Mara Sermon - BIE HMEISEIPA LIATA AHRAH AWHPA EIMA NGIA

Sam 119: 25

Rev. C.Thalai

Bie hmeiseihpa liata eima hrah leipa vâta Campingzy, Crusadezy hnei tyh hra eisala, daihti rei adaih tyh vei. Speaker zy khih ama puasai tawhta buakha tahta a dia thlâh tyhpa a châ. A chhapa cha: Khazohpa hmeiseihpa tawhta eima hrah leipa vâta a châ. Chavâta Sam rotuhpa chata bie hmeiseihpa tawhta ahrah awpa ta maniah a chho.

“Ei hrona he dolei liata khâchâ abaih ta, na bie lymâ hawhta na pahrah ma y” a vaw tahpa a cha. Ahrahna kyh he molei roleipa ta ahrahna he, chi âchhi ngâsâpa a châ. Ahrahna doleipa cha apalaina apahneisa, Pastor-zy, Machâzy mohnaona ama hnei. Bible bie eima nahthlie tua aw.

‘Khazohpa ta apalaipazy a dyu ta, areisipazy deikua cha ngiachhiena a pie tyh” tahpa ta maniah achho. (I Pity 5:5). Thlahpa theilâpa sâchaki (9) hry liata sâcharie (8) pa cha areisina a châ. Areisina hro cha Zisu Krista hro a châpa vâta Krizypa hro lia chhaota areisina hro cha hrongiapa nata Krista châta ropa hapa ama châ tahpa bie rôhnah ngâsâpa Lyuchâpa Pawla ta a vaw rei (II Kawr.14:15).

Awnanopa eima pôkha leina chhâpa cha pachuna doleipa vâ tawhta a châ.

Atahmâ pakheipa bie Bible tawhta eima nahthlie tua aw. Mathai 24: 23-26.. “Ahyrai ta nama hnohta mo te, Messiah cha he liata a y’ ama tah khiahta la zoh kha u. Krista pakheipazy nata hrosa pakheipazy vaw pua tlô aw ei ta, chazy chata tao theihpa châ ei sala a tlypazy ama tao aw. Pachâ teh u, ei cha chho chheilie ei hi, chatina chata nama hnohta pachâ teh u, ‘râhpathopa liata a y’ ama tah khiahtala pua kha u, chhôpadâpa lia a y, ama tah khiahtala zoh kha u.”

Pakheipa thâtih he Abeipa Zisu pakah tawh cheingei ta a vaw rei hawpa a châ. Chavâta pachuna doleipa a hmâpa ama vaw pua via ngâ haw. Thâtihpha cha sôh hmônapa thâtihpha achhotuhpa chhao tahmâ he ama vaw pua lymâ hawpa a châpa a châ.

Bible bie tawhta eima nahthlie tua aw. “Unaw sai u, pachuna bie namo achu leina lâta achhina nata paona ataotuhpa tawhta a phapa ta a vai awpa nata a heisai awpa ta ei cha haw ei. Chahawhpa chyhsazy chata eima Beipa Zisu Krista chakao leipa ta amo py tlao chakao tyh ei ta, ama rei phapa nata ama rei thaina sonazy ta a soleipazy ama dô tyh” tahpa ta Lyuchâpa Pawla ta maniah a chho (Rawma 16: 17, 18).

Atahmâ Bible bie tawhta pachuna doleipa thâti eima nahthlie hei tua aw: “Chyhsa hlupi ta Khazohpa bie he chyhsa dô nawpa ta ta nata sôhry nawpa ta ama hmâpa hawta keimo ta la hmâ tlô leikhâ pi ta, hmeiseihpa ta Khazohpa tuapa ta Khazohpa mohmô ta Krista liana chata bie eima rei tyh” tahpa ta Lyuchapa Pawla cha ta a rei (II Kawr. 2:17).

Pachuna doleipa kyh liana heta Apostol nawzy he amâ vai ngâsâ, he hawna heta: Hrosopa ahyrai ta nie chahiatuhpa nawzy cha Hrosopakheipa ama châ tahpa nama pahno awpa a cha. Chatawhta tâkâ sôh cha hiatuhpa cha Hrosopakheipa ama châ nama tah awpa a châ. Apostol-zy cha Abeipa Zisu ta ano vyupa ta khizaw liata Thâtihpa chho awpa ta biehneina apiepa ama châ. Ama pachuna cha pachuna doleipa tawhta Awnanopa a bohna awpa he amâ chhua chaipa a châ. Apostol-zy hawna hrana khata Awnanopa a boh nawpa ta eima râh liata pachuna doleipa tawhta eima pabohsa hra awpa he Pastor-zy nata machâzy eima maohphaona peimawh ngâsâpa a châ tahpa pahno suh u.

Awnanopa rairuna eima tyhna chhâpa cha Khazohpa bie dopa eima châkhei ngâ leipa vâta a châ.

Abeipa Zisu bie reipa eima nahthlei tua aw. Mathai 10: 32, 33 “Ahyrai chyhsa hmiakô ta na châkheipa maih cha ei Paw avâ liatapa hmiakô ta ei châkhei hra aw. Ahyrai chyhsa hmiakô ta na paphapa maih ei Paw avâ liatapa hmiakô ta ei papha hra aw” tahpa ta bie maniah a taih. Khizaw liata chyhsa rônahpazy nata ministerzy ta bie ama taihpa cha ama bie ataih nota ngâ a chhi kaw ei ta. Châhrasala ama bie taihpa hawhta nga achhi khao vei ei. Abeipa Zisu deikua cha apakah  ta bie maniah ataih leipa ta Ahrona tlokhu zydua ta maniah apie khai hawpa a châ.

