Mara Reih Sermon - JUBILEE YZIE

Bible Text: Theithaina 25: 8-55.

Rev.C.Thalai

         

Israelzy chata kô 50-na Jubilee ama hnei tyh. A yzie cha alyna daihti tahna a châ via chai. He noh heta mietakutôhpa ki tô tyh ei ta, apa hnopa maihta Jubiee alyna palôh phaohna chôta he hawna heta Jubilee ama hmâ tyhpa a châ.

1.   Leibâ ama ngiathai rairie.

2.   Ama hmo hneipazy amâ pie rairie tyh.

3.   Mo tota mohropa chô liata phana palâsa ei ta, chyhsa hropazy châta byhnâ châ awpa amâ chhuahpa a châ.

Jubilee yzie cha ‘Khotalaina’ tahna hawhta rei theihpa a châ. Jubilee noh liana heta chiamie tô ei ta, khotalaina daihti âly chhi ngâsâ pa ama phuah tyhpa a châ. Chyhsa ahyrai ta Jubilee nohta cha alyna noh a châpa vâta ama o lâ nata ama râh lâta a mâdi khai awpa a châ. Keimo ta Krismas daihti eima pasôpa hawhta hlâno Israel sawzy ta cha Jubilee ama pasô hrapa a châ, chavâta Jubilee cha Zisu Krista thisaih ta molei thizohna tawhta maniah a papuana pamohsana a châ. Chavâta Awnanopa cha hlâno Israel sawzy ta Jubilee amâ lypa hlâta âly via awpa eima châ.

Atahmâ Bible tawhta khotalaipa eima chânazie alychhi ngâsâpa palôhru hmeiseihpa ta eima nahthlie tua awh. “Khotalaipa ta eima charei awh” tahpa bie (Sam 119: 45) liata eima hmô. “Areisipazy hnohta thâtihpha chho awpa ta Abeipa ta sathaw eina thûpa vâta Abeipa Khazohpa thlahpa cha ei chôta y ta, ano chata pathi-palôh keichheipazy patlâhna awpa ta zy, seizy â tâhna o pahyna kyh rei awpazy, Abeipa palôhtlâhna kô nata eima Khazohpa phuhlana noh kyh rei awpazy, mâchhiesapa zydua thlapalôh awpa zy, buchâ vyupa ta pawpi pachhizy, chhiesana vyupa ta thaphana sathaw zy, thazeina thlah vyupa ta reithaina chysia ama hnohta pie awpata, Zai-o liata mâchhiesahpa ta a ypazy châta rao awpa ta eina tuah...” (Isai. 61: 1-3).

Abeipa Zisu pakah tawhta bie a puapa cha, “Bie hmeiseihpa pahno aw ei chita, bie hmeiseihpa chata khota a chapalaisa aw ei...”(Zawhana 8:32). “Sawchapawpa ta khota a chapalaisa khiatala khotalaipa nama châ hmeiseih aw.” (Zawhana 8:36). “Moleina tawhta puapa ta ypa ta siana seizy vaw châ ha ei chita, chavâta Khazohpa lâta alyna bie y mawh sy” (Rawma 6:18). “Chavâta atahmâla Krista Zisu liata a ypazy châta thailei pachâsana rai y khao veih. Krista Zisu liata hrona thlahpa a ypa chata moleina nata thina rypa tawh tahpa na papua ha thlôh ta” (Rawma 8:1,2). Ahyrai Krista Zisu liata a ypa chata hmotao thiepa vaw châta, hmo parohpazy cha lei haw ta, pachâ teh, a thiepa a vaw châ haw.” (II Kawr.5:17).

Atahmâ cha eima beipa Zisu Krista liata a ypazy châta Ida paropa y khao leipa ta khao leipa ta khotalaipa eima vaw châ haw, Haleluia, Abeipa Khazohpa cha chhâzaw ta reithaipa ta y mawh sy.

Khotlaiapa eima chânazie Bible tawhta eima nahthlie heih tua aw. “Khotalaipa châ chita, châhrasala nama khotalaina cha molei khu nawpa ta hmâ leipa ta, Khazohpa chakaopa ta tlao hmâ teh u.” (I Pity 2:16). “Khotalaipa ta y awpa ta Krista chata maniah a papuapa kha; chavâta a-ipa ta âduah u la, sei raopyhpa liana chata atâ heih khao khu vy.” (Kal.5:1).

Eima biepipa baotuhpa châta he hla he ei vaw tly.

1.    Hy pachhatuh molei pachârôhna hry ta

Na thlahpa ta nâ chhi la;

Thisaih chatlai chiehpazy moleipa ta y,

Lyna chavah loh hai pahâ ei.

                              Lyna chavah vaw loh se,

                              Khizaw rietheina lia;

                              Vâ Bei saw nâ chatlaituh,

                              Ei hmiakô liata y thlâ ha la.

2.    Hmo hropa hlâ na rônah chaina pachhatuh,

Na taopazy ei ly kaw;

Hmotaopa hlâ na vaw ngia chai na pachhatuh

Na kyhpachâna reih thei va na.

3.    Lei he Beipa na hmopie tuapa a vaw châ,

Reitiah vana lei lyna;

Vâ su rônah na byhnâ pakipa a châ,

Kalvari tlâh lia kei n’aw pie chi.

Jubilee a sôzie nata âly a chhizie ei ropa nata ei chhuapa hlâta a pha via syulyupa ta a reituhpa zydua chô liata Abeipa Zisu Krista ngiachhiena chhâ thai leipa cha khâ vaw y thlâ ha mawh sy. AMEN.