KALVARI NGIACHHIENA TILAIPI

KALVARI NGIACHHIENA TILAIPI

Rev. C.Thalai

Vahtie zydua cha tilaipi tla ei ta, châhrasala, tilaipi cha bie thei hlei vei. Biechhohtuhpa 1:7. Khazohpa ta hmo zydua a taopa he yzie hnei kawpa ta a taopa sai ama châ. Chavâta Hlazy rohtuhpa heta Khazohpa ku zôthai zie nata a rôhnahzie he hawhta a vaw phuah.

‘ABEIPA cha Khazohpa rôhna ngaitapa châ tlôh ta; Khazoh zydua chô liata abei rôhnah ngaitapa a châ. Ano ku liana chata alei su a thu ngaitapa zy cha y ta, Tlâh laki a sâh ngaitazy ano eih châhra ta, Tilaipi he ano eih a châ. Ano taopa châ tlôh ta, alei hipa chhao he ano ku ta a taopa a châ. He bie chhôh lia sai chhao he hmahta Khazohpa cha zo tlâh, angiapâtlâh nata ngâ tlâh a châpa a châ.’ Hlazy 95: 3-5 moh tua.

Tilaipi cha ei hmô haw hra: 1964 liana khata Awnanopa press chalei awpa ta Puhpa Tialo nata Sabyhpi tawhta Rangoon lâ sie pi ta, Rangoon liata noh 9 châh pi ta, kyh hluhpi liata maniah buabâkheituh chaipa cha Puhpa Tohra, Hlôma khihpa, Rangoon liata sawhkhâ rai a hriapa a châ. A chô liata eimâ ly ngâsâ hra. “Pastor y, Rangoon cha na za tlô pachhâna chhao a châ thei thlâh ha mâh ta” tahpa ta Rangoon chhôh su peimawhpa zydua eina chahryhkhei khai haw hra, a chô liata ei ly hmeiseih hra.

Puhpa Tialo cha press a kaw phaoh awpa a châpa vâta Balyh ta kaw sie awpa châ ta, kei deikua cha Puhpa Hlaochia, Burma pheisaih bai 3 pa (Saiko khihpa) nata Rangoon tawhta Akyab lâ dawh 2 chhôh tlai a zaw pi ta, Tilaipi cha ei nahkhaohta ei theipa nata ei pachâna hlâta lai via syulyu haw ta, notla lâ zydua cha khâpa hmahta hmô awpa y khao leipa ta, ti sai ta mo taw chhâna taihta, ti sai ta a bie khai thlâh haw.
Tilaipi chô liata eimâ zaw laih ngâ nota he hla he ei sa laih lyma.

‘Tilaipi hawh ngiahchhiena he,
Tilai hawhta zawngiahna
Hrona bei pathaih thina he,
Ei hro pachha ta a thi,
Ahy a ngiachhie mypa ta
Reithai lei ta a y aw?
Chhâ leipa ta vâ y chhôhta
Ano cha my aw vei ei.’

Zawhtheina tawhta Tilaipi za sai na ta, Khazohpa kyhpachâna a laizie nata a kawhzie thata ei pahno. Rev. K.Teitu biereipa chhao eina patheisa ngâsâ. He hawhta a reih- “ Nô, angiapâ chyhpa sahlao zydua he Tilaipi, Khazohpa hmaotaotheizie nata a rarôh yzie za hmô khai tua mawh ei sala, Khazohpa cha amâ ngiapâ khai thlâh ha aw na” tahpa ta a reih.

Cha leipa ta ei palôh liata a vaw y heihpa cha he hawhna heta a vaw y. Khizaw liata chyhsa zydua ta chysia pasu ei sala, tilaipi mel 50 a kawhpa nata â thupa lia sai hmahta pasu tiah leipa aw ei ta, doh mawh ei sala, doh tiah awpa chhao châ heih leipa aw ta, tahpazy ei pachâ.

Cha dei chhao châ leipa ta, he hawhta ei palôh liata a vaw y heih. Khazohpa ngiachhiena Tilaipi cha moleipazy angiahthaina chavah hnawhpi a chânazie a vaw y heih. Bible bie a vaw lâpazy:

“Nama moleinazy saih-law hawhta saih hra sala, dâhhaw hawhta a ngyuh aw. Saihdôhpa hawhta saih haw hra sala, mietakupa hmi hawhta a ngyuh aw” Isai 1: 18. Hla a taotuhpazy heta ama vaw hmô pasia kaw.

1. Hy khataih lia pachhatuh ta 2. Hy ei cha vâ Beipa tahmâ
Ngiaroh riethei a tao Ei molei sia nawpa
Ahmia khochhipa hmo ei byuh Khizaw liata nâ leipa ta
Ngiachhie thisai lohna Pasina hro y vei

Hy thisai ei hmô khiata cha
Ei molei puana pasi aw
Ngiaroh nôpona a lei aw
Hy na thisai liata
He hla heta Zisu thisaih cha molei pasina ti hnawhpi a châzie a palâsa kawpa a châ.
Khizaw liata chavah hluhpi y ta, ‘Thina chavah’ sai a châ thlâh hapa a châ. Beinô he chho lâta cha chavah mohpathâhpa châ ta, anodeikua cha kô chareihta Beinô liata a thipa ama hluh ngâsa tyh. Ama rizy dâhdei chhao hmô leipa hluhpi ama ypa a châ.

