KHIZAW NANOPA KHIHNARÂH MIATHÔH THÂTIH

Rev.C.Thalai

He hawhta biepipa miathôhta eima pachhaih aw.

1.   Khizaw khihnarâh miakhana cha eima pahrâna alei khizaw râh thâtih a châ aw.

2.   Khizaw khihnarâh sânona cha Tilaipi khihnarâh ziza nanopa râh thâtih a châ aw.

3.   Khizaw khihnarâh miathôhna cha vârâh kyhpachâna râh Angelzy chareina râh khochhihpa râh thâtih a châ aw.

Abeipa Khazohpa ato ataotheituhpa a chânazie Sam rohtuhpa tawhta eima nathlie tua aw. Abeipa cha Khazohpa rôhnah ngaitapa châ tlôh ta, khazoh zydua chô liata Abeipa rôhnah ngaitapa châ tlôh ta, alei chô zydua liata ryureih ta, a ku liana chata alei su athu ngaitapa cha y tlôh ta, tlâh laki a sâh ngaitapazy ano eih châ hra ta, Tilaipi he ano eih a châ, ano taopa a châ. Alei hipa chhao he a ku ta a taopa a châ. Sam 95: 3-5.

“Avâzy khi ta Khazohpa rohnazie pahnosa ei ta, aruapa kawh ngaitapazy khi ta a kuzô thaina a palâsa.”  Sam 19: 1. Khazohpa a y cheingei tahpa â lâna cha khizaw liata hmo a ypa zydua he a taotuhpa a y vheingei tlai tahpa chyhsa palôh liata pachu byuh leipa ta bie a hnei pathu ngâsâpa sai a châ. A hmotaopa rôhnah ngaitapa Avâzy, alei zy, noh nata thlâpâ nata awhsi khaih ngaitapazy a taotuhpa cha Khazohpa a châ tahpa a hmotao noâhchhipa zydua tawhna heta Khazohpa cha a ngiapâ tlâh a châpa a châ.

Khazohpa hmotaotheizie nata a ryhraona noâhchhihzie lyuhchâpa Pawla chhaota maniah a chho hra. “A hmo hmô thei leipa, a chhâzaw hmotaotheina nata a khazohnazie cha khizaw tao tua no tawhta a siapa ta hmôpa ta y ta, a hmotaopa liata â lâ” tahpa ta maniah a chho. (Rawma 1:20). Sam a rohtuhpa chhaota khizaw nata a chhôh liata a ypa zydua Abeipa ei sai a chânazie a phuah hra. “Alei nata a chhôh liata a ypa zydua he Abeipa eih a châ. Khizaw nata a chhôh liata a pahrâpa zydua chhao he” tahpa ta Sam 24:1 liata eima hmô. Khizaw nata a chhôh liata a ypa zydua tahpa bie heta a pahly kaw ngâsâpa a châ. Khizaw nata a chhôh liata hmo zydua a pahly khaipa a châ.

Lyurâhpa sa a taopa lia sai hmahta chi hluhpi y ei ta, pahno tiah awpa chhao châ vei ei, ama niebaw chhao a lyu tlâ hra vei ei. Khazohpa ryhraonazie he noâhchhihpa sai a châ. Chaolia zy, masiah zy, Sasu Zuneihpa zynata sakhihzy, sawza sathawh nawh sahlaozy cha lyurâhpa si a nie awpa ta a taopazy ama châ. Chakeih zy, changie-zy deikua cha sa nie awpa ta a taopazy ama châ.

Pazu nawh chi nah pho lia chhaota a lyucho tlâ hra vei ei. Zabi nawh niebaw a tluana kyh cha alei ry lâta lâpi chao chaimâh ei ta, cha liata tho thari nata ramawh thari ama hmôpa maih aly ngâsâpa ta a niepa ama châ. Mathlaw hnei ta a zaw theipa pavaw chi lia chhaota chi hluhpi ama y hra. Ama rôh chhao âlyu tlâ leipa ei ta, a saihpa ta a taopa zy, arâhpa zy, chi hluhpi ama y. Ama cheirâ chhao â lyu leipa ta angia ngâsâpa ta a taopazy sai ama châ. A kuzô thaizie chyhsapa ta pahno paki theipa nata alaichadai khai theipa châ vei ei.

