MISSION CHAKAONA PEIMAWH ZIE

MISSION CHAKAONA PEIMAWH ZIE

Rev. C. Thalai

Abeipa Zisu bie piepa peimawh chaipa cha khizaw liata thâtihpha chho awpa he a châ.
“Khizaw zydua liata sie u la, hmotaopa zydua hnohna chata thâtihpha he chho teh u.” tahpa bie he Apostol nawh hnoh deita bie piepa dei châ leipa ta, eima hnohta thâtihpha hrona bie chho thei hra awpa he bie hneina piepa eima châ hra tahpa pahno ei suh u.

Thâtihpha Chho Awpa Peimawh Zie.
Abeipa Zisu a vâ lâ a kia nohna khata he hawhta bie rôhna ngâsâpa a reih, “Thlahpa Pathaihpa cha nama chôta a vaw tlô tita hmotaotheina nama hnei aw. Zerusale liatazy, Zudia râh nata Samari liatazy kaoki taih chhaota ei bie pahnotuhpazy nama châ aw.” (Hmt 1: 8).

Zerusale tawhta thâtihpha chho awpa ta bie piena chhâpa cha Zerusale cha Khazohpa pahrâna thabypa a châpa vâta a châ. Chhôhkha he a thaona thaby su a châ hra. Chavâta chhôhkha tawhta pathao tua awpa a châ tahpa a pamosa.

Biehrai tawhta eima nathlie tua aw. Zisu cha zawpizy a hmô nata a tha pasa ngaita kaw ta, vaituhpa hnei leipa mietakupazy hawhta, ngiarohpa nata paipaza ta ama ypa vâta. Chatawhcha apachutuhpazy hnohta, “Sâ hria awpa hluh kaw ta, chahrasala hriatuhpazy ama chyh. Chavâta sâhria Beipa hnohta sâhria awpa ta hriatuhpazy a vaw tuah thei nawpa ta hiah teh u.” maniah a tah (Mat 9: 36-38).

Missionary-zy nata Pastor-zy Pahno Awpa.
Rev. Liangkhaia ta he hawhta a reih. “Khazohpa awna ao pahno leipa ta chakaona cha riethei rairunazy ama tyh nahta ama hnabeidy ta, chavâta ama chakaona ama tha a tlô’pa hawhta tlô thei v’ei. Khazohpa awna ao a thei hmeiseihpazy deikua cha riethei rairuna ama tyhpa nata pachhie pahruna amâ tyhpa chhaota chakaona rai cha, rai zydua liata rai rôhna chaipa a ma tahpa a châ.” tahpa ta a reih.

Richard Wumbrand, Romania râh liata Missionary rôhnapa cha a lei ry ft 36 a thupa liata kô 14 ama patâhpa chata he hawhta a reih, “Ei ngiapâna, ei chakaona, a tah tlôpa ta riethei rairuna, reipasaona a tyh leipa cha vâduapa nata ngiachhi a chhi chaipa nama châ.” tahpa ta bie rôhna ngâsâpa a reih.

Riethei rairuna atao hluhpa maih he Missionary rôhnapazy ama châ lymapa a châ. India râh liata Missionary panopa (2) zy cha, tilaipi ngiakâ liata he hawhta thlah ama chhâ, “Abeipa, India râh chyhsazy ta nâma ama cha reithai nawpa ta a châ khiah cha tilaipi ngiâkâ liana heta meita maniah raosao thlâh ha ei se.” tahpa ta thlah ama chhâ. Ama hrona zydua ama hlâ khai haw tahna a châ! He pano penawh hawhna heta Missionary zydua ta a pie khai theipa châ mawhsala Krista khihnarâh cha khatlu ta kawh aw ta; a ngia aw vâ ma?!!

Mission Chakaona he Nainô sô awpa Châ Vei.
Atahmâ Biehrai tawhta eima nahthlie tua aw, “Thi awpa ta chhihthapazy cha pachha la, thieh thlâh ha awpazy cha pachha thlyu teh. Nahthlie teh, he he pahno mapi na tah khiahta cha, pathipalôh khopathliahtuhpa chata pachâ aw vei tlyma?” tahpa ta Biehrai ta maniah a chho (Biesozy 24:11,12).

