” ta tlôh ta.

Khazohpa ta kyh a pachâ kawpa chyhsapa chata Khazohpa O cha pa-ôpazypa châmaih hmâpa ta a parao ngâthlâh ha aw ma?

Khazohpa kyh a pachâpa nata Ano a hmô pasia kawpa chyhsa chata pa-ôpazypa a tao tyh nahta pangiasa thei va na….. “He he kyhpachâna a châ, Ano biepiepa lymâ hawhta eima ypa he;……” tahpa ta, 2 Zawhana 6 pa liata tah tlôh ta.

 

 

 

Source: Board of Mara Literature, MADC, Siaha.

Comments










Popular posts from this blog

Naupang Doctor te

*NAUPANG DOCTOR-TE: (Specialists).* _*1. Dr. Lalhmuchhuaka*_ J.L Medicine chung,Hospital Road Timing:Zing Dar 7:00 - 9:00 leh tlai dar 3:00 onwards  Clinic no: 0389-2321242 _*2. Dr. C. Biakmawia*_ Life Drug Centre, Hospital Road Phone: 9862682355 Timing - 6:00 am - 7:00 pm _*3. Dr. Lalremruati Sailo*_  Zoram Drug Store, Hospital Road Phone: 0389-2327676 / 9436142485 Timing: 3:00 pm onwards _*4. Dr. Lalbiakkima*_ Mizoram Health Care, Hospital Road Phone: 0389-2314523 _*5. Dr Samuel Sailo*_ Synod Hospital -Wednesday, Friday, Saturday Frasers -Tuesday,Thursday Ph no-0389-2310123 Millenium Centre-Monday, Thursday (1-4pm) Ph no-9862365304 _*6. Dr John Malsawma*_ Synod Hospital - Monday, Tuesday, Thursday, Saturday Frasers : Wednesday Ph no-0389-2310123 Millenium Centre-Friday(1-4pm) Ph no-9862365304 _*7. Dr. Chhuankimi*_ Venus Dawr chung, Upper Bazar. Timing: 3:pm onwards Clinic No-0389-2324780 _*8. Dr. Mahriati*_ Alpha Hospital, Kulikawn. Timing: 11.30 A.M

Mizo Sermon Thar - KHAWVELAH KRISTIAN CHHUNGKUA A PAWIMAWH

(Thufingte 24:11,12) Thi tura hruaite chu chhan la, thah mai turte chu chhan chhuak thuai rawh. Rev.C.Thalai __________________________________________________________________ Tunlai khawvelin a buaipui ber chu Zu leh ruihtheih (drugs) hmangin Setana a alo inrawlh a, chuvangin thalai sâng tam tak nitin leh thla tin thihna thlân khûr lamah an liam zo tawh a. Khawvelah an lo kîr leh thei tawh lovang. Tunlai hun hi hmanlaia Aigupta rama fa tir lalthuthlenga thu Pharoa fa tir atanga bawihnu fa tir thlenga an thi (Exodus 11:5-6), ang mai khan tunlaiah chhungkuaah fa u ber atanga fa naupang ber thlengin anmahni duhzawngin an awm vek tawh a. Chuvangin chhungkaw tam tak chu lungngaihna chhûmpui thimin a khuh mek a nih hi. Tunah Bible thu i lo ngaithla ang. "Kan tukverhahte thihna lâwn lûtin, kan lal inahte a lût tawh si a; Pâwn atangin naupang tibo tur leh, khawlai ata tlangvâl tibo turin." (Jer.9:27) ti a zawlnei Jeremian a lo sawi kha tunah hian a lo thleng ta a

Mizo Sermon Thar - THUTAKA HARHNA KAN NGAI

           SAM 119: 25 Rev. C.Thalai Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.  “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.  “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II