Mizo Sermon Thar - THUTAKA HARHNA KAN NGAI

          SAM 119: 25

Rev. C.Thalai

Thutaka harhna kan neihloh avang hian Camping te, Crusade te han nei thin mah ila, hun rei a daih ngai thin lo. Speaker ten khua an chhuahsan atanga reilote hnuah a reh leh thin. A chhan chu: Pathian tak tak atanga kan harh loh vang a ni. Chuvangin Sam ziaktu chuan thutak atanga harh turin min hrilh a ni.

 “Ka nunna hi vai vutah a bet tlat a, i thu ang zelin min tiharh rawh”  alo ti a. Harhna kawngah chuan sual simna tello harhna hi a hlauhawm takzet a. Harhna diklova harhna chang chuan chapona an nei a, Pastor te, Upate hmuhsitna an nei thin. Bible thu ilo ngaithla ang.

 “Pathianin chapote chu a dodal a, inngaitlâwmte erawh chu khawngaihna a pe thin” tiin min hrilh (I Pet.5:5). Thlarau rah pakua (9) zinga pariat(8) te chu in ngaihtlâwmna an ni. Inngaihtlâwmna nun chu Isua Krista nun a nih avangin Kristian nunah pawh inngaitlâwm nun chu nun ze mawi leh Krista tana rimtui an ni tih thu ropui tak mai, Tirhkoh Paulan a lo sawi a ni (II Kor.14: 15).

Kohhran kan impumkhat lohna chhan chu zirtirna diklo awm avangin a ni.

Tunah Bible atangin a der chungchang kan ngaithla ang. Matthaia 24: 23-26 “Chutih hunah chuan tupawhin in hnenah, ‘En teh u, Krista chu heta hi’ emaw ‘Sawta saw’ emaw an tih pawhin awih duh suh ang che u. Krista der leh zâwlnei derte an lo chhuak dawn si a; thei ang sela thlante meuh pawh an hruai bo theih nan chhinchhiahna leh thilmak ropui tak tak an ti ang. Ngai teh u, ka hrilh diam tawh che u hi. Chutichuan, in hnenah, ‘Thlalêrah a awm e’ an tih chuan kal chhuak suh u, ‘En teh u, pindan chhûngrilah a awm’ an tih pawhin awih duh hek suh ang che u.”

A der chanchin hi Lal Isuan ama ka atang ngeiin a lo sawi tawh a. Chuvangin zirtirna diklo hmangtu an lo chhuak mêk a ni. Chanchintha chu sum hmuhna atana hmang chanchintha hriltu pawh tunah chuan an lo chhuak mêk zel a ni.

Bible thu atangin lo ngaithla ila. “Unaute u, zirtirna thu in dawn kalh zawnga in zinga inthenna leh tlûkna chawk chhuaktute lakah fîmkhur ula, anni chu hawisan turin ka ngen a che u. Chutiang mite chuan kan Lalpa Krista rawng an bâwl lo, mahni pumpui rawngbâwl mai an ni. An tawng hmang thiam leh kam thatin mi mawlte chu an bum thin” tiin Tirhkoh Paulan min hrilh a ni (Rom. 16: 17,18).

Tunah chuan Bible thu atangin zirtirna diklo chungchang kan lo ngaithla leh ang a: “Mi tam takin Pathian thu hi sumdawn nan an hmang angin keini zawngin kan hmang ve lo ve; Pathian tirhin, Pathian hmuhah Kristaah chuan tihtakzetin thu kan sawi zawk thin” tiin Tirhkoh Paula chuan a lo sawi a (II Kor.2:17).

Zirtirna diklo lakah hian Apostolte kha an lo in vêng nasa hle a, hetiang hian: Zâwlnei tupawh ei tur dil thinte chu Zâwlnei der an ni tih in hre tur a ni. Chutiang bawkin tangka sum dil thin tute chu Zâwlnei der an ni in ti tur a ni. Apostolte chu Lalpa Isuan ama ai awh a, khawvela chanchintha hril tura thuneihna a pêk te an ni a. An zirtirnaah chuan zirtirna diklo atanga kohhran humhim chu an tum ber a ni. Apostolte ang khan Kohhran humhim a, kan rama zirtirna diklo atanga humhim hi Pastorte leh Upate mawhphurhna pawimawh tak a ni tih i hria ang u.

Kohhrana harsatna kan tawh thin na chhan chu Pathian thudik kan tan ngam loh vang a ni.

Lal Isua thusawi lo ngaithla ila. Matthaia 10:32,33, “Tupawh mite hmaa mi tan apiang kei pawhin ka Pa vana mi hmaah ka tan ve ang. Tupawh mite hmaa mi phat erawh chu kei pawhin ka Pa vana mi hmaah ka phat ve ang” tiin thu min tiam a. Khawvelah mi ropuite leh ministerten thu an tiam thin a, an tiam lai chuan an rinawm hle a. Nimahsela an thu ang chiah chiah chuan an rinawm leh ngai lêm thin lo. Lal Isua erawh chuan a kâ maia thu min tiam lovin a nun zawng zawng min pe vek zâwk a ni.

