Mizo Sermon - NOVA LAWNG LEH TITANIC LAWNG DANGLAMNA

Rev. C.Thalai

British lawng lian ‘Titanic’ an tih chu a hun lai chuan mihringte kutchhuaka ropui ber anga sawi a ni. A tîra mawhphurtu ber chu Thomas Edward a ni; a chhûng chu pindan 4-a then a ni a, pindan pakhatah tui lût mah sela, pindan danga tui lût thei miah lo tura siam a ni a, chhâwng sâwm leh pakhat (11) a sâng a ni. An zin chhuah vawi khatnaah chuan an hlim êm êm a, lawng chhûngah chuan mi 2,000 chuang an chuang a ni. Chungte chu mi ropuite, sumdâwng te, nuam tâwla zin te, nupui pasal innei thar te, intihlim  tura zin te an kat nuai bawk. Chuvangin miten, “Intih hlimna lawng” tiin a hming an phuah hial a ni. Chu lawngah chuan Pathian tihtu mi tlêmte an tel ve a ni.

Southampton an chhuahsan dawnin Pi Albert Caroll an tih chuan, “In lawng hi tui hnuaiah a pil thei tak tak dawn em ni?” tiin a zâwt a. Anni chuan, “Ka Pi, i Pathian pawhin he lawng hi a tipil thei lovang” tiin an chhang a. Pathian aia Titanic lawng chu an rin zâwk avangin California Lawng chawlhna atanga thuthawn (Message) an dawn, “I lawng khalh ka muangchângin kaltîr rawh, I hmaah khan vûr tlang lianpui sut tur a awm e” tih thu chu hre reng mahse, lawng pu Hichen Robert-a chuan Titanic lawng lian leh tha chu a rin êm avangin chak takin a khalh a, vawi thum lai thu thawn an hmu na in, pawisa lovin lawng tukverhte chu khârin an mutsan ta mai a.

New York atanga Atlantic Tuifinriata mêl 1600 vel an kal lai chuan an la hlim hle a, him taka an la awm avangin thenkhat an mu a, thenkhat an inchhaih a, thenkhatin zu an in a, thenkhat lo infawp tâwk lah bo lo. An hlim vanglai tak 1912 April ni 14 zanah erawh chuan Titanic lawng chuan thawm riva rêng a nei ta lo, a reh vung vung mai le.

An hlimna leh nawmchenna zawng zawngte chu lungngaihna leh tahnaah a lo chang zo ta. Mipa puitling hlir 1500-te chu thihna thlân thim panin feet 12,000-a thuk tui hnuai lamah chuan an pil bo zo ta a.

He zana kristian, Krista zuitu mi tlêmte erawh chu an lungngai lova, an thla a phâng hek lo, mi dangte lungngai leh thlaphâng taka an awm laiin hlim takin he hla hi an sa rual a,

         

“Dam chhûng mi hmuak apiang i tirh ni se,

          A nuam nge a hrehawm engpawh nise;

          Ka mumang lamah chuan i lam hnaih ka duh ang,

          I lamah min hîp rawh, Lalpa Pathian” tiin.

Mipui lungngai leh thlaphâng takte pawh chuan an tih theih hnuhnung ber chu tiin he hla hi an zawm ve a, he hla sa chung zel hian tuipui thûk takah an pil bo zo ta a ni. Krista thisen hlua tlan tawhte tan chuan, “Pa atanga chhuak thlamuanna” , khawvelin a neih loh chu an neih tawh avangin an hlimna leh lawmna, thlamuanna te chu engmahin a tibuai thei tawh ngai lo. Lalpa Pathian chu fakin awm rawh se.

A nih leh keini ve hi, eng lawngah nge kan chuan ve le? Kan in ngaihtuah chian a hun tawh takzet a ni. Kan chuanna lawng hian thihna lam panin nge min hruai a, nunnaah? Kan chuanna lawng hi a him em? Lawng hmingthang tak pahnih a awm a, a hmasa chu Nova Lawng a ni. Nova lawnga lût apiang (Nova leh a chhûngte, ransa chi tinreng leh sava chi tinrengte) humhimin an awm a ni tih Bible in min hrilh (Gen. 7: 1-24) a ni.

Titanic lawng chhûnga chuangte erawh chu lungngaih beidawn tâwp chu tuarin, tuifinriat ft.12,000-a thûkah an pil bo zo ta. Hringnunah hian lawng chi hrang hrang a awm a; duhâmna leh mahni hmasialna lawng te, zu leh drugs lawng te, hmingthan duhna lawng te, mipat hmeichhiatna lawng te, sum ngainatna lawng te, Pathian aia mihringte thiltih rin zâwkna lawngte hi tunlaia kan intlansiakna ber chu niin a lang ta. Siamtu Pathian aia a siam mihringte thiltih rin zâwk hi Pathian duh loh zawng thil a ni.

LALPA chuan heti hian a ti, “Mihring rinchhan a, mihring bân chakna ring a, LALPA hawisanna thinlung neitu chu ânchhedawngin awm rawh se” Jer. 17:5. “Khawvel hi a châkna chawpin a boral mek, Pathian duhzawng titu erawh chu chatuanin a awm reng ang” (2 John 2:17).

Lawng khalhtu a pawimawh. California lawng chawlhna atanga Titanic lawng Captain Hichen Robert-a hnena, “I lawng kha zawi muangin kaltîr rawh, i hmaah khan vûr tlang lian pui a awm e” tih thu message vawi thum lai thawna an hriattîr chu lawng Captain chuan engah mah a ngai lo va, chuvangin amah leh lawng chhûnga chuang zawng zawngte chu an boral ta vek a ni. Hetiang bawk hian khawvel nawmchenna, reilote hlimna lawnga kan chuan lai hian kan in ngaihtuah harh a, chhandamna lawng Isua Krista chu kan pan thuai loh chuan he boralna lawngah hian kan pil ve ngei dawn a ni.

