Mizo Pathian Thu Sermon - CHHUNGKUA THLARAU LAINATNA

Rev. C. Thalai

1Timothea 5:8 “Tupawh mahni chhûngkhat lainâte ngaihsak lo va, mahni chênpui chhûngte ngei pawh ngaihsak lo chuan rinna an phatsan a ni, ring lo mi aiin an sual zawk.”

1Timothea 5:8 thu hi kristian chhungkaw pawimawhzia sawina thu a ni a. Chhungkua hi Pathianin leilung a din tirh atanga a lo din tawh a nih avangin chhungkua hi Pathianin a ngai pawimawh hle a ni. Chuvangin chanchintha pawh chhungkua atanga tan turin Bible in min hrilh a. Chhungkua a pawimawhzia chu; chhungkua a kan chênpuite hnena chanchintha rawngbawlna nei ngai lo mi chu ringlotu aiin an sual zawk tih Bible in chiang takin min hrilh a ni. Ringlotu chu vanram kai lo tur list ah an awm tih Bible in min hrilh  bawk.

Tunah hian chhungkaw tam tak chu an thlarau a boral mek a, khawngaihna hun a liam hma hian muang lovin chhungkua thlarauva boral mekte chhanchhuak tura mawhphurhna chu kan hnenah pek a ni tih i hria ang u.

CHHUNGKAW CHAKNA THURÛK CHU PATHIAN THU (BIBLE) HI A NI

(Joshua 1: 8) “He dân bu hian I kâ chu chhuahsan hlek suh se; chu mi thu ziak zawng zawng chu I zawm tlat theih nan chhûn leh zân I ngaituah zâwk tûr a ni; tichuan I kawngte chu I lo titluang zel ang a, I lo hmuingil zêl dâwn nia.”

Bible hlutna kawnga entawn tlak nih: Bible hlut ber mai chu Mary Jones, Welsh rama hmeichhe naupang kum 15 mi hi a ni. Bible a neih theih nan kumtluanin harsatna tam tak pal tlangin Bible a nei thei a. Bible Society chakna chhan pawh hi Mary Jones vang a ni a. Mary Jones-in Bible a a thu duh ber chu Sam 119:1-176 chhunga mi zawng zawng hi a ni a, " Mary Jones changvawn" tih a ni hial a ni.

“Aw, I dân hi ka va ngaina êm! Nilênga ka ngaituah ṭhin a ni.” (châng 97).

“I thute hi ka atân a va thlum em! A ni, ka kâ atân chuan khawizû aiin a thlum zâwk.”           (châng 103)

“Chuvângin I thupêkte chu rangkachak aiin ka ngaina a ni, A ni,     rangkachak thianghlim   ai pawhin.” (châng 127)

“I thu hi ka ke atânte hian khâwnvâr a ni a, ka kawng atân êng a ni.” (châng 105)

“I dân ngainatute chuan thlamuanna nasa tak an nei a; tlûkna rêng rêng an nei lo.” (châng 165).

Bible ngaihlutute hi Krista a mi ropuite an ni zel thin. Charles Spurgeon-a te, D.L.Moody te, Billy Graham te hi Krista a mi ropuite an ni vek a ni. An nuten Pathian Thu hi hnute tui anga an têt tê atanga an an lo pek/ hrilh thin te an ni.

Bible thiltihtheihzia: England Lalnu Elizabeth-i pawh khan heti hian a sawi, "England ropuina chhan chu Bible hi a ni e." tiin. America President 7-na Andrew Johnson pawhin heti hian a sawi bawk a, "Bible hi kan ram innghahna lungpui ber a ni a. Chumai bâkah Bible hi America hrilhfiahna a ni a. State tina thu neitu ber a ni," tiin.

An pawisa ah pawh heti hian an ziak a, "Pathianah kan rinna kan nghat" (In God we trust) tiin.

ISUA KRISTAA MI ROPUI D.L.MOODY LEH A NU CHANCHIN

Moody-a nu hi kristian tha tak mai a ni a, fa 7 zet a nei a, Moody-a kum 4 a nihin a pasalin a thih san a. Moody-a pa thih atanga thla khat a nihin a nu chuan fa phîr a hring leh a, an vaiin 9 an lo ni ta a. Fa rual, enkawltu neilo an lo  ni ta a, an rethei hle a ni. A chang phei chuan chhuan-chhum tur ngheiin, pum puar khawpa ei tur an chham lai pawh a awm a ni. Chutiang taka rethei chung chuan Moody-a nu chuan a fate a enkawlna kawngah hlim hmel takin ala lawm thei a nih chu!

          A pasal thih kum erawh chuan a fate hmuh loh laiin a rûktein a tap thin a. A lungngaih mittuite chu Pathian hnena innghah vek a pawimawhzia leh rin tlak a nih zia hriat chian tir tu a lo ni ta zawk a.

