-
Rev C.Thâlai
Martarte thih dan chanchin hi Ringtute
ngaihthlâk duh ber leh an ngaihsân ber a ni thin. Chuvangin Sam ziaktu pawhin “A mithianghlimte thihna chu LALPA ngaiha
hlu tak a ni” tiin min hrilh a ni (Sam 116:15).
Bible a martar hmasa ber chu Abela a ni
a. Kaina chuan a nau Abela hnenah, “Lovah
i kal teh ang” a ti a. Lova an awm lai chuan Kaina chuan a nau Abela chu a
bei a; a that ta mai a. Chutichuan, Lalpa chuan Kaina hnenah, “I nau Abela kha khawiah nge a awm tâk?”
a ti a. Ani chuan, “Ka hre nâng. Ka nau
vêngtu em ka nih?” tiin a chhâng a. Lalpa chuan, “Engtizia nge hetiang thil hi i tih le. I nau thisen aw chuan lei
atangin min au asin” Lalpa Pathian chuan a ti a ni (Gen 4:8-10).
Thuthlung Thar lama martar hmasa ber
chu Upa, Thlarauva khat, Stephana a ni (Tirh. 6:12; 7:58-60).
Rom sorkarin
Kristiante a tihduhdah dan.
Pakhatna ah, Kristiante chu khuaah a rûk a râlin an in hmukhawm thin a;
Committee an nei thin a. An committee thu chu, ‘Kaisara bân tîr a, lal dang
Isua chu Lala siam an tum’ tih thurûk an rêl a.
Pahnihna ah, ‘Kristiante chu Rom hmangaihtu an ni lova. Rom sipai nih an
duh lova. Rom sorkar thuneihna hnuaia awm pawh an duh hek lo. Khawpui enkawltu
Committee ah pawh an awm duh lo.’ Hengte avang hian Rom sorkar ngaipawimawh lo
angin an puh bawk a ni.
Pathumna ah, Kristiante chu phalna lovin an in hmu khâwm thin a; Lalpa
zanriah (Sacrament) te midangte hmuh lohva mihring sa ei angin an puh a. Chu
mai pawh nilovin, mipat-hmeichhiatna kawnga awm khawlo angin an puh bawk a ni.
Palina ah, Kristiante chu, ‘Rom sorkar dân an zâwm duh lova. Milem
Pathian an duh bawk hek lova. Lal ber Kaisara chu Pathianah an pawm lova,
puithiamte pawh engahmah an ngai lo,’ tiin dâwtin an hêk a.
Pangana ah, Rom ram Pathian tithinurtu angin an puh a. Rom chhûngah
chhiatna chi hrang hrang; tâm, tuilian leh lîrnghîng lo thleng te an lo awmin,
Kristiante chu Rom Pathian an ti lungawi lovah an ngai a, chhiatna râpthlâkte
an lo thlen chuan Kristiante an mawhchhiat zêl ta thin a ni.
Parukna ah chuan, midangten chanchintha an rin theih nana Kristiante
rawngbâwlna chu ringlotuten an haw hle a ni.
Pasarihna ah chuan, Kristian an nih avang hrim hrima tihduhdah an ni. Rom
sorkar chuan Juda dân an hriat êm avangin duhsakna an pe bîk a. Kristiante
erawh chu mithar an nih avangin an pawm lo thung a. Chuvangin, Kristiante chu
dân pâwn lama awm an ni ta a, eng hunah pawh, khawi hmunah pawh tihduhdah zêl
tûra tih an ni.
Tihduhdahna hmasa ber chu AD 64 ah khan
a ni a. Chu chu ‘Lalber Nero-an Rom khawpui
chu meiin a hâl a’ tia sawi a ni. Nimahsela, Nero thung chuan ‘Kristiante hâl a ni’ tiin a sawi ve leh
a. Chutichuan, Rom khawpuia Kristiante chu an man a, lunginah an khung a, mi
tam tak an khengbet a; mi tam tak an hâl hlum bawk a ni. He tihduhdahna kawngah
hian, Petera chu a letlinga khenbeh a ni a. Tirhkoh Paula erawh chu, Rom mi
nihna a neih avangin an khêngbet êm lova, a lu tan a ni thung. Martar a thite
ruang chu an la khâwm a, an hâl a ni. A vâp chu Rhine luiah an theh darh a,
nuihsawh chungin, ‘Tunah an taksate chu
tho leh thei tak ang maw?’ an ti a.
Lalber
thupêk chu heiang hian a ni:-
1.
Kristian
Biak in tihchhiat vek tur.
2.
Bible
leh Kristian lehkhabute tihchhiat vek tur.
3.
Kohhrante
hmanraw thianghlim chu chhuh vek tur.
4.
Kristiante
chu Pathian be tawh lo tura tih turin.
Thupêk an puan atanga hun reiloteah, ‘Puithiamte
man vek tur’ tih a ni a. Hetih lai huna tihduhdahna hi Rom khawthlang
lamah chuan kum 3 chhûng a awh a, Khawchhak lamah chuan kum 10 dawn a awh a ni.
Chuvangin, Kristiante chu an tiduhdah nasa hle a. Rinna phatsan duhlotute chu
an kut leh kete an tan chhum a; an mitmu an kher chhuak a; an beng an tan a;
Biak In te leh an Bible te pawh an chhuh vek a ni.
Hetiang hian Rom ram chhûng leh ram
pâwn lam thlengin Kristian tihduhdahna chu hmun tam takah a pung zêl a ni.
Tihduhdahna
hi Lal Isua pawhin alo sawilâwk vek tawh a ni.
“Ngai teh u, chinghne zînga berâm awm
angin ka tirh che u hi; chutichuan rûl anga fing, thuro anga pawikhawih lovin
awm ang che u. Nimahsela, mihring lakah chuan fîmkhur rawh u; rorêltuhote an
mantîr dâwn si che u a, inkhâwmna inahte an vua ang che u a, a ni, keimah
avangin hotute leh lal hmaah, anmahni leh Jentailte hriattîrna turin, an la
hruai ang che u” (Matthaia 10:16-18) ah Lal Isuan min lo sawilâwksak vek tawh a ni. Tunah hian
khawvel hmun tam takah Kristian tihduhdahna a pung zel a; Martarte thisen a
luang mêk a, a luang zel bawk dawn a ni.
ISUA ZIRTIRTE THIH DAN.
1.
Simon
Petera thih dan-
Rom khawpuiah a letling zawnga khenbeh a ni.
2.
Andria chu Kros ah thih thlengin hruiin an
phuar bet.
3.
Jakoba chu Herodan khandaihin a lu a tantir a
ni.
4.
Johana chu, têlsovah an thlâk a, mahse a thi
lova, Ephesi khuaa a awm laiin a thi a.
5.
Philipa chu Phrugia Hierapolis ah savun hruiin
thih thlengin an khai hlum.
6.
Bartholomaia chu a nung chungin a
vun an lip a, a thi.
7.
Thoma chu India rama Coromandel hmunah feiin
an chhun hlum.
8.
Matthaia
chu Ethiopia ramah khandaihin an sât
hlum.
9.
Jakoba,
Alphaia fapa
chu Biak In chhîp zum atangin an paih thla a, a thi.
10.
Thaddaia chu Persia leh Assuria rama chanchintha
a hril laiin
an
that.
11.
Simona,
Kanana mi
chu Kros ah an khengbet.
12.
Juda
Iskariota
erawh chu amahin a in âwkhlum.
Hetiang hi Isua zirtirte thih dan chu a
ni.
Comments
Post a comment