EIMA NÔVAH TA INDIA RÂH EIMA PUASAI HAW

EIMA NÔVAH TA INDIA RÂH EIMA PUASAI HAW
– Rev C.Thâlai

Kô 1953 May thlâpâ liata Sabyh khih Awnanopa chhihthatuhpazy, satlia laihsazy nata nô nahzy ta miah za dy ei ta, pahânoh hmâhpa ta noh no tlai Chhaolô khih liata eima châh. Chhaolô Awnano penawh ta Pathliena Programme pha kawpa pachhuahpanoh ta, hla nata thlahchhâna ta miah pathlie ei ta, eima palôh â lie ngâsâ. Râh hro lâ a sie awpa eima châpa vâta maniah pasôh thai kaw ei ta, chakaolâhpazy ta mothlih tla ngâna chôta chibai miah amâ bupa cha keimo chhao eima palôh athata â lie hra ta, eima mothlih a tla ngâkaw hra. ‘Khizaw liata khichhai nata khitlypa dei châ pi ta, khihpi sôhpahlôhpa hnei ma pi’ tahpa eina patheisa kaw!

Programme chhâna lâ liata Biatuhpa Pastor Vasia Paw (Rev.S.Chhôlei) ta bietapa a reipa cha ei palôh na hria kaw ta, my thei va na. Pasyuna bie pha kawpa a rei tawhta Abeipa bie a reipa cha, “Na râh tawhta nata na heih-nawh tawhta nata na paw O tawhtapa pua la, râh ei cha pamosa awpa lâ na chata sie teh” tahpa bie châ ta. Khihnarâh zy, sanawh chhôhkha viasa lôhkhypazy nata eima chakaolâhpazy siesai ta, India râh eima puasai awpa cha eimâ lyna ma â sâh via ma, eima palôhliena ma, tahpa rei thei’pa châ vei.

Eima O chhôh tawhta eimâ thao nota hmobaoh tlyma, chhaichhi tlyma a phao awpa hnei leipa pi ta, phusâ eima hnei chhôhpa cha tlaw hrawh (Rs 10/-) chhao tloh vei. Sapa kawpa ta pachâpa ta cha ku ruapa tlaita eima pua thlâh hapa cha noza lâta â chhih ta, heih hmia kha a ru kaw. Atahmâ daihti thâtihpha khaihna zawzi ta hmahsiena nata a sosâhna athata y ta, dyhchhie chaipazy chhao pi ta hmo hluhpi eima hneiziezy pachâpa ta kha nota eima duasu hawhpa kha la chyhsa hluhpi châta zo chhao â chhih vei.

Thobyh sâkha (Tho ta taopa) a hâ lâ – Fit 1, a doh lâ – Fit 2-pa a châ! Chhaolô Beipa Iahmô (Ngôtlai paw) ta miah a piepa ngâlâh puakhei pi ta, cha liana chata eima hmo hneipa zydua a tlôh khai ta, Biehrai Thiehpa nata Hlabu deikua eima pôhpa liata â vao pi ta, chazy hleikhô hmo hropa hnei ma pi. He daihti nota Hlabu eima hneipa cha Rev.RA.Lorrain ta kô 1910 liata Marapa Hlabu a tao tua chaipa cha châ ta, hla 37 ngâlâh a y, cha cha eimâ phao.

Chhaolô tawhta Tisi khih za tlô pi ta, Tisi khih Awnanopa Hyutuhpa (Village Pastor) Machâ V.Khacho (Chôzo paw) nah-O liata eima tlô. Zâ ta apakhyna maniah hneikhei ei ta, pakhy bâ tawhta O liata hla nata bi eta apakyhna eima hnei pazi heih hra. Tisi khih tawhta Zyhno eimâ rie, Awnano hyutuhpa Chhôlia-O liata eima tlô. Zyhno tawhta Tisi chavah haosâ kiah pi ta, Zyhno râh padia by liata sie lymâ pi ta, Khihmuh chavah tlô pi ta, haosâ eima chaka tawhta cha Myanmar râh vaw châ ha ta, chakhâ kiah lymâ pi ta, cha tawhta Hlômâ khih kei tlô pi ta, “Maniah biatuhpa Pastor cha a lahpinô chhao ta ama nôvah ta ama vaw tlô haw” tahpa ta maniah avaw ly ei ta, kyhchhina zy miah taopa ei ta, eimâ ly ngâsâ. Zâ eimâ pakyh khai tawhta âlyna pamosa n’awpa ta hla sâkha eima sa. Eima hlasapa cha Izarel sawzy tilaipi saihpa ama chaka nah la ‘Beipa tiahna rônah ei sa aw’ tahpa hla châ ta, zawpi âly kaw ei ta, keimo chhao eimâ ly ngâsâ hra.

