Mizo Sermon - KHAWVEL HRANG HRANG RAM PATHUM CHANCHIN

Rev.C.Thalai

Hetiang hian thupui pathumin kan then ang.

1.           Khawvel ram pakhatna chu kan chênna lei khawvel chanchin a ni ang a.

2.           Khawvel ram pahnihna chu Tuifinriat ram boruak dang ram chanchin a ni ang a.

3.           Khawvel ram pathumna chu Vanram, hmangaihna ram, Angelte lênna ram duhawm chanchin a ni ang.

Lalpa Pathian engkim siamtu a nihzia Sam ziaktu atangin kan ngaithla ang. Lalpa chu Pathian ropui tak a ni si a, Pathian zawng zawng chunga Lal ropui tak a ni. Ama kutah chuan lei hmun thûk takte chu a awm a; Tlâng chhîp sâng takte chu a ta a ni bawk a. Tuifinriat hi a ta a ni, ama siam a ni si a; Khawmual pawh hi a kut chhuak a ni. Sam 95: 3-5.

“Vânte khian Pathian ropuizia chu a hriattir a; Boruak zau tak khian a kut chhuak chu a lantir thin a” Sam 19:1. Pathian a awm ngei a ni tih a lanna chu khawvela thil awm zawng zawng hi a siamtu a awm ngei a ni tih mihring thilung ah zirtir ngai lovin thu a nei thûk hle hlawm a ni. A thil siam ropui tak tak Vân te, lei te, ni leh thla leh arsi êng mawi  tak te siamtu chu Pathian a ni tih a thilsiam mak danglam zawng zawngte atang hian Pathian chu rin tlâk a ni.

Pathian thiltihtheihzia leh a remruatna mak tak chu tirhkoh Paula pawhin min hrilh bawk a. “A thil hmuh theih loh, a chatuan thiltihtheihna leh a Pathianzia chu, khawvel siam tirh ata fiah taka hmuhin a awm a, thil siamah chuan a lang a ni” tiin min hrilh. (Rom 1:20). Sam ziaktu pawhin khawvel leh a chhûnga awm zawng zawng hi Lalpa ta a nihzia a puang chhuak a.”Leilung leh a chhûnga thil awm zawng zawng hi Lalpa ta a ni a. Khawvel leh a chhûnga chêngte nen hian” tiin Sam 24:1 ah kan hmu a. Khawvel leh a chhûnga awm zawng zawngte tih thu hian a huam zau hle a. Khawvel leh a chhûnga thil zawng zawng hi a huam vek a ni.

Ramsa a siam ringawt pawh hi chi tam tak a awm a, hriat sên rual pawh an ni lova, an ei in pawh a in ang vek hek lo. Pathian remruat dan hi a mak êm êm vek mai a. Sa mak te, Sai te, Sazuk Zuk Chal leh Sakhi te, Saza Sathârte chu ramhnuaia hnim hnah ei tura a siamte an ni. Sakei te, Chinghnia te erawh chu sa ei tura a siam an ni.

Sazute lam chi ah pawh an in ang leh vek lova. Zubui lam chi chaw zawn dan chu leihnuaiah kawng nasa takin an lai a, chuta thing zung leh mau zung an hmuh apiangte chu lâwm taka ei chi an ni leh a. Thla neia thlâwk thei chi sava chi ah pawh chi tam tak an awm bawk a. An rawng pawh an in ang vek lova, a sena a siam te, a vâr te, chi tam tak an awm a. An tial dan pawh in ang lovin mawi taka a siam te vek an ni a. A kut chhuak thiamzia chu mihring tana hriat zawh leh chhui chhuah thiam rual a ni lo.

Rannung nunna nei a siam zingah aw mawi tak neia a siam Uleuh te, Lelte te, Thereng te, chu chauh lo pawh aw mawi tak tak nei a siam chi tam tak an awm a. Chung zawng zawng chu Amah chawimawi leh fak tura a siamte vek an ni. Chuvangin hla siamtu pawhin hetiang hian hla a lo siam a ni.

