CHHÛNGKAW SIAMTHAT NAN MITTUI SÊN A NGAI

CHHÛNGKAW SIAMTHAT NAN MITTUI SÊN A NGAI
– Rev.C.Thalai

Mittui tla chunga tuhte chuan hlim takin an ât ang. Tap chungin buh chi feh chhuahpui mah sela,an buhphalte kengin hlim takin an haw leh ang.Sam 126:5-6. He thu hi Bible tawngkam duhawm tak mai leh thawhrimna rah lawmawm tak seng tur, rah chhuah tur sawina a ni. Israel hote chuan chho kalna hla an ti thin a ni.

Kawng chho taka kal hi hetiang hian sawi dawn ta ila; kan hriat theih angin kawng chhe tak maia kal chu ni a sat phei chuan a hrehawm zual bîk a ni. Amaherawhchu kawng chho han kal zawh hnua zâwl nuam tak mai leh thingbuk hlim hnuaia han chawlh a, chutah thlifîm dai raih mai a rawn tleh hiau hiau mai han dawn chuan kan hah leh hrehawmna zawng zawng leh kan thlantui zawng zawngte a lo hul vek ang hian, kan Bible hian mittui tlâkna piah lamah hian lawmman a awm tih min hrilh a ni.

Mittui awmzia: Tahna leh mittui hian awmze thûk tak mai a nei a. Awmze awm lovin mittui a tla ngai hauh lova. Hmangaihna leh inkûngkaihna awm lote an thih niin mittui tlâkna leh tahna a awm thei lo. Kan thian kawm ngeih êm êm te thih ni leh chhûngkhat laina, thisen zawmte thih ni ah erawh chuan inzirtir ngai lovin tuihna nei ang maiin mittui a luang thei a ni.

Tunah Tirhkoh Paula’n Kohhrante a ngaihtuah avanga mittui a sên dân chungchang lo zir phawt ila. Ephesi Kohhranho a chhuahsan dawn khan hetiang hian a sawi a, “Chuvangin ngaihven rawh u, kum thum meuh mittui tla chunga a chhûn a zâna mitin zilh ka bân loh kha hre reng rawh u” (T.T.20:31). Paula chuan amah a kal chhuah hnu chuan chinghne kawlhte an lo chhuak ang a, a zirtirte chu an zuah lovang tih a hriatin a lainat hle a. Chuvangin kum thum chhûng mittui nena rawng a bâwl thu mih hrilh a. Paula chuan Kohhranhote a hmangaih avanga a mittui tlâknate chu Kohhranten an hre reng a, an tawngtaisak a, an ui êm êm a ni tih T.T.20:36-38 ah kan hmu.

Tunah chuan Bible atangin mittui tlâkna chhante ilo ngaithla teh ang. “Hengte avang hian ka tap a, ka chhîngmittui tui ang a luang e” (Tah hla 1:16). Aw Lalpa, ka tawngtaina hi ngaithla la, ka auhnaah hian beng chhi la, ka mittui tla hi ngawihsan suh ang che (Sam 39:3). Ka mittui chu chhum lo chat lovin a tla a, Lalpan van atangin min thlîr a, min lo hmu reng thin. Ka mittui hi a chhûn a zânin ka chaw a ni. Sam 42:3. Ka mit ka tah chhe zo va, ka kaw chhung a buai zo ta, ka thinlung a inleihbua a, ka fanute boral avangin. Tah hla 2:11. “Aw Zion fanu, aw ring takin Lalpa chu au rawh. I mittui chu a chhûn a zânin luipui angin luang rawh se. Châwl lo la, i mittui pawh hul suh se.(Tah hla 2:18).

Tunah chuan mittui thiltihtheihzia Nehemia chanchin atangin kan zir hmasa ang. Nehemia hi lal a ni lo va, Puithiam a ni bawk hek lo va, zâwlnei pawh a ni lo. Lal Artezerzia Grep Uain petu a ni a, chi leh kuang lainatna nei mi a ni. Juda ram atanga lo kalte hnenah chanchin a zâwt a, an chan chhiatzia te, Jerusalem kulh chim thu te, a kawngkhar a kâng tihte a hriat veleh a tho thuai a, a tap a, ni engemaw zat lungngai leh chawngheiin a awm a, Lalpa Pathian hnenah a tawngtai tih kan hria (Neh.1:2-4 en rawh).

Unaute leh chhungkua a lainatna avanga mittui tla chunga a tawngtaina chu a hlawhtling hle a, Lal Artezerzia hmaa inlan tur chuan hlim leh lâwm hmêl pu chunga inlan tur a ni a, lungngai hmêl pu chunga inlan chu a hna atanga bân leh chawlhtir hial theih a ni a, chu chauh a ni lo, a nunna pawh lâksak theih a ni.

Nehemia erawh chu a unaute chan chhiatna avang leh Jerisalem a chhiat thu a hriat avangin a lungngai hmêl chu a thup lo va, lungngai hmêl pu chunga a inlan avangin Lalpan a tawngtaina a ngaihthlâksak a, a hna atanga bân chu sawi loh, Jerusalem siam that leh a dilna bâkah vêngtu sipai pâwl khat, lal chuan a pêk belh zâwk a ni. A tawngtaina hlawhtlinzia mai chu, chawlhkâr thum chhûngin Jerusalem chu siam that leh a ni. Nang leh kei pawh chhûngkua keh chhe mah sela, mittui tlâk avangin Nehemia’n Jerusalem a din thar leh ang khan lungngaihna leh lainatna mittui nen tawngtaina chu engmah lo a nih i ring suh ang u.

