Mizo Sermon Thar - VAN RAM CHU RETHEITE RAM A NI

Rev. C.Thalai

 “Unau duh takte u, ngaihtuah teh u, khawvel ngaiha mi retheite hi rinnaa hausa tur leh amah hmangaihtute hnena a ram tiam chang atan Pathianin a thlang lovem ni?” (Jakoba 2:5).

Lalpan ama hming avanga retheih tuartute leh harsatna tuartute tan “Ro chhe thei lo,bawlhhlawh kai lo leh chuai thei lo, vânah in tana dah chu in hmuh theih nan” tiin Bible in min hrilh a (I Pet.1:4).

Tunah Bible aw duhawm tak tangin kan lo ngaithla leh ang a. “Heng mite hi retheih natna atanga chhuakte kha an ni; an puante Berâm No thisena insufaiin an ti vâr tawh a ni” tiin upate zinga pakhat chuan a lo hrilhfiah a (Thup.7:13-14). Lal Isua pawhin, “Tupawhin mi zui a duh chuan hrehawm tuar  pawisa lovin nitin Kros pu in mi zui rawh se” a ti a ni.

Tirhkoh Paula chuan Lalpa hming avangin hrehawmna leh tihduhdahna a tuar tam hle a. Hetiang hian-“vawi tam tak an vuak hnu in tan inah an khung a.....an kê ahte chu thing kawl an buntir a” (Tirh. 16:22-31).

Chu chauh pawh a la ni lo, Lustra lamah te, Ikonia lamah te, Antiokei lam te a chanchintha a hril avangin Paula chu lungin an deng a, thi tawha an ngaih avangin khua atangin an hnûk chhuak a, a thi tawh anga an ngaih chu arawn harh leh, a lo nung leh  ta a. Chutichuan Paula chuan thu ropui tak mai a rawn sawi a, hetiang hian; “Hrehawm tam tak tuarin Pathian ramah kan lût tûr a ni rêng a ni” tia Tirhkohte Thiltih 14:22 thu hian rawngbâwltute min cho hle a ni.

Kohhran Upa pakhat chuan Pastor hnenah hetiang hian a zâwt a, “Kohhran hoten ka tlin lohna leh ka chanchin an sawi reng a, thil tha ka tihte pakhatmah an sawi duh si lova, chuvangin Upa ka nihna hi ka bânsan mai teh ang” a ti a. Pastor chuan hetiang hian a chhang a, “Chutiang a nih chuan Kohhranin an vaw ngai che em? i hmaiah chil an chhak ngai em? i lu ah hlînglukhum an khumtir ngai che em?” tiin a zâwt ve thung a.

Chutichuan Kohhran Upa chuan Isua Krista, misualte tana hrehawm, mualpho tinreng a tuarna zawng zawng chu a hrechhuak a, “Kei chu Lalpa tana hrehawm mualpho ka tuarna hi alo la tlêm lutuk a ni” tiin Pastor hnenah chuan a sawi a. Hrehawm tuarna nun hi Krista nun a ni a, chuvangin hrehawm tuar tam apiang chu Krista tan leh Kohhran tana rimtui an ni thin. “Chhandam mêkte leh boral mêkte tan Pathian hnena Krista rimtui hlan chu kan ni” (II Kor.2:15). Tirhkoh Paula rawngbâwlna a a chakna thurûk chu Krista avanga kawng tam taka hrehawmna a tuar leh harsatna a tawh thinte hi a ni.

Tunlai hunah pawh Kohhran chak anga langte pawh hi tawngtai tam leh kawng tam taka Krista tana thawkrim leh Krista ram tizau tu an ni zel bawk a ni.

Rawngbâwlna kawngah: Kan chanvo tur pawh chân huam a,in ngaihtlawmna a lei vaivuta kan bawh khuh lai hi Isua Krista a lalthutthlenga kan laltir lai a ni thin. Keimahni lalthutthleng sânga kan in pholan lai chuan Isua Krista chu kan ke hnuaia kan dah lai a ni thin bawk. He thu hi rawngbâwltu tinin kan hriat theuh a pawimawh hle.

Pathian mi ropui Rev.Dr.Wurmbrand chuan hetiang hian a sawi a-

1.   Pathianin ama hming avanga hrehawm tuar hi a phal a.

2.   Hrehawm tuarna hi Pathian malsawmna hnâr tha ber a ni, a ti.

3.   Hrehawmna tuar lova Pathian rawng bâwltute chu mi vânduai ber an ni, tiin a sawi bawk a ni.

Missionary ropuite tawngtaina. Hetiang hian India rama Missionary pahnih  te chu Tuipui kamah an tawngtai a- “Aw Lalpa, India ram mi zawng zawngten nangmah an chawimawi theihna tur che a nih chuan Tuipui kamah hian meiin min hâl ral vek rawh se” tiin an tawngtai a ni. An nunna hlu ber thlenga Lalpa tana an hlan vek zia a tilang hle.

Paula chuan Krista tana hrehawm tuarnaa a lâwmna thurûk hetiang hian a sawi a- “Ka hrehawm tawrhna zawng zawngahte chuan hlimna in ka khat a” tiin thu ropui tak a lo sawi chhuak a ni (II Kor.7:4).