          Lei chunga thil nung zawng zawng

Thaw thei tinrengten

Lalpa chu an chawimawi a

          “Aw Lal ropui ber” tiin an zai a

a lo ti a ni. Lalpa Pathianin khawvel leh a chhûnga chêng tura a siam zawng zawng hi mihring mihrinna ngaihtuahna leh thluak leh finna in a chhui chhuah a, a hriat kim theih rual a ni lova ni. Chuvangin khawvel leh a chhûnga thil tinreng awmtirtu Pathian Chungnung ber chu fakin awm rawh se.

2. Khawvel pahnihna chu tuifinriat khawvel boruak dang foreign ram hi a ni. Khawvel 1-na rama zalen taka lêngte hian khawvel 2-na tuifinriat rama boruak a lo danglam tak avangin zalenna chu sawi loh, a chhûnga awm tur pawhin minute 10 aia tam awm tur pawhin an nunna in a daih lova. Chutiang bawkin tuifinriat rama chêngte pawhin khawvel 1-na boruak danglam daih rama chêng turin minute 10 pawh an nunna in a daih lo tho mai.

Khawvel 2-na tuifinriata chêng hote chu khawvel 1-na rama chêng hote nen an hmêl hmang leh pumrua, nungchang leh zia in anna rêng nei lovin, khawvel mak tak a ni a. Tui zawng zawng Headquarters (Hmunpui) chu tuifinriat a ni.

 “Lui zawng zawngte chu tuipuiah an luang lût a, mahse tuipui chu a khat chuang lo” (Thuhriltu 1:7). Khawvela lui tui zawng zawng infinkhâwmna hmunpui ber chu tuifinriat a ni a. 1964 kumah khan Kohhran tana Press lei turin Pu Tialo nen Rangoonah kan kal a, Rangoon atangin Akyab thlengin Pu Haochia, Burma sipai bel 3-bel, Saikao khua nen thlawhtheihna in darkar 2 chhûng zet tuifinriat chungah kan thlâwk a, tuifinriat chu an sawi ka hriat leh ngaihtuah ai mah hian a lo la lian zâwk mah a. Lalpa Pathian thiltihtheihzia râpthlâk tak hi a lo awm tak tak a lo ni. A mak tih mai loh chu sawi theih chi pawh a ni lo. Pastor Teitu chuan hetiang hian a lo sawi a, “Nu ho rinna kawnga luhlul hote hian Pathianin tuifinriat a siam râpthlâk tak mai hi han hmu ta sela, Pathian an ring vek ngei ang mawle,” tiin a sawi.

Tunah Bible atangin tuifinriat ilo en ho ang u. Sawtah sawn tuifinriat a awm a, lian tak, zau tak, sawtah sawn bawkvâka kal chi sawi sênloh an awm a, sa tê leh sa liante chu Sam 104:25 a kan hmuh angin tuifinriat chhûngah hian nunna nei chi hrang hrang engzât tak awm ang maw? Tuifinriat leh a chhûnga nunna nei zawng zawng chunga thuneitu Lalpa Pathian chu ropui leh chawimawiin awm rawh se.

Pathian chu tuifinriat leh thlipuite chunga thuneitu a ni. “Ani chuan thu a pê a, thlipui a tlehtir a” Sam 107: 24, 25 a kan hmuh ang hian May 12-June 7, 2008 a China rama lîrnghîng avanga thi te chu mi 69,103 an ni. An ruang hmuh loh mi 20,000 bâwr vel an awm tih hriat a ni a. A râpthlâk takzet a ni, heta mitthi zawng zawng hi an benga Chanchintha hre lote vek an ni lehnghal. An khawngaihtlâk takzet zet a ni. Hriat theuh angin Burma ramah pawh November 2008 ah khan thlipui avangin mi sîng tam tak an boral a, khawvelin a buaipui a nih kha.

