CHÂHNAMEI PAZYPA A PHA LEI ZIE

CHÂHNAMEI PAZYPA A PHA LEI ZIE (Mara Reih Sermon)
Rev. C. Thalai

Biepipa lâ eima ngia hlâta châhnamei seichâna liata ei tâhna (Testimony) ei vaw palâsa tua aw.
Pastoe rai eihria hlâ tawhta châhnamei he a kho ngâsâpa châ nata, Burma râh liata ko -20 pastoe rai vaw hria na ta, Burma marâpazy he chyhsa pasô thai kaw eita ama veih a seih ngâsâ tyh. Pastorzy pasô kaw ei ta KTP nawhzy ta châhnamei sahria bie daihma na taihta maniah pie tyh ei ta, cha chhao cha thlai apazy khai thlâh ha tyhpa ei châ.
Châhnamei ei zo na zie ei vaw palâsa lyma tua aw…Pati nie khai nata ei tao tuahchaipa cha mei pazypa he a châ. A hnôla tawh chhochhi cha naparu via lyma ta zâ eimô chy zy a zia hma chhaota ei vaw pazy tyhpa a châ!! Châhnamei heta haipa bie chhao eina pareisa!! Ei kaolahpa Pawlynô S.Ngodo (L) ta khapa ma na tah?na tahta, ‘ei charei’ tahpa ta ei chhy tyh, châhnamei vaâta khiluh nata khichao ei padaipa chhaota ‘ei charei’ tahpa ta ei chhy tyh. Bible ta “Hai hmâpazy cha vârâh angia thei leipa aw ei ta, I zy, dyuthaipazy, apheihmapazy, lianycheipazy, nohthlahpa a chhypazy, hai akhopazy nata haihmapa” maih cha ama tovyuh awpa pha leipa Bible ta Eph.22:15 na liata maniah a chho.
Châhnamei seichâna liata ei tâh nota cha keima khozie ta y thei khao vana, Achhyna o lia taihta bie eina hnei hapa a châ. Apakhyna o ei ngia chyta châhnamei ei patlô hmaleipa cha diahpai liata tei nata pakhyna bâh pihta ei kawpuapata nata diapai liata ei zie pa cha la para nata eipazy hei tyh. Chadei chhao châvei!!! Khiliah liazy ta châhnamei tlôna seih viapa ei hmô khia chyhsa moh nata ama y vei khia cha ahua para nata ei pazy thlâh ha tyh. Matu (Khumi) na zy ta Bei pazy ei ta niepâ eita ama lapi, sawnahzy ama my thlah hapa haw tlaita châhnamei ta eina pabuapa a châ. Keima tluta châhnamei akhopa kha ama hlu tu nata pangiasa vana.Châhnamei pazypa ei bâsai thei leina chhâpa cha ei hawti no tawhta ei vaw tao hawpa vâta ei sapa nata thisai liata chi a vawtu hawpa vata tlaichhaina avaw y hawpa a châ. He yzie tawhna heta hawti daihti a peimawhzie tha ta eina pahnosa.
Hlano Izrael sawzy chhao kha Izi seichâna liata kô hlupi ama tah tawhta Tilaipi saipa vaw tlô ei ta, Khazohpa hmo rôhnapa pachhana avaw taopa chy ta Izi pheisai ta a vaw chadai ei ta, ama pyu ru ngâsâpa ama thei nata Mawsi maochhie ei ta, ‘Izi lâ kua ta Izi chyhsazy chakao ei sih la tlao a pha aw’ ama tahpa hawta keimo chhao sahmazy, kuvâzy, pa-ô pazypa a tai pita eima tao thlâh hei tyhpa a châ. ‘Atahma he daihti ryhpaohpa a châ, atahma he pachhana noh cha a châ’ tahpata Abeipa ta maniah ahrua ngâ hai. (2 Kor.6:2 ). Na daihti sôhpa ta a cha khôsai hlâta na tao tyhpa tao khaolei awpa ta, pa ô pazypa seichâna tawhta pua awpa ta Abeipa ta a cha khoh!!
Châhnamei pazypa ei taih theileizie ei vaw rei tuah aw….Lôlei (Serkawn) liatazy nata Aizawl liata Missionaryzy ry liata Khazohpa bie avaw chu lai hra nata eima hyutuhpazy ta châhnamei pazypa phaleizie he hawhta maniah ama chho tyh, “India râh tawhzy ta eima hyutuhpenawhzy kaw tlô tyh ei ta, hyutuhpenawhzy hmiakô liata châhnamei pazy ngapazy he a ngia vei, Khazohpa bie a chupa châ tlôh ei chi ta,” maniah ama tah tyh. Chahrasala ei palôh na pahnie hlei vei, eima hyutuhpenawhzy hmiakô liata pazy leipa nata ama hmôleina liata ei pazy thlâh pyly tyh. Pastor meipazypa ama y thlâh ha tahpa ta keima sasyh ta thai ei pachâsa tyh!! Eikha cha Kristian Tlangau liata pastor pakha ta châhnamei pazypa phalei zie Lyuchâpa Pawla bie reipa “Ahy sei hmata châ vei hrasala, chyhsa hlupi ei pahnie thei nawpa eita chyhsa zydua sei ta ei tao” (I Kor.9:10) na bie hmapa ta aropa hmô nata eipalôh eina pahnie ngâsâ, châhnamei ei pazypa chhao noh 2 noh 3 cha ei vaw patheih hra. Châhrasala ataih pazao thei khao heih leipa nata tha ta eina paru via ha!! Ano hro ta sôhkha sônoh ei pazy thlahpa tlai kha alie ta ei pazy hlu lymâ ha hei pa a châ. Pathleih pahru ta tao heipa cha paru via rili na tlao a châ.