Lôvâpa hrona a hneipa ta a taopa hry liata hla a sa theipa ao pha ngaitapa ta a taopa Uliah zy, Raihnô zy, Taoraipa zy, cha leipa ta ao pha ngâsâpa ta ataopoa chi hluhpi ama y. Cha zydua cha Ano palyupalihpa nata reithai awpa ta a taopa sai ama châ. Chavâta hla a taotuhpa chhaota he hawhta hla a vaw taopa a châ.

Lei chô liata hmohroh zydua

Husona a hneipa maih

Beipa cha palyupalih ei ta,

“Hy Bei rôhna chai” tah ta sa ei.

a vaw tahpa a châ. Abeipa Khazohpa ta khizaw nata a chhôh liata pahrâ awpa ta a taopa zydua he chyhsa chyhsa pachana nata lathli nata sona ta alaichadai theipa nata pahno paki theipa châ vei. Chavâta khizaw nata a chhôh liata hmo to a pa-yhsatuhpa Khazohpa Chônô chaipa cha reithaipa ta y mawh sy.

2. Khizaw sânona cha tilaipi khizaw ziza nanopa foreign râh a châ. Khizaw 1-na râh liata khotalai ta a chareipa nawhzy ta khizaw 2-na tilaipi khihnarâh liata a ziza anano hawpa vâta khotalaina cha reih byuh leipa ta a chhôh lia pahrâ awpa ta minute 10 hlâ a hluh via y awpa ta hrona ta a daih vei. Cha hawhna hra chata tilaipi khihnarâh liata a pahrâpa nawhzy chhao chata khizaw 1-na ziza nanopa râh liata pahrâ awpa ta minute 10 tlu pahrâ awpa ta ama hrona ta a daih hra vei.

Khizaw 2-na tilaipi liata a pahrâpenawhzy cha khizaw 1-na râh liata a pahrâ penawh nata ama hmisâ nata pôh-raoh, hrozie nata nôchâ alyuna rai a hnei leipa, khizaw noâhchhihpa châ ta. Ti zydua Headquarters (su pipa) cha tilaipi a châ.

“Vahtie zydua cha tilaipi liata tla ei ta, châhrasala tilaipi cha bie hlei vei” (Biechhotuhpa 1:7). Khizaw liata chavah ti zydua amâ tyh pakhyna supi chaipa cha tilaipi a châ. 1964 kô liana khata Awnanopa châta Press chalei awpa ta Puhpa Tialao nata Rangoon lâ sie pi ta, Rangoon tawhta Akyab taih Puhpa Haochia, Burma pheisaih bai 3-pa, Saikao khihpa nata azawtheina ta dawh 2 chhôh tilaipi chô liata a zaw pi ta, tilaipi cha ama reipa ei theipa nata ei pachâna hlâta lai via syulyu ta, Abeipa Khazohpa hmotaotheinazie ararôh a y hmeiseihpa a châ. Noâhchhih tah thlâh dei leipa ta cha rei theipa châ vei. Pastor Teitu ta cha he hawhta a reih, “Nô nawh angiapaâna kyh liata ama kuh a chha ngâsâpenawhzy heta Khazohpata tilaipi a taopa rarôh-y ngâsâpazy he za hmô tua ei sala, Khazohpa cha amâ ngiapâ khai thlâh ha aw na” tahpa ta a reih.

Atahma Bible tawhta tilaipi eima sai tua aw. Hao liana hao tilaipi y ta, lai ngaitapa, kawh ngaitapa, hao liana haota hmo alyhtheipa reitiah lei y ta, sa chyhpa nata sa laipazy cha Sam 104:25 liata eima hmôpa hawhta tilaipi chhôh liata hmohrohhneipa chu nano nanopa khazie lei châ ma y sualuah aw vâ tly! Tilaipi nata a chhôh liata hmohrohhneipa zydua chô liata bie a hneituhpa Abeipa Khazohpa cha rôhnahpa nata palyulaplihpa ta y mawh sy.

Khazohpa cha tilaipa nata thlihpipazy chô luata bie a hneituhpa a châ. “Ano chata bie pie ta, thlihpipa pathlisa ta” Sam 107: 24,25 liata eima hmôpa hawhta May 12- June 7, 2008 liata China râh liata hmo a tlôpa alosihpa vâta a thipazie 69,103 ama châ. Ama ri hmô leipa 20,000 rachhôh ama y tahpa pahnopa a châ. Ararôh-y hmeiseihpa a châ, he liata athipenawh zydua he ama nahkhaoh ta Thâtihpha a thei leipa sai ama châ. Ngiachhie amâ chhi hmeiseih. Pahno khaipa hawhta Burma râh liana chhao khata November 2008 liana khata thlihpipa vâta chyhsa thy sâh hluhpi leidia ei ta, khizaw ta buakheipa a châpa kha a châ.

