ABeipa châta chyhsa rônahpazy thâtih

- Rev. C. Thalai

Spurgeon zy, D.L. Moody zy, Billy Graham zy he ama hawsaih no tawhta ama nô nawhzy ta Khazohpa bie, thlahpa lâ sâhpiti ama vaw mohôhpa nata palaiseihsapazy ama châ. Chavâta Khazohpa bie cha ama thlahpa pati châta ama vaw nie hawpa a châ. Atahmâ Bible bie tawhta eima nahthlie tua aw.

            “Hawsaih a pih thiehpazy hawhta Thlahpa lâ sâhpiti, khâpa hmah ahlao leipa cha vâ teh u, chaliana chata pachhana tlohna taihta nama laiseih thei n’awpa ta” ( 1 Pity 2:2) he bie he ama thisaih liata ama vaw laiseihkhei hawpa a châ

            D.L. Moody cha my chareih ta dawh 4 ta thyu ta, dawh 1 chhôh Bible rei n’awpa ta a daihti a hmâh tua chai tyh tahpa a châ. Spurgeon cha Bible ei 100 a reih papuapa châ ta, ei zakha a reih papuapa cha, “A thiehpa hawh sai ta ei nie tyh” tahpa ta a reih. Richard Wurmbrand ta he hawhta bie rônah ngaitapa a reih hra. “Krizyhpa châ na ta, chakaotuhpa chhao châ na ta atah tlôh ta, rietheina, rairuna atyh beih leipa chyhsa cha chyhsa vâdua chaipa nata ngiachhi achhi chaipa ama châ” a tah.

            Abraham Lincoln ta he hawhta a reih, “Ei daihti he thlahchhâna nata Bible reina hetana ei hmâh” tahpa ta a reih. “Bible he hmo zydua liata a pha chaipa nata a sôh chaipa a châ”  tahpa ta bie rônah ngaitapa a reih hra.

            Spurgeon cha thlah a chhâ hluhpa nata Bible a reih hluh kawpa a châpa vâta he hawhta ama hiahhri, “Pâpuh, thlahchhâ ma a peimawh via ma, Bible reih hluhpa he maw?” tahpa. “A vâ liata Pavaw azaw ngâpa khi a mathlaw chachâh lâtahpa ma a peimawh via ma, a chavei lâtahpa mathlaw maw?” tahpa ta âchhy ei.

            Bible hmotaotheizie : England beinô Elizabeth ta he hawhta a reih, “ England rônahna chhâpa cha Bible he a châ” a tah.

            America President miasarina Andrew Johnson chhao ta he hawhta a reih hra, “Bible he eima râh âpahniehna lôpanô a châ. Chadei chhao châ leipa ta, Bible he America chhopasiana châ ta, State to liata bie ahneituh chaipa a châ” a tah. Chavâta ama Tâkâ lia chhaota he hawhta ama roh. “Khazohpa liata eimâ ngiapâna eima pahnieh” (In God We Trust) tahpa ta.

            Bible cha thatlôna bieparu a châ : Zawsua 1:8 “ He ryhpa châbu heta na pakah cha puasai chachei khah se. Cha bie zydua cha khâchâ na zyh thei n’awpa ta chhô nata zâta na pachâ awpa a châ. Chatanachata na lâpizy cha patlâ lymâ aw ta, thlaochhipa ta na y aw” tahpa biepiepa a châ.

            Zawsua chata he hawhta bie rônah ngaitapa a vaw reih. “Keima nata ei chhôhkhazy ta cha  Abeipa eima chakao aw” tahpa ta. He bie heta chhôhto maniah a pahao kawpa a châ. Nâma chhao he “Eima chhôhkha ta Abeipa eima chakao aw” na tah thei hr’aw ma ? Zawsua 24:15

            Khazohpa bie hmotaothiezie : Hebrai 4:12 Khazohpa bie he hroh ta, hmotaothei ta, zaozi koh nata hâh atiah raihriepa hlâchhao ta tiah ta, hrona nata thlahpa ru nata lathli pachhaih theina taihta chhô thei ta, pathipalôh liata pachâna nata â chhuahpazy he thlai a pahno thei tahpa ta Bible ta miah a chho.

            Zeremia 5:14 bie eima nahthlie heih tua aw. Abeipa pheisaihzy Khazohpa chata Zeremia hnohta he hawhta bie a vaw tlô khei, “Na pakah liata ei biezy cha mei ta pachâsa aw na ta, he chyhsa zawpizy he tho ta, chatawhcha a kâ khai aw” tahpa ta.

            Aizawl liata Khazohpa bie ei chu no ta Pastor Liangkhaia O lâcharei tyh na ta, Maisâh su thôh hnei ta, ama o lâei chareina maihta Bible sai ta vaw reih ngâthlâh ha tyh ta. “Pâpuh, nama o lâei vyna maihta Bible sai  na reih ngâthlâh tyh” tah na ta, he hawhta einâ chhy. “Khazohpa nata eimâ pakyh ngâkaw. Bible chhôh liana heta Khazohpa palôhrupa a y khai haw” tahpa ta einâ chhy. Pastor Liangkhaia ta Khazohpa bie a pasôzie nata a papeimawhsana zie ei hmô tawhta keima tlai chhao Khazohpa bie sôhzie nata a peimawhna zie thata eina pahnosa.

            Mawsi biehrawhpiepa ala nota hmo y zie : Mawsi cha biehrawhpiepa Alana einona liana khata noh 40 nata zâ 40 y ta, cha chhôh liana cha pati rai nie leipa ta, ti chhao doh hra vei. Chatawhcha alô phiazy liana chata biehraina biehrawhpiepa cha roh hra ta, Mawsi cha alô phiapa miano cha a ku ta chabapa ta Sinai tlâh tawhta za chô ta, a hmia cha a vaw khaih haw tahpa a pahno leipa ta, Arawna nata Izarel pathla zydua ta Mawsi ama moh nahta a hmia vo cha vaw khaih ta, ahnia ngâh leipa ei ta” tahpa ta Bible ta maniah a chho.(Exodus 34 : 29-35)

            Mawsi hmia a khaihna yzie cha noh 40 nata zâ40 Khazohpa nata amâ kao khoh hawpa vâta Khazohpa palôhrupa hawhta pathaihna palôhrupa a hnei haw hrapa a châ. Vâmo amâ zâ luahna maih liata alei chyhsa tam oh ngâh tyh veih ei, ama moh ngâh leina chhâpa cha ama pathaihpa vâta a châ. Vâmo azâ luahna Bible liata ahluhpi hmô’pa a y. Cha zydua liata sâkha dei ei vaw palâsa aw. Mietaku vaihtuh penawh thâtih a châ aw.

            Abeipa Vâlyuhchâpa cha ama hnohta avaw luah ta, Abeipa rônahna ta ama chheipâh za khaih haw ta, chavâta chi ngaita ei ta, Vâlyuhchâpa chata ama hnohta, “Chi khah ula, nahthlie teh u, moto châta thâihpha lychhih ngaitapa ei cha vaw tlô kheipa ei hih” (Luka 2:9,10)

            Khizaw lei chhiesana râh nata pachârôhna râh puasai awpa ta vârâh Jubilee dawh cha nâma nata keima châta a paro haw.

            Haleluia ! Abeipa Khazohpa cha chhâzaw nata chhâzaw ta reithaipa ta y mawh sy, Amen.