Thi awpa ta chhihthapazy tahpa bie heta pachâna thata eina pahneisa. He hawhta reih ei si la, pahno chyupa hawhta; Burma râh lâzy tawhta India râh lâ sahro-viachaozy, seizy, nawzy, za zuah tyh ei ta, lâpi liata ama pazi ngâ nozy ta ama nie awpa ta sibipazy pabâsa laih ei ta, a ly ngâsâ ei ta, ama thapawh ngâsâ hra ta. Anodeikua cha India râh ama za tlô nata cha thieh ei ta, ama sazy cha Bazar liata ama kezi thlah tyhpa a châ.

Cha hawhna hra chata ama thyutliapazy cha sahma nata parietheipazy sâtâ ta pataosa ei ta, ama tao ngâhainozy ta cha aly ngâsâ hra ei ta, ama lyna cha buakha dei châ ta; rei a daih leipa ta, sâtâ ta chhâzaw thina meitipo lâ ano hnohta y awpa ta thyutlia sâh hluhpi a chhi ngâhai, pachha ama ngiah ngaita.

Hla ataotuhpa heta avaw hmô pasia kaw. Na hria lei vâta, a hluhpi leidia aw ei, Aheih la, moh tua teh, chatlaina pahno v’ei. “Sâhhria awpa hluh kaw ta, ahriatuhpa ama chyh.” tahpa ropa hawhna khata thâtihpha chho awpa he a peimawh. Nainô sô leipa ta.
Atahmâ Biehrai bie eima nathlie heih tua aw. “Khazohpa kyhpachâna liana chata a pabohsa u la, chhâzaw hrona to nawpa ta eima Beipa Zisu Krista ngiachhiena cha hâ teh u. Chyhsa thokha a lôh leipa ta a ypazy cha ngiachhie teh u, thokha mei tawhtapa la para u la, pachha teh u…” (Zuda châ 21-23).

Mei ta o a kâpa nata khih a kâpa he hmô hlu kaw nata, pachâpa nata pangiasapa hlâta rarôh a y via syulyupa a châ. O na a kâ tahpa pyury eima theipa ta nata thlihpipa hawhta maniah asupa a châ! O kâpa cha dusawta ta nainô sôpa ta pua beih leipa ei ta, a chatlie thei chaipa ta pua tyhpa a châ. O kâ nota palôhrupa liata kho chaipa cha o pabohsa awpa e a châ.

Cha hawhna hra chata Zuda châ paphaopa he pachhoh ta hmah châ hrasala a peimawh ngâsâpa a châ. châh 1-25 chhâna taih vaw reih tuala, keima ei reipa nata ei ropa hlâta a cha phahnai via syulyu aw, tahpa a siapa ta ei reih ngâh. Na daihti sôhpa sie saila vaw reih tua ma y tahpa ta ei cha hrua.

Sâhriapa a daih haw.
“Nahthlie teh u, ei cha chho ei hih, sai u la lyuzy moh teh u, atahmâ tlaita hria awpa ta a maih haw.” (Zawhana 4:35). “Chatawhcha kaw moh na ta, meido râhpa hmô na ta; meido chô liana chata chyhsa sawchapawpa a lyuhpa ngô lakho a khopa ta sava tiah ngaitapa a chabapa ta a tyuhpa hmô hra na ta, chatawhcha Vâlyuchâpa hropa, Khazohpa achhyna o tawhta vaw pua ta, meido chô liata atyupa hnohna chata ao paro ngaitapa ta, ‘Na sava kha phia la, â teh; a â ti a dai ha tlôh ta; alei liata sâh khu a lo ha khuh,’ tah ta.” (Bieph 14: 14, 15).

Hla ataotuhpa heta thlahpa lâ tawhta a vaw hmôpasia kaw.
Saitua Beipa ta Kre sahdô lia,
Hriapa ta miah aw hai;
Hriatuhpazy ama chyh vâta,
A theizy lo khai ei.
Beipa mohta tiama ta hria la,
Kyhpachâ hneina chô;
Pachhana ly ypa saipa châ,
Khizaw lia phuah teh u.

