REV. C.THALAI HNENA LEHKHATHAWN UAL-AU

REV. C.THALAI HNENA LEHKHATHAWN UAL-AU

From: Laicho Nôtlia

Krista chhiahhlawh rinawm,
Rawng i bâwlsak Krista Isua hnena i haw hmain, i tisa mit ngeia i chhiar ka duh tlat avangin he lehkha hi ka rawn thawn che a ni. Thih hnua chanchin a chhia a tha pawh nise, insawi ai chuan, dam lai ngeia sawi hi thaa ka hriat vâng a ni e.

‘Ka Khualzinna Ram’ tih lehkhabu i ziah, duhsak taka min pêk kha vawi hnih ka chhiar chhuak a, ka chhiar nawn leh ngei ka beisei. Khawvel hi bo lova ala awm rih zelte a nih ngai chuan thangtharte pawhin chhiar ve zel hlawm se ka ti hle mai. I rawngbâwlnaah Rinawmna Nun, Thuawihna Nun, Inngaihtlâwmna Nun, Hmangaihna Nun leh Pastor nih inhriat chianna Nun zawng zawng hi i fawmkem vek hian ka hria a, a ropui ka ti hle mai. Chanchin Tha ngaithla tur te, a fakna hla sa turte leh a hnena tawngtai tura sawmna (Dar vawtu) hna atanga tan a, ‘KTP hruaitu ah, Tual Upaah, Village Pastor atanga Kraws sipaiah kaisang a, rei pawh a rial hmaa Burma (Foreign) rama Chanchintha hril tura tirh nghal i ni a, thuawihna Nun avanga nangmah tê chauh pawh ni lova, i khingphel (nupui) nena in leh lo, chhung leh khat leh i ram Marara, i han chhuahsan mai hi Abrama leh Saraii te nupa kha ka han mitthla a. Rev. Chhôhlei’ab a thlahna che thu, “I khaw lam ata leh i laichinte ho zing ata leh i pa in ata chhuak la, ram ka la entir tur che lamah kal rawh” (Gen.12:1) tih nen i inhmeh takzetin ka hria. Kum 1955 ah Pastor atana nemngheh i ni a, kum 49 chhung Pastor hna thawkin, kum 2002 ah i lo pension ta a, vawiin ni thlenga min la dampui hi lawmawm ka ti tawkzet a ni. I Pastor pui, Reverend 24 ten Krista hnenah an hawsan vek tawh che a, nangmah tê chauhva he lei ânchhedawng rama kawppui pawh nei tawh bawk si lo va hun i han chhiar thin hi khawhar intiin, chul ram thuva ang maiin i lungte pawh a leng ve thin ngei ang tih ka ring a.

“Ka hmaah lui râl khaw mawi chu a awm,
Thlen ka nghâkhlel khawpui mawi chu;
Lungduh zawng zawng an kimna hmun,
Hmuh châkin ka thlir bâng thei lo,”
tih hla hi a rûkin luaithli i lo nûlpui ngei hian ka ring che asin!
Tirhkoh Paula’n, “Thu chu hril rawh, a hunah te, a hun lovahte pawh bei zel rawh” a ti angin Pastor hna i thawh chhung chauh pawh ni lovin, i pension hnu thleng pawha Chanchintha hrilh bânsan zai rêng rêl lo va, Sermon engemawzat i ziak a, i sem a, i sawi bawk a. Chanchin Tha hi i dampui a, i thihpui dawn chu a ni a, aw! ava ropui tak em!! Vana i ro khâwlkhâwm hi engzat tak ni ang maw? He lei ramah hi chuan e, lu nghahna tur in leh loi, khawsakna tur sum leh pai, Pastor dangte angin nei ve lo mah la e, chunglam atanga lo thlîrtu che van mipui chhiarsen lohte chuan, ‘hausa ber’ an ti ngei ang che. Ram hmangaihna nei tak tak lo va, inhlawh Politician thenkhatte nun zir (copy) thin Pastor thenkhatte chu an kohhran Berâm rualte enkawl leh châwm a hnêkin tunlai khawvel nawmsakna leh sum leh pai ngainatna chuan an rilrute a luah khat ta vek a. Dema’n kha’ng ang rilru a put avanga Tirhkoh Paula a kalsan dante kha rilruah a lo lang a (2 Tim.4:10).

