Rev.
C.Thalai
Ruahtui zawng zawng hi tuifinriatah an
tla a, nimahsela, tuifinriat chu a khat thei chuang lo. Thuhriltu 1:7. Pathianin
thil siam zawng zawng hi awmze nei veka a siamte an ni a. Chuvangin Sam ziaktu
chuan Pathian kut thenthiamzia leh a ropuizia hetiang hian a lo puang chhuak a.
‘LALPA
chu Pathian ropui tak a ni a, Hnam dang pathiante chunga Lalber a ni. Lei
chhûngril thûk tak te a kuta awm a ni, Tlâng sângte pawh a tâ a ni. Tuifinriat
hi a tâ a ni, a siam a ni si a, khawmual pawh hi a kut chhuak a ni e’. Hemi thu chhûng atang ngawt pawh hian Pathian chu awih
tlâk, rintlâk leh innghahna tlâk a nihna kan hmu. Sam 95: 3-5 en ila.
Tuifinriat ka hmu ve tawh: Kum 1964 ah khan Kohhran press lei turin Pu Tialo nen
Sabyhpi atangin Rangoon lamah kan kal a, Rangoonah ni 9 kan châm a, kawng tam
taka min buaipuitu ber chu Pu Tohra, Hlôma khua, Rangoon a sorkar hna thawk a
ni a. A chungah kan lâwm êm êm a ni. “Pastor, Rangoon i rawn kal tâwpna pawh a
ni thei a” tiin Rangoon chhûnga hmun pawimawh zawng zawng min fan pui vek bawk
a, a chungah ka lâwm takzet bawk a ni.
Pu Tialo chu press khâwl phur tur a nih
avangin Lawnga kal tur a ni a, kei erawh chu Pu Hlaochia, Burma sipai bel 3 bel
(Saikao khua) nen Rangoon atanga Akyab panin darkar 2 zet kan thlâwk thung a.
Tuifinriat chu benga ka lo hriat leh ka ngaih ai mah hian a lo lian zâwk a,
khawthlang lam zawng zawng chu eng mah rêng rêng hmuh tur awm lovin, mit tlin
tâwk thleng chu, tui hlîrin a khat vek mai a ni.
Tuifinriat chunga kan thlawh lai chuan he hla hi ka sa zêl
a.
‘Tuifinriat ang khawngaihna hi
Tuilian angin ngilneihna
Nunna lal thianghlim thihna hi
Ka nun chhanin a thi a
Tunge a khawngaih hai derin
Fak lo tunge awm thei ang?
Tâwp lo tawpin vân awm chhûngin
Amah an theihnghilh lovang.
Thlawhna atang chuan Tuifinriat chu ka zu en a, Pathian
hmangaihna lenzia leh zauzia nasa takin ka lo hre ta a. Rev.K.Teitu thusawi
pawh ka hrechhuak hle. Hetiang hian a sawi a- “Nu, rinna tlêm ho zawng zawng
hian Tuifinriat, Pathian thiltihtheihzia leh a râpthlâk zia hi han hmu vek thei
na se chuan, Pathian chu an ring vek thei ngei ang mawle” tiin a lo sawi a ni.
Chu lo pawh chu ka rilrua lo awm leh
chu hetiang hian a ni a. Khawvel a mihring zawng zawng hian kan thawmhnaw hi su
ta ila, tuifinriat mel 50 a zau leh thûk lai hmang ila kan awh zo lovang a, in
zo vek dawn ta ila, in zawh sên rual a ni âwm love, tih te ka ngaihtuah a.
Chu chauh pawh nilovin, hetiang hian ka rilru ah a lo awm
leh a. Pathian khawngaihna Tuifinriat chu misualte ngaihdamna lui hnâr a nihzia
a lo lang leh a. Bible thu a lo lang zut zut hlawm a:
“In
sualte chu sen-lâr angin sen tawh mah sela, vûr angin a vâr ang. Senduk angin
sen tawh mahsela, berâm hmul angin a vâr ang” Isaia
1:18. Hla siamtu hian an lo hmu chiang hle.
Aw,
khawiahnge Chhandamtu chuan Aw
ka ngai che Lalpa tunah
Lungngaih
hrehawm a tuar? Ka
sual tlêngfai turin
A
hmêl duhawm tak hmuh ka châk Khawvelah
hian nangmah lo chu
Hmangaih
thisen luanna Faina
dang a awm lo
Aw, i thisen luang ka hmuh chuan
Ka sual kaidum a sil fai ang;
Lungngaih mangan a bo tawh ang
Aw
i thisenah chuan
He hla hian Isua thisen chu sual faina tui hnâ a nihzia a
tilang chiang hle a ni.