“Khawvel lawmna a ral mek a,

A ropui leh mawina te;

Zion fate chauh lo chuanin,

Lawmna tak an nei love”

He khawvel leh a chhûnga thil awm zawng zawngte hi engmah lo mai vek an ni. In ropui chhâwng sawm chuanga sângte pawh hi lîrnghîng avangin minute khat chhûng leka chim chhe thei vek a ni. “Ni hnuaia thil awm tinreng hi engmah lo mai a lo ni e” ti a Bible-in min hrilh ang khan he kan zinna khawvela thil tinreng hi engmah lo mai a lo ni e.

Kan himna lawng erawh chu Isua Krista chauh hi a ni. Isua Krista thisen chu sual tlen faina lui a ni. Isua Krista chu rethei riangvaite tan chawlhna daihlim nuam ‘paradis’ a ni. Lusûnte tan lawmna luipui fîm tak ang a ni. Sual thim hnuaia thute tan êng a ni. Thihna thim hnuaia thute tan nunna a ni. Tui lian leh thlipui laka himna awm chhun a ni. Chuvangin hla siamtu chuan hetang hian a rilru ngaituahnate chu hla in a lo phuah a-

          “ Ka kulhpui i ni aw ka Chhandamtu,

          Ka himna i ni hmin hliahkhuh la;

          Nangma ângchhûngah ka thla chau châwlin,

          Min vêng fo la aw ka Chhandamtu”

Lal Isua chauh hi kan tan himna awmchhun a ni. Khawvel hi a châkna chawpin a boral mêk a, mi thianghlimte chuan khawvel hi awmna tlâkah an ruat lo (Heb.11:38). Doctor thiam an pung zel a, natna hri a pung ve zel a, Doctor thiamna a sâng tulh tulh a, hrilêng mak pui pui leh hlauhawm lutuk te an lo chhuak ve zel a, mithiamte pawhin damdawi an hre sêng tawh lo. Khawvel thiamna a sâng tial tial a, sualna a sâng ve zel bawk. Khawvelah hian Lal Isua tel lo chuan chan tâwka lungawina rêng rêng a awm thei lo. Finna leh thiamna pun chhoh zel tur thu hi, “Hriat thiamna a pung ang” (Dan.12:4) tiin Danielan a lo sawi lâwk vek tawh a ni.

Finna leh thiamna a sân rualin kan thih dan pawh a râpthlâk telh telh mai zawng a nih hi. Kan hriat theuh angin May 31, 2009-a thlawhtheihna, mihring 228 phur Brazil atanga France pan a thlâwk, Tuifinriat thûk taka tlate kha a râpthlâkzia sawiin a siak lo. Titanic lawng ft.12,000-a thûka pil mah kha râpthlâk kan tih hle laia vân sâng atanga tuifinriata zuk tla phei chu eng ang taka râpthlâk ni ang maw?!

Heng zawng zawngte hian mihring thiamna leh finna te innghahna tlâk a nih lohzia a tilang chiang hle. Tunah zawng Nova hun lai ang mai kha kan ni ta, “An ei a, an in a” tih thu ngawt pawh hian a tichiang hle a ni. Eizawnna kawngah pawh thudik a lal tawh lo va, a zuartu pawh, a leitu pawh, a chuang a liama hlêp theite chu mi finga ngaih an lo ni ta. Zu leh drugs zuartute phei chuan sum an hmuhna tur a nih phawt chuan tûr tha lo pawlh pawh an pawiti tawh lova, mihring nunna in tuar dawn mahse sum an hmuhna tur a nih dawn phawt chuan an pawisa tawh lo.

Nova hun lai ang mai khan nupui pasal inneih chungchangah pawh Kohhran dâna inneihna chu mi tam takin hnawlin, pawn thim hnuaia innei an pung tual tual bawk. Sumdawng lah an tam êm êm a, a zuartu nge tam zawk anga a leitu tih pawh hriat a harsa ta. Tirhkoh Paulan khawvel a chhuahsan dawn a Thlarauva a khah liam laia a thusawi hi ilo ngaithla teh ang-

Hei hi hria in, ni hnuhnungah chuan hun khirh takte a lo thleng ang. Mi, mahni chauh in hmangaih te, tangka sum ngainatute...hmangaihna pianpui lo te,..nawmchenna ngainatute..tia a lo sawi chu a thleng mêk zel a ni (II Tim. 3:1-5).

Tunah hian Nova hun laia nawmchenna leh Titanic nawmchenna lawng lianah khawvel hi a kal mek a ni. Hawikîr a hun ta, sim a inlamlêt a hun tawh takzet a ni. Unau, harh la, Chhandamna lawng, Isua Krista hi pan thuai rawh. He hla hi Sermon puitu atan thlang ila-

          Nova hun laia thil awmzia angin,

          Sodom khua ang khan;

          Mahni nawmsakna ngaihtuahin

          Aw Lalpa an phatsan ta che

                    Aw malin min awmtir suh

                    Ka hnenah awm zel la;

                    Zion tlâng mawi ka thlen hma chuan,

                    Ka Chhandamtu min hruai zel rawh.

Ka hmaah thlêmna tuipui a lo lian,

Boral ka hlau Lalpa;

Chu tuipuia pil tawh te chuan

Chatuan ram an thleng tawh lo vang.

Nova lawng leh Titanic lawng hmanga Sermon ka ziak hi a chhiartu zawng zawng Lalpan malsawm theuh che u rawh se. Amen.