Hrehawm tuarna hlâwkna chu Paula pawhin hrehawmna a tawrh tam poh veleh a lâwmna chu  a khat liam tih tawngkam a chhuah hian awmze thûk tak a nei a. Tui hi a len zawh poh leh lawng chu a thleng sâng ting ang hian Krista avanga hrehawm mualphona tuar tam apiangten khawvelina a neih ve loh lâwmna chuai theilo chu an nei a, an lâwmna chu a sâng zual zel a, hetiang hi vân lâwmna tem tawhte lâwmna chu a ni.

Tunlai khawvel intlânsiakna: Tunlai huna intlânsiakna chu khawpui lama pêm luh hi a ni berin a lang. Khawpuia pêm tur chuan pawisa (sum) nei apiang khawpuiah an pêm ta zel a nih hi. Khawvela ram hmingthang ber chu America ram hi a ni a. Chuvangin America ram lama pêm an tam hle a ni.

Entirnan Mizoram khawpui ber chu Aizawl a ni a. Khawpui 2-na chu Lunglei a ni a. Pathumna chu Siaha a ni. Chu chauh lo pawh tunah chuan District khawpui Mizoramah an tam ta hle a, chuvangin khawsa thei deuh apiang chu khawpui lamah an pêm zel a ni. Sorkar hnathawkte pawhin khawpui lama pêm an duh ta zel a. A chhan chu khawpui lamah chuan ei leh bar lam a tha zawkin, tu leh fate tana zirna sikul a tha zawk bawk a, chuvangin mi khawsa thei te chuan khawpui lama pêm an duh zawk a ni.

Amaherawhchu mi harsa leh khawsak lama harsa tan chuan khawpuia pêm pawh duh hle mah sela, pawisa (sum) neilo tan chuan han pêm ve ngawt chi a ni lova. Hmangaihna khawpui erawh chu khaw neitu Lal chu hmangaihna LALPA a nih avangin hrehawm tuarna atanga chhuakte chu an pumin Berâm No thisena silfaia, tih vâr apiangte tana buatsaih, ram chan tûr a ni. Lalpa Pathian, retheite min hmangaihtu chu chatuanin fakin awm rawh se.

Khawpui chanchin ka ngaihtuah apiang hian Missionary ropui tak mai Morrisona chanchin hian Vanram min ngaihtîr hle thin. Hetiang hian; Vawi khat chu America President Roosevelt leh Africa Missionary Morrisona chu Africa atangin a rualin an lo kal a, President Roosevelt-a chu ropui tak mai hian mi tam takin an lo hmuak huai huai a, pangpâr thi mawi tak takte an awrhtir a, Missionary Morrisona-a erawh chu chibai bûktu pakhat takngial pawh a nei lova. Morrison-a chu amah a in khawngaih ta hle mai a, Pathian hnenah a vuina thu leh rilru natna thu a sawi ta a, chutih lai chuan Lalpa hnen atanga a thinlunga  thu lo thleng chu, “Morrison, President Roosevelt chuan a ram a thleng tawh a. Nang erawh chuan i ram i la thleng ve hlei nem. I ram i rawn thlen ni chuan President Roosevelt-a lo hmuaktute aiin nangmah lo hmuaktu tur che chu a lêt za tam tak an ni dawn asin” tiin. Chumi atang chuan Pathian hnena a lo vui chu a inchhîr a, lâwmna mittui chu tui angin a biangah a luang ta zâwk a ni.

Missionary Morrisona-a chu America ram New York a thlen ni chuan tlâwm hle mah sela, vân Jerusalem, hmangaihna khawpui a thlen ni a a ropui turzia hi ringtute zawng zawng chanvo tur a nih a târlang chiang hle a ni.

He Missionary Morrisonan New York khawpui a luh ni a a tlâwmzia leh nidanga a ropui turzia hian thil tam tak min zirtir a. He leiah hian hrehawm tam tak tuarin vâkvai mah ila, chatuan khua a vâr hunah chuan Angel ten kawngkhar hawnna ni ropuiah min lo hmuak ang a, hmangaih kal hmasate nen lâwmna kim neia kan intâwh khâwm hun turte ngaihtuahna tam tak min neihtir a. Chunglam enin Bible thu i ngaithla ang u.

 “Hetah hian khaw hmun nghet kan nei si lova, khaw lo la awm tur chu kan zawng zâwk a ni”. Heb.13:14; Phil. 3:20.

Van ram chu retheite ram a nihna lanna chu mihausa leh mi rethei Lazara dinhmun atang hian Vanram chu retheite ram a nihna a tilang a ni. Lk.16: 19-30.

Ro chhe theilo, Krista thisen zara chan tur chu engti tlukin nge a ropui ang a, engti tluka mawi nge a nih ang aw?

Vanram chu retheite ram a ni tih thupui hmanga ka sermon ziak hi, a chhiartu zawng zawng chungah Lalpa Isua Krista khawngaihna awm rawh se. Amen.