Khawvelah hian lui tam tak a awm a,
‘Thihna lui’ vek an ni. Tuipui hi chhim lamah chuan lui hmingthang a ni a,
amaherawhchu kum tin mai hian Tuipuia thi an tam êm êm thin. An ruang takngial
pawh hmuh loh tam tak an awm bawk a ni.
Tuifinriat phei chu khawvela lui zawng
zawng intawhkhâwmna hmunpui a nih avangin engti tluka thi tam ang maw!
Tunah nunna leh damna lui chanchin ka
zir ang: A hmasa berah chuan Zâwlnei Ezekielan
thlarau mit atanga nunna lui a hmuh dan chanchin lo en ila. “Chutichan ani
chuan ka hnenah, ‘He lui khaw chhak ram
lama luang hi Arab rama luang lût tur a ni a, tuifinriatah a luang lût ang a,
tuifinriat tui al chu tui thianghlimah a chanitir ang. Chutichuan luite chu an luanna apiangah thilnung nei tinten damna atan
an hmang ang a, sanghate an awm tawh ang. Tuifinriat a thianghlim nan a luanna
apiangah thil nung nunna neiten an nunna atana an hman atan he lui hi lo luang
a ni,” tiih Ezekiel 47: 8,9 in min hrilh a, thu lâwmawm tak a ni.
Bible atanga kohna aw duhawm kan
ngaithla leh ang: Isaia 55:1 “Hawh u tuihâl apiang te u, tuiahte hian lo kal rawh u, tangka sum nei
lote pawh lo kal ula, lei ula, in rawh u. Lokal ula, Uaiin leh hnutetui tangka
sum lovin, man lovin lei rawh u” tiih min sawm a ni.
Ruaitheh ropui bera Isua thu sawi: Tuihâl apiang chu ka hnenah lo kal sela
in rawh se. Pathianin lehkha thu in a sawi angin a kawchhûng atangin nunna tui
chu a lo luang ang” tiin thu ropui tak a lo sawi a ni.
Johana 7:37.
Sâwmna aw duhawm tak: Tuihal apiang lo kal sela, nunna tui hi
a duh apiangin a thlâwnin in rawh se” Thupuan
22: 17. He hla hi kan thupui tanpuitu atan lo târlang leh ila.
Hetah hian nunna tui a luang Tin,
he tui hi hre reng langin
Kalvari a lo chhuak chu Midang pawh hriattîr ve la
Mi tam tak dam nan a luang Mi
tupawhin a in chuanin
Tupawh a in duh zawng chu A dam ngei ngei ang ti la
Nang Eden natna veitu kha Isua
ropuina a ni ang
Lo kalin va in thuai la Van angel thianglimte khian
Tin, Kalvari tui fîm tak kha Lâwm hla mak tak an aupui ang
I thinlungah a luang ang Kan Pa Pathian hmaah khian
Heta tangin chatuan thlengin
He
nunna tui hi a luang
Tho
leh faten a tui thianghlim
Chatuanin
an in tawh ang
Beram No nunna thianghlimin
Chhandamte
an inchâwm ang
Eden
thil hlui awm tawh lovin
Nun tharin an lêng fo vang
Pathianin tuifinriat leh lui tuite a
siam dan kan zir leh ang: Pathianin tuifinriat a siamte leh lui tui
zawng zawng a siamna ah ringawt pawh hmangin Sermon sawi thiamten han sawi ta
sela, Pathian ropuizia nasa takin a lang ngeiin ka ring. Hetiang hian han sawi
leh ila, khawvela lui lian leh hmingthang apiang hi zâwl leh tlâng sâng atanga
teh ni ta sela, kawr thûk zâwk lui apiang hi lui lian zâwk an ni zêl a.
Tuifinriat chu lui zawng zawng zîngah a awmna hmun a hniam ber a, lui zawng
zawnga lui lian ber a ni.
PATHIAN KHAWNGAIHNA TUIFINRIAT
Pathian hmangaihna chu khawvel leh
tuifinriat aia lian zâwk a nihzia Sam ziaktu in min hrilh a. “Aw Lalpa,i ngilneihna chuan vân a tawng a,
I khawngaihna chuan vân dum a thleng” tiin Sam 36: 5 ah min hrilh a ni.
Pathian hmangaihna chu keimahni kan in ngaihtuah aiin min hmangaih zâwk a ni. A
hmangaihna ina min hnaihzia chu kan taksa puma thuamhnaw kan inbelin min hnaih
ai mah hian min hnaih zâwk tih i theihnghilh suh ang u. A nunna ber min pêk
zawh vek thu Johana 3: 16 thu hi i hre reng ang u.