Hria chatlie la, noh a tla haina,
Ama leidia hlâta;
Daihti hupona a vaw tlô hai,
Hria thei khao aw ma pi.

Missionary Reithai Tlâh ama Châna.
Phai râh bypi noh palo ngâsâpa nata ziza y leina, a ô kathluhpa suzy liata ama y thei thlâhpa lia sai hmahta Missionary nawhzy he reithai tlâh ama châpa a châ. Noh apalotupa vâta Malaria zy hluhta, chavâta ama hrona chhao taihta a pachhohpa a châ!

Atahmâ cha Missionary Skul Thâtih a châ aw.
Atahmâ khizaw liata arâpasuana chaipa cha a chuna kyh he a châ. Sawzy châ ama thai thei nawpa ta siku phapa nata boarding-zy liata ama soh lymapa a châ. Châ ama thai thei nawpa nata mongyu reih (English) he khizaw liata reih abei chaipa, khizaw reih a châpa vâta mongyuh reih thei awpa he ama chhuah chaipa a châ.
Missionary nawh siku deikua cha ânano ngâsâ! Khizaw liata a chuna asâh chaipa cha UNIVERSITY châ ta, Missionary nawhzy achuna siku deikua cha Zisu Krista apahno leipa nawhzy nata chi nah pho â lâ pha leipa râh raoh râh chawhpazy liata apahrâ penawhzy reih a chu ei ta, hlabu zy, Biehrai zy ama reih ta taopa ei ta, he he Missionary-zy ama chakaona ama nanona nata ama rôhna na a châ. Ama siku cha kalvari siku a châpa vâta a vâ nata azaopa a ma châ. Alei liata chyhta hmah châ hrasala vârâh liata cha a lai chaipa châ aw ei ta, ama rôhna chai ha aw. Thlahpa leidiapazy Zisu Krista pheithaby liata a vaw dikheituhpazy cha Awhsi hawhta chhâzaw ta ama khaih aw (Dan 12: 3). Haleluia Abeipa eima Khazohpa cha chhâzaw nata chhâzaw ta reithaipa ta y mawh sy. AMEN.

Atahmâ Khizaw Hmo yzie.
Biehrai bie a vaw tlô ngâhai, “Cha tina chata riethei tao awpa ta cha patusa aw ei ta, ama cha thieh hra aw ei…” tahpa ta Abeipa Zisu ta a reih chhielie hawpa a châ (Mt 24: 9). Pahno chyupa hawhta atahmâno daihti he khizaw su hlupizy liata Awnanopa taolana a pô via lyma, Missionary châbu ropa vaw reih nahta, Bazar lâ hmo chalei awpa ta puapazy he ngiaroh a chhi ngâsâ! Khâpa nohta ma Bomb maniah ama thy thlu aw tahpa pachâpa ta eima thlahlôh thei vei tahpa ta a roh.
Atahmâ he khizaw su hluhpi liata Krizyhpa taolana ahluh ngâsâ, ama hrochhôhta Lô O ama patâhpazy, ama rao, zaozi ta ama chhawhsaopazy, ama pakhyna o liata bomb ama papa thlupazy, chadei chhao châ leipa ta atahmâ he Mâty zy thisaih a lo ngâ hai!

Abeipa ngôsapiazy ama lo khai hlâna heta Mission chakaona thapi phia viapa châ mawh sy.
He hla he eima biepipa baotuhpa châta-
Krizyh naw hrala mô kh’u,
Leidiazy tluama pima;
Beipa bie maniah pie chhôh,
Eima y thlâthli awma.
Sie ula, hria lymâ t’u,
Tlua la, leidiapazy cha;
Molei zohna hry tawhta,
Vâ kyhchhi lâta vaw chhi.
A kyh eima pachâ ma?
A bietai eima zyhma;
Hneina pie eima tai ma?
A awna ngia mapi ma.
3
Mission chakaona peimawhzie tahpa biepipa hmâpa ta tloh leina chôta ei ropa he, ei ropa hlâta apha via syulyupa ta areituhpa zydua chô liata Abeipa ta byhnâ pie mawh sy. AMEN.

Comments

comments







Tags: , , ,

Comment using above Facebook Comment Box.