Moody-a nu chu ringtu tha tak ni mahsela, nu pakhat tana fa 9 zet han châwm tur chu an thenawmten an huphurhpui hle a, heti hian thurâwn an pe a. Fahrah enkawlna inah emaw, a nih loh leh mi ina awmpui tura dah mai turin an hrilh a. Moody-a nu erawh chuan hei hian a chhâng a, " Kut pahnih ka neih chhûng chuan ka fate hi ka kutin ka vawng reng hlawm dawn a ni" tiin. "Midang kut a an awm ka duhloh na chhan chu; ei leh bârah chuan keimah aia tha in an enkawl thei ang tih ka hria. Amaherawhchu an tawngtaisak lovang a, Pathian thu an hrilh hek lovang tih ka hriat vang a ni," tiin a sawi

Moody-a nu hian a fate chu tûk tin Pathian thu leh Bible a mi ropuite chanchin a zirtir thin a. Chu chauh ni lovin, an in atanga Biak in mêl 1 zeta hla ah a inkhawm pui thin a ni. Moody-a nu hi chhûngkuaa thlarau lainatna nei a nih zia chu, a fate hnena Bible thu leh tawngtaina pawimawhzia an naupan lai atangin an thisenah chi angin a tuh sak hi a ni.

Moody-an a nu a ngaihzia: " Ka nu, ka ngai takzet che a ni. Ka tan i tawngtai thin tih ka hriatin ka thla a muang thin,"tiin a nu hnenah lâwmthu a sawi a ni.

A nu piancham lawmna: A nu piancham vawi 99 na an lawm ni chuan heti hian D.L.Moody chuan ropui takin heti hian a sawi a, "Khawvelah hian ka nu ang vek hi nute hi ni vek se la, khawvelah hian tânin (Jail) hi a ngai lo vang" tiin.

Moody-a nu in a Pathian a rinna leh a in nghahna chu Moody-a chungah a lo thleng ta a; America leh England ram a sâp tawng hmanna hmun zawng zawngah chuan a thu hril atangin mi sâng tam tak an piangthar a, thlarau bo tam tak Isua Krista ke bula hruaitu a lo ni ta a ni. Heng zawng zawng te hi a nu thawhrimna leh mittuite vang a ni a. D.L.Moody-a leh Sankey-a, Pathian hla phuahtu nena rawng an bawl dun atang phei chuan Moody-an Pathian thu a hril zel a, Sankeyan hla in rawng a bawl ve zel bawk a, America leh England rama saptawng hmanna hmun zawng zawngah te chuan harhna a thleng zel a, misual an nih an lo in hre zel a, Isua Krista  chu mi sâng tam takin an pan phah a ni. Lalpa Pathian chu fakin awm rawh se!

Khawvel a chhuahsan dawn a a thusawi hnuhnung ber chu heti hian a sawi a, "Pathianin min ko tawh a, ka kal tawh tur a ni. Ka Thih ni hi Lallukhum ka khum ni tur a ni a, ava ropui dawn em!"tiin a hnuk a chat ta a. December 22, 1899 khan khawvel a chhuahsan a, hmangaihna khawpui, Angelte lênna ram chatuan hmunah a kal ta a ni.

"Mi tam tak felna kawnga kaihruaitute chu vana arsite angin chatuanin an êng ang"tia ziak chu D.L.Moody-a chungah a kimin alo thleng ta a ni. Vân kawngkhar mawi taka a luh lai te chuan Vân mipui chhiarsênloh leh kal hmasaten an lo hmuak ang a, a ropui tur zia mai chu aw!

NAUPAN LAIA ZIRTIRNA PAWIMAWHZIA

Communist ram ah Rusia sipaiten heti hian zirtirna an nei a. Naupang an nih lai atanga kum 25 an tlin thlengin 'Pathian a awmlo"tiin an in zirtir thin. Chumai ni lovin, Pathian a awmlo tih thu chu thuvawn angin vawi sawmna (50) a zâwnin an sawitir thin. Chutianga chi an tuh tlat avang chuan an thisenah Pathian a awmlo tih chu an thanlenpui tawh a ni. Chuvangin Pathian an ring lo bur a ni.

Pathian hrelote mahin zirtirna diklo an têt tê atanga thahnemngai taka an zirtir a nih chuan keini Kristian, Pathian nung betute chuan an naupan lai atangin Pathian thu zirtir a, kaihruai zawk tur kan ni tih hi kan hriat reng a pawimawh.Tisa hmangaihna atang pawhin fate thatna tur chu zirtir ngai lovin kan hre vek ang a, naupang engmah hrelo an nih lai atangin Boardingah te sum tam tak sêngin an dah a, an tan a admision lâkna kawngah chuan a hmasa ber nih tumin an inchuh ngam thin. Fate tana zirna kawnga kan duh thawh ang hian Lalpa lamah duh thawh thin ni ila, Krista sipai tha, Setana kulh ti chimtu an lo ni zel thei dawn a ni. Chuvangin naupang an la nih lai atang hian Lalpa hnena hruai hi a pawimawh êm êm a ni.

Chhungkua pawimawhzia: China thufingah chuan heti hian an sawi, "Chhungkua a that chuan khawtlang a tha a, khawtlang tha in ram tha a siam a, ram tha in khawvel tha a siam a. Khawvel thatna tur bul chu chhungkaw tha hi a ni,"an ti.

          Chhungkaw Thlarau lainatna tih thupui hmanga sermon kimlo taka ka ziak hi a chhiartu zawng zawngte chungah leh chhungkaw tin te chungah, Thlarau lainatna a awm deuh deuh theih nan, Lalpa Isua khawngaihna tawp ngailo chu in hnenah lo awm zel rawh se. Amen.