TUIFINRIAT LEH LUI ATANGA KAN ZIR TUR
Lui zawng zawng luan khâwmna chu
Tuifinriat a ni ang hian Krista Isua a awmte chu Krista tâ vek kan lo ni a.
Tupawh Krista a awm chu thil siam thar a lo ni a, thil hluite chu an ral ta a,
ngai teh u, a lo thar ta (II Kor.5:17). ‘Ka mi’ ni ngai lote chu ‘ka mite’ ka
ti ang a, hmangaih ngai lohvi chu ‘Hmangaihi’ ka ti ang. Chutichuan an hnena
‘Ka mite in ni love’ ka tihna hmunah ngei chuan ‘Pathian nung fate’ tihin an
awm ang (Rom 9: 25).
Krista nena inpumkhatna: Krista Isua rinna avangin Pathian fate kan lo ni vek ta
a..chutah chuan Juda mi a awm tawh lovang a, Grik mi pawh a awm tawh hek
lovang. Chutah chuan mipa leh hmeichhia pawh a awm tawh lovang. Krista Isuaah
chuan in vaiin pum khat in ni si a (Gal. 3: 26-28).
Zâwlnei Isaian a lo sawi lâwk- ‘Chhandamna
silhfente min sin tîrin, felna kawrfualin min tuam tawh si a’ tih thu lâwmawm
tak Isaia 61: 10 thu hi Isua Krista thisen felna chuan sualna zawng zawng min
hliah khuh vek tih entîrna a ni. Tunah chuan Krista khawngaihna Jubilee dâr ri
mawi mihringte tan a ri ta. Haleluia!
Kan thupuiah lût tawh ila- Khawvela lui zawng zawng hi an
luanna ram hla tak atanga rawn chhuak a, rawn luang zel an ni a. Phaizâwl
atanga lui te, tlâng ram atanga lui te an in ang lova, an tumna hmun
tuifinriatah chauh hmun khatah mihring angin an in tâwk khâwm thin a ni. An tum
hmunpui an thlen hma chu chau takin an rawn kal a, a châng chuan nipui hun a lo
thlen chuan ni a sat êm avangin an kîr leh a, lei hnuai lamah te lûtin, fûr a
lo nihin an rawn chhuak leh a, an luan ngai lohna hmunah te thlengin an lût a,
a châng phei chuan khâm sâng tak atang te in leh lêngkîr atang tein an luang
thla hum hum thin a. Mihring anga tawng thei ni ta sela, an hahzia thu sawi tur
tam tak an nei ngeiin ka ring tlat a ni.
Amaherawhchu chu an tum ram tuifinriat
an thlen atang erawh chuan an chauhna zawng zawng a bo vek a, engthâwl tak leh
lung muang tak leh zalên takin an awm ta a ni. Chutiang bawkin chhandam fate
chu khawvel harsatna chhûmpui chhah tak zîngah la lêng rih mah ila, min
chhandamtu hmêl duhawm kan hmuh hunah chuan kan lâwmna chu Rose pangpâr angin
chatuan atan a pâr tawh ang. Chutichuan chatuanin Pathian berâm no fakna ri
mawi tinrêng te nen fakna dai ngaihlohna hmunah chatuanin kan chêng tawh ang a,
a ropui tûr zia chu tunlaia building tha leh ropui, sum tam taka din mah ropui
kan tih chuan, chhandam fate chênna hmun, khawvel siam tirh ata tawh, ram a lo
buatsaih lâwk tawh chan theih phei chu engti tlukin nge a ropui anga, engti
tluka tha nge a nih ang a, engti tluka mawi ni ang maw?
Lalpa Isua, chu ram neitu ngei pawhin a
hnena chêng turin thu min tiam tawh a ni. Ava hlimawm êm! Johana 14: 2,3. A
tawp berah chuan he hla hi kan thupui tanpuitu atan ka rawn thlang a-
Krista kan chanpual a lo ni
Vânah
kan tâwk thin ang
Vân
luiah kan in bual ang/
Kan
Tlantu khawngaihna a ni
A
hausakna, a hausakna, a hausakna
Chatuanin
kan chang tawh ang (2)
Kalvari
khawngaihna Tuifinriat tih thupui hmanga tlinglo tak chunga Sermon ka lo ziak
hi, ka ziak aia tha in a chhiartu zawng zawng chungah Lalpan malsâwmna pe zêl
che u rawh se. Amen.
Comments
Post a comment