Hlômâ tawhta eima y n’awpa su Sabyh lâ pangaipa ta â thao heih pi ta, Hlômâ nata Sabyh likah liata Zyki chavah eima za tlôpa cha sabyh khih SK, President K.Châchhô nata a viasa Khala zy ta miah vaw hâ thlâh ha ei ta, thopi nata viahchhâ ta maniah ama vaw dy. Eimâ ly zie reih thei ma pi. Sabyh khih eimâ ngia hlâ tawhta lâpizy liata maniah vaw dypa zawpi a hô hô ta a tyh lai pi ta, maniah ama pasôna nata maniah ama vaw dy dâhzy ei hmô nota Abeipa bie ei palôh liata âvaw lâpa cha, “Hôsana, Abeipa moh ta a vypa cha reithaipa ta y mawh sy!” tahpa he a châ. Khih â ngia n’awpa hawka liata dyna pipa ama taopa liata zawpi âvaw pôh chheih thlâh ha ei ta, aly kwpa ta maniah ama vaw dypa kha rônah tah hmeiseih na ta, ei mothlaw liata khâ a châ thlâh ha tyh. Atanoh daihtizy liata molaipa Minister zy ama dyna hlâ chhaota rônah ei tah via syulyu. Maniah ama dyna hla cha Saikao Mission Press liata a hriapa Machâ H.Khikô phipa,

‘Abei Zisu rônahna ta,
Râh zydua khaipahlie se;
He khizaw thaileina kyh liata,
Kalvari khideina hmô ei se.
Na chho chanei heih la (2)
Thlahpa Immanuel, râh thâtih;
Molei chaipa pathipalôh,
Ei novâh ru’

He hla ama sapa heta ei palôh na pahnie ngâsâ ta, ei ly tu hapa vâta athata ângiahma na ta, ei chahaw athata â mâh ta, bie chhao reih thei khao va na. Ama hlasapa cha pahâh ngâsâ ei ta, ama chanei ngâthlâhpa vâta charâ ta pachhâ thei khao leipa ei ta, Hla sa ama pachhâsa tawhta LK President Pihnô Maisô (Hiabi nô) ta alynabie reina nata thlahchhâna hnei ta, cha khai tawhta eima pahrâ n’awpa ta O thiehpa ama sapa lâ maniah ngaikhei ei ta, kyhchhi amâ chhuahnohpa pati cha O thiehpa liata dôh pi ta, kyhpachâna pati eima dôhpa tluta khochhihpa kha y thai khao sala pangiasa va na. “Na y khiah lei vâ a châ” tahpa hlabie tawhta Abeipa Zisu eima hnohta maniah â pahlao hmeiseihpa ta ei pahno. Keichhao, eima nô chhao, eima nôvah ta eimâ ly hmeiseih.

Aly kawpa ta zâ Programme pha kawpa hmâh pi ta, eima patlô liahsa tawhta maniah a di sai ei ta, eima chakao n’awpa nata y n’awpa khih liata eima O thiehpa liata eimâ rie tua chai zâ cha aly thapha kawpa ta hmâ patlô thei khao ma pi. Achhâpa cha, zâ dawh 1:00-pa rachhôh ta ziza nanopa athata pathli ta, zâcho hryta thina dawh pyu eima theipa cha a rarôh y ngâsâ. Sabyh khihpi cha pachârôhna meihdo ta khu khai ha ta, zârâh ta eimâ lyna zy pachâ na ta, no-âh ei tah ngâsâ.

Thina vâlyuhchâpa ta Izi râh liata Phirao sawtuapa tawhta seichânô sawtuapa maihta ama thipa hawhna khata (Puasaina 11:5) bie hawhna hra khata, Sabyh khihpi cha chana-ao pyu na chalih thei khao vei!

May-December, 1953 chhôh lia sai ta athihpa 70 ama y; ama thina chhâpa cha tihri chhôhpatlaipa vâta a châ. Sabyh beipa Matha sawnawh 2 – chanô thyudyupa pano ama thi hra. Chavâta, Sabyh khih cha noh a chhi khao leipa hawhta zoh ta, a zohkaluh thlâh haw!

He thina rarôh y ngaitapa liata atanoh taihta ei my thei leipa cha, nô pakha, a sawchanô laihsa dawpa, chhithai ngâsâpa cha thi ta, he hawhna heta a sawchanô ri chô liata chaphôhtu ta; he hawhna heta :

“Nunu y Saza nô nah paw, Pastor Thali nata S.Ngôdo kaw tlô aw ei ta, Thâtihpha hron bie sôh ngâsâpa maniah kaw phaopa aw ei ta, tahpa tan â ngiatiah leipa kha, atahmâ cha kaw tlô haw bâ ei ta; anodeikuacha ama hmia hmô thei khao vei ei chi hih!”tahpa ta a sawchanô ri chô liata a bâh pazawh ta, cha chaimâh ta. Keima cha ari kiah liata atyuh thlâh ha na ta, eima mothlih cha lôkâh ti pazôpa hawhta a loh ngâthlâh haw! He nota ei palôh liata hla avaw lâpa cha he hlâ he a châ,

‘Kalvari lia na ngiachhiena cha,
Pathâhsa la khizaw nah râh zydua;
Na chatlaipa khizaw chyhsa,
Thi zohna lia ama charei
Beipa Zisu kyhpachâna ngiachhiena,
Paluahsa la chito hry lia;
Chyhsa palôh molei chiehpa,
Na moh rônah reithai sa ei se
Eima râh pachârôh zohna lia,
Thâtihpha ahy chho aw Beipa;
Maw nah chho nâma moh sôhpa,
A châhkheituh hropa y vei’
tahpa heta ei palôh liata bie avaw reih pathuh kawpa ta eina pahnosa.

“Sâh hria awpa hluh kaw ta;châhrasala ahriatuhpazy ama chyh” tahpa bie he phaohri hawhta eina vi thlâh haw. (Mat. 9:36-38)

Comments

comments







Comment using above Facebook Comment Box.