Mara Reih Sermon - Kyhpachâna ei my thei leipa

- Rev. C.Thalai

Kô 1984 Khôpai Presbyteri lâta eima sieno ta hmo yzie :  Chhaolô tawhta Tisi khih â zâ rie pi ta, Tipâ Local KNP-nahta thopi maniah a chhuahnohpa ei ta, cha khai tawhna chata Khôpai lâ sie pi ta, keima cha pheiky a cha-ie ngaitapa akyna ta; pheiky a cha-iepa a kypa cha riethei â chhih zie nata, apasa zie cha pakah nata paleihta reipa hlâta a thata a pasa via. Chavâta, Khôpai a tlô thei awpa châ khao leipana ta, ei nôpo ngâsâ ta; yzia n’awpa dâhdei chhao pahno khao leipana ta. Cha asu cha, pheisaih-nah O nohdi liata eima sie ngâhaino a châ.

Chanona chata, Motor vaw pua ta, Machâ RT Zachônô (Isaac Paw) cha, ‘Vaw kiah la’ tah ei ta, Machâ Zachônô ta, “Keima kiah aw va na, eipâ Pawly paw he keima vyuhpa ta kiah sala” na tah ta. Chapatawnahta kei cha alytu ngâsâ hawna ta, alynabie chhao reih hmâ khao leipa ta, ziza hropa hmah vaw y tlamaw ha heih la tahpa ta aly ngâsâpa ta Motor chhôh liata ei kaw tyuh haw. A seat pha ngaitapa liata na patyusa ta. Machâ Zachônô cha a pheita za sie lymâ ta, zâ ta Khôpai khih a za tlô.

Machâ RT Zachônô he chyhsa rietheipa nata sipasapa kyhpachâna ahneipa a châ. Chavâta, a chô liata ei ly hmeiseih, ei hrochhôhta my thei aw va na.

Zawsua hnohta Abeipa Khazohpa ta bie apiepa hawhna khata a chô liata a tlô lymâpa ta ei pahno hra. “He ryhpa châbu heta Na pakah cha puasai chacheih kha se. Cha bie rohpa zydua cha khâchâ na zyh thei n’awpa ta, a chhôh nata a zâ ta tlao na pachâ awpa ta” (Zawsua 1:8) liata biepiepa hawhta. Machâ Zachônô chô liata Khazohpa ta a hmotaotheina a palâsa hmeiseih. Machâ Zachônô he Krista khihnah râh nata Awnanopa châta â pasaih ngâsâpa a châ. 

Atahmâ Bible bie khochhih ngâsâpa eima nahthlie tua aw : “Kho ngaitapa sai u, kyh apachâ chyu ei suh u. Kyhpachâna he Khazohpa tawhta puapa châ tlô ta. Chyhsa to kyhpachâna ahneipa maih Khazohpa sapa châ haw ei ta, Khazohpa ama pahno hra. Kyhpachâna ahneileipa chata Khazohpa pahno vei. Khazohpa cha kyhpachâna châ tlô ta” (I Zawhana 4:7-8).