VARÂH CHA RIETHEIPAZY RÂH A CHÂ

VARÂH CHA RIETHEIPAZY RÂH A CHÂ
– Rev. C.Thalai

“Unawh kho ngaitapa saih u, pachâ teh u, rietheipazy he angiapâna liata a rôhnah awpanata ano kyhpachâtuhpazy hnohta a taihpa râh a totuh awpazy ta rao vei ma?” (Zami 2:5).
Abeipa ta ano moh vâta riethei a taotuhpazy nata rairuna a tyhpazy châta “ryu to a rao thei leipa, apuapa a hlao leipa, alo thei leipa, avâ liata nama châta a khaipa cha hmô awpa ta” tahpa ta Bible ta maniah a chho (I Pity 1:4).
Atahmâ Bible ao khochhih ngaitapa tawhta eima nahthlie heih tua aw. “Hezy he riethei pasana tawhta a puapa sahlaozy kha ama châ; ama pohzy Mietahkupa Taw thisaih ta pasupa ta ama pangyuhsa haw” tahpa ta machâ hryta pakha ta a vaw chhopasia haw (Biph.7:13-14). Abeipa Zisu chhaota, “Ahyrai na zi awpa a khoh khiahta cha riethei tao papeisa leipa ta nohto kraws a pupa ta na zi mawh sy” a tahpa a châ.

Lyuhchâpa Pawla cha Abeipa moh vâta rietheina nata taolana a tyh hluh kawpa a châ. He hawna heta- “Ei hluhpi ama chhei khai tawhta patahna o liata khô ei ta…ama pheizy liata tho keihhrai ta khâchâ dai ei ta” (Hmt.16: 22-31).
Cha dei chhao châ leipa ta, Lystra lâzy, Ikonia lâ zy, Antiôka lâ zy liata Thâtihpha a chhopa vâta Pawla cha alô ta vawh ei ta, a thi’pa ta ama pangiasapa vâta khih tawhta a daophi haw ei ta, a thi hawpa ta ama pachâpa cha a kaw uh ta, kaw hroh haw ta. Chatawhcha Pawla chata bie rôhnah ngaitapa a vaw reih, he hawna heta- “Rietheihna hluhpi taopa ta Khazohpa khinarâh eimâ ngia awpa a cha” tahpa ta Hmt.14:22 he bie heta chakaotuhpazy maniah a pahao kawpa a châ.
Awnano Machâ pakha cha Pastor hnohta he hawhta hriahhrina a hnei. “Awnanopenawhzy ta ei tlôh leina nata ei thâchhie sai ta na reih ngâthlâh haw ei ta, hmo phapa ei taopazy sâkha hmah ta reipa khoh tlôh leipa ei ta, chavâta Machâ ei châna he ei pabah thlâh haw aw” tah ta. Pastor ta he hawhta â chhy, “Chahawhta a châ khiah cha Awnanopa ta ama cha tu beih ma? Na hmia laiata ama pachih ta ama cha pachhao beih ma? Na luh liata hloh lakho ama cha pakhosa beih ma?’ tahpa ta a hiahhri.

Chatawhcha Awnano Machâpa chata Zisu Krista, moleipazy chata riethei, maohphyu torai a taona zydua pahnopapua ta, “Keima cha Abeipa châta riethei maohphyu ei taona a chyh tu haw” tahpa ta Pastor cha a vaw tahpa a châ. Riethei taona hro he Krista hro cha ta,chavâta riethei a tao hluhpa maihta Krista châ nata Awnanopa châta rohpahâhpa ama cha tyh. “Pachha haipazy liata nata leidia haipazy liana chata Khazohpa châta Krista rohpahahpa cha tlôh pi ta” (II Kawr. 2:15). Lyuhchâpa Pawla chakaona kyh liata a thatlôna bieparu cha Krista vâta kyh hluhpi liata riethei a taona nata rairuna a tyhpazy he a châ.

Atahmâ daihti lia chhaota Awnanopa thatlôpa ta â lâpazy chhao he thlahchhâ hluhpa nata kyh hluhpi liata Krista chata hriapasapa nata Krista khinarâh a pakawhsatuhpa ama châ lymâ hra.
Chakaona kyh liata: Keimo tovyuh apakypa nata apanawhpa ta alei buchâh liata eimâ phaw no he Zisu Krista cha a beidyuchhai liata eima pabeisa no a cha tyh. Keimo abeidyuchhai a sâhpa liata eimâ chaluah nota Zisu Krista cha eima phei ry ta eima so no a châ tyh hra. He bie he chakaotuhpa tota pahno thlâh awpa a peimawh.

Khazohpa chyhsa rônahpa Rev.Dr.Wurmbrand ta he hawhta a reih-
1. Khazohpa ta a moh vâta riethei tao awpa he a pasaih.
2. Riethei taona he Khazohpa byhnâ hnawh pha chaipa a châ,a tah.
3. Rietheina ahlaoleipa ta Khazohpa a chakaotuhpazy cha chyhsa vâdua chaipa ama châ,tahpa ta a reih.
Missionary rôhnah penawh thlahchhâna. He hawna heta India rah liata Missionary pano penawh cha Tilaipi ngiahkâ liata thlah ama chhâ- “Hy Abeipa, India râh chyhsa zyduata nâma ama cha reithai thei nawpa ta a châ khiah cha Tilaipa ngiahkâ liana heta mei ta maniah rao khai thlâh ha ei se” tahpa ta thlah ama chhâ. Ama hrona sôhpa taihta Abeipa châta ama hlâ khainazie a palâsa.