Tunah Bible thu hlu ber leh lâwmawm ber kan ngaithla ang: Pathianin khawvel a hmangaih êm êm a, chutichuan a fapa mal neih chhun a pe a. Amah chu a ring apiang an boral lohva, chatuana nunna an neih zâwk nan” (Johana 3:16).

Hmangaihna thu duhawm kan ngaithla chhunzawm leh ang. Miin a thian tana a nun a pêk aia hmangaihna nasa tumahin an nei lo (Johana 15:13).

Nun pêkna khawpa hmangaihna: “Kei Berâm vengtu tha ka ni, berâm vengtu tha chuan a berâmte tan a nun a pe” tiin Bible in min hrilh (Johana 10:11).

Berâm chungchang kan en chhunzawm leh ang:

Berâmte chu a neitu in a duh chuan an hmul a mêt a, thawmhnawm lum an siam mai thin a ni. A sa pawh chu a neitu in a duh hun apiangah talhin a ei mai thin bawk a ni.

Lal Isua erawh chuan a letling zawngin, a berâmte tan a nunna hlu tak a hlan a. A berâmte chu tutenge ni? Nang leh kei hi kan ni. Lalpa Isuan a nunna min pêkna chanchin hi he hla siamtu pawh hian thlarau lam atangin a lo hmufiah hle a ni!

          En r’u Pathian Berâm No sual phurtu,

          A hming Kalvari tlângah chuan

          Thing ânchhedawng chungah chuan an khai kâng

          Ka tan a thisen hlu a luang chhuak.

                   Chhandamtu nâk thianghlimah chuan

                   Thisen leh tui a lo luang chhuak;

                   Ka thinlungin theihnghilh suh se,

                   Misual faina lui chu.

alo ti a ni. Kan tana Krosa a nun min petu chu chatuan atan chatuanin fakin awm rawh se. Amen.

Kohhran thanlen theihloh na chhan.

Hetiang hian sawi ta ila; Rev/ Pastor te, Pathian thu tak a nihna anga tan ngam lo kan awm avang hian a ni. Kan tan ngam lohna chhan pawh, miten min hua anga, kan hming a chhia ang tih vangin Pathian thu kan sawi huai ngam lova. Tirhkoh Paula erawh chuan hetiang hian a sawi a: “Mihring tilâwm ila Krista bawih ka ni lovang” a ti a ni. (Gal.1:10).

Tunlaiah rawngbâwltu thenkhatte chu nihna duhin an tuihal a, nihna chanvo an neih tawh loh chuan Kohhranah harsatna an siam thin zu nia! Krista rawngbâwltu tak takte ah erawh chuan Pension a awm thei lo. Mihring hmuh theih rawngbâwlna aiin hmuh theih loh rawngbâwlna a ropui zâwk, an ti thin. Mihring aia Pathian tilâwm an nihlawh zâwk. Chuvangin Bible in “Lalpa duhzawng chu engnge ni tih hriat thiam tum zâwk rawh u” min ti a ni (Ephesi 5:17).

Tunah chuan kan Kristianna hi kum 100 chuang kan lo kal ve ta a, chuvangin puitling kan ni tawh a ni.Pathian thu thiamna lamah Theology Doctorate thleng kan nei tawh a, a lawmawm êm êm a. Amaherawhchu Pathian thu a nihna anga sawi râwt duh lohna lam uar lutuk hi a tha lova ni.

Pathian thu in a tum pêl thak khawpa tizautute hi a tha lova. Pa pakhat chuan hetiang hian a sawi a; Pathian thu thlarau chaw ei tur aiin a chawtani (chutney)a tam zâwk mah thin, tiin a sawi a. Bible chuan, “miin thu a sawi chuan Pathian thu ngei sawi rawh se” min ti a ni (I Pet. 4:11). Chuvangin Bible thu hi a lal ber tur a ni.

Pathian thu ah thiltihtheihna a awm. “Pathian thu hi a nung a, thil a ti thei a, khandaih hriam tawn eng ang ai pawhin a hriam a. Nunna leh thlarau, ruhtuah leh thlîng phel hrang khawp hialin” (Hebrai 4:12) a ti a ni.

Jeremia 5:14 ah Pathian thu chu mei thiltihtheihna nena tehkhin a ni a. Jeremia 23:29 ah ‘Ka thu chu mei ang a ni a, lung chhut kehna tuboh ang a ni” a ti. Bible chhiar tam leh a thu zawmtu apiangte chu khawvela mi ropui leh hmingthang an ni zel a. Bible hi van kalkawng min hrilhtu a ni.

Chuvangin hla siamtu chuan,

          Pathian lehkha ka ring e,

          Pathian thutak a hril e;

          Van kalna kawng ber a ni e,

          Vanah kan lâwn thei e.

                   Aw Bible, Aw Bible,

                   Ka ngai, ka thlahlel em e;

                   Aw Bible, Aw Bible.

                   Pathian lehkhabu hi, a lo ti a ni.

 “Thutaka harhna kan ngai” tih thupui hmanga Sermon ka rawn ziah hi, ka ziak aia tha zâwkin a chhiartu zawng zawngte chungah Lalpan malsawmna pe rawh se. AMEN.