India râh Orissa State liana chhao khata Awnanopa taolana vâta Abeipa ta thlihpipa thatlô ngaitapa tuah ta, o nata lyu thata rao ta, chyhsa hluhpi hrona chhao a lei tahpa pahno khaipa a châ hra. Atahhma Bible bie eima nahthlie heih tua aw. “Nâ chata leilô ti athu ngaitapa he poh hawhta pabusa chi ta; tizy cha tlâhzy chô liata y ta, na rana vâna chata arâ syulyu ta, na tôhkalôhpa pyu vâna chata thlai sie syulyu haw ta” Sam 104: 6,7. (Mak. 4:35-41; Lk.8: 22-25; Mat. 8:23-26).

Tilaipi saihpa cha ra ta, chatanachata kua haw ta, chatanachata âmo cha râhpathohpa liata chhihthapa hawhta ti thu ngaitapazy liana chata chhihtha haw ta.Sam 106:9. A hmotaotheihna zydua vâna heta Abeipa cha angiapâ tlâh nata a pahniehna tlâh a châpa a châ. Tilaipi nata leilô a taotuhpa Khazohpa cha chhâzaw ta reithaipa ta y mawh se.

3. KHIZAW SÂTHÔHNA CHA VÂ SALEM KHIHPI, ANGELZY CHAREINA RÂH A CHÂ AW.

Vârâh cha Zunawhzy pachâna liata chhaih 3 lâta ypa ta pachâna ama hnei, he hawhna heta; “Avâzy nata avâ a sâh chaihna nata leilô nata a chhôh liata a ypa zydua he ABEIPA, nama Khazohpa eih sai châ ta,” tahpa ta Ryhpachaneina 10:14 liata ropa a châ.

Lyuhchâpa Pawla chhaota avâ maithôhn aliata lapa ta a ypa thâtih a reih hra. 2 Kor.12:2. Anodeikua cha vârâh cha thina haosâ râh thâtih a châ hapa vâta Ada sapa nata thisaih ta y chhôhta cha pahno pasaipa châ vei, bieparu (bie nyupa) a châ. Chavâta Bei Davi chhaota “Nâma lyuna hneipa ta ei mo padeih tina chata ei lyna a ki ha aw” a vaw tahpa a châ. “Ei mo ei padeih ti” tahpa yzie cha thi tawhta thlahpa lâta mo pavâ nawpa reina a châ.

Cha angiapâtuhpazy hnabeiseihna lai chaipa cha thyuheihna noh rôhnah daihti a vaw tlô awpa, Hrohsopa Isai ta thyuheih nawpa bie he hawhta a vaw rei chhielie hawhpa a châ; “Athihpazy cha ama hroh heih aw, ei chyhsa rizy cha ama thyu heih aw. Doh-lei liata a ypa saih u, ahra u la,thaphapa ta sa teh u,” “Na diati cha âhnalasizy diati hawhta châ ta, alei heta athipazy cha kaw papua tlôh aw ta” Isai 26:19.

Atahma Lyuhchâpa Pawla tawhta eima nahthlie heih tua aw. “Thi haw ei chi ta, nama hrona cha Khazohpa liana chata Krista hnohta nyupa ta y tlôh ta, Krista eima hrona cha â vaw luah tita nâmo chhao a no hnohta rôhnahpa hryta namâ luah hra aw” Kao.3:3-4.

Atahma Abeipa Zisu pakah tawhta thyuheihna bie a reipa eima nahthlie heh tua aw. “Hmeiseihta ta, hmeihseihta ta ei cha chho ei, a daihti a vaw tlô daihmâ, atahmâ chhao a tlô haw. Chatina chata athipazy ta Khazohpa Sawchapawpa ao thei aw ei ta, a theipa maihta ama hroh aw...He he nama noâh khah u, a daihti a tlô daihmâ, cha tina chata thlâ liata a ypa zydua ta a ao thei aw ei ta, ama pua khai aw, hmo phapa a taotuhpazy cha hrona topa ta thlyu aw ei ta, moleina a taopazy cha thai lei pachâsapa ta ama thyu aw.” Zh.5:25-29. Chyhsa hluhpi alei buchâh liata â môpazy ama vaw thyu khai aw. Daniel 12: 2-3 moh teh.