Pawla cha Krista châta riethei taona liata â lyna bieparu he hawhta a reih- “Eima rietheina zydua liana chata thaphapa takhô pathlah na ta” tahpa ta bie rôhnah ngaitapa a reih papua. (2Kor.7:4).
Riethei taona athôhnazie cha Pawla chhao riethei a tao hluh viana maihta âlyna cha a khô pathlah tahpa reikah a puapa heta yzie a hnei pathu ngaitapa a cha. Ti a lai nahta balyh a sâh via lymâpa hawhta Krista vâta riethei maohphyu a tao hluhpa maihta khizaw ta a hnei leipa alyna lo thei leipa cha hnei ei ta, amâ lyna cha asâh via lymâ ta,he hawhpa he avâ alyna a padi hawpazy alyna cha a châ.

Atahmâ khizaw arâpasuana: Atahmâ daihti liata arâpasuana cha khihpi pangaihna a châ chaipa ta â lâ. Khihpi ngai awpa ta cha Phusâ (sôh) a hneipa maihta khihpi ama pangai lymâpa a châ. Khizaw liata râh moh pathâh chaipa cha America râh a châ. Chavâta America râh lâ a paihpa ama hluh kaw bâpa a châ.
Pamosana ta Mawrâh liata khihpi chai cha Aizawl a châ. Khihpi 2-na cha Lôlei a châ. Sâthohna cha Siaha a châ. Cha leipa chhaota atahmâ cha District khihpi Mawrâh liata vaw hluh kaw bâ ta, chavata khih a sa thei viapa maihta cha khihpi lâ ama ngai khoh lymâpa a châ. Sawhkhâ rai a hriapazy chhaota khihpi lâ ngaipa ama khoh lymâ hawpa a châ. A chhâpa cha khihpi lâ cha niedo kyh lazy ta pha via ta, sanawhzy châta sikul achuna châta pha via hra ta, chavâta khih a sa theipa châta cha khihpi lâ ngai khohpa a châpa châ.

Anodeikua cha chyhsa rietheipa nata dyhchhiepazy châta cha khihpi la ngai awpa khoh hra ei sihla, phusâ (sôh) a hnei leipa châta cha ngai thei awpa châ vei. Kyhpachâna khihpi deikua cha khihpi hneituhpa Beipa cha kyhpachâna BEIPA a châpa vâta riethei pasana tawhta a puapa ama pohzy mietahkupa Taw thisaih ta pasi ta, pangyuhsapa maih châta â chhuahdypa râh to awpa a châ. Abeipa Khazohpa, riethei sipasazy kyh maniah a pachâtuhpa cha chhâzaw ta reitheipa ta y mawh sy.

Khihpi thâtih ei pachâ nga hai nona heta Missionary rôhnahpa Morrison thâtih heta vârâh eina pavâsa kaw tyh. He hawna heta; Ei kha cha America President Roosevelt nata Africa Missionary Morrison cha Africa tawhta hmaohkhah ta kaw siekoh ei ta, New York khihpi kaw tlô ei ta, President Roosevelt cha a rôhnah ngaitapa ta chyhsa hluhpi ta vaw dy chaimâh ei ta, pawpi ri ngia ngaitapazy vaw pa-ao ei ta, Missionary Morrison deikua cha chibaih a butuhpa chhao pakha hmah ta y veih ei. Morrison cha anosasyh ta â ngiachhie kaw ta, Khazohpa lâta nô-una bie nata a palôh pasana bie reih ta, cha nota Abeipa tawhta a palôh liata bie a vaw tlôpa cha, “Morrison y, President Roosevelt cha a khinarâh avaw tlôpa a châ. Nâ deikua cha na khihnarâh a kaw ngia mâh va chi. Na khihnarâh na kaw ngia nohta cha President Roosevelt a dytuhpazy hlâta nâma cha dytuh awpazy cha alie za hluhpi ta ama cha dy aw” tahpa ta. Cha rakha tawhta cha Khazohpa lata nô-u bie a reipa a ngiapachhi ta, âlyna mothlih cha ti hawhta a loh ngâ kaw tahpa a châ.

Missionary Morrison cha America râh New York a tlô noh ta cha nawh kaw hra sala, vâ Zerusalem, kyhpachâna khihpi a tlô nohta a rôhnah nawpazie heta angiapâtuhpa zydua tovyuh awpa a palâsa pasia kaw.
He Missionary Morrison ta New York khihpi angia nota a nawhnazie nata nohhro ta a rôhnah nawpazie heta hmo hluhpi maniah a pachu. He lei liana heta riethei sipasapa ta viavi tuh hrei sihla, nohhro chhazaw khih a vaw deih tita cha Vâlyuhchâpazy pahyna rôhnahpa liata rôhnah ngaitapa ta maniah vaw dy aw ei ta, hmialâ a sie tuapa kyhpachâpenawhzy nata lyna kipa hneipa ta eimâ tyhpakhy nawpa daihtizy pachâna hluhpi eina pahneisa. Chô lâ saipa ta Bible bie nahthlie tua suh u.

“He liana heta khihpi sôhpahlôpa hnei tlôh lei khâh pi ta,khihpi a vaw y awpa cha eima tlua. Keimo la eima khihsana cha avâ liata châ tlôh ta” Heb 13:14; Phil.3:20.
Vârâh cha rietheipazy râh a châna â lâna cha ahneirôhpa nata sipasapa Lazara aduana su tawhta vârâh cha rietheipazy râh a châna a palâsa. Lk. 16: 19-30.
Ryuto a rao theileipa Krista thisaih zawhzi ta to awpa cha khatlu ta rôhnah aw ta, khatlu ta angia sualuah aw vâ ma!
Vârâh cha rietheipazy râh a châ tahpa biepipa hmâpa ta sermon ei ropa a reihtuhpa zydua chô liata Abeipa Zisu Krista ngiachhiena y mawh sy. Amen.

Comments

comments







Tags: , , ,

Comment using above Facebook Comment Box.