Tunah Juda Lal Hezekia chanchin kan zir leh ang. Hezekia chu thi lek lekin a na a, chutih lai chuan Zawlnei Isaia chu a hnenah a va kal a, “Lalpa chuan heti hian a ti, ‘I chhûngte khawsak dan tur rêl rawh, dam chhuak lovin i thi ngei dawn si a’”, a ti a. Chutichuan, Hezekia chu bang lam hawiin a let a, Lalpa hnenah a tawngtai a, a tap ta zawih zawih a. Lalpa thu chu Isaia hnenah a lo thleng leh a, “I tawngtaina kha ka hria a, i mittui tlâkna pawh ka hmu a, ngai teh, i dam chhung nite hi kum 15 in ka tisei ang’ a ti a. Isaia 38:1-6. Hezekia chu a sualna avanga a inchhîrna mittui chu Lalpan a zuk hmu a, kum 15 a belhsak tih Isaia 38:5 ah kan hmu a ni.

Chhiartu duh tak, nang leh kei hian kan chhungkaw khawsak rêl nan eng chen nge hun kan neih dawn kan hre hauh lo mai. Chuvangin chhungkaw kim lai hun hlu takin min liam san hma hian chhungkaw maichâm din theuh tawh ila: Chhungkuaah Lal Isua Krista thu neihtirin i Lal tir theuh tawh ang u (I Pet.3:15).
Tunah Zawlnei Jeremia chanchin a ni ang. Jeremia chu a dam chhûngin lâwmna nei ngai lo, ‘Zâwlnei khawngaihtlâk” an ti thin.

Zâwlnei Jeremia mittui tlâk tamna chhan chu Israel faten Pathian nung vahbosan a, milem an biak thin vang leh a thupêkte an zawm duh loh avangin Babulon salah an nula leh tlangvalte leh mi tam tak an tân avangin a mittui hul lovin tuihna ang maiin a luang reng mai a ni (Tah hla 1:16).
Chuvangin a lehkhabu hming atan pawh “Tah hla” tih a ni. Mittui leh tap thawm chu Lalpa Pathianin a ngai pawimawh a ni. Chuvangin, Sam ziaktu pawhin hetiang hian min hrilh: “Lalpa’n ka tap thawm a hre tawh si a” tiin (Sam 6:8). Mittui hi thil hlu tak a nihzia a lanna chu Lal Davida nunah a hmuh theih a ni. Mittui hlutzia chu hetiang hi a ni.
“Ka mittui hi i savun pengah chuan thun ang che. I lehkhabuah a chuang hlawm lawm ni?” a ti a ni (Sam 56: 8). Pathian thu zawm loh leh ngaih thah hi a hlauhawm hle a ni.

Heng Pathian lehkha thu pawisa lo chu ânchhedawngin awm rawh se. Jeremia 11:1-3 a kan hmuh angin, Israel fate chu an thu awih duh loh avangin Babulon salah an tâng vek a ni.
Chutiang bawk chu tunlai kan dinhmun pawh hi a ni a, ngun taka kan ngaihtuah chian a tûl hle a ni. Hetiang taka chhûngkaw chhiatna chhan leh ram a chhiatna chu Pathian thu Bible ngaihthlâk peih loh leh ngaih thah vang veka chhia a ni. Hman lai Israel Babulon sala an tâng vek ang khan tunlai hunah pawh hian Bible thu ngaipawimawhlo apiangte chu Setana bawihah an tâng ang a, mitthite khawpui Seol, chatuan hremhmun meidîlah an kal mêk zêl a ni.
Chuvangin in chhûngkaw kim lai hun hlu leh duhawm a liam hma hian chhungkaw maichâm din la, tawngtai leh Bible chhiatna hun nei lovin i hun tha a liam palh ang e.

Tap thâwm ri: “Babulon lui kamahte kan thu a, chutah kan tap thin” an ti a. An inchhîr a, an tap aw chuan Lalpa Pathian beng a thleng a, tichuan, Lalpa hnen atangin thu a lo thleng a, Jerusalem tahna leh rûmna khawpui chu lâwmna khawpuiah a chang leh dawn a ni tih Isaia 65:19 ah ziak a ni.
Jerusalem chhungah chuan hlim takin ka awm ang a, ka mite chungah pawh ka lâwm bawk ang; a chhûngah chuan tap thâwm hriat a ni tawh lovang a, tap leh rûm ri pawh hriat a ni tawh bawk lovang. Isaia 65:19. Thu lâwmawm tak atangte hian Jerusalem tahna leh rûmna khawpui chu lâwmna khawpuiah a lo chang ta a ni.

Mittui leh tahna thiltihtheihzia: Zâwlneite mittui mi thianghlimte tahna thiltihtheihna chu hetiang hian sawi dawn ila. Vanah khawpui ring takin a lo ri a, leihnuai thlengin a nghawr vek ang mai hiam sual simna leh inchhîrna au thâwm chuan van Jerusalem khawpui a nghawr nghîng thei dawn a ni tih i hre reng ang u.
Chhiartu duh tak, in chhûngkuaah harsatna chi hrang hrang awm thin mah sela, rilru thuhnuairawlh leh inngaitlâwmin, thinlung kehchhia leh inchhîra simin, chhûngkaw siam that nan mittui nen Lalpa i auh loh chuan i chhûngkua a dam thei tawh lovang.

“Mittui tla chunga tuhte chuan hlim takin an buhphalte kengin an lo haw leh ang. Tap chungin buh chite feh chhuahpui mahse, an buh phalte kengin hlim takin an lo haw leh ang.”
“Chhûngkaw siam that nan mittui sên a ngai” tih thupui hmanga ka ziak hi Lalpa’n chhûngkaw tluchhe tawh zawng zawngte siam that leh nan malsâwm rawh se.Amen.

Comments

comments







Tags: , , , ,

Comment using above Facebook Comment Box.