Thyuheihna noh liata thlâ liata kô hluhpi â zia penawh nata a hrohpazy atyhpakhy nawpa a rôhnah nawpazie cha khatlupo ta ama rôhna aw ta, khatlu ta alyna châ sualuah aw va tlyma! Hla a taotuhpazy heta a rôhnah nawpazie ama vaw hmô pasia kawpa a châ.

Noh rôhnapa vaw tlô daihmâ,

Ei hâ Bei Immanuel

Molei hripa tiahna noh cha

Pachha sawzy khotalai nawpa cha.

Chatina cha lypa ta ei sa aw

Bei râh chhuahdy chhâzaw su to hra aw na ta,

Hy a pha ngaita aw na,

Thapa â chhih kaw dia!

Lyna chhâ lei ta charei’ pi

a vaw tahpa a châ. Zisu Krista ta khihnarâh maniah â chhuahdypa su nata râh cha khatlu ta pha aw ta, rôhna aw vâ ma!

Hrohsopa Isai bie kha pakipa ta a vaw châ ha bâ aw. “Ei tlâh pathaihpa liana chata apsasana rai y khao hra aw vei, tizy heta tilaipi a bie thlâh hapa hawhta leilô he ABEIPA novahna ta a bie ha aw.” (Isai 11:9). Cha râh khihpi cha kyhpachâna khihpi a châpa vâta hrohsopa Isai bie reipa hawhna khata pasa nôpona ta rie maniah pathei khao leipa aw ta, hri chichhih chaipa Cancer pasana zy, Malaria pasana zy, pavyh pasana zy, thisaih sâhpa nata a hnaipazy, lôpo nata châh-ao pha leipazy, zôthlôh a veipa zy, Aids hri a veipa zy, chanô chhi pha leipa nata nawh raona zy, Motor accident rarôh-y ngaitapa zy, phusâ takâ hluhpi ta nôpo pachârôhna chôta Hospital pangai tyhnazy he kyhpachâna khihpi eima tlô tita cha y khao leipa aw ta, Hrohsopa Isai chhochhieliena bie kha a vaw tlô khai ha aw.

“Cha khih liata ypazy chata, ‘Tlâh va na’ tah aw vei ei,” Isai 33:24 tahpa bie hawhta khata kyhpachâna khihpi liana cha tlâh leina nata pasana hri rai angia thei khao leipa aw ta, Ida pasana y khao leipa aw ta, hro thiehpa ta eima chareipa ha bâ aw.

Vâ Salem khihpi rôhnah nawpazie: Khizaw liata khihpi moh pathâhpa Tokyo zy, Delhi zy, London khihpi zy, Moscow khihpi zy, New York khihpi zy, Paris khihpizy a hmôtuhpazy ta a rôhnahama tah kawpa a châ khiahta cha “Khazohpa khihpi nata thâtih bie rôhnah ngaitapa ta ama reih tyh” tahpa Sam 87:3 liata eima hmô. Khazohpa khihpi Khazohpa Chônô chaipa pahrâna khihpi cha khatlu po ta pha aw ta, a rôhnahnazie châ aw vâ ma! Eima pachâna hlâta a rôhnah via syulyu aw.

Vâ Angelzy chareina khihpi cha ngôhsuapa ta tobipa châ ta, khihpi chhôh zydua cha thlâlâ mopahlie khaipa hawhta a châ tahpa ta Bible ta maniah a chho. Biph 21:21 cha Jaspy lô nata lôsôhpa chi ta tobipa a châ. Cha khihpi cha noh nata thlâpâ nata awhsi khaihnazy meiôh nata Electric khaihna zy angiah khaoleipa aw ta, Khazohpa Mietakupa Taw hmiphana ta khihpi chhôh zydua cha a khaipahli khai ha aw.

Kyhpachâna khihpi liana cha nodi dahphina y khao leipa aw ta, pachârôhna nata nôpona y khao hra leipa aw ta, khizaw liata eima chariah lai chaipa thina cha pahniepa a châ ha awpa vâta motlih tlana mâchhiesana cha y khao leipa aw ta, Angel nata Serafim zy chhhaota Khazohpa Mietakupa Taw reithaipa ta tlyzaw ta eima charei ha bâ aw. Alyna cha Rose paw hawhta chhâzaw ta a pawh ngathlâh ha aw.

Khizaw nanopa khihnarâh miathôh thâtih a ki leina chôta sermon ei ropa he a reituhpa zydua chô liata Abeipa ta byhnâ pie mawh sy. Amen.