Tilaipi chhochhi cha khizaw liata chavah zydua amâ tyh pakhyna supipa a châpa vâta khatlu po ta a thipa hluh sualuah aw vâ eima!
Atahmâ cha hrona nata tlâhna chavah thâtih eimâ chu aw: Ahmiatua chai ta Hrohsopa Ezekiel ta thlahpa mokhaoh tawhta hrona chavah a vaw hmônazie thâtih a châ aw. “Chatawhcha ano chata ei hnohta, ‘He ti nochhi râh lâta alohpa he Arabah râh liata angia awpa a châ, tilaipi liata a ngia aw ta, tilaipi ti iahpa cha ti pathaihpa ta a pachâsa aw. Chatawcha chavahzy cha ama lohna maih liata hmohroh hneipa tota tlâhna ta hmâh aw ei ta, ngazy ama y hô aw. Tilaipi a pathai nawpa ta a lohna maihta hmohrohhneipazy ta ama hrona ta ama hmâh nawpa ta he chavah he a vaw lohpa châ tlôh ta” tahpa ta Ezekiel 47: 8,9 ta maniah a chho, bie lychhih ngaitapa a châ.

Bible tawhta hruana ao khochhihpa eima nahthlie heih tua aw: Isai 55:1 “Hy dâhphipa saih u, tizy lâna heta avy teh u, tâkâ a hnei leipazy chhao avy ula, chalei ula, nie teh u. Avy ula, Kresawti nata sâhpiti tâkâ leipa ta, a mâ leipa ta chalei teh u” tahpa ta maniah a hrua.

Kyhchhi rôhnah chaipa liata Zisu bie reipa: :Ahyrai a dâh a phi khiahtala kei lâ avy sala, ahyrai nâ ngiapâpa cha doh mawh sy. Khazohpa châ bie reipa hawhta ti hrohpa a chhôh tawhta a vaw loh aw” tahpa ta bie rôhnah ngaitapa a vaw reih. Zawhana 7:37.

Hruana aokhochhih ngaitapa: “A dâhphihpa maihta a vy ei se, a khopa maihta hrona ti he a saipa ta la ei se” Biph 22:17. Heh hla he eima biepipa a baotuhpa châta ei vaw palâsa heih tua aw.
He liata hrona ti a loh He ti he khâ a thei thlâh la,
Kalvari tawh vaw puapa Chyhsa pahnosa teh
Chyhsa tlâh nawpa ta a loh Ahyrai a doh khohpa maih cha
Ahyrai doh khohpa mai A tlâh cheingei aw tah la
Nâ Idah pasana veipa Zisu rôhna nawpa châ aw
Avy la, doh parah teh Vânawh pathaihpazy khita
Kalvary ti pasohpa kha Lyna hla ngia paryh aw ei
Na palôh lia a loh aw Paw, Khazohpa hmiakô lia
He tawhna he chhâzaw taihta
He hrona ti he a loh
Thyuheih sawzy a ti pathaih
Chhâzaw ta ama doh aw
Mietakutaw hrona pathaih
Pachhapa pasa aw ei
Idah paroh y khao aw vei
Hro theihpa ta charei ei.

Khazohpa ta tilaipi nata chavah tizy a taonazie eimâ chu heih tua aw:
Khazohpa ta tilaipi a taozie nata chavah ti zydua a taona lia sai chhao he hmahta Sermon reihthaipazy ta reih mawh ei sala, Khazohpa rôhnazie thata a lânahta ei pangiasa. He hawhta reih heih ei sih la, khizaw liata chavah laipa nata mohpathâhpa maih he bypi nata tlâhsâhpa lâ tawhta thliepa châ mawh sala, saikao a thu viapa liata chavah maih he chavah lai viapa ama châ lymâ. Tilaipi cha chavah zydua hry liata a yna su a hnai chaipa châ ta, chavah zydua liata alai chaipa a châ.

KHAZOHPA NGIACHHIENA TILAIPI

Khazohpa kyhpachâna cha khizaw nata tilaipi laipa hlâta a lai viapa a chânazie Hlazy rohtuhpa ta maniaha chho. “Hy Abeipa, na kyhpachâna zawhngiahna cha avâ taihta kawh ta, na ngiachhiena chata meihdozy khi a kaw daih” tahpa ta Sam 36:5 ta maniah a chho.Khazohpa kyhpachâna cha keimosasyh kyh eimâ pachâna hlâta kyh maniah pachâ viapa a châ. A kyhpachâna ta maniah a hniazie cha eima pohpa liata chysia eimâ kypa maniah â hniapa hlâta maniah â hnia via tahpa my khah ei suh u. A hrona chaipa maniah a pie khaina thâtih Zawhana 3:16 bie he athei thlâh ha ei suh u.