Nang erawh zawngin, a kotu che i hriatchian avangin April 3, 1955 ah Rev.A.B.Lorrain Foxall’an a ordained che a. Chuta a thurochhiah, “Vawiin atang chuan Pastor ka ni tawh tih hi theihnghilh ngai suh ang che” tia vawi hnih ngawt a hrilh che khan, kum 49 Pastor i nih chhung zawng leh vawiin ni thlenga i Nun hruaitu a nih thu i sawi kha ropui ka ti hle bawk. Kum 49 chhung ke lâwngin bial i fang a, thla hnih dawn dawnte i thang thin a (Tunlai Pastor thenkhat, Motora bial fan, zan hnih/khat riah pawh an peih mang loh laiin) Fûr leh Thâl, ni sa leh ruah sûr, tui lian leh kawng hnimten an thulhtir pha chuang lo che a. A changin riltam, tuihal, dang ro leh tâmchhâwl, zan men rei, thawh hma ngai bawk siin i hun zawng zawng i hmang a, loh theih loh avangin hlau leh thlabâr chung chung pawhin tuilian i kân a, a lên che a, mahse a tîrtu che chuan i bânah kaiin, thihna i pumpelh a. Leimin pumpelh hman turin a kaihruai che a, sakawlh lakah a venghim bawk che a. I Pathian chu Daniela leh a thiante, meipui leh Sakeibaknei laja chhanhimtu bawk kha a ni e. Kum 1962 a Chanchin Tha i hril avang Burma sorkarin lung inah an khung che a, hun engemawchen lungngai leh mangang taka i awm hnua mak tak maia chhuah i nihte kha, Vantirhkohina Petera, tân in ata a hruai chhuah (TT.12:4-11) nen khan danglamna a awm lo ve. I rawngbâwlna chanchin ka han chhiar hian ka hnuk a ulh hial a, mahse, i haihawtzia thu ka chhiar thung erawh chuan min ti nui leh bawk a nih chu.

Rev. Liangkhaia’n, “Pathian kohna hre chiang lo va Pastor hna vawn chu, hna duhawm lo ber a ni” tia a sawi hi a dik takzetin ka hria. I thusawi, “Pastor hna hi chhiahhlawh hna a ni a. Chhiahhlawh chuan a pu thu chu a kawi-a ngîlin a zâwm mai tur a ni a. A hnial chuan a pu chhiahhlawh ni tlâk a ni lo. Paula pawhin, ‘Krista bawih’ a inti a, Petera pawhin ‘Simon Petera, Isua Krista bawih’ a inti bawk,” tia i sawite kha thuawihna nun i neihna chhan niin ka hria. Pastor thenkhat Headquarters thu hnial thin ten hei hi hrechiang ve hlawm se ka ti hle a ni. Vawiina kan Pastorte hi nangmah anga thuawihna nun nei engzat tak awm ang maw?

Pathian miten i nun an hmuh dante hi zêp chi niin ka hre lo va, a then a zâr lo târlang leh ila- Upa C.Zohupa’n, “Kan Kohhran Pastorte zingah chuan inngaitlâwm ber leh thawkrim ber a ni hial âwm e,” a ti che a. Rev.C.Rosiama, Sr.Executive Secretary, Mizoram Presbyterian Synod chuan, “Mizoram Pastorte zingah chuan Isua Krista chhiahhlawh tia koh tura zahpuiawmlo pâwl tak a ni âwm e” a ti bawk che a. Rev.Dr.H.S.Luaia’n, “Amah ang hlir hi kohhran hruaitute hi ni ila” tiin a comment bawk che a nih chu. Rev. Dr. T.Laikai pawhin, “Kan ECM Pastor tha berte zinga mi a ni” a ti bawk che. Rev.K.Lalzuala chuan, “Pastorka hriat tawh zingah inngaihtlâwmna lamah Lal Isua a ang teuh berin ka hria” a ti ve bawk. Synod leh Baptist Kohhran puipa tam takin an Comment-na che chu Pastor zinga inngaitlâwm ber, taima ber leh thuawih thei ber tih, title pathum hi an khumtir che a nih chu. Kei pawh hian i phu hliah hliahin ka hria.

A kotu che rilru tur ka han dâwn a, a lungawi hliah hliah ang tih ka ring a ni. Engtikah emaw chuan a kotu che hnena i hawhun a la thleng ngei dawn a. Chuta an lo hmuahna tur che Prokram chu ka han mitthlâ vel a, Van kawtchhuahah puanzâr (Banner) lian tâwk, ‘Rev. C.Thalai, Krista chhiahhlawh rinawm, taima leh thuawih, kan lo lawm a che, i Pa lâwmnaah lo lût rawh le” tih hi rangkachak tuia luan vekin an lo zâr ang a, leia i hla phuah ropui tak, Mara Kristian Hlabu number 339 châng tâwp ber-
“Rawngbâwlna hna ropuiber mai chu,
In leh lo te, chhung leh khatte kalsan a;
Khawvela an chanvo ai chântute hi
Lal Isua zuitu tak an lo ni”
tih kha van zaipawl chhiarsen lohten an lo remsak dawn che a, Lallukhum neitu Krista chuan Lallukhum a rawn khumtir dawn bawk che a. I hla sak ve tur thung erawh chu hei hi a nih ka ring-
“Chan tur Lallukhum aiin,
Ka ngaihlu zâwk petu (Krista);
Khua ti ropuitu ber chu,
Berâm No (Krista) a ni.” A ropui dawn mang e!!

Comments

comments







Comment using above Facebook Comment Box.