Mizo Sermon Tawi - Hmangaihna ka theihnghilh theih loh chu

- Rev. C.Thalai

Kum 1984 Khôpai Presbytery  ka kal tuma thil thleng: Chhaolô atangin Tisi khuaah zan ka riak a, Tîpa Local KNP ten thingpui min lo buatsaih sak a, chumi hnu chuan Khôpai lam ka pan a, kei lah chuan pheikhawk tâwt tak mai hi ka bun pek alawm le; pheikhawk tâwt bun hahthlâk zia leh min tih nat zia chu tawngka maia sawi ai hian a na zâwk. Chuvangin, Khôpai thleng thei dinhmunah ka ding tawh lova, ka lungngai hle mai a; awm ngaihna tak pawh ka hre tawh lovani. Chulai hmun chu, sipai ho barrick bathlara kan kal lai hi a ni a.

Chutih lai tak mai chuan, Motor a rawn lang hlawl mai a, Macha RT Zachônô (Isaac-a Pa) chuan, ‘Va chuang rawh’ min ti a, Machâ Zachônô-a chuan, “Kei chu ka lo chuang ve lovang e, Ka pa Pawly Pa hi ka aiah chuang zâwk rawh se” min ti a. Chutah zet chuan kei chu ka lawm êm êm mai a, lâwm thu pawh sawi tha hman lovin, boruak dang a awm leh pal hlauh ang e tiin lawm êm êm in Motor chhûngah chuan ka lâwn ta hmak mai a. Thutna tha tak maiah hian min thut tîr a. Machâ Zachônô-a erawh chu ke in a kal zel a, zânah Khôpai khua chu a lo thleng ve a ni.

Machâ RT Zachônô-a hi mi rethei leh chhia te hmangaihna ngah tak mi a ni a. Chuvangin, a chungah ka lawm tak zet a, ka damchhûng hian ka theihnghilh thei ngai lovang.

Joshua hnenah Lalpa Pathianin thu a pê ang khan a chungah a thleng zel ni hian ka hre ve a. “He dân bu hian i kâ chu chhuahsan hlek suh se; chu mi thu ziak zawng zawng chu i zawm tlat theih nan chhun leh zân i ngaihtuah zâwk tûr a ni” (Joshua 1:8) a thupêk ang hian. Machâ Zachônô-a chungah Pathianin a thiltihtheihna a tilang tak tak a. Machâ Zachônô-a hi Krista ram leh Kohhran tana mi in phal tak a ni bawk a ni.

Tunah Bible thu duhawm tak kan lo ngaithla ang a: “Duh takte u, i in hmangaih tawn teuh ang u; hmangaihna hi Pathian laka chhuak a ni si a; mi tin hmangaihna nei apiang Pathian hrin an ni tawh a, Pathian an hre bawk a. Hmangaihna nei lo chuan Pathian a hre lo; Pathian chu hmangaihna a ni si a” (I Joh. 4:7-8).