Mizo Sermon Thar - JUBILEE AWMZIA

Bible Text: Leviticus 25: 8-55.

Rev. C. Thalai

         

Israelte chuan kum 50-na ah Jubilee hi an nei thin a. A awmzia chu lâwmna hun tihna a ni ber a. Hemi ni ah hian berâm kî an hâm thin a, a hria apiangin Jubilee lâwmna thinlung pu chungin hetiang hian Jubilee an hmang thin a ni.

1.   Leibâ an in ngaidam tawn a.

2.   An thil neihte an in pe tawn thin a.

3.   Mitinin midang chungah thatna lantirin, midangte tana malsâwmna nih an tum thin a ni.

Jubilee awmzia chu ‘Zalenna’ tihna anga sawi theih a ni a. Jubilee ni ah chuan tawtawrâwt an hâm a, zalenna hun lâwmawm tak mai an puang thin a ni. Mi tupawh, Jubilee ni chu lâwmna ni a nih avangin anmahni in lamah, an ram lamah an haw vek tur a ni a. Keini in Krismas hun kan ngaihlu ang hian hmanlai Israel fate chuan Jubilee hi an ngaihlu ve a, chuvangin Jubilee chu Isua Krista thisenin sual thihna thim atanga min chhanchhuahna entirna a ni. Chuvangin Kohhran chu hmanlai Isarel fate an lâwm aia lâwm nasa zâwk tur kan ni.

Tunah Bible atangin zalên kan nihzia lâwmawm êm êm chu thinlung tak takin ilo ngaithla ang u. “Tin, dîp dâl lohvin kan lêng ang” tih thu Sam 119:45 ah kan hmu a. “Thuhnuairawlhte hnenah chanchintha hril tura Lalpan hriak mi thih avangin Lalpa Pathian thlarau chu ka chungah a awm; ani chuan, thinlung lungchhiate tuam tur te, salte hnena chhuahna thu sawi tur te, Lalpa lungawi kum thu leh kan Pathian phuba lâk ni thu sawi tur te, lungngai zawng zawng thlamuan tur te, vut aiah pangpâr thihrui te, lungngaih aiah hlimna hriak te, nguina thlarau aiah fakna silhfên te an hnena pêkah Zion-a lungngaia awmte tan ruat tur tein mi tir a ni...” (Isaia 61.1-3).

Lal Isua ka atanga thu chhuak chu, “Tin, thutak in hria ang a, thutak chuan bawih a bân ang che u...” (Johana 8: 32). “Chutichuan Fapain bawih a bân che u chuan in chhuak tak meuh ang.” (Johana 8:36). “Sual lak ata chhuahin in awm a, felna bawihte in lo ni ta a, chuvangin Pathian hnenah lâwmthu awm rawh se” (Rom 6:18). “Chutichuan tunah zawng Krista Isuaa awmte tan chuan thiam loh chantirna rêng a awm  tawh lo. Krista Isuaa Nunna Thlarau dân chuan sualna leh thihna dân ata chu mi tichhuak tawh si a” (Rom 8: 1,2). “Chumi avang chuan tupawh Kristaa a awm chuan thil siam thar a lo ni a; thil hluite chu a ral ta a; ngai teh u, a lo thar ta.” (II Kor. 5:17).

Tunah chuan kan Lalpa Isua Kristaa awmte chu Eden bawhchhiatnaa awm tawh lovin zalên kan lo ni ta a, Haleluia, Lalpa Pathian chu chatuanin fakin awm rawh se.

Zalên kan nihzia Bible atangin kan ngaithla leh ang. “Zalên in ni a, nimahsela in zalênna chu sual khuh nan hmang lovin, Pathian bawiha awm nan hmang zâwk rawh u.” (I Pet.2:16). “Bawih ni lo turin Krista chuan min chhuahtir kha, chutichuan ding nghet ula, bawih nghâwngkawlah chuan tâng leh tawh suh u.” (Gal.5:1).

Kan thupui tanpuitu atan he hla hi ka rawn thlang a.

1.    Aw Chhandamtu, sual leh buaina kârah hianin

 Thlarauvin min hruai ang che;

I thisena i tlansate suala hliamin,

Lâwmna luipui luang lai an châwl e.

                             Lâwmna luipui luang rawh se,

                             Khawvel hrehawmah hian;

                             Van Lal Fapa, sual tlantu,

                             Ka hmaah pâr mawi, lo châm reng rawh.

2.    Thil dang aiin i ropui e, ka Chhandamtu,

I kut chhuak pâr kan lâwm e;

Thil siam aiin i mawi zual e, ka Chhandamtu,

I hmangaihna hmêl kan sawi thei lo.

3.    Lei hi Lalpa, i thilthlâwn pêk hmasa a ni,

Ka chhiar sêng lo lei lâwmna;

Vân hmun ropui, i malsâwmna famkim a ni,

Kalvari tlângah kei min pe e.

Jubilee hlutzia leh a lâwmawmzia ka lo ziak leh ka tum aia tha zâwkin, a chhiartu zawng zawng chungah Lal Isua Krista khawngaihna tâwp ngailo chu lo awm reng rawh se. AMEN.