Châhnamei ei pathleih theina chhâpa: Chhaolo KTP nawhta Camping pachhuapanoh eita, chaliata speaker ta na hrua eita M/S liata Counseling eima hnei nga haino ta ei palôh liata hiahrina peimawh ngâsâpa vaw tlô ta, biepipa eima rei awpa cha moleipazy pachha awpa ta kyhpachâna vâta Vâkhihpi Angelzy nata Serafizy ta ama reithai ai leipa kyhpachâna khihpi za siesai ta Bethlehe salaopiena châki liata nawh ngâsâpa ta a zia thlahpa ei palôh liata vawtlô ta, mei hawhta eina kâ ngâ kawpa hawhta ei pahno.
Abeipa Zisu cha Zaspilo nata Losôhpa chito raita tobipa khihpi cha za siesai ta, Bethlehe su nawh ngâsâpa liata a zu chhapa he eipalôh na pahnie ta, keima zaw khapa e ei siesai hra aw? Tahpa hiahrina he a vaw y. Keima ta eihmo khochaipa cha châhnamei he a châ, keima chhao atanoh tawhta cha eihmo khochaipa ei siesai hra aw tahpa bie pathluna ei tao nota ei palôh cha mei hawhta eina kâ ngâ kawpa ta ei pahno. Chhithatuhpa nawhzy lâta phua awpa kho kaw nata ei phua ngâh leina chhâpa miano (2) a y; a miakhana liata Abeipa lâ ta ei hlâ tua leipa vâta. A mianona liata châhnamei ei pathleih awpa na khokhei ngâsâpa S. Ngodo (L), Pawlynô cha Counseling nota hmo yzie chho nata a vaw ly ngâsâ ta, eima nôvah ta pakhu paneihpa ta Abeipa lâ ta alyna bie reina nata a hlâna thlachhâna eima hnei. Cha nohtawhta châhnamei seichâna tawhtapa cha Abeipa ta eina thao papua haw. Abeipa eima Khazohpa cha rethaipa ta y mawh sy. Amen.
Bietana: Châhnamei pazypa phaleizie keima tawhta ei pahnipasia ngâsâ. Mei ei pazy lichi nota cha buakha chhao chakhâ kia thei vana, ei hu a hia lymâ. Pati niepa eipakah pahâ thai hra vei, chavâta ei sapa chhao eina pazaohsa kaw. Atahma taihta mei kha vawpazy thlâh ha chy sala ei hro khao nata a pangiasa vana, ei thi ha ba aw. Chavâta, hropasi awpazy khizaw liata chhôkhazy nata pahra kho awpa na kho khiala mei pazypa he bâsai ha ma y.
Dawty na châbu ropa ei reipa liata cha he hawta a ro: :Aoma khu hmotao theizie cha Pachôh nata ama pakhopa, Pachôh cha meikhu ta kawzai ta pachôh zydua cha chôhchoh ta pahly khai ha ta a vy kathluh thlâh ha pa hawta a châ,” tahpa ama rei. Mei pazypazy châta chi a chhi ngâsâ!!
Atahma Bble tawhta eima chutua aw: “Keimo cha Khazohpa rai ahrialahpazy châ tlôh pi ta, namo Khazohpa lyu châ ei chita Khazohpa o sapa châ hra ei chita.” (I Kor.3:9). “Nama pôhpa cha nama chhô liata a ypa Khazohpa tawhtahpa nama hmôpa Thlahpa Pathaipa o a châ, tahpa pahno vei ei chi ma? Namo ei châ leipa ei ta, mâ ta chaleipa nama châ haw mahta, chavâta nama pôhpa liana chata Khazohpa palyupalih te u.” (I Kor.6: 19-20.)
‘Ahripa nata Krista chhaota khapa a ryhna ama hnei? Khazohpa nothlahpazy nata Khazohpa achhyna-o chhaota khapa a ryhna ama hnei? Keimo cha Khazohpa hrohpa achhyna-o châ tlôh pita.’ Khazohpa ta amo liata y aw nata, amo liata eicharei hra aw. Ama Khazohpa châ aw nata, amo chhao ei chyhsazy ama châ aw. Chavâta ama hry tawhta vaw pua u la, anano ta y te u’ Abeipa ta atah. Hmo pathaileipa rai hria kha u, chatanachata châly aw ei nata nama châta paw châ aw nata namo chhao ei châ ta sawchapawzy nata sawchanôzy nama châ aw.’ Abeipa ato taotheituhpa chata a tah. II Kor. 15:18.
Châhnamei pazypa a phaleizie tahpa biepipa hmâpa ta ei ropa he meipazyna sei liata a tâhpenawhzy pachha papuanawpata eiropa nata eichhuapa hlâta aphavia syulyu ta Abeipa ta byhna pie mawh sy. Amen.

Comments

comments







Tags: , , ,

Comment using above Facebook Comment Box.