Atahmâ Bible bie asôh chaipa nata aly chhi chaipa eima nahthlie tua aw: Khazohpa ta khizaw kyhpachâ ngaita tah, chatana chata a sawchapaw matlupa pie ta. Ano cha ahyrai angiapâpa mai lei dia leipa ta chhâzaw hrona tlao ama hnei nawpa ta” (Zawhana 3: 16).

Kypachâna bie khochhipa eima pazao heih aw. Chyhsa ta a viasa châta a hro apie khai tawhta kypachâna pha viapa ahy hmahta hnei vei ei (Zawhana 15: 13).

Hro apiena kypachâna: “Kei mietaku vaituhpa phapa ei châ, mietaku vaituhpa phapa ta mietakupazy châta a hro a pie” tahpa ta Bible ta maniah a chho. (Zawhana 10:11).

Mietakupa yzie eima pazao heih tua awh:

Mietakupazy cha a hneituhpa ta a kho khiata cha a hmizy ngyu ei ta, chysia lalôhpa ta ama tao thlâhpa a châ. A sa chhao cha a hneituhpa ta a khohna mai liata thie ei ta, a sa cha ama nie thlâh tyhpa a châ.

Abei Zisu deikua cha alie lâta a mietakupazy chata a hrona sôhpa a pahleipa a châ. A mietakupazy ahyzy maw? Nama nata keima eima châ. Abeipa Zisu a hrona maniah a piena thâti he hla a taotuhpa chhao chata thlahpa lâ tawhta avaw hmôpasia kawpa a châ !

Khazoh mietaku tawh molei aphao,

Amoh Kalvari tlâh la cha.

Tho chhiesana chô lia ama khaipa;

Kei cha a thisaih sôh avaw loh.

                    Pachhatuh na pathai tawhta,

                    Thisaih nah ti avaw loh haw;

                    Ei palôh ta my beih kha se,

                    Molei siana tihnawh.

avaw tahpa a châ. Eima châta Kross liata a hrona maniah apietuhpa cha chhâzaw nata chhâzaw ta reithaipa ta y mawh sy. Amen.

Awnanopa a laisei thei leina chhâpa.

He hawhta rei ei sila; Rev/ Pastor-zy ta Khazohpa bie hmeiseihpa a chânazie hawhta a châ ngâ leipa eima y pa vâta a châ. A châ khei ngâ leina chhâpa cha, chyhsa ta eina hao awh ei ta, chavâta ei moh a chhie aw tahpa vata Khazohpa bie cha ama rei ngâ leipa a châ. Lyuchâpa Pawla deikua chata he hawhta a rei: “Chyhsa palysapa ta y aw sala Krista sei châ aw vana” a tahpa a châ (Kal.1:10).

Atahmâ daihti liata chakaotuhpa thokhazy cha châna heisaih heta ama dâphi ta châna liata tovyu a hnei khao vei khiata cha Awnano liata rairuna ama tao tyh! Krista chakao hmeiseihtuhpazy deikua cha Pension thaina y vei. Chyhsa hmôtheipa ta chakaona hlâta hmô theih leipa ta chakaona a rônah via, ama tah. Chyhsapa hlâta Khazohpa palysapa a nohlao via. Chavâta Bible ta “Abeipa khopa khâpa ma a châ tahpa tlao pahno teh u” maniah a tahpa a châ (Ephesi 5: 17).

Atahmâ cha eima Krizyna he kô 100 chôlâ sie ha bâ pi ta, chavâta pitlohpa eima châ haw. Khazohpa bie a thaipa Theology Dr. zy taih vâhnei ha bâ pi ta alypa a châ ngâsâ. Anodeikua cha Khazohpa bie a châna hawhta rei leipa ta khona lâta tlia (uar) tuhpazy pha veih.

Khazohpa bie achhuana khôlâ taihta pakawtupazy he pha leipa a châ. Paw pakhata he hawhta a rei; Khazohpa bie thlahpa pati niepa liata hlata chawtani na a hlao hlu tuh haw, tahpa ta a rei. Bible ta, “chyhsa ta bie a rei khiatala Khazohpa bie hawhta rei maw sy” maniah a tah (I Pity 4:11). Chavâta Bible bie cha Abei chai awpa a châ.

Khazohpa bie liata hmotaotheina a y. “Khazoh bie he hro ta, hmotao thei ta, zaozi ko nata ha atua rairipa hla chhaota tia ta. Hrona nata thlahpa, ru nata lathli pachhai theina taihta chhô thei ta” (Hebrai 4: 12).

Jeremia 5: 14 liata bie cha mei hmotaotheina nata pakhopa a châ. Jeremia 23:29 liata ‘Ei bie cha mei nata syulô ta pakhopa a châ.” Bible a rei hlupa nata a bie a zytuhpa maihta khizaw liata chyhsa rônahpa nata moh pathâpa sai ama châ. Bible cha vâ lâthlôh miah chhotuhpa a châ.

Chavâta hla ataotuhpa chata,

Khazoh châbu ei ngaiapâ,

Bie hmeiseihpa maniah chho;

Va lathlôh hmeiseih chaipa cha,

Vârâh kia thei nawpa.

Hy Bible, hy Bible,

Ei pasô kho chaipa kha;

Hy Bible, hy Bible,

Khazohpa châbu he, avaw tahpa a châ.

“Bie hmeiseihpa liata a hrah awpa eimâ ngiah” tahpa biepipa hmâpa ta Sermon ei ropa he, ei ropa hlâta a pha via syulyupa ta areituhpa zydua chô liata Abeipa ta byhna pie maw sy. AMEN.