India rama Orissa State ah pawh khan Kohhran tihduhdahna avangin Lalpan thlipui chak tak a tîr a, in leh lo nasa takin a chhia a, mi tam tak nunna pawh a boral tih hriat a ni bawk. Tunah Bible thu kan ngaithla leh ang. “Nang chuan leilung hi tui thûk chu puan angin i sintir a; Tuite chu tlâng chungahte chuan a awm po va, I zihhauna avang chuan a tlân bo va; I khawpui rî thâwm avang chuan a kal bo ta thuai a” Sam 104: 6,7. (Mk. 4:35-41; Lk.8:22-25; Matt.8:23-26).

Tuifinriat Sen chu a zilhhau va, tichuan a kang ta a: Chutichuan anni chu thlalêra hruai tlang ang maiin tui thûk takahte chuan a hruai tlang ta a. Sam 106:9. A thiltihtheihna zawng zawng avang hian Lalpa chu rin tlâk leh innghahna tlâk a ni. Tuifinriat leh leilung siamtu Pathian chu chatuanin fakin awm rawh se.

3. KHAWVEL PATHUMNA CHU VÂN SALEM KHAWPUI, ANGELTE LÊNNA RAM A NI ANG.

Vânram chu Judate ngaihdanah then thuma awma ngaihna an nei a, hetiang hian;

“Vânte leh vânte vân leh leilung leh a chhûnga awm zawng zawng hi LALPA in Pathian ta vek a ni a,” tiin Deuteronomy 10:14 ah ziak a ni.

Tirhkoh Paula pawhin Vân thumna a lâka awm chanchin a sawi ve bawk a. 2Kor.12: 2. Amaherawhchu vânram chu thihna lui râl ram chanchin a nih avangin Adama tisa leh thisena kan awm chhûng chuan hriat phal a ni lova, thurûk( thu thup) a ni. Chuvangin Lal Davida pawhin “Nangmah anna neia ka mit a vâr hun chuan ka lâwmna a kim ang” a lo ti a ni. “Ka mit a vâr tikah” tih awmzia chu thihna atanga thlarau lama mit tih vâra awm tur sawina a ni.

Chumi ringtute beiseina lian ber chu thawhlehna ni ropui hun lo thleng tur, Zâwlnei Isaina thawhlehna tur thu a sawi anga a lo hrilhlâwk ang a ni; Mitthite chu an nung leh ang a; ka mi ruangte chu an tho leh ang. Vai-vuta awmte u, harh ula, hlim takin zai rawh u; i daifîm chu thlaite daifîm ang a ni a, lei hian mitthite chu a paih chhuak dawn si a,” Isaia 26: 19.

Tunah Tirhkoh Paula atangin kan ngaithla leh ang. “In thi tawh a, in nunna chu Pathianah chuan Krista hnenah thuhrûkin a awm si a. Krista kan nunna chu a lo inlâr hunah chuan nangni pawh ama hnenah ropui zingah in inlâr ve ang”. Kol.3: 3-4.

Tunah Lal Isua tawngka atangin thawhlehna thu a sawi kan ngaithla leh ang. “Tihtak meuhvin, tihtak meuhvin ka hrilh a che u, a hun a thleng dawn ta, tûnah pawh a thleng tawh mêk, chutih hunah chuan mitthiten Pathian Fapa aw an hria ang a, a hria apiang an nung ang...Hêng hi mak ti suh u, a hun a thleng dawn ta, chutih hunah chan thlâna awm zawng zawngin a aw an hria ang a, an chhuak vek ang; thil tha titute chu nunna changin an tho leh ang a, thil sual titute chu thiam loh changin an tho leh ang.” Joh. 5:25-29. Mi tam tak vaivuta mû te chu an tho leh vek ang. Daniela 12: 2-3 en ila.

Thawhlehna ni ah chuan thla tam kum tam lo mu tawh te leh ala nunga te intawhkhâwmna tur chu engti tlukin nge a ropui ang a, engti tlukin nge a lâwmawm ang aw! Hla siamtute hian a ropui turzia an lo hmu fiah hle a ni.