TILAIPI NATA CHAVAH TAWHTA EIMÂ CHU AWPA
Chavah zydua loh pahyna su Tilaipi a châpa hawhna heta Krista Zisu liata a ypazy cha Krista eih sai eima vaw châ haw. Ahyrai Krista liata a ypa cha hmotao thiehpa vaw châ haw ta, hmo parohpazy cha lei haw ei ta, pachâ teh u, a vaw theih haw (II Kor.5:17) ‘Ei chyhsa’ châ beih leipa cha ‘ei chyhsa’ tah aw na ta, kyh pachâ beih leipa cha ‘ei kyhpachâpa’ ei tah aw. Chatawhcha ama hnohta ‘ei chyhsa châ vei ei chi’ ei tahna su liana tlai chata ‘Khazohpa hroh sawzy’ tahpa ta a ma y aw (Rawma 9:25).

Krista nata apôhkhana: Krista Zisu angiapâna vâta Khazohpa sawzy châ khai tlôh ei chi ta…cha liana chata Zu chyhsa y hlei leipa ta, Krika chyhsa chhao y hra vei. Chaliana chata chapaw nata chanô chhao y hlei vei. Krista Zisu liana chata nama zydua ta pôhkha châ tlôh ei chi ta (Kal. 3:26-28).

Hrohsopa Isai ya a vaw reih chhieliepa- ‘Pachhana chysiazy na bu ta, siana viahpakao pasihpa ta na pahly ha tlôh ta’ tahpa bit lychhih ngaitapa Isai 61:10 bie he Zisu Krista thisaih siana ta moleina zydua maniah a khu khainazie pamosana a châ. Atahmâ cha Krista ngiachhiena Jubilee dawh pyu ngiapa chyhsa ta châta a paro haw. Haleluia!
Eima biepipa lâta angia bâ sih la-Khizaw liata chavah zydua he ama siena râh a hlapi tawhta vaw pua ei ta, a vaw loh lymâpazy ama châ. Bypi tawhtapa chavah zy, tlâh râh tawhtapa chavah zy alyu leipa ei ta, amâ chhuahna su tilaipi lia deita hmaohkhata chyhsapa hawhta amâ tyhpakhy tyhpa a châ. Amâ chhuahna supipa ama tlô hlâ lei cha riethei ngâsâpa ta vaw sie ei ta, a châhta cha nopi nohzy a vaw tlô nahta noh a sa tupa vâta kua ei ta, alei ry lâzy angia laih ei ta, sao a vaw châ nahta vaw pua heih ei ta, ama loh beih leina suzy taihta angia lymâ heih ei ta, a chhta chhochhi cha lôkâh sâhpi tawhtazy nata ngazo tawhzy amâ chhi ngâsâ. Chyhsapa hawhta bie reih thaipa châ mawh ei sala, ama rietheina thâtih reih awpa hluhpi ama hnei nahta pangiasa â chhih.

Anodeikua cha amâ chhuahna râh tilaipi ama tlô tawhta deikua cha ama rietheina zydua cha lei khai ha ta, huhieh kawpa nata chalâhparâpa ta khotalaipa ta ama y ha bâpa a châ. Chahawhna hra chata pachhapa sawzy cha khizaw rietheina meihdo zohna hryta charei chy hr’ei sih la, maniah pachhatuhpa hmia khochhihpa eima hmô tina cha eimâ lyna cha Rose hawhta chhâzaw ta a pawh ha aw. Chatawhcha chhâzaw ta Khazohpa mietakupa taw rietheina pyu ngiapa tota reithaina dia beih leina su liana chata chhâzaw ta eima pharâ ha bâ aw, a rôhnah nawpa zie cha atahmâ daihti liata Building phapa nata rôhnahpa, phusa hluhpi ta paduapa hmahta a rôhnah eima tahpa a châ khaihtala, pachha sawzy pahrâ nawpa su, khizaw tao tua no tawhta khihnarâh a chhuahdypa to awpa chhochhi cha khatlu ta rôhna aw ta, khatlu ta pha aw ta, khatlu ta ngia suahluah aw vâ ma? (Mt. 25:34)
Abeipa Zisu, cha râh hneituhpa cheingei chhaota a hnohta pahrâ awpa ta bie maniah a taih hawpa a châ. Thapha a chhih ngâsâ. Zh. 14:2,3. A chhâ chaina châta he hla he eima biepipa a baotuhpa châta ei vaw tlyh –
Krista keimo eih a vaw châ,
Vâ lia eimâ kaw tyh aw;
Va chavah liata a si pi,
Chatlaituh ngiachhiena cha.
A hneirôhna, a hneirôhna, a hneirôhna
Tlyzaw ta eima to aw (2)

Kalvari ngiachhiena Tilaipi tahpa biepipa hmâpa ta tloh leina chôta Sermon ei ropa he, ei ropa hlâta a pha via syulyupa ta a reihtuhpa zydua chô liata Abeipa ta byhnâ pie lymâ mawh sy. Amen…

Comments

comments







Tags: , , ,

Comment using above Facebook Comment Box.