Mizo Sermon - Thlarau hnutetui kan ngai

(1 Peter 2:2)

-          Rev C.Thalai

“Nausen piang tharte angin thlarau lam hnutê, engmah pawlh loh chu châk rawh u. Chumi ah chuan chhandamna tling khawpa in than len theih nan”

Mihring tana pawimawh ber pakhat chu ei leh in kawng hi a ni a. Amaherawhchu ei leh in kawnga kan fîmkhur hi a pawimawh êm êm thung. Kan awrin a duh ang hlîr eiin in ta zêl ula, kan taksa tan a thalo mai ni lovin, kan nunna pawhin a tlin âwm love. Kan hriat angin thalai tam tak thihna chhan chu Zu leh Ruih hlo (Drugs) te ei in thin avang vek hian a ni a. Taksa thihna aia na zâwk chu thlarau thihna, chatuan meidîl hremna hmun chu, a nat tûr zia chu tawngkâ a sawi leh rin aia pawha nasa a ni dâwn a ni!

Tunah chuan kalna kawng pawimawhzia kan sawi lawk ang.

Kalkawng pawimawhzia entirnan hetiang hian sawi ta ila, Aizawl lama kal kan duh a nih chuan kan khua kan chhuahsan a, chumi atanga kan kalna tur kawng kan zawh loh chuan Aizawl a thlen theih dâwn lohva. Chuvangin, kawng pawimawhzia chu Bible in min hrilh a. Thufingte 14: 12 ah “Mi  ngaiha kawng dik ni âwm taka lang, a tâwp chu thihna kawng ni si a awm” tiin min hrilh. Zâwlnei Hagaian, “In kawngte chu chhût ngun rawh u” tia ziakin min lo zilh hau tawh a ni. (Hagaia 1:5).

Lei leh vana thu neitu Lal Isua ngeiin, “Kei hi kawng leh thutak leh nunna ka n;. Keimaha kal lo chu tumah Pa hnênah an thleng ngai lo” min ti a ni. (Johana 14:6). Bible in kawng leh kalkawng zawh tur a tih chu Bible thu hi a ni. Hemi avang hian hla phuahtu pawhin,

Pathian lehkha ka ring e,

Isua Thutak a hril e;

Van kalkawng thutak a ni e,

Vanah kan lâwn thei e.

Aw Bible, Aw Bible,

                                Ka ngai, ka thlahlel êm e;

                                Aw Bible, Aw Bible,

                                Pathian lehkhabu hi”

a lo ti a ni. Hla hi Pathian hmangaihna min hmuhtirtu a ni.

“Ka lâwm êm êm e kan Pa Vana min,

Bible ah a hmangaih min hrilh vangin,

A lehkhabua thil mak ka hmuh hi

Lal Isua min hmangaihna hi a ni.

Lal Isuan min hmangaih ka lâwm hlê,

                                Min hmangaih hle, min hmangaih hle;

                                Lal Isuan min hmangaih ka lâwm hle,

                                Keipawh min hmangaih e,

An lo ti a ni. A ropui hle.

Kristian chhûngkaw chakna thurûk chu Bible hi a ni

“He dân bu hian i kâ chu chhuahsan hlek suh se; chu mi thu ziak zawng zawnng chu i zawm tlat theih nan chhûn leh zân i ngaihtuah zâwk tûr a ni; tichuan i kawngte chu i lo titluang zel ang a, i lo hmuingîl zêl dâwn nia” (Joshua 1:8).

Bible hlutna kawnga entawntlâk ber mai chu Mary Jones-i, Welsh rama hmeichhe tleirawl, kum 15 a upa hi a ni. Bible a neih theih nan kum 6 chhûng tehmeuh mai harsatna tam tak paltlangin, mittui tla chungin Bible a nei thei tâwk a. Bible Society lo din chhan pawhhi Mary Jones-i hmalakna avang a ni a, ani hmalâkna azârah mitinin Bible chatuan nunna thu hlu ber mai an lo neih theih phah hial a. Lalpa kan Pathian chu chatuanin fakin awm rawh se. Amen.

Mary Jones-i Bible thu duh ber chu Sam 119: 1-176 chhûng zawng zawng hi a ni a. Mary Jones-i thuvawn an tih hial a ni. Mary Jones-i avangin Bible chatuan nunna thu hlu ber mai chu mi tin, milian leh mi rethei ber berte pawhin an lo nei thei ta a ni a. Chuvangin, Lalpa kan Pathian chu chatuanin fakin awm rawh se. Amen.

Sam ziaktuin Pathian thu pawimawhzia hetiang hian min hrilh,

“Aw, i dân hi ka va ngaina êm! Nilenga ka ngaihtuah thin a ni. (Sam 119:97)

“I thute hi ka tan a va thlum êm! A ni, ka kâ atân chuan khawizû aiin a thlum zâwk (sam 119:103) ‘I thu hi ka ke atante hian khâwnvâr a ni a, ka kawng atan êng a ni’ (119:105). ‘Chuvangin, i thupêkte chu rangkachak aiin ka ngaina a ni, A ni, rangkachak thianghlim ai pawhin’ (119:127). ‘I thu hi a thianghlim êm êm a ni; Chuvangin, i chhiahhlawh hian a ngaina a ni’ (119:140). ‘I dân ngainatute chuan thlamuanna nasa tak an nei a; Tlûkna rêng rêng an nei lo’ (119:165).

Bible ngaihlutute chu Kristaa mi ropuite an ni

Spurgeon-a te, D.L.Moody te, Billy Graham te hi Kristaa mi ropuite an ni a; an nuten Pathian thu chu hnutetui anga an naupan lai atanga an lo châwm seilente an ni.

Bible thiltihtheihzia

England lalnu Elizabeth-i pawh khan hetiang hian a lo sawi a, “England ram ropuina chhan chu Bible hi a ni” a lo ti a ni. America President 7-na, Andrew Johnson pawh khan hetiang hian a lo sawi bawk a, “Bible hi kan ram innghahna lungpui a ni a; chu chauh ni lovin, Bible hi America hrilhfiahna a ni a. State a thu neitu ber pawh a ni” a lo ti bawk.

An ram pawisa ah pawh hetiang hian an ziak a ni, “Pathianah kan rinna kan nghat” (In God We Trust) tiin.

Bible in, “A ram leh a felna chu zawng hmasa zâwk rawh u, tichuan chûng zawng zawng chu a pêk belhchhah dâwn che u a nia” (Matt.6:33) tih thu chu America chungah a lo thleng zel a ni.

British leh America hausakna chhan chu

Pathian ringtu an nih avangin Pathianin khawvelah a chawimawi bîk ram an ni. British ho an ropuina chhan chu an tawng English chu khawvela tawng a zawnga lal ber, khawvel ram tin tawng atana Pathianin a hman an ni.

America hausakna chu Pathian thil tha ti tura an intlânsiakna ber a ni tlat mai hi a ni. Chuvangin, khawvela Missionary tîr tam ber an nih avang hian Pathianin hausakna leh ropuina a pe a ni. Chuvangin, khawvela sorkar chak ber leh hmingthang an ni ta rêng a ni.

‘Thlarau hnutetui kan ngai’ tih thupui hmanga tlinglo tak chunga Sermon ka ziak hi mitinin Bible hlutzia leh pawimawhzia te, kum 200-300 nun na tur thu chauh ni lo, chatuan ata chatuan nunna thu a nih avanga beng nei apiangin an hriat theih nan leh mi tinin an lo hriatthiam vek theih nan Lalpa Pathianin malsawm rawh se. Amen.