Ni ropui a lo thleng dawn ta,

Kan nghâk Lal Immanuel

Sual leh ramhuai tlâwmna ni chu

          Chhandam fate kan zalenna tur chu.

Chumi hunah chuan lâwmin ka zai ang.

Lal ram buatsaih chatuan hmun ka chang ve ang a

Aw ava nuam dawn em

Aw, ava hlimawm dawn em!

Hlim tâwp hlau lovin ka lêng ang

a lo ti a ni. Isua Kristan ram min buatsaih hmun leh ram chu engti tlukin nge a that anga, a ropui ang aw!

Zâwlnei Isaia thu hril kha a lo thleng kim tawh dawn a ni. “Ka tlâng thianghlimah rêng rêng chuan intihnat a awm tawh lo vanga, tuite hian tuifinriat a khuh reng angin, leilung hi LALPA hriatnain a khat zo vek dawn a ni.” (Isaia 11:9). Chu ram khawpui chu hmangaihna khawpui a nih avangin zâwlnei Isaia thu sawi ang khan nat lungngaihna in min ti na thei tawh lovang a, hri hlauhawm ber Cancer natna te, Malaria natna te, pum pui natna te, thisen sâng leh hniam te, kal leh lung tha lo te, zunthlum vei te, Aids hri vei te, hmeichhe chhûl thalo leh nau chhiatna te, Motor accident râpthlâk tak te, sum tam tak sênga lungngai tak chunga Hospitala luh thinna te chu he hmangaihna khawpui kan thlen hunah chuan a awm tawh ngai lovang a, Zâwlnei Isaia hrilhlâwkna thu kha a lo thleng kim tawh dawn a ni.

 “Chumi khuaa awmte chuan ‘Ka dam love’ an ti lovang a,” Isaia 33:24 tih thu ang khan hmangaihna khawpuiah chuan damlohna leh natna hri rêng rêng a lût thei tawh lovang a, Eden natna awm tawh lovin, nun tharin kan lêng tawh ang.

Vân Salem khawpui ropui turzia: Khawvela khawpui hming thang Tokyo te, Delhi te, London khawpui te, Moscow khawpui te, New York khawpui te, Paris khawpui te hi ropui kan ti hle a nih chuan “Pathian khawpui leh chungchang thu ropui takin an sawi thin a ni” tih Sam 87:3 ah kan hmu a. Pathian khawpui Chungnung bera chênna khawpui chu engti tluka tha nge a nih ang a, a ropui tur zia chu aw! Kan ngaihtuahna ai hian a ropui zâwk daih dawn a ni.

Van Angelte lênna khawpui chu rangkachak thianghlima siam a ni a, khawpui chhûng zawng zawng chu dârthlalang lang tlang thei vek ang a ni tih Bible in min hrilh a. Thupuan 21:21 ah chuan Jaspi lung leh lunghlu chi tina siam a ni. Chu khawpui chuan ni leh thla leh arsi êngte, khâwnvar leh Electric êngte a ngai tawh lovang a, Pathian Beram No hmêl thatna chuan khawpui chhûng zawng zawng chu a ti êng vek tawh zâwk dawn a ni.

Hmangaihna khawpuiah chuan riltâm tuihâlna awm tawh lovin, lungngaihna leh thawpikna a awm tawh hek lovang a, khawvela kan hmêlma lian ber thihna chu hneha a awm tawh avangin mittui tlâkna leh lusûnna a awm tawh lovang a, Angel leh Serafim te pawh Pathian Beram No fakin chatuanin an lêng tawh ang. Lâwmna chu Rose par angin chatuanin a pâr reng tawh ang.

Khawvel hrang hrang ram pathum chanchin kim chang lo tak chunga Sermon ka ziak hi a chhiartu zawng zawng chungah Lalpan malsawmna pe rawh se. Amen.